@AaZzTt1990

للتواصل على الخاص عن إستفسار أي شيئ يخص القصائد وانا بخدمتكم

جون يخاطب مولاه الحسين ( عليه السلام)

جــرح الـحـب بـيـه هـتـف.. حـسـيـن لـبـيـك

عـمري من عشـﮔـك غرف.. مـن فـضل اديـك

مـجهـول وهـسـه أنـعـرف.. بــيـمــن اوفـيـك

ويــــن .. ﭼـنت أبدونـك .. وتالي عـبدك .. وعـبـد أضعـونـك

ويــــن .. عـبد لـغـيـرك .. وهسه بخيرك .. وخـير أعـيـونـك

ويـن أمــشـي ويــن أرحــل حـــســـيــــــن

بــس يـــــمـــك مـــا أنـــذل حـــســـيــــــن

بــس دربــك خــلـني أنـــدل حـــســـيــــــن

حـــســـيــــــن ... يا مولاي ... يا مولاي ... يا مولاي

*****

أمـيـر أعــلــه الــخــدم.. خـــادم حــسـيـن

وﮔـلـبي لعـشـﮔـه سـلّـم.. بــحــبـه رهـــيــن

وغـير حسـيني ما شـم.. كــــل هـالـسـنـيـن

لا .. مـــا أشــرك بــي .. عـبـده وحـسـيـت .. خِــلّ وخـــلّــه

لا .. مــا ﮔـــايــلــهـــا .. يــنــﮔــط رحــمــه .. مـاكـوا مـثـلـه

مــثــلــه مــا صـايـر ابــد حـــســـيــــــن

خِــلّ أصـبــح ويــه عــبـد حـــســـيــــــن

مـعــيـشـنـي بـجـنــه ورد حـــســـيــــــن

حـــســـيــــــن ... يا مولاي ... يا مولاي ... يا مولاي

****

حـسـيني شـمني بنحـري.. خـل ريـحـي يـطـيـب

مـجـروح آنــه عـــمــري.. وأنــتــه الــطـبـيــب

ويــم الله أرفـــع ﮔــــدري.. عــبــــد الــحـبــيــب

حـــســيــن .. بـيض وجـهـي .. طـيب روحي .. أنـته روحي

حــســيــن .. شـومن هسه .. هـمست شفتي .. يا مـذبـوحي



شـو ﭼـنـك ﮔـتـلي ذبـح حـــســـيــــــن

كـلشي ولا انـتـه جـرح حـــســـيــــــن

وﭼـن ﮔـتلي حتى رمح حـــســـيــــــن

حـــســـيــــــن ... يا مولاي ... يا مولاي ... يا مولاي

****

أسـمـي مـن شــفـتـيـنـك.. حـبـيـتـه جـــون

ونـضرات اللي بـعـيـنـك.. أتـمـلكت الـكـون

وشـالــتـنـي ﭼـفــيــنــك.. مــا هـِـم بـاللـون

اهواي ..هــاي اعـلــيه .. أبن الـزهـره .. حطـني بـحـضـنـه

اهواي .. صـب ادمـوعـه .. فـوﮓ اجـروحي .. ﭼــني أبـنـه

للــخـــادم ياهــو بــﭼـه حـــســـيــــــن

وي عـبده ياهـو حـﭼـه حـــســـيــــــن

ولـو يشكي عبده شـﭼـه حـــســـيــــــن

حـــســـيــــــن ... يا مولاي ... يا مولاي ... يا مولاي

****

ياهــو الـمثـلي شـانه.. عــبـد ومبـخــوت

بـدنـيا شـاف إجـنانـه.. مـا قـبل الـمـوت

ويـبـقى صـوتـي آنـه.. يحـسيـن الصوت

ريت .. عـندي عـمرين .. وعـبدك مرتين .. يا بخـتي بـهـاي

ريت .. يـبـقى الـحُسَين .. مـا يـتـغـرب .. ويـضـوﮓ الـمـاي

يـا سـيـد مات ضـامـي حـــســـيــــــن

يــا وســفــه إمــامــي حـــســـيــــــن

هــذا آخـــر ســلامــي حـــســـيــــــن

حـــســـيــــــن ... يا مولاي ... يا مولاي ... يا مولاي

****

عزت السماوي

أصحاب مولاي الحسين ( عليه السلام) يحيونه ويخاطبونه بهذا الخطاب
****
لا تهتـم للعاشر كلنه اويــاك
وعيـونك قـبل الـذر حبيناك
محله الدم شنهو العيشه بلياك
ربيت گلوب انته وهـاي اربـاك

فد صوت .. للموت .. هالدم حاشه يغله تحت جدمك
يحسين .. عمرين .. نتـمنى نعـيش وهـم نـخـدمـك

نموت ونحيى ونموت ونرد لجلك
مسـابگ عالحـياه والمـوت منمـلك
حســـيـــن ** لــبــيــك
***
مـن عـدنا هـاك أخـذه عهـد ازلام
ما يدنه جيش الشـر راگ اخيـام
واحدنه يشم دمه شگد مـحتـام
وتثـبــتـلك يـبـن الـزهـره الأيـام

بجروح .. هالروح.. ثمره تصير روح تشيل جرحك
محلاك .. بسماك.. شـكثر هنـيالنه انصبح بصبحك

الهوه النـتـنفسه من فـضل مـاعـونـك
شني معنى الوجود حسين من دونك
حســـيـــن ** لــبــيــك
***
حبيتك مـن زغري وچنه ازغــار
وهسه آنه يحسيني شيخ انصار
بگـلب ازغـار نحبك واحنه اكـبار
زامـطـهــم بــزلامـك لا تــحــتــار

اتمنيت .. يا ريت.. نريد نموت حتى يلمنه حضنك
انطيح .. ونصيح .. حتى الموته لجلك فـضل منك

بــلا قــانـون يا مـولاي جــايـبـنـه
كلها گلوب وحـده الـشاب شـايبنه
حســـيـــن ** لــبــيــك
***
كل واحد مـن ربعـك عـشگه بـلون
ومـا تنـظـر أسـود لــو ابيـض لــون
جون أسود بس يا محله حب جـون
گلبه ابيض من كلشي ابيض بالكون

حباك .. ناداك .. ما خذلك وحق أمك الزهره
ويريد .. هالايد.. تشبگه بصدرك ويرتاح صدره

وكـفـو من جـون علـمنـه العشـگ كلـه
العشـگ بالشده كون إعله اليحب يحله
حســـيـــن ** لــبــيــك
***
جايبنه بس حبنه لا مو ديـن
وخسران الخيرنه بيـن اثنين
الاول والتـالي بـس حسـيـن
من عدلين نعشگك من ميتين

انصار .. أحرار.. بس اوياه عبوديتنه حره
نرجاك .. ننخاك .. فقط خلي الگلب لبيك يقره

خـليـهــا رقــيـه تـنــام تـعـبـانــه
گـلهـا دروع تحـرس كـفو ويـانـه
حســـيـــن ** لــبــيــك
***
عزت السماوي

@AaZzTt1990

للتواصل على الخاص عن إستفسار أي شيئ يخص القصائد وانا بخدمتكم

شلون كسره .. الحـسـين بكبـره لازم ظـهـره
شلون كسره .. حـزن زلمه لزلمه مدري شكبره
ساعه ايعـثر ساعه يگـوم
رد للـمــخيـم مــهـضـوم
لازم صــفــاحـه ....... لازم صــفــاحـه
**
من طاحت الرايه انكسر .. وبانت بطوله الكسره
يعني الگمر مو بس ظهر .. جيش الحسين بكبره

الكسر أصـعب حـزن عالزلـمه
واتخيل حسين شرجع من يمه
عدل لو خلينه يم طوله الهلال
چلمة حسين وهـوت هالچـلمه

شلون چلمه .. بيها چان زمـاط وي عدوانه
شلون چلمه .. الناس بالچلمه غدت شمتانه
بهالحاله شيسوي حسين
يسـولف غربته بالعـيـن
و لازم صــفــاحـه ....... لازم صــفــاحـه
**
محتار والدنيا نظر .. واتـشـفـو بـهالحيره
ويتنادسون شما لگو .. ناظره لخيه يديره

يلـتـفـت مـتحـسـر بشـهـگـاتـه
وشكـثـر بـيها حـچـي وگـفـاتـه
آخ بالحومه صفگ إيد إعـله أيـد
ويـعلـم الله شچـانت احچـاياته

آخ خويه .. هـدمتـه لمـن حچاها بضـيـمـه
آخ خويه .. وين عفت حسين وحده بهيمـه
لــمــن حـچـه هـالچـلمـات
بـس اليـسمـعـه شـمـات
و لازم صــفــاحـه ....... لازم صــفــاحـه
**
ما بيـن گـلبه والـحـرم .. چـانت مـسافة جـرحـه
وما عنده بس لزمت ظلع ..معنى الفراگ يشرحه

حسين ما ظل حيله لا ظل شـوفـه
وطـايـحـه الـرايـه بتـرب ملـفـوفـه
وسفه نص دربه گضاه يمشي إعله ادي
الـيتبـع آثـاره يــشـوف چـفـوفــه

باد حيله .. فگد عباس شبقه من حيله
باد حيله .. شكثر طاح ومـحد يتچيله
فاگد وجــوده يـا نــاس
ويصـيـح راح الــعبـاس
و لازم صــفــاحـه ....... لازم صــفــاحـه
**
يا ناس اخو مو أي أخو .. حسين ويگـله فدوه
عباس اخيك فدوه إلك .. وشعندي غيرك خوه

بالعـمامه اتنـگب وطـر هيمـه
يعـني ما ضـلت لهاشـم خيمه
النگاب إعله الزلم كسرة رجـال
الفگد أهل الشيمه حزنه بشيمه

حزن فاگد .. يناشغ ودمعه شهيق انفاسه
حزن فاگد .. فگد اخوه خلاه يدنگ راسه
المـنه يصيحون دخيل
چن سعفه بالريح يميل
و لازم صــفــاحـه ....... لازم صــفــاحـه
**
أول احچايه بالـخيم .. لمـن وصـل حچاها
طيحي يزينب هالعمد ..طــاح الـذي بـناها

ورگضوا اطفال الخيم لحضانه
ولگـو هدمه مـن الدمع نگعانه
ظنهم العباس وده بـيده مـاي
ورد بچـه لمـهجتهم العطشانه

شلون هضمه .. شفاف متفطره وتدور بروده
شلون هضمه .. بردنـه شربو لأن شال زنوده
وگام إعله حيله ورد طاح
گــالـلــهـم الـسـاقــي راح
و لازم صــفــاحـه ....... لازم صــفــاحـه
**
عزت السماوي

حين عاد سيد الشهداء من النهر محني الظهر إلى الخيام وهو بذلك الأنكسار فدخل الخيمة وسألته مولاتي الحوراء عن أخيها وكافلها فقال لها مولاي الحسين . . .

*****

يا زيـنب .... شفـت أوجـوه الـناس

تتـباشـر .... طـاح أخـوه النـوماس

وصاحولي ... وين ﭼـا راعي إلواك

هـضمـوني ... وآنه أخـوي العـبـاس

دمـعـتي .. طـلعـت
حـسرتي .. أنفضحت
وعدوي .. أتشمت .. يزينب يزينب

يزينب .. شـفـتـه
أخـونـه .. وشـلـتـه
ورسملي .. بشفته.. يزينب يزينب

راح الأخــــــو. .. راح الــــدفـــــو
ياهــو مثـله اليـســوه ..صــيــت الكــفــو

يــا أخــي يــا أبــا الـفـضـل

****
إلـتــمـن .... وبـﭼـن إعـله الـشيـمه

ما يرجع .... يـحـرســلـﭼـن خـيـمـه

كـافـلـﭼن .... طـاح هــوه ومــايـه

معــناهـا .... الــخـدر تـالي بهـيـمـه

فـﮔـدنا .. حزامنه
هـوه الـﭼـان ..احجابـنه
للخيام .. راﮔــنــه .. يزينب يزينب

أجـينه .. بهـيـبـه
صفــينــه .. نهـيـبــه
حسافه .. غــريـبـه .. يزينب يزينب

مــخـــوف الـــرجـــال ..يــغــــفــه مــحــال
الــﭼــان سيــد الحـومه.. فــــوﮓ الـــرمـــال

يــا أخــي يــا أبــا الـفـضـل

****
يـا خـويه .... شفـته يـومي بصـوتـه

وﭼـفوفه .... طــيحــتــهـا امـروتــه

ما قـصر .... أبـــن أبــونـه العــباس

ثلث أنعام .... كــفــو وفــه لــخـوتـه



وصـيته .. اعـذرنـي
يـخـويه .. اشبـﮔـني
وعالجروح .. حبـني.. يزينب يزينب

فـﮔـدته .. احـﭼـايه
وطـريحه .. الرايه
وتــبـــده .. مــايــه .. يزينب يزينب

مــــرجـــف الــرمــاح .. تـــالــيــهــا طــــاح
وفـــرحـــت شمـــاتــي.. مــن دمـعــي صـاح

يــا أخــي يــا أبــا الـفـضـل

****
شما نبـﭼـي .... مـا نـوفـي ايـامــه

خــل نلــطم .... بس لجرح الهامــه

يا سكنه .... راح عـمــﭼــن عـبـاس

وتستاحش .... طــوله حـتى اخـيامه

غـريبات .. صـرتـن
للـركـاض .. اتـحزمـن
لـما طيح .. فــــرن.. يزينب يزينب

يطيحون .. أخيامـﭺ
يــضيعـون .. أيتامـﭺ
يشوفون .. أخيالـﭺ .. يزينب يزينب

عـــﮔـــب الـــدلال.. سبـــي وحـــبـــال
وبعدي بعد الكافـــل.. يــصيــر الــمـحـال

يــا أخــي يــا أبــا الـفـضـل

****
كـسـروها .... خـويه هيـبة هـاشـم

وتـمرجـل .... الـﭼـان عـدنا خــادم

يـوسـفـه .... حـلوﮓ صارت تحـﭼـي

شسولف .... ازمـاطي شافـوا نـايـم



قـبـل ﭼـان .. حـيـلي
وضـواي .. بـلـيـلـي
شسوي .. احـﭼيـلي.. يزينب يزينب

حـنـالي .. ظـهــري
شيكـفـي .. صـبـري
وﮔــع بـي .. ستري.. يزينب يزينب

طـــــاح الــــﭼــفيـــل.. معـــدل الـيــمـيــل

وتـالي يحـدي المحمل.. وادم تــــعـــيـــــل



يــا أخــي يــا أبــا الـفـضـل

****

عزت السماوي

حينما رجع مولاي سيد الشهداء من قمر بني هاشم إستقبلته مولاتي سكينة ( عليهم الصلاة والسلام) بدهشه وتعجب قائلة له
***

أول مره اشوف بهضمه تبچي
ودموعك يبويه كلشي تحچي

وچنك تگلي سكنه راح العباس
ويم الشماته بويه دنگت الراس

راح عــمــچ ..... راح عــمــچ
****
تدري بويه ما تدري? .. أجيت وظهرك محدب
حگك فاگد العباس .. وكلشي بوجهك مشيب

وچلماتك آخ .. ما عندك غير حجايه
معناها طاح .. كافلچن فوگ الرايه
وشتريد تگول .. فرگة عباس اهوايه

تناشغ والنظر كلسا تديره
عندك مو أخو الطايح عشيره

يابويه إحچي اوياي خليني ارتاح
تشلع دليلي شما گلت عمچ راح

راح عــمــچ ..... راح عــمــچ
****
دمعي ودمعك اتحاچن .. حرت بيك وحرت بيه
هسه شلون تنحل هاي .. ودمع عباس طاريه

ما تنحل لا .. ودمعك يگطر بهدومك
وانظرلك حيل .. كبرت يا بويه رسومك
أنعاه وانعاك .. يالميت من همومك

خل نتناوب اللجمه إعله لچمه
الزلمه بطيحته يكسرله زلمه

شلون بظهر معصوم اذا بويه الطاح
اعرفت الجواب من اصفگت راح براح

راح عــمــچ ..... راح عــمــچ
****
أنته الراي شو محتار .. وتريد الراي من عندي
تگلي سكنه أخوي الراح .. ودمعك بلل بخدي

لحزن العباس .. دمعك نگّع وجناتي
ودموعي وياك .. اختلطن شهگه بچلماتي
آ يا هالآه .. خل تخلص بيها حياتي

أسولف وانته بس تحچي مدامع
صبرني بشبگ چا ليش راكع

شو بالعكس صارت واصبرك مولاي
غير آنه منتظره يجي راعي الماي

راح عــمــچ ..... راح عــمــچ
****
أشوف بعينك اوصيه .. بس تحچيها ما تگدر
وقريت اوصيته بهضمك .. قبل لتگلي يتعذر

شفت بعيناك .. يا بويه همس حروفه
وأقره الچلمات .. عباسچ ذب چفوفه
چي ضاگن ماي .. وانتي شفافچ ملهوفه

وأعذريني عفت مولاي وحده
شما سالت أمسحي دموع خده

و مو راوي لاچن يبقى أسمي الوفاي
والنظر طفيته لأن شاف الماي

راح عــمــچ ..... راح عــمــچ
****
تبچي وتبچي وتبَچّي .. لحد ما نگعت لحيتك
وكل دمعه سگه للشيب .. الفرگه اهواي ماذيتك

بصوتك ونات .. ومبحوح ونين الكسره
وملزم اصفاح.. يا فگد الخوه شكبره
كافل وحزام .. طاح وخلالك حسره

وراسك شلته وتعاين عليه
وبچيت وهم قريت اليجري بيه

تذرف دموعك واقره بيها الأيام
طيحت گمر هاشم نتيجتها الشام

راح عــمــچ ..... راح عــمــچ
****

عزت السماوي

@AaZzTt1990

للتواصل على الخاص عن إستفسار أي شيئ يخص القصائد وانا بخدمتكم

حينما ذهب مولاي علي الأكبر ورجع إلى أبيه عطشان يتلضى من العطش وقال أبه هل لي بشربة ماء فقال له ابيه بحسرة وغصه

بني علي
اول تالي تطلب ماي ??
يمن تطلب وجود وما اتعذرلك
أدنگ صارت وما حاسبلها تصير
رياجك ناشفه وما عندي اگطرلك
اول تالي ما مش راي ??
لطرف الخيمه ارد محتار
وخلصت الدمع يا رايح ويا جاي
يا هضمة نظرتي أگبالي تتلوه
وتدور بشفتي گطره البيها تتگوه
حرت والحيره صعبه بهاي
يوليدي يبعد اچلاي
أول تالي تطلب ماي ??
***** بني علي ..... بني علي

أخذ من دمعي واستگوي
لچن أدري
الدمع يا بويه ما يروي
وخلص صبري
الدموع يحرگن فطور الشفايف
وسموم الحر خذه رسومك
اموت ولا اشوفك هيچ واگف
العطش طافح على هدومك
تنفث من عطش ? من حر ?
رحتلك فدوه يالأكبر
أحبك بويه بس شتشوف
أحنه نريد
نحصل گطره للأصغر
حيرتوني يا بويه بعطشكم
الاصغر ينخه بالاكبر
ابوكم ليكم اتحسر
ولدي من الضمه يلوجون
وارويهم فلا أكدر
ابوكم بيكم اتحير
بس ارجع واكلك بويه شوف ضماي
يوليدي يبعد اچلاي
أول تالي تطلب ماي??
**** بني علي .... بني علي

واجت طفله اعله طاري الماي
تدور بالشفايف لون
بس تراب شافتهن
وگلتلي يبويه حسين
بهذني دموعك البالعين
هاك شفافي رطبهن
وزادت هضمتي اعليه
ودنگت وصحت خيه
أخذي الطفله ما بيه
محتار آنه بالأكبر
اجيتي منين يرقيه
وبچينه اعله العطش كلنه وگعدنه
ونعاوينه نظر صارت
النعاوي تريد صوت وصوت ما عدنه
وصراخ اطفالنه ما ينسمع ينشاف
العطش يبس شكو برسومهم شفاف
يبس كل معانيهم
يبس كل محاچيهم
شبيدي وحتى ارويهم
شفت يوليدي شنهو الصار??
الما يحتار ظل محتار
يوليدي يبعد اچلاي
أول تالي تطلب ماي ??
** بني علي ...... بني علي

عزت السماوي

الـولـد راح .. اتلگـيني يـا ليلى

شيفيد النياح .. وحزني شيكفـيله

خـل نگعـد آنـه وياچ نـنعــاه

والآه خــل تـتــنــاوب بــآه

راح الولــد راح

***

يا ليلى وحدي بغربتي .. لا صحبه لا ظــلــو هــلي

اتلفت ودمعي يصب .. يا ليــلى چــا ياهــو الإلــي

وما عندي أي چلمه بقت .. بس بويه اريدك يا علي

ما يكتفي حزني بچي لا صفگة الايد

أمنيتي لو يهمس همس واركضله شتريد

يا ليلى هذا ابني علي ودموعي شتفيد

النفس ضاگ.. أبني هوه ريتي

ما أبقى مشتاگ .. والراح عافيتي

يا ريت طول بطول هالحين

وتبچين الأكبر ويه الحسين

راح الولــد راح

***

يا ليلى من شفت الدمه .. مغطيه جميع رسومه

گمت اشهگ وأصرخ علي .. وشمات كلها الحومه

يوليدي گوم لوالدك .. ما ينتهض عالگومه

أتچه گوه إعله المهر والنوب عالگاع

وارجف گمت ما چني ذاك مخوف الأسباع

وعيوني تارسها الدمع والشوف هم ضاع

شفته تعبان .. والروح خلصانه

ومات عطشان .. وشفافه ذبلانه

يا ليلى شوفي رسومه حلوات

شيفيد المايز بعد مات

راح الولــد راح

***

يا ليلى گطريله دمع .. بلكي يفز بدمعچ

اشتاگيتله يگلي أبه .. وصيحيله بلكي يسمعچ

گعدي ولو لحظه ويرد.. وصوته اسمعه يودعچ

الشوگ چتال اليحب وهاي آنه حبيت

وكاتلني شوگي لضحكته ولصوته حنيت

ايعينچ الله بردتچ يا ليلى للبيت

من تشمين .. هدمه وتحضنيهن

عن الحسين .. فدوه بوسيهن

ثَوبي ثَواب الشوگ شَمَات

وبفراشه عني ثَوبي حضنات
راح الــولــد راح
****

يا ليلى شوفي لامته .. مطشره گد هذا الفله

كلشي الإلي وراح الإلي .. شخلت يليلى كربله

تعبني خده عالترب .. الچان بشفافي مدلله

أشتاگله واعطش نظر لو نام هالروح

اشتاگيتله هسه وغفه بس غافي مذبوح

حسين يحچي بيا وكت ووليده مطروح

نشغة الويل .. حسرة فگد غالي

وانگضه الحيل.. وابني بدمه گبالي

ينلچم گلبي لأي خلق چان

شلون إعله ابني المات عطشان

راح الولــد راح

***

يا ليلى وصاني بصبر .. ليچ الصبر مو ليه

گال امي تبقى بهالدهر .. هم فاجده ومسبيه

اينازع وباله إلچ .. بگلبه شكثر حنيه

يوليدي محلاته أمس وياي فد طول

واتمنى ما يمشي بأرض بالهوه مشيول

تالي يليلى هالحسِن ينداس بخيول

من تطلعين .. من الخيمه للحومه

مو تنظرين .. شيصير برسومه

ما يبقى عندچ منه تذكار

النار التجي شتخلف النار
راح الـولـد راح
****

عزت السماوي

يا علي يوليدي ..... يا علي يوليدي

***
جيت اجر بروحي
وما يكفي نوحي
الراح مني الأكبر
جرح جرح جروحي
يا علي يوليدي ...... يا علي يوليدي
شفت ذيج رسومه
غيرتها الحومه
وجهه ذاك اليضحك
ناگع من دمومه
يا علي يوليدي ....... يا علي يوليدي
اطيني ايدج ليله
حسين بايد حيله
روح روحي الطايح
مات لا توميله
يا علي يوليدي ........ يا علي يوليدي
بخده شوفي شصاير
شوفي بي ضل حاير
ترفه ذيج خدوده
السيف بيها شطابر
يا علي يوليدي ......... يا علي يوليدي
طحت يم وليدي
بشعره خليت ايدي
ويمه فاضت روحي
وارجعت مو بيدي
يا علي يوليدي ......... يا علي يوليدي
وين زينب عنه
خل تجي اتساعدنه
عالبچي والنايحه
الراح منه وليدنه
يا علي يوليدي ........ يا علي يوليدي
**
عزت السماوي

مولاتي رقية وهي تتغزل بمولاي الأكبر ( عليهما السلام)

يا علي .. محله نصبتك طولك والزنود
يا علي .. شمرهن على العسكر يصايود
يا علي .. صفّن عمك العباس وحسين
يا علي .. گللهم دخلها وزامط بزود

وتتشيم الخيمه .... من تدخل الجيمه
تشوفك ضوه ويلعب .... يمهندم الهيمه

أتسيد على الساحه .. يبعد أختك
وأكسر للعدو رماحه.. وأخذ صيتك
علي وياك ** علي خويه
***
خزرتك .. رحمه عيونك ادري بالحرب غير
خزرتك .. ضحكه مو غضب والشافك يحير
خزرتك .. تذبح دون الم ترحم بالرگاب
خزرتك .. غيرك ما ملك هاي التعابير

تذبحهم بسمه .... سيف بطعم نسمه
دخيلك علي دخيلك .... يملوحة الزلمه

يا محله رمش عينك .. يمالكني
عشتك بآخر سنينك .. يعايشني
علي وياك ** علي خويه
***
هاك اخذ .. گلبي لامه والياذيني ياذيك
هاك اخذ .. عيني اخيال خل تشبع نظر بيك
هاك اخذ .. روحي خل تهلهل لمن تصول
هاك اخذ .. كلشي البيه يتحسس معانيك

فدوه لهالنظره .... يمعتبر الزهره
شحسنك يروح اختك .... يا لونك شثمره

أحير شلون اوصفنك .. عجز كلشي
النده المتبدي بجفونك .. وصل رمشي
علي وياك ** علي خويه
***
شمرتك .. من باب القتال نگول كرار
شمرتك .. من باب الجمال النبي المختار
شمرتك .. ترفه تبچي حرنه ثلج لو نار
شمرتك .. تزغر بالحروب الچانو اكبار

وچفوفك السمره .... شمحلاها بالشمره
من تهدل لمتنك .... وتعدل الخضره

بچفيتك غزل مچفي .. على الگمره
انطيني خيط اشد چتفي .. يضل ذكرى
علي وياك ** علي خويه
***
شحلاتك .. عطشان وجمالك تارس الكون
شحلاتك .. لو شارب عذب چا گلي اشلون
شحلاتك .. عدوانك يالاكبر أمنيه تريد
شحلاتك .. تمنت كلها تعطش بلكي يحلون

وصحت إعله هالعسكر .... ما واحد اليگدر
يوصل شسع نعلك .... هالخصله للأكبر

رقيه تريدك شويه .. تشتمك
واخذ عصابتي خويه .. وهب كلك
علي وياك ** علي خويه
***

عزت السماوي

تنادي مولاتي زينب ( عليها السلام) على أخويها الحسين وابا الفضل ( عليهما السلام) وتتحدث معهم

بيناتكم خل أگعد وحاچوني
وخلو اديكم خوتي فوگ متوني

*
ما ميل بين متونكم يالخوان
تسندوني عطشان بمتن عالعطشان
ومأمنه بس تعرض احچاية حيران

حد هالدلال الليله ويرگضوني
**
هنيالي يم اخواني واحچي براحه
ويمي الگمر وحسين طيبه اصفاحه
يشتمني باچر بالوجه ذباحه

والراس هذا يشيله بين عيوني
*
انسيت العطش ترويني هاي اللمه
باچر الخيل حسين تطحن جسمه
واتعده اركض اخته واعثر يمه

واصرخله يحسين اركضت شوفوني
**
شوفوني اصرخ بس ارد اتعذر
لمن اشوفك عالرمل بس منحر
والراس مشيول برمح عالخِدر

وصرت آنه استركم يالتستروني

*
يا چلمة الخويه شدفو طاريها
معقوله بس هالليله راح أحچيها
بالهيمه باچر أنتخي شگد بيها

وما أسمع ال ها خويه وتهضموني

****
ما ضال بيها وبيها خلّص كلشي
من هسه أحچي وشاب يمكم رمشي
بت گلبي باچر ينگطع من هرشي

ومن أصرخ تسمعوني ? متسمعوني ?

***
شهالدنيا هاي الدوهنتني بتالي
لو اموت هسه يخوتي اشوالي
باچر اوياكم يهوه خدري العالي

حرمه چبيره بطلعتي يأذوني

****
يخواني خلصت والحچي يريد الحيل
طر الفجر ونسولف احنه من الليل
هالحان موعدكم يخوتي اويه الخيل

يسحگونكم بيها وأنه يسبوني

****

عزت السماوي

تنادي الحوراء على أخويها سيد الشهداء وأبا الفضل (عليهم الصلاة والسلام) وتتكلم معهم في آخر ليلة لهم ....
خل نسولف ذكريات العافيه
باچر بهالساعه اختكم حافيه
تعيش ظهريه وظلام ............ اعليها ما تبقى خيام
الخيم بجدامي تصبح طافيه
ليل الوداع ... ليل الوداع ............ كسر خاطر
****
أرد اسولف .. ذكرياتي
وأبدي من حسين اخوي وذيچ الأيام
من زغرنه .. شلون چنه
حتى من نغفه انتلاگه بنفس الإحلام
وبسمرنه .. وبألمنه
حسره حسره ودمعه دمعه عشنه الآلام

ما حسبت خويه أبد .... ما ترجع لزينب بعد
واحنه سويه من المهد .... مو مالت اوداع
يفززني كل لحضه الجرح .... چني اشوفك تنذبح
وراسك يرفعونه برمح .... يعني الخدر ضاع

ليش ساكت احچي خويه مروتك
حسين بس الونه باچر صوتك
وتون وتگلي تعاي ......... خويه رايد حسوه ماي
وآنه اصيح افزعلي فدوه لخوتك
ليل الوداع ... ليل الوداع ............ كسر خاطر
****
خويه دمعك ... لا تصبه
ينكسر گلبي حبيبي بكسر گلبك
وشال دمعي .. چوه خدي
گطره گطره خويه تحچي ذكرى حبك
يعني كون .. اهواي أبچي
ولون عندي دموع خويه منها اشربك

مو هين اوداع العشگ ..... مدري چذب مدري صدگ?
نتلاگه حتى نفترگ ..... وفراگنه الموت
تدرون وادري بهالأمر ...... الليله الأخيره للخدر
باچر يطشرنه الظهر ...... وينسمع هالصوت

صوتي هذا مخدر بطاريكم
باچر بنص شامت يناديكم
هالطلع صوتي حسين ......... صرت عني خويه وين
انهضم باچر وازامط بيكم
ليل الوداع ... ليل الوداع ............ كسر خاطر
****
هسه احچي ..وي چفيلي
وأرد اسولف خويه من أيام مهدك
وشحلات .. الإبتسامه
من تناغي وأيدي تمشي فوگ خدك
يصير تالي.. كلشي بينه
ما يضل صيته خدرنه خويه بعدك

بيه شيسوي هالدهر .......... لو طحت باچر يا گمر
من هسه شو دمعي حدر...... يا روحي عباس
من باچر يموت الأخو......... وللحره ما يبقى كفو
وتحترگ ذكرة كل دفو ....... ويطش الأحساس

شكثر راح استاحشلها چفوفك
بكل نفس أذكر فضل معروفك
شما يمر بيه الزمان ........... بعد ما حس بالأمان
يا أمان يمرني إذا ما شوفك
ليل الوداع ... ليل الوداع ............ كسر خاطر
****
خويه تذكر .. من ابونه
خله اديك وچلمتك خويه بديه
وكفو منك .. گد چلمتك
حدها هالليله الكفاله وهاي هيه
وشرد اگلك .. يابو فاضل
تدري لو ما تدري شنهو يصير بيه

أتمايز رسومك هجر ..........وبچفوفك أنظر لليسر
لو طاحن بذاك الظهر ......... وتحير الضعون
وهيهات يلتم الشمل ......... لو صار بچفوفي الحبل
وچنت بحراسة چم نفل ...... ولوحدي شلون

خويه آخر مره كض اچتافي
باچر احتاج آنه چف الدافي
زينبك باچر تضيع .......... وتمر من يمك صريع
بعد احچي يا گمر لو كافي
ليل الوداع ... ليل الوداع ............ كسر خاطر
****
ذكريات .. اهواي عدنه
يا حبيبي حسين لازم هسه ترتاح
ظهر باچر.. تعب عندك
گطع خنصر والسلب والراس برماح
وكل عذابك .. مو بذني
العذاب تنام وتشوف الضعن راح

ويا ابا الفضل عوف السهر ...... ينطرك ألم يم النهر
وتودي لينه بس قهر ............ ويضيع الافياي
باچر رسومك تنهب ........ واخيامك إعلينه تشب
وهم مثل اخيك تنسلب ..... بس تبقى وفاي

في أمان اتراب اعوفن لونكم
في أمان احبال ماي وجوهكم
بعد شيفيد الكلام ........... يله خل نقره السلام
باچر يموت السلام بدونكم
ليل الوداع ... ليل الوداع ............ كسر خاطر
****
عزت السماوي

في صباح الحادي عشر تتحدث مولاتي العقيلة زينب ( عليها السلام) بحسرات الغربة والضياع وتقول
*****
راحت ايام الربه هسه الضياع
من طلعنه عن اخوتي بلا وداع
وا ويلاه ........ وا ويلاه
***
صابحونه .... براس اخونه
ويا مره التحمل تشاهد راس اخوها
شحچي وياه ..... شرد أگله
ويمه اخيته الحره غربه الچتفوها
تهبط الراس ..... الفاگده اخوان
وشيردهم والخواطر يجبروها

بين يوم و ليله غربني الزمان
بيا وكت زينب تنام بلا أمان
وا ويلاه .......... وا ويلاه
****
من مشينه .... عن اخوتي
عالهزيله وأنضرلهم عالترايب
وصحت ليهم .... شوفوا اختكم
الأمس بحماكم صفت بين الأجانب
آ يهضمي .... ويا عذابي
أم خدر آنه اصير ام المصايب

كلفه گادونه لچن ما أدري وين ??
وبيه كلهم عرفوا آنه اخت الحسين
وا ويلاه ........... وا ويلاه
****
الفِگد أسمه .... وصيت خدره
يحس حتى الهوه ينظرله بجساره
وهاي آنه .... من سبوني
ضعني گدام الشمس بان إنكساره
يا نهاري ..... وآ يليلي
جرح سلمها لجرح ليلي ونهاره

الهضم بالليل يشرب لونِه
والشمس لفحت جمال وجوهنا
وا ويلاه .............. وا ويلاه
****
شهالمصيبه .... بحبل واحد
وما تلاگينه رغم واحد مشينه
وحده تمشي .... وره وحده
وحسره وبدمعه صفه هذا حچينه
شلون حسره .... شلون دمعه
وحده تحچي لوحده شوفي شصار بينه

وين اهلنه وين ذيچ احبابنه
لليسر يا وسفه دهري الجابنه
وا ويلاه .................. وا ويلاه
**
شلون دنيا ..... غربتني
والمجالس ناطرتني يا حسافه
آنه زينب ..... أخت اخوتي
موش اي اخوان خوّان الكلافه
تالي ادنگ ...... يم رمحهم
وعينه تحچيلي سفرنه مو بشافه

عالرمح راسه وبديه احبالي
العمر هيج انختم بالتالي
وا ويلاه ............... وا ويلاه
*****

عزت السماوي

چم فجر بفجر گلولهن يله

الشام بعيد واحنه نريد نوصله

تعبانات ويفزن على اللچمات

وللمسبي ويفز ما تنحچي أسم الله

من هيمه لخرابه ومنها للديوان

دولبهن ادولب هالوكت غفله

عزيزات الگمر فرجه اعله ظهر النوگ

ضعن نسوان مدري شلون من صله

يا دور الدهر بده الخدر والحيل
يمشن بالنهار ويبچن بكل ليل
ويتناوب ونين الفاجدات بويل

وملچومه تضمد بالجرح ملچوم

يا ديره اليطبن تلتم العربان

ومن حي الهواشم هالسبايا اليوم

ما بيهم شريف يدنگ اعله الشوف

وما گالو فشل هذا الضعن محشوم

من طبع السبايا من العبي مأيسات

بس هنه بعبيهن طبن إعله الگوم

ويا حال الرباب و هزة الكاروك

الما منه شبع والبالسهم مفطوم

الخرايب مو لهاشم بيها ويگعدون
ولا ضعن الله تتخازر عليه عيون
ولا نص القصر يم ناس يشمتون

ولا شمر النذل يم العقيله يحوم

عبي اعليها الحبل تكلف على النسوان

شبديهن بس عليل مگيد ومهضوم

هضيمة زلمه وي عماته چلمة آخ

مكسور ويماشي راس چم مضلوم

بچاهن وكتهن يم ضحك شمات

ومهمومه بحبل تمسح دمع مهموم

شمر صاير عليهن بيده رايه
الفگد ياذيها يدري بي درايه
عگب عباس صاير بيده رايه
كتب فوگاها جبناها سبيه
....
مولاتي تگول
صيواني شحلاته بي ولف چان
بس خماري هالظل بي ولف چان
أنترس هالطف عساﭼر بي ولف چان
أختصاص السلب والسب البقيه
.....
مامش بالخلك يا ناس شيمات
شفت ﮔدامي متحلفين شيمات
شي جانه بيسر يحچون شيمات
وتلگيها الخرابه أسمع عليه
.....

عزت السماوي

لو گاضيه الدنيا بهذيج الساعه
لمن وصلها صوت سحگ اضلاعه
وللموت ما لحگ يمدد باعه

و تسمع ونينه يصيح زينب عطشان
** وا حسيناه .. وا سليباه

شسوه الحسين شسوه ويعطشونه
من مات ليش بخيل ويسحگونه
وفوگ السحگ يم اهله ويسلبونه

واعلي يمرون اهله لاچن عريان
** وا حسيناه .. وا سليباه

بحجارهم ذاك الجمال اتغير
ويا جرح يلزم عالتراب اتحير
جرح الحجر فوگه سهم ومطبر

واكلف جروحه من وصله الدخان
** وا حسيناه .. وا سليباه

حرگو خيم وحسين تجري دمومه
ورعب الحرگ طلّع خدر للحومه
منها وخدرهن عاينو لرسومه

واللي كفلهن تچوي جسمه التربان
** وا حسيناه .. وا سليباه

شهالدنيا خلّت بت علي حيرانه
وحسين راسه نرفع يم نسوانه
يا هضمة العطشان والعطشانه

العطشان الراح الهضم ظل للنسوان
** وا حسيناه .. وا سليباه

الطف گضه بس شگضه الجاي ألعن
بنيات حيدر بالصحاري انطشن
وجم مجلس وديوان وسفه الطبن

مكلفها بت حيدر تطب الديوان

** وا حسيناه .. وا سليباه

عزت السماوي

أول ما طلعت مولاتي زينب ( عليها السلام) من آخر خيمه حرگوها صاحت

تعبت اهواي ... تعبت اهواي .. يا خوتي تعبت اهواي
**
وين انطي الوجه يحسين ما اندل
دوهني الحرگ يا خويه ما تعدل
تعبت اهواي ما بين الزلم والخيل
عگب كافل دلالي ياهو يتكفل

غريبه وناس بس غربه
و على المثلي شكثر صعبه

** خلصت يخوتي
خلصت يخوتي واطلعت خدر البيت

****
تعبت اهواي والجاي اصعب اهوايه
أولهن عِلت للشامت الرايه
براي الكافل امشي والهضيمه الصار
الشايل راس اخوتي اعلي فرض رايه

يكسرة هاشم چبيره
بتهم راحت يسيره

**وتتنخه زينب
وتتنخه زينب يا وسف بالميتين
****
طلعت من الخيم وحسين عاينته
أصدگ ما أصدگ خويه هوه أنت ?
أباوعله واحير وارجع أشتَم بي
اهوايه الخيل يا هالناس ساحگته

أشبگه وينلچم خدري
وأگله تدري ? ما تدري?

** شافوا عباتي
شافوا عباتي حسين أگعد وياي
*
رهمت وانشِفت والشامت اتشفه
وچم چف اليگيدنه عگب چفه
مو النه السبي والسوط والشِمات
العفاف الزينبي شگد صاحوا انعرفه

من ستري آنه عرفوني
ومو آنه اليهضموني

** بالبر ركضنه
بالبر ركضنه وطايحين الخوان
*
تعبانه يخوتي والله تعبانه
حچيت الچلمه هاي اهواي خجلانه
بس شبيدي بس إلكم ابث شكواي
وراح امشي ولمدري وين ممشانه

حره وما بعد حره
التطب ذباحكم قصره

** عالهزله اختكم
عالهزله اختكم رايحه ولا طلاب
***

عزت السماوي