راجع ،
بطرگ الحزن ،
خسران مدري انبعت ،
بس الجرح تذكار

راجع وطن من حرب ،
حزني أعله گد الچثث ،
ميت و ادور ثار



جواد زغير

يلاهي الذنب بالمكتوب ..؟
لو بچفوف ناسي وذمة الساعي ..؟

يـ رب كلشي وعى أمخضر ..
نشف عمري وخضارك ما چهب گاعي

يـ رب الماي ..
انه شما عذبتني الريح احمدك واحمد أشراعي


جواد زغير

أعثر يا غريب " اولايتك عثره "

لا تنشد ولا شباچ ...
نوبات النشد كفره

و نوبات اليضيع " أمرايته تعذره "


جواد زغير

خفت لا تنچفي الظلمه أعله شباچي ،
وضواك بكل كتر يطفه

وخفت لا ينثلم طاريك ،
وألگه أبين أصابيعك عطش صبير ، شايل للرمل لهفه

أنه شبيدي ،؟
گلتلك ديرلي جروحك ،
ونين المحترگ ما ينگضي بـ صدفه

ولو حتى الونين انباگ


جواد زغير

خضرتلك ..
شوگ
ومناطر
و آه
وما أجيت


جواد زغير

من العطش ،
لـ أخر ( تعال ) مدثره بماي السواجي يفيض حيلي
من الوجوه الباهته لـ كلشي عزيز يضيع ليلي

بيه جيل من التعب يبچي أعله فيّه
و بيه يامه من الهوى ينوح أعله ريه


جواد زغير

(ضالة بكلبي)
بصوت : مصطفى عبد الامير

يل حبست الصوت غني

غني من يمته التراب يضم موواويل المناير
غني تلگه الصوت مفتاح المگابر

لا تگلي الماله شباچ إعله دنيا يحب ضلامه
ولا تگلي العاشك السكته سلامه

هاك چفي وأنحت الشباچ واتلگه ضواك
ياربيع أولايتك مني شخذاك


جواد زغير

يا حلالي
ليمته أدورك بالهوى
نسمه لشهگتي وما أشمك

يا خرز حلمي البعيد شلون ألمك


جواد زغير

شثگل حزنه ؟

اليطشر واهسه أعله البوب ،
ويرد تاكل بگلبه حچاية الـ محد



جواد زغير

مسافر
والسفر مرواح للملتم

شما ألتفت للعشرين،
أشوف العمر سفرة هم



جواد زغير

شوگ من ؟
هذا اعله جيدك

ليل من ؟
هذا الـ يصليلك گمر

يا وحيد ،،
أشرب ضماك ،،
الگاع تتلگاك ميت ما أتغنيلك نهر


جواد زغير

يا أبنادم تكبر المن ؟!
موش عمرك ،
هذا شباچ السهر

وهذا حزنك رب غميچ

تنطر ألمن ؟
فايضه الدنيا حبايب ،
وانت عمر الطيف عمرك ،
لا ركدت بـ عين نثيه أ.ولا تعللت بـ رفيچ



جواد زغير

أسولف من ؟
وانه بيا حال ؟

غربة ناهبه ،
أ.ولا باب سولفني ،
شفت حتى الوطن كتال

وين أرچيك يا گلبي ؟
سجن والدنيا كلها أحبال


جواد زغير

ضيع بس ليوين حـــدك ؟
أ.و وين حد هذا الضباب

يا غريب ،
الغربة من تكبر بدنيا تفيض بوب
و'چفك من سِنين ما ضاحكله باب


جواد زغير

خسرتيني ،
و جزيتچ شوف فارگ عين

ولچ يا ظلمة أسنيني الحنين أنباگ ،
باچر طين يعطش طين


جواد زغير