Oʻzbekiston Yozuvchilar uyushmasidagi ikki yarim yillik faoliyatim yakunlandi

Aslida Toshkentga kelganimdan beri uyushmada ishlaydigandek edim. Yaxshi koʻrardim bu dargohni. 15-yili eski uyushmaning katta zalidagi koʻpgina mushoiralarida ishtirok etganman. Adiblar xiyobonidagi yangi binosiga koʻchgandan keyin yaqin ustozlarimiz, akalarimiz, oldiga koʻproq boradigan, tadbirlar va kitob taqdimotlarini qoldirmay ishtirok etadigan boʻldim. Ayniqsa, jigarim Navoiylik Alisher ishga kirganlaridan keyin Toshkentdagi eng yurakka yaqin joyga aylangan edi uyushma. Oʻshanda ustozimiz Rustam Mirvohid Yosh ijodkorlar bilan ishlash boʻlimi boshligʻi edilar. Yosh ijodkorlar bilan Navroʻzda sumalak qilganimiz koʻpchilikning yodidan chiqmasa kerak. Botirjon aka Yoshlar masalasi boʻyicha oʻrinbosar boʻlib kelganlaridan keyin u kishining suhbatlarini qumsab kelayotgan yoshlar safi juda koʻpaydi. Keyinchalik ularning qoʻl ostida ajoyib jamoa shakllandi. Xullas, shunchalik bu muhitni yaxshi koʻrganimdan norasmiy ishlar edim goʻyoki qadrdonlarim orasida. Shunday kunlardan birida oʻqishlarni bitirib maktabda targʻibotchi sifatida ishlab yurarkanman, Yozuvchilar uyushmasida yarim stavka ish borligini aytishdi. Agar meni qabul qilishsa bajonidil ishlashimni aytdim. Axir, bu ulugʻ dargoh. Shunday qilib Botirjon Ergashev menga ishondilar va shu yarim stavkalik ishga joylashdim. Davlat tashkilotida ishimni boshladim. Balki bu kimlar uchundir oddiy holdir lekin men uchun bu ishonch ayni oʻsha vaqtlarimda juda qadrli edi. Menga imkon bergan uyushma rahbariyatiga, suhbatga kirganimda Oʻzbekiston xalq shoiri Sirojiddin Sayyidning samimiyat ila “Nima deysiz, Nodirjon, bu yigitga” deganlarida, “O‘zimizni yigitku” deya yaqin olgan akamiz Nodir Jonuzoqqa, ish davomida men u kishidan koʻp narsalar oʻrganganim ustoz Minhojiddin Mirzoga, masʼuliyatli vazifalarni ham ikkilanmay bizga topshirib, tajribalarini ayamagan akamiz Gʻayrat Majidga, har qanday masalada biz yoshlarga yordam berib kelgan akam Zavqiddin akaga, barcha xodimlarga ming rahmatimni aytmoqchiman. Oʻsha ahil jamoaning bir boʻlagi boʻla olgan boʻlsam, ishonchlarni oqlay olgan boʻlsam, Yosh ijodkorlar uchun nimalardir qila olgan boʻlsam, demak, missiya bajarildi.  Yoshgina bir xodimni ishga olib, yoʻl-yo‘riq koʻrsatib, ishonch bilan Yosh ijodkorlar bilan ishlash boʻlimi boshligʻi darajasigacha ishonib topshira oladigan beminnat dargoh bu Yozuvchilar uyushmasi boʻlsa kerak. Botirjon aka rahbarligida Yoshlar uchun qoʻlimizdan kelgancha yangiliklar qilishga urindik, Buxoroi sharifda Turkiy tilli davlatlar yoshlari forumi tashkil etildi, Zomin seminarlari oʻtkazildi, 70 nafarga yaqin yoshlarning Birinchi kitoblari nashr etilib taqdimotlari tashkil etildi. Toʻgarak va loyihalar oʻtkazildi. Shunday xayrli ishlarda mana shu tashkilotning bari qalbi daryo insonlari va katta isteʼdodli ijodkorlari bilan birgalikda ishladik. Ma’mura Zohidova opamdan juda koʻp narsalar oʻrgandim, Navoiylik Alisher akam-qadrdonim faqatgina ishda emas hayotda ham doim yordamlarini ayamagan, maslahatlarini qizgʻanmaganlar. Nargiza Asadova opam bilan koʻp vaqt ishlay olmagan boʻlsakda mehribonlik bilan ukalariday koʻrib, doim yaxshilik istab turishlarini unutmayman. Masihulloh Madaminov eng yaxshi koʻrgan ukam – hamkasbim bilan xotiradan oʻchmas yaxshi kunlarni, hazillarga toʻla yillarni, baʼzan sinovli damlarni ham oʻtkazdik. Hulkar Sherzodova singlim, Erkin Hojimuhammad ukam bilan yelib-yugurib, saf tortib xizmat qildik. Shu bilan birga yosh ijodkorlarning masʼulligiga kelgan ustozimiz, xalqning sevimli shoirasi Farida Afro‘zga ham rahmatlar aytib qolaman. Barilarining borlariga shukur. Bunday mehribon insonlar bilan bir jamoada ishlaganimdan doimo faxrlanaman va ilohim bu yaxshi insonlar bilan keyingi bekatlarimizda ham birga yurt koriga yarash nasib etsin. Oʻzbekiston Yozuvchilar uyushmasidan boshqa ishga oʻtayotgandirman. Lekin doimo adabiyot xizmatida qolaman. Yozuvchilar uyushmasi aʼzosi sifatida uyushma bergan har qanday vazifaga tayyorman!

Hammasi uchun rahmat!

Niyatullo Elbek oʻgʻli

“Ish faoliyatimizdan lavhalar”