الشي الوحيد والاهم اللي لازم تعملو في حياتك انك ما تدي أي حد مين ما كان اكتر مما بيستحق واكتر مما هو بيديك !
الكرم الزايد ما حلو ابدا لأنو حينقلب ضدك وحيبقى حق مكتسب ووقتها لما تبطل تكون عايز تديهم شي حيشوفوك كعب لأنك رفضت للمره الاولى شي بخصهم هم .. كمان لازم تعرف انو ما بالضرورة كل العلاقات اللي في حياتك تكمل معاك لأخر يوم في عمرك .. مرات كتير لازم تتخلى عن ناس عشان يجيك ناس احسن .. و اتأكد تماما انو كرمك و طيبتك في العلاقات دي ماف زول حيشكرك عليها اصلا بس حتلقى نفسك في نهاية المطاف انك و حيد و كل الناس القمت و قعدت ليهم ديل سابوك مكسور القلب و الخاطر !
و اعرف كمان انو في ناس كتير انت حتحبهم بس و جودهم في حياتك ممكن يسبب ليك نوع من الاذيه ف بالتالي افهم انو ما لازم تتعمق مع كل حد في حياتك و انو عادي ممكن تكون نص علاقاتك مع البشر سطحيه او متوسطة العمق !
وانو في حاجات مابتتحكي لأي حد ولا حتى صحبك القريب .. و انك ما تكون مرن و متقبل لأي تغيير يحصل في الحياة و قتها بس انت حتبدا تعيش الحياة بحق وحقيقي .
#lena

‏بصراحه مافي لحظات تستحق الندم ف العالم غير اللحظات الي بندرك فيها اننا ادينا حاجه اكبر من حجمها واستنزفنا نفسنا وتعبناها وارهقناها و هي ما كانت تستاهل دا كله .. و بصراحه اعطاء الامور اكبر من حجمها دا شئ سئ خصوصاً لو كان الIncome الي حيرجعلك ف الاخر م حيعوضك ابداً عن انطفاء روحك وحزنك .. ‏و دا الي انا بسميه ع قدر تقديرك لذاتك وحبك ليها ع قد ما حتدرك متين فعلاً و لمين و ليه تستاهل تمرمطها و متين ما تستاهل انك تخليها لحظه ما رايقه و مبسوطه .

خلوني اشاركم حاجه حاسه انها ممكن تزح من عليكم حمل كبير ده لو كنتو عانيتو من نفس النوع ده من المواقف ..

من زمان ولليوم ده دايما بسمع الناس الحوليني بقولو لي لما اكون بعمل حاجه مثلا اني بطيئه والحريم خصوصا بقولو لي امي اااا شكلو بتك دي مابتدخليها المطبخ وامي زاتها بتقول لي انتي بطيئه اتلحلحي ووو ..
الموضوع ده كان مضايقني ما اكذب عليكم .. لأني انا عكس اي كلمه هم قالوها عني .. كنت بسأل نفسي ليه هم بقولو لي بطيئه يعني ؟ هل انا فعلا بطيئه؟ هل فعلا بخلص الحاجه الممكن تخلص في نص ساعه في ساعه؟ النص ساعه دي هي المعضله يعني ؟
اتأزمت .. وقلت طالما هم شايفني بطيئه وطالما شايفني مابعمل شي خلاص انا ازيد من كل شي كنت بعملو واكررو كتير عسى بالتكرار ده ابقى سريعه عشان يرتاحو !
وعملت كده فعلا! بس ماف شي اتغير .. انا زي ما انا .. والكلام هو نفسو الكلام ..

ف في مره كنت قاعدة بفكر كده وبعد عدد من الملاحظات البقعد الاحظها في نفسي اكتشفت اني انسانه بفكر وبسرح كتير طول الوقت حتى لو كنت بعمل في حاجه في يدي .. ف تلقاني لو بغسل في عده بسبب سرحاني وتفكيري الزمن بيطول وده ممكن يكون سبب في تأخيري فعلا! .. وتاني شي كنت عارفاهو في نفسي بس مامنتبهه انو هو سبب في البطء كمان هو اني بتقن اي شي بعملو ف بالتالي باخد زمن اطول من الناس البتكلفت! ..
وفي اللحظه دي جاني سؤال.. طيب ما في ناس بتتقن شغلها وبتعملو سريع برضو! .. وجاني الجواب : ديل هم ودي انا .. وحتى التفكير ده لو كان سبب في البطء في النهايه دي ما القضية .. دي انا وبس وكفاية اني عارفه بعمل في شنو كويس وخلاص! ..
لما حددت كل الحاجات دي وفكرت كويس في الموقف وفي كلام الناس لقيت انو كل الناس عايزة كل الناس تكون شبهه كل الناس !
يعني عشان بس فلان ده سريع يبقى انا لازم اكون زيو ؟ مافي النهايه هو بخلص العليهو وانا زاتي بخلصو الفرق بينا شنو يعني! .. ولا عشان فلانه ديك بتلبس لبس بطريقة معينه يبقى انا لازم اكون زيها! ..
ربنا خلقنا مختلفين والناس اكثرهم لايعلمون زي ماقال القرأن عشان كده بيقعدو ينظرو في اي شي وانت بسبب كلامهم ده ممكن تفقد ثقتك في نفسك مع انو فيك كل المقومات وانك انسان ناجح ورهيب بجد بس حتكون فاشل في نظرهم طالما انت مابتشبهه فلان اللي هو القاعدة الثابته للنجاح او اي شي حلو في الحياة ! ..
ف عشان ترتاح من كل ده خت في بالك انك مالازم ترضي كل الناس اصلا وانك طبيعي تكون مختلف ..لانو ربنا خلقنا مختلفين لي حكمة اساسا عشان نكمل بعض فما ممكن يعني كلنا نكون نسخ من بعضنا ولا شنو؟ ..
اقبل نفسك زي ما انت وفكر في كل كلمه تتقال ليك وماتصدق اي شي لمجرد انو قالتو ليك امك او واحد من الناس البتعزهم .. اهلك ديل في النهايه بشر والبشر بيغلطو عادي جدا ، المهم انت نظرتك لنفسك شنو وبس ..

في الاخر انا بعد لميت كل الصوره دي في بالي واتقبلت الحته دي فيني مافكرت اغيرها ولا اي شي بالعكس بقيت مبسوطه بيها جدا لأني عارفه اني لما اعمل شي بكون مستمتعه اولا عشان بعملو بإتقان لاني انسانه مخلصه بطبعي وعشان كمان بكون بفكر في حاجات حلوة شديد بتسليني ، ف بالتالي ارتحت وبقيت حتى لو سمعت من اي زول اي كلمه ما بتأثر بيها والاحلى اني مابقيت بسمع كلام سلبي في النقطه دي اصلا الا ما ندر يعني .. وده كلو عشان انا فهمت نفسي واتقبلتها زي ماهي ومابقيت بتأثر ولا بعظم كلام الناس ف بالتالي مابقيت اسمعو اصلا ..
ف كل الحكايه فكره وقناعه تختها في راسك يا اما ريحتك يا اما كانت سبب دمارك النفسي للأبد ..
خليك دكتور نفسك وماتشتغل بزول ..انت مختلف ومميز وماضروري ابدا تشبهه حد مين ماكان .
وقعت؟
#lena

‏في حاجات كتير كنا مستعدين نفضل نعملها من غير مقابل ، لكن ما من غير تقدير .

ما تتمسكوا ب ال ما عندو رغبه فيكم ' الحاجات الحلوة والأشخاص الصح ' بفضلوا معاكم دائماً بالرضى مش بالإجبار .

‏في فرق كبير بين زول عايزك عشان شايفك فرصه كويسه و بين زول اختارك انت تحديدآ من و سط الف فرصة كويسه تانيه.

‏حتفضل اقوى انسان في الدنيا طول ما انت بتعرف تاخد قرارت عكس رغبتك لمجرد انها الصح حتى لو ما حتريحك .

‏المشكله انو ماينفع تقول لزول انت ما بتحترم وجودي في حياتك او ما بتعمل اي مجهود علشاني او ما مهتم بي ، فَ بتفضل تشيل جواك لغاية م تصحى في يوم مقرر انه لا خلاص كفايه كده انا ماشي .

ليلاً طوِيل ...
جاييِكِ من أبعَد محطة مُعبا شوق ...
شِنط الحكاوي الشايِلا تِقلَت علي ...
عكران مزاجي من الفجُر ضميهو هاك يمكِن يرُوق ...
نَضَبت دِمايَ مِن التَعَب هاك صُبِّي حُب أروِي العُروق ...
♡

غَلَب التَّعب شوقِي الهزيل وقعدتَ في نُصَّ المسافَة ولهفتِي ...
قسراً تآنِسنِي الظُنون ، يا ريتا كان بِعدت بعيد خلتني في نُص وِحدتي ...
يا ريتني ما أوقدت نار شوقِك كفاي نار غُربتِي ...
♡

حاولتَ أتناسى التَعَب واسنِد بواقي الحيل واتماسَك واجِيك ...
كان أملِي اني اتهنّى بيك ...
كان أملي أحمِيك مِن سِواك واتحدّى كُل الكان عليك ...
♡

في سِكّتِك ، بسمع صداك بتهدهدِي الحِلم الزمان ...
مشغُولة تنسِجِي في الجمِيل وورَاك بيتهدّا الأمان ...
تبنِي احتِمالات الوصُول تُوصَد هِناك كُل الببان ...
ترمِي الهُموم تبدِي الطرِيق تبراكِ أشواك الزمان ...
وتواصلِي في سِكة مشيك وتعلميني الإِتزان ...
منصُورة لا هداكِ خُوف لا خوَّفِك ظرفاً جبَان ...
♡

يا الله من هذا الحنين يا الله من هذا الرَهَق ...
أمطَرَت دمعاً سال غزِير قام ردّ قلبِك بالبرِق ...
هل نامت احلام اللقا ولا بتعانِي من الأرق ...
يا الله من هذا الحنين يا الله من هذا الرَهَق ...
ليلاً طوِيل سفراً طوِيل قلباً ظننتو مُقيم معاي لكِنُّو يا حسرة اتسرَق ...

#بقلمي
#غفران_تاج_السّر

" قصة كفاح "

اول شي السلام عليكم ورحمه الله 💜💜 جاية احكي ليكم او اشارككم بأهم انجاز في حياتي كلها " انجاز العمر بالنسبة لي" 💜 ومن خلال التجربة دي حابة أوصل لأي زول إنه مافي شي مستحيل ...
انا medical student مختبرات طبية متخرجه ب full mark مرتبه الشرف الاولى وكنت من الأوائل على دفعتي والحمدلله متخرجه بتخصصين 
بس كان الهدف الاسمى او الحلم بالنسبة لي انو اقرا طب 
فلمن خلصت مختبرات قلت احول للمجال الطبي لاقتني مصاعب و عراقيل كتيرة جدا كانت كفيلة انو تخليني اشيل فكرة الطب من بالي نهائي بس دايما كنت بذكر نفسي بانو my dream worth it وانو لازم يشوف النور مهما كان التمن 
المهم بعد معافرات لقيت فرصه في طب الخرطوم ح ينزلوني من تانيه بس السنه ب80 مليون 💔💔
لكن انا اكبر البيت وعندي اخوان وراي في شتى المراحل الدراسية و ماممكن ازيد على ابوي اكتر من كدا 💔 فرجعت لمرحلة الظلام تاني
ح تقولو لي مدام عايزة الطب كدا ليه قريتي مختبرات ؟! 
انا لمن امتحنت تالت اصلا م كنت عارفة حاجه اسمها مختبرات😹😹💔 المهم كان في منح للرباط والمنحه رغبتين انا كتبت طب وابوي كتب مختبرات وشاءت الاقدار وشالوني فيها يعني قريتها لا خير الا فيما اختارهوالاصرار لمن كنت سنه اولى كان في فرص للتحويل داخل الجامعه على شرط تجيب امتياز فاجتهدت وجبت 3.70 لمن جينا للتحويل قالو لا الا 3.90 💔 فكملت
‏ولسى كان المراد الطب❤ 
وطبعا ياما سمعت الطب فخ و حتندمي 
و مجالك حلو والخ.... تدخلات من المجتمع وغيره 
بس كيف اقدر اواصل في حاجة م رغبتي ، كيف اقدر ادي في حاجه انا م مرتاحه ليها 
بديت الخدمه عشان اشوف طبيعه الشغل كيف قلت يمكن تكون احسن من الجامعه 
الشغل خلاني اكرهها اكتر واتمسك اكتر اني اقرا طب 
جات لحظة خلاص قلت فيها
stop 
I have to rearrange my life again 

‏لازم الناس تتعلم انها تتقبل عواقب اختيارتهم لـ الناس مدام هم متمسكين فيهم لحد الآن و ما قادرين يخطوا خطوة قدام بسببهم ‏ما تقعد تلوم حظك و حياتك لانهم ما ليهم دخل لوم نفسك اول شي لانك متمسك بالناس الماخدنك تسلية زمن و ما قادر تشوف الناس البيحبوك بالجد و ممكن يعملوا اي شي عشانك ‏و دايما نتيجة الحاجة دي الناس بتحس انه يلا ماف زول بيحبها ماف زول معاها والحقيقة انه في اللي بيحبوهو وعايزين ليه كل الخير لكن بسبب تمسكه بالفئة دي ما قادر يشوف الناس الحقيقيين .

"انا بخاف أشوف واحد/ة من اصحابي حبيس علاقة حبّ مع انسان ما محتفي بيهو او بيبادلوا نفس الكم من العاطفة"

من كم أسبوع
لقيت واحد من أصحابي طاير ب حبيبتو السما و شي يا قصايد و يا هدايا و يا حاجات لطيفة في كل حتة / العالم الافتراضي محسوب هنا

بينما هي مكتفية ب إنو تتعامل معاه ع اساس بينها وبينو اتفاق ، نهاية الاتفاق دا هو العرس

حزنت جداً لصحبي دا ..

وقلت في نفسي ، لربما تكون هي بتحبو أكتر ياخي والله أعلم بالنوايا ودايماً الناس بتتعمد تدس حاجاتها الحلوة من الآخرين وما إلى ذلك ..

ثم بعد زمن لقيت نفس البت اللي هو محتفي بيها دي داخلة و طالعة مع ولد تاني

و كان ظاهر انو الولد ما شغال بيها في حين هي شوية و تنط ليهو في رقبتو ..

امتنعت عن اني أعلق على حاجة او أجيب سيرة حاجة ، بل فقدت حتى الجرأة امشي أسلم عليها ساي و اتخارجت من المكان طوالي

بعد فترة لاقيتو بالصدفة
وقعدت معاه و شربنا جبنة واتونسنا ، ولما سألتو قال لي انهم انفصلوا، ببساطة كدا

طب ليه؟ انت كنت طاير بيها السما ، و ما كان شكلك هتفارقها ولو بقى دا خيارها !

قال لي ايوه هو كان خيارها ، و أيوه كنت طاير بيها السما

بس هي ما كانت مقدراني أبداً و ما شايفاني زي ما انا شايفها

وفي الأخير عرفت انها بتلاقي " زول تاني"

حقيقي في اللحظة ديك حسيت صحبي كومة ظلام تجلس على البنبر تدخن وتطلب قهوة تاني ..

ما عرفت أواسيه
ولا أخفف عنه ، و ياها شتايمنا المعهودة النتبادلا كشباب كلما يطرا طاري زي دا

او تحصل حاجة مخيفة زي دي

انا ما انتبهت لتلميحاتو ب كونها خاينة ، بقدر ما قهرني احساس انك تكون طاير ب زول السما ، في حين هو شايفك حاجة عادية جداً ، و ممكن يستبدلك ببساطة بل و كمان يخليك في عز ضعفك و انكسارك دا و يخون البينكم فوق ل دة كلو

" فاللهم ناس بستحقونا ونستحقهم
نحبهم ويحبونا ، كما نحن وكما هم " .

(منقول)

مرَّة طولتَ من أخوي شديد .. و لاقيتو في مكان عام
فما لقيت نفسي إلا وأنا بحضنو!

بعدها انتبهتَ لي نظرات الناس لينا في الشارع خصوصًا إني منقبة يمكن ، فاتداركتَ الموقف بي ضحكة صغيرة اتبعتها بي جملة (واللهِ ده أخوي)!

اتذكرت موقف السيدة صفِيَّة رضي الله عنها ، زوجة النبي ﷺ لما كان معتكف في مسجد ، و هي مشت ليهو بالليل تودّي ليهو أكل على ما أذكر ، فالنبي ﷺ طلع معاها يقدّمها في الشارع فشافوهو كم صحابي ، قامو دنقرو ومشو سريع سريع
فالنبي طوَّالي وقفهم وقال ليهم : على مهلكم دي زوجتي السيدة صفِيَّة
فالصحابة قالو ليو يا نبي الله ، نحنَ ما شاكين فيك
فقال ليهم إنو الشيطان يبلغ من ابن آدم مجرى الدم
(دي القصة أو فيما معناها)
قصة النبي ﷺ دي ، وردت لينا في السيرة عشان تعلّمنا حُسن الظن و إنو الأشياء أو المواقف ، ليست كما تبدو عليه
ما بس في المواقف المشابهة لي دي ، بل في مواقف أبعد من كده ، أو أقل من كده

زي مثلًا يعني

تلقى زول أون لاين ، ترسل ليهو و ما يرُد عليك ، تفتكر إنو مطنّشك ، و انتَ أساسًا ما عارف حاصل عليهو شنو!
مرة كنا بنتصل على زميلنا في الشغل ، و نحنَ جايين على المكتب ، و بنتصل بيهو و هو أون لاين وما برد علينا ، دقّينا جرس وقتها ، و قررنا نتشاكل معاهو نظام هو عارفنا جايين المكتب وما برد مالو و و و!
لما وصلنا ، لقينا الفيسبوك كان فاتح في اللابتوب حقو و هو نايم!
فكلمناهو بالحصل واعتذرنا آسفين عن إننا ما أحسنَّنا الظن

المواقف كتيرة كتيرة ، و الشيطان بحب يتصيّد المواقف الذي دي بالذات عشان يخرب بينك و بين صاحبك أو زميلك أو أخوك أو أي زول تربطك بيهو صلة طيبة!
ما تدّي الشيطان فرصة إنو يدخل بيناتكم و يعكّر صفو علاقاتكم الطيبة
حُسن الظن دايمًا بخلي بالك مرتاح و قلبك تجاه الناس صافِي ، حتى لو هُم طلعو ما بستاهلو حُسن ظنَّك ، فإنتَ كفاك من حُسن الظن ده نَقاء السريرة واحساس الرضا

وفي الأخير .. بذكِّر نفسي وانتو بي مثلين

الأول بقول "حرِّص و ما تخوِّن"
والتاني فيما معناهو بقول ،
ما تحسِن الظن لدرجة الغباء! و لا تسيء الظن لي حد الوسوسة

خلِّي حُسن ظنك بالناس ثِقة، و سوء ظنك وِقاية.

ربنا يرزقنا البصيرة و نور القلب ، ربنا يرزقنا السريرة الصافية و حُسن النِيَّة ♥️
وشُكرًا
وعفوًا

#صفِيّة_مُصطفى

قالت :
الحقيقه قبل سنتين جاني اعتراف بالحب من انسان محترم جدا❤ ويشاء القدر اني كنت مرتبطه بانسان محترم تاني فرفضت الطلب بصوره ظريفه وكتبت نص وقتها موجز النص كان "ولكن كلمتي له سبقت وقلبي انعقد عليه" وحسيت بانو اعتذار لطيف ليهو او لغيرو

مرت الايام والسنوات وانا انفصلت واعاد الطلب وانا قبلت بس كان عندي شرط صغير اني اخد وقتي وانو ما يضغط علي بأي صوره من الصور ويخليني انسى وأتجاوز براي وقد كان
‏الوقت الطلبتو ده ما عشاني بقدر ما هو عشانو

عشان ما اكون اديت كلمه انا ما قدرها واتراجع في نص الطريق.. عشان عيب في حقي لو مرت علي ذكرى حزينه او سعيده علي ابتسم ولا ازعل وانا معاهو ..وقد كان❤
‏لاقيت كل الدعم من الانسان ده لدرجه خلتني اشك انو اهلي ديل ما اهلي وانو هو براهو قادر يديني حب كل العالم كلو حرفيا

بين يدي وحب والديني لي ما كان حب وما كان الا "جبر خاطر" قصاد كل الحب دا وكل الحب العشتو قبلو كان عشان اصل ليهو هو بس♥♥
‏كل موقف كان بيثبت لي انو انسان طيب وخلوق ومحب لدرجه غريبه، وانو ده الانسان الانا اتخلقت علشانو هو بس♥

في مره سألني انا ليه ما بكتب عنو نصوص زي ما كنت بعمل دايما ودي "غيره محموده❤🤣"
‏وانا الليله حارد عليهو هنا قدامكم كلكم "المنشغل بالحب حقيقة لا يجد الوقت للحديث عنه "❣

سينشغل به كما أفعل انا الآن..

‏انا الليله وقدام كل الناس قدام اهلك واهلي قدام العالم كلو بقول ليك "قبلت"❤ ومثلك لا يترك♥ ومثلك لا يخان♥ ومثلك لا يهان .. قبلت الحب قبلت الزواج وقبلت بكل شئ معك شريك حياةة قادمه بأذن الذي جمعني بك وزرع في قلبك♥ جميييع تلك المحبة لي ♥️

@ Yagheeens 📝

بطلو تدو مكافئات لناس مابتقدرها ولا حتى بتديها قيمه وتمتن ليها ..
ما كل الناس بتستاهل مننا نفس التعامل ، لو كنت انت قادر تدي بسخاء بدون ماتنتظر منو مقابل اوكي ادي زي ماعايز بس لو كان الطرف ااتاني بيرمي كل البتعملو ده في الارض ويدوس عليهو برجلو وانت فضلت لسه بتدي ف كده انت يتجيب لنفسك كل انواع الناس اللي عمرها ماحتقدر ولا تقيم ولا تمتن لأي عطاء انت تقدمو ليها ..
ووقتها حتكون علاقتك معاهم عامله زي العجله الدواره ، مهما تلف مابتصل لنهايه ولا بترضى .. وحستهلك روحك بدون فايدة ..
عشان كده قبل ماتفكر تدي أي شي شوف هل الزول القدامي ده يستاهل! هل بقدر اصلا !
والشي ده أيا كان هو شنو .. يعني ما حاجات كبيره بس لا حتى القلب البتختو في نهاية الجملة ده ماكل الناس تستاهلو !
للدرجه دي !
ايوة للدرجه دي ..
والدنيا بتعلمك وحتقنعك تماما بكل جمله وحرف انا قلتو ليك في البوست ده ..
وبس كده .
#lena

#إتزانٍ_ركيك ! .

أطلقوا عليّ إسمَ لا شيء، ولكن مهلًا !
أيَحقُ لهم هذا ؟
يا له مِن لفظٍ قاس.
لو عُدنا للوراء قليلًا لوجدنا أشياء كثيرة قد صُنِعت مِن ذلك الاشيء ، بل لن يكن لها وجود لولاه !.
أختَلِف مِن قلب أحدٍ للآخر، في قلب ذاك قويٍ جدًا ولا يسطيع تجاوزي، وأختَلِجُ في قلبَ ذاك وقد قضيت عليه تمامًا.
أعلّم إني دائمًا ما أقسو على مَن أدبُ بقدماي في حياتِه، ولكن !
يستطيع التجاوز إن أراد.
والأسوء إني مُخبإٍ في الداخل، يختَلِج في أيسري قلبٍ قد تهشم، ومن حولي روحٍ أصبّحت مجرد غُبار.
ولكن مع كل هذه إن قام شخصٍ بسؤال أحَدِهم؛ لأنه قد أبصر نتيجة تفاعل محاولةٍ لِِتجاوُزها في عيناه لقال على الفور:
لا شيء .
ذات مرة كان ذلك الطفل يقوم بأخذ هاتِف والِده لِلَعِبَ فيه عندما يخرج، وعندما يأتي يقوم الطفل برمي الهاتف في الحال، و يقوم والده بسؤاله : ماذا تفعل ؟
فيَكون جوابه كالمُعتاد: لا شيء.
أ لأنه يخشى أبيه يَقول لا شيء ؟
يطلقون عليّ لفظ لاشيء، وإنما أنا لستُ إلا شعورٍ تسبب أحدِهم في وجودي.
حسنًا حسنًا .
لَن أكترِث بَعد اليوم لِما يقولون أو ما يطلِقون عليّ البتة، فَبني البشر مِن غبائهم المُفرط يطلقون الاشيء على كل شيء، بل على أنفُسهم حتى .
حتى الكون قد تكوّن مِني، سَمِعت أحد النظريات تقول كذلك، حينَها ظنَنت إنهم سيكفون عن نَعتي بهذه الإسم ولكن هيهات !.
ذَنبي الوحيد إني لا حولةٍ ولا قوةَ لي لِأُدافِع عن نَفسي، وأن أقول لَهمُ:
"كفوا عن نعتي بهذه الإسم، فأنتم تُطلِقوني على كل ما لا تُريدون قوله".
يتَخِذوني كحلٍ أوسط لِهروب مِن الأجاباتِ يا ذاتي .
لو كان لي لِسانٍ حتى لو أعجمي؛ لأبدَيت بالكثير جدًا مِن الأشياء، فقط سأُخِبِرهم بأن الاشيء، هو فاتِحة كل شيء، وهو أقرب شيئا يتوسط ألّسِنَتَكم لو سُئلتُم مِن أحد الأمور !.
ولكن !
قد قَبِلتُ بإسمي الآن، فإن كانت الأشياء يُطلق عليها
لا شيء :
فمرحبًا بِه جدًا .
ولكن !
يبقى السؤال هو :
متى سَيُدرِكُ البشر بأن الاشيء، جعلوه بأنفُسهم كل شيء ..
------------------------
مهًلا عزيزي القارئ !
أعلّم لو قرأت العنوان الذي يقول :
" إتزانٍ_رَكيك" . لقُلّت أنت كذلك ما علاقته بالمُحتوي المزكور ؟
وسُرعان ما سَيُجاوب عقلك بأنه:
لا شيء.
ولكنه حقًا إتزانِ ركيك؛ لأن البشر يطلقون لا شيء، ليَخفون شيئا ما أو يتجنبون سؤال ما أيضًا ليتَزن عقلُهم مِن ردِ الفعل، ولكنه ليس بإتزانٍ قطّ، بل إنها رَكاكة، حد الا شيء..

#سجى_ناجي

الحمدلله بطلت أنبهر بالإنجاز والنجاح المهني لوحده بعد ما كان أهم حاجة .. بقيت بنبهر بالناس السعيدة .. ناس بتعرف تستمتع بأبسط شئ.. ناس عندها توازن وعلاقات ناجحة .. ناس نجحت في تحقيق إنجاز يبدو سهل لكن في الحقيقة صعب جدًا ( سكينة الإستقرار النفسي والإجتماعي ) .. !!

لإن في الحقيقة ممكن تتوفر ليك كل المقوّمات المادية والعلمية و العلاقات لكن تفتقد سكينة القلب والعقل فمتتحركش خطوة واحدة .. السكينة والإستقرار إنجاز أعظم بيخليك إنسان يمتلك سلامة القلب والعقل مش ترس في ساقية .. !!

راجع نفسك يا صديقي وحدد أولوياتك قبل ماتخسر ناس أكتر في طريقك .. لإن السعادة .. والسكينة .. وراحة البال أهم إنجار .. وأي إنجاز يعارض سلامة سكينة قلبك ملوش قيمة .. !!

Ahmed Yassin

ف فيلم
the perks of being wallflower
من الأفلام البحبها ف لقطة عميقة كده بين تشارلي الطالب الخجول ومدرس الفلسفة والادب بتاعه فتشارلي بيسأله
Why do nice people choose wrong people do date?
اللي هو بالمختصر بيسأله ليه الناس اللطيفة بيختارو الناس الغلط دايما .. فلما المدرس لاحظ سؤال تشارلي الغير معتاد رمى ليه إجابة تحمل ف طياتها النصيحة والتفسير والمختصر الأعظم ع الإطلاق
We accept the love we think we deserve!
بمعنى أصح إنه المفسر الوحيد للظاهرة دي إنه كل إنسان لطيف متمسك بشخص سيء دا إنسان شايف ببساطة إنه دا تمامه !

فتشارلي رجع سأله تاني
Can we make them know they deserve more?
بمعنى ممكن نخليهم يعرفه إنهم يستاهلوا أحسن وتمامهم أحسن من كده
فكان رد المدرس :
We can try!
فنصيحة تقال لأي شخص زعلان ع شخص سيء أو لسة جواه بقايا حب لشخص سيء. .. أو بيجد نفسه ف علاقة صاحبها سيء .. او بيحاول يمضي قدمآ من علاقة توكسيك شريكها سيء "مضيك قدمآ مرهون بفكرة يقينك ب إنك تستاهل أحسن ولو لقيت نفسك جواك تمسك وحب لعلاقة أو شخص سيء .. راجع عدادات تقديرك لنفسك!"

لازم الإنسان يقيم نفسه ويقدرها ويجعلها قيمة عليا ورأس لهرم حياته!
تمسكك بناس سيئة حوالينك أو خوضك لعلاقات سيئة دة ف الغالب سببه أنت بس و حتتحاسب عليه فماف و قت لتضيع الوقت .. ربنا أداك إرداة حرة ووهبك حرية إختيار وقوة و نظرة و شخصية فما ترهن نفسك لحاجات أنت تستحق أكتر منها!

الحب ده حاجة كدة براها ما عندها اي علاقة بي أي حيثيات
يعني..
انا ممكن اكون غياظة و سغيلة و زاتو ما سمحة و انت تكون بتموت فيني و ما شايف في الدنيا دي غيري... ده ما عشان اي ميزة فيني... لا دة عشان قسمتك كدة... قلبك اتقذف فيهو حبي بدون حول منك ولا قوة ولا حول مني ولا قوة... اتوجد كدة من ربنا هنااااك في علاه
وبرضو ممكن اكون انا زوجة صالحة و كل مقاييس الصلاح دي مسطرة فيني بي الملي... ودود و ولود و لطيفة و طائعة و اطوع من بنانك إليك و سكر وعسل سمحة و مكملة الحلاة بس انت ما بتحبني.... كل الناس ح تقول ليك بتبالغ ياخ في زول عندو مره زي دي و يتعامل معاها كدة؟ وانت ما ح تعرف تجاوب لأنك ما عارف انت ليه بتعاملني كده... وما عندك الإجابة بس انا عندي الإجابة... انت ما بتحبني... ودي ما عاوزة مبررات عشان الحب ما بيد زول
عشان كدة علييكم الله
لو ما بتحبها ما تعرسها... خليها في بيت ابوها مرتاحة مبسوطة تنكش في شعرها و تقرمش في الشيبس قدام التلفزيون لكن ما تجيبها بيتك وتعاقبها بعدم حبك ليها
لو ما بتحبيهو ما تعرسيهو... ما يشبكوك القطر فات والغناي مات... القطر دة بيمشي وبيجي غيرو مية لكن ما تاخدي زول عشان تلحقي تجيبي اولاد او عشان تلبسي توب و تتحنني و تعاقبيهو بعدم حبك ليهو
الحب رزق من رب العالمين... القلب البيدق و الشغف و اللهفة و اللوعة البنحسها تجاه زول معين... ولما نشوفو نتلبش و يدينا تعرق و راسنا يلف و حيلنا يموت.... دي حاجات مستحيل نحسها لما نفكر بي عقولنا...مهما كانت حيثيات العقل مناسبة ما ح تعرفوا تحبوهم ولا ح يخشوا قلوبكم عشان كدة الارتباط ده يتحكم بي القلب قبل العقل و ما تسمعوا كلام غير ده عشان ح تتعبوا .