Dr. Eyob Mamo

ቴርሞሜትር ነህ ወይስ ቴርሞስታት?
ነገሮችን ወደ መኖር የማምጣት ቁልፍ

(“25 የስኬት ቁልፎች” ከተሰኘው የዶ/ር ኢዮብ ማሞ መጽሐፍ የተወሰደ)፡፡

በሕይወትህ የሚመጣውን ነገር ዝም ብለህ አስተናጋጅ ነህ ወይስ ሁኔታዎችን ለመለወጥ የምትንቀሳቀስ የለውጥ ሰው? አንዳንድ ሰዎች ሁኔታዎች የእነሱን አቅጣጫ እንዲወስኑ ይፈቅዳሉ፣ ሌሎች ግን ሁኔታዎችን ይቆጣጠራሉ እንጂ በቀላሉ በሁኔታዎች ቁጥጥር ስር አይውሉም፡፡

ምርጫችን ሁለት ነው፣ የመጣውን ነገር ዝም ብሎ ማስተናገድ ወይም የመጣውን ነገር ከአላማችን አንጻር ለመቃኘትና ለመለወጥ መነሳት፡፡

ምርጫችን ሁለት ነው፣ የእለቱን የአየር ጸባይ ማወጅና ማጋነን ወይም የአየሩን ሁኔታ ለቆምንለት ዓላማ እንዲመጥን አድርጎ መቆጣጠር፡፡ ምርጫችን ሁለት ነው፣ ክስተቶችን ቁጭ ብሎ በመጠበቅ ወዲህና ወዲያ መንገላታት ወይም ነገሮችን ወደመሆን ለማምጣት መስራት፡፡

የእለቱን የአየር ጸባይ የምናስተናግድባቸው ሁለት አስፈላጊ መሳሪያዎች አሉን፡፡ አንደኛው “ቴርሞሜትር” (Thermometer) ሲሆን ሌላው ደግሞ “ቴርሞስታት” (Thermostat) ነው፡፡ ቴርሞሜትር የሚለው ስም ከሁለት የግሪክ ቃላት ጥምረት የመጣ ነው፡፡ “ቴርሞ” (thermo) ማለት “ሙቀት” ማለት ሲሆን፣ “ሜትር” (meter) ማለት ደግሞ “መለካት” ማለት ነው፡፡ ከትርጉሙም፣ ሙቀትን መለካት የሚለውን ሃሰብ እናገኛለን፡፡

ቴርሞሜትር የእለቱን የአየር ጸባይ ይለካና ይነግረናል፡፡ ብርዱን ብርድ፣ ሙቀቱን ሙቀት ይለናል፣ መጠኑንም ቁልጭ አድርጎ ያስታውቀናል፡፡

በተቃራኒው “ቴርሞስታት” የሚለውም ስያሜ ከሁለት የግሪክ ቃላት ጥምረት የመጣ ነው፡፡ “ቴርሞስ” (thermos) ማለት “ሙቀት” ማለት ሲሆን፣ “ስታቶስ”(statos) የሚለው ቃል ደግሞ “መጠን” ወይም “ደረጃ” የሚለውን ሃሳብ ያቀፈ ነው፡፡

ቴርሞስታት እኛ በሰጠነው የአየር ሙቀት መጠን የእለቱን የአየር ጸባይ ላለንበት ስፍራና ሁኔታ በሚመች መልኩ ይቆጣጠራል፣ ያስተካክላል፡፡ የሙቀቱን እውነታ ዝም ብለን እንድንቀበለው ሳይሆን በሚመጥነን መልኩ እንድንቆጣጠረው ይረዳናል፡፡

“ሁኔታዎችን ጊዜ ይቀይራቸዋልና ጠብቅ የሚል የተለመደ አባባል አለ፣ ነገር ግን ሁኔታዎችን አንተው ራስህ ነህ መቀየር ያለብህ” – Andy Warhol

ሰው ተፈጥሮ የሚሰጠውን ሁኔታ ዝም ብሎ ቢቀበል በዚህ ምድር ላይ መኖር አይችልም፡፡ የቅዝቃዜው መጠን ደምን እስከማርጋት በሚደርስበት አካባቢ ሰው የሚኖረው እንዴት ነው? የሙቀቱ ግለት ለሰከንድ አፍታ በማይሰጥበት አካባቢስ ሰው እንዴት መኖርን የቻለው?

አየሩን በመቆጣጠር! ሰው በምንም አይነት ሁኔታ ውስጥ መኖር የሚያስችል ብቃት አለው - የሚያደርገውን ካወቀ! በሕይወትህ የሚመጡትን ሁኔታዎች ቁጭ ብለህ የምትጠብቅና የመጣው ነገር ሁሉ ወዲህና ወዲያ እንዲያንገላታህ የምትፈቅድ ሰው ከሆንክ አንደኛህን የስኬትን ነገር ለጊዜው ብትተወው ይሻልሃል፡፡

ስኬታማ የሆኑ ሰዎች ሁኔታዎችን ለእነርሱ አላማ ለማስገዛት ጠንክረው የሚሰሩ ሰዎች ናቸው፡፡ ሁኔታዎች እነሱን እንዲገዟቸው በፍጹም አይፈቅዱም፡፡ ስለጨለማው ቁጭ ብለው አይነጫነጩም፣ ጨለማውን ብርሃን ያበሩበታል፡፡ “ጨለማውን መቶ ጊዜ ከምትረግመው ይልቅ አንዲትን ሻማ ማብራት ይመረጣል” እደሚባለው ማለት ነው፡፡

https://www.tg-me.com/Dreyob

https://m.youtube.com/user/naeleyob623

https://www.facebook.com/Dr-Eyob-Mamo-1050816404958639/