Navoiy tajribasi: foydalanishga qaytarilayotgan cho‘l hududlari

Navoiy viloyatidagi safarim davomida Konimex tumanidagi “Navoiy World Agrotech” MChJga qarashli dala maydonlarida olib borilayotgan agrotexnik jarayonlar bilan tanishdim.

Tumandagi 9 650 gektar maydonning 100 gektarlik qismida xorijdan keltirilgan serhosil paxta navi zamonaviy agrostandartlar asosida parvarish qilinmoqda. Ekinlar 76x10 sxemada, qo‘shqator usulda, plyonka ostiga ekilgan bo‘lib, bu tajriba yuqori natija berishi kutilmoqda.

Mazkur hududda tomchilatib sug‘orish texnologiyasi to‘liq joriy etilgan. Bu esa suv tejamkorligi, hosildorlikning ortishi va yer unumdorligining tiklanishiga xizmat qilmoqda. Ayniqsa, ilgari cho‘l hududi hisoblangan ushbu yerlar bugun Xitoy kompaniyasi bilan hamkorlikda qayta foydalanishga kiritilayotgani tahsinga loyiq holatdir.

Loyiha doirasida g‘o‘za navlarini yetishtirish, yerlarni lazer texnologiyasi yordamida tekislash, qator oralariga ishlov berish kabi ishlar agrotexnik qo‘llanmalarga muvofiq olib borilmoqda.

Albatta, yer tayyorlash jarayoni vaqt talab etgani sababli ekish biroz kechikkan bo‘lsa-da, mas’ullar bilan suhbat davomida hosil mavsum yakuniga qadar to‘liq yetilib, terimga tayyor holatga kelishi kutilayotganini ta’kidlashdi.

Men dala hududida qo’llanilayotgan ilg‘or yondashuvlarni yuqori baholadim, loyiha ijrochilari — fermer va investorlar bilan suhbatlashib, ekin maydonlarini kengaytirish, hosildorlikni oshirish hamda ishlarni izchil tashkil etish bo‘yicha aniq tavsiyalar berdim.