የፀረ-ሠላም ሀይሎችን እኩይ ሴራ በማክሸፍ የሀገራችንን ሠላም እናረጋግጣለን
    ሜጀር ጀኔራል ብርሃኑ ጥላሁን

የኢፌዴሪ መከላከያ ሠራዊት መስከረም
የሀገራችንን እድገት እና ከፍታ የማይፈልጉ ፀረ ኢትዮጵያ የሆኑ ሃይሎችን አደብ በማስገዛት አሁንም የሃገራችንን ዳግም ትንሳኤ እናረጋግጣለን ሲሉ የ6ኛ ዕዝ ዋና አዛዥ ሜጀር ጀኔራል ብርሃኑ ጥላሁን ተናገሩ።

ዋና አዛዡ በአማራ ክልል ምስራቅ ጎጃም ዞንና በደብረ ማርቆስ ከተማ አስተዳደር የህግ ማስከበር ስራዎችን አፈፃፀም በሚመለከት ፣በአካባቢው አሁናዊ የሰላም ሁኔታ እና በቀጣይ የትኩረት አቅጣጫዎች ዙሪያ ከዞን፣ ከወረዳ አስተዳደር እና ከፀጥታ አካላት ጋር ውይይት አድርገዋል።

በአማራ ክልል በፅንፈኞች እኩይ ተግባር ምክንያት ተፈጥሮ የነበረውን ሃገራዊ አደጋ የዕዙ የሠራዊት አባላት ከአጋር ክፍሎችና ከፀጥታ ሃይሎች ጋር ፈጥነው በመመከት የተወጡት ተልዕኮ በአጭር ጊዜ ውስጥ ህዝብን ወደ ሰላማዊ ህይወቱ እንዲመለስ ያስቻለ ስለመሆኑ ያወሱት ጀኔራል መኮንኑ አሁንም ቢሆን የሃገራችንን የማንሰራራትና የከፍታ ጉዞ ለማደናቀፍ የሚወራጬ የጥፋት ሃይሎችን በተለመደው አግባብ ስርዓት እናስይዛቸዋለን ብለዋል።

ፀረ ሰላም ቡድኖችን በማጥፋት ልማትን ማፋጠን የምርጫ ሳይሆን የህልውና ጉዳይ ነው ያሉት ሜጀር ጀኔራል ብርሃኑ ጥላሁን ሰላም ፈላጊውን ህዝብ በቅንነት ማገልገል ከእያንዳንዱ አመራር እና ባለድርሻ አካላት የሚጠበቅ ተግባር መሆኑን መገንዘብ እንደሚገባ አፅንኦት ሰጥተዋል።

አሁን ላይ በሠራዊታችንና በፀጥታ ሃይሉ ጀግንነትና በህዝባችን አጋርነት አስተማማኝ ሰላም እየተረጋገጠ ይገኛል ያሉት የኮሩ ዋና አዛዥ ብርጋዲየር ጀኔራል ሶፊያን ሸህ መሀመድ ለጊዜውም ቢሆን ተደብቀው የቀሩትን የሰላም ጠንቅ የሆኑ ቡድኖችን ለማፅዳትና ዘላቂ ሰላምን ለማረጋገጥ ቅንጅታዊ ስራውን ይበልጥ አጠናክሮ መቀጠል እንደሚገባ ተናግረዋል።

የምስራቅ ጎጃም ዞን ዋና አስተዳዳሪ አቶ ኑርልኝ ብርሃኑ  በበኩላቸው የመከላከያ ሠራዊቱ እና የፀጥታ ሃይሉ በከፈለው መስዋዕትነት የህዝብን ሠላም ማረጋገጥ እና ሠላሙን ወደ ነበረበት መመለስ እየተቻለ ነው ከሠራዊቱ ጎን ተሠልፈን አሥፈላጊውን ሁሉ እናደርጋለን ብለዋል።