ሀገር አቀፉ የ12ኛ ክፍል ማጠናቀቂያ ፈተና ተጀመረ።

የ2017 ትምህርት ዘመን የኢትዮጵያ ሁለተኛ ደረጃ ትምህርት ማጠናቀቂያ (12ኛ ክፍል) ፈተና በዛሬው ዕለት ተጀምሯል።

የመጀመሪያ ዙር የተፈጥሮ ሳይንስ ፈተና በሁሉም የመፈተኛ ጣቢያዎች መሰጠት ተጀምሯል።

የትምህርት ሚኒስትሩ ፕሮፌሰር ብርሃኑ ነጋ ፣ የሚኒስቴሩ አማካሪ ሚኒስትር ዴኤታ ፕሮፌሰር ክንደያ ገ/ህይወት እንዲሁም የደቡብ ምዕራብ ኢትዮጵያ ክልል ርዕሰ መስተዳድር ዶ/ር ኢ/ር ነጋሽ ዋጌሾ በቦንጋ ዩኒቨርሲቲ ተገኝተው ፈተናውን አስጀምረዋል።

ዘንድሮ በወረቀትና በበየነ መረብ ከ608 ሺ በላይ ተማሪዎች ፈተናቸውን ይወስዳሉ ተብሎ ይጠበቃል።

መረጃው የትምህርት ሚኒስቴር ነው።

@tikvahethiopia

ኢትዮጵያ ብሔራዊ ባንክ የገንዘብ ፖሊሲ ኮሚቴ ምን ውሳኔ አሳለፈ ?

የኢትዮጵያ ብሔራዊ ባንክ የገንዘብ ፖሊሲ ኮሚቴ ዛሬ ውይይት አካሂዶ የተለያዩ ውሳኔዎች አሳልፏል።

1. በሁሉም ንግድ ባንኮች ላይ የተጣለው አስገዳጅ የቦንድ ግዥ እንዲነሳ ወስኗል።

ሁሉም ንግድ ባንኮች የረጅም ጊዜ የግምጃ ቤት ቦንድ (Treasury Bond) እንዲገዙ የሚያስገድደው የኢትዮጵያ ብሔራዊ ባንክ መመሪያ (MFAD/TRBO/001/2022) እንዲነሳ ወሳኔ አሳልፏል።

" አሁን ላይ የመንግሥት ገቢ የማሰባሰብ አቅም በእጅጉ በመሻሻሉ፣ እንዲሁም መንግሥት የበጀት ጉድለቱን ለሟሟላት የውጭና ገበያ መር የሆኑ የሀገር ውስጥ የመበደሪያ አማራጮችን እየተጠቀመ በመሆኑ በባንኮች ላይ ተጥሎ የቆየውን ይህ አስገዳጅ መመሪያ አሁን ላይ ማንሣቱ ተገቢ መሆኑን ኮሚቴው አምኖበታል" ብሏል።

ይህ የገንዘብ ፖሊሲ ምክረ ሐሳብ ለብሔራዊ ባንክ ቦርድ ቀርቦ ጸድቋል።

ስለ ግምጃ ቤት ቦንድ ፦ ሁሉም ንግድ ባንኮች የረጅም ጊዜ የግምጃ ቤት ቦንድ እንዲገዙ በሚያስገድደው የብሔራዊ ባንክ መመሪያ መሠረት ባንኮች መመሪያው ተግባራዊ መሆን ከጀመረበት እ.ኤ.አ. ከጃንዋሪ 2022 ጀምሮ ከአጠቃላይ ዓመታዊ ብድራቸው አምስት በመቶ የሚሆነውን ለዚህ የቦንድ ግዥ ሲያውሉ ቆይተዋል።

በዚህ መመሪያ መሠረት የገዙት ቦንድ የሚመለሰው (ለቦንድ ግዢ ያዋሉት ገንዘብ ተመላሽ የሚደረግላቸው) ከአምስት ዓመት ቆይታ በኋላ ሲሆን ፣ ባንኮቹ መመሪያው ተግባራዊ መሆን ከጀመረበት ወር አንስቶ እ.ኤ.አ. እስከ ጁን 30 ቀን 2024 ድረስ የገዙት የቦንድ መጠን 94 ቢሊዮን ብር መሆኑን የገንዘብ ሚኒስቴር የመንግሥት ዕዳ መግለጫ ያመለክታል።

2. በባንኮች ላይ የተጣለው የብድር ዕቀባ የተመለከተ ውሳኔ ተላልፏል።

በአሁኑ ወቅት በባንኮች ዓመታዊ የብድር ዕድገት ላይ የተቀመጠው የ18 በመቶ ጣሪያ እስከ መጪው መስከረም 2018 ዓ.ም. ድረስ እንዲቀጠል ኮሚቴው ወስኗል።

" አሁን ላይ የዋጋ ግሽበት የመርገብ አዝማሚያ እየተስተዋለ ቢሆንም ይህንን ማስቀጠል አስፈላጊ በመሆኑ በባንኮች ላይ የተጣለው የብድር ዕድገት ጣሪያ ባለበት እንዲቆይ ማድረግ አስፈላጊ ነው " ብሏል ኮሚቴው።

3. የብሔራዊ ባንክ የፖሊሲ ተመን (National Bank Rate) አሁን ባለበት 15 በመቶ እንዲቆይ፣ብሔራዊ ባንክ ለሚሰጣቸው ቋሚ የተቀማጭ ሂሳብ አገልግሎት (standing deposit facility)፣ ለቋሚ የብድር አገልግሎት (standing lending facility) የሚከፈሉ የወለድ ተመኖች ባሉበት እንዲቀጥሉ፣ እንዲሁም ባንኮች በብሔራዊ ባንክ የሚያስቀምጡት የግዴታ መጠባበቂያ ምጣኔ በነበረበት እንዲቆይ ተወስኗል፡፡

(ሙሉ መግለጫው ከላይ ተያይዟል)

#NBE #REPORTER

@tikvahethiopia

" ' ከእነ እገሌ ጋር ናችሁ ትፈለጋላችሁ ገንዘብ አምጡ ' በማለት የሚያስፈራሩ ተረኛ ሌቦችና አጭበርባሪዎች እንዳሉ መረጃ ደርሶኛል " - ኮሚሽነሩ

በቅርቡ የሲዳማ ክልል ፖሊስ ኮሚሽን ኮሚሽነር በመሆን የተሾሙት ተስፋዬ ኤቢሶ ባለፉት አራትና አምስት ዓመታት በክልሉ የጸጥታ መዋቅር ውስጥ ይስተዋሉ የነበሩ ህገወጥነትና ሥርዓት አልበኝነትን ለማስተካከል የክልሉ መንግስት ቁርጠኛ አቋም ወስዶ በመስራት ላይ መሆኑን ገለጹ።

" ስልጣንን መከታ በማድረግ ህገወጥ ድርጊቶችን ሲፈጸሙና ሲያስፈጸሙ የነበሩ ባለሥልጣናት፣  ደላሎችንና ኮንትሮባንዲስቶችን እንዲሁም በጸጥታ ተቋም ውስጥ የጥቅም ትስስር በመፍጠር በተደራጀ መንገድ የሌብነት መረብ ከላይ እስከ ታች በመዘርጋት ሲጠቀሙ የነበሩ ግለሰቦችን ለህግ የማቅረብና ተጠያቂ የማድረግ ሥራዎች እየተሰሩ ነው " ብለዋል።

" ለዚህም ስራ የህብረተሰቡ ድጋፍና ትብብር በጣም አስፈላጊ ነዉ " ብለዋል።

ኮሚሽነሩ ' ወሮበሎች ' ሲሉ  የጠሯቸው የተወሰኑ ግለሰቦች " የህግ ማስከበሩን ተግባር ሽፋን በማድረግ የህግ አስከባሪዎች በመምስል ግለሰቦችን ' ከእነ እገሌ ጋር ናችሁ ትፈለጋላችሁና ገንዘብ አምጡ ' በማለት ሰዎችን የሚያስፈራሩ ተረኛ ሌቦችና አጭበርባሪዎች እየተንቀሳቀሱ ስለመሆናቸው መረጃ ደርሶኛል " ሲሉ አስታውቀዋል።

ኮሚሽነር ተስፋዬ ደቢሶ በወንጀል የተጠረጠረና በህግ የሚፈለግ ሰው ካለ በህጋዊ መንገድ እንጂ የሚያስፈራሩ ሰላዮችን በማሰማራት የሚሰራ እንዳልሆነ ታውቆ ማህበረሰቡ እንዲህ ዓይነት ተግባር ከሚፈፅሙ አካላት እንዲጠነቀቅ እና እንዲህ አይነቱ ተግባር ቢያጋጥመዉ ለፖሊስ ኮሚሽን ጥቆማ እንዲሰጥ አሳስበዋል።

የሲዳማ ክልል በፀጥታው ዘርፍ እያካሄደ ባለ ሪፎርም ከዚህ ቀደም በየደረጃው ለሰላምና ፀጥታ ተቋማት ተጠሪ የነበረዉን የፖሊስ መዋቅር ለየመዋቅሩ አስተዳዳሪዎች እንዲሆን በማድረግ የክልሉ ሰላምና ፀጥታ ቢሮ ኃላፊ የነበሩትን አቶ ዓለማየሁ ጢሞቴዎስን ያለመከሰስ መብት አስነስቶ በቁጥጥር ስር ያዋላቸዉ ሲሆን የቀድሞ የክልሉን ፖሊስ ኮሚሽነር ከስልጣን ማንሳቱ አይዘነጋም።

ቲክቫህ ኢትዮጵያ
ሀዋሳ
#TikvahEthiopiaFamilyHawassa

@tikvahethiopia