Qamashi tajribasi: Paxtachilikda ilmiy yondashuv va samarali mehnat – muvaffaqiyat garovi

Qashqadaryo viloyatidagi safarim davomida Qamashi tumanidagi “Yorqinbek Jasurbek” fermer xo‘jaligi dala maydonida bo‘ldim.

Fermer xo‘jaligida 20 gektar maydonda xorijiy paxta navi 76×10 sxemada, qo‘sh qator tomchilatib sug‘orish texnologiyasi asosida ekilgan. Agrotexnik tadbirlar to‘liq bajarilgan, suv tejamkor sug‘orish tizimi qo‘llanilgan, oziqlantirish jarayonlari esa tuproq tahlili natijalariga asoslanib amalga oshirilgan. Mazkur maydonda har gektardan 65–70 sentner hosil olish rejalashtirilgan.

Dala maydonini ko‘zdan kechirar ekanman, fermerning ilmiy yondashuv asosida faoliyat yuritayotganini, agrotexnik intizomni to‘liq ta’minlaganini va zamonaviy texnologiyalarni amaliyotga tatbiq etayotganini ijobiy baholadim. Shuningdek, termidan oldin vezuv bilan ishlov berish orqali barglarni to‘kish usulining samaradorligiga alohida e’tibor qaratdim.

Shundan so‘ng, “Sanjar Diyorovich” fermer xo‘jaligi dala maydonida bo‘ldim. Ushbu xo‘jalikda ham 5 gektar maydonda xorijiy paxta navi ekilgan bo‘lib, agrotexnik tadbirlarning o‘z vaqtida bajarilgani tufayli 65–70 sentner hosil kutilmoqda.

Aytish kerak, avvalgi yillarda Qamashi tumanida o‘rtacha paxta hosildorligi 35–40 sentner/ga atrofida bo‘lgan. Bugungi kunda esa ilmiy yondashuv, suv tejamkor texnologiyalar va tahlil asosidagi oziqlantirish tizimi joriy etilishi natijasida bu ko‘rsatkich 65–70 sentner/ga yetmoqda. Bu holat tuman agrar sohasida hosildorlikning barqaror o‘sishini ta’minlamoqda.

Ishonchim komilki, mexanizatsiya jarayonlarini jadallashtirish, ilmiy-amaliy yondashuvni keng joriy etish va islohotlarni izchil davom ettirish paxtachilikda yuqori natijalarga erishishning asosiy omilidir.

Zero, bugungi yuksak natijalar agrar sohada olib borilayotgan islohotlarning amaliy samarasini yaqqol ifodalaydi.

Qashqadaryo dalalarida zamonaviy agrotexnik yondashuvlar joriy etilmoqda

Qashqadaryo viloyatiga qilgan xizmat safari davomida Ko‘kdala tumanidagi “Qashqadaryo Jingu” qo‘shma korxonasiga qarashli dala maydonlarida amalga oshirilayotgan agrotexnik jarayonlar bilan tanishdim.

Umumiy maydoni qariyb 1500 gektar bo‘lgan ushbu hududda xorijdan keltirilgan serhosil paxta navi zamonaviy agrostandartlar asosida parvarish qilinmoqda. Ekinlar 76x10 sxemada qo‘shqator qilib, plyonka ostiga ekilgan.

Ta’kidlash joizki, oziqlantirishning barcha bosqichlarida tomchilatib sug‘orish texnologiyasi qo‘llanilmoqda. E’tiborga molik jihati shundaki, avvallari bu hudud cho‘l va qarovsiz yerlar hisoblangan bo‘lsa, bugun xorijiy kompaniyalar bilan hamkorlikda qayta o‘zlashtirilib, samarali foydalanishga kiritilgan.

Bugungi kunda g‘o‘za navlarini yetishtirish bo‘yicha keng ko‘lamli sa’y-harakatlar olib borilmoqda. Qator oralariga ishlov berish va parvarishlash amaliyotlari uslubiy qo‘llanmalarga muvofiq tarzda bajarilmoqda.

Yerni ekinga tayyorlash agrotexnikasi ma’lum muddat talab qilgani bois, ayrim joylarda ekin jarayonida biroz kechikish kuzatilgan. Shunga qaramay, mavsum yakuniga qadar hosil to‘liq shaklda terimga tayyor bo‘lishi kutilmoqda.

Dala maydonlarida joriy etilayotgan innovatsion yondashuvlarni yuqori baholadim. Shuningdek, ekin maydonlarini yanada kengaytirish, hosilning to‘liq yetilishini ta’minlash hamda ishlarni izchillik bilan tashkil etish yuzasidan mas’ullarga tegishli tavsiyalar berdim.

Tashrif davomida shu hududda yetishtirilayotgan kuzgi tarvuz navlarini ham ko‘zdan kechirdim. Kuzatuv jarayonida tarvuzlarning vazni va sifati belgilangan me’yordan yuqori ekani e’tirof etildi.

Ko‘kdala tumani tarvuz yetishtirish bo‘yicha viloyatda peshqadam tumanlardan biri sanaladi. Shu bois, bu yerda mehnat qilayotgan fermer va mutasaddilarning fidokorona mehnati alohida e’tirofga loyiq.