وينك.. جم سوال.. بس تعال.. وانضر الحالي
وينك.. گلبي صاح.. ضعني راح.. خويه يالغالي
حسين خويه رد عليه
زينب آنه الهاشميه.. وينك
.........................

تعال وشوف.. شصار بروحي بغيابك
وحك عيناك.. همي وحزني لمصابك
ينور العين.. اشوفك لسه بخضابك
جسد مطروح.. ذبيح امسلبه ثيابك

مجروح گلب اختك وسفه
مجروح خويه ولا يشفه
متعوبه انه بفركاك
صعبه الدنيا بلياك

روحي.. تحن عليك.. وين اجيك.. يالمتت دامي
روحي.. عدهه راي.. تجيب ماي.. الجبدك الضامي
أروي گلبك من اديه
زينب آنه الهاشميه.. وينك
.......................

خذوني ابعيد.. عنك والگلب يمك
وبقت عالبال.. ياخويه وصيت امك
اشيردني اعليك.. اضمدك وامسح بدمك
وأرد اردود.. اجي ومن نحرك اشتمك

ويلاه گلبي اليتجوه
ويلاه يفراك الخوه
يبن امي ونور العين
يومك يهضم يحسين

خويه.. عمري ضاع.. بالوداع.. ونخطف لوني
خويه.. ابلا كفيل.. عالهزيل.. غربه يسبوني
بسمي صاحوا يالسبيه
زينب آنه الهاشميه.. وينك
.......................

اكبال العين.. يخويه حركوا اخيامي
والأطفال.. ضربها السوط كدامي
الحيره شلون.. اخلص روحي وايتامي
وبديه احبال.. وجفي امن الحبل دامي

شمات يحدون اضعونك
شمات من دون عيونك
نمشي بلوعه واحزان
فرونه اعله البلدان

زينب.. بگلبي نار.. بيه صار.. المحد ايشوفه
زينب.. بس انوح.. وين اروح.. وآنه مجتوفه
روحي حنت للخويه
زينب آنه الهاشميه.. وينك
.........................

الألم كتال.. وألم فركاكم البيه
يهد الحيل.. امشي وانه محنيه
تعبت هواي.. امن الشام وطواريه
يخويه حسين.. تعال ولحك اعليه

بديوان راح اوكف اني
بديوان كلهم عدواني
يبن امي منين ارتاح
وروس اخواني اعله ارماح

صعبه.. وكلي خوف.. من اشوف.. عيالك بحيره
صعبه.. كل مكان.. ابلا امان.. وغربه كل ديره
بغربه روحي بلا حميه
زينب آنه الهاشميه.. وينك
........................

تصيح الروح.. بأمان الله بدمع هامل
بعد هيهات.. اشوفك والضعن شايل
حدونه اجناب.. وماكو راية الكافل
هواي هواي.. مشتاكه لبو فاضل

عباس ماقصر وفّه
عباس حط جفي بجفه
تسولف بفعاله الناس
كافل اخته العباس

صارت.. ذكريات.. عالفرات.. الخوه والعشره
صارت.. بس جروح.. وعندي روح.. امن الحزن جمره
ودعتكم عالوطيه
زينب آنه الهاشميه.. وينك


محمد هادي العقابي

ماكو اي سلامه.. وعيني لليتامه
للسبي مشينه.. بكل متن علامه
يخواني وين انطي الوجه ..درب اليسر اذيه
زينب انه هيبة علي.. وصار الحبل بديه
........................

دارت الدنيا وبده درب المصيبه
وگلبي ضل اعليكم بناره ولهيبه
جفك الشايل الرايه امنين اجيبه
خويه ياعباس زينبكم غريبه

ترضه يابو فاضل.. سلبو المحامل
تالي خويه صرنه.. فرجه للقبايل
ياخويه من طاح العلم.. اختك مشت سبيه
زينب انه هيبة علي.. وصار الحبل بديه
.........................

منين مادير الوجه غربه وشماته
واسمع يكولون جيبو مدللاته
الراس جابو عالرمح چان شحلاته
هذا ابوچن منذبح صاح لبناته

صدك هذا انته.. التجري دم ركبته
انته تنظر النه.. واحنه نبچي سكته
وخليت خاف تصد الك.. چفي بوجه رقيه
زينب انه هيبة علي.. وصار الحبل بديه
........................

خويه مشونه بدرب متروس حيره
والاسيره تلوذ بكتار الاسيره
الناس تنشد والجواب بلايه غيره
ذني مسبيات ماعدهن عشيره

انتظر مماتي.. بوجهي مستحاتي
ومدري چم يتيمه..لاذت بعباتي
من تنضرب طفله تجي .. من الألم عليه
زينب انه هيبة علي.. وصار الحبل بديه
.........................

الضعن للكوفه وصل وشطوله دربه
وكفونه بسوك وادم كلها غربه
من درو زينب انه صاحولي صعبه
والله لو حيدر عدل جا رجف گلبه

بت علي الاميره.. اصبحت اسيره
هالكلام اسمعه.. والله هايه حيره
الناس الاجت يم الضعن.. ماعدهه كل حميه
زينب انه هيبة علي.. وصار الحبل بديه
........................

وبعد ما شلعو گلب ضعن الامامه
الشام اه الشام ما شفنه السلامه
بالخرايب تالي آنه اويه اليتامه
وعيد عدهم ويلي وي روس النشامه

والله ماكو راحه.. وبالگلب نياحه
وكلبي يبقه عايش. عمره وي جراحه
كلشي انتهه لكن يظل.. طف كربله هويه
زينب انه هيبة علي.. وصار الحبل بديه


محمد هادي العقابي

يخوتي مشتاكه
بعد مانتلاكه
مشت بيه الناكه

اويلاه اويلاه
...............

عفتكم عالثره .. ومشيت ميسره .. وشفت الصار
اعاين يخوتي .. وجبيره حسرتي .. وگلبي احتار
صدك ماني بحلم .. عليّ هدت زلم .. وشبو نار
وأنه بحرك الخيم .. ركضت امن الالم .. وعندي ازغار

كلهه طشت بالبر
واليحير اكثر
اركض واتعثر

اويلاه اويلاه
...............

الزغيّر بالعمر .. وصل عضمه الجمر .. وشاف الويل
حرت من ياكتر .. اللمْهم والشمر .. هد الخيل
انترس حته الهوه .. رماد بنينوه .. وماضل حيل
عجاجه مغبره .. صفيت محيره .. وصارت ليل

ولّي زاد اونيني
اني شافت عيني
مذبحك يحسيني

اويلاه اويلاه
...............

أنه بأول سهم .. اعاين والالم .. بالدلال
القميصك من شلت .. يخويه ومسحت .. دم السال
ورماح اتولتك .. وسيوف اتعنتك .. وبهل حال
تخضبت ابدمه .. يضنوة فاطمه .. وحيلك مال

شفت طولك يكصر
عينك اعله الخدر
وطحت يابن حيدر

اويلاه اويلاه
...............

شسولف عالصبر .. وانه الشفت الصدر .. بخيل انداس
يخويه اتمرمرت .. وعلى الكافل صحت .. ياعباس
يراعي المرجله .. ابو سكينه انوله .. ابين الناس
صحتله وماسمع .. الصده الزينب رجع .. ابلايه انفاس

هم تغير لونه
وطفو نور اعيونه
وما صحتله شلونه

اويلاه اويلاه
..................

اليسر گضّه العمر .. مشينه وبزجر .. من يحدون
ورقيه بالدرب .. ولوهه بالضرب .. وزركه متون
تره المدلله .. وردتك ذابله .. ماضل لون
تخاف امن الشمر .. على طول اليسر .. تجري عيون

سوطه بيده ويفتر
وعلضرب ماتكدر
مانسيت المنضر

اويلاه اويلاه
.................

بديّ صار الحبل .. وصعدت اعله الهزل .. ابلا خوان
خذوني ميسره .. اطب واني مره .. بكل ديوان
انه بلا كافلي .. الاذان ابلا علي .. كله احزان
تره ضهري انكسر .. عدونه مو بشر .. ماكو انسان

ماكو انسانيه
ترحم العلويه
مكيده ايديه

اويلاه اويلاه



محمد هادي العقابي

انسبي والغربه تحدي اضعوني
والهضم غير ارسومي ولوني
..................

جابني العباس من ارض الوطن
ورايته ترفرف عله روس الضعن
بجاله جت مدلله ودار الزمن
واخذ مني الغالي نور عيوني
.....................

الزمن مايرحمني واني بت علي
انسبي وبيد الغرب وليه انولي
امن الشماته گلبي ونه يعتلي
من بعد حامي الخدر يحدوني
......................

بيه يحدون الأمر هذا عجيب
وناكتي هزله وحبلهه بجف غريب
إسهام هذا الدهر بگليبي تصيب
بت محمد جن ولا عرفوني
.....................

الطف اخذ من عندي اخوتي والاهل
كسر ضهري والدمع مني همل
ماشفت من دنيتي غير الوجل
والسبيه كامو ينادوني
........................

آنه زينب آنه بت حامي الدخيل
صرت من ضيم اليسر امشي واميل
امگيدين اجفوفي بجفوف العليل
ومن يجرون الحبل يآذوني
...................

شفت بعيوني الجره بأرض الطفوف
اخواني كلهم ذبحوهم بالسيوف
روسهم برماح كدامي تطوف
اوياي من بلد البلد ودوني

محمد هادي العقابي

ردت من الشام.. زينب والمدمع بالعين
ردت من الشام.. ووصلت كبر الغالي حسين
طاحت من عالناگه
للمذبوح مشتاگه
ردت من الشام
..........................

تشم بتراب اخوهه هواي. وتصيح احاه يبن امي
راسك هذا جبته وياي. واجيتك اعثر بهمي

تعبان
كلب اختك خويه هواي
يالضامي بصف الماي
تدري شسوت دنياي
ياخويه حسين

رديت
احجيلك بيه الام
من الطف حد الشام
طحت بولية ضلام
يانور العين

من سديت العين.. تعنوا ياخويه الشمات
من سديت العين.. حركوا فوكانه الخيمات
والدمعات حراكه
للمذبوح مشتاگه
ردت من الشام
.....................

عن ضيم السبي تسولف. ودمعه تگود الحجايه
ابحبل الغربه مجتوفين. من اولايه لولايه

ويلاه
بيه الشامت حداي
ولاهودج ضل فوكاي
ولارايه ولاسكاي
وشمات الناس

والصار
من خليتك مذبوح
ضل ينزف گلبي اجروح
شتتحمل خويه الروح
ابلايه العباس

ضعنك يمشي ايام.. ويوم اصعب من يوم هواي
ضعنك يمشي ايام.. وبارض الغربه ايضيع الراي
هواي جروح بفراكه
للمذبوح مشتاگه
ردت من الشام
..........................

وصلت كربله بياحال.. وكل موقف يبجيهه
وتنضر عله الوادي تشوف.. بس اكبور اهاليهه

والطاح
دم مو دمع امن العين
وكعدت يم كبر حسين
ونادت حارمني البين
من الخوان

وتشوف
مكسوره بصدره اضلوع
وكلبه بحافر مشلوع
وعبد الله يهل ادموع
بصدره العطشان

رادت يمه تموت.. ردت راسه وماضل حيل
رادت يمه تموت.. من شافت آثار الخيل
ضيم بضيم يتلاكه
للمذبوح مشتاگه
ردت من الشام
..........................

ابريني الذمه خويه حسين.. تكله رايحه العباس
واكله بطيحة الرايه.. شسوت بينه هاي الناس

عباس
طول اختك خويه انشاف
حرمه وكدام آلاف
ومن حجي الناس انخاف
اذونه هواي

معذور
من سهمك طفه العين
ومكطوعات الجفين
يالكاسر ضهر حسين
يم شاطي الماي

كلبي الطاح اوياك.. من كالو طاح الكفال
كلبي الطاح اوياك.. وراس الغيره برمح انشال
بجفن النوم ماضاكه
للمذبوح مشتاگه
ردت من الشام
.........................

مرتين الوداع ايصير.. مره بعاشر احزاني
ومن ضيم اليسر رديت.. اودعكم يخواني

هيهات
انسه المر بيه وصار
دخان وخوف ونار
وفرينه ازغار اكبار
من صوب الصوب

جم اه
وجم لوعه ابلاوليان
امشي بضعن الاحزان
ابلياكم للاوطان
بگلبي المتعوب

بكلبي هواي اجروح.. ويلجم بيه الريح الهاب
بكلبي هواي اجروح.. وعذبني اوداع الاحباب
كلوب هواي خفاكه
للمذبوح مشتاگه
ردت من الشام


محمد هادي العقابي

استشهاد الامام علي السجاد ع



شفتك مناره بكل وكت ومضوي دربي
والهل سبب فاتح الك بيبانه گلبي
رزق الروح.. انته الگلبي وسالفته
يالسجاد.. ياتاريخ الطف انته
.........................

بالطف شفت طولك علم.. ياحرز وبوسط الخيم
خلاك الحسين
بالغربه كالولي الضعن.. وانته الجنت الهم وطن
شما دارو العين

في وامان بكل وكت..وانته العليهم خيمه
والقافله بگلبك مشت.. لامامشت بالهيمه
كلمن عطش يكصد الك.. وانته العطشهم غيمه

من كيدوك اعله الهزل گلبك يعاني
لو عايفينك تنتفض عباس ثاني
كل الجيش.. من تمشي اكبالك سكته
يالسجاد.. ياتاريخ الطف انته
.........................

هنيال روحي الحبتك.. بعين البصيره شافتك
آية قداسه
منبع وفه ومنبع شيم.. قران ناطق بالحِكم
ثابت أساسه

كل الرياح العاتيه.. الرادت الگلبك كسره
والريح متهز الجبل.. ولامنه توكع صخره
يالمثل جدك حيدره.. مل الصبر من صبره

الرايد العزه وماتضل ايده اعله خده
يمشي اعله نهجك مايزل بخطوه وحده
وكل الناس.. تشهدلي بهذا الكلته
يالسجاد.. ياتاريخ الطف انته
........................

ياكعبت ادموع وصبر.. ياباكي بس مامنكسر
صبرك علامه
ياشاهد بطف كربله.. گلبك امان العايله
وكهف اليتامه

يحتار كلمن صد الك.. والهيبه وسط عيونك
من زغرك حسين بفخر.. حط ايده فوك متونك
ياوجه ابوك وشمرته.. ومن لونه ماخذ لونك

بالدنيه مثلك ماشفت لاصح مثيلك
والدهر من شافك ركع يصرخ دخيلك
يامولاي.. يالحبيته وما شفته
يالسجاد.. ياتاريخ الطف انته
........................

بديوان اميه وبالقصر.. مأسريك لاكن منتصر
والخطبه تشهد
بالخطبه والكل ماحجت.. مجلس حسيني تحولت
يابن محمد

النستهم الدنيا علي.. شافو علي عالمنبر
لمن بديت انته الحجي.. صار القصر وجهه اصفر
وخصمك اكبالك كل وكت.. كدام عينك يزغر

دكيت انته بموقفك يبن الزجيه
آخر بسامير بنعش حكم ال اميه
بأرض الشام.. هذا الموقف سجلته
يالسجاد.. ياتاريخ الطف انته
..........................

من الحسين ومقتله.. الاخر جرح بالقافله
كاتب رساله
المنحر عله السيف انتصر.. يالواكف بعين الدهر
وكفت جلاله

متعوب اجيت امن اليسر.. وحاجيت ابوك بكبره
ذبحوك لاكن ايسو.. تنذبح هاي الفكره
تضل عايش اليوم الحشر.. يابويه عِبره وعَبره

شكراً يبو الباقر الك والمنجزاتك
بنصرت حسين وثورته خلصت حياتك
شهر النوح.. بستشهادك ثبته
يالسجاد.. ياتاريخ الطف انته




محمد هادي العقابي

استشهاد زيد الشهيد ابن علي السجاد عليهم السلام


يفجع امصابك... تشبه احبابك
صابوك بسهم.... ضل بيك الالم
...............

شكد شايل بروحك حزن وبكلبك النار
يابن علي السجاد الك قصه ودمع حار
عالجذع صلبوك بحقد ياابن الاطهار
زيد الشهيد اسمك يضل للثوره تذكار

ثابت بعزمك... من نزف دمك
جسمك ماسلم... ضل بيك الالم
.................

ثائر بغيره ومرجله ياكرة العين
وأفعال عندك تنذكر زين اباثر زين
ايردد السانك كل وكت هاي الكلمتين
عاشت إوياك أمن الزغر ثارات الحسين

كربله بروحك... وزادت اجروحك
من حرك الخيم.... ضل بيك الالم
....................

يالماحضرت بكربله وطاريها اذاك
الباقر اخوك بدمعته بطف كربله هناك
وشاف الجره اعله ام الخدر والبجه الأملاك
ذيجه المصيبه الما بعد تنظرهه عيناك

وبضهر عاشر.... كلشي ضل حاير
من طاح العلم.... ضل بيك الالم
...................

زينب گلبهه امن الهظم عالخوه لهفان
مدلله وخلاهه الزمن من غير وليان
يازيد مكسورت ضهر ضلت بله خوان
مسبيه راحت للغرب دخلوهه ديوان

تجري دمعتهه... بطيحت اخوتهه
دنياهه وهم..... ضل بيك الالم
.................

كل هاشمي لاماسلم مارحمته الناس
لامو غريبه من تضل جثتك بلا راس
عالنهر كبلك سيدي ذبحو العباس
وكطعو يساره ويمنته وضل ينزف احساس

جثث خلوهم.... هوايه اذوهم
الكل حيل انهدم..... ضل بيك الالم
...............

الخدام اجوا بمصيبتك وعيونك تشوف
سيدي ونته ابن الكرم بالكرم معروف
نقسم عليك بمحنتك وبراعي الجوف
يرزقنه الله برحمته لجمه امن الطفوف

ونخدم بهمه... بشهر ابو اليمه
واسوك الخدم.... ضل بيك الالم

محمد هادي العقابي

استشهاد السيدة رقية ع


تعبانه هواي .. ومومال اركض بين الخيل
تعبانه هواي.. ويوم العاشر رايد حيل
ومن ذاك اليوم الهل يوم
گلب بنيتك ضل ملجوم
.....................

شلون اصبر.. والله صعبه.. افراكك بروحي شيحمله
وين رايح.. يالعفتني.. ابيين غربه وآنه طفله

بجاني يابويه الوكت. والناس تضرب بيه
يدرون بيه امدلله. وصاحوا عليي مسبيه
ومشوني بدروب الخطر. ورجلي بجمر مجويه

مجويه بنار .. وبروحي تشب نار اخيام
مجويه بنار.. بويه المجوي شلون اينام
وايأذيني حته النوم
گلب بنيتك ضل ملجوم
.........................

دمعي ينزل.. وبيك اسولف.. هسه ابوي ايرد عليه
ايحبني ادري.. واسمي عنده.. نبض گلبي يارقيه

شكد صحت بسمك بس ردت. بحضنك الدافي اتضمني
خلصني بويه امن الشمر. بالسوط ورم متني
باكو هديتك بويه الي. ويلا وجرحو اذني

والدم ايسيل.. اذن ونحر وجف مذبوح
والدم ايسيل.. من عيني وگلبي المجروح
انترست كاع الطف ادموم
گلب بنيتك ضل ملجوم
.......................

جابو النوك. ابلا هوادج. بيش الزم خاف اطيحن
بويه وينك. ماتجاوب. بسمك من الخوف اصيحن

شصار وكبل ليله چنت. يمك يبويه مأمنه
الوجوه مابيهه عرف. ياهو اليجي يخوفنه
الله يحرمه الاخرك. ومن شوفتك حارمنه

وجفوفي زغار.. من جابو يابويه حبال
وچفوفي زعار. والطف مايرحم اطفال
امر الله الصار ومقسوم
گلب بنيتك ضل ملجوم
........................

ضعن خايف. ناس غربه. يحدي من ديره اعله ديره
والشماته. اعلينه صاحو. هالضعن ماله عشيره

للكوفه طبينه بهظم. وبسوك طبوهه النوك
وأسال بزينب عمتي. فسريلي مفهوم السوك
كالتلي خوف ومستحه. وچف بحبلهم مخنوك

يابويه شلون.. يم زينب ملتمه الناس
يابويه شلون. الضيم الشفته يشيب الراس
محروم يلوذ بمحروم
گلب بنيتك ضل ملجوم
............................

العمر يكضي. هيج احسّن. وما خلص درب السبايا
من وصلنه. الشام كله. معيد بطيحة الرايه

نمت بخرابه من التعب. وكعدني عطر انفاسك
وراسك كبالي بالطشت. يتفايض بأحساسك
ولازم اموت بشبكتك. شمحلاهه شبگة راسك

اخر انفاس. تعبانه وخليني ارتاح
اخر انفاس. والصار بذمة الذباح
لا دنيا ولاضيم يدوم
گلب بنيتك ضل ملجوم


محمد هادي العقابي