سلسلة أنثى بجد🌹
حلقة ٧
النهارده هنتكلم عن روتين النوم 😴
طيب لحظه وحده هو يعني ايه روتين اصلا..!!
كلمه روتين من غير تفاصيل كتير معناها تصرفات معينه بتتكرر بشكل دوري او بشكل يومي ف وقت معروف ومحدد
على فكره حتى امهاتنا وجداتنا كان عندهم روتين لكل حاجه بالفطره
لكن للأسف النت و الوقت الغير منظم خلانا نضيع وقت كتير بدون اي فايده 😌
ليه اعمل روتين للنوم. ؟!
عشان مينفعش افضل سايبه نفسي لحد ماعيالي يهلكوني خالص وادخل السرير مش شايفه قدامي
مينفعش كا أنثى أهمل نفسي وبشرتي بحجه اني تعبانه وماصدقت ناموا ونمت معاهم
واصحى بقى شكلي مبهدل والهالات تحت عيني قد كده ووشي تعبان و ابص لنفسي ف المرايه نفسي تتسد عالصبح 😂
مينفعش انام كده من غير اي صله مع ربنا وانا مش ضامنه انا هصحي تاني ولالا 😢
& By the way...
النوم اسمه الموته الصغرى.... يعني كأنه موت احتمال تصحى منه واحتمال لا... عشان كده لما نصحى بنحمد ربنا انه ادانا فرصه تانيه للحياه ورد علينا روحنا ❤️
روتين النوم ذكرت جزء منه ف حلقه سابقه لما اتكلمنا وقلنا لازم نغير هدومنا ونلبس قميص نوم مش "لانجري"
حرير او ستان او قطن طويل عالاقل لحد الركبه معاه الروب بتاعه ولو ف الشتا ومتكتكه اوي يعني ياستي البسي بجامه نوم شكلها بنوتاتي وشيك كده وبسيط 💜
باقي الروتين هذكره ف نقاط موجزه وبتغيريه ع حسب اللي تحتاجيه..
📍بحدد ساعه معينه للنوم وابدأ التحضير قبلها بساعه
📍الأطفال بيتعشوا عشان يتقلوا كده ويناموا بهدوء😁
📍بتوضي واغسل وشي بالغسول و اغسل اسناني
📍بصلي ركعتين شفع وركعه وتر "طبعا لو قادره حاولي تصلي كم ركعه قيام ليل الأول" 😍
📍بسبح واستغفر عالاقل ١٠٠ مره وانا لسه ف مكاني علي سجاده الصلاة وبعدها بقرا وردي لو لسه مش قراته ❤️
📍بقرا سوره الملك
📍بلبس ملابس النوم
📍بحط كريم الايد والقدم ونقطه جل صبار للوجه لان بشرتي حساسه جدا 😂
" لو عندك مشكله حبوب او هالات او اي مشكله ف الوجه بتحطي الكريم بتاعه و زيت جنين القمح و كبسولات فيتامين e ممتازه لموضوع الهالات"وممكن تحطي كريم ليلى او سيروم للوجه يعني المجال واسع تختاري اللي ترتاحيله 💜
📍بحط زبده فازلين الوردي للشفايف 😍
📍بسرح شعري والمه عشان مصحاش منعكشة 😁😁
📍بطفي نور الشقه كللله وبنيم الأطفال بعد مابقرأ لهم قصه قبل النوم ونقول دعاء النوم 🌸

الروتين يبان خطواته كتير بس هي اقل من ساعه وتنامي مرتاحه نفسيا وحسه انك عامله اللي عليكي ناحيه نفسك وولادك وربنا طبعا ♥️♥️♥️
#انثى_بجد

سلسلة أنثى بجد
حلقة ٨

النهارده هنتكلم عن مشكله كبيرة في بيوتنا وبتضايق اي راجل وبتطفشه وبتدمر كلمه انوثه بجد 😭
وهي الصوت العالي 🙈
صوتك جايب اخر الشارع ليه يابنتي 😐
سمعاكي ياللي بتقولي العيال ✋
الحقيقه دي مشكله كبيره بتواجه معظمنا هي العصبيه والصوت العالي بسبب الضغط البيت والاولاد
انا متفقه معاكي جدا 💔
انتي ليكي حق تنفجري ف وشهم كلهم وابو العيال قبلهم كمان😂😂
بس تعالي نتكلم بعقلانيه شويه
لما عليت صوتي واتنرفزت وزعقت
حليت حاجه ؟
غيرت حاجه؟؟!
استفدت حاجه؟!!!
الحقيقه ان الطفل لما بيتشخط فيه هو عقله مش بيميز الكلام اصلا يعني بالبلدي كده هو باصصلك ومش فاهم ولاعارف انتي بتقولي ايه وعايزه ايه 😂😂
تعالي نرجعي ورا شويه بالزمن ...لا ورا كمان ... لا كمان كمان
ايووووه stop هنا عند مرحله الخطوبه وماقبلها
الله 😍 شايفه كنتي انثي رقيقه ازاي وصوتك ياسلام ايه ده كناريا ياولاد وجوزك كان نفسه تعلي صوتك شويه عشان يميز بتقولي ايه من كتر الرقه 😂😂
طب ايه بقي.. ايه اللي حصل
طيب انتي عارفه عشان تغيري اي صفه فيكي محتاجه تتعلميها وتدربي نفسك عليها
خلينا متفقين ع قاعده مهمه هتنفذيها ولو حتي تمثيل ف الاول 😉
حاولي ديما قدام اي حد ...اي حد حتي لو اهلك زوجك صاحبتك اي حد بجد صوتك ميعلاش ابدا علي ولادك مهما عملوا لو قدرتي تنفذي النقطه دي صوتك بينك وبينهم وانتم لوحدكم هيوطي بنسبه 70% عالاقل
طب عملوا حاجه غلط حاجه تنرفز حاجه تجنن اعمل ايه👇
هتنفس كويس
شهيق زفير شهيق زفير
هتحرك من مكاني بس لامش هروح اجيب البت من شعرها لا😂✋
ياريت تروحي تتوضي
اتخيلي انك ف مكان تاني مع ناس تانيه بتعملي او بتاكلي او بتشربي حاجه بتحبيها وارسمي ابتسامه ع وشك حتي لو تمثيل 😊
روحي احضني ابنك او بنتك وانتي مبتسمه وعينك ف عينه واساليه ليه عمل التصرف الغلط ده وحسسيه انك ف صفه مش ند ليه مش مستنياله غلطه عشان تعاقبيه وتزعقي وتشخطي هو ملوش اي ذنب تطلعي الكبت والضغط عليه حقيقي 😐

تعالي نفكر ف نتايج التصرف ده ..
📌صوتك معلاش وشكلك كان كيوته ورقيق وعاقل وراسي
📌ابنك مخافش منك ومعاندش وهيسمعك ويتكسف من نفسه علي تصرفه وهيستجيب احسن من الزعيق بنسبه 75%
📌حسنتي جوده علاقتك بابنك انها قايمه عالحب وانك خايفه عليه وبتحبيه وعايزه مصلحته مش عالنديه والضرب والغضب
📌الحب ده بينتقل بعد كده للافراد المحيطين بيكي وبيحسوا بسكينه وانجذاب وهما حواليكي مش متنرفزين منك ومن صوتك العالي وعصبيتك اللي بتوترهم وبتضايقهم ✋

موقف تاني 📍
جوزي بنتكلم واتكلم باسلوب مش عاجبني او فرض عليا راي مش علي مزاجي
مينفعش باي حال م الاحوال ارد عليه الكلمه بعشره وصوتي يعلي وازعق واطلع جعفر اللي جوايا 😨
كفايه جدا نظره عتاب مع سكوت وتقوليله اللي تشوفه ياحبيبي بس كان عندي راي تاني كذا كذا لقتيه متربس خلاص اسكتي دلوقتي متردييييش وحاولي تتناقشي ف وقت تاني بهدوء من غير ضغط هتكون نتيجه النقاش ساعتها احسن بكتييير واهم نقطه انك مش هتقولي كلمه بعصبيه ترجعي تتمسك عليكي وتندمي عليها بعدين 😎

طب عشان اساعد نفسي واقدر اتحكم ف كل ده
لازم تعالجي السبب مش الاعراض
يعني شوفي ايه اللي مضايقك ومعصبك وعامللك ضغط موترك ونظميه وعالجيه وحلي مشكلته ساعتها عصبيتك هتقل كتير وهتقدري تركزي مع ولادك وتديهم حب وحنان وتفهم احسن بكتير من العصبيه والزعيق والصوت العالي وكذلك زوجك اللي بيتوتر من عصبيتك و شايفك بقيتي راجل ف ردود افعالك وتصرفاتك ويبص بره يلاقي السكرتيره ولا زميلته ف الشغل منتهي الرقه والصوت الواطي *زيك كده قبل الجواز * وبيسال نفسه ايه اللي غيرك وعقله الباطن يبدا يديه حجج انك معدتيش مريحاه وانه له حق ينكد عليكي ويعاملك وحش ... 😐😐

هتقوليلي التنفيذ صعب هتقوليلي ابقي بمثل وبضحك ع نفسي هقولك الرسول الكريم قال ايه .. قال انما {العلم بالتعلم وانما الحلم بالتحلم ومن يتصبر يصبره الله} 😍😍😍
📍استعيني بالله
📍اخلصي النيه انك عايزه تحسني من نفسك عشان نفسك وعشان ولادك وبيتك وانك فعلا بتحبيهم
📍اقفلي النت... النت والفيس بوك معمولين عشان وقت الفراغ والولاد نايمين مش عشان وقتنا كله يضيع عليه وبعدين نرجع نتعصب عالولاد عشان نركز ف البوست اللي بقراه او برد ع واحده مستفزه ف عالم وهمي ومناقشه ملهاش اي لازمه
📍اعرفي ان الطفل مرايه اهله وان عصبيتك وصوتك العالي هينعكس عليهم متساليش هما صوتهم عالي ايه وعصبيين وزنانين ليه ✋
📍خصصي وقت لنفسك تفرغي فيه طاقتك وهما نايمين ف هوايه اي هوايه او حتي كلام ف التليفون مع والدتك او صديقه مقربه عشان تطلعي الكبت والضغط اللي عندك بعيد عن ولادك وبيتك
📍هرجع واقولك التنظيم والتخطيط بيفرق كتير ف نظام يومك بحيث ميتراكمش عليكي حاجات كتير فاتتعصبي فاتتوتري فاتزعقي وصوتك يعلي بدون داعي ❤

اتمني يكون البوست مفيد ومكونش طولت عليكم

#انثى_بجد

سلسلة أنثي بجد 🌹
حلقة 9
روتين نوم الاطفال
ليه اعمل روتين ونظام لنوم الاطفال
عشان انا انثي منظمه بيتي كويس 👌
لازم ولادي يناموا بدري ويصحوا بدري حتي لو مش ف مدارس ✋
لازم يناموا بدري ويسيبولي مساحه انا وباباهم نقعد لوحدنا مع بعض شويه نقعد ف هدوووء😎
لازم اقعد ف هدوء افصل منهم عشان اقدر اكمل 💔
طب هنيمهم بدري ازاي ومعايا بيبي بيسهر
طب ليه بيسهر ياحجه ليه ! 👊
البيبي الصغير زي الطفل الكبير بعد مايتم 6 شهور خلاص هتصحيه بدري هينام بدري غصب عنه لانه تعب
دي قاعده لاي طفل عموما
لو عايزاه يصحي بدري مش الصح اني انيمه بدري طب هيجيب النوم منين وهو صاحي بعد الضهر او العصر !!
لكن الصح اني ابدا اعوده يصحي بدري كل يوم نصحيه بدري ساعه مثلا عن اليوم اللي قبله واستحمل زنه والاعبه واسايسه لحد ماوحده وحده يبدا يظبط نومه وينام بدري غصب عنه 👍
طيب كفايه رغي بقي ونبدا نتكلم عن الروتين 😂

1.بحدد ساعه معينه للنوم ولتكن 10 ويبدا الروتين قبلها بساعه 💪

2.وجبه عشا لذيذه يختارها الاطفال عشان يتقلوا كده ويناموا😂 بتخيريهم تاكلوا كذا ولا كذا احساس انه يختار وليه السُلطه ده احساس بيعجبهم اوي ديما خليه يختار وسط خيارات انتي اللي حدديها ع حسب امكانياتك وقدرتك 😉

3.بعد مايتعشوا يجي وقت لم لعبنا ماهو مينفعش ننام ونسيب الدنيا منعكشه وماما وبابا يدوسوا عاللعب ورجلهم تتعور ويزعلوا مننا صح ولالا 😉 يلا نعمل مسابقه ونشغل تايمر قبل مالساعه تدق هنشوف مين اسرع واحد هيلم كل اللعب *الصيغه دي الطف علي قلبهم كتير من كلمه لمي لعبك 😂😂* مع بعض التاثيرات الصوتيه من تسقيف وتصفير وتشجيع وخلافه *ايموشن بيزغرط* 😀

4.نيجي لخطوه غسيل الاسنان عشان السوسه الوحشه متاكلش اسنانااااااا يامامي انا خفت 😂😂
وطبعا النداء الاخير لطياره الدوحه قصددددي للبوتي 😅

5.ندخل السرير انوار الشقه كلها تنطفي ماعدا لمبه صغننه تعمل ونس بسيط كده... كانوا زمان اهالينا يشغلولنا وناسه فاكرينها؟😍😍

6.story time 😍 القصص طبعا شئ اساسي قبل النوم وفي صفحات بتنزل قصص حلوه ومفيده كل يوم زي
حواديت قبل النوم للكاتبة شيماء عبد العال 💜
وحواديت قبل النوم للاطفال بالعامية💛
حواديت ابله فضيلة💚
قصص اطفال قبل النوم💙
وعموما اعملي سيرش ع جوجل او الفيس هيطلعلك قصص كتير

7. بنقرا قران المعوذتين و الاخلاص وسورة الغاشيه *كانت ست كبيرة زمان قلتلي بتخلي الاطفال يناموا بهدوء 😍* وسورة الملك كمان💙 ونقول دعاء النوم *باسمك اللهم اموت واحيا* عشان الاطفال يقدروا يحفظوه بسهوله ❤

8.بوسه وحضن واهم خطوه نطفي الموبايل من ايدينا واي حاجه تخلي الطفل يفضل صاحي او قلقان... نوم يعني ضللللمه وبس 💪

من غير زعيق من غير خناق من غير قرص ولا زغر استعيني بالله ف نفسك اعملي نفسك نايمه واسكتي خالص هما هيزهقوا من السكوت والضلمه وهيناموا باذن الله 😍😍

طيب استفدت انا ايه بقى من كل ده؟
هقولك ياستي
📍اولا الصحيان بدري اليوم بيكون فيه بركه سبحان الله وتقدري تنجزي ف يومك مع ولادك حلو و متحسيش بزهق وضغط ولا تأنيب ضمير ان اليوم بيجري هوا ومبتلحقيش تعملي حاجه
📍الولاد السهر بيتعبهم جسمانيا ويخليهم دبلانين غير لما الطفل ينام بدري ويصحي بدري بفطره ربنا
📍كمان تركيز الطفل بيزيد واستجابته غير لما يسهر ويصحي متأخر وخمان وتعبان ومكسل
📍نومهم بدري معناه انك تقعدي ف هدوء سواء لوحدك أو مع زوجك تتكلموا تهزروا تشوفوا حاجه عال TV اي حاجه المهم تحسوا ان ليكم مساحه شخصيه بعيد عن دوشه الولاد ودي حاجه صحية جدا في اي علاقه

اتمني تكون الحلقة عجبتكم... التطبيق ف الاول يبان صعب لكن مش مستحيل 🤔 كل حاجه كويسه دايما عايزه تخطيط و ترتيب ومجهود مفيش أسهل من انك تسيبي نفسك بدون نظام وتسيبي الدنيا ماشيه كده وخلاص 😔

سلسلة أنثى بجد 🌈
حلقة ١٠ 😍

صحتك ❤️
ايوه زي ماقرتيها كده
صحتك ❤️
صاحيه من النوم مش قادره تقومي وجسمك مكسر وخلصانه من مجهود كل يوم
بشرتك بهتانه صح! وقعده تجيبي في كريمات ومفيش فايده؟!
شعرك بيقع وكل ماتتسرحي نصه نازل ف الفرشه... 😑
واقفه ع رجلك طول اليوم بتخدمي ده وده لحد ماخلاص رجلك ورمت وضهرك قفش 💔
نفسيتك ومودك كل شويه يتشقلب فجأه بدون اسباب واضحه او تستاهل الشقلبه دي وبرضه ساكته ع نفسك!
فين اهتمامك بنفسك وصحتك من ده كله... هتفضلي تضغطي ع جسمك لحد امتى.!!!
موضوعنا النهارده عن الفيتامينات
حاجه مهمه جدااا وللاسف بنات وسيدات كتير مش مدينه اي اهتمام❌
اه الاكل الصحي مهم وانك تحاولي تاخدي فيتاميناتك عن طريق الاكل والمشروبات حاجه صح بس مش هتقدرى تحققي الموضوع ده بشكل كامل عن طريق الاكل والشرب فقط لكذا سبب..
🔹الاكل معدش فيه بركه زي زمان
🔹التلوث اللي بقى ف كل حاجه حوالينا حتى مياه الشرب
🔹كده كده طول اليوم مبتقدريش تاكلي كل يوم كل أنواع الغذاء الصحي المطلوب منك تاكليها "احنا بنلاقى وقت ناكل بالعافيه اساسا 😂😅"
🔹بعض الفيتامينات محتاجه اكل معين بكميات كبيره جدا عشان تاخدي القدر اللي انتي محتاجاه
🔹بعض الفيتامينات جسمك عند سن معين معدش بيقدر ياخدها من الغذاء ولازم تتاخد ف شكل دواء للأسف 😢

لذلك..
في بعض المكملات الغذائيه اللي لازم تركزي عليها ف نظامك اليومي كا أنثى لازم تهتم بصحتها لان لما تقعي محدش هيسندك غير نفسك فحاولي تحافظي ع نفسك ع قد ماتقدري...
زي ايه
زي 👇
📍فيتا زينك : من الحاجات المهمه جدا للبشره والشعر والضوافر ⭐
📍الحديد : لو عندك انيميا ضروري جدا تهتمي بيه
،📍سنتروم : من المكملات المهمه جدااا خصوصا لأي وحده بعد الجواز والخلفه⭐
📍فيت د : عارفه بتاع الأطفال اللي بقطاره ده المفروض كل اسبوع تاخدي قطاره كامله ع كوب ميه
📍فوليك اسيد : من المكملات الغذائيه المهمه لأي بنت بعد سن البلوغ
📍كالسيوم : لازم لأي وحده بعد الولاده والرضاعه بالذات
📍اوميجا ثري⭐
📍عندك مشكله تساقط شعر خصوصا بعد الولاده والرضاعه بالاضافه لأهميه الكشف عند دكتوره جلديه بس البيوتين والبريونين ان وامثلتهم مع الفيتا زينك والسنترم مهم جدا جدا جدا عشان يقلل تساقط الشعر ونفسيتك متتعبش بزياده⭐

على فكره اللي حطه جمبهم نجمه دول من الأساسيات بالنسبالي مش بستغني عنهم مع فيت د باخده كل فتره برضه 😍
طبعا مش كل الادويه دي تتاخد سوا ممكن تبدلي بينهم كل شويه ع حسب احتياجك وممكن تعملي check up بمراجعه الطبيب وينصحك ايه اللي محتاجاه دلوقتي وكل فتره تريحي جسمك برضه ووقفيهم خالص لما العلبه تخلص وبعدين ترجعي لهم تاني...ومتنسيش كل ده + الميه كمان مهمه جدااااا لجسمك وصحتك
لكن ضروري ضروري ضروري تهتمي بنقطه الفيتامينات دي ومتسكتيش ع اي خلل شيفاه ف جسمك او احساسك انك مش طبيعيه لانه هينعكس ع أعصابك المشدوده و ع مودك و ع نشاطك وبالتالي عالبيت كله و ع الناس اللي بيحبوكي
ان لبدنك عليك حق ♥️

#انثى _بجد

سلسلة أنثى بجد🌈

حلقة ١١♥️

النهارده هنتكلم عن البشره مش للوش لا لالا
هتكلم عن الجسم اللي منسي ديما ده 👊

طب ازاي اهتم بجسمي ومعنديش وقت ومطحونه بين البيت والمطبخ والولاد و طلبات البيت 💔
ارجوكي كفايه حجج كفايه تضييع وقت ف كلام فاضي وتيجي للمهم ومهملاه 👊
الموضوع كله محتاج منك ياانثي تنظيم وقت و روتين يومي وروتين اسبوعي تعودي نفسك عليه وبكره بنتك كمان هتتعلم من مامي النعومي القمر يعني ايه نظافه شخصيه واهتمام شخصي وروتين ونظام 😉
امسحي الفيس بوك من فونك والانستاا وكل اللي بيضيع وقت ده واصحي من نومك بدري شوفي اللي وراكي خلصي شغل بيتك بدري لهي اطفالك ف لعبه او تلفزيون او شويه فشار او اكله حلوه بمعلقه وطبق يلغوصوا فيها ويتلهوا عما تخلصي😉

خطوات الاهتمام ببشره الجسم :
1.الشاور اليومي ده حاجه اساسيه مفهاش كلام لازم جسمك يكون نضيف وريحته حلوه كل يوم مش شرط حتي ف الشتا مش عشان مفيش عرق يبقي مفيش حما لاااا صحيح مفيش عرق بس في طبيخ 🍗🍖🍳 وتوم وبصل وتقليه وتشويح و شوي و و و وكل الروايح دي بتعلق فيكي 😱 فامينفعش ابدا تقعدي بيها بعد ماتخلصي يومك ✋
2. الترطيب بعد الشاور اليومي لازم يكون عندك لوشن حلو وبنقطتين ترطبي بيه جسمك كللله قبل ماتلبسي 😍
3.لازم لازم كل اسبوع *روتين اسبوعي* مره عالاقل سكراب للجسم ممكن *زيت زيتون مع سكر وملح وليمون* ممكن سكراب*بن مع سكر وزيت زيتون * ممكن سكراب جاهز زي ملح الحليب وسكراب المشمش وغيرهم عادي خالص بس انا بفضل الحاجات الطبيعيه
4.ازاله الشعر والنضافه دي حاجه مفهاش نقاش كل اسبوع *روتين اسبوعي* اول باول عشان يبقي الموضوع سهل وسريع ومش مؤلم بعد السكراب عشان الشعر اللي تحت الجلد يطلع والبشره تنضف هتزيلي الشعر بالاداه اللي تريحك ف يوم ف الاسبوع هتحدديه ف الروتين بتاعك
5.كل شهر *روتين شهري* بقي لازم مره او مرتين حمام مغربي ومش هقولك بخار بقي و الجو ده انا عارفه العيال وقفين يخبطوا عالباب بره 😂
بس هتنزلي تحت الميه السخنه جامد شويه حلوين وتدهني جسمك صابون مغربي بلدي وتدعكيه بالليفه المغربي من تحت لفوق بحركات دائريه وف نفس اليوم ده بعد الحمام المغربي بتعملي السكراب الي اتفقنا عليه ف الخطوه اللي فاتت

6.كل شهر *روتين شهري* بعد البريود لازم تعملي السكراب والحمام المغربي ثم ازاله شعر بسويت او واكس للجسم كله حتي لو الشعر قصير بس بيزيل خلايا وطبقه الجلد الميت لو في شعرايه لسه باقيه تحت الجلد بيطلعها وكمان بتفتح وتنعم بشره الجسم جدا 😍

دلوقتي انتي عملتي سكراب
عملتي ازاله شعر
عملتي حمام مغربي
دهنتي لوشن ريحته حلوه
جسمك كله بيبرق وفله وريحته تجنن ماشاء الله لاقوة الا بالله 👌
انسى بقى البقع الغامقه والسترتش ماركس والخشونه والجلد الناشف و الشعر المجدر وجلد الوزه والبطه وكل الأفلام دي 🤚
⭕وعلي فكره الروتين مش بيجيب نتيجه من اول ولا تاني مره✋ ده اسلوب حياه لازم تعودي نفسك عليه عشان تلاقي نتايج تعجبك وترجعلك ثقتك ف نفسك واحساسك بجمالك وانوثتك تاني 😍 وظبطي كل النصايح علي قد امكياناتك المهم التنفيذ 👊👊

مفيش حاجه سهله وكل حاجه حلوة محتاجه صبر وتنظيم ومجهود وعدم تضييع وقتك ف كلام فاضي بس صدقيني ف الاخر النتيجه ان شاء الله هتعجبك

اللهم الن لنا قلوب ازواجنا واولادنا كما النت الحديد لداوود عليه السلام 💙

#انثى_بجد

سلسلة أنثى بجد 🌈
حلقة ١٢ 🌸
روتين استقبال الزوج
بسم الله ماشاء الله هو في روتين لاستقبال الزوج كمان 😁
لا وسعت مني كده صح 😂😂🤣
طب انا هصدمك بقى واقولك ايون في روتين لاستقبال الزوج 💜
حضرتك مش لو في ضيوف جاينلك بتقلبي البيت فوقاني تحتاني وتنضيف بقى و اكل وضيافه والعيال بيبرقوا كده من النضافه وانتي تبقى ع سنجه عشره 👊
طب بالنسبه لزوجك الغلبان اللي قرفان طول النهار ف الشغل ولا لو معاه ستات ف الشغل بقى ياسلام على شهيره وبهيره وشياكتهم والفل مي كب والرقه ويرجع يلاقي ابو حفيظه بالجلابيه ف البيت وشعرك طبعا اساسي يعني ملموم وريحتك توم وبصل م الطبيخ والعيال بقى زي ماهما بنعكشتهم والبيت هو وحظه يلاقيه متروق يلاقيه مبهدل عادي ياراجل خش برجلك اليمين يعني انت مش غريب 🤨😒
لا على فكره بقى لحد هنا وتعملي cut كده و stop "دنيا سمير غانم ستايل" 😂😂
ايوه بقى جوزك راجل غريب "مجازا" ... جوزك ماينفعش يشوفك مبهدله ولا يشم ريحه مش لطيفه منك... جوزك مينفعش يسمع صوت عااالي طالع من بره باب الشقه وانتي بتزعقي ف العيال.. جوزك مينفعش ياخد عنك فكره غير انك ست فله وبيتك فلتين.. ولازم يشوف ان العادي بتاعك انك ست قمر ونضيفه وشيك
كفايه رغي ونبدأ ف خطوات الروتين؟! 💪
انتي طبعا عارفه مواعيد جوزك ومعاد رجوعه من الشغل أو من بره عموما هنفترض جوزك بيرجع الساعه ٥ او ٦ مساءاً.... يبقى روتينك بيبدأ قبلها بساعه تقريباً😉
١.الخطوه دي ع حسب سن ولادك بس لو من ٣ سنين وفوق ان شاء الله سهل يساعدوكي
يلا بابا جاي يلا نوضب سوا بسرعه ويلموا لعبهم معاكي ف مكانها وتروقي الشقه عموما والريسبشن واوضه النوم اهم مكان يكونوا متروقين ونضاف ومتعطرين
٢.الاكل يتعلق عليه بنار هاديه عشان لما يرجع يكون سخن وجاهز عالتقديم متتاخريش عليه
٣.الولاد تغسلي لهم وشهم واديهم بالصابون وهدومهم تتغير ويتسرحوا ويتبرفنوا لو حابه تديهم شاور سريع يكون ياريييييت 😍😍
٤.تاخدي دش سريع مش لازم تغسلي شعرك كفايه جسمك وخلي غسيل الشعر مرتين بس ف الأسبوع وتغيري هدومك تلبسي طقم لطيف كده بلاش بجامات ولا جلابيات ابوس ايدك ✋
٥.تسرحي شعرك اي تسريحه مناسبه ممكن تعملي القصه ليس عالسريع او تعملي شعرك بالفرشه الحراريه سريعه وسهله وطبعا مكياج خفيف ومتنسيش لنسز لون حلو لايق عليكي واكسسواراتك لو عندك وقت مناكيرك بلون لايق ع لبسك واوعى تنسى برفانك الفواااااح 😉

اقعدي بقى شغلي ال T. V للولاد وامسكي موبايلك اتسلى عما برنس الليالي يوصل بالسلامه 😁👏👏👏

ولما يوصل متنسيش توصي الولاد يرحبوا ب بابا كويس وانتي كمان تستقبليه بابتسامه حلوه وعيون كلها شوق 😉

يارب يكون موضوع مفيد ومكونش طولت عليكم 🙃

في مقولة انا مؤمنة بيها جدا
{مالم يدرك كله لم يترك كله}
بمعنى ان الروتين في كل حلقه مش لازم تنفذيه بالكامل لكن انا بوضح الصوره كامله على أفضل تقدير وانتي اختاري اللي يناسب ظروفك وإمكانياتك وحاولي تعمليه واكيد اكيد هتحسي بفرق 😍

سلسلة أنثى بجد 🌈
حلقة ١٣ 💚
خلينا متفقين ان النهارده الحلقة موجهه اكتر لربات المنازل اكتر من العاملات او اللي بيدرسوا عشان ملاقيش هجوم وكلمه اجيب وقت منين 😁

بنات كتير بعتوا للصفحه عندي وقت كتير ضايع مش بعمل حاجه مفيده
حياتي بقت عباره عن طبيخ وغسيل و الجري ورا الولاد وبس
طبعا الوحده لو بصت لحياتها بالطريقه دي وخصوصا لما توصل لسن معين بتحس ان حياتها بتضيع هدراً بدون فايده
الحقيقه ان لا خالص ✋
انتي بتشتغل شغلانه مهمه جدااااً🤔🤔
رعايه بيت واطفال وإنشاء اسره سوية ومتزنة ده مش اي وحده تقدر تعمله 💪
بس اتفق معاكي أن حقك تحسي ان ليكي ركن خاص بيكي ف اليوم بتعملي حاجه مفيده تحسي بإنجاز بيه لان طعم النجاح ونشوه الإنجاز دايما بيبقى حلو
هدخل ف الخيارات المتاحه ع طول عشان مطولش عليكي
جربي ده وده وده وشوفي اكتر حاجه بتستمتعي بيها وانتي بتقضي فيها وقتك ودوسي فيها 😉

📍طبعا اهم واول حاجة بجد بجد لااااازم تتصرفي وتخلي ليكي ورد قرآن ثااابت كل يوم بإذن الله لازم يتقري من ٥ صفحات *ربع جزء* ل ١٠ صفحات *نصف جزء* كل يوووم اقل حاجه ولو قدرتي تخليهم ٢٠ صفحه يبقى يارييييت بجد ورد القرآن الثابت كل يوم له مفعول السحر على نفسيتك وعلى حياتك كلها اوعي تهجري قراءة القرآن ولا تتأخري عنه أبداً 💚

📍ممكن تاخدي كورسات اون لاين ف اي مجال انتي عايزاه في كورسات مجانيه ف مجالات كتييير مفيده جدا على كذا موقع
👈منهم موقع ادراك
👈موقع رواق
في كمان كورسات مدفوعه من المواقع الحلوه 👈 المونتير
في دورات على قنوات التليجرام في السعاده الأسرية والعلاقات الزوجيه وتربية الاطفال برضه مفيده جدا واشتراك مش غالي اوي
👈كمان أكاديمية زاد للعلوم الشرعيه حلوه جدا ومجانية
احساس لما تتمي الكورس وتجتازي الامتحان وتاخدي شهاده باسمك جميل جداً جداً وبتحسي بإنجاز حلو 😍

📍ممكن تقري كتب مفيده في اي مجال محتاجاه تثقفي نفسك فيه
كتب عن العلاقات الزوجيه والاسريه
كتب عن تربية الأطفال
كتب دينيه
روايات عشان تعيشي مع ابطالها وتفصلي عن العالم المحيط بيكي شويه 😆

📍حبيتي تتعلمي كروشيه تتعلمي تطريز تتعلمي ديكوباج تتعلمي رسم تتعلمي خياطه تتعلمي تفصيل تتعلمي صلصال حراري تتعلمي تشكيل سيراميك تتعلمي حلويات تتعلمي اكله معينه شوفتيها عند حد او في مطعم وعجبك تتعلمي طريقه عصيرات تتعلمي طريقه تفريز الاكل لرمضان تتعلمي ازاي تحطي make_up باسراره وتكاته ... اليوتيوب والبينتريست مش قادره اقولك العالم كله بين ايديكي كميه فيديوهات تعليم مش طبيعيه انتي نفسك هتقولي كانت تايهه عني فين دي متساليش حد دي اتعلمتيها ازاي ولا منين لا النت بين ايدك Google it واقري واتعلمي وطبقي وجربي مره واتنين وتلاته وهتكتشفي موهبتك وتبدعي فيها كمان

📍حفظ القرآن دلوقتي بقي أسهل من الاول كتير في اكاديميات تحفيظ اون لاين كتير وفي جروبات واتس انا جربت مجموعه عالواتس اب اسمها دوحه الفرقان جزاهم الله خيرا بصراحه متابعه وتحفيظ وتفسير وكل حاجه او ممكن تشوفي مدرسه تحفيظ او معلمه تحفظي معاها تجيلك البيت هيكون افضل افضل

📍ممكن تحضري محاضرات دينيه او دروس تنميه بشريه او علاقات اسريه و زوجية او عن تربية الأطفال عاليوتيوب صدقيني هتستفيدي جدا جدا جدا وهتفرق ف بيتك وشخصيتك وتعاملاتك اليوميه وعلي فكرة الفيديوهات دي مش بتكون طويله ولا ممله زي منتي متخيله لا في مدربين كتير بيكون الفيديو من ٧ ل١٠ دقايق بحد أقصى واكيد الوقت ده هيكون افيد كتير ماتضيعيه عالفيس والانستا ف بوستات ومشاكل وكلام فاضي مش هيفيدك باي حاجه 🙃

📍ممكن تشوفي شغل تسويق اون لاين من البيت سواء لمنتجات او حاجات تقدري انتي تعمليها ف البيت
وتسوقيلها عالفيس والانستا واي سؤال ف التسويق الالكتروني انا تحت أمركم درست فيه كورسات برضه ليه معرفش😂 بس هو حب استطلاع يعني والحقيقه اتبسطت بالكورس جداً 😍😍

الموضوع عايز تنظيم وقت +صحيان بدري +ترتيب أولويات + نبطل نضيع وقت عالسوشيال ميديا والمواقع اللي بتسرق الوقت بدون فايده ✋

الوقت الخاص بيكي ممكن يكون بعد مالولاد يناموا او بعد صلاة الفجر أو قبل مايصحوا الصبح تصحى قبلهم بشوية ده انسب وقت بجد تقدري تستفيدي بيه ف هدوء لوحدك 👍👍

انتي بقى قوليلنا بتقضي وقتك الخاص ف ايه مفيد؟! 😍😍


#انثى_بجد

سلسلة انثى_بجد 🌈
حلقة ١٤
النهارده كلامنا عن تاج راس اي بنوته... شعرها 💜
طبعاً الشعر من الحاجات اللي عايزه اهتمام جامد جداااا عشان يديكي اللي انتي عايزاه... نعومه وطراوه ولمعان
فعلاً فعلاً قد ايه شكل الوحده بيختلف لما بتهتم بشعرها وتعمله ويديها ثقه في نفسها
اكيد لا انتي ولاجوزك مبسوطين بلفه الكحكه بتاع الشعر ليل ونهار 😔
الاهتمام بالشعر عايز شويه مجهود وروتين حلو مش اقل من ٣ ل ست شهور عشان يديكي نتيجه حلوه 👌
يلا نبدأ الخطوات؟! 😉
📍حمام الزيت دي حاجه كده مش اختياري اصلا... هو ده غذا الشعر هو ده اللي بيغلفه ويطريه وينعمه
وع حسب احتياج شعرك
لو خفيف محتاجه حمام زيت خروع
لو عايزاه يطول ويطري يبقى حمام زيت زيتون اصلي وبكر
لو عايزاه يطري وينعم يبقى حمام زيوت اللي تقدري تجبيه منها حطيه وهي كالتالي
(زيت لوز حلو +زيت جوجوبا + زيت جوز هند +زيت ارجان) ولو عندك زبده شيا هتحطي معلقه وتسيحيهم ف حمام مائي وبتدهني الفروه كويس جدا والشعر كله و تغسليه بعد ساعتين
ممكن تنوعي بينهم عادي لأقصى استفاده
📍من الحاجات اللي مهمه جدا قص أطراف الشعر كل ٤٥ يوم ليه
عشان يطول ويتقل و تقصي الأطراف المتقصفه اللي بتدمر الشعريه وتقسمها نصين فايبقي شكله صحي
📍حمام الكريم والبلسم دول ضروريات مش رفاهيات خالص
وان كان لازم تستغني عن حاجه فاهي الشامبو مش البلسم وحمام الكريم ✋
وحاولي طبعا تكون منتجات خاليه من الباربين والسلفات والصوديوم
📍غسيل الشعر دايما هما مرتين ف الأسبوع مره بشامبو وبلسم ومره بحمام كريم نوع كويس لانه بيطري للشعر وينعمه جدا
📍الغذا وشرب الميه والمكملات الغذائيه بقى هما الاساس
لازم خضار وفاكهه خصوصا الجرجير بجد مهم جدااا يكون كل يوم ف السلطه بتاعتك او مع الفطار مع جبنه مثلا
وشرب الميه هو اللي بيطري كل حاجه ف جسمك مش بس شعرك
📍بعد غسيل الشعر بننشفه كويس منسرحوش وهو مبلول عشان ميقعش نستنى عليه شويه لما يبقى مندي بتدهني بقى زيت ارغان او سيروم او كريم تسريح خفيف بس انا بفضل زيت الارغان نقطه كده او سيروم وتسريح الشعر يكون من تحت لفوق بفرشه خشب أسنانها واسعه
📍عمايل الشعر بالسشوار او الفرشه الحرارية او البيبي ليس ازاي اعمل شعري ومياخدش وقت عشان الخمس تلاف حاجه اللي ورايا.. هقولك على سري اللي ببنجز جدا معايا ماشاء الله
١.اول حاجه برش سبراي ضد الحراره عالشعر عشان احميه وممكن البديل نقطه بالمرز المخصص لكي الشعر
٢.بقسم شعري اربع أجزاء غير القصه 😂
٣.بمسك كل جزء كده عالسريع بالفرشه الحراريه بجد بتنجز جداا بتفرد الشعر وتظبطيه بس مش بتكون بيرفكت يعني 😕
٤.الشعر خلاص اتفرد بس عايز تكه كمان عشان يبقى ناعم وميهشش بعد شويه
٥.زي ماهو متقسم وتدوسي بقى بالبيبي ليس كده على كل خصله كم مره
٦.لحسه بالمرز بقى صغنونه او سيروم
كده خلاص انتي جاهزه وشكلك زي القمر 😍😍
📍وشوفي طريقه عمل الشعر الصحيحه بالبيبي ليس عاليوتيوب الأول عشان تبقى سريعه ومتمكنه فيها وتعملي صح 👏👏
📍لو مش عايزه تعملي شعرك ليس ممكن وجوزك بالنهار في الشغل تلفيه كحكه لقدام اه شكلها يضحك انا عارفه 😅 بس لفيه كده بالنهار وقبل مايجي بشويه فكيه هتلاقيه جميل بإذن الله ومفرود 😍
📍كمان اليوتيوب وجوجل مليانين صور تسريحات بسيطه وسهله وجميله دوري وشوفي اللي يناسبك وغيري كل فتره وهاتي توك و هيد باندات كده عسوله ودلعي نفسك
📍 لو عندك مشكله تساقط شعر او فراغات او قشرة روحي اكشفي ومتكسليش دي حاجه ميتسكتش عليها ✋

اتمنى يكون البوست مفيد ومكونش طولت عليكم 😊

اللهم صل وسلم وبارك على سيدنا محمد في الأولين وفي الآخرين وفي الملأ الأعلى الي يوم الدين بقدر حبك له صلاة تكفيني بها شر ما أهمني 💙
#انثى_بجد

سلسلة أنثى بجد 🌈
حلقة ١٥ 🌹
"الجزء الأول"

هنتكلم عن موضوع مهم جداااا لأي انثى
ركزي معايا الله يرضى عليكي
أنثى يعني نضافه وريحه حلوة... وريحه حلوة ونضافه يعني انثى
وصلت..؟
مش مقتنعة!
طب اقولك حاجه بسيطة كده عالماشي
عن رسولنا الكريم عليه الصلاة والسلام قال في الحديث ايه،
«أَيُّمَا امْرَأَةٍ اسْتَعْطَرَتْ فَمَرَّتْ عَلَى قَوْمٍ لِيَجِدُوا رِيحَهَا فَهِيَ زَانِيَةٌ، وَكُلُّ عَيْنٍ زَانِيَةٌ»
وقال كمان صلَّ الله عليه وسلَّم: «أَيُّمَا امْرَأَةٍ أَصَابَتْ بَخُورًا فَلَا تَشْهَدْ مَعَنَا الْعِشَاءَ الآخِرَةَ»
وكماااان قال صلَّ الله عليه وسلَّم: «أَيُّمَا امْرَأَةٍ تَطَيَّبَتْ ثُمَّ خَرَجَتْ إِلَى الْمَسْجِدِ لَمْ تُقْبَلْ لَهَا صَلَاةٌ حَتَّى تَغْتَسِلَ»
لا استنى لحظه لسه مخلصتش 😅وايضاً قال صلَّ الله عليه وسلَّم: «لاَ تَمْنَعُوا إِمَاءَ اللهِ مَسَاجِدَ اللهِ، وَلْيَخْرُجْنَ تَفِلَاتٍ» ومعنى «تفلاتٍ» أي: «تاركاتٍ للطِّيب».
ده مش درس ديني على فكرة 😁.... دي بس شويه أحاديث تبين قد ايه اهميه العطر وان ريحه البنت تكون حلوه ومتعطرة حاجه خطيره وتجنن اي راجل

قوم ايه بقى ياست الكل 🤔
الاقيلك وحده خارجالي بره البيت بالبادي الكارينا الجميل تحت اللبس مش مغسول وملبوس عشرين مره قبل كده واحنا داخلين عالصيف وجماله وريحه فعلا صعبه وتقولك ماهو التعطر بره البيت حرام ماشي حبيبه قلبي حرام بس برضه اللي انتي عملاه ده ميرضيش ربنا يعني النظافه من الإيمان برضه 😮

مثال تاني جوه البيت بقى تلاقي الأخت طول النهار تنضيف و شغل بيت وطبيخ وبصل وريحتها مقلوبه وجوزها يرجع وهي بنفس ذات اللبس عاااتي عاااتي هي هتقطع نفسها يعني لكن يشم بره زميلته ف المكتب اللي ضاربه برفيوم فرنساوي اصلي عاااتي برضه عشان يندم ويتوب الى الله انه فكر يتجوز ويحس بغلطته 😒😒

لابجد في ايه؟؟ 😂😂
على فكره النظافه والريح الطيبه لا محتاجه فلوس ولا إمكانيات حضرتك ولا في مبرر للمواقف دي ابداً✋

عموماً موضوع النهارده هنقسمه لجزئين على حلقتين ....
الجزء الأول هنتكلم عن ريحتنا بره البيت والجزء التاني هنتكلم عن ريحتنا جوه البيت 😉

احنا هنتفق انه حرام التطيب بره البيت بس برضه حرام تخرجي بريحه مش لطشيفه وتأذي وتنفري الناس حواليكي 😐

📍الدش اليومي شئ لابد منه للجسم لمى شعرك ارفعيه وغطيه ببونيه بلاستيك و نغسل الجسم ف عشر دقايق مش هتاخدي اكتر من كده مفيش حجج ولا اعزار 👊
عندك شاور جل ريحته جميلة اوك حلو معندكيش هاتي صابونه وليفه وادعكي مش هيقول لا 😁

📍تركه مهمه وانتي دخله الحمام خدي معاكي نص لمونه هتدعكي بالعصاره بتاعها وقشر الليمونه نفسه منطقه الابط الموضوع ده مهم جداااا مش هتلاقي ريحه عرق تاني وكمان بيبيض المنطقه ويخليها فله 😍

📍بعد الدش لازم ديودرانت "مزيل رائحة العرق" طبعا الأنواع كتير انتي وإمكانياتك طب مش حابه استعمله يبقى تستعملي مسك مطحون مع شبه... في بودره معطره للجسم برضه جميله جدا ممكن تستعمليها يعني اللي ترتاحيله استعمليه

📍الهدوم هي خارجه او اتنين بالكتير وتتغسل خصوصا وباء الباديهات الكارينا ده 😑 وياريت لو تستعملي منعم اقمشه بريحه حلوه برضه بيخلي ريحه الهدوم فريش وحلوه 😍

📍طب انا خارجه ومش هينفع اخد دش وحسه ريحتي مش تمام بسيطه جدا هدخل الحمام عالحوض بالليفه والصابون هدعك تحت الابط و تحت الثنيات الجلديه لمنطقه الصدر واغسله بالميه عالسريع جدا واحط الديودرانت او البودره الخطوه دي مش هتاخد معاكي خمس دقايق.

📍الوايبس اختراع كويس جداً ممكن تختاري وايبس بريحه خفيفه وحلوه لو بره لوقت طويل وحسيتي نفسك عرقتي جامد بتدخلي الحمام تمسحي الجزء العلوي من جسمك بالمنديل المبلل مش هيظهر ليكي اي ريحه مش حلوه بإذن الله وتفضلي مرتاحه وواثقه في نفسك 😍

لقائنا ان شاء الله في الحلقة الجايه مع الجزء الثاني " التعطير جوه البيت" وده بقى فيلم تاني خاااالص 😉😎

اتمنى يكون البوست مفيد ومكونش طولت عليكم 😊


#انثى_بجد

سلسلة أنثى بجد 🌈
حلقة ١٥
"الجزء الثاني"♥️
اتكلمنا في الجزء الأول عن ريحتنا بره البيت وازاي نحافظ عليها حلوه وف نفس الوقت مش متعطره ولا ملفته
النهارده ان شاء الله هنتكلم عن ريحتنا "التعطير" جوه البيت 😍
اهه ده بقى فيلم لوحده تبدعي فيه براحه راحتك 😉
الراجل من الحاجات اللي فعلاً ممكن تجننه في اي ست هي ريحتها... مابالك بقى مراته حبيبته حلاله اللي لازم تكون ريحتها بالنسباله احلى من اي ست تانيه... 😁
طبعاً احنا متفقين من الاول ان كل حاجه بعملها لنفسي وبس عشان احس نفسي حلوه ومرتاحه نفسياً بس ميمنعش تنوي لله انك بتتزيني وتعفي زوجك ده برضه أجره كبير جدا عند ربنا والرسول قال انه أجره زيه زي الجهاد في سبيل الله 😍😍
الخطوات ببساطه:

📍الاستحمام اليومي خطوه اساسيه بعد ماتخلصي طبيخ وياريت لو بشاور جل او صابونه ريحتها حلوه بترفعي شعرك وتغطيه ببونيه بلاستيك مش هتاخدي غير ٥ دقايق 🌹

📍مننساش تركة النص ليمونه اثناء الشاور اللي اتكلمنا عنها ف الجزء الأول 😎

📍ممكن آخر الدش " لو " عندك ميه ورد بتحطي شويه ف ابريق ميه مليان وتصبيه عليكي اخر شطفه بيدي الجسم ريحه حلوه واحساس بالانتعاش جداً

📍فرشة سنانك ف ايدك معجونك في ايدك التانيه 😁 اوعي تنسى تهتمي باسنانك وبوقك ريحه البوق مهمه جداً 👌

📍استخدام الديودارنت "مزيل رائحه العرق ✔️ مش مزيل عرق ❌" او الشبه ببودره المسك او مسك خام تحت الابط.

📍استخدام لوشن للجسم بريحه حلوه تدهني الجسم كله سريعاً قبل ماتلبسي هدومك عشان جسمك يفضل ناعم وريحته حلوه.

📍معطر الجسم body mist ده برفان معمول بريحه مش مركزه عشان تترش عالجسم لو عندك حساسيه جلديه بلاش منه.

📍دايماً البرفيوم حاولي تنقي اللي مكتوب عليه eau de parfum مش اللي مكتوب عليه eau de toilette
ليه بقى 😁 لان الاولاني بيكون عطر مركز وبيثبت إنما التاني مخفف وبيطير بسرعه وخلي جوزك ينقى معاكي البرفيوم عشان يكون ع ذوقه وبعد لما تفهمي ذوقه هاتي لوحدك 😙

📍الملابس الداخليه دايما تعطريها "من جوه" بمسحه مسك ابيض سائل خام موجود عند محلات العطاره الكبيره وطبعا ف الخليج موجود في محلات القرشي والعربيه للعود وغيرهم

📍في مخمريات للشعر و والجسم بتدي ريحه حلوه و ثابته لحسه صغنونه كده عالشعر واماكن النبض هتكوني تماااام 😉 لو معندكيش مخمريه شعر يبقى لازم تستعملي شامبو وبلسم ريحتهم حلوه وكمان السيروم او كريم الشعر يكون ريحته حلوه واوعى تلفيه كحكه وهو مبلول عشان ميكمكمش 😷

📍في تركه صغنونه ف السكراب لما تعمليه للجسم " اتكلمنا عنه في حلقة الاهتمام ببشره الجسم " بالسكر والملح والليمون وزيت الزيتون "السكراب ده بينعم جدا ويوحد لون البشره ويطلع الشعر اللي تحت الجلد 😅" ممكن تضيفي عليه معلقه زيت ورد ريحه الجسم بتكون وهمممم وكمان بيفتح البشره مع الاستمرار

📍طبعاً هدومنا دايما نضيفه ولو فيها ريحه طبيخ عالغساله ع طول

الخطوات تبان كتير لكن الحقيقه بالروتين مش بتاخد منك اكتر من ١٥ دقيقه ف اليوم 😍😍

اتمنى يكون البوست مفيد ومكونش طولت عليكم 😊


#انثى_بجد

و افتكري دايماً إن 👇
#ما_لم_يدرك_كله_لم_يترك_كله ✋

⛔️ نصائح للزوج حتى لا يخسر زوجته

✅ النصيحة الاولى لا تهمل

✅من أهم النصائح التي يجب على الزوج ان ياخذ بها في علاقته بزوجته ان لا يهملها فلا يقتل الحب و الود في قلب المرأة الإهمال، فإذا كنت محبا لزوجتك حقا، حافظ عليها و أرويها من نهر الإهتمام حتى تشبع منه، و تشبعك هي الاخرى حبا، و حنانا و اهتماما.

✅النصيحة الثانية : لا تكن قاسيا

✅المرأة لا تحب الرجل القاسي، و يأسرها الرجل الحنون، العطوف، الذي تجد في حضنه الأمان، فإياك أن تقسو على زوجتك، فالقسوة باب مفتوح لخلق الكراهية، وإذا كرهتك زوجتك، لم تجد معنى للحياة معك، سيحدث الانفصال بينكما مهما حاولت منعه.

✅النصيحة الثالثة : لا تُهينها

✅أن أهانة الرجل لزوجته، تحط من قيمته، و قدره عندها بدرجة كبيرة، وتسقط من نظرها، فإياك أن تهين زوجتك او تجرحها، فالمرأة و على الرغم من عاطفتها قوية لا تنسى من أساء إليها، و أهانها، لذلك كن رجلا حكيما و احترم زوجتك و لا تقلل من شانها أبدا، تكن أسعد الناس، فالرجل الذي يقدر زوجته و يحترمها يكون تاج على رأسها، تعمل على راحته، و لا تفكر الا في أسعاده

✅النصيحة الرابعة : لا تكن سليط اللسان

✅فالرجولة لا تعني ان يطلق الرجل لسانه على زوجته، و ان يتعمد جرحها بالالفاظ المشينة التي تسيء اليه هو اولا، لذلك كن متحكما في ما ينطق به لسانك، فالكلمة كالسيف قد تقطع كل حبال القرب و المودة بينك وبينها، و قد تكره الحياة معك، مهما كنت محبا لها، و متمسكا بها.

✅النصيحة الخامسة : لا تحجر على رأيها

✅عزيزي الرجل،
ان الرجولة لا تتمثل في منع المرأة من حق أخذ مشورتها في امور الحياة الزوجية و مشاكلها، لأنها طرف، و طرف مؤثر في الحياة الزوجية، و لا يوجد أستحالة في أن يكون رأيها هو الرأي الصواب في حل الأمر محل النقاش، و عليك أن تعلم أن من تمام الرجولة أن يحترم الرجل رأي زوجته حتى ولو لم يقتنع به.

✅النصيحة السادسة : لا تخيب رجائها فيك

عليك عزيزي الرجل أن تعلم أن المرأة، تحب ان تشعر بوجود زوجها في حياتها، و بدعمه لها، فأنت السند لها، فلا تخذلها وقت حاجتها إليك و لا تبعد عنها أبدا وقت الشدة، حتى لا تسقط من نظرها..

رسالة.للزوج
🌼‏الأزواج الأذكياء يحرصون على سعادة وراحة زوجاتهم..
ويعتبرون نجاحهم في إسعادهن سعادة لهم ؛..
👌أما من يستمتع في التنكيد والتنغيص عليهن فهو يعاني من خلل في شخصيته ويحسن به أن يبحث عن علاج لمشكلته تلك ،...
💥 وبالطبع الأمر يشمل كذلك الزوجات اللائي يتصفن بنفس الصفة السلبية .!

🌼الزوجة أمانة عند الزوج ،..
فيجب عليه إحسان معاملتها/
= قولاً : بكلام حسن وعفّة لسان ،
=وفعلاً : بمعاملة كريمة ...
○لقوله تعالى :
" وعاشروهنّ بالمعروف فإن كرهتموهنّ فعسى أن تكرهوا شيئاً ويجعل الله فيه خيراً كثيراً " ،
○وقول النبي – صلى الله عليه وسلم - : " لا يفرك مؤمن مؤمنة ، أن كره منها خلقاً رضي منها خلقاً آخر " أخرجه مسلم .
○ وروى أبو هريرة رضي الله عنه في الحديث المتفق عليه عن النبي –صلى الله عليه وسلم – أنه قال :
" استوصوا بالنساء فإن المرأة خلقت من ضلع ، وإن أعوج شيء في الضلع أعلاه ، فإن ذهبت تقيمه كسرته ، وإن تركته لم يزل أعوج ، فاستوصوا بالنساء " .

○وقال عليه الصلاة والسلام : " خيركم خيركم لأهله ، وأنا خيركم لأهله " –صححه الألباني – . 

نصيحة منى عف زوجتك
لان عفة الزوجة مش معاشرة وبس
كل امراة احتياجاتها مختلفة عن التانية
اساس الزواج انك تعف زوجتك.
وظيفتك من يوم ما اتجوزت هي زوجتك واولادك
انت كزوج مطلوب انك تعف زوجتك بحسابات زوجتك بحساباتها هى
مش بحساباتك انت ولا حسابات اهلك
لو زوجتك تتعف بالمغازلة .. عفها بالمغازلة
لو زوجتك تتعف بالحنية كون احن مخلوق عليها

لو زوجتك تتعف بالكلمة الحلوة دور على احلى كلام الدنيا
دا ربنا حلل الكدب على الزوجة فى المغازلة والكلام الحلو يااخى
لو زوجتك تتعف بانها عايزة حد تتكلم معاك .. اتكلم معاها بعيد عن الواد والبت والاكل
الفيس مليان ماتسيبهاش تتكلم مع صحبتها ولا اى حد غريب
فضي نفسك ليها واتكلم معاها بدل ما تدور على اللي تتمنى تفضفضله
لو زوجتك رومانسية .. كون رومانسي

المهم هى عايزة ايه وانت عايز أيه
مش انت فاضي لايه وعايز ايه
على فكرة انت ممكن تاخد منها رموش عينها بس بالطريقة الصح بالحب بالكلمة الحلوة
زوجتك هى قرة عينك فلازم تعتنى بعينك عشان ماتتعبكش
وعلى فكرة هتتسأل عن ده عن عفة زوجتك الزوجه الصالحه هي الأمان والزوج الصالح كنز

النقطه التانيه : كل ست تقدر تخلي جوزها يجي زي الحمل الوديع يشرب من ايدها ..
الدفه في ايدك انتي ...
دايما تلاقي واحده تشتكي من انها عاملة لزوجها كل حاجه ومش عاجبه ، لا هو مش عاجبه ، هو حساباته غيرك ومش هيطمر فيه لانه مش عايز ده .. الموضوع بسيط ..
هو اصلا مش عايز كل ده يكون علي حسابه ، هو عايز يجي يلاقيكي صاحيه تحكي معاه شوية حتي لو قصرتي في الباقي هو عايز كده
غيره عايز يجي يلاقي العيال مصحصحين وقاعدينله ..
غيره عايز يرجع يلاقي شموع وورود ..
غيره عايز يرجع يلاقكي علي سنجه عشره .. المهم هو عايز ايه مش انتي فاضيه لإيه
وهتتسألي عن ده ، عن عفه زوجك ، لانك انتي مسؤلة عنها واعرفي انك لما بتعفي زوجك بتعفي مجتمع بحاله لان ساعتها جوزك مش هيبقي زي المسوخ اللي في الشارع دول ..

تاني بقولك : عفي زوجك بحساباته هو ، لا حساباتك ولا حسابات اهلك ..
ومتروحيش تشتكي لصاحبتك ..
لأ صاحبتك بتعف زوجها بحسابات زوجها واللي هي مختلفة عن حسابات زوجك فمش هتفيدك بحاجة
انتي كده عملتي اللي عليكي معاه وتمام وعلامات ان ده تمام انك تلاقيه مايبصش بره .. هو عامل زي واحد شبعان قعديه علي سفرة مش هيبص لحد لانه شبعان حتي لو ماأكالش بس هو شبعان ..
وخلاصه القول ....
ماتحكيش لحد علي مشاكلك ، الحسابات مختلفة من بيت لبيت وممكن يتهد بيتك مش يتعمر وهما ميقصدوش
ماتحكيش لانك كمان وانتي بتحكي تتصابي بعين في حاجه بتعمليها وغيرك مش عارفة تعملها
حافظي علي بيتك .. والله الطلاق ده حاجة بشعة و 90% من اللي إتطلقوا ندموا وان لم يعترفوا بذلك
إنتي لو قعدتي اتكلمتي مع زوجك وفهمتوا بعض .. 80% من مشاكلكم هتتحل .. لا دي مش هتحصل من أصله.

وانت كمان عف زوجتك ... عفها بالستر .. عفها بعدم الاهانة .. عفها بالمعاملة الطيبة .. عفها بحنانك واحتوائك لها .. عفها بانك متبصش لغيرها .. عفها بانك تكون سندها .. عفها بالأمان .. عفها بكلمة حلوة تهون عليها تعب اليوم والاولاد .. عفها بانك متقلش منها قدام اهلك .. عفها بانك متقولش عيوبها وتتريق عليها
ليك دور زى ما هي ليها دور
ربنا يبارك في بيوت المسلمين وينزل عليها الراحة والسكينة والمودة والرحمة

5 حيل ذكية للتعامل مع الزوج الغير رومانسي🍃🍃

في الحقيقية قد يكون هذا الأمر صحيحًا بالنسبة للرجال العاطفيين، ولكن ماذا عن أولئك الرجال الذين لا يعرفون أي سبيل للرومانسية.

بالطبع هؤلاء في حاجة ماسة إلى بعض الحيل الهامة حتى تنعمين معهم بحياة زوجية رائعة:

التحدث بصراحة🍃
تجهل الغالبية العظمى من النساء أن الرجال بطبيعتهم يفشلون في قراءة ما يجول بخاطر زوجاتهم، لذا ننصحكِ أن تخبريه عمّا تريدينه وعمّا تحتاجين إليه بمنتهى الصراحة.
 
التحدث بصراحة🍃

ولكن انتبهي على عدم انتقاده لأن هذا الأمر سيؤدّي حتمًا إلى ازدياد الوضع سوءًا، بمعنى إن كنتِ تودّين أن تذهبا سويًّا إلى عشاء رومانسيّ، قولي له أنكِ ترغبين في الخروج معه للعشاء وانتظري ما سيقول.

الابتعاد عن اللوم🍃
ليس معنى أن زوجكِ غير رومانسيًّا، أنه لا يهتمّ بكِ أو لا يحبّكِ، لذلك ابتعدي تمامًا عن لومه على شخصيّته؛ لأن هذا العتاب لن يوصلكِ إلى أيّ مكان بل سوف يجعله غاضبًا منكِ وسوف يؤثّر ذلك على علاقتكما الزوجيّة.

عدم مقارنته بالآخرين🍃
من أكثر الأمور التي لا تجدي بنفعًا مع الرجال هي مقارنته بالآخرين؛ ببساطة شديدة لأنكِ عندما تقارنيه بشخصٍ آخر كزوج صديقتكِ، زوج أختكِ... فأنتِ بذلك تقولين له أنّ هنالك أشخاص آخرين يقومون بعملٍ أفضل منه وهذا الأمر سيشكّل ضربة قويّة على غروره ولن يساهم بالتالي في جعله رومانسيًّا.

التصرف برومانسية معه🍃
أما هذه الحيلة فتجعله يرى بوضوح كيف تكون الرومانسيّة، فمثلًا قومي بدعوته إلى عشاء أو قدّمي له هديّة من دون مناسبة، وبهذه الخطوة، سوف يعرف زوجكِ أن الرومانسيّة أمر جميل وسيصبح عاطفيّ أكثر فأكثر معكِ.
التصرف برومانسية معه

تقدير ما يقوم به🍃
حتى وإن كانت الإيماءات الرومانسية الصغيرة التي يقوم بها لا ترضيكِ، إياكي وإظهار الأمر بل قدري له لطفه واشكريه على ذلك حتى تشجّعينه بطريقة غير مباشرة على القيام بتصرّفات مماثلة إضافيّة.

📮، ، ،
رسالة للمتزوجين:
▪️اتق الله في شريك حياتك وكن وفيًًا له.. سعيدٌ من ظفر بهما في حياته الزوجية(التقوى،الوفاء).


▪️أكثر من الدعاء بالتوفيق، واعلم أن الصبر والقدرة على تحمل المسؤولية عوامل نجاح أساسية لحياتك الزوجية.
▪️الكمال والسعادة الدائمة ليسا هنا بل في الجنة، لذا لابد من بعض التنازلات لتستقر حياتكما وتسعدا ببعضكما.


▪️حياتك الزوجية من أثمن اﻷشياء التي تملكها..واﻷشياء الثمينة نبذل جهدا عظيما للحفاظ عليها ولانفكر يوما أن نتخلى عنها، إلا إذا صار ضررها أكبر من نفعها بكثير ففي التخلص منها مخرج و سعة.


▪️كل شيء يمكن أن يتغير، كذلك شريك حياتك قابل للتعليم والتطوير، عليك بالتوكل والسعي في الارتقاء به للأفضل مع الصبر الجميل، وسيثمر ولو بعد حين بإذن الله.


▪️غياب عبادة احتساب اﻷجر في التعامل بين الزوجين متعب نفسيا، وهو من الأسباب التي تهدم الحياة الزوجية، فاحرصا على احتساب الأجر في تعاملكما معا، أدام الله بينكما المودة والرحمة وأسعدكما، وحفظكما الحفيظ.