Xorijiy paxta navining ekin holati ko‘zdan kechirildi

Qishloq xo‘jaligi vaziri Ibrohim Abdurahmonov sohada amalga oshirilayotgan ishlarning natijadorligi bilan tanishish maqsadida Toshkent viloyatiga tashrif buyurdi.

Tashrif dasturining ilk manzili sifatida Oqqo‘rg‘on tumanidagi “Humo Agrolux” fermer xo‘jaligiga qarashli 5 gektarlik dala maydoni ko‘zdan kechirildi.

Mazkur hududda Xitoydan olib kelingan Xin Lu Zao-78 navli ekin parvarishlanmoqda. Ushbu nav xorijiy bo‘lganligi sababli, uni yetishtirish jarayonida agrotexnik tadbirlarning o‘z vaqtida va sifatli bajarilishi alohida ahamiyat kasb etadi.

Vazir Ibrohim Abdurahmonov dala maydonini ko‘zdan kechirar ekan, ayniqsa agrotexnik ishlar va vegetatsiya jarayonining borishiga e’tibor qaratdi.

U navning unib chiqish davridan boshlab hozirgi holatigacha bo‘lgan parvarish bosqichlarini atroflicha tahlil qildi hamda ushbu jarayonlar fermer tomonidan belgilangan agrotexnik me’yorlarga muvofiq olib borilayotganini ijobiy baholadi.

Shuningdek, tashrif davomida ekinning rentabelligi, kasallik va zararkunandalarga chidamliligi, hamda kelgusida eksportbop mahsulot olish imkoniyatlari yuzasidan mutaxassislar bilan fikr almashildi.

Vazir o'z navbatida, ilm-fan, tajriba va texnologiyalar uyg‘unligiga asoslangan yondashuv – qishloq xo‘jaligida yuqori hosildorlik va barqaror rivojlanishning asosiy kafolati ekanini alohida qayd etdi.

Zero, bugungi harakat, ertangi yuqori hosildorlik garovi.

Qashqadaryoda ochiq muloqot va amaliy yondashuv asosida tizimli islohotlarga zamin yaratmoqdamiz

Ayni paytda qishloq xo‘jaligi sohasida amalga oshirilayotgan keng ko‘lamli islohotlarning samaradorligini joyida o‘rganish maqsadida, ishchi guruhimiz bilan Qashqadaryo viloyatida bo‘lib turibmiz.

Yakkabog‘ tuman hokimligi binosida tashkil etilgan sayyor qabulda viloyatimizning qishloq xo‘jaligi tarmog‘ida faoliyat yuritayotgan barcha mutasaddilar, fermer xo‘jaliklari rahbarlari hamda tadbirkorlarning muammolari, takliflari batafsil ko‘rib chiqildi.

2024-yilda paxta va g‘alla yetishtirish bo‘yicha erishilgan natijalar va yil davomida amalga oshirilishi lozim bo‘lgan rejalar atroflicha muhokama qilindi. Suv resurslaridan samarali foydalanish, agrotexnik tadbirlarni belgilangan muddatlarda sifatli amalga oshirish bo‘yicha tavsiya berildi.

Har bir mas'ul xodim o‘z zimmasidagi vazifalarni yuksak mas’uliyat bilan bajarishi, ayniqsa chekka hududlarda joylashgan fermer va dehqonlarning sharoitlarini yaxshilash borasida faol ishlashi shartligini yana bir bor qayd etdik.

Albatta, an’anaviy dehqonchilik tajribasini zamonaviy ilm-fan yutuqlari bilan uyg‘unlashtirish orqali hosildorlikni sezilarli darajada oshirish, ilmga asoslangan yondashuv va halol mehnat qishloq xo‘jaligimiz rivojining poydevori.

Yaqin kunlarda boshlanadigan g‘alla o‘rimiga puxta tayyorgarlik ko‘rish, hosilni isrof qilmasdan, o‘z vaqtida va yuqori sifatda yig‘ishtirib olish mas’uliyati har birimizning zimmamizda.

Sohada olib borilayotgan islohotlarning barchasi Prezidentimiz rahnamoligida qishloq xo‘jaligini yanada rivojlantirish, fermer va dehqonlarning huquq va manfaatlarini himoya qilish, ularning mehnat sharoitlarini yaxshilashga qaratilgan qaror va farmonlarning amaliy natijasidir.

Viloyatda qishloq xo‘jaligi sohasida samaradorlikni oshirish, zamonaviy ilm-fan yutuqlarini keng joriy etish va mas’uliyatli yondashuv orqali hosildorlikni yanada yaxshilash uchun barcha imkoniyatlardan oqilona foydalanish zarur.

Bu borada barcha soha vakillarining yuksak mas’uliyat va halollik bilan xizmat qilishi tarafdoriman!