فلاح : شبيج وجهج ثكيل
بديعه : عفيه لتحجي ويايه تره واصله لخشمي ومالي خلك للثوب اللابسته سوايتك عيبه بحقي وبحق اختك
فلاح : وسوايتها مو عيبه زين ولهسه تتنفس المفروض ندفنها ويه صمد
بديعه : اي لان حجت الحق ومرضت مظلومه تنام بكبرها بدون ميرجع حقها انتم كلكم نفس الذبه باطلين ولا واحد بيكم حقاني جان يضربني راشدي وهاي اول مره يضربني
فلاح :جنتي شكد فقيره وهاديه صايره مخبله ولسانج طولان انطيتج مجال هوايه

بديعه : انتم بهذا البيت اليحجي تكتلوه هاي صالحه وساهره كدر واحد منكم يحاسبهن على سوالفهن وجاي هيه تضربني لان حجيت الحق مثل خوله
فلاح : اني رايح للحله عندي بناء هناك وماارجع اسبوعين اياج يابديعه تسوين مشاكل تجنين على نفسج ارجعي خانسه وداري خبزتج وبيتج
اخذ ملابس وهويته وعاف فلوس وطلع كعدت ابجي شسوي اسكت يكتلني القهر احجي اضيع جهالي شسوي ياربي

ناي تبوس بيه وبان حاضنتني وهاي الصغيره تبجي اذا عفت البيت ذني منو الهن ربي اني عبدتك الضعيفه كلها صارت ضدي وماعندي معين غيرك عيني على بلوتي وقويني
سلمت امري الك وماعندي غيرك سند ياالله

رجعت اسكت ومااجادل وبس اشتغل واباوع يومين لا اكل ولا شرب لخوله واني روحي تفرفح عليها واخاف اوصل لغرفتها ساهره مراقبتني  اجاني يونس
يونس  : عمه جوعان
بديعه : اي عمه هسه سويتله لفه جبن وطماطه اخذها وكال
يونس : اريد مي
بديعه : هاك هاي السرايحه
يونس : ثكيله عمه ذبي منها مااكدر اشيلها
بديعه : وين رايح اكعد هنا اكل
يونس : اريد اكل فوك يم ناي
بديعه : اذا جاعت اختك تعال اخذه الها لفه
يونس : اي
اخذهن يونس وصعد يمشي على كيفه

خوله : تعبانه وجسمي يوم بعد يوم يتعب اكثر لا دوا لا اكل ولا شرب بديت احس داموت موت بطئ انفتحت الباب وطب يونس درت وجهي عليه مستغربه
يونس : هاج عمه اكلي واشربي
خوله : منو دزك
يونس : محد اكلي عفيه قبل ميجون ويضربوني
خوله : نزلت دمعتي وسحبته وبسته
يونس : اكلي بسرعه عمه واشربي مي حتى اطيبين
خوله : تريدني اطيب
يونس : اي حتى لتموتين مثل ماما وتعوفينا

خوله : حضنته حييل واشهك حنين على امك جيبهم خلي اكل حتى اطيب
وكعدت اكل جنت جوعانه بشكل مو طبيعي وعطشانه حيل يمكن يوم لاخ يوكف گلبي شربت المي كله
تقرب باسني وكال
يونس : بليل هم اجيبلج وركض طلع وسد الباب
تعالي يذكرى شوفي ابنج بعده صغير وحنين طالع عليج  الْحٍمَدٍ للـّہ مو على صمد جنت حيل خايفه لا يطلع عليه لان كطعي

بديعه : وره يوم صعدت وشفت يونس يعيط ركضت عليه لكيت ساهره لازمته من اذنه
ساهره : ولك بكد القندره وتلعب علينا من تكبر شسوي
بديعه : عوفي شتردين منه
ساهره : هذا بكد الفصمه يودي اكل ومي لخوله

بديعه : سحبته منها وحضنته شلج دخل بيه عوفي
ساهره : لا اكلب البيت عليج هذا تعلومج ادري
يونس : عمه معليها اني اودي
ساهره : هاج استلمي
بديعه : شرايده منه طفل وشاف عمته جوعانه عوفي
ساهره : خوش من هسه عصيهم على عمامهم وخلي ليسمعون كلام

عمشه : شنهي حسجن ليغاد دهر الصابجن
ساهره : تعالي عمه الله جابج شوفي بدعه تعلم الجهال يعاندون عمامهم
بديعه : والله ممسويه شى
ساهره : هذا يونس يودي اكل ومي لخوله واكول لهسه ما ماتت
عمشه : اخيج وينه
ساهره : جاسم
عمشه : چا جم اخ عندج
ساهره : نايم بغرفه صالحه
عمشه : انشدي عليه وگليله يجيب السيد ويعقد عليها وياخذها ويولي اليوم

ساهره : خلي اكله وهم ابلغ جوحي وعبيد
عمشه : انه كتلهم قبل لايطلعون من الفجر
يله انشدي
خوله : سمعت كلام امي متحملت شلت نفسي واسحل بروحي سحل فتحت الباب وكتلها مااتزوجه لو تموتون
عمشه : حسچ بين چا يلكرطه تعاندين
خوله : اذبحيني ومااتزوجه تسمعووووووون
مااتزوجه
عمشه : ماتزوجين جاسم ماتضلين بيتي انه ماالفي جتالين

خوله : وين اروح اطردين بنتج
عمشه : ولو بيدي اذبحج الحين واخلص منج انه بتي ماتت ومالها ذگر برويحتي وانتي غريبه وانه ماالفي غربه وعكارب

خوله : لا لفيتي ذني بنات غنيه وتعرفيهن شكد حقيرات
عمشه : مالج دخل بيتي وانه حره بيه ياتزوجين جاسم يابطرك ثوبج الحين تولين ومااريدن اشوفن ركعت وجهج انه متبريه منج ليوم الدين البت التمشي بجتل اخوها ماتضل بتي وماتوكف على جنازتي
هاا شگلتي
خوله : وين اروح تعرفين بيه مااعرف احد هنا
عمشه : انه ماعندي چلمه ثانيه لا تزوجين جاسم ياامشي اطلعي

خوله : مااطلع ولا اتزوج جاسم
اجت صعدت امي وسحبتني حيل من ايدي وجنت مااكدر حتى ادافع عن نفسي لان جسمي كله يأذيني وبعدني مريضة ومتأذيه واي طاقه مابيه كادتني من ايدي لحد الباب واني اسحل بروحي واسمع صوت بدعه تبجي وتتوسل بأمي

عمشه : ماعاجبج اطلعي وياها
بديعه : بروح ابنج لتسوين هيج
عمشه : امشي ولي وياها
خوله : وين تروح ابقي واني طالعه
جان تدفعني حييل بلطرمه وفتحت باب الشارع وجرتني من شعري ودفعتني
ولي مالج مچان هنا تفوووو عليچ وعلى البطن النگلتج ريتج مجان صمد اكولن ماتت واحزن العمر كله عليج ولا سوايتج السوده نعله الله عليج بزره خايسه
وسدت الباب

بديعه : ركضت جبت عبايه ولزمتني عمتي
دنكت بستها بس تلبس شفتي حالها اذا تمشي العالم تخزيها فدوة انطيها العبايه واطب
ركضت فتحت الباب لكيتها واكفه تباوع وبعيونها دموع  شمرت نفسي بحضنها وابوس بيها وغطيتها بلعبايه
خوله : ادخلي يمعوده مابينا حيل يطردوج مثلي
بديعه : وين راح ترحين
خوله : اروح لبيت امل هسه لحد ماشوفلي جاره
بديعه : اجي اوصلج

خوله : لا لا ذني راح يحركن امي عليج ضلي بلبيت
بديعه : العصر امرلج
خوله : جيبيلي وياج ملابس مو تنسين
بديعه : من عيووني
خوله : يله ادخلي
لبست العبايه عدل ومشيت عيوني تتنقل بين البيبان مال الجيران اخاف اشوف احد امشي على كيف مابيه اي حيل وصلت قريب بيت اكرم جان تطلع امه ومرته درت وجهي حتى لتشوفني وبطئت مشيتي اكثر

صارن كدامي يمشن اباوع على مرته حاطه ايدها على ظهرها وتمشي مبين بشهرها جان هسه اني بمكانها شوف حالي بليه اهل ولا بيت ولا رجال ولا كلشي والي ظلموني كلشي الهم ليش الله ينطي للظالم كلشي والمظلوم ماله شى غير القهر والظلم والاذيه باوعت للسما ودموعي تتسابق على خدي على شنو ابجي ضياع شبابي لو احلامي لو حبي لو بيتي لو اهلي هسه اني انسانه مشرده بدون كلشي والله اعلم وين حالي راح يصفى رجعت اكمل دربي وامسح بطرف العبايه وجهي الممبين من كثر الضرب

وصلت لبيت امل من شافتني تخبلت دخلتني لبيتهم جانت سامعه الصار لان المنطقه كلها تدري
مرايده بس جم يوم ابقى لحد متفرج
امل : يا اشيلج على راسي

بديعه : اخذت ملابس وفلوس وطلعت من الباب جان تلزمني صالحه
صالحه : ماكو طلعه عبالج ترحين الها
بديعه : عوفيني ولتدخلين
صالحه : بس اطلعين ابلغ عمتي والولد واخليج ترحين وراها ولي لجهالج وكافي مشاكل ابعدي عن خوله تره اليمشي وراها تاليته يبات بلشارع وانتي بعد بكيفج تردين ترحين لترجعين لان راح اخلي الكل يلعبون بحالج وحسره عليج جهالج
بديعه : يابه ياصالحه يوم التوكعين والله يجازيج على كل اذيه سويتيها نذر عليه لا اطش واهليه بلشارع وكل هلهوله تسمع لسابع جار
صالحه : امشي لج واكلي تبن وطبي
بديعه : طبيت مخنوكه وخايفه منهن ذني كلشي يسون وكعدت وحطيت ايدي على خدي وحايره بخوله منو الها

بقيت ٣ ايام يمهم كوه اكل وميته خجل همه بيتهم صغير وعيشتهم على كدهم سمعت امها تكول
ام امل : راح تضل هاي هنا
امل : لعد وين تروح يايمه
ام امل : اهلها طردوها احنا شلنا دخل كوه مدبرين عيشتنا تالي يجي حمل فوك حملنا
امل : يمه جم يوم وتروح صديقتي وعشرت عمر عيب اطردها
ام امل : غير من ايدها الصار انجب واسكت اكو وحده تسوي سوايتها وتسلم اخوها لاهل مرته حتى يكتلوه تستاهل الطرده
امل : كافي يمه لتسمعج عيب
ام امل : سكتنا وانتي هم افتهمي منها شكد ناويه تبقى تره مااتحملها بعد
امل : صار صار بس اسكتي هسه

خوله : حضنت نفسي رغم كل وجع جسمي بس مثل وجع روحي ماكو وين اروح منو اليه  ارجع واتزوج جاسم اعرف راح انذل ويأذوني اطلع من بيت امل واضل بلشوارع وبعدين منو اليه منين اعيش شسوي

كمت ابجي بحركة حطيت راسي على المخده ودموعي ترستها غطيت راسي واشهك شفتي يذكرى الموت مرات ارحم من العيشه اني حجت الحق وهاي تاليها محد نصفني وكلها تبرت مني من باجر لازم اطلع اخاف منا هم انطرد

بقيت ابجي واعرف امل تسمع بجيتي بس متقربت مني تعبت ونمت شكد نمت ماادري بس نايمه وغاطه بلنوم مثل الواحد يهرب من الدنيا بلنوم حسيت ايد توخر شعري من وجهي
فتحت عيوني بتعب لكيته دنك وباس راسي

نجم : يله اكعدي اجيت اخذج
يتبع ....

قناة للقصص العراقيه الواقعيه حصرا
‏لاتختار الشخص الجميل، إختر الشخص الذي يجعل حياتك جميلة ❤🌹
بوت تواصل @HD_2018bot دَنـُـــوشٌ┊dиσσѕн ║
تاريخ إنشاء القناة 2018/7/16
قناتنا2 @loves959

#الابواب_الخمس
البارت الخامس والعشرون
للكاتبه Reem

اوكف يازمـن عدنا عتـاب ويـاك
تعال وشـوف جرحك بيش ملجـوم
خليت المصيبـة بكلب كـل انسـان
ويا بيت النطبلـة تشوفـه مهمـوم
عاشرنا الحزن مـن جنا بالكاروك
ولحـد مـاكبرنـا ويانـا مضمـوم
البشر بالعيـد تفـرح تلبس اشكـال
واحنا مـن الدمـع فصلنـا الهـدوم
نعيش بنص وحوش وناس تاكل ناس
وضميـر اكثـر العالـم صـار معـدوم
صار الضحك سلعة وتشتريها النـاس
وثمن كـل ابتسامـة بكـاس مسمـوم.

فتحت عيوني بتعب لكيته دنك وباس راسي
نجم : يله اكعدي اجيت اخذج

قبل ساعتين ::

بديعه : كاعده اغسل هدوم ومكسور ظهري والف حسبه بالي وكل شويه اكول تاليتج يبدعه ضليتي وحدج لا ذكرى الاخذها الموت ولا خوله الجانت توكف وكت الحاجه واخر ايام صارت قريبه مني معودت تتعلم عليه واتعلم عليها وهاي تاليها انطردت والله اعلم شنو حالها زين هسه اني شون اوصل الها اذا حتى من اريد اطلع للدكان ذني الجلبات يفتشني اخاف ماخذه فلوس زايده لو غراض الها تكول حرب عدنا شسوي واروح الها صار ٣ ايام البنبه نكتت بيه وهي معتمده عليه اووف لو اكوم واكعد ادعي عليهن ميبرد گلبي

افرك حيل بلحضاين مال شرهب وسمعت صوت عمتي تعيط وتبجي وصوت نجم اي هذا نجم شمرت الحضاين بلطشت وغسلت ايدي وطلعت اركض من الحمام شفت عمتي حاضنته وتبجي

عمشه : هيچ يمه اتعيف امك وحيدهه هاي انت الحنين وهيچ سوالفك لا عتب على اخوتك وانه اكولن عكب نجم تايهه محد يحن عليه
نجم : اني اجيت اخذ غراضي وطالع منا مالي عيشه يمكم

عمشه : يادهر الصابني چا انه مكتوب عليه وليد ادفننه والثاني يضيع من يدي لا تشلع افادي يبن بطني واركد بيتك چا اخيك والله اخذ امانته شنهي بعد تهج برويحتك

نجم : يمه اذا صمد مات واندفن فهذا الشى راحه اله تمنيت اني بمكانه لا عبالج اني مانعني جان صمد من رجعت البيت جنت اريد اكتله لان ظلمها وأذاها واكتل نفسي وياه لان شايل ذنبها تعرفين شديصير هسه بيه واني اتذكر وكعتها وشون سابحه بدمها الليل كله ترن بأذني كلمتي من كلت اي ردتها ومصارت الي  احس اثنينا اني وصمد تعاونه على كتلتها بس كل واحد بطريقته

عمشه : يايمه البت وماتت والله يرحمها واخيك لحكها وانسدت السالفه لا تضل تهري برويحتك انه اعرفنك متأذي والنار تسعر بكل شبر بجسمك الصار موش هين وانه اعرفن ويه الايام ينسي بسگ يايمه تنكث نكث وتحمل نفسك شى موش بيدك
انعل الشيطان ورد بين اخوتك وهذا بيتك وتزوج بت تراعي الله بيك وانه اجيبلج بت تسوه سهاد وعشيرتها

نجم : من كل عقلج يمه اني اتزوج اني معودت طلكتها
عمشه : وحكها
نجم : اني يوم معافوني اخوتي من حبسوني بلمخزن وهذا الشى ليوم الدين مااسامحهم عليه
عمشه : يمه انه كلت لاخوتك عبن اخافن عليكم انه گلت تذابحون ردت مايصيب صمد ولا يصيبك شر وتالي اجه الميخاف الله وجتله
نجم : تمنيت بيدي
عمشه : يمه گليبك اسيود على اخيك ابري الذمه وليدي وانسى گلشي
نجم : ماابري الذمه ليوم الدين
عمشه : انه مكتوب علي اضل معلعله لا وليد الريحني ولا البت كطعت سالفتك سهاد شصار منها

نجم : طلعت من المخزن رحت لبيت اهلها وحجيت كلشي لابوها وهي منكرت وابوها خوش رجال كال عمي شتريد كتله اطلكها كال طلك وهي متنازله عن كل حقوقها رادت تحجي ابوها سكتها وراها مشيت بلمعامله وطلكتها وخلصت منها

عمشه : يمه رد ليه وحك الحسين ازوجك بت تحلف الدربونه كلها براسها
نجم : النفس ماتت يايمه والروح ضاله تنتظر امر ربها عسى يرحمها وياخذها هاي الدنيا  طفت بعيني وكلشي صار اسود والتردي ميصير انه حتى انحرمت من دفنتها مودعتها مجنت رايد شى بس اشوفها بيدي يمه شلتها وترست هدومي دمها ومن اشوفه اكول هااك شوف زين اشسويت بيها لا حويتها من اول مشفتها وريحتها وتزوجتها ولا عفتها ونسيتها وتاليها صرت سبب بموتتها يمه زين مني هسه امشي واحجي واكل زين مني عقلي براسي لهسه رحمه لابوج جوزي مني تره ضاله طكه وحده واحرك روحي

عمشه : چا وانه يايمه ماتراعي الله بيه ماتكول امي عينهه عليه وانه بعزيت رويحتها مامش ليه معزه بگلبك چا ربيت وكبرت وتعبت وتالي تهج من وره النسوان
نجم : تعرفين الشغله مو هينه وتعرفين ذكرى ماتت مظلومه وتعرفين ذنيج بنات غنيه الهن ايد بكلشي صار وتعرفين من وره كلمتي تخبل صمد وأذاها و صمد طول عمره باطل ويه ذكرى ومايوم راعه الله بيها ورغم كل هذا ساكته وتخبطين ناس بناس

وتحجين الشغله جنهه واحد تعارك على لكمه ومصارت اله وتكوله امه هااك ابني اكل هاي اللكمه الثانيه وعوف ذيج ولتضوج 
يمه اكو وحده دخلت لبيتج عروس بدله بيضه وطلعت بتابوت وهي متجاوز عمرها ٢٥ سنه وشافت المر هنا وتالي تكولين تهج من وره النسوان متسكتين لخاطر الكعبه

دفع امه ودخل لغرفته اجيت بأتجاهه اريد احجي وياه على سالفه خوله جان تلزمني عمتي
عمشه : والغسل وين موليه
بديعه : اسلم على نجم
عمشه : مامش سلام ردي لشغلج
بديعه : عمه شبيج بس اسلم عليه
عمشه : وغمه انه كتلچ ردي لشغلج واياج اشوفنج يم نجم اعرفن يبدعه تحومين على خوله اركدي واستري رويحتج ماضلج شى واطك براسي واسيرج غاد بره البيت ردي ولا تراددين انه مالي خلكج
بديعه : هذا هو عمه راجعه لشغلي

رجعت للمطبخ الوب ياربي شون احجي وياه ماكو غير هاي الفرصه مديت راسي للطرمه كلت بلكت الكف واحد مم الجهال لكيت يونس يلعب بلبراغي تعاال يونس واجه يركض
يونس : هااا عمه
بديعه : حبيبي راح يطلع عمك نجم بدون محد يشوفك صيحه وشاوره وكله عمه بدعه تريدك يم دكان ابو حسن
يونس : اي عمه

بديعه : اروحلك فدوة دير بالك احد يشوفك
يونس : اي عمه بسكوتي
بديعه : عفيه بلسبع اوكف بره وانتظره
رجعت بحجه اغسل هدوم واني حتى كمت اغسل شلون مجان حتى اطلع عذر واطلع من البيت

دخل نجم اخذ غراضه وطلع وساهره نزلت تباوع وتراقب واني كل بالي شون اوصله تالي جلبت بيه عمتي تبوس بيه وتتوسل وكعت دخيل اله وهو ولا يمها ركع الباب وطلع 
وكعدت عمتي تنوح اني كلت ماكو احسن من هيج فرصه لبست عباتي وردت اطلع
ساهره : هاا خيرج
بديعه : اجيب صابون ركي خلصت اريد اغسل حضاين شرهب شوفي شكد بيدي

ساهره : شكتلج ونطيتي
بديعه : خلي اروح قبل لتكعد البنيه وتضل تعيط من الجوع
طلعت واني اقرا ايات واكول يارب دخيلك مالها البنيه معين غيرك وغير نجم محد راح يساعدها غيره وصلت لدكان ابو حسن شفت نجم واكف يايمه گلبي هلكبره صار بحيث ردت ابجي من الفرحه

نجم : خير بدعه ليش محجيتي واني بلبيت
بديعه : امك مخلتني حتى اوصل يمك اسمعني بسرعه لازم ارجع وما اتأخر
نجم : شصاير ضل بالي
بديعه : وبديت اسولف كلشي اله
نجم : من خرب شرفهم شون ينامون واختهم بلشارع ذوله تخبلو
بديعه : المشكله باقين على رأيهم وميرضون يرجعوها امك هلمره جنت على خوله والله اعلم شنو حالها تعرف عظم البني ادم ثكيل ولمتى امل تتحملها
نجم : لج ياامل غير هسه رايح اخذها وارجعها للبيت واريد اشوف ياگلب يفتح حلكه

بديعه : رجعتها بيها اذيه وخاصه انت راح تعوف البيت يعني مثل واحد يطلع واحد من المي ويذبه بلنار محد راح يتحملها والله اعلم شيسون هاي المره بيها اكله عدموها العافيه انتهت كوه تمشي
نجم : وهي هم الغبيه شون تبلغ عن صمد
بديعه : رادت ترجع حق ذكرى واكلتها المكروده
نجم : اني رايح الها لبيت امل وانتي ارجعي

بديعه : لترجعها للبيت نجم وداعت بان راح يعلكوها من شعرها وامك كارهتها حيل اكله حاربوني حتى لا اوصل الها ملابس وفلوس
نجم : ارجعي ويصير خير
بديعه : عافني وراح واني اشتريت صابون حتى ليكولون ليش مشتريتي ورجعت صحت الجهال حتى ياكلون وهم ادرسهم مبقى شى امتحانات نهايه السنه

نجم : وصلت لبيت امل دكيت الباب طلعت امها
هله يمه
نجم : خاله اجيب على خوله
ام امل : الله جابك وليدي چا يصير اخيتكم ذابيها وعدها اربع زلم
نجم : لا ميصير هيه وينها
ام امل : جوه نايمه بلهول على الكرويته ادخل يمه ماكو احد امل راحت للسوك

خوله : فتحت عيوني بتعب لكيته دنك وباس راسي
نجم : يله اكعدي اجيت اخذج
خوله : فتحت عيني زين ونزلت دموعي بجيت بهضم وقله حيله شلت راسي كوه وحطيتها بحضنه

لتعوفني انت هم كلهم عافوني وميردوني لتضربني مثلهم وتأذيني تعبت من الضرب والاذيه تعب من اخوتك اليوميه ذابيني مره ذبوني بحضن رجال بكد ابويه ودارو وجهم وراحو وهسه ذبوني بلشارع حتى مخافو على عرضهم

نجم :كومي شدي حيلج ويايه حتى نطلع منا مااعوفج وياج اني
خوله : كمت اشهك بحضنه ممصدكه اجيت والله أيست من نفسي وكلت وين اروح
نجم : لو ادري ماابقيج لحظه كافي بجي

خوله :منو گلك اني هنا
نجم : بديعه
خوله :  ماارجع لذاك البيت نجم اذا قبل كم يوم ذبوني بلشارع هلمره يذبوني بحلك جهنم ويزوجوني جاسم واني اموت ولا اتزوجه
نجم : لا تتزوجين ولا ترجعين لذاك البيت شو كومي خلي اشوف حالج ولج هاي شمسوين بيج عادل امام مماكل كتل بكدج
خوله : ابتسمت ورفعت نفسي وبسته من خده مراح تعوفني مو

نجم : ولو دكتج ناقصه مال رحتي وبلغتي فوزي بس مااعوفج طول مااشتم الهوا
خوله : هو اخوها اوله بأخذ ثارها صحيح انت جنت تحبها الله يرحمها بس مو من حقك تكتل اخوك مترهم نجم كلشي بلدنيا اله حدود وحدودك بس تبجي عليها مامسموح الك اكثر وبعد شغله وصارت الله يرحمها انت شونك

نجم : تشوفين شكلج شكد متأذي وشكد متألمه ضرب واذيه وكسر گلبج من اخوتج وامج
خوله : اي

نجم : ميجي ربع الاحسه خليني ساكت لا انفجر كومي نطلع المره خلي تاخذ راحتها استلمتني بلباب
خوله : مراضيه على كعدتي وهم خلف الله عليهم لفو اختكم ٣ ايام
نجم : تعدي وتهون يله سمي وكومي
خوله : لزمت ايده شلت نفسي وحيل تأذيت لان جسمي كله يوجعني ومورم
دنك لبسني نعالي دنكت على كيف وبست راسه رفع نفسه وابتسم بوجهي

نجم : اني اجرت مكان صغير غرفه وحمام ومطبخ ماادري راح تجين يمي
خوله : اي شى عسى ما گن دجاج (قفص)
نجم : خلي يستقر وضعي واشوفلي شغله لان عفت ابو سهاد والمكتبه والشغل بيها زحمه مطلك بنته واشتغل يمه وبديت ادور على شغل الكه وراها نغير المكان

خوله : مو مهم والله هسه اليكول عايشين بقصر بس اخذني
نجم : يله امشي
خوله : لزمت ايد نجم ومشيت يمكن مااعرف شنو المستقل وشمكتوب اليه بس المهم طلعت من جحيم ذاك البيت

بديعه : رجعت للبيت وللجهال والكراب والسكوت القديم مالتي اني مو حملهن ولا حمل مشاكلهن ذني بس الطلايب وراهن
بديت اذب حيلي ويه الجهال صارو ٥ برگبتي وكل واحد يريد شى عدا بلال اليرادله مداراه اكثر من غيره
كل ساعه وكل يوم وكل شهر يفوت من عمرنا
اليوم اجه يونس يركض هو وبان ناجحين ويونس طالع الاول بجيت دم لان جنت اتمنى ذكرى تشوف شهادته اجه طاير وفرحان لان كاتبين اله الاول
شكد تمنت هاي اللحظه تشوفه يعبر للمرحله البعدها وينجح ويكبر ويكمل دراسته
حضني حييل وفرحان

يونس : اول عمه اول
بديعه : بلخير عليج حبيب عمتك
بان : واني ماما متبوسيني هم اولى طلعت
بديعه : عفيه بلشطار وحضنتهم اثنينهم
يونس راح للثاني ابتدائي وبان راحت للثالث
وجهال عمكم مرتضى ومهند وسما
بان : ناجحين بس مرتضى اول مثلنا
بديعه : الله يحفظكم واشوف كلكم عدكم شهايد يله تعالو طبو اكلو اكيد جوعانين
يونس : وين ناي
بديعه : نايمه روح كعدها حتى تاكل ويااك
يونس : نايه تعاالي
بديعه : مو منا تصيحها اصعد فوك وصيحها
جان تنزل وتصيح يويو جبتلي مصاص
يونس : اي جبتلج هااج

بديعه : كون تبقى حنين على اختك هيج
اباوع عليهم شنو ذنبهم بله هسه تيتمو الله لايوفق الجان السبب
ردت ادخل للمطبخ وسمعت ساهره وصالحه يسولفن
ساهره : شون بيه كوليلي لازم هم ارجع للعلاج
صالحه : اني اكول اكعدي وسكتي قبل يومين طرحتي ياعلاج

بديعه : يااا هاي جانت حامل
ساهره : اريد طفل ثاني حتى لو بنيه
صالحه : مشفتي اخر دكتوره شكالت حذرتج وكالت يجوز هم يجي منغولي بله بلال وكربسنا براس بدعه وهي حايره بيه اذا جبتي واحد منغولي ثاني المن بله نطي نفتح روضه بيهم

ساهره : شسوي من حركت گلبي ضليت بس على مرتضى
صالحه : مو كدامج اني ضليت على مهند وسما
ساهره : اريد طفل ثاني مشلوع گلبي
صالحه : ارتاحي جم يوم وارجع للعلاج يطبج مرض متاخذين كلام
بديعه : هااا سلامات سمعت طارحه

ساهره : وشنو حاطه اذنج يمي
بديعه : صوتجن عالي وسمعت
ساهره : حيري بشغلج ولتحطين اذنج يمنا اتعبين تره
بديعه : وشجاب اذني يمكم اني اجيت اسوي اكل وسمعت حجيكم
صالحه : الجنتي تردين تسوي سوي امشي ساهره نكعد بلهول

كملت شغلي وافكر شصار من خوله ونجم وين راحو جنت اكل بروحي واريد خبر عنهم
اجتي عمتي ضايجه
ساهره : خيرج عمه
عمشه : خوله ماخذها نجم وياه
ساهره : وشمدريج
عمشه : مرت ام امل بلدربونه وسألتها وحجت من زمان ماخذهه انه عبالي عدهم
خذاها وشرد بيها وعاف گليبي نار
صالحه : وشمدري بخوله عند امل اذا مو احد فتن لنجم
عمشه : چا شيفيد خذاها وراح
صالحه : الله وياهم يسون فضل
ساهره : وجاسم متخبل رجع للبصره وكال من تسمعون خبر ردولي حتى اجي اعقد عليها

عمشه : ماترضى وماطول عند نجم اغسلو ايدكم البت ولت جار اخوهه
صالحه : مدري شبيهه اخويه سنين رايدهه لهاي الزركه كاتل نفسه عليها
عمشه : يااا شبيهه زرگه چا انتي احلى منها چاترحيلها فدوة
ساهره : شو ورجعتي عمه ادافعين الها
عمشه : بسچن انه وجعانه ومالي خلك وانتن تلاسنن ميلن مني اولي لغرفتي اتمدد وارتاح

رجع فلاح وجان مشتغل والحمدلله وكدرت بلفلوس الانطانياهم اشتري ملابس للجهال كلهم حملهم ثكل ومصاريفهم زادت وفلاح ساكت بس معاجبه الوضع
عمتي بدت تنطي مصرف علمود جهال صمد والزكها منا ومنا حتى تمشي الدنيا

خوله : استقريت ويه نجم جان المكان قديم بس مريح وبدا يطلع يدور شغل والحمدلله لكه يشتغل ويه خلفه اول ايام انتهى جسمه من التعب ويون حقه ممتعلم وراها تعود
جنت احسه يتهرب من كلشي بلشغل ردت اساعده مااريد اصير عاله عليه وقررت احوك اني تخبل حياكتي اسوي نفانيف ملابس شفقات للجهال وجبت خيوط وبديت اسوي وهو يبيعهم لجم محل حبو شغلي وبديت اقتصد شكد مااكدر والم يوميته على اليطلع من شغل الحياكه اضمه

جان اكو ترك صغير بصف المطبخ دوم اشوفه يكعد هناك يدخن ويطب هو ميشرب جكاير ابد بس مبين من موت المرحومه تعلم
بيوم نايمه وسمعت صوت ونه وبجي كمت ادور على الصوت  مديت راسي للترك لكيت نجم كاعد بلكاع ويدخن ويبجي
ركضت عليه شبيك نجم شصاير
نجم : طبي جوه خليني
خوله: غير افهم شبيك
نجم : اشتاقيتلها خوله
خوله : كعدت يمه وحضنته على كيفك ويه روحك صار كم حتى اكلك قلان وكوه تمشي وهسه تبجي شجاك
نجم : شوكت اموت واروح الها والله الدنيا گبر وهي ماكو
خوله : كلمن وعمره شنسوي راحت للاحسن مني ومنك كوم غسل تره تأذي نفسك هيج

نجم : لهسه ممصدك ماتت احس جمر يلجم كل قطعه بيه مااتجرأ حتى اروح لكبرها شكول الها اني موتج كله من ورايه ماحصلتي مني بس شلاع الگلب من يوم مشفتيني ومشفتي الخير لو اكول الها اني مابيه خير وخليتج تعيشين حياه مو حياتج  كولي شون اواجهه

خوله : تدري شون ترتاح ذكرى
نجم : شون
خوله : اذا جهالها اتربو زين وكملو شهادتهم ومستقبلهم حلو مثل مارسمته هيه
نجم : اجيب الجهال عدنا
خوله : اني اشوف اذا بقو هناك راح يتأذون صحيح بدعه متقصر بس الى متى يجي يوم وتتعب وهي حامل مسؤوليه بلال يعني ٥ جهال يصيرون براسها

نجم : اي كلامج صحيح اجيبهم هنا اقلها اسوي شى زين لذكرى
خوله : روح باجر الهم وكول اريد الجهال واكيد راح يشيلون وينطوهم الك حتى يخلصون منهم
نجم : اي باجر مااطلع للشغل واروح اجيبهم

خوله : كوم نام وارتاح
نجم : اكمل جكارتي واكوم روحي نامي انتي وبلكت باجر تتسهل الشغله واجيبهم واجي
خوله : تصبح على خير
نجم : وانتي من اهل الخير
بديعه : اليوم عمتي مالها خلك وضايجه وكاعده بلطرمه ساعه تنعي ساعه تصفن ساعه تعيط تريد لو مي لو جاي حتى للشغل مطلعت اعرفها معناها اكو حسبه بالها

صبيت الجاي الها من يوم طردت خوله واني كلامي قليل وياها حتى مااكعد يمها
مديت الكمبار اغسله توصخ من الجهال وافرك بيه انفتحت الباب وكفت اعدل دشداشتي اشوفه نجم استغربت جيته هله بنجم شونك

نجم : هله ام بان شونج
بديعه : يم الله فدوة شخبار خوله حيل بالي يمها
نجم : الحمدلله بخير وتسلم عليج
بديعه : الله يسلمك ويسلمها
عمشه : هااا يبن عمشه توك ماذكرت امك
نجم : هله يمه
عمشه : چا حتى الهلا مالتك رچيجه موش من لبت گلبك

نجم : يمه اني اجيت احجي وياج بشغله واروح
عمشه : مااردن خوله اخافن زهكت منهه ومالك لزم بيها وتريد تردها ليه مالها مچان بينا
نجم : لا ارجعها ولا شى البنيه كاعده ويايه وتعيني وماشيه حياتنا اني اجيت اخذ ولد المرحومه يعيشون يمي

بديعه : شون تاخذهم لا عفيه
نجم : احسن يمنا كافي الحمل العليج اني وخوله نحير بيهم
عمشه : والصغيره شنهي اسمهه شربت
نجم : شرهب هم وياهم
عمشه : ومنين تعيشهم

نجم : اني اشتغل والحمدلله ميسره وخوله هم هاي الفتره تساعدني انطيني الجهال حتى هم حمل ويخف عليكم
عمشه : وانه هيج اشيلن واشمر وليدات صمد ليك ولذيج المدهربه
نجم : يمه قابل احنه غربه غير اني عمهم وخوله عمتهم
جان يطب عبيد
عبيد : هاا منو اليوم يمنا شعجب شذكرك بينا

نجم : ماجيت عليك اجيت اخذ جهال المرحومه واروح
عبيد : خو كول جهال اخويه جهال صمد شنو جهال المرحومه لتنسى الصغيره مو بتها
نجم : هذا مو موضوعي اجيت اخذهم واني اتحمل عيشتهم
عبيد : هااا يمه شگلتي
عمشه : انه مااريدن يطلعون من البيت عبن شوفتهم تذكرني بابوهم

عبيد : سمعت امك متنطيهم
نجم : وانت شعليك وتدخل
عبيد : ذوله يتامى والقيمومه عليهم لو امي لو اني عمهم الجبير واحنا المسؤولين عنهم انت مالك شى يمنا

نجم : لتعاند عبيد اثنينا نعرف محد يتحمل الجهال ومصرفهم خلي اخذهم واخلصو انتو هم من عدهم
عبيد : كتلك مالك شى يمنا لتعاند وتسوي مشكله الجهال ضالين هنا
نجم : هيج تحبوهم شنو هذا الجذب
عبيد : قابل اكرهم جهال اخويه وضالين هنا امشي روح نجم واذا خوله يمك دير بالها بيوم تحط رجلها بهذا البيت اكسرها اخاف ذيج المره كسرت العوده مال ماسحه عليها وركعت راسها اني وجوحي بلحايط هلمره اشمرها من السطح واكتلها خلاص

نجم : شحده اليمد ايده عليها غير اسويها دم وياه
عبيد : اي مو عار انت هو الي يحط عينه على مرت اخوه شترجى منه
جان يتلازمون وكامت عمتي صارت بينهم
عمشه : يمه بسگم وانت نجم اجيت ردت الجهال وماننطيهم لاتضل كل شوي تتهاوش ويه هذا وذاك

نجم : اني لو ابنج الجبير الصاير رجال براسي
عبيد : رجال براسك وغصب عنك وعناد بيك متشوف جهال صمد لو تموت عبالك تربي جهال حبيبه الگلب هنا ضالين واريد اشوفك انت لو ذيج الساقطه تتقربون عليهم وروح ابويه ادوس راسكم برجلي

بديعه : دفعت نجم روح عفيه لتزيد المشاكل
نجم : اجي وين اروح واخذهم منك
عبيد : باع هذا الزعطوط جاي يهدد امشي ولي لك خلي اشوف اني لو انت
عمشه : يمه نجم روح لدربك
نجم : رايح يمه
خله وطلع

عمشه : شون تهد على اخيك
عبيد : مشفتي شون شايل خشمه ويحجي
عمشه : لاتنسى هذا نجم انتم گلكم بجفه وهو بجفه لاتسودن ويلعب بليس براسك والشر تلاكط من عيونك انه ماانطيته ريج عبن اعرفنه يريد ياخذهم ويولي ومايضله درب جيه وانه اريدن كل مده يمر واشوفنه

عبيد : يعني مبقيه الجهال حتى بس تشوفي
عمشه : اكرمنا بسكوتك ولاتلغي انه اريدن اخيك يرد هنا ومايرد لون اخذهم
عبيد : ضلي هيج كلنه متردينا وبس نجم بلگلب
عمشه : يااا وحمس چا تراجف على خيك
صالحه : هااا عيني اجيت
عمشه : اهمداه للوعث عيني كون انفكست عينچ وتضلين تك والتك ماتشوفين بيها واطيحين بنكره مالها صعده ومحد ينشد عليج وتخيسين هناك

صالحه : رد الحيل بيج عمتي ورجعتي للدعاوي مالتج
عمشه : چا شبيه انه ذهب يطيح التراب عليه ومايغير لوني مسحه يد ارجع الالي
صالحه : اي مبين
بديعه : عمه هسه راح يرحون الجهال
صالحه : اي خلي نخلص منهم
عمشه : چا همه بورث غنيه كاعدين خايبه اسكتي من عاب هلحلك الاعوج

عبيد : مياخذوهم وباقين هنا
بديعه : بقيت افكر شنو الاحسن الهم يبقون هنا لو يرحون يعز عليه فراكهم بس من اصفن لمصلحتهم الكاها ويه خوله ونجم
اكثر من مره حاول نجم ياخذهم ومفاد لحد مصارت شغله عناد وتحدي والوكع بيها الجهال وضلو بهذا البيت وكل فتره كابه هوسه من وره هاي السالفه ومتغير شى وبقو الجهال هنا

فاتت مده طويله ودخلنا الشتا وبدت المدارس ورجعو الجهال للدوام والدراسه  واركض عليهم حتى هملت نفسي وفلاح ولو هو هم يركض على العيشه

لحد بيوم شتا بارد ساعه عصريه بنهايه شهر ١٢ /١٩٩٤  سمعنا لا اله الا الله صوت تشييع عالي وعياط لبست عباتي وطلعت ويايه ساهره نريد نشوف منو مات بلمنطقه
فتحنا الباب ونشوف المنطقه كلها تشيع وره مافاتو الزلم النسوان يمشن ولازمات ام ذكرى صخام منو ماات ركزنا صاحت ساهره على مره جوارينا واكفه
ساهره : اكلج خيه منو مات
ابو فوزي الله يرحمه

ساهره : يااا الله يرحمه
بديعه : كعدت بلكاع ابجي وانوح وينج يذكرى تعالي شوفي ابوج حطيت العبايه على وجهي وابجي وذني فوك راسي يسولفن
ساهره : هو مريض خطيه
لا عيني مو سمع خبر ابنه ومتحمل الرجال وكع نقلوه للمستشفى مالحك بلطريق انطاج عمره 
ساهره : ياخبر قصدج فوزي ابنه
يااا متدرون
ساهره : غير تحجي لو ندري المن اسألج
غير ابنهم فوزي انحكم اعدام

بديعه : كمت طفرت من مكان شنو
عبالي تدرون غير انحكم اعدام الولد وابوه سمع وكع المسكين
طبت ساهره تركض للبيت
لزمت جيرانه وكتلها متأكده
اي والله كلها تدري شعجب حموينج ورجلج ميدرون غير هو انحكم لان كتل حماج والله لتزعلين خيه مني حرامات هيج ولد شاب ابن اصول وهيبه والعيبه متطلع منه ينعدم لان كتل حماج  واحد ميسوه حتى يوصخ ايده بيه استغفر الله الرجال مات بس الحق ياخيه حق هضيمه فوزي ينعدم من وره صمد بس شنسوي قسمته بعد

بديعه :هااا يذكرى جريتيهم وراج راح احبابج يجون سمعت هلاهل جوه طبيت ركض
وجع هاي منو تهلهل
عمشه : وجع بگلبج چا غير اجه حك ولدي وانه گلت لصالحه تهلهل
بديعه : اتقي الله عمه هذا موت بعده ابنج مصار جم شهر من مات وتتشمتين
عمشه : چا يعدمون جتاله وماافرح

بديعه : لعد لتلومين فوزي من اخذ حق اخته هو هم فرح من كتل جتالها وحطي بالج فوزي اخذ ثار اخته متعدى عليكم بلباطل وبقى عقاب الله للي سبب بموتتها واباوع عليهن

صالحه : عود حجت ام الوصخ لتذبين بسامير احجي عدل مااحب هاي سوالف التلمز والتغمز لو تحجين طك بطك لو تسكتين خلينا فرحانين
بديعه : ماادوم الشماته ياام مهند مااكول بس الله يعين ام ذكرى خسرت بتها ورجلها وابنها دمرتو عائله بكاملها لا اله الا الله ويتمتو عائلتين جهال ذكرى وجهال فوزي ولكم بس لو افهم الله شون راح يعاقبكم على سوايتكم

ساهره :يابه دولي كل متصير حجايه وذبت الصوج بينا شكد مكروه صايره وسوالفج مال عجايز من تلزكين بشغله كل فتره وترجع عليها
صالحه : عوفيها اخرفت تالي وكت

بديعه : ياريت اخرف اقلها انساجن وانتي عمه اتذكري ولو مره وحده تعب ذكرى وياج ولتتشمتين بأخوها تره كل السواه حتى ياخذ حقها بعد ماسلبتو شبابها خلي ذكرى بين عيونج تره متستاهل كل الصار بيها وبعائلتها

سحبت ناي جانت كاعده تلعب هي وسما وبان وصعدت ناي وبان واني الشهكه والعيطه بيه كون اوكف بلسطح لو مكان عالي وكل عيطه اعيطها اطلع قهر گلبي جن رجعلي موتتها
بنفس اليوم الكل فرحان ومتونس اثاري الولد متابعين القضيه انحكم اعدام لان معذبه حيل وقتل متعمد وماكو سبب للقتل لان شغله ذكرى تقيدت موت بسبب وكعه يعني مو قتل حتى يكون لفوزي سبب مقنع يرضي القاضي ويخفف الحكم للمؤبد

بعدها بمده تنفذ الحكم ومات فوزي
غيره حقد كره حقاره موت الضمير  كلها تجمعت بنسوان كل همهن نفسهن وبلتالي بحركه منهن وبتهمه باطله دمرن عائلتين وشخصين ماتو بغير ذنب وبعز شبابهم ذكرى وفوزي الله يرحمهم

خوله : من سمعت بفوزي الليل كمت ماانامه ساعه الوم نفسي وساعه اكول كلت الحق قابل كفرت ليش الحق دوم يكلفنا هواي امور يعني لان نطقت وكلت الصار اني انهانيت وانطردت وصمد مات وفوزي خسر حياته لو ساكته شجان صار اكول يمكن جان صمد دمر الجهال اكثر وساعه اكول يبقى ابوهم يمكن جان راعاهم الف عذر وعذر انطي لنفسي رغم حجيت الحق بس حاسه بتأنيب الضمير منو الصح  ساكته لو حاجيه لهذا لليوم مااعرف السويته غلط او صح
اووف من كلمة الحق هواي غاليه وهواي اتقدمت قربان الها

نزلت تركض والكصيبه تروح وتجي تمري لونها الشعر بيه كسره وطويل والخدود تخبل والرصعه بخدها زارفته ضحكتها هاديه جنها ضحكت امها وماخذه سمارها
اباوع عليها طولانه وحليانه

اوف العمر يعدي بسرعه كبرت ناي يذكرى تعاي شوفيها اليوم خلصت خامس ابتدائي وطلعت ناجحه وراح تروح للسادس
واباوع على يونس اول متوسط نجح للثاني هستوه شواربه الناعمه تطلع
وشرهب عمرها ٦ سنوات اول ابتدائي

اوف ٦ سنوات عدت واني اجاهد حتى اكدر اكبرهم حرت شسويت حتى بس مااقصر وياهم خوله ونجم سنين يحاولون يقنعون عمتي حتى ياخذوهم ومكدرو اخر شى كام نجم كل ميجي ينطيني هلقاسم الله ويحطه بيدي اساعد بيه مصرف الهم
اباوع على حالي كبرت گبل وكتي من التعب والقهر والجوع خلفت بنيه وحده وتحملت مسؤوليه ٥ جهال

كاعده اضفر شعر بان وناي بصفها تعلم شرهب الحروف صاحني فلاح
كمت من عدهم واجيت لغرفتي
هااا عيني محتاج شى
فلاح : تعالي اكعدي عندي شغله وياج
بديعه : وهاي كعده خير وجهك مبلوع وبيه كومه حجي

فلاح : سمعي يابت الناس صار سنين واني اشتغل من الصبح لليل والهث لهث الجلاب وكلشي ممحصل
بديعه : لا حشاك ياعيني اشبيك اليوم

فلاح : مو شجاني بس تعبت حيلي مو الاولي واباوع على نفسي كلشي ما لام كل تعبي لغيري
بديعه : مفهمت
فلاح : صار جم سنه اشتغل وتحطين بحلك جهال مو جهالنا صحيح همه ولد اخويه بس اني ممجبور عندي بنيه وحده واربي ٤ وياها انكسر ظهري واني حتى مجامع ولا كونت نفسي ضال تحت رحمه الاسطه والمهندس ولا كدرت اشيل كم فلس وافتح بسطيه واشتغل واعين نفسي
بديعه : شو هذا الحجي جديد شصاير اكو شى تغير من سنين هذا الوضع شذكرك اليوم

فلاح : البارحه سمعت من ولد صديقي جوحي مشغل بسطيات اثنين بلسوك ومحد يعرف يعني يشتغل ويه امي وهم عندي بسطيات حاط بيها عمال ويلم بهاي الفلوس اني مو حسد عيشه لا والله بلعافيه بس اني هم لزمت فلوس مثله ولو لام فلوسي وحاطهن على گلبي جان كدرت اصير مثله هو عنده ولد واحد يصرف عليه والثاني شمره براسنه وخلصان منه ولا بيوم كلف كال هاك هاي كم فلس اله حتى من يتمرض يشوفني اتحوجل بيه واركض هنا وهنا وهو حتى ميشيل راسه ويكول شبيهه
هذا جوحي والله اعلم عبيد شلام وشنو مشتري

حتى خوله ونجم وضعهم احسن من وضعي اني مامجبور تعبي الي المفروض المه لكبرتي ولبنتي ياكلون بيه جهال اخويه العليه سويته صار ٦ سنوات واعتقد كافي كبرو وطار شرهم اصغرهم هاي شرهب ودخلت مدرسه بعد شيلي ايدج منهم وناي كبرت تكدر تساعد بأختها واخوها

بديعه : صدك تحجي وين كبرو البنيه كلها خامس ابتدائي كلاص الجاي تخاف تشربه حار وشرهب تبجي اذا واحد اخذ لفتهه وحتى يونس هستوه بلمتوسطه فدوة تحمل اقلها خلي يونس يوصل للاعداديه وناي للمتوسطه
فلاح : اكو شغله اجتني بكربلا اذا صارت اخذج واخذ بان ونشيل هناك
بديعه : من كل عقلك اعوفهم واروح
فلاح : مترحين اخذ بان وضلي وحدج هنا وخلي همه يفرون مصرفج ومصرف الجهال

بديعه : عفيه فلاح لتكول هيج كلي بلتفاهم
فلاح : ماعندي غير حجي حطي بالج اذا صارت شغله كربلا ياتبقين هنا وياج الجهال واني اخذ بتي واروح لو تجين ويانه وتعوفيهم
بديعه : ناخذهم ويانه شكو بيها

فلاح : احجي هندي اكلها اني مهزوم منهم ومن مصرفهم جايتني ناخذهم ويانه اريد الم جم فلس يمره حسي بيه الكدامج مو مطي يشتغل ليل نهار وميتعب يجي يوم واتعب واكبر ويصير حسره عليه شيله كلاص المي تالي منو يفيدني اذا ماعندي فلوس منو يعيشني شو اني حتى ولد ماعندي اعتمد عليه رضيت بهاي البنيه وكعدت وسكتت وكلت رزق الله وتاليها تكبر وتتزوج وتروح لحضن رجلها منو يعيشني احجي بلال المايفتهم حتى الحجي لو يونس الي بالاخير يصير كلشي لمرته يجوز حتى خواته يعوفهن

فلاح : تعرف يونس مثل ابنك وشكد طيب ومتأكده بيوم هو يصير عكازتك
فلاح : هو الابن يعوف ابوه تردين ابن الاخ يصير عكازه خرابيطج احتفضي بيها لنفسج وكتلج ياتجين ويانه ياابقي هنا وانسيني وانسي بتج كافي مصخت حيل وتعبت وماعندي طاقه اتحمل بعد
عافني وطلع كعدت ابجي ياربي شون اعوفهم وحدهم نزلت على عمتي وحجيت كلشي الها
عمشه : يمه براحته چا غير حكه

بديعه : والجهال
عمشه : مايباتون بلشارع چا نفس الشى ضالين هنا
بديعه : تخليت حالهم وحدهم ويه ساهره وصالحه شون يعيشن وخاصه هاي الفتره ملاحظه سما كورها وكور ناي وتسوي مشاكل ااخ منك يفلاح منين طلعت هاي السالفه هسه

اني ناي بت ذكرى اكيد كلكم تعرفوني يمكن اول مدخلتكم لحياتنا جنت صغيره وصافنه على بيبيتي هاي شون تحجي شو مو مثلنا ومكيفه على سوالفها
ومااتذكر شصار وشون بيوم وليله صرت يتيمه الام والاب بس من كبرت عمه بدعه كلشي حجت الي

اني ناي الرفضت ينسد باب امها الماتت مظلومه وبقيت الباب مفتوح لان من وره بابها انفتحت حياتنا على شغلات جان لازم منعيشها يمكن لو امي هنا مجان صار بينا كل هذا

صغيره وفرحانه بشهادتي والدنيا عيوني على اخويه يويو احبه لان حنين وطيب وهادئ وشرهب اختي الصغيره الي لسانها ميسكت واذا رادت شى تاخذه لو تعرف تبجي للصبح
اكثر واحد احبه من ولد عمي هو بلال طيب وحباب وبس يحضن بيه وانقهر عليه من الجهال يضربوه لو يخافون منه ويسموه المنغولي
مرات اضوج واكعد ويااه بلباب ونحسب جم مره وجم رجال يفوت هو يعرف بلحساب شاطر واكثر واحد يحسب هو اليفوز وياكل الشاميه الحمره حتى تصبغ لساناتنا

كاعده العب ويه بلال توكي بلباب واضحك سمعت صوت عمه بديعه كلت اخاف اتصيحني
بلال لتتحرك
بلا : لا لا مااتحلك (اتحرك)
ناي : عفيه بلسبع ركضت للبيت
دخلت لكيت عمه تعيط شون اعوفهم
فلاح : انطيتج خبر قبل كم يوم وعكب باجر طالعين من الفجر
بديعه : والجهال
فلاح : يبقون هنا

بديعه : منو الهم احجي عمه عفيه اقنعي
فلاح : امي مالها دخل كتلج حضري نفسج
ناي : وين عمه رايحه
فلاح : بعد منا وهيج انتي راح تشيلين اخوتج عمتج راح اخذها ونشيل
ناي : مفهمت شنو قصده وبقيت صافنه بلوجهه جان تصيح عمه صالحه الي اموت منها
صالحه : يعني تشتغلين بمكان عمتج وتبطلين لعب وتكمز

ناي : وهنا بدت حياتي ويه صالحه وساهره

يتبع .....

قناة للقصص العراقيه الواقعيه حصرا
‏لاتختار الشخص الجميل، إختر الشخص الذي يجعل حياتك جميلة ❤🌹
بوت تواصل @HD_2018bot دَنـُـــوشٌ┊dиσσѕн ║
تاريخ إنشاء القناة 2018/7/16
قناتنا2 @loves959

#الابواب_الخمس
البارت السادس والعشرون
للكاتبه Reem

(بارت طويل لعيونكم 🌹)

كون ايصير كلشي بعمري مكَلوب
وارضة بكل شئ يطلع عن اصولة
كون اول حياتي الكبر والشيب
واخر لحظة من عمري الطفولة

صالحه : يعني تشتغلين بمكان عمتج وتبطلين لعب وتكمز
بديعه : على كيفج وياها بسم الله بعدني مرحت واستغليتي الوضع
ناي : درت وجهي من عمه صالحه واباوع على عمه بديعه التحرك بدمها
بديعه : بنتي روحي لعبي ومالج دخل بسوالف الكبار
فلاح : شوفي بدعه اني مال ابقى هنا بعد لو تنطين كتلج من الاول شنو البالي وانطيتج خبر بكلشي وعكب باجر الفجر رايحين وانتي بعد بكيفج تضلين هنا اخذ بتي واروح وتحلمين تشوفيها تردين تجين حضري ملابسج وملابس بتج وبس
ناي : واحنا عمو

فلاح : عمو انتم تبقون هنا بيتكم وهاي بيبيتكم موجوده وعمكم عبيد وجوحي ونسوانهم ولدهم
ناي : بس اني اريد عمه بدعه هي امنا شون تعوفنا
بديعه : جريت ناي وشهكت من البجي اول مره انحط بهيج موقف لو ياخذ بتي الوحيده واعرف فلاح كد كلمته وراح يحرمني شوفتها هاي اذا ماتزوج واسس حياته ونساني
او اعتبر روحي بليه رجال وانسى بنتي الوحيده وابقى على راس ذوله الايتام وبلال الاعتبره ابني الثاني فلاح ديخيرني بين روحي وگلبي واني اثنينهم مااكدر بلياهم

عمشه : يمه فلاح شنهي ماخذ البت وهاج ليغاد چا شنهي خلصت الشغيلات وعايف امك وبيتك وضال يم الغرب
فلاح : تعبت من الشغل ومامحصل نتيجه واحدكم عايش حياته وماحاس بلمسؤوليه الذبيتوها براسي
عمشه : چا انه ماساعدتك احجي ضميرك

فلاح : تساعدين يمه بس مايكفي وذوله ٤ غير بتي ولدج كل واحد حاير بروحه حتى الجوحي الي ابنه هو بلال ومن صلبه ماكلف نفسه بيوم ينطيني فلس ويكول هاك هذا لابني مو لاحد
عمشه : يمه چا هو وليدك وربته بدعه ويحبك ويضل هنا بهذا المچان كاعد وينتظرك عكب ترد ويركض عليك ترد رويحته من يشوفنك چاشنهي يفلاح حتى هذا الوليد تعيفه

فلاح : قابل اني مااحبه لو ما احب جهال صمد بس تعبت والحيل ثكيل والعيشه صعبه اركض والعشا خباز ماضلت شغله مااشتغلت بيها وياريت بيها فايده اريد الم روحي يمه اني كبرت واريد اسند ظهري ولد والله مارزقني اقلها اسند ظهري على جم فلس اشتري كاع واحطها اسوي اي شى حتى من اكبر اكول اي سويت وتعبت والحمدلله فاد التعب
بديعه : ليش اذا تعبنه عليهم وربيناهم احسن تربيه قابل مينفعون بكبرتنا
فلاح : ربوني واني الهلي
بديعه : واحنا اهلهم ومردهم النا

فلاح : لاتجذبين الجذبه واتصدكيها تالي البنات لرجولتهن ويونس يتزوج ويروح وبلال مامنه رجه يضل طول حياته عاله علينا اسكتي يبدعه واليرحم اخوانج ذيج السنين ساكت بس مصخت بعد واني من حقي اشوف حالي متردين ضلي هنا يطبج طوب

بديعه : عافني وطلع واني حاضنه ناي وابوس بيها
صالحه : يعني حتى بلال تعوفوه بله ذوله منو الهم عيني مصرفهم اكلهم شربهم مدارسهم خوش والله انتم خلفو وذبو واحنا نبتلي
بديعه : وخرت ناي من حضني وباوعت على صالحه انتي من كل عقلج تحجين هيج صحيح اني اعتبرهم ولدي وقطعه من روحي بس لتنسين واحد ابن اختج شمرته والباقين انتي واختج يتمتيهم لتسوين نفسج خيره واني الموخوش الخلفت وذبت

صالحه : وشبيج هيج گبيتي شحجيت وترجفين عليه لتذبين حركت رجلج بيه
بديعه : وخري من وجهي تره الدنيا طالعه من عيني عفيه عمه احجي ويه فلاح بلكت الله ويغير رأيه اني اذا عفتهم ورحت يطك گلبي مااتحمل شون مااصبح عليهم شون مااوكلهم بيدي اني من يطلعون للمدرسه گلبي ينخمش اخاف يصير عليهم شى واذا تأخرو اتخبل تالي اعوفهم واروح مااكدر والله ابنج ديذبحني بسجينه عميه

عمشه : چاانه بيدي وليداتي صايرين شورهم من راسهم وفلاح من سنين مايسمع الچلمه مثل اخوته عبن شغله وحيده ومارضى وياي يشتغل وانه مثلج دولبني ومايرضى يضل راسه يابس
بديعه : شون ياربي المن اشكي وشون اقنع فلاح نبقى
ناي : راح ترحين عمه وتعوفينا
بديعه : تعالي بنتي ويايه

ناي : سحبتني عمه وياها للغرفه الفوك ودخلنا الها كعدتني بصفها اباوع على عيونها مورمه من البجي وتمسح بعيونها ويرجع الدمع ينزل
بديعه : تعرفين بيه شكد احبج واحب اخوانج
ناي : اي عمه اعرف
بديعه : وشفتي بعينج عمج فلاح شون عصبي وميقبل غير رأيه واني بنص نار يايمه لا بيه اعوفكم ولا بيه اعوف بتي

ناي : روحي عمه وياه احنا هنا ماعلينا شى
بديعه : اعرف بيج عاقله وحبابه وكبرتي وتفتهمين كلشي بس هم مااكدر اعوفكم وحدكم يمكن من نار گلبي كاعده احجيلج اشوف بيج اخيتي ذكرى شون من جان الحمل يزداد عليه اكعد واسولف وياه وارتاح
ناي : عمه انتي تكدرين بليه بان وعمو
بديعه : لا والله مااكدر انتم اعزاز وهي هم بنيتي وعزيزه
ناي : روحي لعمه خوله واسأليها وهي راح تريحج
بديعه : اوووف اي والله صار جم شهر مشايفتها اروح الها والله يايمه جنج امج الله يرحمها دوم تشور عليه بلشي الزين كومي دخلي بلال راح تصير مغربيه
ناي : رايحه اصيحه

نزلت واني افكر شراح يصير بينا اذا راحت عمه
طلعت للباب لكيت بلال يلعب توكي وحده ومره يسوي نفسه ناي ومره بلال ويضحك ويه روحه
يله بلبل ندخل جوه
بلال : مااريد حبابه نلعب توتي
ناي : باجر نلعب توكي تعال انطب ماما متقبل نبقى بره
شويه شويه حبابه ويبوس بخدي
يله داس واحد وندخل كعدنا نلعب واجه يونس

يونس : شعندج بره لهسه
ناي : بلبل يريد يلعب
يونس : شرهب وين
ناي : هاااا ماادري
يونس : ولج مو تدرين بيها متكعد راحه طبي شوفيها وينها
ناي : طبيت اركض وخايفه عليها هاي حركه وكحه اصيح شوشه شوشه
ماكو
لكيت بان بلمطبخ ويه عمه بانه مشفتي شوشه
بان : شفتها فوك
ناي : اوف منج ركضت عليها دخلت للغرفه ماكو ضربت كصتي بس لا وجان تگب العيطه مال سما
ركضت لغرفتهم
صالحه : شبيج ماما
سما : لعابتي كاصين شعرها وملابسها
صالحه : منو ياچلب كاصها
سما : هاي شرهب الحقيره
وباوعت على ناي

صالحه : ولج سليمه البين يم كفشه وينج اليوم اكص شعرج مثل ما كصيتي شعر لعابتها وبدت ادور عليها اني خفت وبطني وجعتني اعرف عمه راح تضربها كمت ادور عليها بكل مكان تالي صعدت للبيتونه
شرهب يمعوده وينج ودمعت عيني من الخوف عليها واسمع صوت بس بس اندار والكاها خاتله بين الفراش

شسوين هنا
شرهب : خاتله من عمه
ناي تقربت منها وكعدت بصفها ولزمتها من اذنها ليش تتحارشين بسما
شرهب : هي خبيثه متنطيني لعابتها العب بيها
ناي : وتكصين شعر اللعابه بأبتسامه طفوليه كالت
شرهب : سويتها كرعه وشكيت ملابسها حتى تذبها بلزبل واني اخذها
ناي : ميصير هيج عيب هسه اكول ليونس عليج ويزاعلج
شرهب : لا ازاعلج اذا تكولين وبرطمت تريد تبجي

ناي : هسه تكتلج عمه مالي دخل
شرهب : من تضربني ابجي واروح لبيبي تعيط عليها
ناي : خوش لكيتي سالفه تسوين المصيبه وتختلين يم بيبي تعالي انزلي جوه
شرهب : اشتريلي لعابه
ناي : مااشتري اله تصيرين عاقله
شرهب : اني عاقله
ناي : اي كلش امشي بسرعه انزلي يم بيبي
كامت حافيه لزمت نعالها وحطته جوه ابطها ونزلت تركض شوكت تكبر ونخلص من هوستها

نزلت وراها وجان تشمر نفسها بحضن بيبي
شرهب : بيبي يردون يضربوني
عمشه :ياااهو يمد يده اجسرها
شرهب : عمه وتأشر على صالحه هي شالفتها واجت تجرها من شعرها
ااااخ بيبي

عمشه : عيفيها لاانعل شيب اهلج
صالحه : غير بجت سما
عمشه : چا شنهي حشت رجولها هي دميعات وطاحن وبنيتج حديثه شسودنها وبجت
صالحه : كله من وراج عمه انطتيها عين بكد القندره وتسوي بلاوي وبتي بعدها صغيره

عمشه : شنهي انه بعمرها تزوجت فرج ١٣ سنه واعرفن گلشي وصرت مره حوك اداري عيالي وابو بيتي وانتي تجوعرين بتي صغيره
دهر الدهرج انتي وياها چا غير بلغت
صالحه : صغيره عمه وذاك الوكت يختلف عن هسه واذا بلغت مو معناها كبرت شنو ١٣ سنه طفله واني اضوج من اشوفها تبجي لو احد يندك بيها و هاي متبطل تضوجها وتبجيها

عمشه : حبوبه شعامله وهاي المدهربه تزكح عليج
شرهب : ههههههه مدهربه
صالحه : عمه لتغلطين كدامها هاي تحفظ وتعيد الحجي
عمشه : چا جذبت مدهربه ومسودنه وعكربه وماتنهضمين

شرهب : بيبي اني احبج وباستها
عمشه : يايمه وانه رويحتي بيكم يله ولي ولا تجيسيها وروح ابيها امدج هنا وامسد عظامج تمسد وذيج بنيتج شوي اكرصيهه لاتذب سمها على بت عمهه چا انه مااخلص من وحيده يطلع البزره ركيه ومفشوكه نصين

صالحه : اعرف بيج متحبين بتي وتحبين ذني تره لا عبالج اسكت الها خليها اليوم كله بحضنج وانتي والله اذا ماالزم شعرج واكصه مااطلع صالحه
لزمت شعرها شرهب وعاطت وتبجي
بيبي راح يكصون شعري واصير ولد مثل يويو

عمشه :انتي مره وطالعه من ظهر ابوج وجيسيها وحك العزاز النامو بلتراب لا ازينج بيدي وراسج هذا جنهه راس ثوم اطبره اطبر
صالحه : ضلي دافعيلها لحد ماتكبر ومتسيطرين عليها وتجيبلج الهبيه وعود ذاك الوكت اذا مامتي اذكرج
عمشه : ضاله على افادج مااموتن چايومج كبل يومي والبس احمر واردح انه والبت فوك گبرج

ناي : تعالي شرهب نصعد فوك
شرهب : مااا انام هنا وتأشر بحضن بيبي
عمشه : عيفيها يمه وانتي صويلحه ولي ليغاد كملي شغيلاتج كون اطيحين وتنگسر رگبتج كولي امين يمه
شرهب : امين شنو امين بيبي
عمشه :والغسل لا تضلين تسألين
صالحه : اسمعي لج انتي الخبيثه اذا تقربتي من سما اعلكج من شعرج بلبنكه هلمره راح ابلعها مره ثانيه لو مو بيبيتج توكفلج اسوي بيج الماتسوه اجويج على ايدج احركها كلها افتهمتي

عمشه : ولي وحمس الحمسج
ناي : كعدت بصف بيبي بعد مراحت عمه وهي تعيط وصايره نار
لج صيري عاقله لا كل شويه مسويه هوسه
عمشه : حبوبه بطلي من صويحله وبتها يأذوج
شرهب : انتي متخليهم بيبي

عمشه : يايمه لو علي مايجيسوج لو على كص رگبتي عبن رويحتي بيجن انه اخافن تستگوي عليج وانه ماموجوده
ناي : بعد منا وهيج احبسج بلغرفه مطلعين
شرهب : اريد لعابه شعرها اصفر
عمشه : يااا باجر من صباحيه الله ادورلج بلعتيك واشوفنج وحيده حليوه مثلج

شرهب : اريدها جديده بيبي مثل مال سما
ناي : كاافي وامشي اصعدي
عمشه : انه يصير عندي جم فلس واشتريلج لاتكدرين خاطرج ياحبوبه تعالي احبنج(ابوسج) واصعدي ويه اخيتج
ناي : اخذتها وصعدنا جنت افكر اذا عمه ماكو وبيبي بلشغل احنا شون بينا

بديعه : ثاني اليوم مرجع فلاح لبست عباتي من الصبح وبحجه اسوك ركبت نفرات ورحت لخوله طول الطريق ايدي على خدي وصافنه وصلت وبقيت اتمشى لحد ماوصلت لشقتهم غيرو مكانهم بمكان احسن وانظف وارتب صعدت ودكيت باب الشقه هواي دكيت اعرف نوم خوله ثكيل وين يله فتحت الباب وعيونها مورمه من النوم

خوله : هااا منو اجانه من الصبح يمعوده الچلب العضج كتلناه ممصدكه ذكرتي واجيتي
شمرت نفسي بحضنها اشهك بلبجي
خوله : شكوو الجهال صار بيهم شى شو تعالي ادخلي وسديت الباب شكو تره دمي نشف

بديعه : فلاح يريد ياخذني اني وبان لكربلا
خوله : شكوبيها زياره ونسه على تبجين من وجع كون وكعتي گلبي
بديعه : لا يمعوده اسمعي الصار وبديت كلشي احجي وخوله كعدت على القنفه ورفعت رجلها وصافنه بوجهي واعرف بالها الف حسبه

خوله : كلت بس فلاح بيه حظ وخلف الله عليه مداري الجهال وتالي عوج
بديعه : شسوي اجيتج  وهموم الدنيا كلها واكعه على راسي ومحد يحس بيه
خوله : مالها حل غير ترحين وياه هذا مبين شاد حيله والشغله مو ضحك لو زعله يوم يومين اخاف متسمعين كلامه وينفذ تهديده
بديعه : والجهال

خوله : الهم الله شنسوي غير امي راكبه راسها ومتقبل تنطيهم تعالي لا همه عابرين السن القانوني واخذهم ولا الي حق اطالب بيهم بلمحكمه وهذا الطحش عبيد وسواها عناد بنجم وبيه وذوله اليتامى وكعو بيها

بديعه : صغار منو الهم ذني ساهره وصالحه راح يطلعون القضى والمضى بيهم
خوله : كحاب ادري بيهن هلمره تصفنين لحظه اكول فلاح حقه مامجبور يتحمل كلشي والعيشه صعبه ولحظه اكول غير ولد اخوه ويدري يضيعون اذا اخذج وراح
والله يابدعه حيره وتصفن الميتصفن
بديعه : مااجيت حتى تصفنين اريد حل ساعديني
خوله : مالها حل روحي ويه رجلج بلكت كم شهر ويمل ويرجع

بديعه : هلمره حتى بلال ميقبل اخذه
خوله : شجاه هذا يرادله مداراه ومتابعه كل وكت لازم واحد يركض وراه كل شويه وهاي ساهره ولا جنهه تعرفه
بديعه : حطيت ايدي على راسي اااخ اخوج ذب جبال على راسي ويگلي ارفعي راسج
خوله :اتوكلي بالله وروحي وياه لتخسرين كلشي وحاولي تحجين وياه من يهدا بلكت من يروح هناك ويشوف الوضع يغير رأيه ويرجع

بديعه : نجم وين
خوله : طالع من الفجر للشغل هذا هم الثاني شك گلبي كتله اتزوج وتلاحكلك على طفل يشيل اسمك قافل
بديعه : صار سنين وهذا حاله منسه
خوله : ليش هي تنسي يبدعه وربج مرات من التعب ينام جفي على وجهه ومرات اذا ماعنده شغل يضل يشرب جكاير ويسمع راديو ويبجي لهسه ينوح عليها ويتختل مني اخاف اشوفه واحجي علي بطلت حتى كمت من اشوفه يبجي مااتقرب منه لان يختنك اكول خلي يبجي ويتعب وينام

بديعه : والله اني كلت وره هاي السنين كلها راح ينسى ويتزوج ويعيش حياته
خوله : ياريت والله شكد حجيت لساني انشل من كثر الحجي
بديعه : الله يبرد گلبه خلي اروح ارجع هسه الجهال يكعدون
خوله : اوكفي
راخت دخلت للغرفه واجت هاااج
بديعه : شنو هاي
خوله : ذني هسه بوجهج اطلعين للسوك تشترين للجهال ملابس وغراض اخاف ترحين ومنو يشتري الهم اقلها هلمده عدهم الي يلزمهم اني لو اكدر اطب لذاك البيت جان كل شهر اشتري واودي

بديعه : منيلج هاي الفلوس
خوله : والله من شغلي جامعتهم صار كم شهر ولان انتي راح ترحين اخاف البنات يحتاجن ملابس نعالات هدوم مدرسه منو الهم اشتري ذني ومن الله يمكني ادز بيد نجم خلي ينطيهم لامي بلكت تحن وتشتري الهم
بديعه : امج روحها بلجهال هم نعمه من الله خاصه شرهب شيطانه تكمز هنا وهنا ودمها يلعب وهاي عمشه روحها معلكه بيها وياويله  الي يطخها

خوله : بت جليله بعد تصير حركه نار وصي ناي عليها واريد اشوفهم بدعه
بديعه : ماضل وكت عندي باجر من الفجر طالعين
خوله : روحي الله وياكم عود اني اشوف شون نجم يجيبهم
بديعه : خلي نجم ليكطع منهم فدوة وعينه على يونس
خوله : الله كريم روحي لتتاخرين

بديعه : بستها لخوله وطلعت للسوك اشتريت غراض للجهال اشتري وابجي مرات الواحد ينحكم بشى ميريده وفلاح حكمني ولو ادري بيه بس ياخذ بان وفتره ويرجع والله اخلي يرحون وحدهم شكو عليها يم ابوها بس اعرف بيه راح يأذيني بيها واني مالي احد بعد الله وهو اووف يااهلي الروحه روحه ماواحد بيكم بيه ذرة محنه ويسأل عني ميته عايشه لا اله الا الله خلي اكمل وارجع

ناي : كعدت من النوم ورجل شرهب على بطني وشعرها مغطي وجهه شوشه شعرها نكرو (كيرلي) حيل لدرجه من بدايه الشعره ملفوفه وثخين جنهه طلي دوم شعرها نازل على عيونها وتشيله ويرد ينزل ومن نشيله بقراصه يكفش بس هيه تحبه وتوكف على المرايه وتكمز حتى يصعد وينزل تكول شعري يكمز ويايه

وخرت رجلها من بطني وشعرها من الوجهه عدا شعرايه بحلكها شون نايمه ومتحس كارثه هاي البنيه غطيتها وكمت اباوع بلكاع مكان يونس فارغ وين راح طلعت من الغرفه ونزلت جوه اسمع عمه بدعه تحجي ويااه وحاضنته وهي يبجي

بديعه : يمه يونس انت رجال ويعتمد عليك خواتك امانه عندك ذني بعدهن صغار وميعرفن
يونس : واني هم عمه بعدني صغير واخاف وحدي
بديعه :بس انت رجال والرجال ميخاف لعد اني اكول رايحه وعايفه رجال حوك وياهن طلعت ماافهم وانت جاهل وتبجي وتخاف
يونس : عمه لتعوفينا مثل امي

بديعه : سوده بوجهي هو بيدي واعوفكم وابجي بحرگت گلب وحضنته وابوس بيه حبيبي وصيتك خواتك لتخليهن وحدهن ولا يكعدن ويه ولد عمك خاصه ناي كبرت ابني
عيب تكعد وحدها وياهن
يونس : حتى ويه بلال
بديعه : لا بلال غير شكل وعينك عليه هذا اخيك وميفهم لتخلي احد يأذي
يونس : ماشي عمه وشوكت ترجعون
بديعه : والله ماادري بس منتأخر ان شاء الله
وعمك نجم راح كل فتره يجيك وينطي مصرف لعمتي اخذ منه واشتري التريده انت بعد رجالهن وحاميهن دوم اكلك مالهن سند وعزوه غيرك وذني بنات لازم دوم عينك وراهن

ناي : دخلت للمطبخ وكلت زين والبنات ميحتاجن ام فوك راسهن وانتي امنا ودمعت عيني
اجت عمه تبوس بيه وتحضن
بديعه : اوف ربي ارحمني برحمتك والله گلبي ممرود وكل حيل مابيه عبالج هينه عليه اني هسه عايفه جهالي وطالعه وحتى الهوا كارهته
ناي : اني ماشفت ماما واتذكر شى بسيط ومرات مااتذكر انتي الشفتج دوم وانام بحضنج وتهتمين بيه وادافعين عني وادرسين ومن اتمرض اداريني انتي امي شون تعوفيني

بديعه : لتأذيني ناي وروح امج الطيبه مغلوب على امري اذا ضليت هنا عمكم مراح يرحمني واذا قبل ابقى يجوز فتره ويطردني واني مالي مكان غير وياه ترضين امج تنشمر بلشارع
ناي : هزيت راسي وابجي لا
بديعه : تعالي يانور عيني متعرفين من اشوفج اشوفها وانتي مهديه نار البيه من فركاها
مااوصيكم بعد وانتي نايه ديري بالج من ذني ولتنطين مجال الهن واذا صار شى روحي لعمتي احجيلها لتخافين

ناي : اخاف بيبي تتعارك وياهن
بديعه : مالج دخل گبار وبينهن يتعاركن المهم لتنطيهن مجال يأذنج ويأذن اخوتج صيري سباعيه
ناي : اي عمه

بديعه : وعمج نجم من يجي احجيله اي شى يضوجج لتسكتين وشرهب بعديها منهن اختج تكمز طفله متفهم حاولي تسيطرين عليها
اوووف يايمه شعدد الكم وحده اثنين واوصي
يونس :اني موجود وعيني عليهن
بديعه : اروح فدوة لطولك ولعقلك ورزانتك يمه مااوصيك بعد ودراستك انت شاطر مااريد متقرا وتتهزم لان ماكو احد يتابعك اريدك تبقى هيج شاطر
وانتي ناي وراج بكلوريه اريد اسمع معدل زين
ناي : اي عمه اقره زين واطلع معدل لخاطرج

حضنتهم وابجي ياربي الصبر منك احميهم ذوله يتامى مالهم احد غيرك ابعد عنهم كيدهن ومصايبهن وسحورتهن جان تدخل عمتي
عمشه : شنهي تحضنين بيهم وتنحبين
بديعه : غير باجر من الفجر نطلع
عمشه : چا هذا فليح مارد لعگله وضل بينا
بديعه : لا حتى مااجه البارحه
عمشه : انه اعرفنه مايفوخ اله يتسوحل ليغاد ويضوك المر وتالي يرد يلولح براسه
بديعه :مابيدي شى غير اسكت واسمع كلامه ويعيني الله على فراك ذوله عمه مااوصيح عليهم بروح ابوهم وامهم لتخلين ذني يأذوهم

عمشه : چا انه وين وليت ضاله هنا واريدن اشوف منهي بيهن تكرب ليهم لايتكدر خاطرج ذوله بعزيه رويحتي وانه احبنهم اكثر منج
تعالو حبوبه تريكو وياي جيعانه انه
ناي : اني اسويلج بيبي البيضه التحبيها
بديعه : اخاف عليج من النار اني اسوي
ناي : لا عمه اعرف والله وعلى كيفي هو سلك اجيب جدريه الفافون الصغيره واحط مي بيها وبيض وعلى النار ومن تفور هوايه اطفيها واطلع البيضه وجوه المي تبرد واكشرها
بديعه : بس لتسوين شى اخاف عليج من النار
ناي : خلي اسويلج ويه بيبي
بديعه : يله تعالي اثنينا نسووي

ناي : كعدنا كلنا نتريك ونزلت شرهب بكفشتها والبجامه نصها نازله والرجل الثانيه مرفوعه حرب مو نايمه واجت كعدت بحضن بيبي
شرهب : جوعانه
عمشه : يايمه بطن عدوينج الجوع هااج أگلي وياي
وتوكل بيبي بشرهب
نزلت بان كاعده وتباوع على يونس وعلينا عيونها حمره مبينه باجيه عمر بان جان ١٤ سنه رغم علاقتي بيها محدوده بس مايوم أذتني وقبل لتكبر جانت تلعب ويايه

بيج شى بانه
بان : لا مابيه ماما كملت حطيت ملابسي بلجنط
بديعه : اي يمه هسه اكمل البيدي واصعد احط هدوم ابوج وهدومي
ناي : وبلال راح تاخذوه وياكم
صار صوت بجي بان عالي مبين مختنكه ومتحملت
بديعه : اسكتي بنتي
ناي : راح يبقى ويانه متاخذوه
بديعه : هو اخوكم واعرف بيكم راح اداروه نايه بغلاتي عندج عينج عليه تعرفي شكد متعلق بيج
ناي : اني هم احبه
بديعه : خلي ينام يم يونس حتى اخاف بليل يكعد تحسون عليه

ناي : وغرفتكم تقفلوها
بديعه : اي اقفلها وانطيج المفتاح شتحتاجين اخذي من الغرفه وارجعي اقفليها واياج تنطين المفتاح لاحد
عمشه : چا بيها فلوس فرعون هي خشيبات مكسره
بديعه : ميخالف عمه تقفلها احسن ومن تحتاج شى عود المفتاح يمها

ناي : يوم حزين جان للكل كل ميصير موقف واحد من عدنا يبجي صعب علينا انفاركهم وبليل اجه عمو فلاح
فلاح : هااا شقررتي
بديعه : غوركت عيني وكتله وياك وين متروح
فلاح : ماطول هيج ساعه ٥ الفجر طالعين
بديعه : الله يسهل
صعدت الم الغراض الباقيه سمعت صوتهم بلغرفه الثانيه يبجون مكدرت افتح الباب واطب عليهم اذا طبيت شراح اكول الهم عفتكم وكت مردتوني قصرت وياكم وماصنت امانه امكم بيا وجهه اكابلهم واكعد خليت ورجعت لغرفتي كملت كلشي لحد ال ٢ بليل فتحت الباب عليهم لكيتهم نايمن بست كل واحد بيهم ردت اشم ريحتهم قبل روحتي
كوه حاصره روحي لا اعيط وابجي تالي اشرلي فلاح عرف بيه هنا بستهم واحد واحد وخاصه بلال حتى ايده بستها وهو نايم طلعت ويااه وكل خطوه اخطيها اباوع على البيت وعلى بيبانه كلشي عشته هنا تحملته اله فكدهم دمرني

طلعنا والكل نايم اني بليل سلمت على عمتي وتعرف بينا راح نروح سديت باب الشارع وعفت اربع جهال بين ناس مارحمو اهلهم ولا رحموهم باوعت للسما جان الفجر يريد يطلع رفعت ايدي للسما ربي ذوله امانتك ارحمهم برحمتك الواسعه واحفظهم لكيت بان حاضنه ابوها وتبجي صعدنا بلسياره ومشت بينا وعفتهم بيت عمشه ام العتيك

ناي : كعدنا اليوم ولاول مره صوت عمه بديعه ماكو عرفت راحو
كعدت يونس وبلال وشرهب حتى يتريكون نزلت اسوي الهم ويونس يساعدني
حسيت بوحشه كوه لازمه دمعتي لاول مره احس من گل گلبي اني يتيمه لا ام تحضني الصبح وتبوسني ولا اب يسأل عليه
امسح بعيوني مااريدهم يحسون طب مرتضى من بره
مرتضى : هاي الشنو اليوم الريوك من ايدج عمه بديعه وين
يونس : حارو
مرتضى : كالت امي راح يرحون اساعدج بشى اخاف متعرفين
ناي : لا شكراً وكتمت خنكتي
مرتضى : نايه يمعوده شكو وهيج تبجين شو خلي اشوفج دارني عليه

مرتضى : لتختنكين اتنفسي
ناي : عوفني عفيه
مرتضى : لا مااعوفج تعالي اكعدي
ناي : جوعانين خلي اكمل ريوكهم
مرتضى : شوفي شجبت الج
ناي : انطاني علاكه بيها جبن احبه مالح
شكراً مرتضى
مرتضى : بس شكراً مالي بوسه
وقدم خده متعلمه من صغيره من يجيبلي شى ابوسه من خده شكر اله هلمره تقربت جان يعيط يونس

يونس : شدسوين
ناي : فزيت اشكره
يونس : كلتي شكراً وكافي ودفعني بعيد عن مرتضى
مرتضى : هاي شبيك تخبلت قابل اول مره
يونس : واخر مره بعد متنعاد
مرتضى : اليوم مبين ضاربات عندك وضايج وتريد تذبها براسي وتغثني غير بت عمي ومن احنا وصغار هيج

يونس : وكبرتو وفضت
نزل مهند من فوك وطب للمطبخ خيركم من الصبح جنكم ديوجه واحد واكف بوجهه الثاني
مرتضى : مالك شغل انت
مهند : مسألتك الك احجي يونس
يونس : هيج شغله وراحت
صالحه : شصاير بعدنا بسم الله اول يوم بدعه ماكو وطلع صوتكم
يونس : يله بسرعه كملي الريوك ويباوع على ناي ويخزر بيها

ناي : اشرت براسي وكعدت اكمل ريوكهم وصالحه تسوي ريوك مرتضى ومهند اخذت الصينيه وكعدنا بلهول شرهب بحضني وبلال كعده يونس حتى يوكله اباوع ماكو عمه ولا سوالفها ولا ضحكها طلعت بيبي من الغرفه
عمشه : صبحكم الله بلخير
ناي : صباح النور بيبي تعالي الجاي حار واكلج موجود
باوعت على صالحه وكالت
عمشه : كملن تزوهر وصيحي اختج اريدن اسولف وياجن

كعدت بيبي وكامت شرهب وكعدت بحضنها
كملنا الريوك والولد طلعو ويونس وبلال صعدو فوك اجت ساهره وصالحه واني كاعده امشط شعر شرهب اجيبه منا واودي منا مداعرف
عمشه : اسمعني بنات غنيه كدامجن بدعه سيرت ويه زلمتها الله وياهم والبيت ضل لمطيره والحظ ضل الجن

صالحه : واحنا شعلينه عمه قابل احنا كلنا الهم روحو
عمشه : بسچ لاتقاطعين چلمتي انه اريدن منجن تقسمن الشغل ولا تضلن تهاوشن كل وحده الها شغيله وحيده تطبخ وتغسل مواعين ووحيده تنظف البيت گله
ساهره : وعيني وذوله الجهال انضا انظف وراهم

عمشه : چا شبيج مجسره سكيطه مكوسحه مثل الصل عرج مايطكج هي وصله اكضها وامسح البيت من فوك لجوه طولج مايكصر
ساهره : خلي تنظف ناي مو اخوتها يوصخون
عمشه : چا انه راضيه تنظف وتساعدجن وياها سما تكض الشغل نص نايه ونص سما
صالحه : لا عيني بتي مدلله واخاف عليها مااخليها تشتغل
عمشه : چا وناي گملتها بكعه
ساهره : غير اخوتها يوصخون

عمشه : ابنج وياهم لاتنسين
ساهره : اني ابني مرتضى وبس وصار شاب قابل يوصخ
عمشه : ربج عادل عبن شمرتي وليد مارزقج بغيره وغمه كون اسمعني ولاتلاسنن البيت عليجن وناي تعين اخوتها البت صغيره ومالها حيل لا تعكربن عليها وتضلن تذبن گلشي براسها وانه لون سمعت بيجن لاعبات بذيلجن ومأذياتها ادزن على خوله تجي هنا ترد للبيت وتركب على راسجن واطيح بيجن العافيه

صالحه : لا عمه كله ولا خوله وثاني شى انتي مو متعاركه وياها وحالفه متدخل البيت
عمشه : شنهي اجسر حلفاني لون صارت رطينه وماتنكضن اسير عليها هي ونجم واريد اشوفن وحدتجن شسوي

ساهره : هذا هو عمه احنا انشيل الشغل وهي تحير بدراستها واخوتها بس ملابس اخوتها مالنا دخل بيهم
عمشه : ياا عساجن بلگرم هنه جم ثوب لاتغسلن
ناي : اني اغسلهم بيبي اعرف
عمشه : يمه عينج على خيتج واخيج ولاتكربين لاي شى
ناي : اي بيبي
جنت فرحانه لان بيبي حجت وياهن ومراح اشتغل شغل عمه بدعه لان جان شغلها هوايه

كومي شوشه سويت شعرج
شرهب : محلو شيلي القراصه احبه يكمز ويايه من انزل الدرج
ناي : ميصير يبقى مفتوح يتوصخ
شرهب : ما ما اريده يكمز
ناي : اهووو بدينا العناد
شرهب : بلبل تعال على ناي عضها
ناي : ولج ليش

شرهب : تشيلين شعري
ناي : اسمعي كلام وبليه عناد
كامت من حضني واخذت بلبل من ايده وهو يضحك عفتها شويه وراها كمت  اشوف شسوي طلعت للطرمه واشوفها وتأشرله على القراصه
شرهب : شيلها جرها حيل
بلال : ماادل (مااكدر )
شرهب : ولك هيج جرها جر
بلال : نانه ماتبل (ماتقبل)
شرهب : لا تقبل وهيه كالت بلبل ينزعها الج يله حباب وتبوس بخده جيرها حيل
بلال : ماتبتي نانه
شرهب : لا متبجي ولا تزعل بس جرها
كام بلال وجر القراصه جنت حيل شاده شعرها جرت القراصه من ايده وشمرتها بين السكراب

شرهب : هيييي طارت يله تعال نلعب
ناي : صحت بيها شرهب منو فتح شعرج
حطت اصبعها بحلكها طبيعتها تكرض اضافرها بحلكها شكد اضربها على ايدها ميفيد
شرهب : بلبل جرها من راسي
بلال : هي دالت (كالت)
شرهب : لا مو اني هو ديلعب وجرها
ناي : وفوكاها تكذبين ولج لوما شايفتج بعيني
بلال : مااهبج بعد شنه
شرهب : ولا اني ليش تنزع قراصتي
ناي : جريتها من اذنها اسمعي لج اطبين هسه بنص هذا السكراب كله اتجيبين القراصه
شرهب : اتعور واصير اواو وابجي تقبل بلبل ابجي
يهز براسه لا
ناي : خوانت الفطير بسرعه تگلب يله مالج فلوس تشترين اذا متجيبيها

شرهب : هسه بلبل يطب ويجيبها يله حتى نروح نشتري من عمو ابو الدكان وهذا طفر بنص السكراب يدور على القراصه ولك تعاال راح تتعور وشرهب واكفه وتلعب بشعرها وتضحك
تعاال بلبل لتتعور مااريدها للقراصه بس تعال وانتي ام لسان اذا ما توبتج من الكذب مدت ايدها
شرهب : انطيني فلوس اريد اشتري
ناي : مالج مشتره اليوم وطلع بلال مترب من فوك ليجوه وبيده القراصه
بلال : هااج لاتبتين
شرهب : صفكوله وتصفك وتكمز وياه
انطيتهم فلوس يشترون ويرجعون

دخلت صار بوجهي مهند
مهند : شبيج اليوم ويه مرتضى
ناي : يونس مقبل ابوس مرتضى من خده لان جابلي جبن وشكرته
مهند : حقه لتبوسي عيب كبرتي
ناي : بس هو مثل يونس
مهند : اسمعي كلام اخوج ولتعاندين يله حبابه وشتردين اني اجيبلج
ناي : شكراً

مرت ايام هاديه بلبيت عطله صيفيه وخلصت وبعد كم يوم المدارس فتحت غراض الجابتهم عمه بدعه قبل متروح لكيت بيهم حاجات للمدرسه واكو فلوس هي كالت من تجي المدارس اخذي بيبيتج واشتري لان ملكت جنط وصداري لان مو موسم مدارس سحبت الفلوس ونزلت جان تشوفني ساهره
شنو هذا البيدج

ناي : فتحت ايدي فلوس
ساهره : ايا حراميه منين جبتيهن بكتيهم مو
ناي : لا والله عمه ذني عمه بدعه عافتهن الهن حتى نشتري ملابس مدرسه
ساهره : وشبيهم ملابسكم العام اشترت عفه مو تكول ماعندي شو طلعن الفلوس شو جيبيهن

ناي : والله عمه بوتيني مشكوك وشرهب جنطتها مال العام انشكت ويونس قميصه تعبان يعني الفلوس تكفي شغلاتنا
ساهره : انجبي ولي والعدكم استخدمو واذا على المشكوك خيطو لو حضرتج بت الباشا لازم كله جديد هاي مو البنات وياج يخيطن المشكوك ويلبسن
ناي : اني مااريد اشتري بس اخوتي خطيه

ساهره : اسمعي لج لا كل حجايه وترديها من احجي تكولين صار ومتناقشين لا عبالج عمتي تحميج مني تره برجلي ادوسج واطيح حظج حتى من المدرسه ابطلج
ناي : لا لا عفيه هذا هو راح اخيط غراضنا بس لتبطليني من المدرسه
ساهره : ولي يله وعندج جم قطعه ملابس مال مرتضى اغسليهم وياج من تغسلين مال اخوتج
ناي : صار عمه

ساهره : غير كلمة صار مااسمع بعد لو اكلج اشمري روحي بنار تكولين صار افتهمتي
ناي : اي افتهمت عفتها ونزلت والدمعه بعيني رحت للحمام سحبت الطشت وكعدت اغسل كوه افرك مااعرف اغسل زين
افرك بلهدوم وامسح عيوني هسه غير يبطل الدمع ينزل منها
شوي واسمع صوت ورايه

مرتضى : كومي عوفي الهدوم
ناي : شتريد ودرت وجهي عنه ضايجه من امه
مرتضى: متردين تشترين غراض لاخوانج اني اخذج للسوك
ناي : برطمت من القهر وكتله امك اخذت الفلوس مني
مرتضى : ذني وفتح ايده
ناي : كمزت من مكاني ونزلت دشداشتي الجنت رافعتها واني كاعده وكفت كباله فرحانه قبلت ترجعهم

مرتضى : حتى واذا متقبل اخذهن غصب عنها جنت اتفرج على التلفزيون وسمعت كلامج ويه امي واول مطبت اخذتهن منها
ناي : اخاف تكتلني
مرتضى : مالج دخل حجيت وياها يله بدلي وامشي نروح للسوك ماطول بعد وكت
ناي : اخاف يونس ميقبل اطلع وحدي
مرتضى : مو وياج اني خلي يولي يله قبل ماامي تنزل وتاخذهن مره ثانيه
ناي : ركضت ليفوك وبدلت حتى كصيبتي ما مشطتها خفت امه تاخذ الفلوس ونزلت
طلعنا من الباب جان تجي شرهب تركض

شرهب : اجي وياكم
ناي : ارجعي اشتريلج جنطه جديده للمدرسه
شرهب : هم اجي وياكم
مرتضى : روحي بدلي ننتظرج هنا
ناي : شتبدل وجان يغمزلي مرتضى لزمت ايدي وكالت بدليلي
بس روحي جيبي المشط خلي امشطلج ونروح دخلت تركض ويركض وراها بلال
مرتضى : انطيني ايدج
ناي : حطيت ايدي بأيد مرتضى وركض طلعنا من الفرع اركض واضحك واتخيل شكل شرهب من تطلع واحنا ماكو

وكفنا ناخذ نفس ونضحك
مرتضى : يله نصعد نفرات حتى ننزل بدايه السوك لزم ايدي وصعدنا وكعدني بأتجاه الجامه وكعد بصفي وصلنا بسرعه ونزلت متحمسه
جنت امشي ويه مرتضى واني مااعرف شى وبحياتي ما مشتريه
مرتضى : شتردين اشتري اني هم عندي جم فلس ضامهن جبتهن ويايه
ناي : اريد جنطه لشرهب وقميص ليونس
مرتضى : والج
ناي : مااريد
مرتضى : لعد اول وحده الج بوتينج مشكوك
ناي : لا عفيه اخوتي اهم واشتري لبلال دفتر يكتب بيه حتى يتعلم اكثر
مرتضى : كتلج اول وحده انتي وبله حجي زايد

اشترينا وعوزت فلوس وهم كمل من عنده جنت فرحانه حيل كدرت اشتري وهو حيل ساعدني يعامل ولسان وميخاف
رجعنا والعلاليك بيدي وصلنا قريب البيت اجت شرهب تركض عصبيه وتضرب بطن مرتضى
شرهب : حقير شون تعوفني وتروح
ناي : عيب ولج كولي العفو
شرهب : مااكول وزاعلته
مرتضى : واني جايبلج جنطه جديده يله زاعليني انطيها لسما
شرهب : لا لا احبك وصالحتك جيب الصحيبه ومدت اصبعها وحطته بأصبع مرتضى وسحبت الجنطه من ايده وركضت للبيت

دخلت فرحانه لكيت عمه ساهره وصالحه كاعدات يشربن جاي وياكلن كعك من شافنه تفاجأن
ساهره : وين جنت يمه وانتي ولج يلثوله شطلعج
مرتضى : اني اخذتها نشتري غراض
ذبت الاستكان من ايدها وتوجهت على ناي ولزمتها من شعرها
ساهره : تكسرين كلامي ادبسسز
مرتضى : عوفيها يووم وجر ايد امه حيل
اني كتلها انتي مو كلتي اخذ الفلوس الك اني اشتريت بيهم
ساهره : يمه الك تشتري حاجه تنفعك مو تقشمرك هاي البكد القندره وتسحلك للسوك وتذبهن كلهن

مرتضى : اني كتلها وتوسلت بيها
صالحه : خوش والله ابنج من هسه يحود النار لكرصت ناي
ساهره : ياشحده غير اكص راسه
مرتضى : كصي يله
جان اطب بيبي من خوفي ركضت الها وصرت وراهه
عمشه : شنهي شبيجن تراجفن يمكموعات
ساهره : ماكو شى عمه وانت روح لغرفتك احسابك بعدين ويايه
ناي : عفيه لتكتلي هاج الغراض اخذيهم مااريدهم

عمشه : شنهي ذني
ناي : اشترينا للمدرسه وعمه ساهره متقبل
عمشه : منيلج فلوس
ناي : عمه بدعه عافتهن النا
عمشه : ولج سهيرة يلوجهج من كفاج ماينفهم شتردين من البت
ساهره : مرايده شى عمه بلعافيه على الغراض
عمشه : لاتلوعن جبدي گل شوي هازات البت انه كتلجن تكدرني اسوي بيجن فلك
صالحه : يمعوده عمه ماكو شى روحي انتي لاخوتج يله

ناي : صعدت اركض وره شويه اجه يونس ومن عرف كام يعيط لان طلعت ويه مرتضى
يونس : بعد مطلعين ابد واذا طلعتي ازعل عليج والله ومااحاجيج ابد
ناي : بس هاك كدر ذني شوفهن قياسك
لبسهن وصارن على قياسه جنت فرحانه رغم المشاكل الصارت ورتبت كلشي بمكانه
بس بالي يم بلال من نروح للمدرسه منو اله

اجت المدارس وكمت اني اكعدهم لخوتي اني سادس بكلوريا وشرهب ثاني ابتدائي ويونس ثاني متوسط وبلال مسجلوه لان يخافون من الجهال ليضربوه بس يكعد يقرا ويانه ويعرف يحسب ويلزم قلم ويكتب بس مكسر

داومنا واول يوم من رجعنا لازمه ايد شرهب لان تكمز بلشارع لكيت بلال بلباب كاعد ويباوع على الرايح والجاي
هو شافنه اجه يركض ويصفك اجوي من المدسه (المدرسه)
حضني اني وشرهب ويبوس بينا
ناي : ليش كاعد بلشارع وحدك
بلال : دوعان (جوعان)
ناي : محد سوالك اكل
يهز براسه لا

تعال اسويلك وسحبته من ايده جان يفوتون صديقات اثنين ويه شرهب بلصف وصاحن هذا اخوج
شرهب : اي اخويه
هذا منغولي متخافين منه
شرهب : شنو منغولي نايه
ناي : حرام تكولون هيج هو مأذيكم
شرهب : انتم منغولين وزمايل وزاعلتكم ودنجت وشالت حصو وشمرته عليهن ركضن
ناي : عرفتي شنو منغولي
شرهب : لا انتي تكولين حرام يعني غلطو عليه
ناي : عفيه بلذكيه غلطو عليه
شرهب : باجر اخذ دفتر الاملاء مالتهن واشكه حتى ليغلطون على اخويه

ناي : وهاي هم حرام وعيب بعد لتحجين وياهم وبس لتسوين مشاكل
شرهب : اريد العب يحمصه يزبيبه
ناي : بعدين سحبتهم من ايدهم ودخلتهم
لكيت عمه صالحه مكمله الاكل صبيت النا شويه اخاف تعيط اكلنا وغسلت الماعونين ورجعتهم

جنت ادوخ منا ادرس شرهب ومنا ادرس ويونس دوم ساكت ويقرا
اجه عمو نجم حيل احبه اكثر من عبيد وجوحي من يجي يحضني حيل وادمع عيونه ويشتري اشكال النا ويروح
كاعده اقري شرهب طبت سما للغرفه
واتجهت على يونس الكاعد بلكاع ومركز بلقرايه
سما: قريني عندي امتحان صعب رياضيات
يونس : واني هم عندي امتحان فيزياء
سما : جم معادله علمهن اليه وهذا هو
يونس : تعالي اكعدي
شره لتقريها الكسوله وطلعت لسانها
يونس : عيب كولي لعفو سما اكبر منج
دارت وجهه وسوت نفسها تحفظ املاء

مرت كل الاشهر وبديت اتعلم اتحمل مسؤوليه اخوتي صعبه على عمري بس ماعندي حل مرات اتعب وابجي واخربط وارجع اقوي نفسي ماعدهم احد غيري عمامي همه والماكو سوه ونسوانهم اكوم اكعد يخزرن بيه وسما علاقتها زينه بيونس بس ويانه متحجي ومالها دخل
اما مرتضى ومهند ذوله الدوم مانعين امهم مني ومن شرهب
اما المصرف ناخذه من بيبي لو من يجي عمو نجم ينطيني واضمهم واصرف بيهم على كيفي

دخلنا سنه ٢٠٠١ ايام مرت بارده واني ادفي بلغرفه حتى ليتمرضون اذا تمرضو حتى مااعرف اداريهم والحمدلله عدا الشتا وكلشي زين بهاي الفتره كل شهر يدك تلفون الجيران نروح الهم نحجي ويه عمه بدعه تسأل علينا ومن تحجي لحد متسده تبجي تمنيتها يمنا راحت بوكت كلش محتاجيها

وهسه امتحانات نهايه السنه نجحت شرهب ويونس واني انتظر نتيجتي اليوم تطلع اروح واجي خايفه وبلال مجلب بيه وكل شويه اسألة ناجحه اني يضحك ويكول اي لحد مااجه يونس ردت ابجي من الخوف
يونس : ناجحه ومعدلج ٨٤ عفيه بلسباعيه حضنت اخويه وابجي ممصدكه نجحت وره هذا التعب كله وراح اروح للمتوسطه

صالحه : شكو قابل رايحه للطبيه هي للمتوسطه شلكم بهاي اللواكه
يونس : غير تعبت وقرت ونجحت ونفرح الها
دخل مرتضى حضنها وبارك اليه ومهند هم
حسيت يونس ضاج استحيت ادفعهم غير ولد عمي ويهنوني
نايمه وفرحانه عبرت هاي السنه على خير
وره ايام سمعنا هلاهل گبت بلبيت
صالحه : ولكم نجح مهند 
ساهره : شكد معدله
صالحه : ٦٥ نعمه المهم خلص اعداديه
دورت على مهند لكيته هو وابوه وعمو جوحي ومرتضى كاعدين بلهول  اجيت بلهفه اباركله حضنته وكتله مبروك مهند راح تدخل كليه
مهند : يوم الج
وخرت منه ابتسم وفرحانه اشرت صالحه من بعيد رحت الها

اول مدخلت لزمتني من ياخه الدشداشه لج بت ذكرى لا تحومين على ابني اخاف راسمه لبعيد
ناي : شرسم عمه
صالحه : وسم بگلبج هاي سوالف المراهقات مااريدها اذا طخيتي ابني اشرج على الحبل واشعل اهل اهلج جنج على امج عينج طايره وفاره هنا وهنا مهند اذا وصلتي يمه اندمج على اليوم الي انولدتي بيه تنجبين تكملين شغلج وتصعدين ومنا وهيج تساعدين بمسح البيت
ناي : كالت بيبي ماانظف لزمت كصيبتي وحصرتني بلباب محد يشوفنا
صالحه : تنظفين وكت ماهي ماكو يوم التطلع للشغل من فوك ليجوه مسح كبرتي شوفي نفسج جنج ثور اكل ونوم بعد ماكو واذاحجيتي شى لعمتي وكلتي انظف اهجج من البيت انتي واخوتج وانومكم بلشارع
حتى مااخليهم يلكوكم اكول الهم اخذت اخوتها وانهزمت

ناي : انظف والله لطردينا
صالحه : امشي ولي من ولت روحج ودفعتني حييل
ومن يومها واني من تطلع بيبي للشغل امسح البيت من فوك ليجوه مرات ابجي من ظهري والتعب واخاف احجي  مرتضى ومهند لان عطله الصبح يطلعون يشتغلون بمحل ويه صديق عمو عبيد بيع مواد احتياطيه مال سيارات علمود يتعلمون الشغل جنت اتمنى واحد منهم موجود اقلها يشوف حالي هنه يعرفن شوكت يصخرني للشغل من الكل طالع حتى محد يحس وره مااكمل شغل تلزمني لو صالحه لو ساهره يهددن بيه واني طفله واخاف واصدك بكلشي

وبيوم كاعدين نتعشى كلنا جان يكول عبيد
عبيد : يمه بعد منطلع  وياج للعتيك لان مدنحصل شى والشغله احتركت والكل صارت مثلنا تشتغل وكدامج كوه انلزكها لكينا شغله ثانيه نسترزق منها
عمشه : يايمه ياريت عبن شغل العتيچ هد حيلي
عبيد : يمه اني انطيج الج مصرف بس جهال صمد مالي دخل بيهم
عمشه : چا غير ويايه همه وانتم عمامهم
جوحي : اني يوميتي الراح يشدوها اليه يادوب تكفيني
عمشه : اعرفنك يمه خسيس والفلس ابيك وامك وماتنطي فلس لو گصو رجولك
عبيد : يمه انتي بعد لطلعين واكلج ويانه وذوله بطليهم حتى المصاريف تخف

عمشه : ووليداتك تبطلهم
عبيد : ليش ابطلهم
عمشه : چا ليش تركض على وليدات صمد عبن مرتك وزتك وتاكل براسك
عبيد : يمه لا مرتي ولا بطيخ هذا العندي يكعدون بلبيت ماكو مدارس والي نطبخه ياكلوه موزين منا ملفيهم
عمشه : موش بيتك وتلفيهم وانه طيبه واشتم الهوا وكويه اسير من الفجر لرزگي ورزك هليتامه ولا منيتكم
يونس : اني ابطل عمو واشتغل ويه بيبي وخلي خواتي يكملن
ناي : ذبيت اللكمه من ايدي واباوع بلوجوه
عمشه : يايمه اخافن عليك عبنك رچيج ومامشتغل گبل

صالحه : اي عفيه صير رجال واشتغل ويه عمتي شلك بلشهاده تريد خواتك يكملن وكلهن من جدتعبك مو من فلوس عمامك
عمشه : بسچ لاترطنين يمه يونس انه اشتغل وضل بمدرستك

يونس : لا بيبي اني كبرت واريد اشتغل
ناي : انت عندك بكلوريا ثالث تروح عليك
ساهره : اسكتي انتي شدخلج اخوج لازم يتحمل مسؤوليه كافي لعبت نفسنا عيشو نفسكم
يونس : عمه تره ما ماخذين منج فلس خلف الله على عمو فلاح ذيج السنين كلها وراها بيبي وعمو نجم وعمه خوله هم مرات ادز
ساهره : والله وطلع صوتك وتجاوب ابن ذكرى

عمشه :كرت عيني چا النسوان ترطن وزلامتهن ساكته اهمداكم
يونس : هذا هو بيبي اني وياج من باجر
مرتضى : تعال اطلع ويانه محتاجين عامل بلمحل النشتغل بيه
ساهره : اسكت انت شكو طالع وياكم خلي ويه بيبيته

ساهره : يمه شبيج ترجفين غير ابن عمنا وحاله من حالنه
صالحه : حير بروحك وبشغلك وهو مو صغير راح يشتغل ويه عمتي
ناي : علت اصواتها وزاد النقاش لزمت يونس توسلت بيه ميبطل جان قافل حتى كتله نروح لعمو نجم ويساعدنا مقبل يمكن بوقتها جان يحس بنقص ويضوج لان خواته الرايح والجاي يعير بلكمتهن

وانتهى النقاش يبطل ويشتغل ويه بيبي بلعتيك

اني يونس الشاف امه تموت كدام عينه وهو صغير وخلص طفولته يخاف يطفي الضوا ليشوف دمها

اني يونس التحمل الفقر والتعب لخاطر خواته ميبطلن اباوع بعيون الكل شون من ايد لايد ننشمر والي يتحمل مسؤوليتنا يوم وراها يتخلى تعبت واني احس الكل تتصدق عليه وعلى خواتي جنت احترك من احد يجيب الهن شغله واني مااكدر احجي
رغم شطارتي بس كلت لازم اوكف على رجلي واني اتحمل مسؤوليتهن مثل ما ناي الاصغر مني تحملت مسؤليه حالها حال الام

طلعت للشارع واني ابن ١٥ سنه كلشي مااعرف غير بالي شى واحد اعيش خواتي بچدي وتعبي وبله منيه احد
طلعت واني اسوك المطي الجار العربانه وبصفي بيبيتي وننزل بكل مكان انلكط بين الزبل اول ايام صعبه عليه شون امدها بين الوصاخه والريحه الجايفه ومرات انجرح ويبقى الدم يجري واني الكط واحط بلكونيه لو اركض بين الكيعان الفارغه الي يشمرون بيها مواد بناء لو مخلفات مال بيت
لو ادك البيبان واكولهم عتيك للبيع واشتري برخص السعر حتى بعدين نبيعه لغير ناس ولازم مااحجي ولا اشكي ولا اكول تعبت

اباوع لحالي الجان القميص ابيض يلمع والبنطرون اسود والشعر امشط والايد نظيفه والاصافر مكصوصه وما انام اذا مااسبح  اليوم البنطرون زيتوني عتيك ومركع والقميص اسود املح والشعر مكفش والايد سوده والبوتين الف خيط مخيط ومسحوك سحك كله حتى الم چم فلس ومااخلي خواتي يبطلن
بس المجنت حاسبه شغلت العتاكه تگلب حياتي

يتبع ..
قناة للقصص العراقيه الواقعيه حصرا
‏لاتختار الشخص الجميل، إختر الشخص الذي يجعل حياتك جميلة ❤🌹
بوت تواصل @HD_2018bot دَنـُـــوشٌ┊dиσσѕн ║
تاريخ إنشاء القناة 2018/7/16
قناتنا2 @loves959