Орзуга мактуб

1

Кўзимнинг нури, паризодам, малагим менинг. Ўзингизни тутишингиз, кўнглимни тушунишингиз, тенгдошларингизга қараганда оғир-босиқлигингизни билардим. Аммо кечаги суҳабтимиздан кейин... сиз билан катта мавзуларда ҳам бемалол суҳбатлашса бўлишини англадим ва мактуб ёзишга қарор қилдим.
Куни кеча гимнастика тўгарагига тўлов қилаётиб, кассир аёлнинг “Бу ойдан курс нахри ошди, ҳа энди кўчада ҳамма нарса ошяптида, ойиси, тўғри тушунасиз”, – деган гапи қулоғимга кирмай хаёлга толиб қолганимни англадим. Аслида мен унинг бироз олдин “Орзу ҳам жиддий тайёрланяпи, мураббийсининг айтишича, уч ойлардан кейин мусобақага чиқишни бошлайди”, - деган гапидан ҳаяжонда эдим.
“Орзу ҳам мусобақаларга чиқишни бошлайди!” Бу гап хаёлимда Орзу Жаҳон чемпиони, Олимпиада чемпиони... кейин юртимиз байроғи, Ўзбекистон мадҳияси баланд минбарларда янграй бошлади, қарасам, кўзимда ёш қалқияпти. Кейин сергак тортдим, боланг мусобақага чиқишга тайёрланяпи холос, ўзингни бос, аввал тенгдошлари, туман, шаҳар, Республика деган босқичларга ҳали қанча бор-у, сен тайёргарлик жараёнларидаёқ йиғлаб ўтирсанг дедим ўзимга ўзим.
Сиз иккига кириб-кирмай инглизчада бешгача адашмай санаб берганингиз учун боғчадан пуфак ва тароқ ютиб келидингизда дадангиз уйнинг гоҳ у бурчагида, гоҳ бу бурчагида, гоҳ дераза олдида ёруғ чиқади деб хона тўрида суратга олиб қариндошларга инернет орқали юбориб “Менинг Орзумни ютуғини кўрдингларими, мени қизим-да у, ўзимни қизим”деб мақтанганини, аммангиз ҳали интернетга киришга вақти бўлмай кўришга улгурмаган экан, “Нега қарамайсиз, опа, тезда киринг, кейин гаплашамиз”, деб телефонни қўйиб, сизни елкасида миндириб дўкондан шоколад олишга шошганини яхши эслайман. Аслида дадангизнинг ҳар қанча мақтанса арзигулик истеьдоди, билими бор эди, бирга яшаб бирор мартта мақтанганини кўрмаганман... Бироқ фарзанднинг кичик ютуғи ҳам ота-она учун ҳар қандай тарози палласини босиб кетадигандек туйилар экан.

2

Жасорат ва матонат уйғун жойда бадиий гимнасика пайдо бўлади. Модомики, майдонга чиқар экансиз сизга айтарларим бор, унутмассиз. Куни кеча илк қадамларингизни ташлаб биз, томон келаётганингизда йиқилсаниз йиғламаслигингиз учун дадангиз “Уррааа, Орзу маладеееес, Орзуга гап йўқ,” деб олқишлаб кўтариб олардилар. Сиз туғилганингиздаёқ бизга ота-она мақомини берди Худо. Сиз биз учун ҳамиша ғолибсиз, ҳамиша биринчи! Ҳадемай тўртга кирасиз бемалол юроласиз, аммо майдон — уйимиз ҳовлиси эмас.

Аввало ғолиб бўлинг, мабодо йиқилдингизми, олқиш кутманг, шарт ўрнингиздан туриб кейинги сафар ғолиб бўлиш учун тайёрланинг! Ютсангиз мағлубнинг олидида ғалабани сокин қабул қилинг, йиқилган одамнинг олдида қувончдан қичқириш ноқулай. Ғалабани табиий қабул қилинг!
На ҳукумат, на одамлар, ҳеч кимдан ҳеч нарса кутманг, то абад Ватанга беминнат хизмат қилинг.

Бу юртнинг ташқи қарзлари, ривожланган давлатлар қаторига киролмаётгани ҳақида кўп гапиришади, сиз кўп меҳнат қилинг, ҳеч бўлмаса сизнинг соҳангиз миллатни ёруғлик томон бошласин. Агар ҳамма шундай ўйласа, ўзининг соҳасида ҳалол меҳнат қилса ҳеч қандай ташқи қарз бўлмайди. Ҳалол бўлинг, унутманг, ҳалол инсонларнинг авлодисиз. Бу халқ ёмон халқ эмас, дадангиздан ажралган, осмон ҳам уввос солиб йиғлаган, кунимиз тунга дўнган куни халқ, Ватан ёнимизга келди. Келганининг ўзи минг тиллодан қимматлироқдир. Сиз, укангиз, мен–ҳаммамиз ватанимизга хизмат қилишимиз керак.
Онам дадамни қатиқ яхши кўрган, ҳурмат қилган деган фикрлардан олдин дадангиз қанчалик закий инсон бўлганини хаёлингизга келиришингизни хоҳлардим. У арзирди, севгига, эҳтиромга, ҳар қанча эъзозга, арзирди.

Қачон янги кўйлак кийсангиз дарров “раҳмат, аяжон”, - дейсиз. Йўқ, бу кўйлаклар, кунора ейдиган шоколадларингиз, гимнастика харажатлари ҳозир ҳам дадангизнинг зиммасида. Сизлар 18 га киргунингизча дадангизнинг ойлигидан маълум қисмини давлат сизларга бериб турибди, мен ҳеч нарса қилганим йўқ. Ризқингизни кўпини дадангиз сабаб беряпти Худойим. Характерингизда зарра камчилик бўлса мен сабаб, барча яхши жиҳатларингиз Дадангиздандир!

Шунинг учун ҳам дадангиздан миннатдор бўлинг, унинг номини кўкларга кўтаринг, унинг хотирасига эҳтиромда бўлинг, унинг ишончини оқланг, у биз билан. Мен эса олимпиада чемпиони бўлганингизда йиғламай, кулиб кутиб олиш учун ўзимни тайёрлаб тураман. Сизларга ишонаман, Жонимдан ёдгорларим, жонларим!
Онангиз,
Шоҳсанам
2025

CHEMPIONLARGA

Ey siz, turnaqator saflarim mening
Ukalarim mening, alplarim mening.
So‘zdan ko‘zmunchoqlar taqaman desam
Tiriladi Sug‘diy xatlarim mening.

Bahor endi keldi O‘zbekistonga
Ey siz, Alpomishning azim otlari.
Kaftini duoga ochgan el nomin
Kiftida ko‘targan azamatlari.

Vatan omon bo‘lsin, siz omon bo‘ling,
Men ham to‘ylab keldim to‘ylaringizga.
Ukalar, aylanay, she’rim tasadduq,
Kelinlar yarashiq bo‘ylaringizga!

Shohsanam NISHONOVA

Орзу билан суҳбат

Тилим ютган дунёда
Турфа савол сўрайсан.
Яшин урган кўнглимни
Яшилликка ўрайсан:

–Онажон, юлдуз нима?
–Дадангнинг кўзи, болам.
–Шеър нима?
–Худо берган
Дадангнинг Сўзи болам.

Шамол руҳим девона
Қилган жунун сочлари.
Кўкда бургут эмас, йўқ,
Дадангнинг қулочлари.

–Она нима, сиз кимсиз?
Айтасан такрор-такрор:
–Мен ҳеч ким, бу дунёда 
Даданг билан Худо бор!

Ш.Н

Lavoziming oshgan sari xoksor, kursing balandlagani sari ko‘ngling yanayam samimiy bo‘lib boryapti. Ko‘z tegmasin, Do‘stijon, xayrli bo‘lsin!

✍Shohsanam Nishonova
🎤G‘anisher Rajabboyev

***

Тонг нозанин,
Тунлар ойдин,
Эртаклар чин дамлар эди.
Ухлатгали бувим бизни
Бўжи билан алдар эди.

Менга қизиқ эди ахир,
Қандай бўлар Олабўжи?
У ҳам ўйин ўйнайдими,
Биздаймикан, юзи, кўзи?

Эртакда ҳам, ҳаётда ҳам
Бир бор экан, бир йўқ экан.
Мудроқларга ором бору,
Уйғоқларга кун йўқ экан.

Баски, чўпчак тингламоққа,
Етармикан энди тоқат.
Уртўқмоқлар урса магар,
Юрагимга урди фақат.

Тўп-тўп чиқди атрофимда,
Тўда бўжи, гала бўжи.
Токайгача тугамайди,
Олабўжи, олабўжи!

Aй, бувижон, наҳот ҳануз
Ердан баланд учолмайман.
Наҳот энди бўжилардан,
Ухласам ҳам қочолмайман.

Ш. Нишонова

2021

Dilimning tub-tubidagi soʻzlar...

Bu she'rning o'ziga xos ruhi va mazmuni juda chuqur va ma'noli. U insonning hayotga bo'lgan munosabatini, vaqt va mavjudlikning o'zgaruvchan tabiati haqida tafakkur yuritadi.
Ushbu betaktor she'rda hayot va vaqtning o'zgaruvchanligi, insonning o'zini tushunishi va ularga qarshi turish imkoniyatlari haqida o'ylashga undaydi. She'rning birinchi qismida, "dunyo—chodir" va "umr—daryoga timsol" kabi iboralar orqali, yozuvchi hayotni o'zgaruvchan va tez o'tuvchi narsalar sifatida tasvirlaydi. Bu erda "chodir" va "daryo" obrazlari hayotning o'zgaruvchan va cheksiz tabiatini ifodalaydi, inson esa bu holatlarda baliqchi yoki kampir kabi turli vaziyatlarda bo'lishi mumkin, har biri o'z joyida va o'z vaqtida o'zining shaxsiy qiyinchiliklari bilan kurashadi.
She'rning keyingi qismida esa vaqt va kuchning ma'nosi chuqurroq yoritiladi. "Tanda tugaydi quvvat" degan satrda, insonning jismoniy va ruhiy kuchi cheklanib, vaqtning o'tishi bilan tugashi ta'kidlanadi. Ammo, "So'zsiz yengguvchi vaqtni yengish mumkin So'z bilan" degan g'oya hayotning eng katta qudrati so'zda, fikrda va ruhda ekanligini ko'rsatadi. Bu fikrni shunday tushunish mumkin: vaqtni yoki uning ta'sirini yengish, insonning ichki kuchiga, ma'naviyatiga va so'zlarning kuchiga bog'liqdir. So'zlar orqali inson nafaqat boshqalar bilan aloqada bo'ladi, balki o'z vaqtini, hayotini anglab, unga qarshi kurashadi.
Yumshoq va ma'noli uslubda yozilgan she'r insonni o'zini va atrof-muhitni qayta baholashga, vaqt va hayotning haqiqiy mazmunini tushunishga chaqiradi. O'ylash va so'zlash orqali vaqtning ta'siridan chiqish mumkinligi fikri, ayniqsa, bugungi kunda juda dolzarb va ilhomlantiruvchi bo'lib, har bir kishi o'z hayotini o'zgartirish uchun so'z va fikr qudratiga ega ekanligini bildiradi.
Shoira Shohsanam Nishonovaning  barcha  sheʼridagi  har bir  satr ajabtovurdir.  Shoiraning sheʼrlarni oʻqir ekanmiz, koʻnglimizga oʻzgacha surur bagʻishlaydi. Shohsanam Nishonova adabiyot olamida yashayotgani nafaqat oʻzining, balki bizlarning ham koʻnglimizni shod etadi...

***

Kim aytgan dunyo—chodir,
Umr— daryoga timsol?
Balki baliqchi choldir,
Balki kampir xastahol.

Tanda tugaydi quvvat
Ko‘rolmassan ko'z bilan.
So'zsiz yengguvchi vaqtni
Yengish mumkin So'z bilan.

Shohsanam Nishonova

Dildora Ilhom qizi

✨️ SHEʼR ✨️
✍️Shohsanam Nishonova
🎙Abdulaziz Oltinov
💻Nazar Sobirov

SESSIYA
Sessiya. Bir yilda ikki imtihon,
Guruhdoshlarimga qarayman bir bir.
Yoqam tishlangancha beraman savol:
Bizlar…bizlar..bizlar doʻst edik axir

Kibor nigoh bilan qaragancha soʻng,
Dilga oʻq qadaysiz nechun qadrdon?
Ishoning, mana shu soʻzimga qasam:
Yordam soʻramayman sizdan hech qachon.

Ertaga oʻtadi navbatdagisi,
Oʻylasam yuragim titilib borar.
Qoʻrqaman, kimlarning niqobi tushib,
Kimlarning vijdoni sotilib borar.

Dahshat. Bir chekkada yigʻlaydi koʻnglim,
Odamlar odamday boqmas muloym.
E vohki, imtihon shu qadar boʻlsa,
Qiyomating qanday boʻlar Xudoyim?

Yoʻq, yashab boʻlmaydi bunday havoda,
Xonani tutadi oʻtli bir ovoz:
Mening bahoyimni “bebaholar” ga,
Tengdan boʻlib bering, roziman ustoz!

Shunda yoʻqolgaymi orada nifoq?
Shunda qaytgaymikan, oʻrtaga mehr?
Shunda koʻrinarmi, bor samimiyat?
Paydo boʻladimi, soʻzlarda sehr?

Soʻng, chiqib ketaman, kengliklar tomon
Aytmayman, qancha dil tigʻlaganimni.
Bilaman, bilmaysiz oʻsha kuni men,
Qiyomatni oʻylab yigʻlaganimni.
2015
Sh.N
🎤Davronbek Hamidov

Qashqadaryo, rahmat!!!!

Ассалому алайкум, ўзанимизнинг асилзода ўқирманлари! Келаётган ҳайит айёми дунёга, юртимизга, хусусан, хонадонингизга тинчлик, бахт, қувонч, кўнглингиздаги хоҳ ошкор, хоҳ пинҳон эзгу тилакларингизнинг ижобатини олиб келсин. Энди муддаога ўтсак))))

Биламан, тақдирлаш кунини интиқ кутяпсиз. Ўзимда ҳам ҳаяжон , қўрқув, олдингиздаги масъулият ҳисси чексиз.

"Қанот"лойиҳаси доирасидаги китоб тақдимотининг чўзилганининг сабаби, юқоридаги китобнинг чоп этилишини кутганимизда эди. Ахир Сизга янги китоб улашайлик дедик😍. Бир қошиқ қонимиздан кечасиз деган умиддамиз. 🙈
Келинг, сизга ҳам, бизга ҳам ҳайитлик бўлсин, ғолиблар ва мукофот "чўғи"ни 🥇💸💸 кўпайтирдик.

Шунинг учун видео ва тақризларингизни 17 июнгача бемалол юбораверинг, иштирокчилар қаторига қўшиб қўямиз. Зора, олдингиздаги хижолатчилигимиз шу билан ариса.

Тақдирлаш 30 июнь куни Миллий Матбуот Марказида бўлиб ўтади. Дуоларингизда эсланг, дуоларимдасиз! Бизнинг манзил: @Odiljon_qizi

***
Гўзал ўтди болалигимиз,
Асрадилар қордан, қировдан.
На рамазон айтиб ўтдим мен,
На ҳайитлик кутдим бировдан.

Ҳовучимиз тўла ҳолва-ю,
Гул тутдилар, тутмадик тикан.
Янги эди кўйлакларимиз,
Ҳар кунимиз бир ҳайит бўлган.

Хон эмасдик, тўра эмасдик,
Унни сувмас, сутга қорамиз.
Қийналгандир эҳтимол бизга,
Сездирмаган ота-онамиз.

Мурувватинг чексиз, биламан,
Раҳим айла, ёрлақа мани.
Ҳайитликлар сўраб қошингга,
Келдим рамазонлар айтгани.

Тинчлик бергин элларга, Тангрим,
Гўдакларнинг юзига кулгу.
Ёлғиз сенинг қудратинг чексиз,
Ёлғиз сенинг даргоҳинг кенг-ку.

Бу дунёга ҳайитлик қилиб,
Яшнатиб қўй бутун оламни.
Ёр кўксига бошимни қўйиб,
Хотиржам эркалай боламни.

Ш.Н
2022