🧑‍🏫👨🏼‍🏫 Школа народнай дыпламатыі

Паважаныя сябры і сяброўкі!
Народныя амбасады Беларусі працягваюць цыкл лекцый у школе народнай дыпламатыі.

У чацвер, 5 чэрвеня, а 20:00 па Менску (20:00 па Вільні ці 19:00 па Варшаве), нам прачытае трэнінг-лекцыю Мікалай Кванталіяні — беларускі эксперт па лічбавай бяспецы, які спецыялізуецца на дапамозе журналістам і медыяпрафесіяналам абараніць сябе ад пагроз сачэння.

Тэма лекцыі: «Актуальныя пагрозы лічбавай бяспекі».

Абмяркуем рэальныя кейсы, якія адбываюцца прама цяпер і не проста пагаворым пра пагрозы, а паспрабуем адсочваць сляды, шукаць матывы і вывучыць механікі сучасных кібератак.

1. Персанальны фішынг: Справа COLDRIVER
Хто стаіць за маскамі? Як адзін ліст можа стаць ключом да тваёй пошты?

2. Знікненне Анжалікі Мельнікавай
Што вядома? Як тэхналогіі і слежка могуць выкарыстоўвацца супраць тых, хто змагаецца?

3. Узлом «Беларускага Гаюна»
Хакеры выйшлі на паляванне: сацыяльная інжынерыя, уцечкі, Telegram. Як яны праніклі ўнутр і што можна зрабіць, каб супольнасці былі ў бяспецы?

4. Мабільны крыміналіст і Cellebrite
Перасякаеш мяжу — а разам з табой едзе твой тэлефон.
Разбяром, што спецслужбы могуць выцягнуць з прылады за некалькі хвілін, і як сябе абараніць.

Падчас лекцыі ўдзельнікі і ўдзельніцы атрымаюць інструменты і веды, якія дапамогуць:
— распазнаваць фішынг і сацыяльную інжынерыю
— падрыхтавацца да падарожжа або допыта
— будаваць бяспечныя лічбавыя звычкі ў супольнасці

Таксама будзе блок адказаў, дзе можна будзе ананімна задаць пытанне або распавесці пра ўласны кейс.

Для ўдзелу неабходна прайсці па спасылцы👇
https://us06web.zoom.us/j/82437054780?pwd=9lqeA3U6I42gzmbxaU5ptRWbz4gxkA.1

Чакаем вас!

#НА_адукацыя

Народныя амбасады | Ананімны зварот | Падтрымаць нас

🏦 Што рабіць, калі банк закрывае ці адмаўляецца адкрыць банкаўскі рахунак

Нажаль, у апошні час з гэтай праблемай беларусы і беларускі за мяжой сутыкаюцца ўсё часцей.
Неаднаразова ўздымалася гэтае пытанне і падчас IV Канферэнцыі беларусаў і беларусак свету.

Банкі спасылаюцца на рызыкі, звязаныя з фінансаваннем тэрарызму, або кажуць, што беларусы пад санкцыямі. Але варта разумець: пад агульныя санкцыі не падпадаюць усе грамадзяне Беларусі, а толькі асобы і кампаніі, уключаныя ў афіцыйныя санкцыйныя спісы.

Адмова адкрыць рахунак толькі на падставе грамадзянства альбо нацыянальнасці — гэта дыскрымінацыя.

Народная амбасада Беларусі ў Славеніі раней ужо накіроўвала запыты Абаронцы прынцыпу роўнасці, у Банк Славеніі і Еўрапейскі цэнтральны банк з прыкладамі дыскрымінацыйнага стаўлення банкаў і атрымала адказы.

Нават калі вам адмовілі ў адкрыцці звычайнага рахунку вы можаце адкрыць базавы банкаўскі рахунак.

🔍 Што важна ведаць:

✅ Базавы банкаўскі рахунак (basic bank account) — гэта ваша права. Кожны замежнік ці замежніца, якія легальна знаходзяцца ў краіне ЕС, у тым ліку з ВНЖ, візай D, заяўнікі на статус уцекача, можа адкрыць такі рахунак.

✅ Базавы рахунак дазваляе атрымліваць і адпраўляць грошы, аплочваць пакупкі ў інтэрнэце і мець плацёжную картку. Ён прадугледжаны Дырэктывай 2014/92/ЕС і банк абавязаны яго адкрыць, калі няма вельмі сур’ёзных падстаў для адмовы, рэгламентаваных законам.

✅ Калі банк адмаўляе, ён абавязаны даць пісьмовы адказ з канкрэтным тлумачэннем, чаму ён адмаўляе. Адмова толькі па прычыне “вы беларус” або “мы не працуем з грамадзянамі Беларусі” — недапушчальная і можа разглядацца як дыскрымінацыя.

Калі вы сутыкнуліся з такой сітуацыяй, не бойцеся патрабаваць тлумачэнняў. Падобныя справы можна абскардзіць у нацыянальных інстытутах па недыскрымінацыі (амбудсмэн або спецыяльных камісіях). Але галоўнае — памятаць: вы маеце права на базавы банкаўскі рахунак, і банк не можа адмовіць вам толькі з-за беларускага пашпарта.

Не саромейцеся звяртацца за парадай праз чат-бот да Народных амбасадаў Беларусі - мы гатовыя дапамагаць і падказваць, як абараніць свае правы.

⏳У бліжэйшы час мы раскажам, што рабіць, калі адмову атрымала кампанія альбо прадпрымальнік.

Народныя амбасады | Ананімны зварот | Падтрымаць нас

Мы пачынаем, далучайцеся 👆

🏦 Адмовы банкаў супрацоўнічаць з беларускімі бізнесоўцамі

Раней мы ўжо падрабязна пісалі, што рабіць, калі банк адмаўляе ў адкрыцці асабістага рахунку. Але ж з праблемамі ў банкаўскім абслугоўванні ў краінах ЕС сутыкаюцца і беларускія кампаніі, прадпрымальнікі і фізічныя асобы-прадпрымальнікі. Банкі адмаўляюць не толькі ў адкрыцці рахункаў, але і ў іх абслугоўванні — могуць без тлумачэння прычын закрыць існуючы рахунак, адмовіць у выдачы крэдыту, лізінгу або іншых паслуг.

🔍 Чым аргументуюць банкі свае дзеянні?

Звычайна яны спасылаюцца на тры асноўныя “прычыны”:

1️⃣ Санкцыі супраць Беларусі. Гэта аргумент, які часта гучыць, але ён непраўдзівы ў большасці выпадкаў. Санкцыі дзейнічаюць толькі супраць асобных асобаў і кампаній, уключаных у афіцыйныя санкцыйныя спісы ЕС, ЗША, Вялікабрытаніі і іншых юрысдыкцый. Калі ваша кампанія або вы асабіста не знаходзіцеся ў гэтых спісах — санкцыі да вас не маюць дачынення.

2️⃣ Беларусь у спісе краін з павышанай рызыкай адмывання грошай і фінансавання тэрарызму. Гэтая катэгорыя не азначае, што вам павінны адмовіць у банкаўскіх паслугах. Гэта азначае толькі, што банк павінен правесці дадатковыя праверкі (напрыклад, пацвердзіць паходжанне грошай або іншыя законныя патрабаванні). Гэта — абавязак банка, а не ваша праблема. Аўтаматычная адмова толькі на падставе таго, што вы беларус ці беларуска — гэта парушэнне вашых правоў.

3️⃣ “Рэкамендацыі” або “парады” Еўрапейскага цэнтральнага банка. Гэта таксама непраўда. Народныя амбасады Беларусі накіроўвалі афіцыйны запыт у Еўрапейскі цэнтральны банк і атрымалі адказ: ЕЦБ не выдаваў аніякіх указанняў, якія б абмяжоўвалі правы беларусаў на банкаўскія паслугі. Калі банк спасылаецца на ЕЦБ як на крыніцу такой палітыкі, гэта спроба схаваць уласнае нежаданне выконваць свае абавязкі.

⚖️ Што рабіць у такой сітуацыі?

На жаль, у адрозненне ад фізічных асобаў, у кампаній няма права на так званы “базавы банкаўскі рахунак”. Таму адзіны шлях абараніць свае правы — гэта даказваць, што адмова банка звязаная з дыскрымінацыяй.

Вось што варта зрабіць:

🔹 Запытайце ў банка пісьмовы адказ з тлумачэннем прычын адмовы або закрыцця рахунку.
🔹 Збірайце ўсе магчымыя доказы: пісьмовыя лісты, афіцыйныя паведамленні, электронную перапіску, патрабуйце запіс тэлефоннай размовы з банкам, скрыншоты сайтаў і паведамленняў.
🔹 Падавайце скаргу ў нацыянальны орган па недыскрымінацыі (амбудсмэн, камісія або спецыяльная інстытуцыя ў вашай краіне), якія абавязаныя быць прапісаныя ў нацыянальных законах згодна з Дырэктыввай аб недыскрымінацыі.
🔹 Калі орган прызнае, што банк парушыў прынцып роўнага стаўлення, гэта можа стаць падставай для далейшых дзеянняў: скаргаў у наглядныя органы, судовых пазоваў, выкарыстання справы для прыцягнення ўвагі ў медыя.

Такія працэсы могуць быць доўгімі і складанымі, але кожны выпадак мае значэнне.

Стварэнне прэцэдэнтаў — гэта шлях да таго, каб банкі перасталі парушаць правы беларусаў і беларусак.

🤝 Не саромейцеся звяртацца за парадай праз чат-бот да Народных амбасадаў Беларусі - мы гатовыя дапамагаць і падказваць, як абараніць свае правы.

Народныя амбасады | Ананімны зварот | Падтрымаць нас

🇸🇪 Канстанцін Сярогін і ягоная сям’я атрымалі палітычны прытулак у Швецыі

Пасля доўгага перыяду няпэўнасці і шматлікіх адмоваў Канстанцін Сярогін — відэааператар і сябра каманды блогера і палітвязня Сяргея Ціханоўскага — разам з жонкай Ксеніяй і сям’ёй нарэшце атрымалі палітычны прытулак у Швецыі.

Іхная справа стала прыкладам плённага супрацоўніцтва грамадзянскай супольнасці і праваабаронцаў. Лёсам сям’і Сярогіных займаліся Народная амбасада Беларусі ў Швецыі, офіс абранай прэзідэнткі Беларусі Святланы Ціханоўскай і вядомая шведская юрыстка і праваабаронца Сесілія Экман. Менавіта спалучэнне глыбокага разумення сітуацыі ў Беларусі і яе прафесійных юрыдычных ведаў зрабілі гэты вынік магчымым.

Падаем поўны пераклад каментару спадарыні Сесіліі Экман:

“Я, нарэшце, магу расказаць, што Канстанцін і Ксенія атрымалі від на жыхарства. Мы вельмі радыя і дагэтуль спрабуем усвядоміць, што ўсё скончылася, і што няпэўнасць нарэшце завершана.

Швецыя не пакідае беларусаў, якія змагаюцца за дэмакратыю — проста Міграцыйнаму ведамству часам патрэбна больш часу, каб прыняць рашэнне. І вось цяпер яно прызнала іх бежанцамі — і гэта лагічна, бо дэмакраты павінны абараняць іншых дэмакратаў, і дзеля іх, і дзеля сябе саміх. 🤍❤️🤍
Жыве Беларусь“

Каментар Сесіліі суправаджаецца фатаздымкам з серыі, прысвечанай сям’і Сярогіных, зробленай Вольгай Дземянковай. Гэтая фотасерыя была адзначаная ўзнагародамі падчас вясновай выпускной выставы Паўночнай фаташколы.

Народныя амбасады | Ананімны зварот | Падтрымаць нас