بكل براءة بحكي لاختي: حاس البنات كلهم صايرين حلوين!
وبنفس الوقت كلهم بشبهوا بعض..

فهي حكتلي: عيب عليك...وإنت ليه ما بتغض بصرك؟!!
فانا قلتلها والله مش قصدي آســـف، يعني بحكي بالمجمل : \

فهي مشكورة قعدت معي قعدة وشرحتلي فيها عن بعض المستحضرات اللي بستخدموها البنات في الواقع، وعن بعض الفلاتر والأشياء في العالم الإفتراضي واللي من خلالها بصيروا يشبهوا بعض وبصيروا كمان حلوين..!

المهم في كثير مقالات وكتب وأبحاث بتحكي عن تاريخ الجمال..
يعني مثلا عند العرب قديما كانوا يكتبوا الشعر ويتغنّوا في المرأة "الممتلئة"، وكانت توصف بـــ ( خرساء الأساور) يعني الأساور ما بتتحرك بإيديها المليانة ")

وعند اليونان والرومان القدماء كان أغلب تركيزهم على جمال الرجل مش المرأة..
وفي الثقافة المسيحية في القرون الوسطى ما كان في اهتمام بالجمال لإنهم كانوا ينظروا للمرأة كرمز للخطيئة، وكانوا يوصفوا البنت الحلوة بـــ( فخ الشيطان).. وبالتالي حتى البنت الحلوة فيهم تخلّي وجهها شاحب دلالة على الطهر والعفة والتربية الفاضلة..

بعصر النهضة صار الجمال مقتصر عالطبقة الأرستقراطية.. وكان معيار الجمال هو الوجه والخصر فقط، وكانت أصلا طبيعة ملابسهم فساتين منفوخة من تحت وضيقة من جهة الخصر.
ومن لحظتها بدء استخدام المكياج للوجه والمشدات اللي بتخفي الترهلات جهة الخصر..
.
.
.
إحنا الآن بنعيش في زمن زي ما صارت "ستوري" الإنستجرام تاعت البنت الأمريكية وهي بتشرب من ستاربكس، نفس "ستوري" البنت العربية..

صارت حتى معايير الجمال مشتركة بينهم وبين كل العالم..
(الجسم المثالي، نسبة الدهون ما بتزيد عن كذا، البشرة صافية، الحواجب مرفوعة، الأنف صغير، الشفايف منفوخة، ويفضل وجود غمازة .. وحتى طريقة التصوير لازم تكون بشكل ووضعية معينة..الخ)

المشكلة بالرغم من كل هالمستحضرات والفلاتر إلا إنه الأبحاث بتشير لأضرار نفسية هائلة بتعرضوا إلها البنات في معركــــة الجمال..!

الابحاث بتحكي عن تدني صورة الذات Self Image.. لدرجة صرت تلاقي البنت بمجرد ما قعدت مع طرف آخر بتصير تعتذر عشانها مليانة شوي أو عشان انفها مش صغير أو عشان وجهها مش صافي أو إنها قصيرة\ طويلة كثير..!

فضلا عن الأضرار النفسية المتعلقة بالاكل والمظهر والحمية القاسية اللي بتضطر بعض البنات تمشي فيها، وهذا بسبب امراض مثل "فقدان الشهية العصبي" أو " الشره العصبي للأكل".

غير إنه هالمعركة ساهمت في تدني مستوى الاهتمامات والطموحات عند البنات..
هي بس مشغولة كيف تصير احلى!
مش مهم دراسة وشغل وثقافة وعلم بقدر ما مهم أكون أحلى..

هالمعايير واللي بنشوف مظاهرها على وسائل التواصل الإجتماعي ساهمت في كثير حالات اكتئاب وضياع وتوتر وحتى انتحار..!
.
.
------------
هالمعايير الغربية للجمال انطلقت ببساطة من منظومة مادية، بتشوف كل هالعالم من نظرة مادية وآخر اهتمامها روح الإنسان وجوهره..

ما في بنت ما بتحب تكون حلوة..
ودينّا ما ركّز عالروح واغفل الجسد..
الدين وازن بين فطرة التزين وفطرة الستر..
هالموازنة اللي انتجت زينة ظاهرة ممكن نكشفها، وزينة باطنة لازم نسترها..

هالموازنة الهدف منها تحرر البنت من معركة الجمال الموهومة!
تحررها من اكتئابها وضياعها وشتاتها ومن عالم المقارنات اللي فرضته عحالها..
هالموازنة حريصة تلفت انتباه الناس لروحها مش لجسمها وشكلها..
حريصة تحررها من نظرات الجشع والشهوة والطمع في عيون الناس إلها..
حريصة تبيّن إلها إنه في احلام وطموحات أسمى تقاتلي عشانها..

وإنه الله ما بنظر لأشكال الناس وصورها وجمالها..
لكنّه بنظر

لقلوبها..!
.
.
.

#ARK

من سنوات تواصلت بنت ملحدة مع آرك وجرى بينا نقاش طويل..
وبعد ما قادنا النقاش لإثبات وجود الله وصحة الإسلام..
وفي اللحظة اللي كان من المفترض تتشهد فيها وترجع للإسلام...
قالت: لأ...ما بدي!

هالموقف أثر فيي جدًا، وحزنت من كل قلبي عليها..
خصوصًا إنه رفضها كان مجرد تكبّر وجحود، وهي اعترفت إنه الدين صح بس هي ما بدها لأسباب ما بنفع أذكرها حفاظا على خصوصية صاحبة القصة..

أيام معدودة تواصل مجموعة من البنات والشباب واللي كان منهم تارك الإسلام أو على شفا حفرة يتركه..
وكلهم بلا استثناء انتهى النقاش بــــ
( لا إله إلا الله..محمد رسول الله)!
.
.
.
في آية عجيبة في سورة المائدة:
يَا أَيُّهَا الَّذِينَ آمَنُوا مَن (يَرْتَدَّ مِنكُمْ) عَن دِينِهِ فَسَوْفَ يَأْتِي اللَّهُ (بِقَوْمٍ يُحِبُّهُمْ وَيُحِبُّونَهُ) أَذِلَّةٍ عَلَى الْمُؤْمِنِينَ أَعِزَّةٍ عَلَى الْكَافِرِينَ يُجَاهِدُونَ فِي سَبِيلِ اللَّهِ وَلَا يَخَافُونَ لَوْمَةَ لَائِمٍ ۚ ذَٰلِكَ فَضْلُ اللَّهِ يُؤْتِيهِ مَن يَشَاءُ ۚ وَاللَّهُ وَاسِعٌ عَلِيمٌ.

برتد منكم (واحد)...بيجي بداله (قـــوم) !

العجيب إنه في هالآية الله ما يخوّف اللي برتدوا عن دينهم بالنار أو العذاب..
بخوفهم بالحــــــب!
بإنه رح يستبدلهم بقوم (يحبهم ويحبونه)!

الله ما حكى في الآية إنه رح يستبدلهم بقوم مؤمنين، صالحين، أتقياء..
هذا أمر مفروغ منه..
في مسافة عظيمة بعد هذا كلـــه..
وهي مســـافة

(المُحبيــن)!
.
.
------------
<3 !

#القرآن_الجميل
#ARK

هل سمعتم ب (جنة) ❤️😁

https://m.facebook.com/story.php?story_fbid=3604639516279798&id=103622369714881

- عادي أحكيلك إشي وما تحكي عني مجنونة!
- آه..
- نفسي أجرب حياة البشر!
- هههه مجنونة..شو عاجبك بحياة البشر؟!
- نفسي أخوض صراعهم في بحثهم عن الخير والحق، في بحثهم عن معنى لحياتهم، في صراعهم مع شهواتهم ورغباتهم..نفس اجرب هالتناقض ما بين مشاعر فرحهم وحزنهم، شو نفسي أبكي وأضحك زيهم..
نفسي أحب واكره واتألم وأفرح واجهل وأتعلم، أنظلم وأسامح، اظلم واستسمح، أغلط وأتوب...نفسي أعيش كل هالمشاعر زيهم..
نفسي أصحى زيهم الصبح وأشرب قهوة!

- غريبة!
يعني ما شفتي كيف هالبشر نفسهم بتمنوا لو الله ما خلقهم؟
كم مرّة شفنا ناس بتتوجع وبتتألم وبتفكّر تنتحر..؟
كم مليون مرة سمعنا عن ناس نفسها ترجع عدم..؟
كم ناس سيطر عقلوبها الظلم والجشع والطمع والحسد والغل والكبر!!
مجرد التفكير إنه نكون بشر فكرة مرعبـــــة..
بكفي هالفكرة كفيلة تعيّشك بصراع ممكن يخليك تنسي الله..!
في أبشع من هيك؟؟

- مستحيل لو كنت بشر أنسى الله!
- هههه والناس اللي بنشوفهم نسيوه!!
- بحس حالي غير عنهم..يعني آه لو انخلقت ممكن أضعف وأغلط بحكم إني بشر وبعيش صراع تقدّر عليّ ككائن بمتلك حرية إرادة...بس إلا (الله) مستحيل أنساه !

- ما بعرف كيف عندك الجرأة تفكري بهيك إشي مجرد تفكير..

- صدّقني ما بحس الصورة هالقد مأساوية وسوداوية عوصفك..
يعني حتى البشر اللي كنا نشوفهم بتمنّوا يموتوا ويخلصوا من هالحياة كنّا نشوفهم ثاني يوم متشبثين بالحياة بأدق تفاصيلها..
وما تنكر إنه كمان الحياة فيها تفاصيل حلوة ومدهشة..
زي إنهم بحكوا مع الله، بحسوا بشعور القرب منه، بعيشوا مشاعر الحب والصدق والإيثار والخير والعطاء..
ووو بشربوا قهوة!

- يييي هالقد ميتة على القهوة!
أصلا بسمعهم دائما بحكوا عنها مرّة..

- بس مع ذلك بشربوها!

- قصدك تحكيلي زي حياتهم؟؟

- آه بالضبط..بالرغم من مرارتها إلا إنهم بستسيغوها وبحبوها..
مش بس القهوة، يعني كتير أشياء بحياتهم في ظاهرها مرّ وشر وألم وجهد وتعب..مع ذلك وبكل إرادتهم بعيشوها..

أصلا معنى حياتهم بتمثّل بالآلم والمصاعب اللي بمروا فيها..
يعني كيف رح يشعروا بقيمة النعم لو ما انحرموها..؟
كيف رح يشعروا بقيمة الصحة بدون ما يمرضوا ويفقدوها..؟

كل إشي بحياتهم بتجلّى معناه بعد المعاناة!

- يعني حابة تصيري بشر؟!
- آه...
- بس أكيد بتعرفي إنه ربنا رح يقدّر عليك أشياء، يعني ما رح تختاري شكلك ولا لونك ولا لغتك ولا اهلك ولا وطنك ولا إشي!!

- عادي..
مش الله ما بحمّل حد فوق طاقته؟ ورح يكون اختباره ضمن طاقته ووسعه..؟
يعني هو ما رح يقدّر عليّ أشياء او يبتليني ببلاء إلا وانا بمتلك طاقة وقوة أصارعه وأتحداه وأقهره..صح؟

- أكيد صح.. الله عادل ورحيم ^^
ممممم بس خايف تنسي الله!

- يا رب..لأ..
ما رح أنساه..وعد!
---------------------------------
نفخ الله من روحه في الخلايا والدم فحسيت بحركة..
وأنا متكورة عحالي والمكان كله ظلام وبخوّف..
في ملايين من الخلايا بتصنع المخ‏،‏ وملايين الخلايا بتصنع العظام‏، وملايين الخلايا بتصنع شبكة الأعصاب‏، وبلايين الخلايا اللي بتصنع بقية الجسد. والغريب أنه كل خلية كانت تعرف طريقها علما إنه الدنيا كثير عتمة..!

وفجأة..

شلال من نور هطل عليّ..
دثار دافي أحاط بروحي..
وميض من ضوء سافر بعروقي..
ملك من السما تسلل لقلبي..
ونسمة نور بعد ظلام طويل حضنتني..

لحظة ما ربنا قدّر يوجدني!!
.
.
------------
وقررت ماما تسمّيني

قـــــدر! <3

#ARK

كيف ممكن لبنت فهمانة وعاقلة وواعية تتعلق بشب سطحي وتافه؟
وهي بتعرف إنه هالشب إله علاقات متعددة وما رح ينظر إلها بشكل مختلف عن بقية البنات اللي بعرفهم؟!

ونفس السؤال للشب..؟

كم مرة صادفنا بنت منيحة كانت ضحية لشب مريض قدر يضحك عليها ويدمر حياتها؟
ولما سألناها طيب كيف هيك؟ كيف سمحتي إله يجرّ رجلك للغلط؟ وين عقلك لحظتها؟

وهي تجاوبنا: ما بعرف!
.
.
ليه الشرير عادة بظهر أذكى من الإنسان الخيّر..؟
والملحد أذكى من المؤمن..؟
والسيء أشطر من المحترم ؟
والخائن أكثر عبقرية من الوفي؟

ليه بتجذبنا الشخصيات المريضة والمعقدة أكثر من الشخصيات الطيبة؟
وليه بنبتسم بإعجاب لما نصادف فيلم أو رواية فيها شخصية شريرة؟
.
.
إحدى التفسيرات باعتقادي ما يسمى في علم النفس الإجتماعي:
(الاحتفاز العقلي لمواجهة التنافر المعرفي)
والتنافر المعرفي: حالة نفسية أولية بتنشأ من مخالفة السلوك للمعرفة الداخلية.
نفس فكرة الطبيب المدخن.

يعني الطبيب بمتلك معرفة إنه الدخان مضر بالصحة وهذا بتعارض من سلوكه كونه مدخن..صح؟

هسا للنفس آليات مختلفة في مواجهة التنافر المعرفي منها مثلا: التحفيز العقلي..
إنه يستخدم عقله بشكل لوهلة ممكن نشوفه منطقي لكنه في حقيقته فاسد ومش منطقي.

زي مثلا يقلك: هي السكّري بموّت ليه الناس لما تشوفك بتاكل شوكلاته ما بتحكي إشي معك؟

أو الحرامي لما يقلك: كل الناس بتسرق؟
او الشب لما يقلك البنات همه اللي ببعتولي!
فلانة هي اعطتني مجال أنا ما جبرتها على إشي؟!
.
.
هالتحفيز العقلي وإن كان مبني على مغالطات منطقية لكنه في كثير من الاحيان بظهر بشكل فريد وعبقري.
لما الملحد يبرر إلحاده، والفاسد فساده، والخائن خيانته، والجَشِع جَشعه، والشب علاقاته..
كلهم رح يبرروا بشكل متحايل وذكي وعبقري واحيانا مدهش و واو !!

وهذا رح يدفع كثير ناس تقتنع بكلامهم او تبرر أفعالهم او تحاول تقترب منهم..

وحتى لو صرّحنا بمعارضتنا إلهم، في بعض الناس رح ينظر إلهم باعجاب كونهم ظفروا بمتع وملذات بترفضها مبادئهم وضمائرهم..
--------------
.
.
الخلاصة:
ما تسمحوا لناس بتضحك عحالها إنها تضحك عليكم ")

#ARK

مرة كنت في بلد أجنبي ودخل وقت الصلاة وما في مكان أصلي فيه..
فأخذت زاوية بطرف الشارع وقلت "الله أكبر"

ما لحقت احكي "الله أكبر" إلا بنت وقفت جنبي وصارت تتفرج عليّ..
صراحة وقتها انعجقت عالمزبوط ")

خلصت الصلاة وتفرجت لأشوف مين هالبنت إلا هي بنت روسية "")

- عادي سؤال؟
- تفضلي..
- إنت كنت بتصلي صح؟
- آه..
- يعني بتحكي مع الله؟
- آه..
- يعني جد بتحس بشعور إنك بتحكي معاه؟
- آه..

بكل دهشة قالت: شو نفسي أحس هيك!
وضلت رايحة..
.
.
بعد هالموقف صفنت بسؤالها وجوابي..
وقلت يا ترى انا لما أصلي فعلا بكون مستشعر إني بحكي مع الله؟

ومن وقتها صارت نظرتي للصلاة إني بحكي مع الله!
صرت أحاول أستشعر إني فعلا بذكره وبدعيه وبحكي معاه..

حتى إني صرت حريص أربط كل صلاة بأحداث يومي..
يعني الصلاة اللي بصليها بعد ذنب أذنبته بتكون فيها دعوات إنه ربنا يسامحني..
الصلاة اللي بكون قبلها زعلان او مزعوج بدعيه يساعدني ويخفف عني..
الصلاة قبل السفر إنه يارب يسر طريقي..
الصلاة اللي بصليها في بيت أختي بدعي فيها لاختي وزوجها وولادها..
مرة حدا ساعدني ببنشر السيارة فكانت صلاة العصر بتحمل دعوات إله في سجداتها..

كل صلاة مربوطة إما بحدث سابق أو لاحق إلها..
وبحرص فيها أذكر ربنا وأعظمه وأحكيله إني بحبه رغم كل أغلاطي وضعفي وتقصيري..
.
.
القرآن دائما بذكرنا إنه الهدف من الصلاة "الذكــــر"
إنك تُذكر ربنا وتتذكره بكل تفاصيل يومك وحياتك..

إِنَّنِي أَنَا اللَّهُ لَا إِلَٰهَ إِلَّا أَنَا فَاعْبُدْنِي وَأَقِمِ الصَّلَاةَ لِــذِكْرِي.

حتى الآية اللي بتحكيلنا إنه الهدف من الصلاة النهي عن الفحشاء والمنكر:
وَأَقِمِ الصَّلَاةَ ۖ إِنَّ الصَّلَاةَ تَنْهَىٰ عَنِ الْفَحْشَاءِ وَالْمُنكَرِ

تكملتها:
وَلَذِكْــــرُ اللَّهِ أَكْبَـــــرُ ۗ وَاللَّهُ يَعْلَمُ مَا تَصْنَعُونَ.
.
.
---------------
لو استشعرت فعلا إنه صلاتك ذكر وحكي مع ربنا رح تتغير حياتك..
ورح تمر عليك اوقات تستنى فيها الصلاة حتى تفضفض لربنا شو بقلبك..
حتى تغسل روحك وتخفف من حمل ظهرك..

رح تيجي لحظة تستعجل خطواتك لمكان صلاتك..

في موضوع شاغل بالك بدك تحكيه لـــ ( الله ) !

#القرآن_الجميل
#ARK

أحيانا إنك تضرب اللي قدامك كفّ أفضل بمراحل من إنك تحكيله كلمة سيئة أو جارحة..

أجروا مجموعة من الدراسات على بعض المساجين وسألوهم لو بإمكانكم تنتقموا من سجّانينكم مين بتختاروا فيهم؟
معظم الإجابات اختارت السجّانين اللي كانوا يتلفظوا بألفاظ سيئة ومهينة إلهم..
يعني لو خُيّر الشخص فيهم إنه ينتقم من السجّان اللي ضربه وعذبه أو السجّان اللي غلط عليه وسبّه كان الاختيار يقع ع اللي غلط عليه وسبّه وأهانه..!

ألم الإهانة اكبر بمراحل من ألم الجسد أو الضربة..
وفي الوقت اللي بتتلقى فيه ضربه على جزء من جسدك، بتهزّ الكلمة السيئة كل كيانك..
ألم الضربة بصيبك من برا، لكن ألم الكلمة بنخر في روحك من جوا..!
وجع ضربة الجسد بزول بعد ساعات غالبا، وألم الكلمة بلازمك للأبد..

يا ترى الناس شو بتخسر لو حكت كلام منيح وحلو؟
شو بتخسر الإم لما تحكي لإبنها الله يرضى عنك..
والصاحبة لصاحبتها حليانة أو اشتقتلك..
والأخ لأخوه أبشر..
والزوج لزوجته تكرم عينك..
والزوجة لزوجها حاضر..

ترى في ناس ما بناموا الليل من كلمة انحكت إلهم..
وناس انقهر قلبها عتعليق وصلهم..
وناس انتحرت لإنه ما حدا حكالهم كلمة حلوة بحياتهم..!
.
.
دائما دائما القرآن بلامس روحي لما يخاطبنا بعتب ويحكيلنا:
يَا أَيُّهَا الَّذِينَ آمَنُوا لا يَسْخَرْ قَومٌ مِنْ قَوْمٍ عَسَى أَنْ يَكُونُوا خَيْرًا مِنْهُمْ وَلا نِسَاءٌ مِنْ نِسَاءٍ عَسَى أَنْ يَكُنَّ خَيْرًا مِنْهُنَّ وَلا تَلْمِزُوا أَنْفُسَكُمْ وَلا تَنَابَزُوا بِالألْقَابِ بِئْسَ الاسْمُ الْفُسُوقُ بَعْدَ الإيمَانِ وَمَنْ لَمْ يَتُبْ فَأُولَئِكَ هُمُ الظَّالِمُونَ.

أو لما يحذرنا ويخوفنا:
وَالَّذِينَ يُؤْذُونَ الْمُؤْمِنِينَ وَالْمُؤْمِنَاتِ بِغَيْرِ مَا اكْتَسَبُوا فَقَدِ احْتَمَلُوا بُهْتَانًا وَإِثْمًا مُبِينًا

ولمّا يوصينا وصية عامة نستخدمها بكل تفاصيل حياتنا:
- وَقُولُوا لِلنَّاسِ حُسْنًا
- وَقُلْ لِعِبَادِي يَقُولُوا الَّتِي هِيَ أَحْسَنُ

وفي الحديث:
- ليس المؤمن بالطعان ولا اللعان ولا الفاحش ولا البذيء.
- اتّقوا النار ولو بشق تمرة فإن لم تجدوا فبكلمة طيبة.
- إن من موجبات المغفرة بذل السلام وحسن الكلام.

-------------
في يوم من الأيام اختلف سيدنا عثمان وعلي، فعاتبه سيدنا عثمان..
وسيدنا علي ساكت بدون ما يجاوبه..

فسأله عثمان: ما لك لا تجيبني؟
فجاوبه علي:

إن قلت لم أقل إلا ما تكرهه..
وليس لك عندي إلا ما تُحب <3 !
--------
ممكن من اكبر النعم اللي ممكن تحظى فيها بحياتك، إنه ربنا يرزقك حد ما بتسمع منه إلا الكلمة الحلوة اللي بتصنع يومك!

#القرآن_الجميل
#ARK

إمي بتخبرني قصة عن وحدة من صاحباتها كانت بتقوّر كوسا..
ولما كان ضايل عليها بس 3 كوسيات أذّن..

المنطق إنها تكمل تقوير هال3 كوسيات وتخلص منهم بعدين تقوم تصلي أو تعمل شو ما بدها..

لكن هالمرأة كانت ماخذة عهد على نفسها إنه ما يأذن إلا تقوم مباشرة وتترك كل إشي بإيديها وتلبي نداء ربنا..

وكانت تحكي للناس دائمًا:
كلنا لما يدق باب البيت بنترك كل إشي بإيدينا وبنقوم نشوف مين عالباب، ولو كان ضيف فمش من عاداتنا نأخر الضيف ونخليه واقف عالباب يستنى!

كان صوت الأذان بالنسبة إلها ما بختلف عن صوت طرقات الباب..
وكانت بتشوف إنه استجابتها السريعة لطرقات البشر على الأبواب ما لازم تختلف عن استجابتها السريعة لنداء الله:
حيّ على الصلاة، حيّ على الفلاح..
.
.
تركت هال3 كوسيات وقامت تلّبي نداء الله..
توضت ولبست أواعي الصلاة وكبّرت ودخلت في صلاتها..

وماتت وهي ساجدة!
.
.
.
إِنَّ الَّذِينَ هُم مِّنْ خَشْيَةِ رَبِّهِم مُّشْفِقُونَ (57) وَالَّذِينَ هُم بِآيَاتِ رَبِّهِمْ يُؤْمِنُونَ (58) وَالَّذِينَ هُم بِرَبِّهِمْ لَا يُشْرِكُونَ (59) وَالَّذِينَ يُؤْتُونَ مَا آتَوا وَّقُلُوبُهُمْ وَجِلَةٌ أَنَّهُمْ إِلَىٰ رَبِّهِمْ رَاجِعُونَ (60) أُولَٰئِكَ يُسَــــارِعُونَ فِي الْخَيْرَاتِ وَهُمْ لَهَا سَابِقُونَ (61)

#القرآن_الجميل
#ARK

- في شب صافن من شباك الباص بفكّر بمصاريف دراسة أخته وبقول يا رب ارزقني وافتح عليّ..
يا رب ما تحرمني من ضحكتها لما أحكيلها إني أمّنت أقساطها.. .
الملائكة أمّنت على دعائه وربنا كتبله أجر "المجاهد"!

- وبنت نامت وقلبها بوجعها من همومها وأحزانها..
لما صحيت قررت تقرأ أذكار الصباح..
ولما مرّت على:
يَا حَيُّ يَا قيُّومُ بِرَحْمَتِكَ أسْتَغِيثُ أصْلِحْ لِي شَأنِي كُلَّهُ وَلاَ تَكِلْنِي إلَى نَفْسِي طَـرْفَةَ عَيْنٍ.

يبدو إنه هالدعاء طلع من قلبها..
وربنا الكريم أصلح كل شأنها وبلحظات تلاشى وجعها وحزنها..

- في شب نام على معصية، هو ندم كثير على غلطه ولام نفسه ليه بضل يرجع لنفس الغلط؟؟ وقال يارب ساعدني..
الله صحّاه يصلّي الفجر...وهو بطريقه للمسجد ردد دعاء حفّظه إياه سيده وهو صغير لما كان يروح معاه عالمسجد:

اللهم إني أسألك بحق السائلين عليك وبحق ممشاي إليك، فإني لم أخرج أَشَرًا ولا بَطَرًا ولا رياءً ولا سمعة، خرجت اتقاء سخطك وابتغاء مرضاتك، أسألك أن تنقذني من النار، وأن تغفر لي ذنوبي، إنه لا يغفر الذنوب إلا أنت.

و (الله) غفرله !

- "نور" راحت بيوم تصلي الظهر في مصلى الكلية، صادفتها بنت وتعرفت عليها ولما عرفت إنه اسمها نور خبرتها عن دعاء كثيييير حلو بحمل اسمها:

اللهم اجعل في قلبي نوراً، وفي لساني نوراً، وفي بصري نوراً، وفي سمعي نوراً، وعن يميني نوراً، وعن يساري نوراً، ومن فوقي نوراً، ومن تحتي نوراً، ومن أمامي نوراً، ومن خلفي نوراً، واجعل لي في نفسي نوراً، وأعظم لي نوراً.

هالموقف صارله 5 سنوات، ونور من وقتها ما بتشرق شمس ولا بتغيب بدون ما تدعيه..
وبكل مرة بتحط إيدها عقلبها وهي بتحكي: اللهم اجعل في قلبي نورا!

- كان كثير منسجم وهو واقف بسيارته عالإشارة بدعي.
كان منظره غريب بالنسبة للسيارات اللي جنبه..
ما كانوا بعرفوا إنه كان يحكي مع الله:

اللهمّ أنت حسبي حين تضيق الحياة وأنت المُنتصر حين يغلبني الوجع، اللهمّ أنت عوني ونجاتي حين أفقد الحيلة.

- اليوم أول يوم بتطلع فيه "زينة" بحجابها ولبسها الساتر..
كانت طايرة من الفرح وهي بتّمتم:
اللهم لك الحمد أنت كسوتنيه!
أنت كسوتنيه...أنت كسوتنيه يارب..
ثبتني عليه وجمّلني بالستر والعفاف..

كانت كل شوي تفتح كاميرا تلفونها حتى تشوف شكلها بالحجاب، وجننت كل صاحباتها وهي بتحكيلهم: لبست حجاااااااب ولبسي صار أستر.. ")

الغريب إنه "زينة" بتحكي لصاحبة إلها: حاسه حالي حـــــرة!!
مش مضطرة أتقيد بالموضة واللبس ومعايير الجمال اللي بفرضها المجتمع..
أنا هلأ حــــرة، أنا هلأ زينـــــة !

وبكل مرة بتشوف حالها بالمراي بتردد: أنت كسوتنيه!

كانت وقتها بتحكي مع (الله) !
.
.
.
- وإنت؟
حكيت اليوم مع (الله)..؟

#ARK

أي واحد فيكم جرّب يعمل (رجيم) رح يدرك كم أحيانا جدول الأكل بكون قاسي..
وأول ما تبلش رح تصير تسأل نفسك: معقول أنا كاين آكل وقت ما بدي عادي؟
يعني هسا وجبة الشاورما اللي ما كنت أفكر قبل ما أشتريها صرت أستنى يوم الFree عشانها ") !

ونفس الإشي للناس اللي بتلعب رياضة..
في أكثر الاحيان بتكون التمارين الرياضية فعلا قاسية..
ولو دخلت على أي نادي رياضي رح تلاحظ إنه في ناس بتبذل مجهود مش سهل أبدا..
في ناس بتصرّخ وبتتعذب وبتتعب وبتعرق وحالتها حالة..
وغالبا رح يتبادر لذهنك سؤال: شو جابرهم!!

بالرغم من قسوة الحمية الغذائية وقسوة التمارين الرياضية إلا إنه أصحابها بكونوا سعيدين جدا بإنجازهم..

مع الوقت بصير شعور إني أحكي للوجبة الفلانية لأ واستمر في جدولي الغذائي أحلى من شعور أكل الوجبة نفسها..

وإني أركض ساعة أو أرفع أوزان ثقيلة أحب إلي من من قعدة الكوفي شوب والأرجيلة!

الرياضة رغم قسوتها لكنها تعتبر علاج للإكتئاب بعادل عقار "بروزاك"..!
وعلماء الأعصاب إلهم أبحاثهم الكثيرة في تأثير الرياضة على خلايا المخ..

يعني شفت هذا ابو الجيم اللي بصرّخ بأعلى صوته حتى يرفع الأوزان وبتلاقيه بحسب أكله بالجرامات حتى ما يأثر على جسمه..؟

رغم قسوة هالشيء إلا إنه سعيد بنفسه، ومن خلال هالقسوة بحارب اكتئابه وتعاسته..
--------------------------

الكابتن في الجيم ربنا أعطاه حكمة عجيبة..
وكثير كان يقسوا على اللاعبين ويبهدلهم بس لإنهم كسروا جدول اكلهم، او ما لعبوا كامل تمارينهم..

دائما ما بمل من تذكير اللاعبين إنه لازم تتعبوا وتحرموا حالكم حتى تصلحوا أجسادكم..

وكمل كلامه وقال:
نفس الإشي أرواحكم..!

أرواحكم مستحيل تسمو بدون قسوة..
بدون قيود..
بدون كلمة لأ للغلط..
بدون ما تكسروا نومكم بصلاة الفجر..
بدون ما تتركوا كل إشي بإيدكم وتصلوا..
بدون ما تشيلوا من مالكم وتتصدقوا..

زي ما بتحكوا للأكل (لأ) رغم حبكم إله..
بدكم تحكوا للشهوة (لأ) رغم رغبتكم فيها..
.
.
القيود اللي بفرضها القرآن علينا بالرغم من صعوبتها وقسوتها أحيانا..
لكنها في الحقيقة بتكون لصالح خفة ورشاقة وسعادة أرواحنا..

ومع الوقت رح يجد المؤمن الصادق سعادته وحياته وطمأنينته وسلام روحه من خلال هالقيود..

من خلال كلمة (لأ)..

أكثر من سعادة الشب اللي قال (لأ) لكسله وطلع عالجيم..
أو سعادة البنت اللي قالت (لأ) لوجبة الشاورما ")

#ARK

من الأشياء الملفتة جدّا في القرآن تسلسله وتدرجه في تناول موضوع (المرأة) !

يعني الخطاب القرآني المكي بالمجمل بتناول المرأة بشكل عام وعابر من غير ما يخصص الخطاب إلها مباشرة أو حتى يذكر اسمها..
(امرأة عمران، أم موسى، امرأة فرعون).

مع الوقت وبمجرد ما انتقلت الدعوة للمرحلة المدنية رح نجد إنه الخطاب القرآني اختلف بشكل جوهري..
رح نلاقي سور قرآنية جاءت تتناول وتوضّح بعض القضايا الخاصة بالمرأة..
مثلُا: (سورة النساء، الحجرات، الطلاق، الاحزاب، الممتحنة، المجادلة)..

هذا التدرج في الخطاب كان ضروري جدًا في مجتمع قائم على انتقاص المرأة واحتقارها وعدم مراعاة حقوقها..

وبمدة قياسية جدًا استطاع القرآن يمهد لنوع من المساواة العادلة في الحقوق والواجبات ما بين الرجل والمرأة.

يعني سورة النساء أول آية فيها:
يَا أَيُّهَا النَّاسُ اتَّقُوا رَبَّكُمُ الَّذِي خَلَقَكُم مِّن نَّفْسٍ وَاحِدَةٍ وَخَلَقَ مِنْهَا زَوْجَهَا وَبَثَّ مِنْهُمَا رِجَالًا كَثِيرًا وَنِسَاءً ۚ وَاتَّقُوا اللَّهَ الَّذِي تَسَاءَلُونَ بِهِ وَالْأَرْحَامَ ۚ إِنَّ اللَّهَ كَانَ عَلَيْكُمْ رَقِيبًا (1)

وفي الحجرات إن أكرمكم عند الله أتقاكم:
{ يَا أَيُّهَا النَّاسُ إِنَّا خَلَقْنَاكُمْ مِنْ ذَكَرٍ وَأُنْثَى وَجَعَلْنَاكُمْ شُعُوبًا وَقَبَائِلَ لِتَعَارَفُوا إِنَّ أَكْرَمَكُمْ عِنْدَ اللَّهِ أَتْقَاكُمْ }

وفي التحريم بضرب مثل لكل العالم بامرأتين !
وَضَرَبَ اللَّهُ مَثَلًا لِّلَّذِينَ آمَنُوا امْرَأَتَ فِرْعَوْنَ إِذْ قَالَتْ رَبِّ ابْنِ لِي عِندَكَ بَيْتًا فِي الْجَنَّةِ وَنَجِّنِي مِن فِرْعَوْنَ وَعَمَلِهِ وَنَجِّنِي مِنَ الْقَوْمِ الظَّالِمِينَ (11) وَمَرْيَمَ ابْنَتَ عِمْرَانَ الَّتِي أَحْصَنَتْ فَرْجَهَا فَنَفَخْنَا فِيهِ مِن رُّوحِنَا وَصَدَّقَتْ بِكَلِمَاتِ رَبِّهَا وَكُتُبِهِ وَكَانَتْ مِنَ الْقَانِتِينَ (12)

وفي الأحزاب بحكيلنا إنه ما في فرق بينكم:
إِنَّ الْمُسْلِمِينَ وَالْمُسْلِمَاتِ وَالْمُؤْمِنِينَ وَالْمُؤْمِنَاتِ وَالْقَانِتِينَ وَالْقَانِتَاتِ وَالصَّادِقِينَ وَالصَّادِقَاتِ وَالصَّابِرِينَ وَالصَّابِرَاتِ وَالْخَاشِعِينَ وَالْخَاشِعَاتِ وَالْمُتَصَدِّقِينَ وَالْمُتَصَدِّقَاتِ وَالصَّائِمِينَ وَالصَّائِمَاتِ وَالْحَافِظِينَ فُرُوجَهُمْ وَالْحَافِظَاتِ وَالذَّاكِرِينَ اللَّهَ كَثِيرًا وَالذَّاكِرَاتِ أَعَدَّ اللَّهُ لَهُم مَّغْفِرَةً وَأَجْرًا عَظِيمًا (35)

وفي الممتحنة النساء ببايعوا الرسول مثلهم مثل غيرهم:
﴿ يَا أَيُّهَا النَّبِيُّ إِذَا جَاءَكَ الْمُؤْمِنَاتُ يُبَايِعْنَكَ عَلَى أَنْ لَا يُشْرِكْنَ بِاللَّهِ شَيْئًا وَلَا يَسْرِقْنَ وَلَا يَزْنِينَ وَلَا يَقْتُلْنَ أَوْلَادَهُنَّ وَلَا يَأْتِينَ بِبُهْتَانٍ يَفْتَرِينَهُ بَيْنَ أَيْدِيهِنَّ وَأَرْجُلِهِنَّ وَلَا يَعْصِينَكَ فِي مَعْرُوفٍ فَبَايِعْهُنَّ وَاسْتَغْفِرْ لَهُنَّ اللَّهَ إِنَّ اللَّهَ غَفُورٌ رَحِيمٌ ﴾

والأمثلة والشواهد من القرآن والأحاديث لتدرّج الخطاب -بشكل عبقري- كثيرة..
.
.
.
من المؤسف بصراحة إنه بعض الرجال وبعد أكثر من 1400 سنة من نزول الوحي مُصرّين ينظروا للمرأة بنظرة جاهلية..!
ونسيوا أو تناسوا خطابات الوحي المتكررة لترسيخ حقوقهم والتحذير من ظلمهم!

ومن المؤسف كمان إنه في بنات اقتطعت من النصوص على كيفها، وفسرتها على مزاجها وحكمت عالدين كله من خلالها وسمحت لمين ما كان يشكّل تصوراتها وقناعاتها..

وللأسف لو إنها أمعنت النظر شوي لأدركت كيف إنه القرآن كان حريص يكرّس ويطالب ويدافع عن حقوقها.. <3

#القرآن_الجميل
#ARK

وَمَن يَقْتُلْ مُؤْمِنًا مُّتَعَمِّدًا فَجَزَاؤُهُ جَهَنَّمُ خَالِدًا فِيهَا وَغَضِبَ اللَّهُ عَلَيْهِ وَلَعَنَهُ وَأَعَدَّ لَهُ عَذَابًا عَظِيمًا (93)

#سورة_النساء

متأكد إنه كثير رجال لما سمعوا بقصة أحلام قالوا في نفسهم: ياريت كنّا موجودين لحظتها كان قدرنا ننقذها من بين إيدين أبوها..

ومش كل أب بلحق بنته في طوبة، في آباء الواحد فيهم بشتغل ليل ونهار حتى يأمن أقساط بنته..

في رجل شايب سألوه في أحد البرامج شو حلمك في الحياة؟
قلهم أدرس بنتي..!

ومرة على جروب شباب نزّل واحد بوست: شباب معي 25 دينار حوشتهم وبدي أجيب فيهم هدية لزوجتي..بعرف إنه المبلغ قليل بس هي بنت أصل ورح تتفهم ظرفي..احكولي شو بقدر أجيب إلها لإني حاب أبسطها..؟

وشب ثاني بشتغل شغلين حتى يدبر مهر البنت اللي بحبها..
وكل ما يتعب وينهدّ حيله من شغله بقول: بهمش...بشتغل كل عمري كرمال قلبها..

في إخوان مستعدين يحرقوا العالم مقابل دمعة على خد أختهم..
أبوهم ربّاهم وعلّمهم إنه خواتكم كل إشي..
ورح أغضب عليكم كلكم لو بيوم بتقصروا معهم أو بتزعلوهم أو بتاكلوا حقهم..

جربي كبنت توقفي اي شخص في الشارع وتطلبي منه مساعدة..
غالبا رح يساعدك بعيونه من دون أي أجر أو مقابل أو مصلحة..

لحد الآن مش قادر أنسى قتلة أكلتها من أبوي عشان رفعت صوتي على أختي علما هي كانت الغلطانة!

وفي أب رعم شيبته ووقاره وكبر عمره ما قدر يمسك دموعه كالأطفال لحظة ما نادوا على اسم بنته في حفل التخرج..

الإمام أحمد بن حنبل كان يبشر أي شخص ربنا رزقه بنات:
أخبروه أن الأنبياءَ آباءُ بنات !

القرآن خلّد موقف بسيط عمله سيدنا موسى..
بسيط بنظرنا، لكنه بنظر ربنا عظيم لما قام سيدنا موسى وبالرغم من تعبه سقى للبنتين..
.
.
-------------
مع كل قصة مؤلمة بنسمعها بتدفعنا عواطفنا نطلق ونعمم احكامنا اتجاه المجتمع..
البعض بلوم الدين والأعراف والتقاليد وبحملّها مسؤولية أي جريمة..
مع العلم إنه الجرائم في البلاد الثانية واللي ما فيها لا دين ولا أعراف وتقاليد لا تقارن بحجم الجرائم عنّا..
ودينّا بحرم هالجرائم والظلم وبتوعد مرتكبينها بأقسى وأبشع وأفظع العقوبات..
وبالتالي ربط هالجرائم بالدين أبعد ما يكون عن العقل والمنطق..

وهالقصص بالرغم من قسوتها فالبعض بعتبرها استثناء..
لكن لا يعني أبدا أبدا لو سلّمنا بكونها استثناء يعني نتوقف عن ذكرها ونتقاعس ونتهرب من إنقاذ الناس المظلومة واللي ممكن بأي لحظة نصحى على خبر مقتلها..

لكن القصد إنه ما بدنا تدفعنا عواطفنا وحميّتنا إنه نعمم احكامنا بشكل مجحف اتجاه المجتمع لإنه هذا ما رح يفيدنا بشيء..

بالعكس لازم نأكد إنه هذا المجتمع نفسه بنعوّل عليه في تغيير الواقع والأنظمة والقوانين..
وفي شباب مستعدين يموتوا حتى ينقذوا بنت ما بعرفوها..
وأباء بركضوا ورا بناتهم بالحب مش بطوبة..!

وإنه المجتمع لازم يكفّ عن جلد ذاته ولازم يفكر كيف يساهم في انقاذ كل مظلوم ومظلومة بشبهوا أحلام..

وإذا كان ربنا خلّد ذكر موقف بسيط لنبي سقى لبنتين..
يا ترى كيف رح يجازي مجتمع انقذ أرواح و(أحلام) بناته؟! <3

#ARK
#صرخات_أحلام

للأسف ما في إعدام!
هيك منظمات حقوق الإنسان بدها..
لإنها بتشوف إنه الإعدام انتهاك لحقوق الإنسان..

ولا كأنه المقتول إنسان وإله حقوقه!

وعفكرة لو أي حد تابع تبريرات هالمنظمات لمنع الإعدام رح يجد عدة مبررات منها:
إنه الإعدام ما فيه رجعة وبالتالي ممكن يحصل أخطاء.
وإنه الإعدام ما بردع الجريمة..
وإنه بعض الدول ممكن تصير تستخدمه بشكل تعسفي وتعدم فيه السياسيين مثلا..
وإنه الإعدام فيه تمييز وراح تروح على الناس الأقل حظا واللي من الصعب عليهم يوفروا محامين وقانونيين يدافعوا عنهم..

والخ..
.
.
طبعا الكلام أعلاه مجرد هرطقات..
وعادي بإمكانهم يشرّعوا قوانين إعدام لكن بضوابط معينة.. مش يتم إلغاء القانون بالكامل لإنهم خايفين من سوء استخدامه..

لإنه القانون لمّا تعطل استثمر المجرمين تعطيله..

يعني همه ما عندهم مشكلة يشغلوا طياراتهم ويقصفوا فيها بلدان بأكملها بنسائها واطفالها وشيوخها..
بس عند الإعدام لا Nooooo حقوق الإنسان وهيكا ")
.
.
القرآن واضح في هالمسألة أشد الوضوح..
صح إنه الأعدام ما رح يرجّع حق المظلوم ولا رح يحيي المقتول..
لكنه شيء لا بد منه كمواساة مؤقتة قبل جزاء الآخرة..
يعني مجرد ما انقتل القاتل رح نرتاح ولو قليلا..
رح ينشفي غليلنا ولو شوي..
رح ناخذ نفس عميق ولو للحظات..
رح نبتسم لبرهة..

لكن أي راحة رح تيجينا لما نعرف إنه القاتل بلعب شدة في زنزانته مع الشباب؟!

يَا أَيُّهَا الَّذِينَ آمَنُوا كُتِبَ عَلَيْكُمُ الْقِصَاصُ فِي الْقَتْلَى الْحُرُّ بِالْحُرِّ وَالْعَبْدُ بِالْعَبْدِ وَالْأُنْثَى بِالْأُنْثَى فَمَنْ عُفِيَ لَهُ مِنْ أَخِيهِ شَيْءٌ فَاتِّبَاعٌ بِالْمَعْرُوفِ وَأَدَاءٌ إِلَيْهِ بِإِحْسَانٍ ذَلِكَ تَخْفِيفٌ مِنْ رَبِّكُمْ وَرَحْمَةٌ فَمَنِ اعْتَدَى بَعْدَ ذَلِكَ فَلَهُ عَذَابٌ أَلِيمٌ (178) وَلَكُمْ فِي الْقِصَاصِ حَيَاةٌ يَا أُولِي الْأَلْبَابِ لَعَلَّكُمْ تَتَّقُونَ (179) (البقرة)
.
.
.
هذا العالم بتخوث والله..
صدقوني من الصعب أحيانا تفهموا بأي منطق بفكروا هالأوغاد !

#القرآن_لجميل
#ARK

شو ما شكيت للناس ألمك وحزنك ووجعك رح يتعاطفوا معك أولها بعدين مع الوقت رح ينسوا..
ولما يشوفوك بعد فترة رح ينسوا يسألوك: صار معك إشي؟
في الوقت اللي إنت بتستنى منهم هذا السؤال..

وكثير قصص مؤلمة صادفناها في المجتمع وتعاطفنا معها وأكلت من قلوبنا أكل لحظتها، لكنها أيام معدودة ونسيناها تماما وكمّلنا حياتنا..

أحيانا ممكن تقدم للناس خدمة تكون أخذت من وقتك وجهدك ومالك وتفكيرك واستنزفت كل قوتك، لكن للأسف مع أول خطأ منك رح ينسوها..

هيك الإنسان مفطور على النسيان..
ويقال سمّي الإنسان إنسانا لأنه ينسى.

وفي القرآن وصف لأبونا آدم عليه السلام:
وَلَقَدْ عَهِدْنَا إِلَى آدَمَ مِنْ قَبْلُ (فَنَسِيَ) وَلَمْ نَجِدْ لَهُ عَزْمًا
.
.
ممكن عشان هيك ربنا في القرآن بطمئنا وبريحنا وبواسي قلوبنا وبطبطب عليها لما يخبرنا:
﴿ وَمَا كَانَ رَبُّكَ نَسِيًّا ﴾

الله الوحيد اللي ما رح ينسى وجعك وألمك وحزنك وتعبك وجهدك وكل خير قدمته في حياتك.

الناس كلها رح تنسى..
لكن رب الناس ما رح ينسى <3 !

#القرآن_الجميل
#ARK

ملاحظة:
ممكن البعض يسأل كيف ربنا بخبرنا في هالآية إنه ما بنسى..
لكنه في آيات ثانية بحكي إنه بنسى؟!
{نسوا الله فنسيهم}
{فاليوم ننساهم كما نسوا لقاء يومهم هذا}

هون لازم نعرف إنه النسيان إله معنيين:
1- نسيان = عكس التذكر، يعني غياب الشيء في الذهن ونسيانه.
وهذا النوع حاشا إنه ينطبق على ربنا.

2- نسيان= بمعنى الترك أو التغافل.
مثلا مش إحنا أحيانا بنحكي: ما تنساني!
بنكون بنقصد فيها: ما تتركني..

أو العرب قديما كانوا يحكوا: قد نسينا فلان فما عاد يذكرنا..
يعني فلان تركنا وتجاهلنا ومش مهتم فينا..

فربنا لما يحكي: {نسوا الله فنسيهم}
يعني تركوا الله فتركهم !
.
.
فيارب ما تتركنا! <3

واحد بحكيلي نفسه يتقدم لبنت حبها ومعجب فيها زي ما في الأفلام..
يعني يروح على حفلة تخرجها مثلا ويحمل معاه خاتم وورد ولما يقرب منها يثني ركبته عالأرض ويرفع الخاتم إلها ") !

قلتله: هسا إنت حاضرلي فيلم وعايش الدور.. : \

فحكالي بالله عليك ما هو إشي حلو؟ يعني لحظة مثل هيك كفيلة تتخلد في ذاكرتهم طول العمر..

جاوبته:
إحنا بنشوف هاللحظة والمشهد الدرامي إشي حلو لإنه ببساطة سمحنا لأنفسنا نستسلم وننبهر بكل ما هو غربي.. والإشي الحلو بنظرهم رح يصير حلو بنظرنا..

الموضوع بسيط وما بدي أعقده ولا بقدر أحكم عليه إنه غلط.. لكن انبهارك فيه مش شيء سليم..

الزواج بعرفهم وتقاليدهم بختلف عنّا..
يعني عندهم بعيشوا ألف علاقة قبل الزواج وغالبا ما إلهم أي ارتباط بعائلاتهم وما في هالمسؤوليات والواجبات بينهم..
وبالتالي الإشي عادي وسهل ومش مطلوب من الرجل غير يشتري خاتم ويوقفها بالشارع ويثني ركبته ويطلب الزواج منها..

عنّا الزواج من وجهة نظر الدين ميثاق غليظ!
وعقد أبدي، ومشروع حياة، وغرس شجرة قائمة عالمودة والرحمة والعطاء..
وبالتالي بدايته فيها نوع من الجدية والصرامة!

عنّا في أعرافنا لو بدك إياها بدك تبعت لأهلها خيرة الرجال حتى تطلب وتشفع وتحضر وتشهد وتبارك!
وقبل الجاهة في مفاوضات وتعاقدات وجلسات وتحضيرات حتى يضمن الجميع إنه هالبنت محمية ومصونة بين كل هالرجال، وإنها رح ترتبط برجل مدرك لمسؤوليته وقادر على تحمل الشيء اللي قرر يقبل عليه..

صدقني الإشي لو فكرت فيه رح تكتشف إنه مسؤولية عظيمة..
ورح تكون ظالم في اللحظة اللي بتقصر فيها بأحد حقوق زوجتك..
وفي الحديث: كفى بالمرء إثماً أن يضيّع من يَقُوت.
يعني أي إثم رح يلحق بالرجل اللي ضيّع قوت وإعالة ومسؤولية اللي ربنا استرعاه عليهم..؟

وفي الحديث: أكمل المؤمنين إيماناً أحسنهم خلقاً، وخياركم خياركم لنسائهم.
معيّار الخيرية عنّا في الدين إنك تكون منيح مع زوجتك..

الزواج في الدين عبارة عن مسؤوليات وواجبات وأمانة رح تنسأل عنها..

والرجولة إنك تكون قد هالامانة والتكليف..
مش بس تثني ركبتك وترفع الخاتم إلها!
.
.
----------
القرآن ذكر إلنا قصة عجيبة جدا عن زواج سيدنا موسى..
فبعد ما اجته البنت على استحياء تطلب منه لقاء ابوها:

فَجَاءَتْهُ إِحْدَاهُمَا تَمْشِي عَلَى اسْتِحْيَاءٍ قَالَتْ إِنَّ أَبِي يَدْعُوكَ لِيَجْزِيَكَ أَجْرَ مَا سَقَيْتَ لَنَا ۚ فَلَمَّا جَاءَهُ وَقَصَّ عَلَيْهِ الْقَصَصَ قَالَ لَا تَخَفْ ۖ نَجَوْتَ مِنَ الْقَوْمِ الظَّالِمِينَ (25) قَالَتْ إِحْدَاهُمَا يَا أَبَتِ اسْتَأْجِرْهُ ۖ إِنَّ خَيْرَ مَنِ اسْتَأْجَرْتَ الْقَوِيُّ الْأَمِينُ (26)

قَالَ إِنِّي أُرِيدُ أَنْ أُنكِحَكَ إِحْدَى ابْنَتَيَّ هَاتَيْنِ عَلَىٰ أَن تَأْجُرَنِي ثَمَانِيَ حِجَجٍ ۖ فَإِنْ أَتْمَمْتَ عَشْرًا فَمِنْ عِندِكَ ۖ وَمَا أُرِيدُ أَنْ أَشُقَّ عَلَيْكَ ۚ سَتَجِدُنِي إِن شَاءَ اللَّهُ مِنَ الصَّالِحِينَ (27) قَالَ ذَٰلِكَ بَيْنِي وَبَيْنَكَ ۖ أَيَّمَا الْأَجَلَيْنِ قَضَيْتُ فَلَا عُدْوَانَ عَلَيَّ ۖ وَاللَّهُ عَلَىٰ مَا نَقُولُ وَكِيلٌ (28)

أي رجولة وحب في قلب سيدنا موسى..
لما وافق يدفع 10 سنوات شغل من عمره مهر لزوجته!

#القرآن_الجميل
#ARK

هل في الدين شيء اسمه (جرائم شرف)؟!
👇

يبدو إنه المرأة ما بتتعرض فقط لظلم من المجتمع، كمان بتتعرض لظلم من الناس اللي بطالبوا في حقوقها..!

لما نحوّل قضية عظيمة مثل قضية المرأة ومظلوميتها لشعارات سطحية وساذجة وغير واضحة ولا مدروسة فهذا اكبر ظلم للمرأة..

أعداد هائلة من النساء اليوم بترفض إنه يتم تمثيل قضيتهم بهذا الشكل السطحي والساذج واللي رح يفاقم مشاكل المرأة أكثر من حلها..

لما يكون في بنات بتعرّضوا لقتل وظلم وتعنيف وإيذاء ونجد إنه الشعارات ما ركّزت على القوانين بقدر تركيزها على (أنا حرّة، وبدي أعيش حياتي، وما حد دخله بغشاء بكارتي، أو شعارات بتشن الحرب بشكل طفولي وساذج على كل الرجال والأباء)..
ففي هيك حالة إحنا للأسف سطّحنا وسخّفنا قضية المرأة!

دائما كنت أجد نفسي منحاز لقضية المرأة، وانحيازي كان بدافع ديني بحت، كون المرأة الأكثر مظلومية في مجتمعاتنا، وكونه رسول الله صلى الله عليه في أكثر من موضع أوصانا..

ومن جميل ما قاله الشيخ الطريفي: ظلم المرأة عند الله أشد من ظلم الرجل، لأن انتصار الله للضعيف بمقدار عجز الضعيف عن نصرة نفسه، قال ﷺ (إني أُحرج حق الضعيفين اليتيم والمرأة).

لكني اليوم بشعر بالأسى من هالمتاجرة والإستغلال لقضية المرأة من اللي بزعموا إنهم خرجوا من أجل حقوقها..
-----------------
دائمًا بتلفت انتباهي سورة النســـــــــاء!
سورة النساء سورة سياسية بامتياز..
سورة بتحكي عن النظام السياسي ودولة القانون..
سورة بتتناول العدل كركيزة..
سورة كل تركيزها على سنّ القوانين والأنظمة..
لإنه من خلال العدل والقوانين الصارمة مش فقط رح ننصف المرأة والضعفاء، وكمان رح نساهم في تغيير كل الأوضاع اللي ساهمت بداية في استضعافهم..!

سورة بتكرر فيها الحكم والعدل والقسط والتحذير من الظلم..
- وَإِذَا حَكَمْتُم بَيْنَ النَّاسِ أَن تَحْكُمُوا بِالْعَدْلِ
- يَا أَيُّهَا الَّذِينَ آمَنُوا كُونُوا قَوَّامِينَ بِالْقِسْطِ شُهَدَاءَ لِلَّهِ
.
.
السورة بتتناول مجموعة قوانين وأنظمة بتخص المرأة والأيتام..
فيما يتعلق بالنساء: معاشرتهم بالمعروف..حقهم بالميراث..العدل معهم..حقهم بالمهر..وبعض القضايا المتعلقة بشؤون أزواجهم..حفظ كرامتهم..وحتى طريقة التعامل معهم في حال ظلمهم!
وبالرغم من تناول السورة لقضايا عديدة لكنها مع ذلك حافظت على اسمها (النساء) !
وكل ما السورة تستعرض بعض الجوانب السياسية والتشريعية بترجع لموضوع النساء وبتأكد عليه..

ببساطة..ما في نظام سياسي قوي وعادل بغفل وبتناسى حقوق النساء والضعفاء وما بساهم في حمايتهم والدفاع عنهم..

وَمَا لَكُمْ لَا تُقَاتِلُونَ فِي سَبِيلِ اللَّهِ وَالْمُسْتَضْعَفِينَ مِنَ الرِّجَالِ وَالنِّسَاءِ وَالْوِلْدَانِ..
.
.
النساء رمز للمستضعفين في الأرض..
كثير نالهم ظلم حتى من اللي بنادوا بحقوقهم!
كثير ناس تاجرت واستغلت واستثمرت قضيتهم..

سورة النساء ما بطّالبك تذرف دموع عليهم..
ولا تردد وترفع شعارات ساذجة وسطحية لتنصفهم..

السورة بتطلب منك تتقي ربنا وتعدل وتقسط وتحكم بالحق وتسن القوانين
و"تقاتــــل" لرفع الظلم عنهم!

#القرآن_الجميل
#ARK

شيء غريب جدًا!

أي رجـــــل في الدنيا رح تجد إنه من المواضيع المؤرقة بالنسبة إله (البيت)!
يعني كيف يوفر أجار البيت أو حقه..
وفي كثير من الأحيان بضطر ياخذ قروض ويلزم نفسه بأقساط لعشرات السنوات حتى يدفع ثمن البيت أو الشقة اللي قرر يشتريها..

بالرغم من كل جهود الرجل وكدحه وتعبه وعرقه في توفير (بيت) يسكن فيه هو وعائلته..
بتفتح القرآن وبتنصدم إنه القرآن نسب البـــيت للمرأة مش للرجل!

* في بيوت النبي صلى الله عليه وسلم بتنزل آيات بتنسب البيوت لزوجاته!
- { وَقَرْنَ فِي (بُيُوتِكُنَّ) وَلَا تَبَرَّجْنَ تَبَرُّجَ الْجَاهِلِيَّةِ الْأُولَىٰ ۖ وَأَقِمْنَ الصَّلَاةَ وَآتِينَ الزَّكَاةَ وَأَطِعْنَ اللَّهَ وَرَسُولَهُ ۚ إِنَّمَا يُرِيدُ اللَّهُ لِيُذْهِبَ عَنكُمُ الرِّجْسَ أَهْلَ الْبَيْتِ وَيُطَهِّرَكُمْ تَطْهِيرًا }

- { وَاذْكُرْنَ مَا يُتْلَىٰ فِي (بُيُوتِكُنَّ) مِنْ آيَاتِ اللَّهِ وَالْحِكْمَةِ }

* حتى في أوقات الخلاف والطلاق!!
- { يَا أَيُّهَا النَّبِيُّ إِذَا طَلَّقْتُمُ النِّسَاءَ فَطَلِّقُوهُنَّ لِعِدَّتِهِنَّ وَأَحْصُوا الْعِدَّةَ وَاتَّقُوا اللَّهَ رَبَّكُمْ لَا تُخْرِجُوهُنَّ مِن (بُيُوتِهِنّ)...}

* وفي قصة يوسف عليه سلم، نسب البيت لإمرأة العزيز مش لزوجها:
- { وَرَاوَدَتْهُ الَّتِي هُوَ فِي (بَيْتِهَا) عَنْ نَفْسِه ِ} .

* الحالة الوحيدة اللي ما نسب فيها القرآن البيت للمرأة هي في حالة خيــانتها..!
في هالحالة بسحب منها القرآن هذا التكريم لإنها ما استحقته ولا كانت أهل إله ولا قدرت تصون وتحفظ بيتها..

- { وَاللاَّتِي يَأْتِينَ الْفَاحِشَةَ مِن نِّسَآئِكُمْ فَاسْتَشْهِدُواْ عَلَيْهِنَّ أَرْبَعةً مِّنكُمْ فَإِن شَهِدُواْ فَأَمْسِكُوهُنَّ (فِي الْبُيُوتِ) ...}
.
.
.
لاحقًا أدركت إنه هالآيات ما فيها إشي بستدعي العجب..
ما دام القرآن من الأصل شايف المرأة بذاتــها (سكــــــن) !

{ وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا (لِّتَسْكُنُوا إِلَيْهَا) وَجَعَلَ بَيْنَكُم مَّوَدَّةً وَرَحْمَةً ۚ إِنَّ فِي ذَٰلِكَ لَآيَاتٍ لِّقَوْمٍ يَتَفَكَّرُونَ }

#القرآن_الجميل
#ARK