مرة صار موقف قدامي لبنت صغيرة فلّتت إيد إمها وركضت عالشارع...
بسرعة ركض أبوها وراها وأول ما مسكها قرصها من خدها!

بكت البنت وركضت على حضن إمها..
والأب صار يقلها: يعني تدعسك سيارة أحسن؟! لو بتعيديها غير تشوفي..!

البنت أكيد ما بكت من قرصة خدها..
غالبًا بكت من غلطها وخوفها..

لكن هذا الخوف بلحظات تبدد واستحال لـحُب لما سمعت البنت كلام إمها..
"بابا قرصك لإنه كان خايف عليك ..هو كثير بحبك يا ماما.."!

أدركت البنت إنه هالقرصة كانت قرصة عتب وحب..
فرجعت لأبوها وقالتله آسف...انا بحبك بابا..!
فاستقبلها الأب بأحضانه وهو ببتسم وبمسح دموعها..
.
.
أحيانا القدر بصفعنا صفعة على وجهنا أو بقرصنا قرصة على خدنا..
لحظتها إحنا ما رح نبكي من وجع الصفعة أو القرصة..
لكن رح نبكي من وجع جواتنا كان محتاج لقرصة تستفزه وتكشفه وتظهره..

القرصة كانت عالخد لكن ألمها صاب قلوبنا فاستحثّت دموعنا حتى نبكي...فبكينا..!

ووقتها ما بنلاقي ملجأ ولا ملاذ غير ربنا..
وهو برحمته بستقبلنا وبمسح دموعنا وبخفف وجعنا..

---------
لما تحس بألم ووجع وقرصة!
اعرف إنه ربنا حب يردك إله..
حب إنك تقبل عليه بأخطائك وأوجاعك..
حب إنك يسمع منك همومك واحزانك..
حب إنك تستغفره حتى يغفرلك كل ذنوبك وآثامك..

والغريب إنك بمجرد ما أقبلت عليه رح يشكر سعيّك!
لأنه هو (الشكور)..

ابتلاك وامتحنك واستفزّك وقرصك حتى تقبل عليه..
فلما أقبلت عليه شكرك بالرغم من إنه هو اللي جابك..!

وَكَانَ سَعْيُكُم مَّشْكُورًا
.
.
.
رب هذا جماله..!
لــيه لما (يقرصك) بتتأخر عليه..؟!

#القرآن_الجميل
#ARK

كان لما يكون زهقان يطلع يتمشى لحاله..
في أغلب الأوقات يحط هالسماعات ويسمع كل إشي..
بس بتعرفوا هديك اللحظة لما تحس حالك زهقان من كل إشي..؟
لما راسك يصير يوجعك وتحس إنه ولا إشي طايق تسمع؟

شال السماعات وكمل طريقه..
فتح يشيّك عالفيسبوك والواتساب سريعا..
كالعادة كان واصله مسج من إمه. هي كل يوم بتبعت أشياء زي صباح الخير ومساء الورد مع صورة وردة بتطفي وبتضوي أو صورة فنجان قهوة مع صباح الأمنيات الجميلة.. ")

إمه ما كان بوصلها إشي عجروب الجارات إلا مباشرة بتعمله شير عكل مكان..
وهو من زمان عامل "Mute" للمحادثة معها وحاطه لسنة كاملة !

هالمرة إمه كات باعته صورة فيها تكبيرات..
الله أكبر..الله أكبر..الله أكبر..
وإنه يستحب التكبير في هالأيام..

سكّر التلفون وهو ببتسم من عفوية إمه..
رد بسرعة فتح عالمحادثة ورد عليها بقلوب وحكالها إنه بحبها..
وكمل طريقه..
***
وبدأ يتمتم بشكل عفوي..
الله أكبر..الله أكبر..الله أكبر..

قرر يتخلى عن عفويته بالتكبير..ويركّز أكتر..

الله..
أكبـــــر..

الله....... أكبـــر..

الله أكبر.. من كل إشي..

الله أكبر من كل همومي !
الله أكبر من كل لحظة ألم تسللت لقلبي..
أكبر من كل مصيبة استنزفت عمري..
أكبر من خذلان أقرب الناس إلي..
أكبر من كل ذنب كان حاجز بيني وبينه..
أكبر من كل لحظات الضياع والوجع اللي بتعصف بحياتي..

الله أكبر من دنيا ربطت فيها سعادتي..
أكبر من اهتمام كنت بنتظره من أقرب الناس إلي..
أكبر من ناس رفضت تسمعني..
من حب بخل فيه كثير من الناس..
وأكبر من كره وكبر وظلم عشعش بقلوبهم..
.
.
الله أكبر من كل إشي بحول بيني وبين أحلامي وأهدافي..
أكبر من كل خطوات استصعبت أكملها..
وأحلام قررت أتنازل عنها..
وصراعات ياما فكرت أنسحب من مواجهتها..
.
.
الله أكبر من كل لحظة فتور حرمتني من قربه..
من كل مرة حرمت فيها حظ روحي من كلامه..
من كل لحظة كسل كانت حاجز من السجود فيها بين ايديه ومناجاته..
من كل إشي شغلني عن فكرة ذكره واستحضار رحمته ومعيته..
.
.
الله أكبر من كل إشي..

الله > من كل إشي!

وَقُلِ الْحَمْدُ لِلّهِ الَّذِي لَمْ يَتَّخِذْ وَلَداً وَلَم يَكُن لَّهُ شَرِيكٌ فِي الْمُلْكِ وَلَمْ يَكُن لَّهُ وَلِيٌّ مِّنَ الذُّلَّ وَكَبِّرْهُ تَكْبِيراً <3

#القرآن_الجميل
#ARK

لــو الله ما خلقك يؤسفني أحكيلك إنه حياة الناس اللي بتحبها وبتعرفها رح تكون أسوء بكثير مما بتتخيل..!!

- تتذكري لما وقفتي مع صاحبتك وضليتي معها حتى تخففي عنها وتحلّي مشكلتها؟
لو الله ما خلقك كانت رح تنتحر!

- وإنتَ لما مرة لقيت ولد صغير بنص الشارع، وقمت ركضت حتى تبعده عن السيارات..
لو الله ما خلقك كان هالطفل رح يندعس ويموت..
بتعرف إنه الآن كبر وقاعد بستنى نتائج التوجيهي^^

- تتذكري لما نصحتي بنت جيرانك الأصغر منك شو تدرس؟ وساعدتيها بتعبئة طلبها؟
ونصحتيها أكم نصيحة عن الجامعة وكيف تتعامل فيها..؟
لولاك كان اختلف كل مسار حياتها..
ولولا كلامك وحرصك عليها كان شفتيها بحال ما رح يسرّك أبدا أبدا..!

- مرة لما سمعت إنه صاحبك عنده شبهات، فقمت رتبت لقاء مع أحد الدكاترة المتخصصين. وصاحبك طرح عليه كل شبهاته وأسئلته..
حتى آخر إشي صاحبك اقتنع وزالت شبهاته واستعاد إيمانه..
لو الله ما خلقك كان صاحبك الآن ملحد!

- تتذكري لما مرة تصدقتي بمصاري كانت زايدة معك؟
وقتها أعطيتيها لعيلة محتاجة..
الإشي اللي ما بتعرفيه إنه هالمبلغ أنقذ هالعيلة من أزمة حقيقة كانت رح تنتهي بسجن الأب..
وسجنه كان كثييير رح يأثر على زوجته وبناته..

- لو الله ما خلقك..كان حياة أختك اللي بتحبها وبتخاف عليها جدا تعيسة..!
كانت رح تفقد السند..
كانت رح تفقدك إنت..!

- وإنتِ لو الله ما خلقك...كان ما وقفتي قدام طالباتك ونصحتيهم هديك النصيحة...ذاكريتها؟
الله لا يوريك كيف كانت رح تكون حياتهم بدونها..!
نصيحتك وقتها لامست قلوبهم كلهم..
ورح يموتوا وهمّه متذكرينها بكل تفاصيلها..
.
.
-------
حياتك كشخص (منيح) مرتبطة ارتباط عجيب بحياة الناس من حولك..
وبالرغم من كون الحياة صعبة وقاسية ومؤلمة...
لكنها كانت رح تكون أكثر ألم وقسوة على الناس اللي بتعرفهم لو الله ما خلقك..!

عشان هيك لو إنت بيوم قدمت خير واحد بكل حياتك..
فما تحكي ياريت الله ما خلقني..

لإنه هالخير اللي قدمته أنقذ حياة شخص واحد على الأقل..
هالخير خفف عنه ولو شوي من قسوة الحياة ومعاناتها..

هالخير امتد لأماكن ما بتعرفها ولا بتتخيلها..
واشتبك بحياة كثير ناس بطريقة مش ممكن تتصورها..

هذا التعقيد المدهش للخير اللي قدمته بس ربنا اللي بعلم فيه..
ورح يخبرك فيه..."يَوْمَ تَجِدُ كُلُّ نَفْسٍ مَا عَمِلَتْ مِنْ خَيْرٍ مُحْضَرًا"
.
.
وبالتالي بس حبيت أحكيلك إنه ما تحكي: ياريت الله ما خلقني..!

بالعكس..
شكرًا لوجودك وللخير اللي جواتك..

والــحمد لله..
إنه ربنا خلقك <3

#ARK

في أمريكا كان إلنا جار "ش ا ذ" !
أنا ما عمري شفته ولا كنت بعرف..

وبيوم قرروا الشباب "العرب" يروحوا يزوروه بس هيك من باب الفضول والزناخة.. ")
وكان معنا شب نهفة قلنا شباب البسوا لبس واسع ومش غلط تتحجبوا ::))

توقعت صراحة نلاقي شب، وكانت المفاجأة إنه هالجار زلمة شايب!
وزوجــــه بنفس العمر تقريبا..
كانوا عايشين مع بعض فترة تجريب قبل ما يقرروا الزواج : ) !

وقتها سألناه: يعني إنت طول حياتك هيك؟ عمرك مثلا ما كنت سوي وعالفطرة؟!
ضحك عسؤالنا وقال: عندي ولاد بعمركم!! وكان إلي علاقات مع بنات بس مع الوقت شفت متعتي ولذتي هيك..

والله هاللقاء لسه حاضر ببالي بكل تفاصيله..
ولحد هسا بتذكر لما حكالنا أنا ما بحب الشب المخنث..لا بروح مع بنت وبختصر..!
انا بحب شب شب..
وقتها الشب النهفة قلنا: شباب RUN! ")

ولحظتها تذكرت مقولة الفيلسوف الوجودي "كيركجارد" لما وصف حالته بعد ما جرّب كل الشهوات، فقال:
"لم أجد قعرًا لبحر اللذات أرسِل إليه مرساتي"!

اللي بصير مع الناس إنهم بفكروا بمجرد ما اطلقوا العنان لشهواتهم رح يرتاحوا..
لكن الواقع بحكي خلاف هالحكي تماما..

الشهوة ما إلها حد أبدا..
ومهما اطلقت العنان إلها مستحيل تشبع..
رح يضل بدك كمان وكمان..
ورح تضطر بكل مرة تجرّب أشياء جديدة تنوّع فيها لذتك ولحظات استمتاعك..
وبعدين...؟!!
بعدين ولا إشي.. يا بتعيش كل حياتك هيك..يا بتزهق وبتمل وبتنتحر!!
.
.
أغلب الناس ما بتعرف كمّ الإنحرافات السلوكية اللي بتتولد عند الناس اللي حبّت تشبع رغباتها بلا قيود وحدود..
مع ملاحظة إنه مش شرط كل إنسان شا ذ يعني جرّب كتير حتى صار شا ذ..
في ناس عندهم بكون عنده مشاكل نفسية وغيره وهدول أكيد يفترض ندعيلهم ونساعدهم وناخذ بإيدهم حتى يتعالجوا..

مثلا بخصوص الإنحرافات عنّا:
حب ممارسة الجنس مع الأطفال Pedophilia، ومع الموتى Necrophilia، ومع الحيوانات Zoophilia ، ومع شخص بتألم Dacryphilia، ومع كبار السن والعواجيز Gerontophilia، ومع أشياء غير حية Sexual fetishism، ومع شخص نايم أو فاقد الوعي Somnophilia، ومع شخص مشوّه Teratophilia ومع الأشجار Dendrophilia، ومع السيارات والآلات الميكانيكية Mechanophilia، ومع الأقدام Podophilia، ومع الأنوف Nasophilia، ومع الأشياء القذرة Mysophilia،ومع المعاقين عن الحركة Abasiophilia ، ومع أصحاب الأطراف المبتورة Acrotomophilia، وحب التحرش بشخص مش موافق عملامستك إله Frotteurism ، وحب الإيذاء الجسدي Sadism، وحب الاغتصاب Biastophilia ، وكمان أكل اجزاء من المُغتَصب Anthropophagolagnia، وحب تعذيب الحيوانات للوصول للنشوة الجنسية Zoosadism..!

الله لما يفرض علينا قيود غاياته يحافظ على إنسانيتنا..
غايته يحمينا ويحفظنا من هوى نفوسنا وجشعها وطمعها..
الله بقيّد حريتنا حتى يخفف عنّا ويرحمنــــا !!

وَاللَّهُ يُرِيدُ أَن يَتُوبَ عَلَيْكُمْ وَيُرِيدُ الَّذِينَ يَتَّبِعُونَ الشَّهَوَاتِ أَن تَمِيلُوا مَيْلًا عَظِيمًا (27)
يُرِيدُ اللَّهُ أَن يُخَفِّفَ عَنكُمْ ۚ وَخُلِقَ الْإِنسَانُ ضَعِيفًا.

(تنهيدة)!

طلعت من عند جارنا وانا بحمد ربنا على إنه في إشي اسمه (حرام وممنوع) في حياتي!

شكرا يا الله..

ولكل إشي بتطلبه مني وبتحرمه عليّ:
حاضر <3 !

#القرآن_الجميل

القصة وما في فيها باختصار..
في شباب وبنات كانوا مناح وماشيين بالطريق الصح، أكيد بغلطوا وبعصوا وبذنبوا لكنهم كانوا يتوبوا مباشرة من أغلاطهم ويظهروا لربنا صدقهم وإخلاصهم..

- لكــــن مع الوقت تغيّرت صحبتهم وقناعاتهم وأفكارهم..
(وفتحوا عحالهم كل أبواب الفتن)
علما إنه أبواب الفتنة لازم نصفعها بكل قوتنا مش نغلقها برفق ونضل قاعدين عبوابها..!

- لما فتحوا عحالهم أبواب الفتن وغلطوا..للأسف ما تابوا لربنا ورجعوا إله زي ما كانوا زمان!
صاروا (يرتابوا ويأجلوا ويأخروا توبتهم ورجعتهم لربنا)..

وفي يوم من الأيام صاروا يحكوا بينهم وبين حالهم:
إحنا لمتى رح نضل عايشين حياة تأنيب الضمير هاي؟؟
يعني شو هالحياة كل إشي فيها حرام..؟
هي كل الناس عايشة حياتها وبتعمل شو ما بدها.. إلا إحنا حيضل هالضمير ملازمنا بكل لحظة ومنكد علينا عيشتنا..

- وقتها (ارتابوا) وشكّوا في دينهم!
وقرروا حتى يواجهوا وجع ضميرهم إنهم يتنازلوا عن إيمانهم..
وصاروا يحكوا أصلا شو بضمنّا إنه الإسلام صح؟
وشو بعرفنا إنه القرآن كلام الله..
وليه نصدق البخاري ومسلم؟؟
أصلا الأديان صناعة بشرية..
ومش أكيد في حياة بعد الموت..

بلا أديان بلا تخلف..!

- وآخر إشي للأسف (غرّتهم الدنيا) وعاشوا حياتهم مثل ما كان بدهم بالضبط، بدون تأنيب ضمير ولا حد يقلهم هذا حرام..

- حتى اللحظة اللي باغتهم فيها (الموت) فجأة..

- وماتوا مخدوعين بأوهام الشيطان..!

--------------------
يوم القيامة...
وفي موقف أغلبكم بعرفه بصيروا ينادوا عالمؤمنين حتى يمدّوهم بشوي من نورهم..
لكن من حواراتهم الملتفة مع المؤمنين لمّا ينادوا عليهم: مش كنّا معكم؟؟؟؟

يُنَادُونَهُمْ أَلَمْ نَكُن مَّعَكُمْ ؟؟

والمؤمنين بردوا عليهم:

قَالُوا بَلَىٰ وَلَٰكِنَّكُمْ:

- فَتَنتُمْ أَنفُسَكُمْ
- وَتَرَبَّصْتُمْ
- وَارْتَبْتُمْ
- وَغَرَّتْكُمُ الْأَمَانِيُّ
- حَتَّىٰ جَاءَ أَمْرُ اللَّهِ
- وَغَرَّكُم بِاللَّهِ الْغَرُورُ

فماتوا مخدوعين بأوهام الشيطان..!

#القرآن_الجميل

هل سبق وخطرلك تعمل خطتك السنوية بالتاريخ الهجري؟!

ممكن إنت دائما بتعمل خطتك بالتقويم الميلادي اللي وضعه البابا غريغور الثالث عشر ^^
غالبا أول مرة بتسمع فيه ")

لكن ليه هالمرة ما تجرب تعمل خطتك بالتقويم الهجري اللي وضعه "عمر بن الخطاب"!

الجميل في التاريخ الهجري إنه ما انطلق من ولادة أحدهم أو موته..
تواريخ الميلاد والوفاة غالبا مش ثابتة..
وموت وولادة أحدهم ما بعني إلنا هالشيء..

معظم تواريخنا الإسلامية مرتبطة (بالعمل والإنجاز)!
إحنا ما بنعرف بالضبط ميلاد رسولنا وصحابته، لكن بنعرف بالضبط تواريخ هجرتهم وجهادهم ومعاركهم وفتوحاتهم..!

ما بهمنا جدا تواريخ ميلادهم...لكن بهمنا تواريخ ميلاد قلوبهم لما لامسها الوحي..!
بهمنا تواريخ هجرتهم وجهادهم وإنجازهم وتضحيتهم..

كان ممكن لعمر إنه يختار تاريخ ميلاد رسولنا، أو تاريخ معركة بدر لما انتصروا فيها..
أو تاريخ فتح مكة مثلا..

لكنه اختار (الهــــجرة)!
اختار اللحظة الحاسمة والخطوة المهمة واللي ترتب عليها بالرغم من صعوبتها كل الإنتصارات والفتوحات اللاحقة..
.
.
----------------
غدا 1/ محرّم.
أول أيام السنة الهجرية الجديدة.
.
.
لا بدّ أن تهاجر إلى الله يا فتى.
لا فتح من غير هجرة
لا فتح (لك) من غير هجرة..!

شو كان نفسي أسمع كلمة "لا تحزن" من رسول الله وهو بواسي فيها أبو بكر.
وكان نفسي أتأمل ابتسامة أبو بكر لما حكالنا: فشرب النبي حتى رضيت!
يا الله سيدتنا أسماء وهي بتشقّ حزام ثوبها حتى تربط فيه الأكل إلهم..
وحيرة سراقة بن مالك ورسول الله بوعده "بسواري كسرى" بهيك موقف!
عمر وهو بتوعد أي حد يوقف بطريقه..
وعلي لمّا كان بتقلب في فراش النبي صلى الله عليه بفديه بروحه وحياته!

كنت بتساءل كيف كان منظر أولاد المهاجرين والأنصار وهمة بيتسلّقوا النخل براقبوا متى حبيبهم يوصل..؟
وكيف كانت صرخة أول صحابي لمح النبي صلى الله عليه وسلم لما وصل..
يا الله "طلع البدر علينا" ما أحلاها بصوت الصحابة !
وما أحن دموع الصحابيات بشوفة النبي صلى الله عليه وسلم اللي ربنا بعثه رحمه فيهم.
فرحة إم أيوب لما خبرها أبو أيوب الأنصاري إنه رسول الله ضيفنا..
وأطفال الأنصار وهمه بسمّعوا لرسول الله قرآن علّمهم إياه مصعب..
وقلوب الأنصار وهي بتسقبل وحي نزل يحكي فيهم:

وَالَّذِينَ تَبَوَّءُوا الدَّارَ وَالْإِيمَانَ مِن قَبْلِهِمْ يُحِبُّونَ مَنْ هَاجَرَ إِلَيْهِمْ وَلَا يَجِدُونَ فِي صُدُورِهِمْ حَاجَةً مِّمَّا أُوتُوا وَيُؤْثِرُونَ عَلَىٰ أَنفُسِهِمْ وَلَوْ كَانَ بِهِمْ خَصَاصَةٌ ۚ
ودموعهم اللي انتهى فيها المشهد..
.
.
مرة وأنا بقرأ بسورة النساء مريت على آية خلتني أعيش لحظات الهجرة:

وَمَن يُهَاجِرْ فِي سَبِيلِ اللَّهِ يَجِدْ فِي الْأَرْضِ مُرَاغَمًا كَثِيرًا وَسَعَةً ۚ وَمَن يَخْرُجْ مِن بَيْتِهِ مُهَاجِرًا إِلَى اللَّهِ وَرَسُولِهِ ثُمَّ يُدْرِكْهُ الْمَوْتُ فَقَدْ وَقَعَ أَجْرُهُ عَلَى اللَّهِ ۗ وَكَانَ اللَّهُ غَفُورًا رَّحِيمًا

الآية سبب نزولها إنه أحد الصحابة الكبار في العمر ما قدر يهاجر مع بقية الصحابة..
لكنه مع الوقت ما تحمل هذا البعد..وما تحمل فكرة إنه الصحابة بصافحوا وجه النبي صلى الله عليه وسلم وهو لا..
فقرر الهجرة..
علمًا إنه معذور وظرفه ما بسمحله لكبر عمره..
وهو بالطريق شعر إنه رح يدركه الموت ..
قام هالصحابي ضرب كف بكف وقال: اللهم هذه بيعتي لك
وأعاد الكرّة وقال: اللهم هذه بيعتي لرسولك..
ومـــات..!

ممكن من وقتها وكل ما أصادف ذكرى الهجرة..
بضرب كف بكف وبحكي: اللهم هذه بيعتي لك..
وبضرب كف بكف وبحكي: اللهم هذه بيعتي لرسولك..

#القرآن_الجميل

اليوم بعد الصلاة روحت عالبيت مستعجل..
كان عندي سؤال شاغل بالي بدي أطرحه عالقرآن بعد ما الشيخ في الخطبة حكالنا إنه سورة القصص واللي فيها قصة سيدنا موسى نزلت بفترة الهجرة..

سؤالي كان شو العلاقة ما بين قصة سيدنا موسى في سورة القصص والهجرة؟؟

دائما بصراحة بحب اسأل القرآن..
ودائما القرآن بحب يدهشني ")
.
.
سورة القصص من بدايتها بتحكيلنا عن فرعون وجرائمه البشعة..
بعدها بنتقل المشهد لأم موسى وخوفها وحزنها ولمّا الوحي لامس قلبها:

وَأَوْحَيْنَا إِلَىٰ أُمِّ مُوسَىٰ أَنْ أَرْضِعِيهِ ۖ فَإِذَا خِفْتِ عَلَيْهِ فَأَلْقِيهِ فِي الْيَمِّ وَلَا تَخَافِي وَلَا تَحْزَنِي ۖ إِنَّا (رَادُّوهُ) إِلَيْكِ..

وبتخبرنا السورة عن لحظة حزينة وعاطفية جدا مرّت فيها لما افتقدته وكانت رح تفقد صبرها وتعترف إنه موسى إبنها... لــــولا الله ربط عقلبها..

وَأَصْبَحَ فُؤَادُ أُمِّ مُوسَىٰ فَارِغًا ۖ إِن كَادَتْ لَتُبْدِي بِهِ لَوْلَا أَن رَّبَطْنَا عَلَىٰ قَلْبِهَا

ومثل ما في لحظات حزن، في كمان لحظات فرح وسعادة..")
وأخيرا طفلها الرضيع ربنا ردّه لحضنها:

(فَرَدَدْنَاهُ) إِلَىٰ أُمِّهِ كَيْ تَقَرَّ عَيْنُهَا وَلَا تَحْزَنَ وَلِتَعْلَمَ أَنَّ وَعْدَ اللَّهِ حَقٌّ

بعدها السورة بتخبرنا عن مجموعة من القصص والمصائب اللي تعرّض إلها موسى..
مثلا لما هرب من قومه خائفا يترقب..

فَخَرَجَ مِنْهَا خَائِفًا يَتَرَقَّبُ ۖ قَالَ رَبِّ نَجِّنِي مِنَ الْقَوْمِ الظَّالِمِينَ

ومثل ما في لحظات خوف، في كمان لحظات أمان..
موسى عليه السلام صادف بنتين في مدين وساعدهم..وأبوهم عرَض عليه الزواج من وحده فيهم والمقابل إنه يشتغل 8 سنوات أو لو حب يكملهم للعشرة!

قَالَ إِنِّي أُرِيدُ أَنْ أُنكِحَكَ إِحْدَى ابْنَتَيَّ هَاتَيْنِ عَلَىٰ أَن تَأْجُرَنِي ثَمَانِيَ حِجَجٍ ۖ فَإِنْ أَتْمَمْتَ عَشْرًا فَمِنْ عِندِكَ ۖ

وبتواصل السورة سردها لقصة موسى..
-------------------

بآخر السورة وبشكل مدهش بنتقل الخطاب لقلب محمد صلى الله عليه وسلم!

إِنَّ الَّذِي فَرَضَ عَلَيْكَ الْقُرْآنَ (لَــرَادُّكَ) إِلَىٰ مَعَادٍ ۚ قُل رَّبِّي أَعْلَمُ مَن جَاءَ بِالْهُدَىٰ وَمَنْ هُوَ فِي ضَلَالٍ مُّبِينٍ

السورة في البداية فيها قصة موسى لما إمه قذفته في اليم وربنا ردّه إلها..
وفيها خروجه من قومه "خائفا"..
وفيها 10 سنوات في مدين قضاها..
.
.

يا محمد..
اللي ردّ موسى الرضيع لإمه..
واللي حفظه وأمّن خوفه من بطش قومه..
واللي بعد 10 سنوات قضاها في مدين رده..

رح يردك !

#القرآن_الجميل
#ARK

في شركة كبيرة جدًا بحاجة لموظفين..
هالشركة ما بتعيّن أي حد، وما بتقبل إلا شخص صاحب مؤهلات عالية جدًا..

وبيوم قررت إنت تبعت ال CV للشركة بس لتجرّب حظك..
تواصلوا معك وحكولك تفضل عالمقابلة.
إنت في داخلك بتعرف إنه نسبة قبولك ضعيفة جدًا لإنه مؤهلاتك مش ولا بد..

لما دخلت عالمقابلة بلّش اللي بقابلك يحكيلك عن المؤهلات اللي بدهم إياها..
وهو قاعد بخبرك بالأمور اللي لازم تتوافر بالشخص اللي رح يعينوه إنت صفنت وصرت تحكي: أنا شو جابني هون؟؟ طيب هي الCV قدامه..هو مش شايف إني بعيد جدا عن الشخص اللي ممكن يقبوله؟؟

لحظتها شعرت بإحراج إنه بعد كل كلامه رح تحكيله: أنا آسف..أنا مش اهل لهيك وظيفة.!

أخيرا لمّا خلّص كلامه الطويل...فجأة قام من مكانه وقلك: مبرووووك!
أنا (اخترتك واجتبيتك) للوظيفة..
ومن بكرا ببلش شغلك إن شاء الله..!

وبأول يوم دوام إلك خجلت من حالك إنك مش عارف تعمل ولا إشي !!
والشغل كثييير أصعب مما كنت بتتخيل..
لحظتها فات عليك المدير وقلك ( ما في داعي تنحرج أبدا..)
إنت مناسب جدا لهاي الوظيفة وإحنا كشركة مآمنين فيك وبقدراتك بس أكيد لازم تشتغل عحالك أكتر..
وشغلنا ما فيه إشي جدا صعب أو محرج بحيث يكون صعب عليك تعمله..

وشوف (فلان) خليه قدوتك لإنه كثيييير مرّ بصعوبات وتحديات وبلاءات وإحراجات وصبر عليها..
وإنت مستحيل تمرّ ولو بـــ 1% من تحدياته وصعوباته وإحراجاته!!
ومع ذلك (الله) سهلّ عليه طريقه وساعده..
فأكيد إنت كمان لو مشيت عطريقه ربنا رح يسهل عليك ويعينك..

بس إنت كون منيح وصلي وزكّي واعتصم فيه وتوكل عليه..
هو نعم المولى ونعم النصير..

-----------------------
- وَجَاهِدُوا فِي اللَّهِ حَقَّ جِهَادِهِ ۚ

بس يا رب مستحيل نعبدك حق عبادتك..ولا نشكرك حق شكرك..ولا نجاهد حق جهادك..
إحنا ضعاف جدااا!

- هُوَ اجْتَبَاكُمْ
إحناااااا؟؟ بس المهمة صعبة جدا ومحرجة أحيانا؟؟

- وَمَا جَعَلَ عَلَيْكُمْ فِي الدِّينِ مِنْ حَرَجٍ ۚ
بس كيف رح نصبر على هالطريق؟؟

- مِّلَّةَ أَبِيكُمْ إِبْرَاهِيمَ ۚ هُوَ سَمَّاكُمُ الْمُسْلِمِينَ مِن قَبْلُ وَفِي هَٰذَا لِيَكُونَ الرَّسُولُ شَهِيدًا عَلَيْكُمْ وَتَكُونُوا شُهَدَاءَ عَلَى النَّاسِ ۚ

آه...ابراهيم!
وهو فتى واجه قومه ورموه في النار..وترك زوجته وابنه في مكة بنص الصحراء..
واستجاب لأمر ربنا بذبح ابنه اللي بحبه..وابتلاه ربنا عدة بلاءات..

كل حياته كانت صعبة!
بس الله كان معاه..

وربنا اللي سهل عليه طريقه رح يسهل علينا طريقنا..
وإبراهيم صبر على إحراجات كبيرة زي إنه يترك زوجته بالصحرا أو يذبح ابنه اسماعيل!!
معقول إحنا ما نصبر على أوامر أقل من هيك بكثير..
إنه نصلي 5 صلوات في اليوم وندفع من رواتبنا ومصروفنا للمحتاجين؟؟

- فَأَقِيمُوا الصَّلَاةَ وَآتُوا الزَّكَاةَ وَاعْتَصِمُوا بِاللَّهِ هُوَ مَوْلَاكُمْ ۖ فَنِعْمَ الْمَوْلَىٰ وَنِعْمَ النَّصِيرُ

حاضرين <3
---------------
وَجَاهِدُوا فِي اللَّهِ حَقَّ جِهَادِهِ ۚ هُوَ اجْتَبَاكُمْ وَمَا جَعَلَ عَلَيْكُمْ فِي الدِّينِ مِنْ حَرَجٍ ۚ مِّلَّةَ أَبِيكُمْ إِبْرَاهِيمَ ۚ هُوَ سَمَّاكُمُ الْمُسْلِمِينَ مِن قَبْلُ وَفِي هَٰذَا لِيَكُونَ الرَّسُولُ شَهِيدًا عَلَيْكُمْ وَتَكُونُوا شُهَدَاءَ عَلَى النَّاسِ ۚ فَأَقِيمُوا الصَّلَاةَ وَآتُوا الزَّكَاةَ وَاعْتَصِمُوا بِاللَّهِ هُوَ مَوْلَاكُمْ ۖ فَنِعْمَ الْمَوْلَىٰ وَنِعْمَ النَّصِيرُ

#ARK
#القرآن_الجميل
* فكرة البوست منقولة بتصرف من نعمان خان.

والله وصرتي سنفورة..!
يا الله الأيام..
لسه امبارح كنا أنا وإمك بنفكر شو نسميك..؟
هيّك كبرتي وصرتي صبية، وبتنهي حاضر حيصير مجرد ذكريات..

ثقتي فيكِ عمياء..
أنا بعرف أنا وإمك شو ربينا..
لكن هذا لا يعني ما نخاف عليك..
وندعي ربنا بكل خطوة من خطواتك إنه يحفظك ويحميك..
.
.
شوفي يابا..
زي ما بتعرفي لا تزول قدما عبد حتى يسأل عن أربع، ومنها:
عن عمره فيما أفناه؟ وعن شبابه فيما أبلاه؟

وهذا اشي بخلي الواحد يصفن..
طيب مش الشباب فترة من العمر..؟
يعني مش "عن عمره فيما أفناه" لحالها بتكفي...؟

لا يابا وكإنه العمر إشي ومرحلة الشباب إشي..

لإنه هالمرحلة إنتِ فيها بقمة نشاطك وصحتك وعافيتك..
وكل إشي حابة تكوني عليه بالمستقبل بعتمد على خطواتك حاليا..
بعتمد على شو رح تعملي بالجامعة..؟
كيف رح تستثمري هالمرحلة من عمرك..؟

بدك تنشغلي بدراستك وتتفوقي فيها وبنفس الوقت تطوري من مهاراتك الشخصية بالتطوع والدورات وخدمة الناس وقضاء حوائجهم..؟

ولا بدك تتمختري في الجامعة تبحثي عن شب جذاب أو عاشق كذاب..!
.
.
ديري بالك تحصري حياة رحبة فسيحة بين ايدك بلذة لحظية رح يتبعها ندم وحسرة طول حياتك..
وديري بالك تنسي المهمة اللي انخلقتي عشانها..
وإياك تنظري نظرة غلط لأي حد بختلف عنك..
ديري بالك من نظرة إزدراء لبنت لبسها أو تصرفاتها ما عجبتك..
عفكرة ممكن امتحانها في الدنيا تصارع شهواتها ورغباتها وتبحث عن الحق وتخضع إله.. وامتحانك في الدنيا تساعديها وتوخذي بإيدها..
.
.
وما تفكري لاحقا إنك لو خدمتي الطلاب بكتاب أو حصة مراجعة أو نشاط يعني عملتي اللي عليك اتجاههم..
كل ما سبق وسائل مهمة..
والغاية تخدمي أرواحهم اللي غاب عنها الوحي..وما ارتوت من أنوار القرآن..!
.
.
المسؤولية مش سهلة..
والتحدي كبير..
والأمانة أعرضت عنها أرض وسموات وأشفقت منها جبال..

وحملها قلبك !
.
.
فاحفظي الله يحفظكِ
احفظي الله يحفظك~

#ARK

ما بعرف كيف وصلت لهون..
كنت متوتر..
وقلبي بدق بسرعة..
وحاسس إنه لازم أرجع..
أنا ما بدي أصلي..!!
بس ما بعرف كيف لقيت حالي ماشي باتجاه مسجد الجامعة..
.
.
قعدت برا قريب من شجرة..
صوت الشجر غريب، بذكرني بوجود الله بطريقة عجيبة، وحفيف الشجر كفيل يعيشني بعالم ثاني..
أدهشني منظر الطلاب من الجنسيات المختلفة وهم بيتسابقوا عالمسجد..
ما بقدر أنكر إنه في نور عجيب بشعّ من وجوههم..
وفي بنات حاملين بلالين وكيك سمعتهم بحكوا في ختمة اليوم لبنت!
انصدمت بأشكال ناس ما توقعت ألاقيهم بالمسجد..

المسجد مش حكر على حدا وعادي عفكرة لو فتت..
بس لا لا أنا مش جاي أصلي..
أنا ما بدي أصلي..!
---------

بس شو بمنعني؟
شو بمنعني أدخل زيهم وأحكي "بسم الله..اللهم افتح لي أبواب رحمتك"..
شو بمنعني أتوضا وأغسل وجهي من تعب الأيام..
شو بمنعني أكبّر..أحكي بصوت عالي إنك يارب أكبر من كل همومي وأوجاعي..
شو بمنعني..أثني على الله بسورة الفاتحة؟ وأطلب منه يهديني للصراط المستقيم..
ليه ما أركع وأشيل عني ذنوب تراكمت عظهري..
وأرفع من الركوع وأنا بحمد الله حمد أكيد رح يسمعه..
شو بمنعني أطمئنّ وأنا ساجد..اطمئنان يخليني أبثّ لربنا أمنياتي وطموحاتي..
يخليني أحس إني قريب منه..يا الله لما أحس بقربه ببكي..
وأول ما أرفع راسي، أحس بدموعي النقية وهي متعلقة برموشي..

يا الله زمان عن (الله) !
زمان ما........

قطع الصراع اللي بيني وبين نفسي، صوت طالب عرفت لاحقا إنه من شباب الشريعة:

"شب.. تصلي معي جماعة؟"
***********************
***********************

تأخرت عن الصلاة اليوم..
المحاضرة كانت مؤثرة..أنا فعلاً موقفي كطالب شريعة قوي..
ولازم أكون جريء وأخطو خطوة في مساعدة الناس..
كثير ناس بتستنى بس كلمة من أي حدا..
كلمة كفيلة تنتشلهم وتساعدهم وتاخد بإيدهم..

وأنا رايح باتجاه المسجد لمحت شب قاعد لحاله وصافن..
مشيت اتجاهه ولمحت دمعة نقية متعلقة برموشه..!
.
.
ما بعرف كيف وصلت لهون..
كنت متوتر..
وقلبي بدق بسرعة..
وحاسس إنه لازم أرجع..
أنا ما بدي أحرجه..
بس ما بعرف كيف لقيت حالي بحكيله:

"شب.. تصلي معي جماعة؟"

#ARK

خطرلي من فترة أبعت لصاحب قديم جمعتني فيه أيام وذكريات حلوة المسج التالي:

أنا بحبك !
وممتن إلك فوق ما تتصور إنك في حياتي..
ممكن ما بتصور حياتي لو ما كنت فيها أصلاً..
صحيح الدنيا فرقتنا وزمان ما شفتك وسمعت أخبارك..
بس خطرت ببالي وحبيت أحكيلك إني بحبك ^^
.
.
لحظات وردّ إنه المسج كان مفاجأة وصدمة بالنسبة إله..خصوصاً إنه كان بحاله نفسية جدًا سيئة.. وهالمسج وصله بالوقت المناسب وخفف عنه كثير..
.
.
وبصراحة مش صاحبي القديم بس..
ممكن أنا شخص ما بمّل من مصارحة إمي وأختي وأبوي والمقربين مني إني بحبهم..
صح إنه الموضوع صار بالنسبة لبعضهم مبتذل..
وإمي ارتبط الحب عندها إني أساعدها البيت وأضب الجلي وأرتب غرفتي..
وإنه "لو بتحبني جد كان بترد عليّ مش بس بالحكي..!""
لكن المهم إني صارحتها بحبي..
لإني على يقين إنها رح تيجي لحظة تفقدني أو أفقدها..
ووقتها رح تختفي كثير تفاصيل ورح يضل الحب !
.
.
ما أحلى شعور تصارح حد بحبك إله بدون أي مصلحة بدك إياها منه !
إنك تحبه لذاته لإبتسامته لمجرد وجوده بيومك ولكلمة أنا معك حكالك إياها بلحظة كان شعور الوحدة مسيطر عتفاصيل حياتك !

وما أحلى شعور إنك تِنحَب، إنه الناس تثني على خير قدمته إلهم..
إنك تشعر إنه وجودك في حياتهم إله مغزى، وإنه حياتهم بدونك ما إلها معنى !
-----------

طيّب يا رب..
وإنت؟

ممكن تحبني؟
وأنا أنا وإنت إنت ؟؟

----------
كالعادة القرآن بصدمني !
وبحكيلي إنه حب ربنا أقرب مما كنت بتتخيل...

رح يحبك أكيد لو كنت مُتقي ومحسن وصادق ومقسط ومتوكل..
وفي اللحظة اللي ممكن تفقد فيها الأمل من الظفر بهذا الحب عشانك مذنب وعاصي ومقصر..
بحكيلك القرآن إنه كمان رح يحبك فيما لو كنت حريص تتقرب منه وتستغفره وتطلب عونه وتلجأ إله بعد كل مرة بتوقع وبتغلط فيها..
فهو بحب التوابين والمتطهرين.. !

---------
شكراً يا رب..

لإنك ممكن تحبني..
وأنا أنا وإنت إنت !
.
.
- وَأَحْسِنُوا إِنَّ اللَّهَ يُحِبُّ الْمُحْسِنِينَ.
- بَلَىٰ مَنْ أَوْفَىٰ بِعَهْدِهِ وَاتَّقَىٰ فَإِنَّ اللَّهَ يُحِبُّ الْمُتَّقِينَ.
- فَإِذَا عَزَمْتَ فَتَوَكَّلْ عَلَى اللَّهِ إِنَّ اللَّهَ يُحِبُّ الْمُتَوَكِّلِينَ.
- فَاعْفُ عَنْهُمْ وَاصْفَحْ إِنَّ اللَّهَ يُحِبُّ الْمُحْسِنِينَ.
- وَإِنْ حَكَمْتَ فَاحْكُمْ بَيْنَهُمْ بِالْقِسْطِ إِنَّ اللَّهَ يُحِبُّ الْمُقْسِطِين.
- فَمَا اسْتَقَامُوا لَكُمْ فَاسْتَقِيمُوا لَهُمْ إِنَّ اللَّهَ يُحِبُّ الْمُتَّقِينَ.
.
.
إِنَّ اللَّهَ يُحِبُّ التَّوَّابِينَ وَيُحِبُّ الْمُتَطَهِّرِينَ.

<3 !

#القرآن_الجميل
#ARK

كانت بتتمنى الموت ولو الله ما خلقها..!
- يَا لَيْتَنِي مِتُّ قَبْلَ هَٰذَا وَكُنتُ نَسْيًا مَّنسِيًّا

وربنا الرحيم سمعها وبـــ ( لا تحزني) أوحالها..
- فَنَادَاهَا مِن تَحْتِهَا أَلَّا تَحْزَنِي..

بعدها واساها وحكالها: كلي واشربي و"طيبي نفسا" وطيّب خاطرها:
- فَكُلِي وَاشْرَبِي وَقَرِّي عَيْنًا ۖ
-------

يا إلهي..
لما رحمة ربنا تختصر المسافة ما بين:
(يَا لَيْتَنِي مِتُّ قَبْلَ هَٰذَا وَكُنتُ نَسْيًا مَّنسِيًّا)
وبين..
(فَكُلِي وَاشْرَبِي وَقَرِّي عَيْنًا ۖ ) !

<3

#القرآن_الجميل
#ARK

بنت أختي بترن عليّ بس حتى تجاكرني..
إنه بابا اشترالي مطرة، وماما جابتلي مقلَمِة، وتيتا رح تشتريلي فستان...وإنت يحرااااام ما عندك مطرة ومقلَمِة وفستان!

من فترة رنت عليّ حتى تجاكرني بإنها بتحفظ بسورة النبأ..
وحكتلي انا شطورة مش زيك ")

بصراحة هالمرة نجحت فعلا باستفزازي..
وهذا دفعني لما سكرت الخط معها إني أروح أفتح سورة النبأ..

عَمَّ يَتَسَاءَلُونَ (1) عَنِ النَّبَإِ الْعَظِيمِ (2) الَّذِي هُمْ فِيهِ مُخْتَلِفُونَ (3) كَلَّا سَيَعْلَمُونَ (4) ثُمَّ كَلَّا سَيَعْلَمُونَ (5)
.
.
أَلَمْ نَجْعَلِ الْأَرْضَ مِهَادًا (6) وَالْجِبَالَ أَوْتَادًا (7) وَخَلَقْنَاكُمْ أَزْوَاجًا (8) وَجَعَلْنَا نَوْمَكُمْ سُبَاتًا (9) وَجَعَلْنَا اللَّيْلَ لِبَاسًا (10) وَجَعَلْنَا النَّهَارَ مَعَاشًا (11) وَبَنَيْنَا فَوْقَكُمْ سَبْعًا شِدَادًا (12) وَجَعَلْنَا سِرَاجًا وَهَّاجًا (13) وَأَنزَلْنَا مِنَ الْمُعْصِرَاتِ مَاءً ثَجَّاجًا (14) لِّنُخْرِجَ بِهِ حَبًّا وَنَبَاتًا (15) وَجَنَّاتٍ أَلْفَافًا (16)
.
.
.
إِنَّ يَوْمَ الْفَصْلِ كَانَ مِيقَاتًا (17)
-----------
يعني..
الآيات بدأت باستنكار البعض للبعث..
بعدين مرت على مراحل الخلق وانتهى المشهد بالتأكيد على البعث !

طيب كيف وليه وشو دخل؟
.

حتى تستدل على أمر غيبي جلل ما بخطر ببالك مهما تصورته..
إنت بحاجة إنك تلقي نظرة على هذا الكون وتتأمل بالأرض وصلاحيتها للحياة..
وتنظر لتشييد الجبال ووظيفتها المحكمة..
وفي الطريقة اللي اختارها ربنا لبقاء النسل..
والطريقة اللي اختارها لتجديد الطاقة الإنسانية..
وطريقة تقسيم الزمان وتوزيع الأدوار..
والسماوات البعيدة والشمس المانحة للحياة..
والسحاب المحمّل بالرزق والأرض الموزعة للطعام..
ومناظر الجنان البهيجة..
.
.
.
خلّصت من جولتك ؟؟
ومن تلفونك مع بنت أختك؟؟

اللي خلق كل هذا رح يعجزه يبعثك ؟؟!

#القرآن_الجميل
#ARK

من فترة لمحت في البيت "مــج" عليه صورتي..
رحت لإمي بقلها شو هاد...مين عمله؟
حكتلي أنا لما إنت كنت مسافر..

فأنا بقلها شو من وين نزلت عليك الحنيّة؟ مش على أساس ندمانة على خلفتي ")
قالت آه أكيد بس وقتها اشتقتلك..
خلص اكسره لو بدك...الحق عليّ ")
.
.
هالموقف البسيط ذكرني بعبارة إنه قلب الأم دايما مشغول بالبعيد..!
أي إم بغيب عنها ابنها بتنشغل فيه عن بقية ولادها..
وبصير حاضر دايما علسانها وكلامها وجوا دعواتها..
وبتحرص ما تفوّت لحظة تتواصل فيها مع ابنها البعيد عنها حتى تتطمن عليه وعلى صحته..
وبتقوم بالليل بس لتبعتله مسج: أكيد إنت منيح؟؟
أو خلص يلا ارجع طولت واشتقنالك..

ممكن ولادها القريبين منها أحسن بكثير من البعيد..
لكن حتى ولو قلبها حيضل مشغول بالبعيد حتى يرجع..!
.
.
---------
لما أفتح القرآن بصادف آيات كثيرة زي قلب الأم بالضبط...!
آيات مشغولة بالبعيد..
آيات بتنادي عالبعيد حتى تذكره برحمة ربنا وسعة عفوه..
بتحكيله إنه ربنا رح يقبلك بمجرد ما أقبلت عليه بصدق..
وإنه رحمة ربنا وسعت كل إشي وأكيد رح توسعك..

آيات شغلها الشاغل تنادي عالبعيــــد..
تستعطفه..
تستجديه..
تلامس قلبه..
تستحث دمعته..

وتحكيله تعااال !

- وَهُوَ الَّذِي يَقْبَلُ التَّوْبَةَ عَنْ عِبَادِهِ وَيَعْفُو عَنِ السَّيِّئَاتِ وَيَعْلَمُ مَا تَفْعَلُونَ.
- وَاللَّهُ يُرِيدُ أَنْ يَتُوبَ عَلَيْكُمْ.
- فَمَنْ تَابَ مِنْ بَعْدِ ظُلْمِهِ وَأَصْلَحَ فَإِنَّ اللَّهَ يَتُوبُ عَلَيْهِ إِنَّ اللَّهَ غَفُورٌ رَحِيمٌ
- أَفَلَا يَتُوبُونَ إِلَى اللَّهِ وَيَسْتَغْفِرُونَهُ وَاللَّهُ غَفُورٌ رَحِيمٌ

- وَإِذَا جَاءَكَ الَّذِينَ يُؤْمِنُونَ بِآيَاتِنَا فَقُلْ سَلَامٌ عَلَيْكُمْ ۖ كَتَبَ رَبُّكُمْ عَلَىٰ نَفْسِهِ الرَّحْمَةَ ۖ أَنَّهُ مَنْ عَمِلَ مِنكُمْ سُوءًا بِجَهَالَةٍ ثُمَّ تَابَ مِن بَعْدِهِ وَأَصْلَحَ فَأَنَّهُ غَفُورٌ رَّحِيمٌ

- قُلْ يَا عِبَادِيَ الذِينَ أَسْرَفُوا عَلَى أَنفُسِهِمْ لَا تَقْنَطُوا مِن رحْمَةِ اللهِ إِن اللهَ يَغْفِرُ الذنُوبَ جَمِيعاً <3
.
.
بالضبط مثل قلب الأم..
حيضل مشغول بإبنها البعيد حتى يرجــــع !

#القرآن_الجميل
#ARK

قَدْ بَدَتِ الْبَغْضَاءُ مِنْ أَفْوَاهِهِمْ < وَمَا تُخْفِي صُدُورُهُمْ أَكْبَرُ ۚ

#القرآن_الجميل
#ARK

يَا أَيُّهَا الَّذِينَ آمَنُوا لَا تَتَّخِذُوا بِطَانَةً مِّن دُونِكُمْ لَا يَأْلُونَكُمْ خَبَالًا وَدُّوا مَا عَنِتُّمْ قَدْ بَدَتِ الْبَغْضَاءُ مِنْ أَفْوَاهِهِمْ وَمَا تُخْفِي صُدُورُهُمْ أَكْبَرُ ۚ قَدْ بَيَّنَّا لَكُمُ الْآيَاتِ ۖ إِن كُنتُمْ تَعْقِلُونَ (118)

يا مؤمنين ما تتخذوا أخلاء وأصدقاء من غير المؤمنين أو المنافقين والمخادعين وتطلعوهم على أسراركم وخواص أحوالكم..

همّه ما بقصروا في طلب مضرتكم وفساد حالكم..
وبتمنوا يصير معكم أشياء رح تضركم..

كراهيتهم بدت في كلامهم وعلى لسانهم بالطعن فيكم وبدينكم وإفشاء أسراركم..
ولسه الموجود في قلوبهم أكبر وأكبر..

قَدْ بَيَّنَّا لَكُمُ الْآيَاتِ ۖ إِن كُنتُمْ تَعْقِلُونَ

- بشو صافن؟
* بشغلة..
- شو الشغلة؟
* خلص شغلة فش داعي تعرفي..
- عفكرة إنت جد نكد..
كل ما أتذكر وقت كتب كتابنا باجي رح أنجلط..!
لما صرت تحكيلي إنه هاي الدنيا ما فيها سعادة مطلقة..
وإنه السعادة الحقيقية في الجنة..
وقال شو لما صرت تحكي: الله يحسن ختامنا!!
يعني مشان الله حد وقت الكتاب بحكي الله يحسن ختامنا..!!
يعني أكيد آمين..وبعرف إنه الدنيا فش فيها سعادة مطلقة..
بس ليه بلحظة زي هيك وغيرها بتحب تنكد وتعملّي فيها الزاهد والورع وأبو قلب معلق بالآخرة.. : \

* ههههه والله وقتها كنت شاد عحالي بعترف..
حسيت إنه لازم أثبتلك إني حدا منيح..
الوقت قبل كتب الكتاب ما أسعفني أوضح هالنقطة منيح..
وما لقيت غير هداك الموقف أثبتلك فيه إني بعز الفرحة ما نسيت الآخرة..
هههه خلص آسف..

- بعد شو آسف..: \
.
.
* بتحبيني !
- ما رح أجاوبك..وما تسألني أسئلة زي هيك بهيك موقف لإني لسه زعلانة!
* طيب جاوبي جد..؟
- بشرط تحكيلي بشو كنت صافن ؟
.
.
* ممم كنت بفكر إنه ليه لما حدا بدو يثبت حبه للطرف الثاني بحكيله:
إن شاء الله يومي قبل يومك!
ليه أنا بحس إنه لازم العكس؟!
يعني لو أنا متت قبل الطرف اللي بحبه فهذا يعني إنه رح يتألم ويعاني ويتوجع على فراقي ورح يعيش بحزن طول حياته..
وبالتالي لو هو مات قبلي أنا بتحمل عنه هالوجع والألم والمعاناة..
فاهمة علي ولا بخبص..؟؟

- اسمع إنت جد بتفكر بهيك إشي؟
مش معقول إنت !!

*هسا بحكي جد..
فهمتي علي؟ أنا شايف إنه غلط نحكي يا رب يومي قبل يومك..

- آآآه.. يعني نحكي إن شاء الله يومك قبلي يومي !! هيك أحسن..؟؟

* لا مش شرط تنحكى أصلا..بس بحكي من ناحية المبدأ..

- من ناحية المبدأ بتفق معك..
إنه آه العبرة مين يتحمل وجع الفقد عن الثاني..
أول مرة بنتبه للموضوع من هالناحية..
بس تذكر بدون ما نصرح فيها..
لإنه مش مناسب..
كما.....

يا اسمع سكّر هالسيرة مشان الله..
والله بتوجِّع !

* آه والله بتوجِّع..
خلص آسف..
طيب وين جواب الشرط؟؟

- آه بحبك !
.
.
.

*************
- كثير في إصابات في الحادث؟؟؟
* السيارة الاولى صحابها كسور ورضوض وواحد منهم مخطر..
والسيارة الثانية زلمة وزوجته

ماتوا للثنين " مع بـعـض" !

#ARK
* الكومنت الاول "مهم جدًا"

الهدف من هالقصة..
إنها تدفعنا نفكر بشكل مختلف اتجاه الناس اللي بنحبهم وفارقوا الحياة قبلنا..

بتذكر مرة بنت تواصلت معي ومش قادرة تتجاوز مشاعر الألم بعد فقدانها لإمها..
ووقتها قلتلها طيب شو كان حيصير لو إنت اللي توفيتي قبل إمك؟؟
وقتها قالت كانت إمي رح تموت من حسرتها عليّ !

فقلتلها طيب.. هي إنت حملتي الحسرة والوجع والألم عن إمك..
فكوني بنت منيحة وتصرفي بحياتك بالشكل اللي يرضيها..

هالحوار نفسه كان يستخدمه الطبيب النفسي فرانكل مع المراجعين إله..
فمثلا أجاه طبيب مش عارف يعيش بعد وفاة زوجته..
وصار بينهم الحوار التالي:

- فرانكل: ما الذي كان يمكن ان يحدث لو أنك توفيت أنت أولا؟
-الطبيب: كان هذا سيكون أمرا رهيبا للغاية، إذا كانت ستحس باللوعة والمعاناة!

- فرانكل: هكذا ترى، يا دكتور، أنها كانت ستعيش تلك الآلام وهذه المعاناة، وأنك أنت الذي عشت من أجلها تتحمل المعاناة، وعليك الآن أن تضحي من أجلها بالبقاء وبتقديس ذكراها!

لم ينطق الطبيب بكلمة واحدة..وصافح الدكتور ومضى في طريقه.

يقول فرانكل: إن المعاناة تتوقف عن أن تكون معاناة بشكل ما في اللحظة التي تكتسب فيها المعاناة معنى، مثل معنى التضحية. <3

تتذكر لما أجاك صاحبك يشكيلك من ذنوب وقع فيها..
وإنت وبشكل عفوي صرت تحكيله عن رحمة ربنا وسعـــة عفوه ومغفرته..
وصرت تذكّره بكل الآيات والأحاديث اللي بتعرفها عن التوبة..

وقتها خبرته إنه الندم توبة....وإنه ربنا الرحيم حاشاه ما يقبل توبتك..
وعادي أهم إشي تتعلم من أغلاطك وتزاحمها بطاعات..

لحظتها حكيتله كثير أشياء احتوته وطبطبت عليه ورسمت ابتسامة صغيرة عوجهه..
وقلك شكرًا من كل قلبه..
.
.
طيّب ليه إنت لما تغلط وتوقع بذنوب بغيب عنك كل الأمور اللي ذكرتها لصحابك!
ليه وإنت اللي دايما بتذكّرالناس برحمة ربنا بخلت فيها على نفسك..؟
ليه بتبشر الناس بالتوبة وبتستسلم ليأسك..؟
إنت اللي دايما بتحسن الظن بربنا وبتحكي أكيد رح يستر عفلان ويرحم فلان ويسامح فلان ليه نسيت حالك؟
وليه ما بتعامل نفسك لما تغلط بنفس المنطق اللي بتعامل فيه غيرك؟
.
.
وكيف بترجو الله لغيرك، وما بترجوه لنفسك؟

-----------
تتذكر لما حكيت لصحابك آية:

إِنَّ رَبَّكَ وَاسِــــــــــــــــــعُ الْمَــغْفِـــرَةِ

ما تنسى إنها كمان بتوسعك ")

#القرآن_الجميل

#ARK