በፓኪስታን በደረሰው ከባድ የጎርፍ አደጋ 46 ሰዎች ህይወታቸው አለፈ‼️

በሰሜን ምዕራብ ፓኪስታን እና በሌሎች አቅራቢያ ስፍራዎች ለአንድ ሳምንት የሚጠጋ ጊዜ እየዘነበ ባለው ከባድ ዝናብ ባስከተለው ጎርፍ የሟቾች ቁጥር 46 መድረሱ ተገልጿል።

የሀገሪቱ መንግስት የሟቾቹን ቁጥር ይፋ ሲያደርግ ለበርካታ ቀናት እየዘነበ ያለው ከባድ ዝናብ የጎርፍ አደጋውን አባብሶታል ሲል አስታውቋል።

የፓኪስታን የሚቲዎሮሎጂ ኤጀንሲ፤ እየተመዘገበ ያለው የዝናብ መጠን ከሚጠበቀው በላይ መሆኑን ገልፆ፤ ኑሮዋቸውን በወንዝ አካባቢ ያደረጉ ዜጎች ጥንቃቄ እንዲያደርጉም አሳስቧል።

የሚቲዎሮሎጂ ኤጀንሲው የሃገሪቱ ዜጎች ወንዞችን እና ጅረቶችን ከማቋረጥ እንዲቆጠቡ ማሳሰቢያ ማቅረቡን አልጀዚራ ዘግቧል፡፡

በፓኪስታን በተደጋጋሚ ጊዜ የጎርፍ መጥለቅለቅ የሚያጋጥም ሲሆን በቅርቡ በ2022 የተከሰተው እና በርካታ የሀገሪቱን ክፍል በሸፈነው የጎርፍ አደጋ የ1 ሺህ 737 ዜጎች ህይወታቸውን ማጣታቸው ይታወሳል።