‏لا تستحي مـن كلمـة الحـق قلها
‏لا خير بـ اللي عادته يخفي النـور

ترى الخطيه خاسرن من فعلها
‏ولا بيض الله وجه من يشهد الزور

يارب تسعد ضايـق الصدر والبال
عجل فـرج مخلوق بالحيل ضايق

بدل عسر دنياه في يسر الاحـوال
وعسى مزاجه ويـن ماراح رايـق

اجمعوا كل الأماني مع الثلث الاخير
و ارسلوها بين سجدة و ترديدة دعاء

ما تخيب الدعوة اللي لها ربٍ قـديـر
يا تجيكم بـ أعظم الخير يا تدفع أذى

‏ويــن الذي عقـب الفجر يفتح الباب
ونجـــره يوقـظ كـــل نــايـم دنـيـنــه

وديوان بيته نصفه اصحاب واجناب
ولا بــاح مــن كثــر المكـارم كنــيـنـه

يضحك ويستبشر اذا جوه الاصحاب
وتقراء الكرم فـي وسط كفه وعينـه

الهاب بدر

‏حتى لو ان اوضاعنا دون في دون
والناس ثار سلاحها من يديها

بخير دام عندنا من يقولون
متى الصلاة وكم باقي عليها

‏ركعة وتـر في تالي الليل تغنيك
عن ما جمعته في حياتك من أموال

من فضلهايمكن من النار تنجيك
يوم الحساب وتصفيت كل الأعمال

‏أبشروا بالخير ياأهل الصلاة
فعلكم طيب ومكسبكم ثمين
.
دامــكم لله تــــرخون الجـباه
خاشعين وراكعين وساجدين
.
علي_الشريف

‏احفظ لسانك لابلوك المعاثير
والكلمة اللي دون ميزان خفها

يجوز ترمي كلمةٍ دون تفكير
والصبح سودان القلوب تخطفها

عبدالرحمن بن بديع

‏طال الزمان وبان فرق الرياجيل
لا واحسافه هقوتي في بعضهم

مرضى القلوب محاربين المشاكيل
اصعب مرض ما ينتعالج .. مرضهم

محمد_أبوعبيه

‏احتجت والحاجه تحد الرياجيل
واللي يـســـد اللازمــه ويـن بيته

راحوا كـبار الروس مثل التماثيل
الهــرج واجد والـفـعــل مـالقيته

شبيب بن شاهر

‏سبحان من يعطي قـبول المخـاليق
وسبحان من يفرق عطا عبد عن عبد

بعض الأوادم شوفها يجلي الضيق
وبعض الأوادم شوفها .. يدبل الكبد

ضويحي_العماني

‏لوضاقت الدنيا بها حل وافراج
لابد من عسرٍ يجي فيه تيسير

اشتك على اللي يطلبه كل محتاج
الواحد اللي عنده الرزق والخير

والصبر خله لك طريقه ومنهاج
ان كان تبغالك معزه وتقدير

مولاك يجعل لك من الهم مخراج
الرازق المعطي ولي المقادير

سعود عايد العلوي الحربي