ጳጉሜን 5 " የነገ ቀን " በሳይንስ ሙዚየም  በተለያዩ ዝግጅቶች ተከብሯል።
===============
በዝግጅቱ ዲጅታል ኢትዮጵያ ላይ ያተኮረ የፓናል ውይይትና በዘርፉ የተሰማሩ ተቋማት የተሳተፉበት ኤግዚቢሽን ተካሂዷል፡፡

ዲጂታል ኢትዮጵያን ላይ ትኩረቱን ባደረገው በዚህ ዝግጅት ላይ የኢኖቬሽንና ቴክኖሎጂ ሚኒስትር ዶ/ር በለጠ ሞላ ባስተላለፉት መልዕክት የነገዋ  ኢትዮጵያ  ዕጣ  ፈንታ በዲጂታል እና በመጻኢ ቴክኖሎጂዎች በሚኖራት አቅም  የሚወሰን መሆኑን ገልጸው በቴክኖሎጂ በመታገዝ አገልግሎት አሰጣጥን ቀልጣፋና ተደራሽ በማድረግ ረገድ ከተቋማት የሚጠበቀው ሚና ከፍ ያለ መሆኑን ጠቁመዋል።

ሚኒስትሩ አያይዘውም  ሀገራችን  ግብርናን በማዘመን እና የምግብ ሉዓላዊነቷን በማረጋገጥ ፣ አስተማማኝ የሃይል ምንጭ በመገንባት እንዲሁም ከእርዳታ ጠባቂነት እና ከሌሎች ጥገኝነት ለመላቀቅ በመሳሰሉ ወሳኝ ጉዳዮች በምታደርጋቸ ጥረቶች እየተመዘገቡ ያሉ ለውጦች በተጀመረው ግለት እንዲቀጥል የሁሉም ርብርብ ወሳኝ ነው ብለዋል።

በፕሮግራሙ ማጠቃለያ ላይ የሥራና ክህሎት ሚኒስትር ክብርት ሙፈሪሃት ካሚል ባስተላለፋት መልዕክት፣ የኢትዮጵያ ሰንደቅ አላማ በአለም አደባባ ተከብሮና ከፍ ብሎ እንዲውለበለብ ስለነገ መስራት የምርጫ ጉዳይ አይደለም ብለዋል፡፡

ኢትዮጵያ ነገዋን በትክክል ለመቅረጽ ትላንትናና ዛሬዋን በትክክል አይታ እየተጓዘች እንደሆነም በንግግራቸው ያመላከቱት ሚኒስትሯ ፤በየትኛውም አይነት የሥራ መስክ ለነገ ያልተዘጋጀ የመውደቅ ዕድሉ ሰፊ መሆኑንም ጠቁመዋል፡፡

ዲጅታል ኢትዮጵያን ለመፍጠር ለነገ የተዘጋጁ ተቋማት እና ይህንን የሚሸከም የሰው ሀይል ማፍራት ወሳኝ በመሆኑ ለተቋም ግንባታ ልዩ ትኩረት ተሰጥቶ እየተሰራ ነው ብለዋል፡፡

ኢትዮጵያ ነገዋን እየሰራች ስለመሆኑ የህዳሴ ግድብን ጨምሮ የተጀመሩ፣ እየተሰሩ የሚገኙ ዘርፈ ብዙ ስራዎች ሁነኛ አመላካች መሆናቸውንም አብራርተዋል፡፡

በዝግጅቱ ላይ በተካሄደው የፓናል ውይይት በነገዋ ኢትዮጵያ ውስጥ ቴክኖሎጂ  ባለው አይተኬ እና ወሳኝ  ሚና ላይ ተመሰርተው በነገዋ ኢትዮጵያየአመራር  እና ተቋማት ሚና ፣ቴክኖሎጂ አመንጪነት እና ደህንነት  ያለው ፋይድ፣የምግብ ሉዓላዊንት ማረጋጋጥ እና ከተረጂነት የተላቀቀች እንዲሁም የማትበገር የነገዋ ኢትዮጵያን መፍጠር ላይ ያተኮሩ ሃሳቦች ተነስተዋል።

የነገ ቀንን ምክንያት በማድረግ  የሀካቶን ውድድሮች ሲካሄድ የቆየ ሲሆን በውድድሩከ1ኛ-3ኛ ለወጡ አሸናፊ ቡድኖች የተለያዩ የማበረታቻ ሽልማቶች ተበርክቶላቸዋል።

ዝግጅቱን የኢኖቬሽንና ቴክኖሎጂ ሚኒስቴር፣ ግብርና ሚኒስቴር፣ የሥራና ክህሎት ሚኒስቴር፣ ኢትዮ ቴሌኮም፣ ሲቪል ሰርቪስ ኮሚሽን፣አደጋ ሥራ አመራር ኮሚሽን፣ የመረጃ መረብ ደህንነት አስተዳደር እና የአርተፊሻል ኢንተለጀንስ ኢንስቲትዩት በጋራ አዘጋጅተውታል።