Dr. Eyob Mamo

ቅድመ-አመለካከታችን በአተረጓጎማችን ላይ ያለው ተጽእኖ

አመለካከታችን ከአንድ ክስተት በኋላ የሚሰማንን ስሜትና የምንሰጠውን ምላሽ የመወሰን ጉልበት አለው፡፡ በሌላ አገላለጽ አንድ ሁኔታ ሲከሰት የምንሰጠው ምላሽ የሚያመለክተው ከዚህ በፊት ከነበሩን ልምመዶ የተነሳ አሁን ያለንበትን አመለካከትና ለሁኔታዎች የምንሰጠውን ትርጉም ነው፡፡

በአስተዳደግ ወቅት የተፈጸመብን ጥቃት፣ ያለፈ የመገፋት ቁስል፣ በሰዎች መጎዳትና የመሳሰሉት ሁኔታዎች ያለንን አመለካከትና ንጽረተ-ዓለም የመበከል አቅም አለው፡፡ ይህ የተበከለ ንጽረተ-ዓለም “ሰዎች እንዲህ ናቸው፣ ሕብረተሰቡ እንዲህ ነው፣ እኔ እንዲህ ስሆንኩ ነው ሰዎች እንዲህ የሚያደርጉብኝና የመሳሰሉ እጅግ በጣም ጎጂ አመለካከቶችን እንድናዳብር አሳልፎ ይሰጠናል፡፡

ይህንን የተበከለ ንጽረተ-ዓለም ሆን ብለን፣ አስበንበትና ጊዜ ወስደን ካላከምነው፣ የሚያጋጥሙንን ነገሮች ሁሉ ካልዳነው ቁስላችን፣ በአካባቢያችን ባለው ሰው ላይ ካለን ምልከታና ስለራሳችን ወደማሰብ ከመጣነው እምነት አንጻር የመተርጎም ልማድና ልምምድ ውስጥ ራሳችንን እናገኘዋለን፡፡

አንድን ምሳሌ እንመልከት:-

በመንገድ ላይ እየሄችሁ ነው፡፡ በድንገት በተቃራኒው መንገድ ላይ ራቅ ብሎ የቅርብ ጓደኛችሁ ሲሄድ አያችሁትና እጃችሁን በማወዛወዝ ሰላምታ እና “ወዴት ነው?” አይነት ምልክት ሰጣችሁት፡፡ ያንን ስታደርጉ አይቷችኋል ግን ምላሽ ሳይሰጣችሁ መንገዱነ ቀጠል፡፡ ምን ይሰማችኋል? ምንስ ታደርጋላችሁ?

1. ምናልባት ሃሳብ ላይ ይሆናል በሚል ግምት ወዲያውኑ ስልክ አንስቼ እደውልና ለምን ዝም እንዳለኝ እጠይቀዋለሁ፡፡

2. “ተበሳጭቶብኛል ወይም አኩርፎኛል ማለት ነው” የሚል ሃሳብ ይመጣብኝና ምን እንዳደረኩት በማሰላሰል እረባበሻለሁ፡፡

3. አውቆ ዘግቶኝ ነው በማለት እናደድና እኔም እዘጋዋለሁ፡፡

4. ዝም ብዬው በንዴት በመሄድ ለሌሎች ጓደኞቼ ያደረገኝን ነገር በመንገር የእኔን ስሜት እንዲገነዘቡ ለማሳመን እሞክራለሁ፡፡

5. መንገዴን በመቀጠልና በመሄድ ወዲያው እረሳውና ሌላ ቀን ሳገኘው ነው ትዝ የሚለኝ፡፡

ምናልባት ከላይ ከተጠቀሱት የምላሽ ምርጫዎች የተለየ አለ ካላችሁ ዝርዝሩ ላይ ጨምሩት፡፡

• የትኛው የእናንተን ምላሽ የሚወክል ይመስችኋል?

• የትኛው ምላሽ ትክክለኛና ሚዛናዊ ነው ብላችሁ ታስባላችሁ? ለምን?

• እንደዚህ እንድታስቡ ያደረጋቸው በሰዎች ላይ ያላችሁ አመለካከት፣ በራሳችሁ ላይ ያስቀመጣችሁት ግምት እና የመሳሰሉት ሁኔታዎች እንደሆነ ታውቃላችሁ?

• ከዚህ በፊት በተመሳሳይ ሁኔታ ሚዛናዊ ያልሆንን ምላሽ ሰጥታችሁ የተበላሸባችሁ ነገር ወይም ግንኙነት ትዝ ይላችኋል?

• በዛሬው ፖስት ካነበባችሁትና ወደመገንዘብ ከመጣችሁት የግል ሁኔታችሁ አንጻር ምን አይነት ነገር ላይ መስራት ያለባች ይመስላችኋል?

አመለካከት ወደመልካምና ወደሚዛናዊው ሲለወጥ ለሁኔታዎች የምንሰጣቸው ምላሾችም እንደዚሁ ይለወጣሉ፡፡

ምላሻችን ሲለወጥ ደግሞ ከራሳችን ጋር ሰላም እንሆናለን፣ ዓላማችን ላይ ለማተኮ አእምሯችን እረፍት ያገኛል፣ ከሰዎች ጋር ያለን ግንኙነት የሰላምና ለስኬታማነት የሚጠቅም ይሆናል፡፡

https://www.tg-me.com/Dreyob

https://m.youtube.com/user/naeleyob623

https://www.facebook.com/Dr-Eyob-Mamo-1050816404958639/