O‘zbekiston va yetakchi xalqaro kompaniyalar o‘rtasida agrar sohada hamkorlik aloqalari kengaymoqda

IV Toshkent xalqaro investitsiya forumi doirasida Qishloq xo‘jaligi vaziri Ibrohim Abdurahmonov xorijiy davlatlar hamda nufuzli xalqaro tashkilotlar vakillari bilan qator uchrashuvlar o‘tkazmoqda.

Ana shunday muhim uchrashuvlardan biri McKinsey & Company vakillari bilan bo‘lib o‘tdi.

Uchrashuv davomida O‘zbekiston qishloq xo‘jaligi sohasida olib borilayotgan islohotlar, investitsiya salohiyati hamda ilm-fan asosidagi yondashuvlarni rivojlantirish borasida fikr almashildi. Tomonlar sohaga ilg‘or texnologiyalarni jalb etish, raqamli transformatsiyani jadallashtirish va barqaror qishloq xo‘jaligi tizimini shakllantirish yo‘nalishlarida hamkorlik imkoniyatlarini muhokama qilishdi.

Shuningdek, McKinsey kompaniyasi O‘zbekiston agrar sohasini strategik rivojlantirish bo‘yicha o‘z tajribasi va ilmiy yondashuvlarini taqdim etdi. Uchrashuv yakunida tomonlar o‘zaro manfaatli hamkorlikni kengaytirish va aniq loyihalarni amalga oshirish bo‘yicha kelishib oldilar.

Shundan so‘ng, vazir Ibrohim Abdurahmonov X5 Group kompaniyasi vakillari bilan muloqot olib bordi.

Mazkur uchrashuvda O‘zbekiston qishloq xo‘jaligi mahsulotlarini Rossiya bozoriga eksport qilish, logistika zanjirlarini rivojlantirish hamda zamonaviy talablar asosida ishlab chiqarishni kengaytirish masalalari muhokama qilindi. Tomonlar o‘zaro manfaatli sheriklik asosida oziq-ovqat xavfsizligini ta’minlash, mahsulot yetkazib berish jarayonini soddalashtirish va yuqori qo‘shimcha qiymatga ega mahsulotlar eksportini oshirish bo‘yicha fikr almashishdi.

X5 Group vakillari O‘zbekistonning tabiiy iqlim sharoiti, qishloq xo‘jaligi resurslari va meva-sabzavotchilikdagi yutuqlarini e’tirof etib, yaqin istiqbolda qo‘shma loyihalarni boshlashga qiziqish bildirishdi.

Albatta, bu kabi hamkorlik uchrashuvlari O‘zbekiston qishloq xo‘jaligi sohasiga xalqaro tajriba va investitsiyalarni jalb etish, ilg‘or texnologiyalar asosida ishlab chiqarishni modernizatsiya qilish hamda eksport hajmini oshirishda muhim qadam bo‘lib xizmat qiladi.

Qishloq xo‘jaligi sohasida global sheriklik yangi bosqichga chiqmoqda

Toshkentda o‘tayotgan IV Toshkent xalqaro investitsiya forumi doirasida yurtimiz taraqqiyotiga hissa qoʻshadigan, ayniqsa, qishloq xo‘jaligi sohasidagi xalqaro hamkorlikni mustahkamlashga xizmat qiladigan muhim uchrashuvlar bo‘lib o‘tmoqda.

Forum doirasida O‘zbekiston Respublikasi qishloq xo‘jaligi vaziri Ibrohim Abdurahmonov bir qator xorijiy davlatlar hamda nufuzli xalqaro tashkilotlar vakillari bilan samarali muloqotlar olib bormoqda.

Shular jumlasidan, dunyoga mashhur “John Deere” kompaniyasi vakillari bilan bo‘lib o‘tgan uchrashuv alohida e’tiborga loyiq. Mazkur kompaniya butun dunyo bo‘ylab zamonaviy qishloq xo‘jaligi texnikasi va yechimlarini taqdim etib kelayotgan yetakchi brend sifatida tanilgan.

Uchrashuv davomida O‘zbekiston va “John Deere” o‘rtasidagi ikki tomonlama hamkorlikni yanada mustahkamlash, mavjud loyihalarni kengaytirish, xususan, innovatsion texnologiyalar asosida mexanizatsiyani rivojlantirish masalalari muhokama qilindi.

Aytish kerak, bugun O‘zbekiston qishloq xo‘jaligida yuqori unumli, raqamlashtirilgan va ekologik jihatdan barqaror yechimlarga ehtiyoj sezilmoqda. “John Deere” kompaniyasi esa ana shunday yechimlarni taklif qiluvchi ishonchli hamkor sifatida bu jarayonda o‘z o‘rnini mustahkamlab bormoqda.

Shuningdek, forum doirasida vazir Ibrohim Abdurahmonov BAAning “Condor Group” kompaniyasi rahbari janob Sivaprasad bilan uchrashuv o‘tkazdi. Bu muloqot ham dolzarb va strategik ahamiyatga ega bo‘ldi. Unda O‘zbekistonda xalqaro standartlarga javob beruvchi, akkreditatsiyadan o‘tgan zamonaviy oziq-ovqat xavfsizligi laboratoriyalarini tashkil etish masalasi muhokama qilindi.

Tomonlar ayniqsa, bu boradagi texnik, tashkiliy va institutsional islohotlar yuzasidan aniq kelishuvlarga erishdi.

Shuningdek, laboratoriya axborotini boshqarish tizimlari — LIMS (Laboratory Information Management System) ni joriy etish, eksport mahsulotlarini xalqaro standartlar asosida sinovdan o‘tkazish va tan olingan sertifikatlar berish tizimini yo‘lga qo‘yish bo‘yicha Qo‘shma ishchi guruh tuzishga kelishib olindi.