#биласизми

Маъмурий жавобгарлик тўғрисидаги кодекснинг 76-моддаси. Сув хўжалиги объектлари ва қурилмаларини шикастлантириш, улардан фойдаланиш қоидаларини бузиш, шунингдек гидротехника иншоотларининг хавфсизлиги тўғрисидаги қонунчиликни бузиш

✅Сув хўжалиги иншооотлари ва қурилмаларини шикастлантириш, —

БҲМнинг 3-5 бараваригача миқдорда жарима солишга сабаб бўлади.

✅Сув хўжалиги объектлари ва қурилмаларидан фойдаланиш қоидаларини бузиш, шунингдек гидротехника иншоотларининг хавфсизлиги тўғрисидаги қонунчиликни бузиш, —

мансабдор шахсларга БҲМнинг 7-10 бараваригача миқдорда жарима солишга сабаб бўлади.

❗️МАЪЛУМОТ ЎРНИДА:

✔️2020-2024 йиллар давомида Маъмурий жавобгарлик тўғрисидаги кодекснинг 76-моддаси (сув хўжалиги объектлари ва қурилмаларини шикастлантириш, улардан фойдаланиш қоидаларини бузиш, шунингдек гидротехника иншоотларининг хавфсизлиги тўғрисидаги қонунчиликни бузиш) билан 182 нафар шахс маъмурий жавобгарликка тортилиб, уларга жарима жазоси қўлланилган.

✔️Жорий йилнинг биринчи ярмида ушбу моддада назарда тутилган ҳуқуқбузарликни содир этган 8 нафар шахс маъмурий жавобгарликка тортилиб, уларга жарима жазоси қўлланилди.

Telegram

БАЁНОТ

Ижтимоий тармоқларда блогерлик ниқоби остида фуқароларнинг мурожаатларини эълон қилиш орқали айрим блогерлар нохолис ва бирёқлама ахборот тарқатиши оқибатида юртдошларимиз ўртасида судларга нисбатан асоссиз равишда норозилик кайфияти ва ишончсизлик юзага келмоқда.

Бундай тоифадаги блогерларга судьяларга қандай шаклда бўлмасин, босим ўтказиш қонунчилик нормаларига, хусусан, “Судлар тўғрисида”ги қонуннинг талабларига зид экани такрор ва такрор тушунтирилаётганига қарамай, судни обрўсизлантириш, унга очиқдан-очиқ таъсир ўтказиб, қонунга итоатсизликни шакллантирмоқда.

Аслида ҳеч қандай юридик маълумотга эга бўлмаган, холислик, тамойилига мутлақо амал қилмайдиган айрим блогерларга мурожаат қилаётган юртдошларимиз шуни англаб етишлари керак: ижтимоий тармоқларда эълон қилинадиган ҳар қандай шаклдаги мурожаат, у хоҳ ёзма равишда, хоҳ видеомурожаат шаклида бўлишидан қатъи назар, суд қарорларини ўзгартириш ёки бекор қилиш учун асос бўла олмайди. Негаки судьялар қарор қабул қилиш чоғида фақат қонунга бўйсунади. Суд қароридан норози тараф қонунда белгиланган тартиб ва муддатларда юқори инстанция судига мурожаат этган тақдирдагина суд қарорлари қонуний асосларда қайта кўрилиши мумкин.

Демак, мурожаатчилар судда кўрилган ёки кўрилаётган ишни гўёки ижтимоий тармоқларда кенг муҳокама қилиш йўли билан ҳал қилиб беришни ваъда қилаётган бундай блогерларга эмас, профессионал адвокатларга мурожаат қилиш орқали ўз масаларига ечим топишлари мумкин. Зотан, халқимиз чумчуқ сўйса ҳам қассоб сўйсин, дея бежизга айтмаган.

Ўз навбатида, куни-кеча YouTube видеохостингида эълон қилинган видеолавҳалар (ушбу ва ушбу) эълон қилинишидан аввал ҳар бир мурожаатчи Олий суд масъуллари томонидан алоҳида-алоҳида қабул қилиниб, улар билан индивидуал суҳбат ўтказилиб, уларнинг мурожаатлари белгиланган тартибда ўрганиш учун қабул қилиб олинган.

Такрорлаймиз, масъуллар томонидан қабул қилиниб, тегишли ҳуқуқий тушунтириш олгандан кейин ҳам бундай вазиятни юзага келтирган мурожаатчилар ўзлари адолат деб ҳисоблайдиган натижага бундай уринишлар орқали эриша олмасликларини англаб етишлари лозим. Суд қароридан норози бўлган ҳар бир фуқаро қонунда белгиланган тартиб ва муддатда шикоят келтириш орқалигина суд қарорларининг қонунийлиги ва асослилигини текширтиришлари мумкин.

Суд қарорларини ўзича “ноқонуний, адолатсиз” деб атайдиган бошқа бирор-бир шахс суд қарорига ҳуқуқий баҳо бериш ваколатига эга эмас.

Бунга улар на маънавий ва на ҳуқуқий жиҳатдан ҳам ҳақли эмас!

Албатта, мурожаатларнинг ҳар бирини ўрганмасдан туриб, жавоб бериш ножоиз. Таъкидлаб ўтилганидек, видеолавҳадаги ҳар бир мурожаатчининг мурожаати Олий судда белгиланган тартибда ўрганилади ва қонуний муддатларда жавоблар берилиши таъминланади.

Мурожаатчиларга эса эслатиб ўтамиз, суд ҳокимиятининг мустақиллиги қонун устуворлигининг асосий тамойилларидан биридир. Судьяларга босимнинг ҳар қандай шаклига йўл қўйилиши мумкин эмас ва амалдаги қонунчилигимизга зиддир.

Нохолис ахборот тарқатаётганларни провокацион чиқишлар қилишдан тийилишга, қонунга итоат этишга, суд ҳокимияти мустақиллигини ҳурмат қилишга чақирамиз.

Telegram

#биласизми

Маъмурий жавобгарлик тўғрисидаги кодекснинг 77-моддаси. Ўрмон фонди ерларидан фойдаланиш қоидаларини бузиш

✅Ўрмон фонди ерларида пичанзорлар ва яйловларни шикастлантириш, ўзбошимчалик билан пичан ўриш, дренаж тизимларини ва йўлларни йўқ қилиш ёки шикастлантириш —

фуқароларга БҲМнинг 1/3-1 бараваригача, мансабдор шахсларга эса — 1-3 бараваригача миқдорда жарима солишга сабаб бўлади.

✅Худди шундай ҳуқуқбузарликлар маъмурий жазо чораси қўлланилганидан кейин бир йил давомида такрор содир этилган бўлса, —

фуқароларга БҲМнинг 1-3 бараваригача, мансабдор шахсларга эса — 3-7 бараваригача миқдорда жарима солишга сабаб бўлади.

✅Ўрмон фонди ерларида чорва молларини ўтлатиш қоидаларини бузиш, —

фуқароларга БҲМнинг 3-5 бараваригача, мансабдор шахсларга эса — 5-10 бараваригача миқдорда жарима солишга сабаб бўлади.

✅Ушбу модданинг учинчи қисмида назарда тутилган ҳуқуқбузарлик маъмурий жазо чораси қўлланилганидан кейин бир йил давомида такрор содир этилган бўлса, —

фуқароларга БҲМнинг 5-10 бараваригача, мансабдор шахсларга эса — 10-20 бараваригача миқдорда жарима солишга сабаб бўлади.

❗️МАЪЛУМОТ ЎРНИДА:

✔️2020-2024 йиллар давомида Маъмурий жавобгарлик тўғрисидаги кодекснинг 77-моддаси (ўрмон фонди ерларидан фойдаланиш қоидаларини бузиш) билан 555 нафар шахс маъмурий жавобгарликка тортилиб, уларга жарима жазоси қўлланилган.

✔️Жорий йилнинг биринчи ярмида ушбу моддада назарда тутилган ҳуқуқбузарликни содир этган 42 нафар шахс маъмурий жавобгарликка тортилиб, уларга жарима жазоси қўлланилди.

Telegram