📃 عنوان القصيدة: فرحة علوية 💚
المناسبة: #عيد_الغدير

١٤٤٠ هـ

▫️▫️▫️▫️▫️▫️▫️

المستهل /

إجينا اليوم نفرح فَرْحَه عِلْوِيَّه
إجينا اليوم نفرح فَرْحَه عِلْوِيَّه

١/

إجينا ابحُب علي هاليوم نتلاقى
إجينا اُو كل قلب مِنَّا الفرح باقه
نهدي إلـ بعض من الورِد باقه
وابحُبه اْنْتِآخَه اُوْ نِهْدِي لِهْدِيَّه

إجينا اليوم نفرح فَرْحَه عِلْوِيَّه


٢/

آخيتك اُو صافيتك اُو صافحتك
فـ الله اُو عاهيديته اُو ايدي ابيَدَّك
ابرُسله و انبيائه عهدي اُو عهدك
رِجلك تدخل الجنه اُويا رِجليَّه

إجينا اليوم نفرح فَرْحَه عِلْوِيَّه


٣/

الحمد لـ الله إمامي المُرتضى حيدر
ابحُبه الفوز باچر والله بالمحشر
سريع اعلى الصراط انسير هالمعبر
ألف هِنيال كلمن حيدر اُوليَّه

إجينا اليوم نفرح فَرْحَه عِلْوِيَّه


٤/

من شِجْرَةْ مُحمد و العِلم بابه
ربي اكتبنا نُوْصَلْ اِنْقَبِّلْ اعتابه
اُو تِسمعنا علي؛ سجِّلنا يا يابه
انريد ازيارتِك هالليله عيديَّه

إجينا اليوم نفرح فَرْحَه عِلْوِيَّه

٥/

لامونا اشكثر هالناس لامونا
مجانين ابـ علي صاروا يوصفونا
مايدروا الوصف بِيه هم يسعدونا!
خلُّوهم يِحِلْمُوْا اْحْلام ورديِّه

إجينا اليوم نفرح فَرْحَه عِلْوِيَّه.

▫️▫️▫️▫️▫️▫️▫️

✍🏻 بقلم / خادمة ولي النعمة ( قصائد ولي النعمة )

رابط القناة بالتلقرام /
https://www.tg-me.com/Qasayidwaliualnaema
رابط الانستقرام /
https://www.instagram.com/k.waliualneama?igsh=aGM4d3R6Ym1xdW91

▫️▫️▫️▫️▫️▫️▫️

🧷 طور القصيدة: يزوار الحسين وياكم اخذوني
https://youtu.be/zrDKThStHEI
.

📃 عنوان القصيدة: أبارك لك 💚
المناسبة: #عيد_الغدير

١٤٤٢ هـ

▫️▫️▫️▫️▫️▫️▫️

المستهل /

‏أبــارك لــك واهـنِّـيـك .. ابـوَلِـيـك اللي تِـنـَّصَّب
يَـ"قلبِي" امبارك اعليك .. "عـلـي" شطَّـار مَرحَب

١ /

علي شطَّار مَرحَب وي مِثاله
علي الكرَّار مَيفر ابقتاله
علي اليرجف عدوَّه من خياله
وعلي نفسه اللي يغمرنا بدلاله
أبو واغلى ولا انغيب اعلى باله
نِفدِّيه بالعمر حِلو الخِصاله

"علي" بليلة غديره .. رفع "قلبي" شِعاره
بتعابير الفخر قال .. (تلوقن لك لِإمـاره)

٢ /

علي الساكن ابقلبي بكل وجوده
علي الآنا وهلي وصحبي اعلى موده
علي الزاير حضرته اينخِّي جُوده
ويسولف بالحِزن الله يعوده
علي من دونه والله الدنيا سوده
علي من فضله لو منهو ايتدوده

"علي" أول فضيله .. في بيت الله مهده
وِاعلنها النبي اليوم .. (يوِّد الله الـ يوِّده)

٣ /

في ذو الحُجه ذوي الأفراح قلبي
رساله امن الله جتني تدلني دربي
بـ "عليِّ" النعمه تمَّت قال ربي
وحُب المرتضى يوجِب لـ حُبِّي
الـ يواليه اُو يقُر به هذا قَر بي
الـ يبغضه لا يجي ويتدنى قُربي

"أميري" امن الله مُختار .. وَ فخر كِلِّي ابـ " أميري "
"ضميري " ما رِضى إلاه .. طـلـع كَـيِّس " ضميري "

٤ /

الحمدلله الذي ابـ درب الوِلايه
جعلني ماسك ابـ هاي الهِدايه
" أمير المؤمنين " اُو حُبه آيه
أعَرف الـ زين واليمشي معايه
عباده " ذِكره " وَاختم بالنهايه
أعيد " المستهل " من البِدايه

أبــارك لــك واهـنِّـيـك .. اِبـوَلِـيـك اللي تِـنـَّصَّب
يَـ"قلبِي" اِمبارك اِعليك .. "عـلـي" شطَّـار مَرحَب.

▫️▫️▫️▫️▫️▫️▫️

✍🏻 بقلم / خادمة ولي النعمة ( قصائد ولي النعمة )

رابط القناة بالتلقرام /
https://www.tg-me.com/Qasayidwaliualnaema
رابط الانستقرام /
https://www.instagram.com/k.waliualneama?igsh=aGM4d3R6Ym1xdW91

📃 عنوان القصيدة: يا خم يا غدير 💚
المناسبة: #عيد_الغدير

١٤٤٤ هـ

▫️▫️▫️▫️▫️▫️▫️

المستهل /

(يا خُم يا غدير) .. (يا درب الأمير)
عليَّه اشهد، أنا اشهد، علي وحده أميري

١ /

(أرض مكه) أشهدي .. من أول مولدي
أوالي حيدره و اللي يحبه آنه اْحبه
(ديار المصطفى) .. ولائي تعرفه
سلم للسالمه آنه حرب للچان حربه

بخُم (المُرتفع) .. كلمن بيه سَمع
عليَّه أشهد، أنا أشهد، علي وحده أميري

٢ /

حجيج الله أسمعي .. أريدچ تعلمي
علي فخري وذُخر عمري من الرحمن رزقي
چنت عاشق إله .. قبل يوم العِله
هذيچ الصخره واتنصَّب أمير الكون عشقي!

(جابر والزبير) .. (سلمان) النصير
عليَّه أشهد، أنا أشهد، علي وحده أميري

٣ /

يَحِسَّاد الولي .. ا "بَّخٍ لك يا علي"
على بوحسين نور العين بسم الله منكم
نِزل أمر البشير .. علي هوَّه الأمير
يشا من شاء يأبى الباء مو نافع بغضكم

القُرب (الجحفة) كان.. افلان اُو يا فُلان
عليَّه أشهد، أنا أشهد، علي وحده أميري

٤ /

اشهدي عاشر سنه .. من الهجره انه
امتثلت البيعة الكرار في ذوالحجه طاعه
و أجدد كلِّ عام .. و ازيد امن الغرام
علي قُربه ومدى حُبَّه يفوق الاستطاعه

يا يوم السرور .. حُبَّه لا يبور!
عليَّه أشهد، أنا أشهد، علي وحده أميري

٥ /

يفاطمة البتول .. يبوالزهره الرسول
يبومحمد عليَّه أشهد وابوالسجاد سجِّل
في سرِّي والعَلن .. علي بقلبي سكن
علي الساقي وأنا الضامي على الكوثر اعوِّل

يا أهل الكساء .. ويا وعد السماء
عليَّه أشهد، أنا أشهد، علي وحده أميري.

▫️▫️▫️▫️▫️▫️▫️

✍🏻 بقلم / خادمة ولي النعمة ( قصائد ولي النعمة )

رابط القناة بالتلقرام /
https://www.tg-me.com/Qasayidwaliualnaema
رابط الانستقرام /
https://www.instagram.com/k.waliualneama?igsh=aGM4d3R6Ym1xdW91

📃 عنوان القصيدة: كاسر لي ظهري 🏴
المناسبة: شهادة أبا الفضل العباس (عليه السلام)

محرم ١٤٤٧ هـ

▪️▪️▪️▪️▪️▪️▪️

المستهل/

كافل لي خدري .. كاسر لي ظهري
قطعوا چفوفه .. وما راد أشوفه
كاسر لي ظهري!

١/

كاسرلي ظهري الذي هو چان سنده
وخلَّاني وحدي أنا و احسين وحده
منهو ال عقب كافلي جرحي يشده
شحالي أنا وخدري ياحسرات بعده

عاف الوديعه .. وظل عالشريعه
شنهي ظروفه؟ .. وما راد أشوفه
كاسر لي ظهري

٢/

من ايدي راح الأخو الماكو مثيله
الوصَّتني اعليه بِنت خيَّه العليله
عبَّاس إذا ما قبل لحسين ايشيله
بلزم عباتي واخوي آنه ال بجيله

يحسين اِخذني .. للي كفلني
القلَّك تعوفه .. وما راد أشوفه
كاسر لي ظهري

٣/

وصلت الشريعه ولقيته ابلايا چفين
و راسه بعمود انجسم ياويلي نصين
واللي ذبحني السهم وصوابه بالعين
حضريله ي امه دخيلچ يم البنين!!!

حضريله حضري .. لعيونه نظري
بدر ابخسوفه .. وما راد أشوفه
كاسر لي ظهري

٤/

قتله أريد أسمع آخر كلمه منَّك
وآخذها طول العمر ذكرات قُربك
بدرب السبي بيها أتسلى وأذكرك
وأتحسر اعليك يمن ماطال عمرك

بس ما حچاها .. الكلمه وبچاها
رايد أعوفه .. وما راد أشوفه
كاسر لي ظهري.

▪️▪️▪️▪️▪️▪️▪️

✍🏻 بقلم / خادمة ولي النعمة ( قصائد ولي النعمة )

رابط القناة بالتلقرام /
https://www.tg-me.com/Qasayidwaliualnaema
رابط الانستقرام /
https://www.instagram.com/k.waliualneama?igsh=aGM4d3R6Ym1xdW91

▪️▪️▪️▪️▪️▪️▪️

🧷 طور القصيدة: راحوا يجدي، الملا باسم الكربلائي
https://youtu.be/CaBvBOfRrnQ?si=HYW-oqatXDx6OgGq
.

عنوان النعي: يستعد للموت 🏴
المناسبة: شهادة مسلم بن عقيل (عليه السلام)

محرم ١٤٤٧ هـ

▪️▪️▪️▪️▪️▪️▪️

تستعد الناس ( ليلة عرفه )
كون تحيي الليل وباچر توقفه
ومسلم الليله بدموعه الذارفه
يستعد للموت وحده بغربته

يستعد ينوي صيامه للأبد
من يذبحونه ويسكن في اللحد
مسلم ابأعمال هالليله اجتهد
و خلَّص الأعمال ساعة ذبحته

الوقفه چانت وقفته قبل الرمي
اُو سلَّم اعلى حسين بزيارة نعي
و الدعاءْ يا زينب الحورا ارجعي
لا تجي للكوفه چانت دعوته

غربته ما تنوصف هذا الوگت
وحسرته اچبيره علىٰ ديچ البنت
أما حيرة وِحدته بيها حِرت!
يا جعل روحي تموت الكسرته!

ايدُور راسه كل كتر رايد مُعين
ماكو بس له إلا رب العالمين
صاح اخيراً بالدمع: رد ياحسين
الكوفه بن عمَّك تراهي خذلته.

▪️▪️▪️▪️▪️▪️▪️

✍🏻 بقلم / خادمة ولي النعمة ( قصائد ولي النعمة )

رابط القناة بالتلقرام /
https://www.tg-me.com/Qasayidwaliualnaema
رابط الانستقرام /
https://www.instagram.com/k.waliualneama?igsh=aGM4d3R6Ym1xdW91

📃 عنوان القصيدة: محرم رد اجه 🏴
المناسبة: إستقبال محرم

#محرم_١٤٤١

▪️▪️▪️▪️▪️▪️▪️

المستهل /

مُحرَّم رد إجه .. مدد يا فاطمه
نِطلبچ وفقينا نخدم احسين

١ /

الحمد لـ الله بُقيت .. اُو للحسينيه جيت
يَمولاتي اُو تِجدد جرحي لحسين

رغم حزني اُو رغم .. هُمومي إلـ عُظم
اجيتچ ناسي كُلشي وابچي احسين

٢ /

هِلاله رد طِلع .. لدلالچ فِجع
اُو كلنا اوياچ جينا نبچي العين

بُقى العالم ظلام .. اختِفى كل الكلام
اُو بُقت بس يالزچيه صرخة (احسين)

٣ /

الحُسين ابكربله .. يَزهرا بالدِّمه
بُقى امعفَّر ثلاثه ابلايه تكفين

نِظر ناسه اُو هلَه .. مُضوا عنه اُو بِچه
وحيد امسى السِبط ماله ولا امعين

٤ /

يَزهرا نوعِدچ .. نواسي امصيبتچ
بالمدلل يَـ يُمه و أسمعي زين

نرد اعلى النداء .. العلى ابكل كربلاء
"الا من ناصر" ابـ (لبيك يَحسين)

٥ /

ابلطم ندمي الصدر .. لـ ربَّات الخِدر
اُو لعبَّاس إلي فِضخوا منه لجبين

لخيل اللي عِلت .. يَزهرا واسحقت
صدر لحسين واويلي اعلى لحسين

٦ /

لـ ليلى والرباب .. اُو رمله والشباب
نِظل انموت حسره اُو يعلى لونين

قلبنا منَّا ذاب .. لـ جاسم والخِضاب
نشيل اشموع عرسه ابدمعة العين

٧ /

لـ زينب بت علي .. اُو صيحتها "هلي"
مدد زهراء حيل إلزينب امنين!

دِ حضري فاطِمه .. اُويا حمَّاي الحِمه
قبل لا زينب اتصير ابدواوين.

▪️▪️▪️▪️▪️▪️▪️

✍🏻 بقلم / خادمة وليِّ النعمة ( قصائد وليِّ النعمة )

رابط القناة بالتلقرام /
https://www.tg-me.com/Qasayidwaliualnaema
رابط التويتر /
https://twitter.com/waliualnaema?s=08

▪️▪️▪️▪️▪️▪️▪️


🧷 طور القصيدة /
دمعتي هامله، للسيد طاهر مكي والملا محمد بوجباره
https://youtu.be/_iUt26ipQYE
.

عنوان النعي: جزاء الحسين لشيعته (ع)

#محرم_١٤٤٦

🔸في رواية عن الزهراء (ع) تسأل النبي (ص) عن من يبكي على ولدها الحسين ومن يزوره ومن ومن... وهو يُقتل في زمن يخلو منها ومنه ومن والده وأخوه، فيقول لها يخلق الله له شيعة. فتسأل وما جزائهم منا؟ فيقول كل فردٍ منهم جزائه، إلى أن يصل سؤال فاطمة للحسين نفسه فتسأله عن مكافئته وهديته، فيقول أنا لمن زارني زائر يوم احتضاره، إلخ.... 🔸

▪️▪️▪️▪️▪️▪️▪️

آه يَمدلل الزهرا .. والله مانك امقصّر
شتهدينا بعد رايد .. وانته هادي المنحر؟!

شتنطينا بعد يحسين؟ .. والله انطيتنا كلشي!!
يالماكو أحن منك .. مستحيين لك نمشي

آه يا سيدي شتنطي .. وانته انطيت بالعبَّاس!
آه يا سيدي ويا ويل .. منطي صدرك المنداس

لأجلنا تهدي اشرايد؟ .. وأكثر بَيش بتضحي؟!
ضحيت ابخدر اختك! .. والهسَّه ابنزِف جرحي

بعد لأكبر بعد جاسم .. بعد عبدالله شبتنطي؟!
وبنتك بالسلب صاحت .. يابويه خذو قرطي!

-

حتى رقيه انطيتنا يا نور هالعين!
حتى رضيعك سيدي سلَّمته للبين
شتنطينا رايد أكثر اشتنطينا يحسين؟!
ما قصرت يابو علي أرحم دليلي

اتقول اليزورك سيَّدي انته تزوره
بوگت احتضاره ماتخليه ابكسُوره!
بلصراط تالي تحضره ابساعة عبوره
يابو الحنان ابحنِّتك هدِّيت حيلي.

▪️▪️▪️▪️▪️▪️▪️

✍🏻 بقلم / خادمة وليِّ النعمة ( قصائد وليِّ النعمة )

رابط القناة بالتلقرام /
https://www.tg-me.com/Qasayidwaliualnaema
رابط التويتر /
https://twitter.com/waliualnaema?s=08

عنوان النعي: اجا عاشور 🏴
المناسبة: إستقبال محرم

#محرم_١٤٤٦

▪️▪️▪️▪️▪️▪️▪️

الحمدلله اِجا عاشور.. اُو بعدني بالحُسينيه
لا مالت بي الدنيا.. ولا غيرك سكن بيَّه

الحمدلله رغم كل حال.. إلي عندك محل باقي
يكافي ارويحتي شكراً.. إلك وإلحضرة الساقي

يبعد الناس والدنيا.. والدلَّال والخاطر
يبعد الروح هاك الروح.. اُو بلِّغني ظهر عاشر

وأموت اعليك خلِّيني.. يالميِّت على شاني
لعل أستاهل الخنصر.. الذي قطعوه يالغالي

وأنوح اعليك فاقد راي.. وألطم قوَّه لك صدري؛
أريد ابهالسنه يحسين.. يفنى ابعاشرك عمري

فلا ليل اهدعش بعدك.. اعيشه ويعتصر قلبي
ونظر زينب يخو زينب..  عليكم بالعتب يربي.

▪️▪️▪️▪️▪️▪️▪️

✍🏻 بقلم / خادمة ولي النعمة ( قصائد ولي النعمة )

رابط القناة بالتلقرام /
https://www.tg-me.com/Qasayidwaliualnaema
رابط التويتر /
https://twitter.com/waliualnaema?s=08

عنوان النعي: قومي يزينب
المناسبة: خروج الإمام الحسين (عليه السلام) من مكة


#محرم_١٤٤٥

▪️▪️▪️▪️▪️▪️▪️

قومي يزينب شدِّي احزام الصبر
حلِّي احرامچ والله سلمي له الأمر
في كربله محفور لإبن أمچ قبر
صار الوگت قومي وشيلي الكربله

قومي أصعدي يمدللـه بضعن الدلال
الما بِيه يبيِّن لچ أثر حتى الخيال
قبلن يزينب تنظرچ عين الرجال
وما يبقى اسمچ بت علي لمدللـه

سار الضعن ومخيِّم اعليه السكوت
يرجف قلب زينب ولا مسموع صوت!
تمشي اُو تناظر للأحبه اللي تموت
اُو مصرع أحِبتها بقت تتخيله

تلفي النظر لحسين اُو تسرح بالخيال
تتخيله طايح اُو مرمي اعلى الرمال
بس التخيُّل والضعن حسَّت به مال!
شنهو يصير ابساعة التنظر إله؟!

تلفي لعبَّـاس النظر وتهضمها لجروح
هذا الحنين اعليها منها باچر ايروح
تحس ابألم بيها بيطلِّع منها هالرُّوح
لمَّن أخوها اتناظره اُو تتأمله

تلفي لواحد واحد اُو تتحسر ابـ "آاااه"
ماتدري منهو تنوح له ومن تبچي فرقاه
تتودع اُو ما تدري من تتوادع اوياه
واحد ظهرها وچم فقد لـ بتحمله؟

▪️▪️▪️▪️▪️▪️▪️

✍🏻 بقلم / خادمة ولي النعمة ( قصائد ولي النعمة )

رابط القناة بالتلقرام /
https://www.tg-me.com/Qasayidwaliualnaema
رابط التويتر /
https://twitter.com/waliualnaema?s=08

▪️▪️▪️▪️▪️▪️▪️

🧷 طور النعي: قالت شربت الماي، للشيخ علي الجفيري 
https://youtu.be/DAGHrMPtezQ
.

📃 عنوان القصيدة: حدِّثيني
المناسبة: وصول الإمام الحسين (عليه السلام) لكربلاء

#محرم_١٤٤٦

🔸الحوراء (عليها السلام) مُخاطبةً للعباس في كربلاء: أخي أحدِّثك بحديث، قال(عليه السلام): حدِّثي يا زينب لقد حلا وقت الحديث،...🔸

▪️▪️▪️▪️▪️▪️▪️

المستهل/

يختي زينب، حدِّثيني بكلشي عندچ
يختي زينب، باچر أو بعده افقدچ
الحديث اسا حله.. من وصلنا كربله
يختي زينب

١/

يختي يازينب عسى بهالنزله ما صابچ تعب؟
بيدي نزلتچ أنا اُو ما واحد الصوبچ قَرب
خيمتچ نُصبت بيديني قولي راضِيته النِصَب؟
قولي شتريدين أٌمري آنه ابرسم الطلب

آمري بس، وأمرچ ابهالعين افدِّيه
آمري بس، فدوه دمعچ لا تِبدِّيه
غيرچ الكافل شِله.؟. من وصلنا كربله
يختي زينب

٢/

طال عمرك يا بعد عمر اختك المتعلقه بيك
ابجالك الأسفار حلوه والتعب يرحل بايديك 
رايده اسأل يخويه من قبل ما أحچي ليك
شنهو إلخاطر تظل لي أمسح اُو أقرا عليك؟

آنه اْريدك، عوِّدت روحي وِصالك
آنه اْريدك، ما أريد أفقد دلالك!
ولا يفرقنا البله.. من وصلنا الكربله
يختي زينب

٣/

وادعيني يختي زينب لا تصعبين الأمر
قولي كل اهموم قلبچ قولي شبقلبچ كسر
هسه يمچ (أبوفاضل) وحده بخيامچ يمر
تالي من بعدي يزينب من يمر لچ بالجبر؟

قولي ليِّه، بالصبر شديتي ظهرچ؟
قولي ليِّه، مستعد للموت صبرچ؟
ابَّالي هاي الاسئله.. من وصلنا كربله
يختي زينب

٤/

ما عليكم صبر ينشد لا تعول اعلى الصبر
بظهري كل هاي اليتامى وظهري باچر ينكسر
انته وحدك يا كفيلي طيحتك تفني العمر
شلون تالي احسين أعاين بالترايب يعتفر

لحظه لحظه، خويه ردوني المدينه
لحظه لحظه، اقبالي لا ينحز وتينه!
ما بعد متجهزه له.. من وصلنا كربله
يختي زينب

٥/

سامحيني يالعقيله وبالعتب لا تحضري
لا تجيني للفرات -اُو حق سكينه- تعذري
غصباً اعلىٰ ( أبوفاضل ) هالبلايا تنظري
شلون هالطف اُو عذابه تحضرينه تقدري!

سامحيني، بليلة الوحشه الكئيبه
سامحيني، من تباتي اعلى التريبه
اوياي جيتي امدلله.. من وصلنا كربله
يختي زينب.

▪️▪️▪️▪️▪️▪️▪️

✍🏻 بقلم / خادمة ولي النعمة ( قصائد ولي النعمة )

رابط القناة بالتلقرام /
https://www.tg-me.com/Qasayidwaliualnaema
رابط التويتر /
https://twitter.com/waliualnaema?s=08

عنوان النعي: أحوال الدلال
المناسبة: شهادة شيخ الأنصار

#محرم_١٤٤٣

▪️▪️▪️▪️▪️▪️▪️

اِدنى يا عمِّي أريد أحچي إلك
عالدلال الزينبي وهذا الجلال
ياحبيب اُو عندي علم امن النبي
تالي شاليجري في أحوال الدلال

عزوتي هالحايطه بيِّه تموت
والله يا عمِّي مؤكد هالخبر
هالقُمر ليجول حولي كل وگت
باچر ايخليني وحدي هالقُمر

آسفه يا عم وأزدينَّـك بعد
والمدد طِلبه لِأن زودي جرِح
شايف الشيبه اللي ذوَّبْتك عِشق؟
ترتفع باچر يَعمِّي اعلى الرمح

يا حبيب احسين باچر ينذبح
بعد ماينخاكم ابدمعه الذروف
انظره بعيوني - يا هَم القلب -
يم جثثكم بوعلي يسعى ويطوف

عمِّي ما يحتاج اقلَّك شاليصير
اعليِّه بعد أهلي اُوقوله مو سهل!
حيل قدَّامي طريق اشقد طويل
يسر، ضرب، احچايه لا ماتِنحمل

آنه بس ياعمِّي كلمه ابخاطري..
الـ أرد اقلها ليك من هذا الكلام
ألـف هنيـالـك شهيـد ابـكربـلـه
وتندفن باچر ترى يم الإمام

وآنه حسراتي أضمها بالقلب..
من بعد كُبر العنا وطول الفِراق
أندفن وحدي وبعيده عن اخوي
آنه بأرض الشام وهُوَّه بالعِراق.

▪️▪️▪️▪️▪️▪️▪️

✍🏻 بقلم / خادمة ولي النعمة ( قصائد ولي النعمة )

رابط القناة بالتلقرام /
https://www.tg-me.com/Qasayidwaliualnaema
رابط التويتر /
https://twitter.com/waliualnaema?s=08

📃 عنوان القصيدة: يعباس 🏴
المناسبة: وصول ضعن الإمام الحسين (عليه السلام) لكربلاء

#محرم_١٤٤٠

▪️▪️▪️▪️▪️▪️▪️

المستهل /

يَعباس .. خويه خايفه اوصَلنا يَعباس
بـعـدك يـاحبيبي مالي حُـراس
هايه كربلا البتشيل چم راس
                    
١ /

ها خويه ياعباس إلي ، تدنَّى أريدن احچي
چنه وصلنا كربلا ، الارض التي بيها ابچي
خَبَّر علي عن هالارِض ،وإلي يصير من انجي
اوياك آنه خويه مدلـله ، بس ابقى لا لاترجي

تروحون .. انتَ اُو خَيّك الغالي تروحون
تعوفوني وحيده ويا لضعون
وبالسطره عموها خويه العيون

٢ /

قال الولي في هالارِض ، حِنّه اُو عِرس لجاسم
مايكمل اُو هم العطش ، اتعبهم الهواشم 
الـ ليلى علي مَيرد ابد ، خل تندبه الفواطم
وطفل الشهور ابدم منحره ، انشوفه اعلى بيّه نايم

والحسين .. واويلي اعلى حِيرة خويه الحسين
بياكتر ايتمدد يعلي الونين
عالعريس ساعه وعالإبن حين

٣ /

ابهالارِض تجري المذبحه ، خويه اُو بقيت بس انته
ناصر لأخوك بعد الاهل ، بس ياعجيبه عفته
ابطبرة عمود اتوذرِت ، اُو حال الأخو ماشفته
بيده الچفوف وايخاطبك ، ظهري يخويه اكسرته

القُمر راح .. يناديني يَزينب هالقُمر راح
سندي احسينچ اتطيحه هالرياح
آخر مانِطق "زينب" ترى وراح!

٤ /

ايظل الحُسين ابمفرده ، حسره اعلى خنصر ايده
آنه اعتذر ما احچي لك ، عن حاله واليصيبه
بس اختصرها والمُهر ، رد يصرخ الظليمه
امصاب السِبط ماتِحتمل ، خلّه إلى العقيله

اشبِديه .. ابنفسي المُهر قدمته اشبِديه
ابنحره قبليته للزچيه
اُو فارقته عزيز الهاشميه

٥ /

ماظل احد راحوا سِوى ، اُو لاظل إلي مُحامي
ليلي يجي وماكو ضُوه ، طايح قُمر سمائي
اْسكت سكينه واردَ ارِد ، اْحاچي رقيه نامي
باچر نروح امقيديين ، اُو كِلها إلينا اتاني

والمتون .. حمره من الضرب خويه هالمتون
قلي اعلينا شـ يشيلن هالعيون ؟
وينك بالقِصاص اعلى الينظرون

٦ /

اسم الله اعلى قلبك بوالفضل ، من كل اذى يجيني
من يشتموني هالعِدا ، اصرخ ولا تِجيني
ادري تِقلي المعذره ، ويني انا وچفيني
آنه لچّني اتضيعِت ، اعتب عليك خليني

حبيبي .. عتبي اعليك هَجرك ياحبيبي
اشتاق الـ حنانك ياكفيلي
اُو شو رحتوا سِوى انتَ وخليلي.

▪️▪️▪️▪️▪️▪️▪️

✍🏻 بقلم / خادمة ولي النعمة ( قصائد ولي النعمة )

رابط القناة بالتلقرام /
https://www.tg-me.com/Qasayidwaliualnaema
رابط التويتر /
https://twitter.com/waliualnaema?s=08

▪️▪️▪️▪️▪️▪️▪️

🧷 طور القصيدة: يخيمات، للملا عمار الكناني  https://youtu.be/Jm6TOEZ83eQ

📃 عنوان القصيدة: زاير وخادم
المناسبة: توسل بشهادة شيخ الأنصار

#محرم_١٤٤٤

▪️▪️▪️▪️▪️▪️▪️

المستهل /

سجل اسمي ياحبيب
سجل اسمي ياحبيب
زاير وخادم مُحب سجل إلى احسين الغريب

١ /

اسمي بالله اكتبه .. في سجل الزائرين
ماتِخَلْص العشره .. دوني وأهلي امسجلين
نحلم احنا ابكربله .. نمشي بين الحرمين
ياحبيب اكتبنا عاد .. هالسنه انزور الحُسين

اشتاق قلبي ياحبيب
اشتاق قلبي ياحبيب
زاير وخادم مُحب سجل إلى احسين الغريب

٢ /

ذاب قلبك يا حبيب .. عالحُسين اُو شوفته
من قبل والساعه هَم .. جيت ركض الـ نُصرته
طِحت قبله ابكربله .. صعبه لنها فرقته
تدري بافراقه أذى .. انطيني بالله ازيارته

طال صبري ياحبيب
طال صبري ياحبيب
زاير وخادم مُحب سجل إلى احسين الغريب

٣ /

عاشِقه انته وخادِمه .. وتفهم ابعشق الخدم
عفت كلشي ياحبيب .. وجيت بس تمسك علم!
ابعينك اتراب الطفوف .. ابعيني جدران الحرم
والعلم ( رايه ) ابـ عزاه .. آنه اْرِفها بالألم

خَلْني اْخدْمَه ياحبيب
خَلْني اْخدْمَه ياحبيب
زاير وخادم مُحب سجل إلى احسين الغريب

٤ /

ياللي عندك منزله .. وزينب اتسلم عليك
ابَّاب خيمتها اوقفِت .. وآنه لايذ بين ايديك
نفس هالوقفه أريد .. ابَّاب مرقدها البريك!
محترق قلبي وأنا .. سلَّمِت قلبي إليك

عالي قدرك ياحبيب
عالي قدرك ياحبيب
زاير وخادم مُحب سجل لزينب والغريب

٥ /

بعد حاجه اسألك .. وانته ليها اشقد أهَل
باچي انته عالخدر .. وضيعته بعد الكفل
داري ليِّه دمعتي .. وخلني (بچَّاي) العمل
ماتِجف إلا بنداء .. "سيِّدي المهدي وصل"

لا تردني ياحبيب
لا تردني ياحبيب
زاير وخادم مُحب سجل إلى احسين الغريب.

▪️▪️▪️▪️▪️▪️▪️

✍🏻 بقلم / خادمة ولي النعمة ( قصائد ولي النعمة )

رابط القناة بالتلقرام /
https://www.tg-me.com/Qasayidwaliualnaema
رابط التويتر /
https://twitter.com/waliualnaema?s=08

📃 عنوان القصيدة: عباس طايح لو أنا؟
المناسبة: شهادة أبا الفضل العباس (عليه السلام)

#محرم_١٤٤٥

▪️▪️▪️▪️▪️▪️▪️

المستهل /

عبَّاس طايح لو أنا الطايح؟
رايح اخويه لو أنا الرايح؟
لَـ اتعشِّم ابصبري .. مانا انكسر ظهري!

١/

ياخويه حاچيني أنا .. حسين الكسرته ابقلبه
طايح لأنك عالتُرب .. وماظال يَمه اُو قُربه
عايف لحضني وشعجب ..و رايد حضنها التُربه!
ياخوي عندي اسأله .. مامن ضمنها القُربه

عالقُربه ما أنشد فلا تهتم
خلَّه يموت ابأهله لمخيِّم
ما ينطفي حرِّي .. مانا انكسر ظهري

٢/

هذا انته طايح يالأخو .. لو طايح آنه ابظهري؟
شوف الأعادي اتشمتت .. كلها تباوع كسري
هذا انته رايح بوالفضل .. لو رايح آنه ابعمري؟
يالغالي چانت شوفتك .. تكشف من الهم صدري

اشبيها العيون التشرح الخاطر؟
جاوبني وآخر مرَّه لي ناظر
اكشفلي هَم صدري .. مانا انكسر ظهري!

٣/

اسمعتك(يخويه)اندهت إلي .. وحيل اخنقتني العبره
لبيك جيت ابركضتي .. اتدلل (يـ ابن الزهره)
شو قِلِّي جتَّك فاطمه؟ .. اُو حضرت لك ابهالصحره؟
هانت دليلك يرتوي .. الماي ابيمين الحُرَّه

ياليت (خويه) منادي من بدري
مو هسَّه و انته اتنازع ابكتري
وعمرك فدا العمري .. مانا انكسر ظهري!

٤/

وينه چفوفك؟ اسألك .. رايد تضمني بيها
قلبي تِعوَّد چم سنه .. ما يهدا إلا اعليها
هدَّتني خويه كربله .. ما ادري منِّي اشليها
منِّي خَذَت صُحبي وهَلي .. وبس موتي اليرضيها

ابعازة چفوفك هسَّه وتضمني
و انته ابسكوتك هذا تهضمني
ما تجبر الكسري؟ .. مانا انكسر ظهري!

٥/

عوف السألته ابأكمله .. وعوفك بعد من حالي
عدمن عفت زينب؟ يمَن .. بس تندهك (كفَّالي)
أختك تموت ابفرقتك .. لو آنه بس دلَّالي!
ما تدري بچفوفك خدر؟ .. وهوايه خدرك غالي

زينب تضيع اُو انته كافلها؟!
وآنه اللي عقبك ما أرد إلها
شباقي القطع نحري؟ .. مانا انكسر ظهري

٦/

ياخويه مو وحدك ترى .. طايح يخي قدامي
يمَّك طِحت آنه اُو بعد .. طاحت عليَّه اخيامي
رايح أنا اُو انته سوه .. اُو هَم رايحه أيتامي
والما يموت امن السبي .. ايموت ابذكر أيامي

طحت اُو يخويه طيَّحِت كلشي
النسوان باچر عالهزل تمشي
الله اليعظم اجري .. مانا انكسر ظهري.

▪️▪️▪️▪️▪️▪️▪️

✍🏻 بقلم / خادمة ولي النعمة ( قصائد ولي النعمة )

رابط القناة بالتلقرام /
https://www.tg-me.com/Qasayidwaliualnaema
رابط التويتر /
https://twitter.com/waliualnaema?s=08

▪️▪️▪️▪️▪️▪️▪️

🧷 طور القصيدة: ياموت اخذني، للملا جبار الحريشاوي
https://youtu.be/kgEjj8nDU2M
.

عنوان النعي: شهادة العباس دون أم
المناسبة: شهادة أبا الفضل العباس (عليه السلام)

#محرم_١٤٤٥

▪️▪️▪️▪️▪️▪️▪️

تعنَّى احسين للعبَّاس، وأم لبنين في باله
ليت ابهالضعن چانت، ابنها تنظر اشحاله
حسره بالقلب كل من، وداع اميمته ناله
وما چانت إلى العباس، أم لبنين موجوده

كل من حضرته أمه، ابوگت ما طاح عالتربان
بس يا ويلي عالعبَّاس، اِلوحده وقع حيران!
ما ودَّع حضن أمه، التي عافوها بالأوطان
واللي يقصد الميدان ، أمه تكون مريوده

حتى احسين نال اوداع، من أمْه فاطمه الزهره!
من لبست عبايتها ، زينب و انطته مُهره
و نوباً عنها ودعتَّه، وحبَّت نحره اُو صدره
بس عبَّاس دون أمه، طاحت رايته اُو جُوده.

▪️▪️▪️▪️▪️▪️▪️

✍🏻 بقلم / خادمة ولي النعمة ( قصائد ولي النعمة )

رابط القناة بالتلقرام /
https://www.tg-me.com/Qasayidwaliualnaema
رابط التويتر /
https://twitter.com/waliualnaema?s=08

📃 عنوان القصيدة: طاح من المطَّهم
المناسبة: شهادة أبا الفضل العباس (عليه السلام)

#محرم_١٤٤٤

▪️▪️▪️▪️▪️▪️▪️

المستهل /

طاح امن المُطَّهم
أبوفاضل يَـ حُرَّه
وجاله حسين محني
يحط ايده اعلى ظهره

ها يا أم البنين .. دلِحقي اوليدچ الحِين

١ /

وقع عباس يَـ امه، ويندا "أدركني يحسين"
اُو وقع عامود لخيم، من صاح "الأخو وين"
غمامة خوف حلَّت ، و زينب شابحه العين

ها يا أم البنين .. دلِحقي اوليدچ الحِين

٢ /

طايح عالترايب ، رباچ ابدمه سايل
قُربله احسين لنه، "منو القربي" يسايل
عماله السهم عينه، ودم باليسره شايل

ها يا أم البنين .. دلِحقي اوليدچ الحِين

٣ /

دخيلچ حِضري لأبنچ، ينازع طلعة الروح
وجيبي الوالد اوياچ ، يداويله هالجروح
تعالي منعي زينب ، لأجل لا يَمَّه اتروح

ها يا أم البنين .. دلِحقي اوليدچ الحِين

٤ /

تعالي يم البنين ، دِ حضرينه ابنچ
دوناً عن الباقي، انحرم بوداعه حضنچ
يقاسي العطش قلبه، د روِّينه ابقلبچ

ها يا أم البنين .. دلِحقي اوليدچ الحِين

٥ /

الزچيه اوياچ جيبي ، اُو سأليها وفيتچ؟
لإبنچ كل بنيني ، فِدا ولصون بيتچ
وهذا أعز واحد ، قُمر مدمي هديتچ

ها يا أم لحسين .. وفيت اوياچ هالحِين؟

▪️▪️▪️▪️▪️▪️▪️

🧷 طور القصيدة: خطاف الأرواح، للملا أحمد الباوي
https://youtu.be/RAyN5-3drMk
.

عنوان النعي: جينا بنزفك يجاسم
المناسبة: شهادة القاسم بن الحسن (عليه السلام)

#محرم_١٤٤٤

▪️▪️▪️▪️▪️▪️▪️


لا تظل حسره في قلبك، وتقول "اذكريني" بألم
كلنا جينا انزفك اليوم ، بالنوب عن أهل الخيم

جينا بنزفك يَجاسم، ولأجلك انوَّج الشموع
لا كسر لك الله خاطر، وماي وردك هالدموع
ياحبيب الحسن انظر، الخاطرك كل هالجموع
والله مانحمل حسرتك، للعرس آه يالشَهم

زفتك هذي يَمعرس ، منها رمله اشقد تخاف
لنها تدري ذبح ابنها ، يصير في يوم الزفاف
وحيل تعبانه العروسه، امبيِّن اعليها الجفاف
لا مهر رادت تريد ، الماي من راعي العَلَم

جينا بنزفك يَجاسم ، وجينا بنجَّمع شباب
ما لقينا علي الأكبر ، وعمَّك العبَّاس غاب
كل شباب أهلك يغالي، امذَّبحه فوق التراب
بالعرس لا ما يحضروا ، بكل كتر منهم سَهَم

جينا بنجَّمع النسوه ، لك تهلهل ياغريب
ما لقينا إلا نسوه ، حيل تاعبها النحيب
هذي ماصارت يجاسم، لا بعيد ولا قريب
كلها مكسوره وحزينه، والوجه يحچي الألم

جينا بنزفك يَجاسم، و رِدنا يحضر لك لأبو
لازم ابعرسك يحضنك، المجتبى ابحضنه الدفو
وبالبقيع الحسن نايم ، ومنك انريد العفو
هذي الزفه يَغالي ، الفرح بيها ما وَلَم.

▪️▪️▪️▪️▪️▪️▪️

✍🏻 بقلم / خادمة ولي النعمة ( قصائد ولي النعمة )

رابط القناة بالتلقرام /
https://www.tg-me.com/Qasayidwaliualnaema
رابط التويتر /
https://twitter.com/waliualnaema?s=08

▪️▪️▪️▪️▪️▪️▪️

🧷 طور القصيدة: ودي أحمل بيدي رايه، للملا عبدالحي قمبر
https://youtu.be/r1eyI5IWNqg
.

📃 عنوان القصيدة: حق الشباب على الشباب
المناسبة: توسل بشهادة القاسم بن الحسن (عليه السلام)

#محرم_١٤٤٦

▪️▪️▪️▪️▪️▪️▪️

المستهل/

يالجاسم أقسم بالمُصاب
حق الشباب اعلى الشباب

١/

قلب الشباب ايناشدك.. ماتت يجاسم روحه
مجروح من هذا الزمن.. وأفراحه هم مذبوحه
شد اعلى قلبه وعاونه.. واستصغي إلكل بوحه
(بحق الشباب) انخاطِبك.. تبريله كل اجروحه

خلّينا عنوان الخِطاب:
(حق الشباب اعلى الشباب)

٢ /

الينخاك بعيون التعب.. شيل التعب من عينه
خفف على قلبه الألم.. هوِّن عليه وعِينه
المسروق منه چم سنه.. رجع عليه اسنينه
كل شاب غايب رجِّعه.. خلَّه يعوِّد لينه

أنهي تعب هذا الغياب
حق الشباب اعلى الشباب

٣/

بحق حسرة أمك يالولد.. حسرات كل أم ناظر
المهدود حيله امن المرض.. وكاسر لأمه الخاطر
هالليله كل أم تسألك.. لأجل الشباب الحاير
ورادوك يبن المجتبى.. تكون إلكسرهم جابر

أنظر قلبهم والعذاب!
حق الشباب اعلى الشباب

٤/

لذنا بشبابك يالذي.. مآذي قلب عمَّاته
يمخلِّي عمَّك هالمسى.. مسموعه له ونَّاته
محسور راس ومختنق.. وماتكفي لك حسراته
بحق الحُسين اُو حالته.. من ردَّك الخيماته

طيَّب قلبنا بالجواب
حق الشباب اعلى الشباب.

▪️▪️▪️▪️▪️▪️▪️

✍🏻 بقلم / خادمة ولي النعمة ( قصائد ولي النعمة )

رابط القناة بالتلقرام /
https://www.tg-me.com/Qasayidwaliualnaema
رابط التويتر /
https://twitter.com/waliualnaema?s=08

عنوان النعي: زفاف القاسم
المناسبة: شهادة القاسم بن الحسن (عليه السلام)

#محرم_١٤٤٤

▪️▪️▪️▪️▪️▪️▪️

( يزفوه يزفوه، اِلقاسم يزفوه )

ناده احسين عالنسوه
بهلاهلهم يشيعوه

( يزفوه يزفوه، اِلقاسم يزفوه )

بسم الله وعلي وأحمد
معرسهم يعوذوه

( يزفوه يزفوه، اِلقاسم يزفوه )

جمال المجتبى اتجلَّى
بزفافه اُو ينظروه

( يزفوه يزفوه، اِلقاسم يزفوه )

دمع العين ماي الورد
وعالقاسم يرشوه

( يزفوه يزفوه، اِلقاسم يزفوه )

"بالمبارك" يصيحوله
اُو يبچون اُو يبچُّوه

( يزفوه يزفوه، اِلقاسم يزفوه )

معرس ما صُبح مثله
مَيهوسوله، ينعوه!

( يزفوه يزفوه، اِلقاسم يزفوه )

عروسه "الموت" ولـ موته
معرسهم يعطروه

( يزفوه يزفوه، اِلقاسم يزفوه )

ودخَّان الخيم تالي
بعد موته يبخروه

( يزفوه يزفوه، اِلقاسم يزفوه )

موش الـ"بيته" اوداعه
للـ "الجنه" يودعوه.

▪️▪️▪️▪️▪️▪️▪️

✍🏻 بقلم / خادمة ولي النعمة ( قصائد ولي النعمة )

رابط القناة بالتلقرام /
https://www.tg-me.com/Qasayidwaliualnaema
رابط التويتر /
https://twitter.com/waliualnaema?s=08

▪️▪️▪️▪️▪️▪️▪️

🧷 طور النعي: إجا الليل، الشيخ زمان الحسناوي
https://youtu.be/CzgtLRg8L18
.

📃 عنوان القصيدة: علي الأكبر وقع
المناسبة: شهادة علي الأكبر (عليه السلام)

#محرم_١٤٤٥

▪️▪️▪️▪️▪️▪️▪️

المستهل /

ويلي.. ابني علي الأكبر وقع.. ويلي
بسيف العدا تقطَّع قطع.. ويلي
شِبه النبي ما ينجمع.. ويلي

١ /

ليش يا زينب طلعتي امن المخيَّم؟
وليَّه جيتي.. رجعي يختي
لا تقولي اعليَّه خفتي مانا باموت!
وتدري انتي.. رجعي يختي
امدللي لازم أجمعه قطعه قطعه
ما أخليه.. رجعي يختي

عودي.. لأم الولد هيئي الخبر.. عودي
باداوي راسه اللي انطبر.. عودي
لا تحچي لحسين انكسر.. ويلي

٢ /

روحي يم ليلى اُوقولي ليها ترجع
لإبني تدعي.. بلكي ايقوم
بصدمة الفاقد اقلَّچ وكلِّي حسره
وآنه احسِب.. بلكي ايقوم
من اجيتيلي نظرته وقلت هانت
ايشوف عمته.. هسَّه وايقوم

ميِّت!.. ما قام إلچ يعني الإبن.. ميِّت
والله انترس قلبي حزن.. ميِّت
واخته تنطره بالوطن.. ويلي

٣ /

مُهره ظل دربه وتعنَّى بيه لعداه
ما تعنَّى.. حضن ابيَّه
راد يلفينا المُخيِّم حيل مجروح
راد يشفى.. بحضن ابيَّه
ألف حسره وحيف ابني بس وِصاله
تالي تلفي.. بحضن ابيَّه!

يختي.. بعد ابني عالدنيا العفى.. يختي
نظري شبيه المُصطفى.. يختي
طبروه في راسه وماكفى.. ويلي

٤ /

راح ألم إبني بعباتي آه يزينب
طول لأكبر.. بالعبايه!
الطلع من عند أمه سالم راح أرجعه
ابكل جماله.. بالعبايه!
بالله عينيني و اِسندي ظهر اخيِّچ
محني ثقله .. امن العبايه!

زينب.. وشلون أرد للوالده.. زينب
بنها الوحيدي فاقده.. زينب
غيره ولا شي رايده.. ويلي

٥ /

امودَّع الله يَبني هسَّه تشرب الماي
ياللي تدري.. شكثر عطشان
اتذبلِّت مو عطش منِّ افراقك انته
هسَّه آنه.. شكثر عطشان
وما أريد الماي صرت آنه أريدن
وگت موتي.. شكثر عطشان

ساعه.. بعدك فلا تحلى بعد.. ساعه
آنه ابغيابك بس جسد.. ساعه
وحتى الجسد دا ينفقد.. ويلي.

▪️▪️▪️▪️▪️▪️▪️

✍🏻 بقلم / خادمة ولي النعمة ( قصائد ولي النعمة )

رابط القناة بالتلقرام /
https://www.tg-me.com/Qasayidwaliualnaema
رابط التويتر /
https://twitter.com/waliualnaema?s=08

▪️▪️▪️▪️▪️▪️▪️

🧷 طور القصيدة: روحي، للملا باسم الكربلائي
https://youtu.be/kPYKgu5qA7c

.