ناجح اليخدم امامه                 يربح بيوم القيامه
حسين باب الله الچبير            كل بشر بيه يستجير
يربح ابيوم القيامه
ــــــــــــــــــــــــ
اية القران حجة وبالرواية اليوم احاجج
مَن عمل مثقال ذره بالحشر یلگاله ناتج
إنما الدنيا امتحان وغداً توزيع النتايج
هالدنيه فرصة للعمل- مو للمقاهي والجهل
وابليس بارع بالحيل - عنده افكار ومخارج
بالك اتضيع حياتك          حسين يضمن لك نجاتك
بس اخدمه وما تحير           كل بشر بيه يستجير
يربح ابيوم القيامه
ــــــــــــــــــــــــ
عن رسول الله محمد خبر منقول بوثاقه
حسين مني وانه منه الما رضى يعني انشقاقه
وجان كل ساعه الرسول ايزيد لحسين اشتياقه
هذا الحديث النبوي- مو فكر رجعي واموي-هذا الفكر منه ارتوي
واعلن اليوم اعتناقه
حسين مني وانه منه       يعني حب احسين جنه
گال ابو الزهره البشير     كل بشر بيه يستجير
يربح ابيوم القيامه
ـــــــــــــــــــــــــــــــــ
يروى عن جعفر الصادق وابد ما چانت اكذوبه
تگول مضمون الروايه ابن ادم التکثر اعيوبه
خل يجي لمجلس احسين ويبچي تتطهر اذنوبه
وابليس وسوس للبعض- لهاي الروايات اعترض
معذور وابلگلبه مرض - واحنه ندعي له بالتوبه
الخدمة مخصوصه لاهلها        والبعض ما يگدر الها
باچر حسين الامير                كل بشر بيه يستجير
يربح ابيوم القيامه
ــــــــــــــــــــــــ
احنه اصحاب الدليل ودينه دين الهداية
ينقل النه ابن شبيب من الرضا معنى الروايه
اليبچي لمصاب الحسين  ادموعه تصديق الولايه
آدم عصى وتاب وندم- وبحسين ربه اعليه نَعم
لحسين مطرت دنيه دم- وحده واطفاله ضمايه
لو ردت تستر عيوبك      دمعك ايطهر ذنوبك
خادم لخدامه صير         كل بشر بيه يستجير
يربح ابيوم القيامه
ــــــــــــــــــــــــ
الخدمة هاي اربح تجاره وبا المناحر نشرتيها
والتخصه الزهرة  فاز ويفتخر يم الله بيها
والحضه بهاي الكرامه لازم ايحافظ عليها
لا يستهين بخدمته- فاطمة بيها خصته
لو عثر صعبه عثرته- وطيحته اتزيد بچيها
واليگول انه اسمي خادم       خشمه لا يشيله عالوادم
عمي بس الله الچبير           كل بشر بيه يستجير
يربح ابيوم القيامه
ــــــــــــــــــــــــ
الناس هاي اتموت كلها وكلمن اينام بحفيره
لا يفيدونه العمام ولا ينفعونه العشيره
والبچه اعلى احسين دمعه ايحضره ابو اليمه ويجيره
بذيچ الحياة المظلمه-يزورونه هوه وفاطمة-
حاشاه يترك خادمه- احنين وروحه چبيره
والبچه ادموع المصابه         هوه اليوقع كتابه
ويصبح احسابه يسير         كل بشر بيه يستجير
يربح ابيوم القيامه
ــــــــــــــــــــــــ
نعيم ابو باقر الساعدي

باچر ابکلشــي ختام...يـنذبـح حـتى السلام
    والسبي يبدي الحكايه...وقصّه باجر للسبايه
                  باچر ابکلشي ختام


           شنهو باچــر لو سألــتو ابهالمــجال
           وجـه الاحسين اليجاوب عالسؤال
           بــاچــر الدنــــيه تهــدّم بــالجــبال
           وتذبح الدين ابحقدها اهل الشمال


      ينتهي يوم الحبيب....ويعله من كيفه النحيب
     كلــنه مانرضه اعلى هايه..وقصّه باجر للسبايه


            باچر ايمــنعون كــل ماي الفرات
            وتصبح الگــطره تساوي للحيات
            عالحسين اتعيل بســهام الرمات
            وتنكر المعروف اصحاب الطغات

     زينب اعلى التل تصيح.....وين طايح ياذبيح
     توصل الساعه النهايه.....وقصّه باجر للسبايه


          باچــر اركــان الســمه تهــتـز كثيــر
          ويــوم مـن الغاضــريه ايتــم عسير
          اطفال ماتــدري عليهااشراح ایصیر
          اتشوف خیل وناس ولموت المصیر


        راح تــتيتم بــنات......والــبيارغ هـاويات
        والفرات ايغور مايه...وقصّه باجر للسبايه


         باچر اسيوف العده اگبال الحسين
         توگف وشـفــراتها چــن عدها دین
         ومن ابوفاضـل تــره اتطيح الادين
         والخيــم نيـران يدويـهــا الــ لعين


      مظلمه تقدي الطفوف...ابجرت اجيوش الالوف
      كلها متعنــيه ابعــنايه......وقصّه باجر للسبــايه

        
         باچر اعيون السمه تمــطر دمــوع
         ومن عطشها ايــتام بالمحنه تلـوع
         ليلها مــظــلم ولا يحــصل شمـوع
         من عگب دوس الحوافر عالضلوع

      اويامن انوجه العتاب....وللاهل ما من كتاب
     لا معــين ولاحــمايه.....وقــصّه باجر للسبايه

هادي الامغيطي البوغبيش

الهي بحق الحسين وفقنا لخدمة الحسين

مكسور ضهره الماله خوان
و الموت ما خلاله صحبان
خليت اخوك بكربله
ما بين شمر و حرمله
بعدك يا عباس
ـــــــــــــــــــــــــــــــــ
العنده أخو ايعادل زلم يكسر ضهر عدوانه
ويضل غريب ابدنيته  كـــــلمن دفن خوانه
يا بوعـــــلي ويا غربته  ويا شـــفته الذبلانه
لا عنده اخو بيمن يهد والموت اخذ صحبانه
و الماله اخو يفزعله لو صاح
تتسلب هدومه اذا طاح
هاذ الحسين ابمصرعه
و اعيونه صوب المشرعه
بعدك يا عباس
ــــــــــــــــــــــــــــــــ
من جان ابو فاضل عدل  جانت جيوش تهابه
بس روس تتطاير تضل لو عاف سيفه اكرابه
شو هسه كلها اتمرجلت  صارت زلم بغيابه
يا وسفه وصــــــلو للـخيم واتهوس السلابه
لمن نزف دمك على الكاع
كلها على اخيك صارت اسباع
من ضل وحيد بلا سند
لا عنده اخو ولا ضل ولد
بعدك يا عباس
ــــــــــــــــــــــــــــــــ
سولفلي يا طف كربله  اعلى الكافل ونكباته
شحـــــال الاخو لمن ســــمع  يم النهـــــر صيحاته
واشلون ابو الاكبر ركض يسمع ضحك شماته
واتمدد وياه وبجــــــه وضل يمســـــح ابطبراته
وايكله اكعد يا ضوه العين
مثلك اجيبن لي اخو منين
يا النايم ابجرف النهر
يا خويه احس ضهري نكسر
بعدك يا عباس
ــــــــــــــــــــــــــــــــ
المتخوصــــــر ايرد للخيم  معناها طايح بيته
شيكل للاطفال البقت  عطشانه و متانينه
صاحت دمعته هنا يمن للساقي مترجيته
يا ام الخدر راح الخدر عا المشرعه خليته
يله استعدن ها شميات
باجر سبي  راعي الخدر مات
زينب تنوح اتلكته
واتصيح خدري وهيبته
بعدك يا عباس
ــــــــــــــــــــــــــــــــ
كامت له سكنه ابلاوعي واتكله يا والينه
يا بويه لو باجـــــــر متت  يا كــافل اليحمينه
ركضت رقيه وشبكــته وشافتها  دمعه بعينه
صاحت يا بويه ابداعتي  لا تمشي و تخلينيه
وزينب تون لو انته ونيت
معناها وحدك بويه ظليت
لو أذن آذان الضهر
يركب على حسين الشمر
بعدك يا عباس
ــــــــــــــــــــــــــــــــ
الما عنده خوان اوولد لـــــو طاح ياهــــــو ايسنده
وايصـــــيح يا خــــويه البشــــر لو طاح يوم ابشده
الله اليعينه اعلى بهاالوكت كلمن اخو ما عنده
واحسين كــــــلها امـــــــذبحه خـــوانه اويلي اوولده
من طاح فوك الكاع تعبان
سلبو اهدومه ومات عطشان
فوك الترب دمه نزف
لا واحد يحامي وكف
بعدك يعباس
ــــــــــــــــــــــــــــــــ
من طــــــاح ابو الاكــــــبر اجــــه العباس يمه ابروحه
ذبلان شــــــافه امن العـــــطش واتســــيل خوه اجروحه
عــــــباس مــــــن شاف الشــــمر ما عنده جف وايلوحه
وايشوف اخوه ضل بس الجسد حب ركبته المذبوحه
صاح انه اسف منك اهواي
ما بللتها اشفافك ابماي
كال السبط لا تعتذر
وفيت بس ضل الخدر
بعدك يعباس
ــــــــــــــــــــــــــــــــ
نعيم ابو باقر الساعدي

على نحر الحسين خل نذرف الدموع  
وا اماما        وا غريبا           
ـــــــــــــــــ
يحسين جرحك ما يطيب  اصوابه
والما يحبك خل يعيد احسابه
لومات باجر واللحد سد بابه
يكضيه بيش اويه الكبر واترابه

واليبجي عالحسين  هذا الدمع شموع
على نحر الحسين خل نذرف الدموع  
           وا اماما        وا غريبا  
ـــــــــــــــــ
للموت جمره ودمعي ما يطفيها
وامصيبتك دمعاتي ما تكفيها
هاي الخدم حيدر علي يوفيها
اليلطم ويعرك كل مرض يشفيها

صرختنه يا حُسين من تهتف الجموع
على نحر الحسين خل نذرف الدموع   
          وا اماما        وا غريبا  
ـــــــــــــــــ
لحسين عيني امن الدمع ذبلانه
مفجوع كلبي لجبدته العطشانه
حتى بشراب الماي صار ويانه
بيوم القيامه حسين ما ينسانه

كل يوم الك تصيح صرخة كلب جزوع
على نحر الحسين خل نذرف الدموع   
          وا اماما        وا غريبا  
ــــــــــــــــــ
هاي المجالس بالكرم مرحومه
وهواي ناس امن الفضل محرومه       
يجري الدمع وي فاطمة المظلومه
نواسي بلطمنه اضلوعك المهشومه

على صدر الحسين خل نهشم الضلوع
على نحر الحسين خل نذرف الدموع
وا اماما        وا غريبا  
ـــــــــــــــــــ
مفجوع كلبي المجلس اتعنيته
بدموع عيني المنتظر واسيته
دين الله انته بمنحرك عليته
حتى الرضيع لمنهجك ضحيته 

يل بالنحر فديت دين الله والفروع
على نحر الحسين خل نذرف الدموع
وا اماما        وا غريبا  
ـــــــــــــــــــ
نعيم ابو باقر الساعدي

لسان حال العليله تخاطب ابوها

حنيت ولدارك اجيتك
يوسفه يغالي مالكيتك
مظلم يوسفه الكيت بيتك

اشيفيد البيت بويه بغير ملكاك
وشيفيد الدمع والروح تهواك
وشتيفيد البواجي لو بجيناك


خل من الدمع حمره اتصير عيني
وابجي العمر خلني وكل   سنيني
هو...... الراح غايب مايجيني

كلبي من الونين اعليك طايح
وحيلي  من الطم هم بويه رايح
متعوده بجفاكم بس اصايح



جيتك....... ركض ....تاخذني وياك
وتعرفني  مريضه  ويصحعب اجفاك
جا مو من بناتك.. ليش انا اترجاك
شاطي المالكي

#أبوذيات للخدمة

سفينه نوح هايه.... لو للحسين
وكبل جبريل ياهو .... لوله لحسين
ومحمد جان ظعنه .... لوله الحسين
اشترانه بدم رگبته ابن الزجيه

وحق من فرض نفسه .. رب على حسين
بدليلي اسنين باني .... ربعه لحسين
الحمد لله الحسبنه .... ربع الحسين
وخصنه  بخدمة الزهره الزجيه

فاضل الغـريباوي

#اللهم_عجل_لوليك_الفرج

من اتبده الماي تغير         
وجه الشط خجلان 
ظل عباس يدير بعينه       
لحسين العطشان

فارغ جوده وطاح الواه    
ونكطعت بالطف يمناه
من تبده الماي               
من تبده الماي
.........................................................
جان الجود مدلل عنده            
واكثر من روحه يداريه
من يمشي يضمه وي ضلوعه    
  يخاف من النسمه اتمر بيه
ومن اتصوب بدو مايه          
واتبده العباس عليه
صوره المامرسومه بلوحه    
   للكافل ظلت تاذيه

لايكدر يوصل الخيامه   
ويتعذر لحسين
ولايكدريرجع للشاطي     
وهوه بلاجفين

وسهم المتوسط عيناه      
ونكطعت بالطف يمناه
..................................................................
بين الشاطي وبين خيامه        
  كافل زينب ظل محتار
لارايه ولاجود العنده             
ولاجف يشيل البتار   
موقف بجه عيون الدنيه     
وعرش الله وعين المختار
كل هذا وماهم بجروحه        
هم بعضيده بلايه  انصار 

وينادي من ابعيد ابصوته        
  يل وحدك ظليت
مابين العسكر من عفتك           
  اشعر ماوفيت

ياهو بالعركه التنخاه             
   وانكطعت بالطف يمناه
.....................................................................

مثل خيالك واكف يمك      
ماعفتك يحسين بيوم
من هل ساعه وداعك خويه 
وحدك تظل بين الكوم
انه تعذر مارويتك        
   ويسعر جبدك يالمضلوم
طاح الجود بطيحت جفي    
وتناثر عالصحره هموم

من شفته عله الكاع تبده  
صحت الكافل ضاع  
يحسين الحك رايد منك  
  اخر لحظه وداع

يل وجهك مايوم انساه     
و نكطعت بالطف يمناه
.....................................................................
يمحير التاريخ بصيتك   
  ظامي وفوك جتافك ماي
لاعد نوح ولاعد ادم     
   صارت خوتك يل وفاي
ريت السهم الضيع عينك 
   صاباني وضيع عيناي
عليك سكينه ودمعت زينب   
ترجع يل عباس وياي

هاي الدنيه خلاف عيونك ظلمه     وصارت ليل
ضعن الخدر يابو الغيره         
   ظل بلايه كفيل

وحسينك شمتانه عداه            
وانكطعت بالطف يمناه
................................................................
نذبحت ياعباس الخوه        
حسينك ردد بيهه وكال
بين العسكر عفته لوحده 
   وهاي الحومه تريد رجال
من يمشي محنيه ضلوعه  
وصاير ظهره جنه هلال
موكت النومه عله شاطي  
تنتضرك ياخويه اطفال

يم اسس عالشاطي بسيفك   
وكفات لابطال
يمشبع التاريخ بصيتك      
يافخر لاجيال

عليك اصرخ عباس احاه     
  وانكطعت بالطف يمناه
خادم اهل البيت                          الشاعر فلاح طالب الماجدي

((شو بس راسك))


جابولي شو بس راسك
چــــــــاوينك ونبراسك
يــــابويه شـــو متغــــير
سولفلي ياهو الجـاسك

عـــود آنــه رت اشگيلك
بس اخجل من احچيلك
وبخــــدي ضميت الدمع
مشتاگـه ضـمني دخيلك

عفتني الوحـدي     وسياط المعتدي
وشگلك بالسلب     تراچي ومعضدي

حسينآ ياحسين ...

"""""""""""""""""""""""""""""""""""''''''''''

مشيّ الهـــــزل أذانه
والعثــــره بويه ويانه
من ابچي ويضربوني
والشوفتك ولــــهانه
    
عمتي تگـلي مسافر
وانــه ودمعتي نكابر
چم باچر ايمــر بينه
چا يمته يوصل باچر

وأتاني عالجمر     يهلبـت بس تمر
يبوية تأخـــرت     وكلمتي التنهطر

حسينآ ياحسين ...

"""""""""""""""""""""""""""""""""""''''''''''

مـــــو للعتب چلماتي
بس للعشگ دمعــاتي
احچـــيلك وأتحــــسر
بگلبي صفت صيحاتي
    
حاچيني كلـمه زغيره
ما احمـــل انه الحيره
افتــــح أليــــه عيونك
وشاهدني بويه إيسيره

يبويه بــــلا حمه     ذراري فاطمه
العقيله ام الخدر    بونين امكـتمه

حسينآ ياحسين ...

"""""""""""""""""""""""""""""""""""''''''''''

هسه انه أريد حجايه
مـــن شفتك الدمايه
حاجيني لو بس مره
بويه انسبينه ســبايه

حاچيني گمت اتحلم
راح انتـــــضر تتكــلم
يابابا بسمي اتنـــــادي
حتى انسه چنت اتألم

مهجتي تنجـرح     يـــــرايح بالذبح
اخذني العالمك    الهدوئك ياسمح

حسينآ ياحسين ...

"""""""""""""""""""""""""""""""""""''''''''''

حضنك گضه وما شفته
بس راسك انه احضـنته
دفيـــتـــك بجـــــمـراتي
بس موتتــني الســـــكته

بدونك حياتي شبــيها
لا كل طعم مـــا بيـــها
خليني احضنك بــويه
روحي العشگ سـابيها

اموت الخاطرك     وابوسك واشكرك
لحـــد مانـــلتقي     امـــوت وانــطرك

حسينآ ياحسين ...

عبد زينب
محمد الابراهيمي

 قصيدة گعده





فـــي اخـــر الــزمــان .. ياشيعــة الــزهره
القابض على الحسين .. كالقـابض الجمره
خلـونه ويـه احسين
مثل الرمـش والعين
ياشيــعـــة الــزهـره
__

ايها الشـــعب الحـــسيني يالـِتــبنـــيتـو القـــضــيه
كونو زينا عالحـــسين و مـــوش زيــن الاال امــيه
خــيط خل انصير وبره انـــروف جــرح الــغاظريه

حتى الحسين انوقره .. وموشخص عادي انصوره
غرتنه ليــش الكامـره .. وعــفـــنه كامــرة الــزچيه
 
وين احنه چنه اوين     هســه احنه اصبحه
حــسين بضـــمايرنه     بس بالحچي صحنه
المفروض متيـقـنين
مثل الرمش والعين
ياشيــعة الـــزهــره
-----------

اهنا يأصحاب العــقول الواعـــيه واهــل الدرايه
ينذبح منبرنه ليش ونـسكت اعــله اهـل الجنايه
اتلفلـــفت وادم علينه وصـعدت بطــاري السبايه

امن اليوتيوب اخذو اجر .. وعافو اجر ام الخدر
منهم اكو عــدنه  اشكــثر .. التاجرو بسم العبايه
 
لا مومهم احسين     بعبون چـــم منشد
كون المهم ايصير     بــهاي الزياره ترند
مو چـانو الماضــين
مثل الرمش والعين
ياشيعــة الــــزهره
-----------

حسين ديـن الله الحنيــف المــنزل الاهل البصــاير
حسين شوكه بعين كلـــمن رايد ايسقـط الشعـــائر
حسين اكـو وادم تخـــدمه واكــو وادم بيه تـتاجر

صفي السريره ابهالنــفق .. وعوف الورق لهل الورق
اويه احسين ضل لاخر رمق .. بالقيامه اتفــوز باچر
 
يامن تريد ايعيش     في داخلك عاشور
قلد علـي السجــاد     لتقــلد الــمشــهور
وابكــي مع الباكين
مثل الرمش والعين
ياشيعــة الزهـــره
------------

حسين مشكــاة الطــريق المظـــلم بـــدرب الجهــاله
حسيـــن رايـــد جـــيل واعـي جيـل بدموعه رساله
ومــثل ماحافظ عليـنه كون هــــم نحفـــظ اعيــاله

من نحچي عن جرح السبي .. ياريـت منشگگ عبي
زحمه تره امــن ابن النبـي .. نسولف بعرضه فشاله
 
واجب على الجميع     بالحچـــي تتادب
ونتبــره مـنه كون     اليهتك خدر زينب
ونرفض شكو شي شين
مـــثل الرمــش والعيــن
ياشيعة الزهره
----------

يـلي عايـشتو محرم عوفـــو سالـــفة المـــصالح
اليخدم احسين بضـميره الدنيـــا والاخــره رابح
ســلف صــالح چـــان عدنه لايــعامــل لايگـــابح

عرفو طريق ام الحسن .. وخلود زمن يتبع زمن
عبد الرضه وحمزه اوطن .. مثل للاجيال واضح
 
لو وي يزيد تصــــير      لو انته ويه احسين
حظرة جنـابك ليش      تلعب على الحبلين
فازو المــتمــسكين
مثل الرمش والعين
ياشيعة الزهره
---------
حيدر تركي الكربلائي
 
 
 

https://www.tg-me.com/Alaqilajjmm




نسائم عاشوراء
إرحم قَلب عزيزٍ
ياالله حَنَّ لضريح الحُسين,

الهي بحق الحسين وفقنا لخدمة الحسين