#جديد-للمشايه

حزميني ... يالزهـره بحـــزام الخدم
سويني ... اتراب اويسحگونه بجدم
من تجي المشايه
ـــــــــــــــــــــــــــ
يالزهره سويني اتــــراب وتسحگني المشايه
وتخفگني نسمات الريح لمن تـــرف الـرايه
ماعدي ابد كـل غايــات بس الحُسين الغايه
أتراب بطريــــق الـزوار وعليه هم اهــوايه

عيشيني ... نار وجمر ذيج الخيم
سويني ... اتراب ويسحگونه بجدم
ـــــــــــــــــــــــــــ
بعيوني ماشفت أحسين بس غيره مايحــلاي
ساكـن أبگلبي وميروح متربـع بنـص بــــالي
غالي واعـز امن الروح يالزهره ابنـج غــالي
يحسبني خادم مبخوت والله صـدك هنـيالي

سجليني ... ماريد ايصر امن العدم
سويني ... اتراب ويسحگونه بجدم
ــــــــــــــــــــــــ
معروفه مذلول يعيش كلمن خـدم سلطانه
بس الخدم اهل البيت ينعرف اسمه وشانه
سلطان بالدنيه ايصير وبالجنه صار امجانه
يحضه بمهابه وتقدير يصيحــوله يامولانه

ويحسيني ... عمري ارد اعيشنه بألم
سويني ... اتراب اوسحگـونه بجــدم
ـــــــــــــــــــــــــــ
اعله الخدمه نتسابگ دوم هيج الاهل ربونه
وصونه اهلنه اعله حسين أمن الزغر وصونه
اليسمع بطاري حسين ومايبجي صوج أعيونه
والنعمه ابـد ما تـنعـــاف وحسين لتعــوفونه

ياعيني ... بكل دمعه كون اه وسهم
سويني ... اتراب اويسحگونه بجدم
ـــــــــــــــــــــــــــ
مولاتي يا أم حسين سجلينه من خدامه
كلمن تمديله العـــون يرفع ابأسمج هــــامه
والله لو ما الحسين ماينـعـــرف اســــلامه
عيشنه بالدنيه بخير والثمن حرگ اخيامه

نصريني ... ماريد اعض اصبع ندم
سويني ... اتراب اويسحكونه بجدم
من تجي المشايه
ـــــــــــــــــــــــــــ
محمد المشعلاوي

#عند رجوع الضعن الئ كربلاء
ـــــــــــــــــــــــــــــــــــــــــــ
 
ردينه من درب السبي يا ابا الفضل گوم
وزينب أجتك تشتـكي ومحمله أهموم
اگعد يخويه واستمع من عندي الاخبار
بالشام سمعونه حجي ومشامر احجار
خويه خويه .. خويه خويه
ـــــــــــــــــــــــــــــــــــــــــــ
من بعد ما طحتو يخي هجمو علينه اعداكم
صاحوا احرگوها الخيم لا يمي حتئ انخاكم
الشمر وبصوته النذل ويصيح طاح الواكم
ويصيح يازينب بعد العباس شو ما جاكم

يتمرجل اعليه الشمر من ياوكت هاي
ياخويه گلي بياوكت ماهو انته وياي
ياريت حاظر يالگمر وتشاهد النار
بالشام سمعونه حجي ومشامر احجار
خويه خويه.. خويه خويه
ـــــــــــــــــــــــــــــــــــــــــــــ
من حرگو اخيامي العده ياخويه صرت أبحيره
والحال أبد ماينوصف كلش صعب تفسيره
انه الخدر وام الخدر من ديره امشي لديره
ديرة شماته ابلا رحم و الوجه وين نديره

حركو خيمنه او حضروها هزل النوك
محتاره وين انطي الوجه من طبت السوك
بس الرعب منهم بگه بگلوب الازغار
بالشام سمعونه حجي ومشامر احجار
خويه خويه .. خويه خويه
ـــــــــــــــــــــــــــــــــــــــــــــ
ياخويه شحجيلك بعد  عن اليسر ودروبه
ليل او يمرنه بالغرب لا هلا بجيت اغروبه
ضلت تره بس العبي  ياخـويه ما مسلوبه
من يزمخ اعلينه العدو راسك نعاين صوبه

فوك الرمح راسك يخي  ومخوف الناس
تـتراجـف بخـوف الزلم  لو صحنه عباس
ياوسفه دارت دنيتي وبيه الوكت دار
بالشام سمعونه حجي ومشامر احجار
خويه خويه .. خويه خويه
ــــــــــــــــــــــــــــــــــــــــــــــ
طبينه للشام بطبل  كل الخلك فرحانه
مانعرف اوجوه البشر الحبنه والضدانه
شماتنه هواي وبعد شافو الروس اويانه
تهضمني ياهوه اليجي يذكرني هسه السانه

زينة أبوها بياوكت  بالطاري تنجاب
غير الوكت خله الگمر نايم عالتراب
وياي حاظر يالولي بس راسك الحار
بالشام سمعونه حجي ومشامر احجار
خويه خويه .. خويه خويه
ــــــــــــــــــــــــــــــــــــــــــــــ
شحجيلك اوشذكر الك  ياخويه عن ياحاله
شتـحـمـل وشصبر بـعـد وگـبــالي الجــتـاله
متوسط إيزيد القصر ويسولف اعله افعاله
كتله الفعل لهـل الفعـل وانـت الولا تحـلاله

يالمالك افعـال الزلم گتله  جـنت ويــن
لو عندك الجرئه صدك  گابلت الحسين
بس راس الحسين اوخفت لوصوبك اندار
بالشام سمعونه حجي ومشامر احـجار
خويه خويه .. خويه خويه
ـــــــــــــــــــــــــــــــــــــــــــــــــــــــــــــــــ
الخــــادم
محمد المشعلاوي

ردينه من ذاك السبي يا ابا الفضل كوم

#لمولاتي_الزهراء_عليها_السلام


هاي اول ليله وامنه  ابعيده
وهوه لو راح العمر  شيعيده
اليله اول ليله من أغيابج
الله لا ينطيه الدافع بابج
يمه يمه  * يمه يمه
ـــــــــــــــــــــــــــــــــــ
يمه يامحله المسامر    جنه من نكعد سوه
يغار جان اليل منه     والنجم ويه الضوه
جانت اتلمنه عباتج    ومانشم حتئ الهوه
وياسوالفنه الحنينه   الجانت اتنكط دوه

حضنج الدافي الحنين انريده
الراحت امه الدنيه جا شتفيده
واشعمل بينه الدهر بمصابج
الله لا ينطيه الدافع بابج
يمه يمه * يمه يمه
ـــــــــــــــــــــــــــــــــــ
يمه من ساعـة وداعــج   بينه ما هــاد الجـرح
وهوه المفاركله غالي  يموت كل طلعت صبح
الراحت أمه يصير عمره  جـرح والفـرگه ملـح
ومن تنشده الناس عنهه   جـنه مطعـون برمـح

الماتت امه يموت   كون اوياها
ولا يعيش الدنـيه  مـن فرگـاها
يالستر كون الله من احجابج
الله لا ينطيه الدافع بابج
يمه يمه * يمه يمه
ــــــــــــــــــــــــــــــ
يمه صار البيت وحشه  من بعد عطر الورد
نصيح ها يمنه الحنينه  والصدئ ماتت يرد
ومن رجع لينه ابونه   وانتي  ظليتي ابلحد
هنا عرفنه الفرگه شنهي  وانفطر بيهه الچبد

صارت الدنــيه ضلام ابدونــج
واحنه جنه نشوف بيها عيونج
الوحي يسئذن گبل بعـتابــج
الله لاينطيه الدافع بابـــــــج
يمه يمه * يمه يمه
ـــــــــــــــــــــــــــــــــــ
يمه يالزهــــره اليالي   فرهــدت منه العمر
يكسر الخاطر وضعنه  وحتئ بجينه الصبر 
يمه آنه حسين گومي  شكثر ناديت اشكثر
نمتي يانوم العوافي   يمه بس شنهي العذر

ارد امــــوت اويـاج  ما خلــــوني
يمه گومي وامسحي دمع اعيوني
كمت احن واشتم عطرها اثيابج
الله لاينطيه الدافع بابـــــــــج
يمه يمه * يمه يمه
ــــــــــــــــــــــــــــــــــــــــــ
يمه والهيبه ابونه    ذاك ابو حيل الثجيل
بغيبتج يايمه هسه   من الهوه لو مر يميل
ابد ما شفنه بعمرنه     يخلص اليل ابعويل
كسر ضلعج كسر ضهره وأثر ابحيله الرحيل

رد ابونه منكسر احنه شنصير
وسفه المحير الزلم بعدج يحير
رد ابونه وابيه عطر اترابـــــج
الله لا ينطيه الدافع بابــــــــج
يمه يمه  * يمه يمه
ــــــــــــــــــــــــــــــــــــــــــ
محمد المشعلاوي

الله يساعد علي     بيده دفن روحه
مكسور رد الولي    شيضمد اجروحه
  الون والحزن نصيبه
الدافن بديه حبيبه
شيضمد اجروحه
*
بعمره مايرتـــاح ســاعـه   البيده دافــن غالي
بكثر ما يبجي اعله فگده بخــده دمعه يلالي
منين ما يلتفت يلگه  امجانه موحش خـــالي
الجرحه ينزف يبقه سكته  يمـــوت اول تـالي

يخلص حياته بحزن    الفاگد اعز ناسه
ويشيب كد ما يـــون    گلبه قبــل راسه
روحه ويحس غريبه
الدافن بديه حبيبه  شيضمد اجروحه
*
اليشيع اغله ناســــه  هــوه والمـيـت ســـوه
وحيدر الشيع حياته   ودفـن بالضلمه الضوه
فاطـمة وحيـدر سويه   تشاركوا حته الهوه
لو يمر الداي واحـــــد   يصيرله الثـاني دوه

شخصين جانو نعم    بس بگلب واحد
حب الحقيقي انفهم   من عدهم الشاهد
معلعل فگد طبيبه
الدافن بديه حبيبه
شيضمد اجروحه
*
ياعـــلي الله يعينك    حيـن شاهدت الضلع
من شفت اثـــار بيها  شلــون لملمـت الدمــع
الورد بالسندانه ينحط تـرف ما يحـمل صفع
ليش خد الزهره ينطك وبيه اثر جف منطبع

جبريل يطلب أذن   وبيت النبي بيته
الحـاقد يكلهم وأن  الما منعرف صيته
والحادثه عجيبه
الدافن بديه حبيبه
شيضمد اجروحه
*
الميت احبابه التجهــزه  وناسه اليغسلونه
وحيدر مغسل الزجــيه  بمـاي دمــع اعيونه  
وشيعاها بليل ضلمه  يخشئ الي يضدونه
عمداً اخفه الگـــبر عنهم   يعرف اينبشونه

يعرف طبعهم غدر   الهجموا علئ بابه
لذالك اخفه القبر    عن نهش الذيــابه
ماتبرد المصيبه
الدافن بديه حبيبه  شيضمد اجروحه
*
حگه من يحتــار حـيدر   شكد جبير امصـابه
منين ما يلتفت شـافه يسيل دم احبــــــابــه
طاح قربان اوضحيـه  المحسن اعله اعتـابـه
والضلـع قـــربـان ثاني  حـــين دفعو بـــابــه

لوما وصيت النبي    حيدر يسل سيفه
جا ماهجم ناصبي    وبيده اخذ حيفه
جا ثاره بيده يجيبه
الدافن بديه حبيبه   شيضمد اجروحه
*
***
محمد المشعلاوي
تمت بعون الزهراء ع

أمنيتي ازورج  يالزجـــيه
باليالي الفاطــــــــــــــــميه
وأقرئ جراحـــــــــات وألم
وانعه السبي وحرگ الخيم
يالزجـــــــيه ... يالزجــــــــيه
ـــــــــــــــــــــــــــــــــــــــــــــــ
حسره بگلوب الخدم يالزهره هايه
أمنيـة الخــادم يــزورج كــل روايه
وكـــون يتعنه مشـي وشايله رايه
بيها مكتوب أعلموا الزهراء  أيــه

انزلها الرحمـن من عالي السماء
بــ أي ذنبًٌ قُتلت خَـــيرَ النـــساء

أمنيتي بعتابج  اطـــــــوف
وأقرئ ابيات الطفـــــــــوف
وانقلج أهــــــــــات الخـدم
وانعه السبي وحرگ الخيم
يالزجـــــــيه ... يالزجــــــــيه
ـــــــــــــــــــــــــــــــــــــــــ
كون اجيلج يمّ حسن جيت زيــــاره
وتضوي مـن ابعيد اشوفنها المنـــاره
ونقرئ بالمقتل ابصحنج والغيـــــاره
تزود ماتطفه ابگلبهم هــل حــــــراره

حـــرارةً فــي قلبنا لاتنطــــفي
حــتئ ظهورَ قبـــركِ المختـفي

يمته احس هاذه الشعـــور
وبضريــحـــج كـــون ازور
وتعـنه الــج حـافــي الجـدم
وأنعه السبي وحــرگ الخيم
يالزجـــــــيه ... يالزجــــــــيه
ـــــــــــــــــــــــــــــــــــــــــــــ
من نزور حسين مشياً باربعينه
تتجه كـون المــواكـب  للمديـنه
قافلة عشـاق فـاطم تحدي بينه
لمن نوصل گبت الزهره الحزينه

قُبَتٌ يسطّع بها  كـــلَ الحُــزن
تحتها نلعنُ مــــنْ قــــــالَ وأن 

يمته يتحــقــق حلمنه
وكبرج يلم كل شملنه
وياريت كل دمعه بسهم
وانعه السبي وحرگ الخيـم
يالزجـــــــيه ... يالزجــــــــيه
ــــــــــــــــــــــــــــــــــــــــــــــــــ
حلمي يمته يـصير يالزهره  حــقيـقه
كــون كـبرج ينعـرف واضـح طريــقه
اوذهب كبتــج بالضـلام ايشـع بريـقه
والبصدره اهمـوم تـنـزاح ابدقيــــــقه

كُل ضيقٌ سوفَ يذهب عندها
الم نشـــــــرح لك صدرك انـها

عَـبـره اسمــج  بالمجــالس
واحنه خـــدامــج عــوابس
انــتي أهـم أمــن الاهـــــم 
وانعه السبي وحرگ الخيم
يالزجـــــــيه ... يالزجــــــــيه
ـــــــــــــــــــــــــــــــــــــــــــــــــــ
المنتظـر ايـامه نعـــــرف مـو بعيـده
بثـارج يعـجــــل يمـــولاتي نـــريـده
يسل سيفه اعله الكفر نسل الصميده
وزود خدامج فخـــــر روح العقيـــده

لهفي لثأر الاضلاع والقلب ناري
متئ نزور الزهراء  هاذا شعاري

روحي مشتـاكه الحظرتج
تنشمل كــون يرحـــمتج
بأسمج احــس جـرحي الچـم
وانعه السبي وحرك الخيــم
يالزجــــــيه ... يالزجــــــــيه
ـــــــــــــــــــــــــــــــــــــــــــــــــــــــــــ
محمد المشعلاوي

#ميمر

يالله بعزم .. خل نحتزم
المجلس فخر بي نلتزم
ننصب عزانه ابهل يوم  وي امّ الحسن عالهادي

***
يالتسمع الصــــوت احـــتزم ويانه
بيت المأتـــم شــــــرعت بيــــــبانه
المجلس حسيني اوفاطمي عنوانه
لتشغلك الدنيـــه تـــره خلصـــــانه

فاز الخِــدّم .. ويــه الخَــدّم
ماينحسب عمـــــره عــــــدم
يتميز ابين الناس كلمن حُسين اينادي
***
ابكل مجلس أيصير ام حسن تتبـاهه
تشوف اليحبها اويبجي دوم اويـاهه
صـح فـاطـمه ابمجلسنه ما شفنــاهه
لاجــن يقين ابكـل عــــزه تلگــــــاهه

تشـوف اليجي .. والمــــايجي
واتسجـــــل ادمـــــوع البجـي
ارضي البتول الزهراء  وخلي اليعادي إيعادي
***
حـب اليحب ال النبـي والزهــــره
بيهم صفت هـاي الارض مبتشـره
فـــاز ابحياته الفوض الهم أمـــره
لاخــــر نفـــس منـهم ولا نتبــــره

همه العشك .. وهل الصدك
والهــم فقــط گلبــــي يدك
اعله الدنيه بس همه أسياد وانه افتخـر بأسيادي
***
الرايد نجـــاته امن الزمن يدنـاهم
كلمن يحبهم ينحـــــــشر  ويـــاهم
رب البشـــر فوك البشــــر عـــلاهم
مكتوبه فوك اعله العرش اسمـاهم

حبهم فرض .. اعله اهل الارض
و اهل السماء طــــــول ابعرض
والما يحب اهل البيت لايدنه شربي وزادي
***
الينكــــر فضلهم عالبشــر ماريـده
يبين الاحق والمفتري ابجف أيـده
هـوه العمر مــــره اوبعد شيعيـده
شنفعه اليصوم اوما يعرف ابعيده
لو من هلي .. وينكر علي
لانـــه اله ولاهـــــــوه الي
ماعندي غيــــر الكــــــرار ينفــعنــي أبميعــادي

***
الله الرزقنـي بنعـمـته اوســــواني 
الدرب الحـــقيـقه والصدك جاباني
بعشك المجالس ياخــــلك ربــــاني
بس ربع الحسين الخـدم صحباني

بيــه أشكثر .. خدمـه وأجـر
الحـــمــــدُ لله والشـــــــكـر
بالذر عشكت اهل البيت  واكتملت ابميلادي
ـــــــــــــــــــــــــــــــــ
محمد رحيم المشعلاوي

للشاعر المبدع محمد المشعلاوي
بصوت ستار الصالحي

مولاي السجاد في استشهاد مولاتي زينب عليهم السلام
ـــــــــــــــــــــــــــــ
ماتــــــت زيــــنب  وانـــه بحـــــيره
بديـــرة غـــــربه    وشـحــة غـــيره 
محـــد حـــاضر     من اخـــوتــــــها
ولا واحـــــــد شـــال   اجـــنازتـــها
بديرة غربه وشحة غيره
ــــــــــــــــــــــــ
يهل الشام  شسوت  زينب
من ماتت  هيج  اتضلموها
من طبت  ليكم  مسبيه
بحجار  الناس  اتلكوها
ودارت  دنيانه  وهم ردت
تسكن  بالشام  يريدوها
ماتت مقهوره  اعله  اخوتها
الرادتهم  همه  ايشيعوها

زينب هاي .. رسمت بالعفه أجمل صوره
زينب هاي .. بقرأن الطف أعظم ســــوره
زينب هاي .. شمس الله بأرضه المعموره

البيديها احبال  اومجتوفه
اعرف بيكم  خلت خـــــوفه
ماتت بالشــــــــــام  أبحــــــسرتها
ولا واحد شـــــــال أجــــــنازتها
بديرة غـــربه وشحت غيره
ــــــــــــــــــــــــ
آه يالشـام مشيب گلـبي
اشجم موقف وي زينب خَله
بأسواگ يفــــرون الخـدّر
هاذا المــوقـف أكـــــبر علّه
ماشافت ضلهن كـــــاع الله
ينظرهـــن صار البـيه خلّه
عيون الوادم مارحـــمتهن
والتكتل نظــــــرات الذلّه

أهل الشام ..  أبســـوك الخدّام انطبيـنه
أهل الشام .. أبحـــقاد أينظرون اعليـنه
أهل الشام .. الرايـح والراد  أيسب بينه

يالما بيـكم غيــره ورحــمه
بينه اشخليتو اشجم لچمه
عميـــه اعيــوني اولاشــافتــــها
ولا واحـــد شـــــال أجـــنازتـها
بديرة غربه وشحـة غيــــره
ــــــــــــــــــــــــ
ما عدهم موقف ويــانه
ولا بيهم واحد رف گلبه
عاميهم حب هاي الدنيه
محد منهم يعـــــرف ربه
اخ الشام شسوه بزينب
عيشها اوموتها بغــــربه
بموكب جانت لمن تطلع
وحشه أجنازتها اشكد صعبه

هظمه اشلون .. ما عدها اخوان أيشيعون
هظمه اشلون .. يمها اهل الشام يضحكون
هظمه اشلون .. أبماي التغسيل ايسومون

الطـــف أبجـــفه والأيــــتام
العــــذب زيــنب جرح الشام
أتمنـــــت عبـــــــاس أبســــــاعتها
ولا واحـــد شــــــــال أجــــــنازتها
بديـــرة غــربه وشحــة غيــره
ــــــــــــــــــــــــ
متعوده اعله حسين أتشوفه
ومايـــبعد عنـــها اولا لحضه
بس بالعاشــر زينب شــــافت 
صدر احسين الخـــيل اترضه 
وادم شرايــت دم جـــــــانت
ماخــــــلـوه يكــمـــل فـرضه
طـــاح أو هجمو كلهم  صوبه
مسابگ ياهو ابراسه اليحضه

ضل ابوحده .. وكلهم ركضوله يذبحـــونه
ضل ابوحده .. اعله الكاع يطيح ايتانونه
ضل ابوحده .. والزيــنب دارها اعيـــــونه

بنحـــره المختار  أشكد بـــــاسه
اللهُ اكـــــــــــبر   ذبحـــو راســـه
ذبحــــة راســــه  اشكد ذبحــــتها
ولا واحـــــد شــــــال أجــــــنازتها
بديـــــرة غربه وشحـــة غيـــره
ــــــــــــــــــــــــ
جم موقف بالطف شاهدتي
الله يســـاعد گلبــج عـمه
شفتي حسين وحزة نحره
والحـــافر متحـــني بدمه
التمو فوگــه وسلبو ثوبه
وكطعو خنصر أيده ابهمه
دخـان اخيمنه الحرگوها
بعده بثوبج جاي اشتمه

لا ما طاب .. من الســــــوط امورم متنج
لا ما طاب .. ابمجلسهم من سـألو عنــــج
لا ما طاب .. جــــرح الماخذ روحج منج

الله يعيــــــنج  شفتي اشكــال
من الطف ميته  وبيــج أشضـال
ليهسـه أثــــــــــار أبــــــوجنـــــــتها
ولا واحــــــد شــــــال أجــــــنازتها
بديرة غربه وشحة غيره
ــــــــــــــــــــــــ

محمد المشعلاوي

ضل ابحيرتك ما تلكه الها اجواب
علي محد يعرفه يعرفه بس الله

علي فاتت صلاته وگال بسم الله
رد الشمس بيده وگـــــــــام صلّه

#متباركين_بولادة_أمير_المؤمنين

#ياعلي_مدد

يقول الامام زين العابدين (صلوات الله عليه) :
كسرت خاطري عمتي زينب رأيتها تلتفت يميناً وشمالاً كأنها تنتظر قدوم احد ....💔

#ميمر
أستشهاد الامام موسئ ابن جعفر الكاظم عليه السلام
ــــــــــــــ

يابــــو الرضــا  فــــاز الحضــا
وبمـحـبــتـك   نــــــال الرضـــا

كل شيعـتك هاذا اليوم لمصيبتك حزنانه
ـــــــــــــــــــــــــــ 
هـــاي الملاين الأجت يــم بابك
سجدة شكر لله اسجدت بعتابك
وين اليضدك خل يشوف احبابك
أبنص الگلب چادر حزن لمصابك

بالسم هـــوه ـــ وچبدك روه
وسفه انطفه ـــ سابــع ضوه

الگالو غريــب ابغداد  صار الاسد عنـوانه
  ـــــــــــــــــــــــــــ
گالو غريب اومارضينه ابهايه
اتعنينه يمك سيدي مشــــايه
هاك العهـد يامنبع الـوفــــايه
لا مانعوفك لا تضنه احجـايه

يالما تـــرد ــ جــفه اليمـــد
اليطلب حجر ــ تنطي ورد

باب المراد المايوم خــاب اليدك بيبــــانه
ــــــــــــــــــــــــ  
انتـه الطبيـب الينوصـف للفقـــره
كشفيته دمعه اعله الضعن لوعبره
طاب اليحلفك بالضلـــع والزهــره
الرايد صبر منك اخـــذ كل صبره

تنطــي اليجــي ـــ حــگ البـچـي
ما ينحـــمل  ـــ أشصعبه الحـچي

تنطي اليحلفك بحسين گبل الحجي من السانه
ــــــــــــــــــــــــ
تقارن قضيتك ويه عمتك زينب
بطاموره گالو وبسجودك تنحب
نفس الحبل والگيد بس ما تنسب
وعمتك شتم واصياح لمن تتعب 

زينـب صعب ــ بيــن الغرب
خـدر السـمه ــ مو للضـرب

ذلت يزيـد أبجلمات  بنص مجلسه أوديــوانه
ــــــــــــــــــــــــ  
اكبـر جروحك هــوه جـان العـــاشر
حــيره بمصيبة كـربــــله شكد حاير
من تذكر ابيوم الطفــــوف اشصاير
وتســمع أضلوع اتكســـرت بالحافر

تنسـه السجـن ـــ تبجـي اوتـون
والكـــربـــله ـــ گلبــك يحــــــن

تسمع اصريخ الاطفـــال  اخ العطش اذانـه
ــــــــــــــــــــــــ
 
محمد المشعلاوي

حلّت الأفراح في قلوب المؤمنين 💐 بولادة الأقمار العلويّة💐

#متباركين🤎🕊
بولادة سيد شباب الجنة
المولى اباعبدالله الحُسيِٰٓنٌ

الشهر الوحيد الذي لا
يتخلله شهادة للائمة
هو شهر شعبان..
والشهر الوحيد الذي لا يتخلله
ولادة هو شهر محرم..
هذا يعني أن الحُسين
عليه السلام هو ..
محور السعادة والحزن ❤️‍🩹.