عارفين الغلط وين ؟؟الغلط انو نحنا بنتعشم شديد في اي زول درجة ما بنخت مكان ولا نسبة واحد في المية انو ممكن يأذينا الانسان ده والطبيعي انو البزيد عن حدو بنقلب ضدو ... يا جماعة خلو عشمكم بس في ربنا لانو هو الوحيد سبحانه وتعالى البدينا اكتر مما نتوقع خلي املك في ربك قوي لانو الوحيد الما بخذل قلب لجأ ليهو ولا يد اتمدت ليهو
اما بالنسبة للبشر فعادي انت ممكن تتخذل من اقرب الناس ليك شفتا الزول المراهن الناس عليهو وطاير بيهو السما يلا عادي يوقعك من سابع سما ولا يرف ليهو جفن 🙂 .


"في زمنا دا بقى اي زول بفتش على مصلحتو بس واي زول عايز ياخد اكتر ما يدي حرفيا الانانية كترت " .


وكمية الناس العايزة تعرف اخبارك من باب الشمار كُتااار وانت مفتكرهم حبايبك 🙂
الكلام يطول بس عايزة اقول ليكم
حتلاقو ناس كتار في حياتكم فيهم الكويس وفيهم الوحش اتمسكو بمبادئكم واخلاقكم واحتسبو الاجر ما اي زول معتبرو البيست حقك هو معتبرك بيست .
خليك مستعد لاي صدمة ما تراهن على زول ما تراهن ما تراهن ما تراهن لانو ف الاخر كلو حيقع ع راسك و انت الخسران 💔 .
حياتك الشخصية احتفظ بيها لروحك و بس فهمت؟

#العنود

‏المشكلة ما في الناس البتخذلك ، المشكلة فيك انت البتتعشم كتير .

كان نفسي اشوفِك وانتِ بتجاهدِ بتحاربِ ولو شوية عشان علاقتنا كان نفسي اشوف محاولاتِك عشان ما تخسريني.!
بس كل افعالك كانت بتقول" عادي امشي" .

وحدة قالت جات فتره وكنا متشاكلين انا وراجلي وقاعدين مع بعض زي الضيوف ، بس قايمه بواجبي تجاه بيتي ومطبخي على أكمل وجه الحاجة اللينت قلبي وخلتني امشي اعتذر انو كان كل م اعمل شي واتعب يقولي م تتعبي نفسك ، تسلم يدك ، الاكل طعمو حلو الليله ، ماشاء الله فستانك حلو 💜 كان بطيب خاطري رغم مشاكلنا عشان كده كان لازم اصالحه حتى لو هو الغلطان .



وحده قالت امي وابوي سافرو شهر ام ابوي كانت عيانه وخلوني مع اخواني الاربعه ، كنت خايفه وشايله هم لاني امسك بيت كامل زي دا براي وانا م عندي اخت َامي كانت شايله عني حمل كبير ، كنت بعمل ليهم فطور غدا وعشا دايما مهما كان الاكل كعب بقولوا لي تسلم يدك ، مع انها كيف كيف لكن عشانك ي ستي 💜 وأحيانا كتيره بساعدوني ف نضافة البيت ومن وقتها حتى لمن امي جات بقيت رسمي ماسكه البيت ومبسوطة .



" الكلمه الطيبة " .
البنات م عندهم مشكله يتعبوا ويشتغلو ويقيفو بالساعات عشان خاطر راحه اخوانها او راجلها ، كل هي المحتاجاهو منك كلمه طيبه والكلمه الطيبه دي قادره تزيل جبال من الهموم من على كتفها والله💜

" رفقا باخواتنا وأمهاتنا وزوجاتنا💜 "

#لين_نزار

محل ما اقبل بشاكلوني اني بنوم كتير😂 وبقولوا علي دب وم عارفه شنو وكلام كتير يعني منتقدني في النوم كتير و م مريحني بس هم م عارفين اني اذا قعدت كم ساعه بدون م انوم مخي حيضرب بجد💔 م عارفين الانا بمر بيه💔 م عارفين انا بجاهد لايي درجه عشان انوم و م افكر كتير.!


" خلو الناس بحالهم ياخ ! "

على فكرة الناس دي ماجميلة زي ما في بروفايلهم ، الحب دا ماحلو زي الافلام ، الحزن ما كعب شديد زي ما الكل فاكرو ، البعد طول عمرو ح يفضل قاسي ، الشوق ما بقتل والبحبك مابخليك والبعزك بقيمك.

بنندم على الحاجات الكنا فاكرنها صح اكتر من الحاجات الكنا متأكدين انها غلط.

كتير خبينا زعل وتعب ورا كلمة كنت مشغول .

كتير رتبنا كلام بس لما جاء وقتو ما قلنا ولا كلمة.

شريك العمر او شريك الروح او زي م بقولو شريك الحياة.
الزول دا قادر و ف يدو إنو يديك شجاعة أبدية ل مواجهة أي شي ، أو كمان بيديك كسرة قلب تعيشك باقي عمرك خايف وجبان لأنو ثقتك بنفسك اتهزت .

العلاقة بين أي تنين ، "اصحاب ، أخوات ، أو متزوجين" لازم تكون قائمة ع أساس " أنا وراك ف ضهرك وحواليك " ، اللي هو أنا معاك لو مهما عملت والبصيبك بصيبني عشرة اضعاف ، و دا بيبقى شي مُطمئن جدآ .

" أي علاقة ما فيها الشعور دا لا يعوّل عليها💜! "

#لين_نزار

ما تخسر نفسك مهما حصل لانه النفس م بتتعوض.

‏ما تتمسك في زول ما بيبذل مجهود عشان يحافظ على وجودك.

لو ركزت شويه ح تلاقي انك مريت بلحظات قهرتك شدييييد واتجاوزتها ، يبقي نفس الفتره الانت البتعاني فيهاا الان مصيرها تعدي علي خييير .

‏مامهم نرجع لحياتنا الطبيعية متين ، المهم م نرجع ناقصين زول من حبايبنا يارب .

قالت :

و أنا طالعة الصباح كل يوم بصادف ولد جيراننا بلعب جنب باب بيتهم ، إتعودت أبتسم ليه و أنا مارة بجنبو وهو كمان ، يوم طلعت من البيت مستعجلة و زهجانة مرّيت بجنبو بدون ما أعاين ليه ، قبل أوصل نهاية الشارع ناداني.

" إنت في زول مزعلك ؟ ما ضحكتي الليلة 💔"

حسيت وقتها إني عوّدتو على إحساس جميل كل يوم و جيت وقفت فجأة و أنا ما خاتة في بالي إنو ممكن يركّز .

قالت :

أستاذنا في المدرسة عوّدنا بداية الحصة كل زول يتكلم عن يومو ، كنا بنفرح شديد بالحصة دي ، جات فترة بقى يدخل يدرسنا ويطلع ، إتعودنا على البداية الجميلة ، و بقينا ماقادرين نتقبل فكرة الحصة بدون كل زول يطلع الجواه في بدايتها ، إتعودنا على البداية دي ، وبقينا ما قادرين نتقبل بداية جديدة.

قال :

إتعودت أقول لزوجتي كل يوم و أنا طالع الشغل

" خلي بالك من نفسك "

حتى لو نحن زعلانين من بعض ، كانت بتبتسم في كل مرة كأنها الأولى .
مرّة نسيت أقول ليها و طلعت .. لقيت منها رسالة

" طيّب ما أخلي بالي الليلة ؟ "

رغم إنها متأكدة إني ما قاصد ، لكن حسيت إنو يومها نقص لما نسيت أقول ليها كلمة حلوة .

خُلاصة الكلام :

" من حقك إنك ما تعوّد إنسان على حبك ، إهتمامك ، إبتسامتك ، كلامك " .

بس ما من حقك أبداً إنو تخليه يتعوّد و تجي تبطّل التصرف البقى بالنسبة ليه حياة ، ما من حقك تقطع جزء من يومه إنت بنفسك بنيته جوّاه .
لو ما بتقدر تشيل مسؤولية فرح زول ما تحاول من الأول.
إني أتعوّد عليك دا إحساس عظيم ، و ( إنك تبعد في النص دا إحساس ما متقبّل أبداً ) ، عشان كده دايماً بنقول :

" كونك تَكون جافّـيً من البدايةِ احسن كتير من انك تعشم انسان فيك 💔 ✅ .

‏الزول الببرر ليك عشان م تفهمو غلط دا حاول انك م تخسرو.