السلام عليكم ورحمة الله وبركاته

بداية سيمستر موفقة للجميع يا رب.

حنكون معاكم إن شاء الله السيمستر هذا ف كورس كميونيتي جديد ع منصة أكاديميا، وهذا فيديو جديد لأول محاضرة ف الكورس نستعرض فيها طريقة الشرح.

تفاصيل الكورس حتنزل نهاية الأسبوع إن شاء الله.

خسوف القمر الليلة.

لعنة التطور 🥲

قلنا نغيروا أجهزة التسجيل والمايكات والمعدات السيمستر هذا باش نطلعوا بجودة أفضل، نلقا كل المحاضرات اللي سجلتها من غير صوت.

هذا علاش عطلنا ف تنزيل الكورس، حاليا قاعد نعاود ف المحاضرات ثاني 🫠

السلام عليكم ورحمة الله وبركاته

الحمد لله كملت المحاضرات وبعثتهم للمنصة وبانتظار فتح كورس النصفي لكميونيتي 1

القروب متع المادة سواء كميونيتي 1 أو 2 مفتوح حاليا، أي استفسار تقدروا تبعثوه ع القروب.

هذا الرابط: https://www.tg-me.com/+UK1ZuB798Q01NDZk

السلام عليكم ورحمة الله وبركاته

كورس كميونيتي 1 نزل ع منصة أكاديميا.

بإذن الله المحاضرات حتكون متابعة للكلية.

بالمناسبة، للمصداقية؛ ما نشرحش ف محاضرة الIntroduction to community medicine.

ولا عمري شرحتها ولا حتى قريتها أيام كنت طالب، ولا مقتنع بيها إلى يومنا هذا.

السلام عليكم ورحمة الله وبركاته

إخواننا السوريين؛ أي حد يبي يشترك ف كورساتي بإمكانه يكلمني ع الخاص أو القروب وأنا نفتحله مجاني، أنا عارف كويس الظروف اللي تمروا بيها.

وكذلك الكلام هذا لأي حد ما يقدرش يتحمل تكلفة الاشتراك فالباب مفتوح ليه أيضا.

دكاترة الكلام هذا حيستمر بس لمدة 5 أيام إن شاء الله، لأني ما نشوفش ف الخاص هلبا وما نحبذش من يكلمني ع الخاص خاصة لو كانت بنت.

ملاحظة: لو بتبعثيلي ع الخاص، يفضل تبدي بالسلام وتكتبي طلبك طول من غير أي مقدمات أو هدرزة أو فتح مواضيع، درءً للفتنة.

الأولاد عادي خودوا راحتكم 😂

السلام عليكم ورحمة الله وبركاته
هادي المحاضرة الأولى لكميونيتي 1 لو فيه حد الصوت مش واضح عنده ف المنصة.

السلام عليكم ورحمة الله وبركاته
طلبة البارا مش ناسيكم، نزلتلكم 4 محاضرات من منهج النصفي وبانزل الباقي إن شاء الله، القناة خاصة وممنوع تشارك المحاضرات تقدر تشارك الرابط بس.

القناة مجانية بإذن الله.

وفقنا الله وإياكم.

رابط القناة: https://www.tg-me.com/+698aWnCetzU5MjQ0

زملاؤكم طالبين منكم تعبوا الاستبيان هذا من بعد إذنكم.
https://forms.gle/Ji4DLpXje6XFMmmX8

إنا لله وإنا إليه راجعون

فُجعنا بخبر وفاة سماحة الشيخ عبد العزيز بن عبد الله آل الشيخ – المفتي العام للمملكة العربية السعودية – بعد حياة حافلة بخدمة الدين والعلم ونصح الأمة.

رحم الله الشيخ رحمة واسعة، وجزاه عن الإسلام والمسلمين خير الجزاء، وجعل ما قدّمه من علم وفتوى ودعوة في ميزان حسناته.

اللهم اجعل قبره روضة من رياض الجنة، وارفـع درجته في عليين، واخلف الأمة بخير.

السلام عليكم ورحمة الله وبركاته

كميونيتي 2 محاضرتي الImmunization and Cold chain
شرحتهم من سلايدات الدكتورة اللي عندي، حتلقى فيه بعض الفروقات لما بتقرا م الشيت بس الدكتورة قالتلكم أنكم مطالبين بالسلايدات اللي شرحت منهم.

السلام عليكم ورحمة الله وبركاته

خلي نقُلكم ع فائدة تُقدر بالذهب -بالنسبة لي ع الأقل- ومتأكد أنه فيه ناس نفس حالتي.

أنا شخص ناخد العدوى خاصة ف الأمراض الفيروسية التنفسية بسهولة جدا، ومناعتي تتعامل معاها بطريقة جدا غريبة، يعني عدوى ممكن تمشي ع العيلة كلها من كبيرها لصغيرها ما يصيرلهمش إلا مجرد زكمة بسيطة وتستمر يوم يومين وتمشي، ولما حد م العيلة يمرض لازم ناخد العدوى منه لاااازم، بس أغلب الأحيان لما أنا تمرض ما نعطيها لحد ههههه.

المشكلة مش هني، المشكلة لما ناخد العدوى نخش ف مضاعفات قوية جدا وتستمر أحيانا حتى لشهر، لدرجة أنه آخر مرة صار الشيء هذا رقدت ف المستشفى وخشيت ف التهاب رئوي وموضوع طويل.

المهم؛ بعد المقدمة الطويلة هادي خلي نقوللكم ع الفائدة اللي وفقني الله عز وجل لمعرفتها.

قريت مرة بحث ع موضوع الغرغرة بالماء والملح وكيف أنه ينقص من مدة المرض ومضاعفاته وفاعليته.

المهم، مرضت ثاني ولما كيف بديت نحس بالأعراض بديت ندير ف الغرغرة هادي ع الأقل 3 مرات ف اليوم، والله بدون مبالغة، من لما تعلمت الشيء هذا وبديت نطبق فيه والفضل لله أولا وآخرا؛ بدت المرضة يا دوب تجي وتمشي من غير ما تعطل أو تخشش فيا ف المضاعفات القوية، وأنا بطبيعتي
كنت نمرض هلبا ولازم نخش ع المضاد ف الوريد وهكذا.

بس هادي فائدة حطيتهالكم لعل حد منكم عاش نفس معاناتي ويستفيد بإذن الله.

شوية ملاحظات:
الغرغرة يفضل تقعد تغرغر ف الماء ف حلقك ع قد ما تقدر وعاودها حتى 3 أو 4 مرات ف الجلسة الواحدة.
ما دابيك مع الغرغرة تستنشق وتستنثر الماء بخشمك حيسرع الأمر بإذن الله.
الكمية هي تقريبا لتر ماء فيه كاشيك ملح المهم ما تكثرش هلبا الملح.
حاول اديرها بكري يعني أول ما تحس برقبتك فيها شوية جفاف أو مش مريحة أو ألم.
حاول ما تشربش أو تاكل بعد الغرغرة ع الأقل لمدة عشر دقائق.
ركز؛ راهي غرغرة مش مضمضة.
هذا الكلام قد لا ينطبق ع الكل، قد يكون ما ليشي تأثير ف بعض الأمراض، هذا مش وحي، هذا كلام يحتمل الصواب والخطأ وأكثر من احتمالية.

الكلام هذا قريته من بحث علمي موثق ومنشور ع الpubmed مش من راسي.

كتبت من غير استخدام مصطلحات طبية لتبسيط المعلومة.

السلام عليكم ورحمة الله وبركاته

كميونيتي 2
الكورس جاهز ع منصة أكاديميا سواء النصفي أو النهائي، حنتابع معاكم التغييرات ف المحاضرات لهذا السيمستر إن شاء الله، وحتلقوا المحاضرات المتماشية مع منهج الكلية لهذا السيمستر ف قسم اسمه: خريف 2025.

وفقنا الله وإياكم.

السلام عليكم ورحمة الله وبركاته

كميونيتي 1 منهج النصفي نزل بالكامل ع المنصة.

خلال تحضيري لمحاضرة الCounselling in PHC وبالتحديد ف التعامل مع السلوكيات الإدمانية كالتدخين مثلا؛ قابلني كتاب في علم السلوكيات اسمه: Willpower is not enough أو الإرادة لا تكفي -ولا أنصح بقراءته- كانت خلاصة الكتاب أن اعتمادك على الإرادة في الكف والترك ومواجهة السلوكيات الإدمانية غالبا لا تكون كافية ولا تؤتي ثمارها.

كمثال؛ لو حاولت أنك تسيب شيء مدمن عليه كالتدخين أو الأكل أو عادة سيئة، شوف شن بيصير؛ بمجرد خضوع نفسك للسلوك الإدماني حتحس بعده بالذنب وتأنيب الضمير وتعزم ع تركه، بس بمجرد ما توفر لنفسك البيئة المناسبة -بعد عزمك ع الترك- زي أنك ترافق مدخنين، أو تمشي مع أصحابك لمطعم تحبه أو تخلو بنفسك ومعاك الوسائل اللي محتاجها؛ حتضعف نفسك سريعا وحتعاود تقع ف نفس السلوك ويعاودك شعور الذنب وتبدأ ف دائرة لا تنتهي.

والسبب الرئيسي هنا هو اعتمادك ع الإرادة لوحدها، فَنَصَّ الكتاب ع أنه لازم تعترف بأنك منهزم أمام السلوكيات هادي إذا توافرت شروطها وحتعاود ترجعلها -وهذا في بداية التعافي يكون- ما لم تبتعد عن كل ما يهيج فيك السلوك الإدامني.

نعطيكم مثال: لو كان شخص مدمن ع عادة سيئة وكل مرة يمارسها يحس بالذنب ويقول بنسيب، وبمجرد ما تتوافر قدامه أسبابها يضعف ويرجعلها.

لهذا؛ بناءً ع هادي النظرية شن الحل؟

قالك لازم تعترف أنك ف بداية طريقك مش حتقدر تقاوم السلوكيات هادي -غالبا- إذا وقفت أمام مهيجاتها كما ذكرنا، والحل أنك مش تبتعد ع السلوك هذا بل تبتعد عن كل ما يذكرك ويخطر عليك السلوك هذا لأنك غالبا حترجع تمارسه ثاني.

اللي خلاني نكتب الكلام هذا؛ هو تذكري لحديث النبي صلى الله عليه وسلم: ومَن يُشْرِفْ لها تَسْتَشْرِفْهُ، ومَن وجَدَ مَلْجَأً أوْ مَعاذًا فَلْيَعُذْ بهِ.

يعني اللي يوقف قدام أسباب الفتنة أو الانتكاس أو الشيء المدمن عليه حيلقى روحه طايح فيه.

ولهذا قال الله عز وجل (ولا تقربوا الزنا) وما قالش ولا تزنوا، بل قال ولا تقربوا، يعني ما تقربش من أسبابها حتى، باش ما تقعش فيها، فسبحان الله.

دين شامل كامل غطى جميع نواحي الحياة.

ملاحظة: المحاضرة قاعدة ما نزلتش.

السلام عليكم ورحمة الله وبركاته
كميونيتي 1
محاضرة Basic measurements سحبتها م المنصة وحنرجعها بإذن الله، لهذا ما تستغربوش لو ما لقيتوهاش.

كذلك كميونيتي 2 بالنسبة للNCDs