يوم التعنه اعله النهر
زينب تخاف امن الخطر
صاحتله يا خويه الگمر
ماريــد الـمـاي  ــــ  بس رد اويــــاي
ـــــــــــــــــــــــــــ
نادت زيـنب العبــاس   وجــان الصوت بالعبره
توك خويه جنت اوياي  هـسه افراگـك اشكبره
الك مشتاكه انه اهواي  وحك أحسينك اوصبره
من شافك رحت للحيـن  اخـيك مـا تـرك ضهره

اخوك احسين بعدك حـاله متغير
من ساعـة وداعك بعــده  متحير
متخوصر او كض الضهر
وعيونه تربي اعله النهر
ومبيـن ابـ وجـهه القـهر
ما ريد المـاي    بس رد اوياي
ـــــــــــــــــــــــــــ
رحـت ما فكـرت عباس    غيـرك منهو كفـالي
وانه المال اعوفك دوم   ماجانت تـــره ابـالي
من لحظة وداعك ذيج  مدري شصاير ابحالي
اوياي الفرگه موش اولام  سهم الفرگه جتالي

الهجر بعدك اخذ من عدي عافيتي
اخــت عبـاس انـه وهــايه تاليـتي
عيون الغـرب تنظر الي
يدروني زينب بت علي
بالطف بقيـت ابلا ولي
ماريد الماي ـــ بس رد وياي
ـــــــــــــــــــــــــــ
من گالولي طـاح الـواك   طحـت گـامو يتجولي
رت اطلـع ولاجـن عيب   تشوف عيونهم طولي
حركوها الخيم  عـباس   افــــزعمن يطفـــــولي
محصول العمر خــوان    جــا ويـنك يمحصولي

ضـاع ابكربله كـل تـعبي و سنيني
حـرمه الوحـدي جـا ياهو يحميني
ضاع التعب ضـــاع العمر
والهيـبه راحت  والخــدر
يتمرجــل اعليـــه الشمر
ماريــد المـــــاي ــ بس رد وياي
ـــــــــــــــــــــــــــ
يم باب الخيم ضليت    ابجـي وانته مو  يمي
مو همي تجيب الماي    بس ترجع فقط همي
أموت ابدونك وماعيش  انته الاغله من دمي
انسه الروح لوذكروك    يمك انسه حته اسمي

ارجـع يابو فاضـل هالصبر طــال
هوه الراح اخـوه المن بعد ضــال
الماعنده اخو يعيش بغرب
فاركتك او حـالـي صعب
والشيب خظــر بالگلب
ماريد الماي ـــ بس رد اوياي
ـــــــــــــــــــــــــــ
وينك يابو فاضل ليش  اصيح و ما تجـاوبني
وانه الما اعرفك هيج   يغالي أدريبك أتحبني
جبتني ابهيبتك وحماك   بعـدك ياهـو اليردني
لا تـتخـر انـه ارجـــوك    رد  اولا تعــــــذبـني

يكافل خـدر اخـيتك بالله حاجـيني
جبتني من اهلي بس ياهو اليوديني
محتاره بيتام وضعـن
ياهو اليرد بيه للوطن
والتمن اعلــيه المحن
ما ريد الماي ــــ بس رد اوياي
ـــــــــــــــــــــــــــ
طريت الجـثث والخـيل   ونـار امجلبه بذيالي
من أعثرت بيـن الـناس   عرفـو فاركـت غـالي
ماخليتي اليه اخـــوان    شعندج كربله وتـالي
بعدهم عمري جا شيفيد  ميته اوياهم اشوالي

اعثرت ببني وجـزيته شايطه اتعثر
أدور عـن كفيلي وجـسمه المـطـشر
أركض أوما أدري الجدم
بيه مستقر جـمر الخـيم
كالولي بعيــــونك سـهم
ماريـد الـمـــاي ـــ بس رد اوياي
ـــــــــــــــــــــــــــ
محمد المشعلاوي

أرجع يالغالي أشتاگينه
والـوَن أعيونك حنينه
ارجــع ماردناه الـمــاي  فدوه الطولك يالوفاي
يالماي اعيونك يروينه
ــــــــــــــــــــــــــــــــــــــــــــــــــــــــــــــــ
ننتظرك اباب الخيم     ترجـع بذيـج اطيفوك
ياماي وبكصتك بحر    يرّوي البحر بجفوفك
الماي سر گالـو نعـم    بس انته سره انشوفك
يالخيرك معيش النهر  ضل يجري من معروفك

  يا سرّ المـاي أوتكوينه
الشط أجفوفك جرفينه
جودك اكثر منه أهواي .. فدوه لطولك يالوفاي
يالماي اعيونك يروينه
ـــــــــــــــــــــــــــــــــــــــــــــــــــــــــــــــــــــــ
يافَينه من ذيج الشمس   ياشجـره وتثمر عشكَ
عبـاس لا تـبـعـد عـلَــي   روحـي بغيابك تحتركَ
دگــات گـلبي اتـوقـفت   الـه بوجـدك مــن تـدكَ
يالعـايش ابريـتي هـوَه   لو ماتـرد تـدري اختنكَ

انته عذيبي يمر بريتي
يالبيدك صارت عافيتي
يمته اعيوني تشوفك جاي فدوه لطولك يالوفاي
يالماي اعيونك يروينه
ــــــــــــــــــــــــــــــــــــــــــــــــــــــــــــــــــــــــ
يم الخـيم صوتك وصـل  ادركني صـار الصايـح
حسين انتفض مثل الأسد  گالوله اخوك الطايح
شايب رجع من شاهدك  مخضب وادمك سايح
عباس شو تالي الـعمـر   عـايف حسين اورايـح

حسينك يتنخاك اتگـوم
ما حسبنه الفــرگه بيوم
كوم بحيلك رد اوياي .. فدوه الطولك يالوفاي
يالماي اعيونك يروينه
ـــــــــــــــــــــــــــــــــــــــــــــــــــــــــــــــــــــــ
يالطايح ابصف النهر    وعلينه تربي أعيونك
يامـن يوصلني الك  خويه ارد اشوف شلونك
طعنات بيك من الضهر  انه اعـرف يغدرونك
حـكـهـم يطعنـونك غــدر  ماكدرو  يلاگــونك

يالي مخوف وجه الكاع
طايح وسفه وطولك ضاع
طولك جان مخوف أعداي..فدوه لطولك يالوفاي
يالماي اعيونك يروينه
ـــــــــــــــــــــــــــــــــــــــــــــــــــــــــــــــــــــــ
متانيتك اعيـون اهـواي   يمته تــرد يالغــالي
انـتـه الگـمـر وآنــه اليل   اظلـم بدونـك حـالي
الكون اظلم وموحش صار فاهي ومجانك خالي
ماجـنت أضـن ياعبـاس   والفـرگـه ماهي ابـالي

اليل ابدونك ضلمه يصير
واحنه بدونك راح نحير
عباس اكعد نور اسماي .. فدوه الطولك يالوفاي
يالماي عيونك يروينه
ــــــــــــــــــــــــــــــــــــــــــــــــــــــــــــــــــــــــ
محمد رحيم المشعلاوي

جاسم يالغالي     عايفني الحالي
  بعدك يوليدي      لوميته أشـوالي  
ـــــــــــــــــــــــــــ
جسام الفرح من بالي شلته
ويايمه الحـزن بعدك عرفته
عاشرت الدمع عشرة بواچي
ورسمك يالولد بعيوني شفته

يمزود نوحـي      يالعايف روحـي
يالساكن عيني       وطولك يحلالي
ـــــــــــــــــــــــــــ
ياكشخة سلف طولك يهيبه
شيخ ابهل عمر كالو عجيبه
ياورث الكـرم  يبن الاكـارم
يالعينك وطـن وأمك غريبه

ياماي اعيوني         ترضه يذلوني
من بعد أعيونك        شيصير ابحالي
ـــــــــــــــــــــــــــ
يمحلي الخظر  يمه بلبسهن
من بعدك منو گلي اليمسهن
ياشيخ وشهم هيبة خواتك
بعدك جامنو يمه الحرسهن

نور الله عيونك   ليش يذبحونك
ضلينه بـهيـمه     بعدك يالـــوالــي
ـــــــــــــــــــــــــــ
يافرحـة عـرس  مادامت النه
عـريس الدمه  صارتله حــنه
ماحركو شمع حركولك اخيام
ومات بغيبتك  يايـمـه أمـلنـه

ذبحـو كل ناسك     من ذبحـو راسك
ميت وانـه ابقه     ماجـان ابــــالي
ـــــــــــــــــــــــــــ
تمنيتك تضل  في اعله روحي
واسمك من يمر يشفي جروحي
ياتالي العمر  ماضلي كل حيل
رايح حيلي يبني وضلي نوحي

ياهـو يتجيلي      رايـح كل حيلي
ياحلم اسنيني     راسك يـبرالـي
ـــــــــــــــــــــــــــ
رتك للزمن مـن اكبر اويــــاي
شو تالي طحت ماشارب الماي
ما حس بالنفس عگبك يجسام
يانسمة هـوه  ياشـمة أهـواي

خـانگـني افراگـك    يادمـع اشواگك
ياعطـر الـجـنه    شو عفتك تــالي
ـــــــــــــــــــــــــــ
محمد المشعلاوي

الئ مولاي مسلم ابن عقيل عليه السلام
#رسالة_مسلم


رساله امن القصر خطت عناوين
من مسلم سفير حسين لحسين

علَي منعوها حتئ شربت الماي
أرجع ياحسين المـن بعد جــاي
رساله امن القصر خطت عناوين
ـــــــــــــــــــــــــــــــــــــــــــــــــــ
مسلم بالقصر وينادي يحسين 
رد ولا تجيهم
الكوفه محيله وعاشت ابوجهين
خانوك بحجيهم
ذوله اهل الرسايل شوفت العين
محد باقي بيهم
بس عدهم مره تسوالها الفين
شيخه تحكَ عليهم

طوعـه المؤمنه الوالت الكرار
بعدهه امحزمه ضد هاي الاشرار
هاي الكوفه ماضل بيـها وفاي
أرجع ياحسين المن بعد جـاي
رساله امن القصر خطت عناوين
ـــــــــــــــــــــــــــــــــــــــــــــــــــــ
رساله من القصر عنوانها يكول 
ماعدهم أمانه
ابن ازياد عدهم صار  مسـؤول
ارجع ياحمانه
مابيهم كفوها يغير ويصول
بس بيهم خيانه
خاف الدرب متعب باجـر يطول
وشتلاگي ابمجانه

تلاگي اسيوفهم ماعدها خطار
الباعو جنـة الله لأجـــــل ديـنار
واحدهم تخربط ماله كل راي
أرجـع ياحسين المن بعد جاي
رساله امن القصر خطت عناوين
ـــــــــــــــــــــــــــــــــــــــــــــــــــــ
أذا تسـمع ندائـي قـبل لامــوت
عاود للمدينه
رد لهلك وفــرح ذيــج البيوت
المن عگبك حزينه
هاي الكوفه بس جنها بطن حوت
مو أمـة نبينه
صوت من الگلب لحسين هالصوت
رد سالم ولينه

تره امتانينك او حدوها السيوف
وأعليـك الفرق والجيش مصفوف
رد انـته بعيالك فــدوه مــولاي
أرجع ياحسين المـن بعد جــاي
رساله امن القصر خطت عناوين
ــــــــــــــــــــــــــــــــــــــــــــــــــــ
امرهم بيه غرابه اوما يوافون
وما عدهم معاهد
امس ستطعش الف اوياي يمشون
هسه ولاكو واحد
حي اعله الجهاد وهلا يصيحون
تالي ولا مجاهد
كلمن ناصراني اعليه يحكمون
جثيرات المشاهد

حرت شذكرلك وشحجيلك اهواي
عليه اتكاثـرو بس هانـي ويـــــاي
منو يوصل الرساله حسين الك هاي
ارجــع ياحسين المن بعد جاي
رساله من القصر خطت عناوين
ـــــــــــــــــــــــــــ
سلامي البني هاشم رفعة الراس
وحيود البساله
ولبو فاظل الغالي الكمر عباس
راعيها الكفاله
سلام اعله الحسين اباخر انفاس
وي ختم الرساله
اذه بالموت يحيئ الدين للناس
ميتين ابداله

اذه بالموت نحيي شرع الاسلام
بني هاشم كفوها وكلهم أزلام
نموت احنه ابدالك يضي عينـاي
ارجـع ياحـسين المـن بعد جــاي
رساله من القصر خطت عناوين
ــــــــــــــــــــــــــــــــــــــــــــــــــــــ
محمد المشعلاوي

الـمـاي اريـده يالگـمر صـاحـت سُكيَنه
انـتفظ عـمهـا واحـتزم يعصرها عـينه
شربي يعمي من العـين
فدوه الج يابت حسين…يعصرها عينه
ــــــــــــــــــــــــــــــــــــــــــــــــــــــــــــــــــــ
طلبي يعمي وكل طلب يصعب تشـوفيه
يسهـل علـيه والـوعـد ياعـمـي اوافـيـه
الماي عندي شي سهل بس خـزره كافـيه
ما يســوه اطلعله جُهد والـ الله خــافـيه

اي طلب كولي شتردين ياعمي حاضر
هوايه عليه رمشت عين ماعندي باجر
عمج واطلبي شتردين
فدوه الج يابت حسين…يعصرها عينه
ــــــــــــــــــــــــــــــــــــــــــــــــــــــــــــــــــــ
ياعمـي خـادم آنـه الـج ما يصعـب الـمـاي
بس لازم أهوه الي يجي يم حضرتج هاي
ويـكلـج آسـف و اعـتـذر متـئخـر أهــواي
شـانج جـبير انـتي تـره بس هـوه لشـواي

من فاطمه وأشــرف نسـَل يابت الاكرام
وجدج محـمدنا وعلي اشــراف الاسلام
اهلج اساس اهل الديـن
فـدوه الج يابت حـسين … يعصرها عينه
ــــــــــــــــــــــــــــــــــــــــــــــــــــــــــــــــــــ
انتي امـيـره اعله النسـه بالطف شفتـها
بالقـيس فدوه اتروح الج هيه وعرشـها
انـتي وريـثة فاطــمه او هيــه نـفســها
وانـتي يالـكلــج فــرض يـالـقـدستــــها

يابت الحـسين او علـي انتـي أميـره
وبالقيس هيـه والعـرش يمج زغيـره
من هيه بالقيس منين
فدوه الج يابت حسين … يعصرها عينه
ــــــــــــــــــــــــــــــــــــــــــــــــــــــــــــــــــــ
بنت الاميـر انتـي وفقط بيدج تأشــرين
الماي اليجيج الخيمتج وانتي التئمـرين
عمـج غيـور وهـاشـمي بـفعـاله تدريــن
لـو مـا يجــيلـج بالنهــر لا لاتـعــذريـــن

اليعرضلي يم ماي النهر بالجربه اخليه
والينضر اعليه بطرف بعيني اسحك عليه
اسحك زلمهم صوبين
فدوه الج يابت حسين… يعصرها عينه
ــــــــــــــــــــــــــــــــــــــــــــــــــــــــــــــــــــ
اتونس آنـه اعله الحرب من زغري نبراس
وارث شجـاعه من علي وتـسـمه عـبــاس
من زغري سبـع الگنطره تشهد تره النـاس
منطي العهد لحسين انه حدكطعت الراس

ما اهتم العـده وعدد لا والدحــه الباب
والســيف ما يلحـك ابد من حز الارگاب
طلبي انتي اشتـتمنين
فدوه الج يابت حسين… يعصرها عينه
ــــــــــــــــــــــــــــــــــــــــــــــــــــــــــــــــــــ
مـنـك يـعـمـي ونعـــم للغـيـره راعــــي
يالخلصت عمرك فقـط بس النه ساعـــي
كل هل جيوش بخزرتك ما الـهـا داعـــي
لـو حــل عليـهم غضـبك ماتو جــماعــي

ساقي العطاشه ونعميـن بدر العشيــره
فضلك ابد ما ينقـــــاس روحك جبيره
مثلك ولا يحصل ويـن
فدوه الج يابت حسين… يعصرها عينه
ــــــــــــــــــــــــــــــــــــــــــــــــــــــــــــــــــــ
الخـــادم: محمد رحيم المشعلاوي

#نزله
لمولاي اباالفضل العباس

رايح انـه عالجيش وارد اشفي غليلي
وارجع شــايل المـاي ياخـويه بشليلي

الحـومه زغيـره .. وزينب جبيـره
    اخو زيـــنب .. اخو زيــنب
 ــــــــــــــــــ ❃ ❃ ❃ ــــــــــــــــ 
يختي رمشت عين رايح هسه راجع
راح جـيب المـــاي بيـدي للمضاجــع
واله خلي الجـيش يم الجربه راكــع
خـل يسمعني الجـهلنـي لـو مسامـع

فارس آل عدنان وحسيني أطيعه
لو تملكلي دنيـاي ما اكـدر أبيـــعه
حسيني هوه ديره .. وزينب جبيره
     اخـــو زيــنب ..اخـــو زيــنب
 ــــــــــــــــــ ❃ ❃ ❃ ــــــــــــــــ
بگلبي انه احساس عالي وغيره شايل
الهـوه لو مر اعله زيـنب عنـدي عـايـل
جــــبل انــه وهم سمعتو جبــل مـايل
والنسب معـروف هيــبه بالحــمـــايـل

هاشم بالوغه احيود معروفه واصيله
وفازع ليكم اليوم من ارجال الثجيله
     شيخ العشيره .. وزينب جبيره
     اخــو زيــنب .. اخـــو زيــنب
 ــــــــــــــــــ ❃ ❃ ❃ ــــــــــــــــ
گلبي حس بعطش زينب عندي احساس
وصحت زينب خويه ابشـري انـه عباس
الـه اجيـب النهـر ليــج اگبــال هـالنـاس
ولو رفـض يخـتي يجـيلـج الـه يـنداس

الشط ما يضل غاد للخيـمه ارد اجيبه
ماي الشط يجي اهنا لعيــون الحبيبه
ويمشي بمسيره .. وزينب جبيـره
اخــو زيــنب .. اخـــو زيـــنب
 ــــــــــــــــــ ❃ ❃ ❃ ــــــــــــــــ
ما اهـم لاجـيـوش انــه وانـتي تـدريـن
دارس افـنــون المـعـارك بـــدر وحـنـين
فـارس وسبـع الكنـاطـر واخـو الحسـين
بخزره وحده الجيش هسه يصير نصين

بعيني اظرب اسهــام للـرايد يـقــاتل
الخدرج انه حمــاي من زغري مقاتل
فعالي جثيــره .. وزينب جبيـره
   اخـــو زينب .. اخــو زينب
 ــــــــــــــــــ ❃ ❃ ❃ ــــــــــــــــ
آنـه ملك المـوت نازل هيئـتي هـــاي
حـتئ عـزرائــــيل  تـايـه مـنـه الـراي
كالي اوكف يابوفاضل صارو اهـواي
خل اجيب املاك تحسب موته وياي

يحـسب يخطأ ويعيد ما يلحـك عليه
احضن بيهم احضون واشمرهم بديه
  لعيون الاميــره .. وزيـــنب جبيره
    اخــــو زيــنب .. اخـــو زينب
ــــــــــــــــــ ❃ ❃ ❃ ــــــــــــــــ
آنه نـــازل عالمـعـارئ بيمنـتـي سـيف
حروره بـيه ونار تلهب تجوي الصيف
حطب راح اشعلهم انه واكرم الضيف
ما أجــامل انه بيــهم واخـذ الحيــف

وينه الكال انه فلان خل يبرزلي وينه
رايح آنـه للـمـاي خــل يحسب سنينه
سنينه الاخيره .. وزيــنب جبيره
   أخــو زيـنب .. أخــو زيـنب
ــــــــــــــــــ ❃ ❃ ❃ ــــــــــــــــ
الخادم :محمد رحيم المشعلاوي

@Mohammed_almassl

#قصيدة_عزاء_العرش


عزائك بالعرش منصوب يحسين
المــلائك والرسـل كلهم مُعـــزين
عشره بشهر عاشور    ينزل موكب النور
الملائك والرسل كلهم مُعزين
ـــــــــــــــــــــــــــ
هليله كل اهل السمه  شدو حزم لمصابك
أخذو اذن رب العرش  ينزلون يم اعتابك
أشرف بقاع بهل ارض كربله وريح اترابك
ونزلو يلطمون بهظم شعث وغبر يم بابك

أجـت كــل الملائك يمك أتـنوح
وتنادي ياحسين المات مذبوح
الك كل لحظه منذور  ينزل موكب النور
الملائك والرسل كلهم مُعـزين
ـــــــــــــــــــــــــــ
كل الملائك والرســل يحسين الك حـزنانه
ربك عرض الهم جزء امن امصيبتك مولانه
طاحو جزع باول نظـر  كلمن وكـع بمجـانه
أشكد عظيمه أمصيبتك يالعيلتك عطشانه
جرحك بعده بيهم لسه ما طاب 
شابت روسهم من هول المصاب
كل ما ذكرك يدور  ينزل موكب النور
الملائك والرسـل كلهم مُعــزين
ـــــــــــــــــــــــــــ
حته الحوارين اجو يخدمون وسط الحظره
ينادون يا أم الحـسن  منـج أنـريـد النظـره 
  اهل السمه كلهم أجو شالو الرايه الخظره
خطو شعار او للأبد  ما ننسه أبـن الزهــره

أهــل الجــنه أجو كلهم منـــاديـن
أجيـنه بخدمتك يحسين يحسين
أنس وجان والحور  ينزل موكب النور
الملائك والرسل كلهم مُعزين
ـــــــــــــــــــــــــــ
نصبو مواكب بالسمه  مـن العـرش حـد گبرك
وكـل موكب مثوب نهـر مـن الجـنان الصـبرك
وخطولك ابسابع سمه حسين الوفه بدم نحرك
شكـراً حُـسين من العرش  رب العبـاد يخـبرك

درب الحج تغيـر صوب الطفوف
أجت كل الخلك يم گبرك أطـوف
كلمن رايد يزور    ينزل موكب النور
الملائك والرسـل كلهم مُعزيـن
ـــــــــــــــــــــــــــ
الـ بالذر بعدهم سيدي والـ بالمهد مجنونك
اهل الارض واهل السمه والماتو يخدمونك
شيب وشباب اتحزمو  بس رادو يوافونك
الارض والفوك الارض كلشي صبح ممنونك

الميت والعدل و التوه مخلوگ
يخدم للحسين بلهفه وابشوگ
كـون انقدم انحـور  ينزل موكب النـور
الملائك والرسـل كلهم مُـعزيـن
ـــــــــــــــــــــــــــ
محمد المشعلاوي

ملامح هيبتك وي ريحتك جنهه الحسن
يالمزعل الهوه حتئ الضوه لطولك حزن
يشيــخ المرجله .. يكشـخة كربله

يجاسم يمه تكوه يكشاخ وشهم
شحلاتك بالحرايب يهيبة هالزلم
يفرحة عمري انته يمفتاح العزم

يجاسم زفتك لارض الحرب مو للخيم
ميادين الكفو لهل الكفو يابــو الشيم
جبيره المنزله .. يكشخة كربله
ـــــــــــــــــــــ
يكشخة هالمضايف يبن ذاك الكريم
رحت للحومه يمه وبقه عشكك يتيم
ياوارث هالشجاعه يبو العقل الحليم

بقيت انثر دمع فوك الشمع دمعة عرس
الك روحي اشكثر نذرت نذر يمه امس
ييو جلمة هله .. يكشخة كربله
ــــــــــــــــــــــ
الكواكب كلها منك ياغــارن لـو تـمر
جمالك يمه هيبه يبو ارسـوم الشگر
يفرحة عمري يبني شكثر ابقه انتظر

اتاني واندعي كون الولد سالم يرد
حنين وبيه اشم عطر الحسن عطر الورد
الك كلشي حله .. يكشخة كربله
ـــــــــــــــــــــ
المواقف عنه تشهد زغير اعله الحرب
دخل والحومه رجفت دخل بيها الصعب
زغير اومن دخلها زرع بيهم رعب

يباشط بالحرب يبن الفحـل والله ونعم
شجاع اعله الكرم بس بالحرب طالع شهم
يبو السيف وهله .. يكشخة كربله
ــــــــــــــــــــــــــ
يالمقدم حــياتك فدائاً للحسين
مهر عرسك ييمه دمائك يالحنين
نذر عمرك نطيته وتحس مقصرين

يالمنفذ الامر أمر الحــسن ووصيته
يريدك تنذبح گبـــل السبط أمنيـته
وصحت أبشر اله .. يكشخة كربله
ـــــــــــــــــــــــــــ
محمد المشعلاوي

#ابوذيات

بداية كلشي هوه بسمله حسين
عمرنه وكل ملكنه بسم الحسين
جمع قرأنه حيدر بس مله حسين
وختم اياته بارض الغاضريه

الگلب ينبظ ودكته دم عالحسين
ابمجان الماي نبجي دم عالحسين
يجن الشاف بالطف دمع الحسين
اعله زينب من مشت وي آل اميه

مشه الكفال وابطه مايه لحسين
مشاله وردلي وسفه مايل لحسين
لــون عباس جــايب ماي لحسين
أثــر مايبقه بارض بالغـــاظـريـه

غشيم الراد منكم شر عالحسين
اكطعه الشال اصبعه شر عله حسين
اضل كل عمري اطيعاً شرع الحسين
انه العـبـاس دستـور الخـويـه

مثل شجره اعله زينب ضل الحسين
الـرفـضهم عنه كَــالـو ضلل حسين
ثلث تــيام بالــطــف ضل الحسين
عـــاري وبالشمس خلـوه رميه

محمد المشعلاوي

صفت بيه الجروح احساب مايه
شعـاتب ياعـتب عبـاس  مــايه
ارجع فدوه خويه وعوف مايه
الفرات ويانه ناوي اعله الاذيه

العيون الباوعت بيه تـره اسهام
بكلبي. وحملن اجروحي ترسهام
مصايب كربله بحزني تره اسهام
ورث . والشــــام رايد حصه بيه

الشمر متخوصر اعلينه وشر باه
وبايـج سيفه وبراسك وشر  باه
حــرام المـاي اضوكنه  وشر  باه
وخوي حسين عطشان ورميه

بالحب والغرام    أبعثلك سـلام
لعيونك حسين   ماخذني الهيام
حنتلك دمــوع العـــــين
ياأشرف بشر يحــــسين
ـــــــــــــــــــــــ
  كاتبلك جــــــوابي 
بدموعي اوعــذابي
ناذرلك نذر   كل العمر   يخلص بواچي
  لو عندي عمر نـــوح 
هم اكضيه الك نوح
شوفيلك ألم  حرك الخيم  سلب التراچي

ناجح بالعشگ كلمن درس
يم عابس وجون
كلشي اعله الارض يحسين الك
صاح انه مجنون

يا أول حبيـب  للوادم قريب
عيشنه بحماه  بس عايش غريب
شوفيلك جثير الديــــن
ياأشرف بشر يـحـسـين
ماخذني الهيــــام
ـــــــــــــــــــــــ
يانــــور الحقـيقه
يمعيـش الخليقه
يابن فاطمه  أرض وسمه  مطلوبه الك دين
شرد اوفيلك أهواي
يالماشارب الــمــاي
يالحبك فرض   هاي الارض   ممنونه يحسين

يا أكـبر وطـن  لم البشــر
يموحد الاصفوف
راسك عالرمح  بس منتصر
يمشرف الاطفوف

منصوب العزاء   بعنان السماء
يا اعظم غريب  عاش بكربلاء
يمثبت أصـول الـديـن
يا أشرف بشر يحسين
ماخذني الهيام
ــــــــــــــــــــــــــــ
قبطــان السفينه
وبحــبك نجـينه
يشراع الخدم  دونك عدم  كلشي بحياتي
يمنجي القضيه
من طوفان أميه
يمطفي الفتن  حبك أذن  سري ونجاتي

بدمك قدمت أكبر فضل
عيشت الانسان
يالدافع ثمن  بزغــر طفل
قدمته قربان

من حرك الخيام  عيشت السلام
لو ما حظرتك   مانعرف حـرام
مثلك ماحصل ومنين
يا اشرف بشر يحسين
ماخذني الهيام
ــــــــــــــــــــــــــــ
دربك ما أعـــوفه
لو موتي أشـــوفه
بحبك لو متت  يعني عشت  ياضي العيون
عابس حگه مجنــون
شافك شوف العيون
بيك اتجننت بس ماشفت لو شوفك اشلون

اشجم عابس الك  جنه العشك
والوادم أتلوم
العـافك مختصر  ياسيـدي
من الجــنه محروم

يحسين أبرضاك  ماعيش ابسواك
مخنوك ويموت الماشم من هواك
بيك انه افتخر يازين
يا أشرف بشر يحسين
ماخذني الهيام
ـــــــــــــــــــــــــــ
ياقبلة بكــــــــائي
عاشورك عــــزائي
كون امن الطم حتئ العظم من صدري مكسور
حسين ابلا مناصر
ساحگته  الحـوافر
اسمع واحترگ يابو العشگ  دمي بقه يفور

ياخذني الهظم  واتمنه الك
كون انه مسحوك
ياوسفه بغرب  جسمك بقه
من ثوبه مبيوك

دوم ابمقتلك  روحي اتهيم الك
وأتمنه أمــوت  فدوه انه لهلك
وأتمنه العمــر مــرتيـن
يا أشرف بشر يحسين
ـــــــــــــــــــــــــــ
محمد المشعلاوي

حـسين ياوالينه ـــــ خـدمتك تحيــنه
ـــــــــــــــــــــــــــ
يالخدمتو احسين احذرو خدمته اتضيعوها
الخدمه هاي تعلي شــــان اواجب اتقدسوها
هالمجــالس جـن مدارس لازم اتـحـظـروها
وعلمـو الاطفــال تخــدم ورث خي ورثوها

خـــل يشد احــزامه ـــ ويعرف الـطــامه
خل يدگ عالهــامه ـــ وخلي يعرف دينه
ـــــــــــــــــــــــــــ
خدمتك يحسين تسري من المهد ويـــــانه
وكل عمرنه ويانه عايش هالشهر وحـــزانه
وكـل سنه نتلكه زيـنب من تجي تعـــــبانه
وهـوه ياحيــل اليفيده التنذبــح خــــوانه

التعــــباها العــاشر ــــ وشيباها الـحـافر
انشد حزمنه الباجر ـــ نلاكي خدر اسكينه
ـــــــــــــــــــــــــــ
اهـواي متفضـل علينه حسين لمنه بخيمه
ماتــركنه انظيــع ابداً بـس بـناتـــه ابهيـمه
عيشانه بخـــير حـبه وهـوه مـــات بظيمه
يالي تسأل عــــن عظَمته الله سـر تعـظيمه

عايشين بخـيـره ــــ شلون نرضه بغـَـيره
العلمانه الغـِيــــره ــــ حسين عايــش بينه
ـــــــــــــــــــــــــــ
علمتنه الدنـيه عبــره واحـنه لازم نعتـــبر
ولازم الموقف نعـيده اوياك لو ويه الشمر
وياك موقفنه احنه ثابت مانعـوفك للحـشر
وهيـه معـروفه التحـبه باجــر اوياه تنحشر

أنحبك ابلا غايـــه ــ وحــق هــاي الرايـه
الك ننطي احجـايه ــ يالعمــــر منطيـــنه
ـــــــــــــــــــــــــــ
حسين انته اول عشكنه وانته يا أخر عشك
لطم شور أو بالمجـالس هيـج نبضـاتي تـدك
جن خيم وياك روحي من اذكر اسمك تحترك
بالسنه لو ما محرم والله احس روحي أختنك

خدمتك عنواني ــ شلون احبً ثاني
مجلسك ربــاني ــ واسمك امعليــــنه
ـــــــــــــــــــــــــــ
لا حياة ابلا وجـــودك دنـيـه مـن دونك عـدم
والف شكرا ياحبيبي وياك عشنه من الخــدم
اليمشي بالشريـان حـبك لاتضن يحـسـين دم
المايحبك شنهي عذره خل يعض اصبـع نـدم

يالمطيب أجروحــي ــ حسين يامذبــوحي
ياسفيـــنة نوحــــي ــ من الغـرق تنجــــينه
ــــــــــــــــــــــــــــــــــــــــــــــــــــــــــــــــــــــ
محمد المشعلاوي

من ليلة العاشر  أوداع اوكسر خاطر
بأخــر وصيه
يازينب اليله  كلمن يشد حيله
باجــــر منيــه
ـــــــــــــــــــــــــــ
اليله ابو الاكبر يودع صحبته وناسه و هله
وصاح زينب والفواطم  بخيمه لم العايله
وسولفلهم والسوالف عن مصايب كربله
باجر  يركضن بناتي بالصحاري او بالفله

باجر مصاب او اه    ما الهه غير الله
صعبه القضيه
ويوصي بالعيله    كلمن يشد حيله
باجــــر منيــه
ـــــــــــــــــــــــــــ
زينب ارويلج مصايب  خويه كلها مروعه
باجر العباس أخيج   يوگع اعله المشرعه
السهم بعيونه يصيبه  والجفوف أمكطعه
مايرد باجـر كفيلج   بعيد عنـج مصـرعه

مايرجـع الكفال  زينب تره بهل حـــال
طايح رميه
موذر منو يشيله    كلمن يشد حيله
باجـــر منيــه
ـــــــــــــــــــــــــــ
باجر اتشوفين أخوتج  نومه وبحر الظهر
والرمل حـار ويجوي   حته احر من الجمر
باجـر أتئيسين زينب  من يرد خالي المهر
لاجن اوصيج ابناتي  وخلي بالج عالخدر

زينب يذبحـوني   وتصدلج أعيوني
يالهاشميه
صوتي وتراتيله  كلمن يشد حيله
باجــــر منيــه
ـــــــــــــــــــــــــــ
باجـر ايطر ابمصابه  خويه وي طرت الصباح
بسهم عبد الله يزينب  ينذبـح مـن غبشه راح
ينسلب حته قميصي  وخنصري كطعه مـبـاح
حرك واخيامي اتسلب  وروس تنشال برمـاح

وجسمي فوكه الخيل  تهوس أبكل حيل
تسحگه أعوجيه
والحــافر أثكيله   كلمن يشد حيله
باجـــــر منيــه
ـــــــــــــــــــــــــــ
خلي بالج خويه زينب  تكفليهه انتي العيال
زحـمه ينشـافـن بناتي  تعـودن بس عالدلال
ذره من باجر مصيبه   تحدب أظهور الجبال
باجر أيشوفون وسفه  المانشاف الهن خيال

باجــر يشوفوهن   عمداً يركضوهن
سكنه ورقيه
ماتبقه كل حِيله   كلمن يشد حيله
باجــــر منيــه
ـــــــــــــــــــــــــــ
من بعد هاي المشاهد  تحظري الدرب السبي
من عگب فخر الهواشم  باجر الحادي اجنبي
روحي يازيـنب سبيـه   لاجــن ابهيـئة نـــبي
بعفتج يم عون باجـر   يـنحـلف بيها العــبي

وخليهم يعرفــون  من هيبتج يم عون
لا مو سبيه
يم عفة الشيله   كلمن يشد حيله
باجـــــر منـيــه
ـــــــــــــــــــــــــــ
محمد المشعلاوي

وينك وينك .. گوم فيي اعله الضعن بالرايه
وينك وينك .. يروحلك فدوه النهر وي مايه
***
كوم ياعباس وحديلي الضعون
زحمه أنگاد بحبل ويسيره 
نايم اعله المشرعه وزينب تروح
ويه وادم ماتعرف الغيره
استغلو غيبتك  عرفو طريح
خويه فرونه العده اشجم ديره

وينك وينك .. الخارجيه منين صاحو هايه
وينك وينك .. يروحلك فدوه النهر وي مايه
* * *
خويه تعبني الدرب كلش طويل
رحلت الشام وتعبها اثگيله
نوكهم هزله وتتعب بالمسير
عرجه والي يطيح شي تجيله
الناگه معروفه حنينه اويانه ليش
تعبت حته العليل او حيـله

وينك وينك .. گوم حاجيني يخويه احجايه
وينك وينك .. يروحلك فدوه النهر وي مايه
* * *
أحبالهم خشنه وترف جف الدلال
كطن جف ارقيه مشدود بحبل
ماتت احلام الزغار وكلشي مات
ظامي عبد الله وسگوه رمية نبل
والابطال من ال هاشم والشيوخ
وسفه خلو روسهم بيد النذل

وينك وينك .. جفك الخــد الزغـــــار اولايه
وينك وينك .. يروحلك فدوه النهر وي مايه
* * *
عفتك اعله النهر بس جثه واجيت
خــويه  جتالك بـقـه اليبـــرالي
كـــون مذبـوحه ولا عيني تشـوف
أمعلك اعله الرمــــح ويــن الغالي
خـويه وتمنيت مـوتي بكـربــــلاء
كــون ميته اويـاكم انـه اشــوالي

وينك وينك .. خويه ردتك لو ملت تجايه
وينك وينك .. يروحلك فدوه النهر وي مايه
* * *
اعله القصر طبونه وبنص الزلام
ولو ماضلت زلم من دونك
الجانو يخافون من اسمك يفوت
تمرجلو عگبك طحــت يدرونك
الرايه ويانه اجت كل الطريق
اعله الضعن لو گربو ايشوفونك

وينك وينك .. صارت اشيـوخ الگبل ودايه
وينك وينك .. يروحلك فدوه النهر وي مايه
ــــــــــــــــــــــــــــــــــــــ
محمد المشعلاوي

مـن خَــدّم والينه .. فــاطــمه سجلينه
ـــــــــــــــــ
فاطمه سجليه اسمنه  من خـــدم زواره
الكـرم منـج  نريــده  انقـدمه لخـطــاره
ورزقينه بالمجـــالس  والدمع يتجــــاره
منزلتنه نريد منج من عبيد انصــــــاره
عبد كافي اعلينه .. فاطــمه سجلينه
ـــــــــــــــــــــــــــ
يالله ياخــدام فاطـم  الحـزم شــدوها
هلت ايام الحسين  وبالدمـع واسـوها
فاطمه ادور المجالس كل عزه تلكوها
واسو ام حسين بيــكم تفتخر خلـوها
وبالعزه ناديـــنه .. فاطــمه سجلينه
ـــــــــــــــــــــــــــ
واجب اعلينه نحـافظ عالطم والخـدمه
النعمه تتـقدس ياوادم والحسين النعمه
وألي يخدم نيته بيضه هاذه هوه الزلمه
بنادم من يموت باجر خادم يصير اسمه
خدمتــه اتعليـنه .. فاطــــمه سجلينه
ـــــــــــــــــــــــــــ
ينعرف اسمه الخدمهم  يعلئ صيته وشانه
ياتجـاره ابــلا خـسـاره  وبالـدمــع ربـحـانه
احـنه ويـه حسين دوم  ابكل عــزه تلكـانه
خـادم العـتره المـــوالي  كــربـله عنــــوانه
حسين منه وبينه .. فاطمه سجلينه
ـــــــــــــــــــــــــــ
شانـك اتعليه الـزهــره  يالتـشد احــزامك
يلي تارك هـوه الدنيه وتلطم اعله ايمامك
يل سنينك كلها خدمه وبس حسين ايامك
زيارتك حجه وطواف واسود انته احرامك
بمرقــده حجــينه .. فاطمه سجلينه
ـــــــــــــــــــــــــــ
الخـدمه لازم نتعـب الها  ولازم انـوافـيها
كـون تتطلب انضحي انموت بس نحيها
مانفـرط بالخــدامه بس لأمــــــر واليها
للظهور الخـدمـه تبقه المهدي يحكم بيها
من خـدم مهدينه .. فاطمه سجلــينه
ـــــــــــــــــــــــــــ
محمد المشعلاوي