ابا الفضل يبن علي ... ابا الفضل يبن علي
_______

إنخاك يا بدر العشيرة ونخوة العلوية
تنظر لشيعة ابوك بنظرة المحمية
شكثر حاجات بگلبنا ليك ما مطريه
نظرة ياعباس نظرة دعوتي يومية

مشكلتي حل يبن علي ... ابا الفضل يبن علي
_______
من مجالسنا هتفنا وبيرقك رف عالي
بنبرة احزانك تفنن صوتي وموالي
بزينب اني ارد احلفه وبالحسين الغالي
تشفع لهاي البرية وتنظر لاحوالي

بيك ارتجل يبن علي ... ابا الفضل يبن علي
_______
اه ياكافل اخيتك يالحميت اخيامها
انته ذليت الشريعه وما گدرلك مايها
لوتشوف احوال زينب بعدك وآلامها
اسروها وحيروها ومرروها بشامها

بنت الأصل يبن علي ... ... ابا الفضل يبن علي
_______
كل سوالفنا وشعرنا حارت بعنوانه
شنوصف الضحه الاجلنا وبالنعم خلانه
والنده وين ابو فاضل ما ترد لسانه
ياطبيب الماكو مثله من العلل شافانه

شافي العلل يبن علي ... ابا الفضل يبن علي
_______
طاحت لذكرك يحامي دمعتي السياله
وهامله لحسين ظلت للذبيح وحاله
انتوا دين الله ويقينه وغيره لالا ولا لا
ابذكركم افني عمري ومجلسي يحلاله

اولا امل يبن علي ... ابا الفضل يبن علي
_______
بسمك اتسمت حياتي وانكتب مضمونها
گلبي ودماي وحواسي انته نور عيونها
اي وحگ الهاشمية القرروا يسبونها
كل حياتي خادم الكم شما تغير لونها

ليك امتثل يبن علي ... ابا الفضل يبن علي
_______
مجيد عبد الرضا القريشي

عد يمناك عد يمناك ... نحيي مصابك عاهدناك
_______
حبيناك احنه وعالفطرة
حب الصافي ومابيه نعره
اي ومصابك يبن الزهرة
اليوم المحشر. وياك
______
كلمات احزانك نطريها
نقره وبالعالي نعليها
فاطم بدموع نواسيها
الشابت من شافت بلواك
_____
يحسين بأحزانك خذني
الكم صدري لصدرك خلني
من داسه الحافر شيبني
من طشر بالحومه اعضاك
_____
يالماذلك ظلم الظالم
دخيلك سجلني الكم خادم
واطلب ثارك ويه القائم
المهدي لو ثار هناك
_______
يالعايش وي روحي ودمعي
يالماخذ كل شوفي وسمعي
بالعباس وجاهك ادعي
تنظر هالمجلس عيناك
_______
يالماتنسه دوم احبابك
ميخيب الجاك ودگ بابك
ودمعة زينب يوم مصابك
انسه الروح وما انساك
_______
يالمايوم يعادل يومه
الذاب بحزنك ما لومه
بعدك شيعتكم محرومه
شافت ويلات بلياك
______
مجيد عبد الرضا القريشي

وينه وينه لا ودعني ولا جاني
وينه وينه ما دنگ لي وباساني
گالو سافر زيد بالغربة احزاني

_____
أنه بنته العزيزة وهاي تاليتي
عليه من البچي خلص هوه ريتي
اريدن شوفته التردلي عافيتي
واريده يدور اعله الباگ ترجيتي

ارد اشكيله عالصار ابنته ارقية
ارد اشكيلة عن اذني وعالترچية
دهري الظالم اليا ظالم وداني
______
انطر جيته ومتلهفه للملگه
ومحضره عيوني ودمعة الفرگة
واذا گوة مشالك هالجدم حگه
مجرح بالسبي وبخيام محترگة

من يحضني رحمات بصدرة الدافي
من يحضني عيوني المعلولة تشافي
وادريه يزعل لو شاف الدم بذاني
______
سوالف شوگ بين بين الوالد وبنته
هو قصتي بس وأنه هم قصته
يشرد كل تعب لو مرة كلمته
يشبگني بحنان وياكبر حنته

يسعد گلبي حسين بنظرات عيونه
يسعد گلبي وگلوب الي يلاگونه
لاچن بعده هدم حيلي وضاماني
_______
العليم الله بكثر شوقاتي عالغالي
ومدري ايش يلچم بيه دلالي
وسؤال الظل ظنونه تجر على بالي
ما يتركني ابوي وهيچي احوالي

طفلة زغيرة صار ايام يمشوني
طفلة ازغيرة شنهو ذنبي يضربوني
حبل بئيدي يابوية شگد آذاني
_____
اذا مسافر صدگ تسأل بعمتها
هديتي من السفر ما كلمچ عنها
ما گال العزيزة شراح اجيبلها
وزينب بالقهر محبوسة ونتها

شتجاوبها عن الطاحو حراسه
شتجاوبها مصيبة لو شافت راسه
جاوب موتي من طشت الراس اطاني
________
مجيد عبد الرضا القريشي
خادم السيدة رقية

راحت أيام الدلال و هاي هية
العزيز خيالها صارت سبية
الابد ما الها خيال .. مگيدة باربع حبال
صارت سبية
_________
طبع بنفوس الفواطم ماتشوف خيال واحد
من تزور النبي بليل تطفى كل نور المواقد
داير اعليها زلمها ومايظل بالدرب شاهد
من طاحت بدمها الزلم جارت عليها الموزلم
اوهام هذه لو علم گبال زينب شمر گاعد

بيد لازم راس ابو فاضل اخوها
وبيد لازم راس ابو رقية السبوها
يصيح وين ام الدلال .. مگيدة باربع حبال
صارت سبية
_________
عذبوها هواي لازم مبين اعليها حقدهم
لان ستر الهاشمية للملا يفضح نقصهم
العرب بئرة نفاق وعالفلس باعو شرفهم
حرگو خيم ال النبي گبال العرف والاجنبي
اه يا نفاق اليعربي من تطيح الغيره منهم

هاي زينب يا عبيد لآل أمية
هاي بت حيدر علي حامي الحمية
مجندل أشباه الرجال .. مگيدة باربع حبال
صارت سبية
_________
اه يادرب العذاب البيه زينب گوة راحت
اشكثر لحسين ونت واشكثر عباس صاحت
تنادي لو مدفونه يمهم اهون وروحي استراحت
ولا طلعتي بلاية خدر واتعثر بحبل الأسر
وكل ساعة يضربني الشمر سياطه حتى اطفالي لاحت

وتشگف بالسياط اثنين ايدية
خافن لاتجي بگصة رقية
يكفي دم رجليها سال .. مگيدة باربع حبال
صارت سبية
_________
ندري مو سهله عليها من ولوها بظهر عاشر
لاچن المكتوب لابد يجري وتشوفه النواظر
لانبي ومرسل مثلها بهالمصايب سبقه صابر
بالصحره أخونة مجندلة ولا واحد اليفزع اله
ابعيد عن بيته وهله بالحرم واطفال حاير

والكفلها طايح بارض البعيده
نابت بعينه السهم مگطوعه ايده
اشكثر گتله تعال .. مگيدة باربع حبال
صارت سبية
_________
رغم ما زينب سبية وبهضمها الله عالم
علمتنا دروس عبرة بيها نتخطه الموازم
واكدت بيها علينا من نقيملها المئاتم
شما گصة ويانه الزمن مجلسك هو الوطن
تحضره ام الحسن تواظب انته عليه لازم

لو ذكرتو حسين والكافل ضعنا
تنظر الزهرة عليكم بالمحنة
وتفلح بيوم السؤال .. مگيدة باربع حبال
صارت سبية
_________
مجيد عبد الرضا القريشي
خادم زينب ع

خوية يحسين رايح لوين يادلالي
تنادي ميمون وتترك ام عون بلاية والي
______
ما حسبت حسابي للزمان
انبلي بهالصحرة والمكان
خوية لو موقف هجرنا حان
يلغي من بعدك الامان
والاميرة تصير اسيرة هذا حالي
وكل ضعنا وستر اهلنا بلاية والي
________
صعبة اقدملك فرس ممات
وانته بعيونك شفت حياة
من تهشم صدرك العداة
بلا خيم اختك ترة تبات
لو رحلتو لو بعدتو غالي غالي
تشب الاشرار بالخيم نار بلاية والي
_______
خاف للحومة صعب اجيك
اصعد التل وأصد اليك
شلون اطمن بعد عليك
لو عدل بس مد الي ايديك
لو فرس رد صوره ينشد ردلي خالي
بالظليمه يا هضيمة بلاية والي
________
صعبة من بعدك يظل عمر
كل طعم بشفافي يبقة مر
لو صعد فوك الصدر شمر
يعني تهنا وابتده الاسر
من ينحرك حلمي يغرگ باليالي
والزچية تنعه هية بلاية والي
______
لو رحلت وما بقت خيام
يبقه بس أبالي هالكلام
دربي اخطر لو لفاني شام
والشمر ايدور انتقام
دربي الطويل يهدم الحيل ودمعي هالي
ومنظر الراس بالگلب داس بلاية والي
________
مگيدين بسلسلة حديد
وللگصردخلونا اليزيد
لو شتم واحد الف يعيد
وبالخرابة يبقه شي وحيد
عن رقية بهالمسية ظل سؤالي
من تنظرك دامي نحرك بلاية والي
______
مجيد عبد الرضا القريشي

زماني وشلعب بيه زماني .. رماني بالكدر والهم رماني
على المرضوض بالحافر ... تسولف ليلة العاشر
زماني .. زماني
_________
قيام ودم حشر والتم مصارع شاهدتها
خذت عمري وهوه اليسري شلون تحملتها
ذاك الصاح ذاك الراح محنة العاشرتها
وين حسين وين حسين الف مرة گلتها

ذاك مترس جروح وذاك الفارگ الروح
وانه بالونه والنوح حياتي خلصتها

مثل طير انذبح رفسات گلبي .. اعاين ذبح اخوتي ويلي ربي
لاميت ولاطاير ... تسولف ليلة العاشر
زماني .. زماني
_________
قهر يگتل دمع يهمل محال الشفته اني
حمار الدم نزل بالهم على عيوني وعماني
شفت ميمون صوته جنون مثل سهم الرماني
ظليمة ونوح كالمذبوح بلا فارس اجاني

اجاني وزاد ونب بكثر ونه چتلني
لوعني وهضمني من اشوفن رأسه حاني

اگله حسين وين يگلي هيهات .. مايرجع بعد فجر السماوات
بحر من الدما صاير ... تسولف ليلة العاشر
زماني .. زماني
_________
صعدت التل ترابه أنهل سهام وصوله خيول
وعلى خيامي عدو يامي حرگها وداير يجول
صحت يحسين اروحن وين جاوب بيش مشغول
اثاري بدم عليه ملتم عدو ويسحگه بخيول
يطيح الماله ناصر على تراب السواتر
ويرض ضلوعه حافر .. وراسه برمح مشيول
صحت يابا الفضل هدو على حسين .. وطشرو جسمه مابين الصواوين
وخدري ما أله ساتر ... تسولف ليلة العاشر
زماني .. زماني
_________
ضاگ الحال والچتال علت ايده وضربني
وصدري گال لو كفال يمي ما هضمني
سوالف ضيم وسط الهيم بعيالي رعبني
يا عباس يا عباس انخه وخاب ظني

شيهد الماله جفين ونابت سهمه بالعين
كسر ظهري ويالحسين يوم الراح عني

ثگيلة حچاية الفرگة يعباس .. الاخت لو راح اخوها تشمت الناس
بكثر ميك دمع هادر ... تسولف ليلة العاشر
زماني .. زماني
_________
عليكم دوم حزن وصوم إلى يوم القيامة
زماني هد عليه وشد بحزاني حزامه
فرق ياناس ذاك الداس للغالي عظامه
وبين الهام حزن وقام مجلس لأجل امامه

فرق واضح للاعيان بين الصار خوان
وبين اللم الاخوان ... ونزل دمعه وغرامة

واليذرف على المظلوم عبرة .. احضر مجلسه وتحضر الزهرة
ونوگف بالحشر باچر ... تسولف ليلة العاشر
زماني .. زماني
_________
مجيد عبد الرضا القريشي

اه يدنيا ... محيرة ومالچ امان
اه دنيا .. ترافگ وياچ الزمان
خطتچ مكشوفة
بكربلا والكوفة
اه يدنيا .. اه دنيا
_______
بعد ماتنفع ابد كلمة حسافة
مسلطة علينه ابلاچ وكلچ آفة
من السقيفة المرة وأصحاب الخلافة
شرچ اعله حسين حد سيفة وهتافة
من غدرتي .. حاقده ومالچ رحم
‏من غدرتي.. چم سهم فوگ السهم
‏بصدره يوم طفوفه .. بكربلا والكوفة
اه يدنيا .. اه دنيا
_______
هبت جنودچ عليه هبة شياطين
تسلطت من كل جهة ترمي على حسين
ما سلم منه شبر لا چبد لاعين
وفوك كل هذا على صدرة تسحگين

والحوافر .. سحگت ضلوع الشرف
والحوافر.. ما سلم منها طرف
وما بقت بيه شوفة .. بكربلا والكوفة
اه يدنيا .. اه دنيا
_______
دوم يادنيا على الباطل ركضتي
بعترة الغالي جنيتي وما رحمتي
حتى عن أطفاله ماي الله منعتي
بچتلة فرحانه ولاعين الدمعتي

ويال أمية .. صرتي عالطيب حلف
ويال أمية .. ليش ضيعتي العرف
خيانتچ معروفة .. بكربلا والكوفة
اه يدنيا .. اه دنيا
_______
رغم ما جورچ عبر كل المقاييس
واتخذتي الباطل بوادي النواويس
ورغم ما قاسي الزمن وبلوته يقيس
يبقى أية الأكبر وجسام عريس

والگمر صار.. جفة بوسع هالسما
والگمر صار.. ماي ويشافي الضما
نور تضوي چفوفة .. بكربلا والكوفة
اه يدنيا .. اه دنيا
_______
وياج يادنيا اريد اختم كلامي
شيعي كاشف وجهي ما لابس لثامي
منچ بفد يوم لابد انتقامي
يالحكمتي هواي ايحكمچ امامي
المهدي يظهر .. ويأخذ بثار الشهيد
المهدي يظهر .. ويصبح العلم سعيد
والبرية تشوفه .. بكربلا والكوفة
اه يدنيا آه يدنيا
______
مجيد عبد الرضا القريشي

يا عجيد الحومة ها يعباس .. زينبك مهضومة ها يعباس
يالله صول أعليهم ... سيفك متانيهم
_________
يهدد بسيفة عدوك والشعار مولمة
اليوم نفني هاشم احنه اليوم تسبى الحرمه
ماكو غيرك يبو فاضل كله طيب ومرحمه
علم العاداك فنك يبو فاضل علمه
علمه شنهي الخدر ... شنهي غيرة حيدر
وانظر لتاليهم ... سيفك متانيهم
_________
الحلم ما ينفع معاهم ولابد تسل الحديد
قائدك احسين انته وهم قائدهم يزيد
كاس من كوثر ينطرك وهوه ينتظره الصديد
فرق بين التبع الله وبين شيطان المريد
خلي كل صفوفة ... مطشرة بطفوفة
وانته التقاضيهم ... سيفك متانيهم
_________
يا دلال ام عون زمجر يا فخر ال النبي
بيك مهيوبة الفواطم من چبير ومن صبي
لاتخلي خيام زينب يوصللها الاجنبي
وانته تدري باع غيرة وبس نفاق اليعربي
عربي موثاني .. بشره تولاني
غيره ماكوبيهم ... سيفك متانيهم
_________
تدري خوتنا شكبرها وما يفرقنا الزمن
لاچن المكتوب اشوفة مثل ما شفت الحسن
الماي صار بعيني جمرة لو ايديك تگطعن
موش ظهري البيه كسرة كل ظلوعي تكسرن
من اشوف اسهامك ... وكثرو الامك
الله لاينطيهم ... سيفك متانيهم
_________
أية من چفك تجلت فوگ نهر العلگمي
من شمرت الماي هونا صحت يانفس اعلمي
أنه من حسين اروي لو روى وما ظل ضمي
اطفي عيوني وچفوفي تطيح وانه الهاشمي
دمي ينبع غيرة ... حسين مالي غيرة
حجتي اواليهم .. سيفك متانيهم
_________
من اسم عباس نروى وبالملا ماظل عطش
انته جنة ماي بسمك بالورد طفنا انفرش
تفرج هموم اليگصدك لو نخه ويمك طرش
يالي حبكم ذهب صافي ابد ما يحمل دغش
ياهوه البعروگي ... كلي ومعشوگي
‏حيلي من طاريهم .. سيفك متانيهم
_________
مجيد عبد الرضا القريشي
‏

هل محرم والمجالس رفعت اذان الحزن
مو نعي هذا التسمعه نبض گلبي من يجن
هاي خدامك تشوف .. عالصدر طبعت چفوف
يا امامي يا امامي
________
خطة مرسومة لعزائك من گبل ادم بدت
تنصب ليك المواكب بالسماء اتاسست
اجر كل دمعة عبادة لو جمر ليك انزلت
والقره چلمات حزنك ليه جنة تولمت
مجلسك يابو الحنان
مستهله من الجنان
حارت بوصفه الحروف .. عالصدر طبعت چفوف
يا امامي يا امامي
________
نهر ما يوگف حزنه جاري بفضل الجليل
شما تعبنا بهاي الكم سيدي هذا قليل
مانوفي جروح گلبك لو نحر دمه يسيل
والله لخاطر عيونك نعبر احنه المستحيل
شما گصة بينه الزمان
عدنا مجلسكم امان
كعبة وبوسطه نطوف .. عالصدر طبعت چفوف
يا امامي يا امامي
________
عدنا كل يوم بمحرم ساعته تعادل الف
اه يحسين ومصابه بالأجر ما تنوصف
لوصحت عباس صوتي ونته تطيح سگف
لو ذكرت اهات زينب توگع ايدي وتنچتف
انترست احزان السماء
من مصيبة كربلاء

عالگضو برض الطفوف.. عالصدر طبعت چفوف
يا امامي يا امامي
________
رحم الله الذي أحيا شعارات الحسين
رحم الله الذي اجرى دموعا بالانين
فاطمة ترضى عليه وترضى هم ام البنين
وينزل التوفيق حتما من تمد الهم ايدين
من تنادي يا حسين
تحضرك ام البنين
همه حرزك بالحتوف .. عالصدر طبعت چفوف
يا امامي يا امامي
________
هو منهجنا ودرسنا حسين بالروح انرسم
ألف هنياله التبعهم وانحسب الهم خدم
شيعته من هالمجالس تسلقت اعلى القمم
ابغيرة العباس صرنة انتباهه اعله الأمم
ومن نهج ام الخدر
صرنا أبطال العصر
ما تگابلنه السيوف .. عالصدر طبعت چفوف
يا امامي يا امامي
________
مجيد عبد الرضا القريشي

الليلة ودعناكم باچر الله وياكم ..يزينب يزينب
اه يالمرضية للغرب مسبية ..يزينب يزينب
_______
الليلة مو مثل الليالي ما سطع بيها نجم
غايب بظلمة گمرنا عليه گلبي ملچم
زينب الليلة گضتها بالنوايح واللطم
اتصيح بعد أهلي واخوتي عمد بيتي منهدم

مشبگة بحبالها مگبعة بحزانها ..يزينب يزينب
بالقهر مروية للغرب مسبية ..يزينب يزينب
_______
الله اليساعد گلبها من تظل بلا حمه
بين الخيام وحرگها وبين اخوها بالضمه
عالنهر عباس طايح ومظلمه عليه السما
والحسين ابلايه رأسه صدره خيل تهشمه

يا متاحة البيها من رحل واليها ..يزينب يزينب
موقف من تشوفة كالحشر موصوفة ..يزينب يزينب
_______
ياعلي تنادي وعليها تضرب سياط الشمر
زينب الچانت اميرة راح تمشي للاسر
القدر ما ظن يتاني وليلها ما ينتظر
والعرب تسبي ضعنها من اميه هالامر

اه من يسبونها ويجري دمع عيونها ..يزينب يزينب
بلا اخو المظلومة تنتحب بالحومة ..يزينب يزينب
______
اه يا زينب عليكم انكتب أعظم مصاب
ينحر راس الحسين وشيبته تغدي خضاب
وتنطبر وجنات الأكبر وينچتل فخر الشباب
ويلي عالعباس يومه چن نزل يوم الحساب

عالوطيه ازلامها وتنحب بألامها ..يزينب يزينب
تصيح يابوفاضل من يميل الحامل ..يزينب يزينب
________
دما يازينب عليكم صدر شيعتكم غده
الفجر سهرانه تلطم بالنحيب الماهده
هاي دمعتكم علينه والمجالس شاهدة
شيب ضحينا وشباب وما رضخنا للعده
تصيح ما وفينه دمعه من سكينه ..يزينب يزينب
ولرقية عيوني ذابت اعله جفوني ..يزينب يزينب
_________
مجيد عبد الرضا القريشي

علي علي اه يالاكبر ياعلي
قاتلونه العرب .. هذا أمر انكتب
اه يالاكبر ياعلي
________
حاصرونا وهاجمونا بلاية غيرة واصل
حيرتهم واحرفتهم مغريات النذل
ماكو غيرك وبيمينك يبني سيفك تسل
لو رحلتوا وابتعدتوا هالخيم تشتعل

تطب تطب للحومة حيدر تطب
ويغلي سيفك غضب .. هذا أمر انكتب
________
ما رعوني وحاربوني واني سبط النبي
لا زغير ولاچبير يسلم ولاصبي
عطشوهم مرمروهم امة الناصبي
گالوا انتم صار اسمكم خارجي واجنبي

طغو طغو امة ظلالة وطغو
نكروا اشرف نسب .. هذا أمر انكتب
________
ماهي أمة كلها نغمة تذبح بلا حرام
كفرتنا حاربتنا واحنة ولد الامام
رادو إمرة وساحة حمرة واحنة ردنة السلام
مارعونا وهددونا مايغيد الكلام

حرب حرب رادوها فتنة وحرب
والسقيفة السبب .. هذا أمر انكتب
________
يا حقدهم يا مكرهم ذولة أهل النفاق
بالعداوة والبداوة ما مثلهم شقاق
حيروني ومارعوني بوية أهل العراق
وبعهودي كاليهودي نقضوا الاتفاق

تبع تبع شام وحجاز اتبع
ما يفيد العتب .. هذا أمر انكتب
________
هاية عله والنه الله عالطغى واليخون
وشبدية عالرزية بحالي مايرحمون
وبدمائك لنتمائك علينه يستهترون
يا ذخرنا يافخرنا بينه هذا اليكون
الم الم موت ونياحه والم
هذا فعل النصب .. هذا أمر انكتب
________
دنيا غبرة وموتي عبرة بكربلا يولدي
من دمانه وبمهانة يشتفي المعتدي
يا ارضنا ويا سمانا وياملاك اشهدي
هذا الأكبر چنه حيدر والنبي سيدي
نبي نبي يشبه ارسوم التبي
وبحياتي انحسب ... هذا امر انكتب
______
مجيد عبد الرضا القريشي

خادم الك بعيوني .. واصحابي ينتظروني
وفقني فدوه لهاية .. يحسين لاتنسوني
________
اخرتي انته ودنيتي وشما حصل بيه
عمري الك كلي الك وبصافي النية
مخلوق أنه واخوتي لهاي الحسينية
نحيي يغالي مصيبتك بظهور محنية

جيت بجمر احزاني .. انعاك ويه اخواني
اقره الك خلوني .. يحسين لاتنسوني
________
تربيت أنه بخدمتك وبمجلس احزانك
من گبل مادور عليه دورني عنوانك
راسي انرفع بين الملا وحگ الرفع شانك
يالوسط صدري مسكنك والگلب اوطانك

يالمجلسك تربيتي .. يالدمعتك عافيتي
بمحبتك وصفوني .. يحسين لاتنسوني
________
مشكور ربي لخدمته وفقني ولناسه
ذاك الفده دم النحر وچفوف عباسه
عايش صرت بمصيبته وبطيبت احساسه
يالحبك الزاچي غده ويالروح مقياسه


عاشرتك بأحساسي .. يا اهلي انته وناسي
يالخيمت بظنوني .. يحسين لاتنسوني
________
عباسي أنه وزينبي منكم صبح اسمي
والفاطمي والحيدري منقوش وي رسمي
الراضع خدمتك سيدي ماظن بعد يضمي
يا ضوة اعيوني ومهجتي الفارگك يعمي

من خدمته المعروفة .. فارس صرت بطفوفة
والخادم يسموني .. يحسين لاتنسوني
________
عهد وختمته بالدما ما عوف هالخدمة
لا والحسن ما انحني لو ميت الف لچمة
المايسولف خدمتك ما عنده اي كلمة
ضاعت حياته وانطرد من جنة الرحمة

الما ذكر احزانة ... نار السقر عنوانة
وخل تسمع اللاموني .. يحسين لاتنسوني
________
مجيد عبد الرضا القريشي

يريت الموت أخذني من الشمرگال
اچتفوها سبية هاكم حبال
بقه بصدري چلمتين .. ويبو فاضل والحسين
يريت الموت
________
سوالف هم چثيرة وتشده البال
على صدري حملها يهد الجبال
أنه الچانت اميره واخت شيخ العشيرة
صدگ هسه اسيرة وظهري مكسور
على هموم اللفني يسولف هذا وني
المصايب دولبني بعشرة عاشور

مني هاي الغريبة تسئل الناس
واكلهم زينب اني اخت عباس
على الماي انطه چفين .. ويبو فاضل والحسين
يريت الموت
________
صفت ايامي ظلمة وصبت الليل
گبالي الروس چنها نجمة سهيل
اسيرة وفكري حاير شفت روس ومناحر
تأذن كالمناير بين الضعون
على رماح العوالي. شفتهم غالي غالي
الشمر لو سوطه اجالي مايسكتون
اشوفن عينه تجدح گمر عدنان
اذا واحد ضربني وخله نيشان
شبع متني نياشين .. ويبو فاضل والحسين
يريت الموت
________
الغريبة بلا ولي تجرحها چلمات
‏واجرح كلمة گالو كافلچ مات
‏ابد ماكو حمية الخدم عد ال امية
‏زلم صارو عليه وجابو الخيل
‏لعد وينه حماكم لمن عباس اجاكم
‏ختلتو يم نساكم شفتم الويل
‏اجيتو هسه يمي وعالي تحچون
‏لون عايش گمرنا ما تگربون
‏اجيبة أعليكم منين .. ويبو فاضل والحسين
يريت الموت
________
طريق بطول همي واسمه للشام
الحرمة بلا زلمها صعبة تلام
غريبة بلاية والي. رحل عني دلالي
خذت حيلي وكمالي طبت السوگ
النظر شابح علينه نسا ومچتوفة ايدينه
نتستر بالضعينة ومحمل النوگ
صرت من مستحاتي بين الأطفال
اخبي وجهي بيهم وأستر الحال
اشيل اثنين وره اثنين .. ويبو فاضل والحسين
يريت الموت
________
زماني وشلعب بيه زماني
على دروب الخطر والهم خذاني
ترس گلبي مصايب وخذ مني الاطايب
بعد المن اعاتب والدمع سال
غدر بيه زماني ومسح كل الاماني
وتركني لوحدي اعاني بلاية كفال

يا ونات السبية مترسة جروح
مثل شهگت رقية تاخذ الروح
تنادي عالابو وين .. ويبو فاضل والحسين
يريت الموت
________
خادم زينب ع
مجيد عبد الرضا القريشي


‏

اقسم الك اقسم الك ما فارگ الاحزان
اقسم الك اقسم الك كلمة گلب ولسان
_______


كلماتي تجريلك نهر وتنام بجروفك
موجودة چنها بعاشرك بس ضامي تشوفك
عليك السيوف تجمعت بس ماكو سيوفك
لابيها نخوة وتنصرك ولاتقبل تعوفك

كلها روت كلها روت بس انته العطشان

اقسم الك اقسم الك كلمة گلب ولسان
________
فارس أنه بمحبتك وتعلمت منك
لو مال دهري ودنيتي اعدلهن بونك
صح انته ضامي ومنحر وخيول داسنك
بس كل زمن واگف الي چنك عدل چنك

چنك عدل چنك عدل وتحامي كل انسان
اقسم الك اقسم الك كلمة گلب ولسان
______
يا سيف ذاك اليذبحك انته الذبحت السيف
ما بدلك حر الشمس ولا غيراك الصيف
ياحيف خانوك العرب وسفه والف ياحيف
وانته المسيحي ناصرك من شافك بنص طيف

وسفة غريب الينصرك وتخونك العربان
اقسم الك اقسم الك كلمة گلب ولسان
______
ماكو مثل حزنك حزن يا سيد الدمعة
ماتوفي كلماتي الك لو خلص السبعة
ياضامي وبعينك نهر منحور وي ربعه
مالوم نفسي لو گضت كل العمر تنعه

وانته النعه وانته النعه موتك نبي الاكوان
اقسم الك اقسم الك كلمة گلب ولسان
______
وشلون ما انعه و نعت زينبنا فوگ التل
من چان منبرها رمل فوگ الشعر ينهل
وتنادي كون الطبرك يحسين چفة نشل
من بعدك عيوني عمن والدرب ما اندل

دمعي جره دمعي جره كالسيل عالتربان
اقسم الك اقسم الك كلمة گلب ولسان
______
مانسه احزانك ابد وسفه والف وسفه
ماانسه عاشور السده واحزانه وطفه
شلون انسه عباس الگمر يوم انگطع چفه
وظل منكسر ظهر السبط والوانه مختلفة
خادم الك خادم الك مو طبعي النسيان

اقسم الك اقسم الك كلمة گلب ولسان
______
مجيد عبد الرضا القريشي

الليلة مهيوبة وأميرة مخدرة .. وتبدي معركة الستر باچر ترة
من يميل من الهزل حامل .. بعد ما يفزع ابو فاضل
الليلة الليلة
__________
چنها ليلة قدر هم بيها علامة
بيها حتى الفجر اخواني بسلامة
لو طلع منها الضوة تشوف الامامة
جوة حافر خيل مسحوگة عظامه
وتترس في عيوني جمرة الدمعة
‏تنحب عليي راح وما اله رجعة
‏وينهد كل كياني وتبتدي الوجعة
‏
‏اه ياليل العشر فجرك غدر ... مسارع بحزني وابد ماتنتظر
‏مايهزك دمعي الهامل .. بعد ما يفزع ابو فاضل
الليلة الليلة
__________
‏التنتظر صدمة فجر بإبال الها
‏الليلة يمها وباچر تسافر اهلها
‏من تريد الماي ويروح الكفلها
‏يعني طاح حسين وتبدد املها
‏بروحت اخوتي تتهدم اقلاعي
‏بتراب ودمع يتغطه اقناعي
‏مهزولة السفينة ومايل شراعي
اه يا حرگ الخيم بيد الشمر.. اشگف اسهامة ويچويني الجمر
بلاية غيرة عالنسا صايل .. بعد ما يفزع ابو فاضل
الليلة الليلة
__________
ادري موسهلة التظل هيچي غريبة
الدوه ماينفع جرحها ولا طبيبة
لا نبي المثلي شهد هيچي مصيبة
منهو شاف اعله الرمل مصرع حبيبة
وتشوف الشمر صاعد على صدرة
لازم حربته وصاب ثنعش طبره
ويلي من الگفا ظل يذبح بنحره

حتى عالجبلة ابد ماجبلوه .. راد شربة ماي خيي و ماسگوه
عفيه گلبي شگد صبر شايل .. بعد ما يفزع ابو فاضل
الليلة الليلة
__________
لو رحل عباس للماي وحتوفة
هي اخر شوفة اله وشلون شوفة
ماخذعيونه السهم وبلا چفوفة
الچان ظلي يابشر شلون اعوفة

كاتب عالجرب ياخوية عذريني
صعبة اعله النهر طايح تشوفيني
ماكو چفوف ادية وانطفت عيني
صعبة بعدي ياذيچ الشمر .. وصعبة اشوف حسين ظهرة منكسر
صاح زينب والدمع سايل .. بعد ما يفزع ابو فاضل
الليلة الليلة
__________
خل نلم ارواحنه ونصير الجنود
والستر هو الدرع لو حلن السود
لاتظنن من نهر عباسنا يعود
حرم بالصحرة نظل والعادي اليحود

ومعركت الستر تبدي وملاحمنا
بالعاشر تطول وتعلى ونتنا
مچتولة الزلم محروگة خيمتنا

اه يا درب الأسر ذله تطول .. ما اريد احچي عليه ولا اگول
لشام لو ضعني صبح شايل .. بعد ما يفزع ابو فاضل
الليلة الليلة
__________
مجيد عبد الرضا القريشي

‏

صوت النوح عالعربس ياجسام ياجسام
والمجروح همه يصير ضرب اسهام ضرب اسهام
رباك الراح شيرجعة ... شموعه تحولت دمعة
__________
طبع أم الولد ترتاح لو سوت اله زفة
تگر اعيونها بشوفة وتترس أيدها الحنة
وانه يا خلگ زفيت ابني لحومة الونة
غاب بظلمة العدوان وهو چالكمر چنة

ولمن راح ظل الصوت اه يبني اه يبني
ياجسام بعدك شوگ عذبني عذبني
الم بياسه والشمعة ... شموعه تحولت دمعة
__________
يشايل من ابوك اطباع كريم لحد مناية الروح
الشباب بعرسه مال ورود مومالة حرب وجروح
أنه ابدال الشمع خليت اصابع عشرة بيهن نوح
تلطم صدري والدلال على الدمه بحرب مسفوح

بعدك اه ظل عمري بالايام بالايام
حل رباك انه ادري چم حزام چم حزام
العمر بفراگه ما أجرعه ... شموعه تحولت دمعة
__________
يتربات الحسن وحسين بيهم رافع اعلامك
يعطر من الكريم يفوح اشمك واغفة بنسامك
يدرة وامنتها بروح احسب عمري بيامك
لچن ما حسبت دهري يخون ويذبح احلامك

بعدك مات كل حيلي شحچيلك شحچيلك
بعد شتفيد كلمة فدوة اغديلك اغديلك
زرعت بمهجتي الوجعة ... شموعه تحولت دمعة
__________
كلام الفارگ احبابه يزرع بالصدر غصة
يمكن تمضي الايام وتنطيه دنيته فرصة
لچن ام لو ولدها راح هذه غير هالقصة
يأخذ كل عمرها وياه ربعه ولانصه

الولد لو مات گلب أمه يموت وياه يوت وياه
وطور النوح من بعده اه واه اه واه
أبد ما تحمل الفجعة ... شموعه تحولت دمعة
__________
عرس جسام ظل أية لشباب الغيرة والثورة
يعلمهم ثقافة دين وحگ الضايع ايدورة
اليريد يطالب بحگه بستر مو بارز العورة
مو جمعة وهرج چذاب وعدو حسين ايصورة

صنع جسام الك دستور هاك اقراه هاك اقراه
واعلى الدين هذا اليوم عاهدناه عاهدناه
اليخالف لازم نردعة ... شموعه تحولت دمعة
__________
مجيد عبد الرضا القريشي
خادم ابن الحسن ع

يا كسرة ظهري وكل حيلي عندي عتاب هواي
ليش تگل لنفسك هوني وما شارب هالماي
انخطف بعدك ثمر لوني ... عتب واضح على عيوني
___________
اعاتب والعتب مرسوم بعيوني
وطبگن عالجمر من حالك جفوني
رحلتو وعايش بهمي تخلوني
وانه ظني گبلكم من تشيعوني

فوگ اصحابي اولدي ترحل عني يا عباس
مو شيب براسي من همك بجسمي ما ظل راس
فگدت الي يواسوني ... عتب واضح على عيوني
___________
كاتب اعله جودك بالدمع شفتك
العذر يحسين مي ما بللت شفتك
ضامي لوحدك بوسط العده عفتك
وادري لارحم ترجيه من امتك

المارحمت طفلك عبدالله كل شي اعليها يهون
والصابو عيني وچفوفي چم راس ينحرون
بگطع نحرك يذبحوني ... عتب واضح على عيوني
___________
شعاتب والزمن ما يسوه چلماتي
اذا رحت انته حلت كل معاناتي
بقت بس چلمة اكتبها ويه دمعاتي
يعباس انكسر ظهري ورحل ذاتي

يا حسراتي وحسرة زينب يوم العنا تروح
نبقه اجسام بهاي الدنيا بس ما بيها الروح
وسط موتي تخلوني ... عتب واضح على عيوني
___________
ڜگل لختك وگابلها انه بياعين
وشگل لسكينه لو سئلتني عمي وين
شجاوب والجواب يهد سما الصوبين
منو يصدگ بلا عباس ظل حسين

هاي الچلمة اصعب چلمه والله تهد الحيل
من تسمعها مني عيالي يصير نهارك ليل
بعويل الهم يلاگوني ... عتب واضح على عيوني
___________
يعباس وعلي ما ظلي بعدك حال
بكثر دمك دمع بالعين مني سال
أنه ما طالب بهالصحرة دنيا ومال
وعلي عينك تشوف يدور الچتال

مااسلم بعدك من عدهم جسمي يصير اسهام
مثلك منحور وهم ضامي ويحرگون خيام
وتحير لزينب ظنوني ... عتب واضح على عيوني
___________
خادم ابا الفضل العباس ع
مجيد عبد الرضا القريشي

أنصار والله ونعم الانصار ... ختمو عمرهم ويه الحسين
ذاعت شيمهم كل الاخبار ... وتصدرو كل العناوين
صارو مثلنا ... لهذا زمنا
________
أسود بكل زمان نشوف طرواهم
حسين اختارهم وبئيده علاهم
على اذان الملا والعين سماهم
صحابة نور والخير ابتده وياهم
مازال يفخر صوته مازال ... نعم الاصحاب ونعم من گال
غيره وشجاعة وگلب ما مال ... خيالهم مايثني لو صال
ترسو گلبنه ... لهذا زمنا
________
هلا بيهم شكثر شالو كرب لحسين
هلا من گال فدوه نروح للطيبين
حبيب الصاح زينب گولي شتردين
لخلي اعداچ نهر من الدما صوبين
لعيناچ فدوة وعدها عيناچ ... للخدر كلنه نطيح اموات
وخل يسمع الكون الگصه وياچ... كلنه فدة للفاطميات
هالكلمة گلنا ... لهذا زمنا
________
خرس من صال ابن القين كل الكون
وابن عوسج رسم طعناته باليعدون
ماگول الرياحي العزة عنده فنون
بس شم العطر والطيب من عد جون
اعله الفخر مشبوحة العيون ... واعله السفر كلها تنافس
بحب الحسين اتبارو أجنون ... وهاك انظر السواه عابس
اجنونه جنة ... لهذا زمنا
________
صحب حسين صارو معجزة وامثال
أية بكل زمن نقراها للأجيال
عبر نخوة وشهامة ودرس للابطال
وبهذا الزمن شفناها واقع حال
من گال داعش اهدم گبور ... ما صابت الخيرين حيرة
طفل وشباب وشيخ مهجور... نزفت گصصهم نهر غيرة
سوو حشدنا ... لهذا زمنا
________
كلام الناس ماينصف كلام الناس
نكر كل مرجلة وصار الغدر فراس
لچن مادام طيب شعري والانفاس
كلامي الكم يظل لحسين والعباس
اكتب شعركم واني ممنون... شمحلاته للطيبين شعري
وخل الملامة واليلومون ... بالآخرة يشوفون أجري
انتم اجرنه ... لهذا زمنا
________
تربينه أعله حبكم بالزغر وكبار
لا طاغوت همنه شما عدم لو جار
حاربنة النواصب والسواتر نار
وعمرنا مجالس الكم بكل دار

حاربنة وبحبكم نمارس ... سيوف ولسن اعلينه يحچون
والماتعجبة هالمجالس ... موت اليطمه وهمداه كون
ما يرضى عنا ... لهذا زمنا

________
مجيد عبد الرضا القريشي
نسالكم الدعاء

چنك نبي وصبح الله چنة عيونك
والعاينو وجهك فلا ينسونك
يا بدر ما لمك سما ... ينجرح برسومه الدما
________
يمه غده صدري جبل يوم الرحت للمعركة
وعيوني ذابت چن ثلج حر النهار يفككه
ابعيد ما توصل الك ايدي بهواها شابكة
شيصبر الأم عالولد سيف القدر لو شاركة
من بعيد انده الله وياك سالم يوليدي
يا فرحة عمري بدنياي يا هلة عيدي
بس منيا وحده تمنيت شمه من وحيدي
لاچن خالف ظني الموت يبني موبيدي
من عاند وياك القدر يالغالي... هدملي حيلي وما رحم بحوالي
وهسه بمراري مألمة ... ينجرح برسومه الدما
________
بالحومة عافيتي غدت وابعد علي شم الهوه
والفارگ بلحظة گمر يملي عيونه يا ضوه
وشلون لو يشبه نبي لفراگه ينفع يا دوه
يالراحل ابعد السما هم نرجع ونگعد سوة
يا كسرة ظهري ويحسين يانور أيامي
يالرايح لانياب الموت يالگلبك ضامي
من بعدك ياروح الروح ضاعت أحلامي
ياريت اسهامك بحشاي يالعني تحامي
بعدك فلا لون لضوه بعيوني ... اسود غده من فرگتك وظنوني
لا تظن بعدك سالمه ... ينجرح برسومه الدما
________
من وجه ابوك انظر الك شفت بمعانية الحرب
ما رمشت عيونه بشمس ولاميلت عنك غصب
الوان وجهه لشوفتك كل ساعة لون وينشطب
ولمن برز غانم الك ولادم بقه بوجهه يصب
معذور بصفناته حسين وخطفة الوانه
لن بن غانم ايعدوه الف بعنوانه
لو گرب منك ياحيد چن موت وجانه
ظليت ادعي وياي حسين لله سبحانه
ومن كبر حسين بعظم إحساسه... ياليله ابنچ هذا رافع راسه
جندل بكر رغم الضمه ... ينجرح برسومه الدما
________
يلمارويت من العذب گلب الشمس گلبك غده
يالصارت اشفافك جمر ولاماي عدنا نساعده
لسانك على السان الولي طابگ ولامن فايده
بس گال كلمة وغربت صايل على جيش العده
جدك ينطر بيده الماي يالاكبر والكاس
من عطشة گلبك يرويك من لوعة هالناس
واعله اثارك هالماضين بوية اني وعباس
بين المنحور ومطبور ما راوي من الطاس
يوليدي مكتوب وتشوفه عيونك.. بالحومة ضامي والعده يطبرونك
عن چتلي لاتسئل لما ... ينجرح برسومه الدما
________
غابت شمس عمري وصرت دنية عذاب بلاشمس
من طبرك سيف العده يطبر حشه گلبي احس
ما رحم دهري بحالتي ولا رحم بوليدي النجس
بجيشه فرد هجمة هجم بين الطبر بين الرفس
اه يادهري وياي شبيك خالفت ظنوني
توليني بهالصحرة اعداي ببني يذبحوني
من طاح الأكبر مصيوب ما تدري شلوني
ميته بلا روح وناديت لبني ودوني
ماتت احلامي يابدر وي موتك ... طايح على الغبرة ورمل تابوتك
وحسين ناصب مأتمه ... ينجرح برسومه الدما
________
خادم الأكبر
مجيد عبد الرضا القريشي
نسألكم الدعاء

يادگة الباب گري هالعيون ... بلچن بالاحباب جية ويمرون
طاحت عيوني من النظر ... من المرض گلبي انفطر
يادگة الباب
________
اسولف والسوالف ضيم للعايش بلاية اهله
هجرهم كالجمر يسري بجسمي فوگ هالعله
لا ماي البعدهم بيه اهنه ولا طعم أكلة
بعدهم والهجر يا ناس صواب بمهجتي خله
دمعي ولافاد عالراح دمعي ... مكسورة بالبيت والصوت ينعي
بالهم بعدهم والكدر ... من المرض گلبي انفطر
يادگة الباب
________
بقيت برحمة المرسال بلچن لو خبر عنهم
يطمني اعله حيلي الراح ويحدد مواطنهم
يگلهم هم يجي عباس ياخذني لمحاملهم
نذر اطيها هاي الروح بس أوصل وشوفنهم
أمن يجيبه ادعي وانادي ... بجاه النبي وجاه حيدر الهادي
بجاه الإمام المنتظر ... من المرض گلبي انفطر
يادگة الباب
________
علي يمسهل الصعبات ردلي الصارو بغربة
يحلال المشاكل دوم ادعي ودعوتي صعبة
اوزع بالفضل عالناس بجاه أبو الفضل قربة
وادعي لوالدي المظلوم الله ينصره بحربه
لعبد الله سويت حرز اعله اسمه.. خافن هالزغير بالصحرة يضمه
خافن يجيه سهم بنحر ... من المرض گلبي انفطر
يادگة الباب
________
ونات الزغيرة ظنون من تنحب جمر هية
وانه لوحدي اجر النوح ليل نهار يومية
علي لو هاجت الحمى تمرني بئيدها رقية
وهسه مگابلة الونات ولا واحد يمر بيه
اسأل يهالناس ومگابلة الباب .. ولامن مراسيل ردتلي الجواب
بنار الهجر جسمي استعر ... من المرض گلبي انفطر
يادگة الباب
________
حلم صارت تدگ الباب وهيچي گبالي مفتوحة
واشوفن طلة المحبوب ويداوي گلبي وجروحة
شو طال البعد ياباب وچنها الروحة فد روحة
لا ردة البعد منهم تهيد للمحب روحه
جاوبني ياباب اعتب ترة اعليك ... لو ضلعي ينصاب اگعد وتانيك
لودگتك ضلعي انكسر ... من المرض گلبي انفطر
يادگة الباب
________
أنه اللاسلوة الي ضلت حزن وبصدري مغرس
الم ودموع تبرالي وهموم البصدر تحبس
بس وحدة اريد هنا ربي شيعتك احرس
يسلوني بذكرهم دوم وما ينسوني بالمجلس

ذكرو مصابي وحزني على حسين ... ياربي احفظ ذولة الموالين
من كل وباء وكل خطر ... من المرض گلبي انفطر
يادگة الباب
________
خادم العليلة مجيد عبد الرضا القريشي
نسالكم الدعاء