لطالما آمنت إنك عالمي ، رجل أفكاره سماوية لو ما فيها مبالغة ، مكانك أبعد من هنا والله
دايماً رافعين راسنا يا حفدة الطيب صالح
إستمر ، عشان نحن نقدر نستمر .💙

بعض اللطف من الdm ❤️

ثواني ..
فكّر في المشكلة ديك ، أي أكبر مشكلة أو مصيبة حاليا مواجهاك أو ح تواجهك ف المستقبل ، الحاجة المقلّق منها طوااالي وما بتوقف تفكّر فيها ولا لحظة ، حتى لو نسيتها بترجع تتذكرها تاني وتفكر ح تحلها كيف ، امتحان الشهادة ، المدرسة ، الجامعة ، امتحانات السمستر ، النتيجة ، مصاريفك الخاصة ، الحاجة الجديدة العاوز تجيبها ، زول متشاكل معاو .. المهم أي مصيبة دنيوية شاغلة بالك وبتفكر طوالي تحلها كيف ، لقيتها؟

يلا ماف أي فايدة من تفكيرك و قلقك د ، كيف ؟
الحاجة دي أمرها منتهي من فوق ، ربنا كاتبها من قبل ما تتولد حتى وكاتب حلها .. و انت لو أسي بقيت تطير ما حتطلع من قدر ربنا ، يعني يا سيدي ما توجع راسك .. الحل قاعد ، انت بس م عارفو .. المصيبة حتهون، انت بس م عارف متين ، مشاكلك كلها ح تتحل .. انت بس م عارف كيف ، وأعتقد انو ماف داعي توجع راسك بي حاجة هيا كدا كدا حاصلة صح ؟ ما بقول ليك ما تخطط أو تفكر في مستقبلك .. حتبقى غبي لو فهمت كلامي بالشكل د .. أنا بس بقول ليك إنو صح خطط و صح فكر بس ما لدرجة تهلك وتنهك عقلك وصحتك النفسية عشان تعرف أمر محتوم و أساسا ما ضروري تكون عارف كل حاجة ياخي .. ربنا أقرب ليك من حبل الوريد ، عارف انت بتفكر في شنو و عندو الحل و حلّاها ليك اولريدي .. أشكروا من أسي واتعامل مع ربنا باليقين .
ما تشغل بالك ، محلولة❤️

لا حول ولا قوه الا بالله العلي العظيم.
حسبي الله ونعم الوكيل.
مبدئيا كدا لو جاك اتصال من رقمي م ترد (للناس البتعرفني شخصيا) .
ولو نزلت حاجة ما لائقة في أي واحد من حسابات الميديا حقتي ف د برضو م أنا .
قدر الله وما شاء فعل ، تلفوني اتخطف مني قبل شوية في لفة العزبة (شنقهاي) ، وهو فاتح ف أي حاجة ممكن تحصل .
كل م احاول اتفاءل و اقول انو الدنيا بي خيرها تحصل حاجة زي دي و أموت أنا ألف مرة .
التلفون فارق معاي لأني جبتو بي عرق جبيني واشتغلت ٤ شهور أوفر عشان أجيبو .. ولمن جبتو الحمد لله اتسرق بعد ٤ شهور برضو .
ما عاوز أكتر كلام ، الحمد لله على ما أراد الله و كلو ل خير
العاوزو طلب بسيط بس عشان ممكن تلفوني يرجع ، زي م قلت التلفون أنا مشتريه جديد وبي قروشي .. أنا ال فكيتو من الكرتونة ، معاي الكرتونة والرقم التسلسلي ،لو بتعرف زول في الأمن / الشرطة / أو اي زول ممكن يساعدني ب اي طريقة ممكنة ف رسل لي مسنجر أو اتصل هنا
0923333491
شير ع أوسع نطاق لو سمحت ، احتمال شقاي يرجع .. وشكرا

عُدنا والشوق بأحرفنا ❤️ !

لم يكُن تجاهلاً، الأمر أقرب للقتل العمد.

أجل لم أختلف عن بقية الأطفال كثيراً، مثلاً بوقت الفراغ حين كنا جميعاً نمسك الأوراق وأقلام التلوين لنرسم .. كنتٌ من بينهم جميعاً أحمل اللون الأسود - أقرب الألوان للحبر الموجود بالكتب - و أبدأ .. بنهاية اليوم؟، كان الجميع يعرضون على آبائهم رسومات تنضح بالحياة .. أشكال هندسية عابثة و حيوانات الغابة بأبعاد غير حقيقية والوان لا منطقية تستطيع استنتاج أن من قام برسم الورقة طفل حينما تراها، شمس بـ ركن الورقة و طيور على شكل الرقم سبعة .
ورقتي؟، كانت أمي ترى نصوصاً غير مكتملة، مقدمة لرواية عنوانها "النهاية".
الاختلاف لم يكن كبيراً .. كنا نحمل جميعاً نتاج مخيلاتنا .. في ورقة بحجم طبيعي.

أعود للمنزل بعد يومين ولكن الجميع يُنكر ذلك ويدّعي أنه يوم واحد فقط، بعينين شبه مغمضتين، بهالات سوداء وعزيمة مهشّمة، بظهرٍ مُنحَنٍ و يدين متأرجحتين بطاقةٍ لا تزيد عن حاجتي بل وتنقص قليلاً فلا يمكنني تأدية صلاتي واقفاً، بِفِكرِ شخصٍ خسِرَ عقله ولا شيء يصنع فرقاً الآن .. أستلقي بضع ساعات لأنهض مجدداً، أقوم بتبديل ملابسي ليتم تعذيبي بهيئةٍ أخرى جميلة هذه المرة.. كعاهرة، تفعل كل يوم ذات الشيء.. بمكياج مختلف، وملابس أخرى.

أسير عكس التيار بمعظم الأحيان، أؤمن بالشذوذ الفكري والأمر ليس سيئاً كما يظن البعض، أُقَدِّسُ الإختلاف .. فأنا لا أعتقد أني وُلِدتُ لأكون كسبعِ مليار شخصٍ آخر .. ما الفائدة؟

اللهم صيباً جَابِراً ❤️

جمعة مباركة ❤
الكلام الجاي دا ما للمناقشة، ما للإعتراض ولا محل جدل أصلاً بس عشان الناس ما تتعب نفسها وتحاول.
ماف زول مثالي وماف زول مكمل الدين لي حدو، و إتّباع الدين هٍداية ونعمة من ربنا .. والحمد لله على نعمة الإسلام قبل كل شي.
المهم، ما عارف هل الناس ما عارفة الكلام دا، ولا عارفة ومتغاضية عنو .. ولا الحاصل شنو بالضبط، ما زول متدين أنا، أو بمعنى آخر ما زول بحث في الأحاديث و السنة واتشدد في تطبيقها.. يعني بالمختصر البعرفو من الدين بطبقو، أي مكان بلقى فيه معلومة دينية بحاول أركز معاها لأنو مدرك إنو دي حاجة حتأثر شديد في آخرتي وبتخيل إني لو واصلت في غفلتي وما اهتميت بالحاجة دي العاقبة حتكون كيف، يعني زيي و زي أي مراهق طايش همو الدنيا وأشغالها وماف زول ح ينكر الحاجة دي، لاحظت إنو صفحتي معظم - إذا ما كل متابعنها - شباب .. ف قلت ان الموضوع د أحسن مكان يتطرح فيهو هنا.
بدون إطالة عشان الناس ما تزهج ، لي زي اسبوع بفكر في الحاجة دي و ببحث.. و اكتشفت إني غافل عن حاجة واضحة وضوح الشمس وماف أي جدل فيها .. ومعظم الشباب البعرفهم كدا، موضوع مصافحة النساء ..
مصافحة الرجل للمرأة الأجنبية حرام لا يجوز ومن الأدلة على ذلك ما جاء في حديث معقل بن يسار رضي الله عنه قال: قال رسول الله صلى الله عليه وسلم: "لأن يُطعن في رأس أحدكم بمخيط من حديد خير له من أن يمسّ امرأة لا تحلّ له" رواه الطبراني وصححه الألباني في صحيح الجامع.
ليه بنصافح والحاجة دي حرام؟
ح تجي تقول لي ليه بنعمل حاجات كتيرة تانية و هي برضو حرام .
ح أرجع تاني و اقول ليك انو ماف زول دينو كامل و كلنا متبعين أهواءنا إلا من رحم ربي .. ما عارف باقي الناس لكن أنا كعبد الرحمن معتصم بشوف إنو لو في حاجة بسيطة زي دي بقدر أتبع فيها رسلونا الكريم و السنة النبوية فبعملها وعلى حسب قدرتي ولا يكلف الله نفساً إلا وسعها ، صاح في حاجات أكبر بكتير احتمال تكون غلط وحرام وأنا بعملها .. بس زي ما بتقول أمي "خُد من التل يختل" يعني لو عاوز تقدر على حاجة كبيرة .. أبدا نقّص منها شوية شوية وفي النهاية ح تضعف وتقدر عليها.
أخيراً دا ما تظاهر والعياذ بالله و ح يجي زول تاني يقول لي بطّل مصافحة بينك وبين ربك نحن مالنا .. البوست هدفوا الأكبر إنو أنبه البنات العندي معاهم تواصل في أرض الواقع سواء من أهلي/زميلاتي في الجامعة أو أي بنات بعرفهم تاني من الميديا أو غيرو وممكن نتلاقى أو أولريدي بنتلاقى بس عشان ما يحصل حرج بأي شكل من الأشكال وسوء تفاهم ..
الرسول (صلى الله عليه وسلم) قال: "أنا لا أصافح النساء"
و أقل حاجة ممكن تتعمل عشان ننجو من فتنة الدنيا ودهاليزها إنو نتبع حبيبنا ولو في الحاجات البسيطة قبل الكبيرة .. ف إن شاء الله أنا ح أوقف مصافحة من الليلة وربنا يهدينا جميعاً .. ما معروف ربنا ياخد امانتو متين ف نحاول نستعد ولو شوية يعني و ب البنقدر عليه .
Mugtba Elnujoomi
قايلني نسيتو مش؟ ههخخ ، د حبيبي والله كيف يتنسي؟
بنحاول نلتزم أهو يا مجتبى عسى ولعل نلقى مكان جنبك في الجنة ، مسك الختام للبوست الجميل دا ، الرحمة والمغفرة يا رفيق ❤

من أخبرك أن كل شيء سيهون كاذب، كل شيء يزداد صعوبة .. دائماً، أنت فقط الذي تصبح أقوى فيبدو الصعب سهلاً، لذا لا تنتظر أن تهون الأمور .. سارع أنت بشفائك، سارع أنت بنموِّك، سارع أنت بالبقاء أعظم.

1:09 AM

الأمرُ فاقَ كونه تعباََ، أنا أتهدّم .. أتساقط!

2:14
يتعافى المرء بنفسه لا غير.

منذ الصباح ، سريري يلفظني للعالم .. أستيقظ ، أنهض لأواجهه فيلكمني الأخير ويدفعني لسريري .. المنزل يلعنني للشارع ، أخرج للطريق فيرجعني للمنزل .. الأرض لا تريدني ، تلقيني بقلب الحافلة ، الحافلة تشمئز وتوقعني بالأرض مجدداً أمام الكُلية .. أدخل و أخرج ، الجميع يتدافع الجميع يلعن ، الطلبة يكرهون الاستاذ والعكس ليس خطأ ، عامل الكافتيريا يكره الزبائن والزبائن يريدون الساندويتش بأسرع زمن ليغوروا عن وجه العامل ، البشر يمقتون العالم والعالم يدعي على البشر .. نحن نعمة ، نحن نقمة .. نحن نحيى حتى لا نموت.

كآخر محاولاتي لنسيانها؟، ذهبتُ لمصفف الشعر .. طلبتُ منه أن يقص شعري ما استطاع، حاولتُ عبثاً إخباره ألا يحذر و يبدأ بالعمل مكفوف العينين، علّه يقص ابتسامتها من ذاكرتي ، أو حتى تفاصيل وجهها.

منذُ أربع ساعات وأنا أحاوِل صياغة مافي داخلي في نصّ مُصغَّر. إنها المرّة الأصعب على الإطلاق!
التّاسعة والرّبع تمامًا،
ليست لديّ أدنى فكرة عما سيحتويه السّطر القادم
أشعر بإنقباضات دائمة في عضلة أيسَري، على ذكر الإنقباضات.. أتت سيرتكِ اليوم بينَ السّطور، فقط بينَ السّطور.. لم تُذكَر بشكلٍ مباشر فلم يعد يعني لي أمرك كي أجعلكِ مادّة لنقاشٍ ما.
صدِّقْ مرّت فترة طويلة مذ ذكرتكَ بهذا الشكل آخر مرّة، ولم أفعل لو لم تأتِني بشكل سؤال..
لا أدري ما الّذي دفعَني لتغيير الحديث بسرعة دون أي نقاش.. لم أرِد الكلام أكثر كل ما أردته هو الصمت عنكِ تمامًا دون تبرير أو خاتمة للحديث
منذُ أشهر كانت كلّ النّصوص خالية منك، ليسَ تمامًا.. ربّما كانت لا أدري.

• سأستمرّ بوصف هذا المجتمع بالقمامة؛ "نادوا النّيزك".
• مؤلمة حالة الخوف من الحبّ الّتي أعيشها، مؤلمة للغاية.
• الياسمين هوَ أقدس نوع ورود إطلاقًا.
• أعظم إنجاز برأيي هو إسعاد انسان.
• لا تتوقّف عن صنع المحادثات الّتي تجعلكَ تحلِّق من السّعادة، لا تفكر بسلبية.
• أنتَ أولًا.
• "صوِّب ع القمر": كنّ طموحًا.
• أنتَ صفر مهما بلغتَ، لا تقف عند إنجاز ما، إطمع' بالمزيد.
• لا تخبر أحد بمشاكلك، سيستغلّ نقاط ضعفك عاجلًا أم آجلًا.
• هذا نصّ غبيّ، لقد أضعت وقتك. 💙

_ فتح الرحمن سليمان

السودان ما بلد قراية أصلاً، ماف ولا مقوّم واحد من مقوِّمات الدراسة متوفر، يعني البلد دي بتهد حيلك ولو داير تقرا زاتو تطلع نفسك من القراية.
كلنا شباب، كلنا عاوزين نندمج في مجتمعات جديدة ونكون متطلعين على العالم ومواكبين لكل جديد .. ماف زول عمرو من ١٧ ل ٢٦ سنة بكون كل همو القراية و التعليم، حتى لو كان عندو اهتمام ف ميولو لل"حياة" و للمراهقة و إن يعيش حياتو بكون أقوى .. لكن انت مفروض تصحى وتعرف إنو غير بالتعليم ما ح تصل مكان، أو هو صراحة "ممكن" تصل .. لكن الضامن الأكبر و أكتر وسيلة آمنة ياها قرايتك، ماف زول بحب يصحى من ٦ ويتطين ويوسخ جزمتو ويصرف قروش مواصلات عشان يقعد يحضر ليو محاضرة بغض النظر عن محتواها، ماف زول بحب يتمعط اسايمنتات وتسليمات و ميد تيرم وامتحانات، ماف زول بحب الامتحانات و أكيد ماف زول بحب يخت تلفونو ويخلي الفيس والواتس وعالم السوشيال ميديا المبهر العظيم د عشان يفتح شيت يقرا.

لكن عندي ليك سؤال، لو ما قريت لي نفسك .. ال ح يقرا ليك منو؟
أنا أكتر إنسان بيكره القراية والتعليم، ومستحيل أقعد براي كدا أفتح لي شيت اقرا منو .. لكن حبي لنفسي أكتر من كرهي للقراية.. إذا كان في سبب بخليني أواصل تعليم لحدي أسي فهو إني بحب نفسي، بكره أشوف نفسي ورا الناس ولازم أطور من عقلي و أكون أحسن ما يمكن، و أنا متأكد إنو ماف زول ما بحب نفسو .. ف كل ما تضيق بيك، وكل ما تشوف إنو مافي هدف من البتعمل فيهو كل يوم د والسودان طلع من التصنيف العالمي للتعليم" والهيلمانة دي كلها .. اتذكر إنو انت ما بتقرا للسودان بس، أنت بتقرا ل نفسك أول و ما أعتقد إنك عاوز تطلع من التصنيف البخليك زول ناجح، نافع، مفيد.
ما حنك، كورك، زغردي، جعّر واتزهج زي ما داير، أصلاً البلد دي عاصرة على أي زول و الكفتيرة لمن الموية تسخن بتصفّر وتطلع صوت، أنت منو عشان تستحمل د كلو؟ ، لكن الكفتيرة ما بتنفجر، و أهم حاجة إنك ما توقف .. اتذكر إنك قاري لي نفسك وعشان تشوف روحك في مكان عالي وتبقى فخور بي عقلك والحاجات الجواه.
كل ما تتكاسل وتضيع زمن ف الكلام د خصماً عليك، كل م ارتحت اسي ح تتعب في المستقبل والله و كم نفر في الثانوي قالو "ءه الانجليزي د كلام فاضي ساي" و أسي كبار بي أولادهم و بجو السوق العربي عشان يقرو كورس ب ٥ ألف للمستوى، د مثال بسيط بوريك إنو أي خطوة مفروض تاخدها أسي وما اخدتها او حتى اتكاسلت فيها ف ح تاخدها دبل قدام و في ظروف أصعب، أصحى لي نفسك انت ما صغير عشان يوروك تنجح في حياتك كيف، بطّل طنطنة و اشتغل على نفسك.
لو ما نجحت لي نفسك، ال ح ينجح ليك منو؟