لا رساله ولا خبر يبويه
طالت ايام السفر يبويه
—————
انت مو تدري الهجر ماينحمل
ماعفت بالدار عبدالله الطفل
مو سهل يفراك وجهك مو سهل
مو بعيده وياك يلتم الشمل

جرح المفارك كبر يبويه
طالت ايام السفر يبويه

—————
عكب عينك بويه ماريد العمر
شفت نجم المرض مو نجم الضهر
بويه مالك نيه ببنيتك تمــــــر
خذت وياك الصبر واهل الصبر

بعد ما احمل قهر يبويه
طالت ايام السفر يبويه
—————-
بويه من بعدك عفت حته الدوه
أنعم الله ولسه اشتم الــــهوه
البيت من دونك احسه بلا ضوه
كلبي خايف خاف مانلتم سوه

بلكي يجمعه القَدر يبويه
طالت ايام السفر يبويه

—————
كل مسيه عيوني لعيونك تحن
الدنيا بغيابك مثل باب السجن
من اشوفك ينتهي هذا الـــحزن
جم رساله انكتبت بدمع الجفن

نايم بعيني السهر يبويه
طالت ايام السفر يبويه
————
بويه مامريود شلعان الگلب
بويه والفركه اشد من الحرب
ارجع ارجع وأنته تندل الدرب
صرت عنك اسئل الناس الغرب

رعب وجروح وخطر يبويه
طالت ايام السفر يبويه

—————-
وضعي بعدك مو هذاك الاولي
ابيا علي اكعد واكوم بيا علي
ارد اسئلك بويه عن صحة هلي
من المرض اشفه إذا ترجع الي

مانشف دمع النضر يبويه
طالت ايام السفر يبويه
———-
سيد معتز الحسيني

https://www.tg-me.com/aabas78
قصائد لكل ايام محرم اشترك بالقناة

ام البنين ع👇👇👇👇

نزله ( #أميره_اعل_الخدم ) #محرم_1447

……………………………………………………………

أميره اعل الخدم .. ويا اعظم فخر
يظل عالي العلم .. بدين أم الگمر

……………………………………………………………


هالمواكب دوله عظمه تربح وما افلست
أم ابو فاضل رئيسه و بجداره اتريست
الفضل يرجع كله الها ابكل شعيره اتمارست
تره اول موكب الها برض يثرب أسست

يارئيسه اتنصبت من فاطم
ابكل محرم ينتخبها الخادم

مَدِح بيها أنعِلم .. من الأثني عشر
يظل عالي العلم .. بدين أم الگمر

……………………………………………………………


الذي يسن سُنه حُسنى أله يمتد الاجر
وهي اعظم سُنّه سنت خالده اليوم الحشر
العين مو بس ماي تدمع عدها كون اتصب جمر
واللطم تعتبره فاهي لوَن ما يخسف صدر

يعني كلما نلطم المولانه
بالاجر تصبح شريچه ويانه

مدين الها الـ لطم .. على ذاك النحر
يظل عالي العلم .. بدين أم الگمر

……………………………………………………………


للعزاء دستور كتبت واليخالف ينطرد
امن القرايه ما يمنعك كون لا حر و برد
دربك ولو شوچ كله تشوفه بعيونك ورد
ماكو القاب و أسامي انتَ بالمجلس عبد

لان هي امهبطه دوم الهامه
مو شريچه و لم حسن خدّامه

الوفاء بيها انرسم .. الكرم بيها افتخر
يظل عالي العلم .. بدين أم الگمر

…………………………………………………………….


تريد كل واحد مثلها كون خادم من صدگ
كون لجل اخيام زينب دوم گلبك محترگ
تلطم ابصدرك واذكر صدره ذاك المنسحگ
من كثر ثگل الحوافر عالظهر ظل منطبگ

حتى من تاكل تعيش الحاله
حسينك امن الجوع صفره اعياله

ولا تنسه السهم .. الوصل يم الظهر
يظل عالي العلم .. بدين ام الگمر

……………………………………………………………


الحزن بستمرار عدها امس و اليوم وغدن
لوَن ما مكروه طلبت اسود يكون الچفن
تكفر ابنعمة عيونك لوَن للطف ما بچن
تشهد ايدك بالقيامه لطمت اعل ابن ام حسن

خلي بس لحسين كل احزانك
علي و جاسم بالقيامه اخوانك

فقط دوسة قدم .. گُبل تخمد سقر
يظل عالي العلم .. بدين ام الگمر

……………………………………………………………


هي امنه شگد حنينه و عادله ابنفس الوقت
ابد ما چنها تعرفك لوَن متكبر صرت
وذا تتواضع تحسبك ماي للاكبر جبت
ولو ترائي اتگلك انت ابسبي زينب شاركت

دوم اتركها الأنا و عاديها
تره اتأذي حسين من تحجيها

اعتبر نفسك عدم .. الك يصبح قَدَر
يظل عالي العلم .. بدين أم الگمر

……………………………………………………………


هل المره صارت عظيمه منها خل ناخذ وعي
باب تگظي الحاجه فوراً بيها كلمن يندعي
خطوه عالخطوه يخادم الها اصبح تابعي
بالخدامه آية الله هي صارت مرجعي

من اقلدها اصيرن عالم
وامتياز أعليه تكتب فاطم

ذهب حبر القلم .. كتب أجمل خبر
يظل عالي العلم .. بدين أم الگمر

……………………………………………………………
✍️ ( سيد خضر الزاملي )


https://www.tg-me.com/aabas78
قصائد لكل ايام محرم اشترك بالقناة

#قصيدة سريعة لام البنين
ـــــــــــــــــــــــــــــــ
ام البنين الطاهره ام الوفه
ــــــــــــــــ
خجلان منچ يا وصف جلماتنه المتحيره
كل الصفات العالية يمج تصير ازغيره
يكفيج بس هذا الشرف وفيتي ويه الزهره
قدمتي ولدچ للذبح اتكولين انه امقصره
نحتار هذا الكرم بيش انوصفه
ام البنين الطاهره ام الوفه
ــــــــــــــــ
من يوم رادج حيدره اهداف عنده هوايه
يدريج نطفه وطاهره يا ام الكرم وفايه
خلاچ للعازه ضخر تدرين هاي الغاية
عباس راده بكربله هوه اليشيل الراية
عباس بالطف شال راسج موقفه
ام البنين الطاهره ام الوفه
ــــــــــــــــ
من راد ضعن ابن النبي ما يستقر باوطانه
تدرين هاي الخاتمه وكلبچ تشب نيرانه
گلتيله يا هرش الگلب يم حضرتك خجلانه
اربع بنين واستحي وي السبي كون انه
گدام زينب انسبي وامچتفه
ام البنين الطاهره ام الوفه
ــــــــــــــــ
من شاف كل هذا الوفه الدمعات خنگت عينه
كلچ يا يمه بموقفچ دين النبي تنصرينه
عباس حامل رايته وبالمعركه اتعرفينه
مشكوره عن هذا الكرم يم فاطمه تلكينه
موقف وفائچ عن عقيده ومعرفه
ام البنين الطاهره ام الوفه
ـــــــــــــــــ
لميتي ولدج اربعه البيهم شجاع وعالم
توصين بيهم والحچي مفهوم حچيج حازم
ما اريد واحدكم يرد مثلوم سيفه وسالم
من عدكم اتبره وعلي وگدام كل الوادم
بيكم اشيل الراس يمه امشرفه
ام البنين الطاهره ام الوفه
ـــــــــــــــــ
ترحين يم زينب خجل وتشوف دمع عيونچ
تمنيت يا ورده علي يسبوني ما يسبونچ
وصيت عباس الوفي يضحي النفس من دونچ
خدام ولدي الاربعة وبارواحهم يفدونچ
تكلج يا يمه وهذا طبعج نعرفه
ام البنين الطاهره ام الوفه
ـــــــــــــــــــــــ
نعيم ابو باقر الساعدي


https://www.tg-me.com/aabas78
قصائد لكل ايام محرم اشترك بالقناة

محرم ام البنين

اليمشي بضعن للموت يتحصل منين
حن الگلب  ويريد  ملگات  الحسين
،،،،،،،،،،،،،،،،،،،،،،،،،،،،،،،،،،،،،،
انه ام الأربعه .. عمري كله ملوعه
وبعيني الدموع
حيلي خلص والحجي .. يشرح حوالي البجي
وجروحي موضوع

شابجه الراس ودمعتي تفزز الموت
بعد طول حسين طولي يريد تابوت
ليش بس بيتي انه فارغ دون البيوت
شما اصيح حسين ميت يرجع الصوت

صارت غريبه اليوم حته الحياطين
حن الگلب ويريد ملگات الحسين
،،،،،،،،،،،،،،،،،،،،،،،،،،،،،،،،،،،،،
حسين عافاني ورحل .. يابسه وعودي ذبل
وشباقي بالروح
انه وبنيته بقت .. وهيه هم اتعطلت
بخيام الجروح

شما أسيير عالعليله وتگعد احذاي
نبجي عالغالي  وبناته  ونلطم هواي
هيه هم نعمه والگيت اليلطم وياي
انه  وياها اتفقنه  انزاعل  الماي

ماردنه شوف الماي ماتقبل العين
حن الگلب ويريد ملگات الحسين
،،،،،،،،،،،،،،،،،،،،،،،،،،،،،،،،،،،،،
انحب وگلبي نفطر .. ماكو طارش لاخبر
ومشيب الراس
للنهر هاذ الحجي .. شابعه خلافك بجي
امك يعباس

يابوفاضل تعرف امك يوم الوداع
خضر الشيب بعمرها وكبرت بساع
يبني اريد اگبال اخيتك تخسف الگاع
يضيع كل تعبي التعبته لو خدر ضاع

اختك اذى تنخاك جيبلها شطين
حن الگلب ويريد ملگات الحسين
،،،،،،،،،،،،،،،،،،،،،،،،،،،،،،،،،،،،،
صرت اشعر بالألم .. الماي جتال الخيم
ومعذب الحال
اعرف بحال الخدر .. يبقه بشموس الضهر
وتضع العيال

باجر يطيح المخيم فوگ الهموم
واليدور گطره يبقه بعازت هدوم
حسين باجر عالوطيه اتسلبه الگوم
مگطع وماعنده حيل الزينب يگوم

باجر يضل عريان وخوانه ميتين
حن الگلب ويريد ملگات الحسين
،،،،،،،،،،،،،،،،،،،،،،،،،،،،،،،،،،،،،
كون هسه بكربله .. حالي حال العايله
ليش انه ضليت
مدري ليش تعطلت .. كون وي زينب رحت
للغربه ياريت

موغريبه انه عليهم والصدگ كون
رايحه ويهل المحنه بذيج الضعون
شرايده من الله الترافگ رحلة ام عون
لو عطش عبدالله اعصر فوگه العيون

ام البنين شلون تبقه وتجن وين
حن الگلب ويريد ملگات الحسين

العبد ابوفايز الرافضي


https://www.tg-me.com/aabas78
قصائد لكل ايام محرم اشترك بالقناة

. نزله الام البنين ع

صارت مثل للاجيال من فزعة البدوية
اربع ولد عدها ابطال كل واحد ب600

@@@

يالتسأل اعله التاريخ رايد تعرف ابطاله
ل ام البنين اقره وشوف واتمعن بهالحاله
حرمه ومواقفها هواي عبرت زلم خياله
بعض الحرم تسوه ارجال لو صارت الحربية

@@@

من احچي عن ام عباس فعلا اضلن حاير
لو بالشعر شفت اقصور لا تعتب اعله الشاعر
محد يوصف ام عباس لا باطن ولا ظاهر
كل النسمعه ونقراه من عدها هذا شويه

@@@

يمها احتراما وجلال نركع اذا مرينه
انطت زلم دون حسين بالحومه وينه اوينه
الينطي نحره وميهاب والينطي چفه اوعينه
رضعو لبنها او وياه رضعو وفه وتضحية

@@@

راحت لبنها العباس شدت علگ بزنودة
بالك تگله اعله حسين لحد يصل لحدودة
انته الضخر وانته الماي وانته العلم وجنودة
مادامك اگبال الجيش يعني الخيم محميه

@@@

وگفت علي للمختار يوم الوگفله بصفين
هيچ اوگفت وي حسين ماقصرت ويه الدين
نخله بشموخ وايباء وانطت ثمرها لحسين
متربيه عد ناس اكبار حي الله هالتربية

@@@

مافكرت بالاولاد من غربو من عدها
تبچي اعله زينب وتخاف بس لا تضل وحدها
ماغمضة ساعة بليل الله وعلي ايساعدها
مشتاگله ضلت لحسين والزينب العلوية

@@@

ام البنين الابرار من وگفت اويه السادة
خلاها باب الحاجات ربك فرج لعباده
كلمن طلبها وبخلاص يرجع ينول امراده
بالشدة فزع ام عباس مالك شغل مکظية

@@@

للشاعر طاهر الدريعي


https://www.tg-me.com/aabas78
قصائد لكل ايام محرم اشترك بالقناة

صعدو الخيل وجوها وكربله بزود خذوها
اخوان عباس
*
اخوان عباس الغياره دخلو السوح الحرب
غيمت والجيش راسه الولد حيدر منطلب
سبحت بدمها ال اميه وكطعو اعليها الدرب
الخيل تصهل بالملاحم واجت بيهم تنكلب

خسفو الكاع بهلها الرايه جعفر حملها
اخوان عباس
**
اخوان عباس امن اجوها اوجوهم صارت صفر
واليطبرونه اعله صدره قفص صدره ينكسر
ذوله شريان العقيده الهوه بيهم ما يمر
وقائد القوات كلهم ماكو حل لازم نفر

كامت اطيح زلمها والحرب عون حسمها
اخوان عباس
*
ضلت تموج الكتايب والوضع بالطف رهين
كلها صاحت وين نشرد اجو ولد ام البنين
ذوله متروسين غيره وعالقتال امعلمين
وصلو الاخر كتيبه ونصرو حسين بيقين

شالو الروس بديهم شدو الحيل عليهم
اخوان عباس
****
قدم العباس اخوته فرقة الرد السريع
اجت برقيه بقتلهم واليلزمونه يضيع
الحرس الهاشمي ذوله بكربله السد المنيع
والرئيس حسين واكف والزلم كلها تطيع

استعرضوله بحربهم يحرك الجيش غضبهم
اخوان عباس
****
ردو الفرسان كلها ونطوت طي السجل
زامطو وولاد حيدر لو حجو كول وفعل
طبو الساده النشامه البيهم الطف ينعدل
وصل دمهم للمخيم والجثث يم الجفل

جيش اميه تحير كضو كل المعسكر
اخوان عباس
**
حشم العباس اخوته وللحسين اتراكضو
لبسو دروع المنيه وعالقتال اتسابكو
مثل عباس ابو الغيره بالحرايب دخنو
سحكو الخيل وزلمها وللشريعه اتقدمو

حاصروها السرايه وشوفوها المنايه
اخوان عباس. اخوان عباس
**
تمت
تحسين الخفاجي


https://www.tg-me.com/aabas78
قصائد لكل ايام محرم اشترك بالقناة

4
نزله 
بطور الحزين 

﴿يمه عذراً قــصـريت)
﴿﴿4محرم الحرام ﴾﴾

           يمـه عذراً قــصـريت 
           أربعـه وهم ماوفـيت   
ــــــــــــــــــــــــــــــــــــــــــــــــــ
يمه صحته المــعذره.  
لـو مشه ضعنه وسره 
أربعـه وكلش قليل   وانته يفداك الداليل  
أربـعه وكـلهم وفـه.   منـي رضعو عاطفه
ثلاث كواكب والكمر   فدوه كلهم للنحر 
              
لويصح بيدي مشيت 
أربعـه وهـم ماوفـيت   
ــــــــــــــــــــــــــــــــــــــــــــــــــــ
لو يصح بيدي رحـت 
لـلضـعن وأنه تبعــت 

وسري ويه القافلـه  وأوصل الطف كربله 
لوجهاد على المرءه   أطلع أنـه مبختره 
أطلع وافدي النحر   فدوه الحسين النظر 

وبهجر شـوفك نعـيت 
أربعــه وهـم ماوفـيت   
ــــــــــــــــــــــــــــــــــــــــــــــــــــ
من يشد ضعنه ورحل 
باالحزن راح انه أظل 

وحشه تصبح ديرته  والله تكتل فــركتـه 
لو يغيب ولو يروح   تكثر علينه الجروح 
هــا يـرد لـومايرد.  عل بعد كمت انه أعد 

ياضوه عيوني بجـيت  
أربعــه وهـم ماوفـيت   
ـــــــــــــــــــــــــــــــــــــــــــــــــــــ
عايشه بطور الحزن 
كلبـي مشتاك ويحن 

بهجره حيل تغيرت  حيره بعده تحـيرت 
حسين يانيط الكلب  والدمع الجله يصب 
ألهج بأسمه وصحت   بعده أنه أتمرمرت 


بالحـزن بعـدك بكيـت 
أربعــه وهـم ماوفـيت   
ــــــــــــــــــــــــــــــــــــــــــــــــــ
ابجي وبحركه وشجن 
ع المشه وعاف الوطن 

باليصير وبالجره   يمه صحته المـعذره 
مادريـت ولاعـلم   هـوه يحـتـاز الزلم 
عشره سويت الولد للمشـه والمبـتعـد 

بالـربه شـو قـللـيـت 
أربعه وهم ماوفـيـت   
ـــــــــــــــــــــــــــــــــــــــــــــــــــــ
قـللت وأنـه اعـتذر 
ريته مقـبول العـذر 

عذري شنهو الفاطمه  لوحجت شمقدمه 
قدمت الجله اربعه طافو عله المشرعه 
نادت وكامت تصيح أنتي وفيتي الذبيح 

يمه يحسين وبجيت 
أربعه وهـم ماوفـيـت   
ـــــــــــــــــــــــــــــــــــــــــــــــــــــ
 كلمات الشاعر الحسيني 
مرتضى مكطوف الموالي


https://www.tg-me.com/aabas78
قصائد لكل ايام محرم اشترك بالقناة

كلشي انطفه بعيني يوم المشه حسيني

أم البنين أم البنين
***

عميه عيني وما اشوفن مات بعونـــي الضوه
جرحي ماضنه ايتشافه وشال من عندي الدوه
يوم ماسافر عزيــــزي آنه والميتــــــــه سوه
ضاكت الدنيه الوسيعه وضاك بأنفاسي الهوه
شح الهوى بصدري ومني انكسر ظهري
أم البنين أم البنين
***

وين ما صـــدن عيوني بكل جهه انظر صور
صورة حسين وحبيبي بيها احس لوعه وقهر
بيها مرسومه محـــــنه ماتت بصــــف النهر
ينعصر كلبــــي عليها وحيل يوجعني النحر
شالت اعز ناسي ومرمــــرني عباس
أم البنين أم البنين
***

كَلبي مدري اشبيه يسولف بالمواجـــــــع والحزن
والمصايب جنها رحــــــه وتطحن بروحي طحن
لاني ميته ولاني عدلــــــه عايشه روحــي بسجن
نعمة الله امفاركتنــــــــــي اشلون اهـيد واستجن
حسين الرحل عني وهالنعمه شــــدهتني
أم البنين أم البنين
***

حكي لو ركن عيوني وراح شوفي وشيبت
وحكي لو رجفن اديه ومالــي حيل وحدبت
رحمة الله الجنت بيها ودنيتي بفيــه عشت
هيبتي وبخت العشيره العكبه بالدنيا ضعت
شيرجـــــــع الغالي والله انشغل بالي
أم البنين أم البنين
***

ابلا امان الدنيـــــا جنها وكلش احسن مكتأب
ابلا شعور الروح مني اهواي كامت تنتحب
الخير والحب والتسامح شال ليـــش ومنسلب
والشمس غايب ضواها وكَمر ليلي منحجب

شيرجــــــع احبابي عيني علـــــى بابي
أم البنين أم البنين
***



الشاعر ابو علي الركابي


https://www.tg-me.com/aabas78
قصائد لكل ايام محرم اشترك بالقناة

ام البنــــين ومــن يـــواسيها
ربــت الغـــيره بكــل معانيها
****
صبت دمـعها ومــابقـة دمعه
ودلالـــها مــن الهـــظم يـنعه
بلــروح تحـرگ تشبه الشمعه
والخلگ سمعت كل بواچيها
****
لحسين ونت ونــه مهظومه
ومـــن العزيز اليله محرومه
يـــاريت گالت اسمع اعلومه
وتبچي الحنينه تـريد واليها
****
نـاحــت عليـهم ونــت بغيره
ياناس وحشه وظلمه الديره
تانت ضعنها وحـايره بحيره
تشكي صـفت ضلت الباريها
****
صاحت حسين اليله ماجانه
وظلـيت اون علــيه حيرانه
اگظي العمــر علراح حزنانه
تهــد الصخر ضـلت نعاويها
****
تجرحــها ضــلت اه حـراگه
لحسين هــيه دوم مشتاگه
گلبچ يحـره تــكتل اشواگه
الناس كلها صــاحت شبيها
****
ضلمه عليها الرايح ضواها
والروح بيها ضــاع منواها
راح الگمر وحــدهـا خلاها
والــوكت بلـوه هـوه باليها
****
ابوحيدر الصبيحاوي

https://www.tg-me.com/aabas78
قصائد لكل ايام محرم اشترك بالقناة

كفو من ام البنين
،،،،،،،،،،،،،،،،،،
يابخت هاشم يعنوان الوفه
انتي من فاطم اخذتي اعضم صفه
والله  يالبدويه  كلج  عاطفه
الكرم عندج حيره بيش انوصفه

سند خيمات الحسين
كفو من ام البنين
..........................
انتي باب الله جبير ورحمته
ماتركتي حسين وحده بمحنته
انطيتي ولدج فده تحرس خيمته
والگمر حنيه تارس جربته

انتي يم گلب الحنين
كفو من ام البنين
.............................
انتي ياعضم مره بهاي حيات
كون اسمج ينذكر وي الصلات
انتي وصيتي الولد تفدي الخوات
وبكمرهن هنه دوم مدللات

بالكفاله امدللين
وكفو من ام البنين
.......................
ياكلابيه وعلي اختارج سند
وانتي يوم شده وفيتي الوعد
انتي دستور وفه وكل شهد
السمه صاحتلج يمولاتي المدد

نردد بهاي السنين
وكفومن ام النين
...............................
الج يالبدويه اعضم منزله
انتي خيمه وسند اشرف عائله
صرتي ايه اولدج اقدس بسمله
كشخه صارو يالحنينه ابكربله

ولد هيبه معدلين
كفو من ام البنين

الشاعر مصطفى فوزي المالكي


https://www.tg-me.com/aabas78
قصائد لكل ايام محرم اشترك بالقناة

عندي اشلون ازلام الضهر حسين احزام
كلهم وفايه
**
طبو والسمه مغيمه ويعادل جيش واحدهم
ومالحك ييمه الموت يبلع ريجه من عدهم
والعباس لمن صال غاد امن الشمس ردهم
واخوت زينب الشجعان حي الله سواعدهم

صعدو فوك الخيل ذوله اسباع الليل
مطيني احجايه
***
ذوله اهل الجفافي البيض تتلامع صوارمهم
مالمت رجلهم كاع بس كلبك تره يلمهم
عفيه ام البنين تصيح ماردو طلب لمهم
ولدي بخدمتك يحسين اشلون تريد قسمهم

عندي اشلون اقمار وين الزلمه الحار
للحك شرايه
*

كاع الطف تضل تميل من تدبج عراضتهم
ولدي بالحرب يحسين معروفه شجاعتهم
فرحانين اخوتك بيك رفعة راس خوتهم
عالشط سوو استعراض والقادات هابتهم

اطلابه وعد عباس اشلون اتفض يا ناس
شيال الرايه
**
صكار الزلم عباس ما يتلاوه بالملكه
ومن طب للنهر خلاه ما يكدر يفك حلكه
يشمر بيده ضل بالروس والدم تارس الدركه
يم الشط حضر تجوال والعباس اجه بحركه

واليتوازه وياه راسه وياه ذباه
ذل الرمايه
**
انه ام اليخلي الكوم تشرد من يسل سيفه
هاي الساحه للعباس والملعب صفه بكيفه
طب ليها وسحكها الخيل ومن الجيش اخذ حيفه
شو بعده الشته ما جاي وكلها ترجف بصيفه

الحومه دخيل اتصيح صفوف صفوف اطيح
وحسين الغايه
***
تمت
تحسين الخفاجي


https://www.tg-me.com/aabas78
قصائد لكل ايام محرم اشترك بالقناة

مسلم عليه السلام 👇👇👇👇

 قصيدة مسلم س
.
.
.

دخيل الله ودخيلك جيشهم صاح
مســــلم انته لو قـــــباض الأرواح
يبن عم ابوفاضل
اذا نـاوي تــــقاتل
ارحـم هالجـحافل
جيشهم صاح
***
 
يموت مرجف گلـوب القيادات       سجيل ونـزل
والجيش نذهل
والاعناق اشرئبت والحچي مات     قد حان الاجل
والجيش نذهل
يچنك ريح صــرصر والجمع ريش
اليريد يعيش لازم بأمــــرك يعيش
كافي اقصاء گالو كافي تهــــميش
كافي گلوبنه طاحـــت على الگاع
 
اليأرخون الوقائع لجـل الاثبــــات
صاحو مانلحگ تحـصي الأمــوات
ولكن بالــــمقابل
اذا ناوي تـــقاتل
ارحم هالجحافل
جيــــشهم صـاح
***
 
گلوب الجيش وصلت للحناجر     اين المستقر
بل اين المفر
وهنا فتــــحت بوب الـــــمقابر     ماهذا الخبر
بل اين المفر
الگبل بالكوفه گالو احـنه شجــــعان
شو سكته وفقط صكصكت الاسنان
لا خرسان حتى نگـــــــول خــرسان
شنهو الصاب جــيش الكوفه ياناس
 
حسسهم قيامه ونفـــخت الصــــــور
وخلي الروس تتطـاير علـــــى الدور
فقارك والله عادل
اذا ناوي تـــــقاتل
ارحم هالجحــافل
جيشهم صاح
***
 
سمي وگــول بس الله اكبر       وانظر مايلـــي
ياشمرة علي
اخطب والخطابة تريد منبر      عالروس اعتلي
ياشمرة علي
كفو يمرجف الخــــــياله والخيل
نهار الكوفه بأمرك ينــــگلـب ليل
راس الجيش اگطعه واترك الذيل
سبـع تنعام مــــــنك يابوطــــاهر
 
گلهم مستعد الــــــخاطر حـــسين
الغـي امن الخريطه الكوفه مرتين
صاحو ماتجــامل
اذا نــــاوي تقـاتل
ارحــم هالجحافل
جيشهم صاح
***
 
بالكوفه الازقه كلش زغار      واكتــظ العدد
والجيش احتشد
وي ما جردت سيفك البتار      شـو نادو مدد
والجيش احتشد
ابن ازيــاد للــــقائد يحـــــــاچيه
اذا مسلم الجيش الكوفه گاظـيه
ابوفاضـــل لعد بيـــــمن نـــلاگيه
حيره شلـــــون حلـوها القــضيه
 
خيـــدزونه امـــــــن الشام اســــناد
قبل ما هالجـــيوش بســــيفه تنباد
نص الجيش خاتل
اذا نــــــاوي تقاتل
ارحم هالجـــحافل
جيشهم صاح
***
 
يبن العالم بمـــــــــعرفة الانساب        تحليل الرگــب
بالصارم وجب
الماحاسب لسطرة چفك احساب         راسه بلا تعب
بالصارم وجب
الماخذهه التكبر ســــيدي عليك
واجب صار كون تقبل ايديـــــك
وجوباً كلهه تركع تحـــت رجليك
اشما يكـبر عددهم انتـــــــه اكبر
 
املاگـه بالوجــــــه لا مايلاگوك
لذلك قررو همه يـــــــــــغدروك
ماعـــــدهم بدائل
اذا ناوي تقاتــــل
ارحم هالجحافل
جيشهم صاح
***
حيدر تركي الكربلائي


https://www.tg-me.com/aabas78
قصائد لكل ايام محرم اشترك بالقناة

نزله.   مسلم ابن عقيل

قصه الاهيه... بسمك وقف هيه... هاي السفاره


كلها راحت وانت خالد..... گبتك اعظم دليل
والعطش صار بحضرتك....ماي يتوزع سبيل
ياسفير حسين انت......من صنعت المسحيل
جوه رجلك كل قصرهم...صار مكسور وذليل
واليوصل الكوفه.  بعيني يجي يشوفه
.قصر الاماره .........    هاي السفاره
**
صرت باالكوفه انت معلم...شامخ بكل العصور
وچي امان الله بحضرتك......بيها ترتاح الطيور
والهوى يمر اعله صحنك.....خاطر يخلي عطور
براحه نفسيه عجيبه..............يشعر الرايد يزور
عطر الامامه أنت.....كل المجد نلته...
..بزود وجداره ......هاي السفاره
**
ألف عام عليك وأكثر....وانت قرآن الخلود
بحر.ياالكلك معاجز...  شما خذو منك تزود
مرتبط هذا وجودك.......سيدي بكل الوجود
من اخر الدنيا تجيلك.........كلها زوار اوفود
قائد وابن قائده....رف بيرغ الساده...
فوگ المناره......هاي السفاره
**
العنده شده ويعتنيلك......يمك يفل الشداد
ماكو مؤمن عنده حاجه...ومااخذ منك مراد
دار كل واحد يضدك...... راحت وصارت رماد
كل مجاهد راعي مبدأ......انت علمته الجهاد
كلمن نوه الثوره.....عندك اخذ دوره...
وحدد مساره......هاي السفاره
**
الشمس مايخفي ضواهه...شما كبر حجم الغيوم
الباطل اشما طال حبله...فترى يبقى وما يدوم
وكل خفافيش.السياسه ... تطيح ماتگدر تحوم
وانت الك هاي المناير.......تسجد عليها النجوم
كل نجمه تهواهه....وتصلي فوگاهه..
وتقره الزياره.......هاي السفاره

الشاعر سعد العبودي

https://www.tg-me.com/aabas78
قصائد لكل ايام محرم اشترك بالقناة

الى مولاي مسلم ابن عقيل



مسلم علمنـــــه ابتضحيته
لحسين ابيض وجهه ونيته

درس وعبره      الحب عشره
لحسين ابيض وجهه ونيته
=============================
مسلم چان يطي ادروس وحب حسين موضوعه
ماكو اكتاب يشرح بيــــــه ابگلبه الفكره مطبوعه
اخـدوده اتصيــر صبــــوره وعليها تكتب ادمـوعه
طـلاب اشكثر درس مثل هانـي ومثل طـــــــوعه

ابمسلم شافت طوله ولونـه
 صـــارت مجنونه بمجنونـه

امـــن اول مره                
الحب والعشره

 لحسين ابيض وجهه ونيته
=============================
اذا بـالـدنه فوز اتــريــد بخدمته چلب وحبـــه
مسلم جان ويه حسين يمشي بنهجه وبدربـــه
 غير حسين مـاواحـد شغل فكره وسكن گلبـــه 
 اول قائــد ابـلا جيش بــالكوفه علن حـــربـــه

لا گاهـم مـا همـــه الـعسكر
خله الجيش أگبالـــه اتطشر

بيــــــــه امأثره                                   
الحب والعشّره

لحسين ابيض وجهه ونيته
=============================
مـــــــن گـد العطش مسلم ماينسمع منه الصــوت
ويحمد الله مثل احسين چي عطشان راح يموت
كل شارع وحايط بيت عله خدوده نحت منحوت
بكثر مــــــاتجر بيــه الخيل يلمه بعـــد يــــــابوت

ابكل گطــرة دم ينزف گلبـه
 تخضر ثوره وتمشي ابدربـه

اطيـــــب ثمره                                   
الحب والعشره

لحسين ابيض وجهه ونيته
=============================
  مثل عمــه علي مسلم  بـاخلاقــه يوصفـونـــه
بس الحللاه ربــــــه عليـــه اتباوع اعيــــــونـــه
ومايسمع حچي الموزين الهسه انتم تسمعونــه
 كافي امـــن الذنب كافي الليله انتوب خلـونــه

مانعصي الله بكل الـراده
ويغفر النه بجاه الــساده

ايطفي الحمره                                     
الحب والعشره

لحسين ابيض وجهه ونيته
=============================
يالعايف صـلاتك ليش مــن عنده اخذ عبــــره
 ماعاف الصلاة ابيوم حرب والدنيه مستعـــره
اشتنفعك دگت الزنجيل والـــدمام  والطبـــــره
 ابمحرم اذا مــــــــاصليت المن تلطم وتقـــــره

حسين الخاطرنه انطه اعياله
مــــــــــن تصلي اتغث چتاله

بيهه ادمـــــــره                                  
الحب والعشره

لحسين ابيض وجهه ونيته
=============================
✍حيدر الشغانبي
        

https://www.tg-me.com/aabas78
قصائد لكل ايام محرم اشترك بالقناة

3
حميده ابنت مسلم عليهم السلام تخاطب اباها


حياتي ابدون وجهك مو حياتي
اشــوفــنــك واضمك بمنياتـي
ــــــــــــــــــ

يگولون البشر يتناسى لـو ينسه
لان الله خلقها جبدتة مــلــســه
وانا وعينك ترى من يومي ولهِسه
شفت الضيم بويه الماشفت نفسه

يـبويـه وراح يـلـفـيـنـي ممـاتـي
اشــوفــنــك واضمك بمنياتـي
ــــــــــــــــــ
يتاج الراس طيفك من يـجي ابالي
وحگ عينك علي بس حسره تبرالي
قميصك لــو يرد يـابــويــه يالغالي
اتـمـنـى بحقيقة وترجع اگــبـالــي

تفطر جفني مـن گـد نايحاتـي
اشــوفــنــك واضمك بمنياتـي

ــــــــــــــــــ
موقـف شفتة بــويـه وحـيـل اذانـي
عمي حسين اجاني بـلهـفـه ضمانـي
وحط ايده اعله راسي وبويه خلاني
بحضينة ويــگــلــي انــي ابــوج انـي

ويگلي اني احسبج من بناتـي
اشــوفــنــك واضمك بمنياتـي

ــــــــــــــــــ
اشلون انساك وانته الشوف البعيني
يمسلم بوية انشدك من تــخــلـيـني
مشيت انته وخذت كل عمري واسنيني
يـالمـدللـنـي مـا لـحـضـه تـجـافـيـنـي

كـلـهـا ويـاك جـانــت ذكــريـاتـي
اشــوفــنــك واضمك بمنياتـي

ــــــــــــــــــ
يـبويه ابلا ابو مهمومة الابنـيه
باجر مـن تصير الدمعه ترجية
بحساسي وشعوري ما الك جيه
ولــو ترجع يبوية وتنظر البية

يـبـست مـن الـم فـگدك لهاتي
اشــوفــنــك واضمك بمنياتـي
ــــــــــــــــــ
يـا خيمة وحنينك لمن يسافر
رحيلك بـويه يشبه ليلة العاشر
اتاني لرجعتك من بين الف باجر
بعدك اني اكـسر خاطر الخاطـر

يالتنشدني وادور رضـاتــي
اشــوفــنــك واضمك بمنياتـي
ــــــــــــــــــ
شـوفت طولك اترد العمر بية
وانذرلك نذر لو ترجع اعلية
اطـش اسنيني ياقلبي وطورايـه
وكحل عـيني ضلمه وانته گمريه

من الگاك افك ايدي يغاتـي
اشــوفــنــك واضمك بمنياتـي
ــــــــــــــــــ
يا راحه الـبال ويا نـبـض قـلـبــي
يا قران روحـي ويـا جـرح دربــي
ياشهك الـريه وبـالـنفـس تعـبـي
يا شـمعه حياتي ويا سحر حبي

غلاتك بـويه اكـثـر من غلاتـي
اشــوفــنــك واضمك بمنياتـي
ــــــــــــــــــ
الشاعر زين العابدين الشمري


https://www.tg-me.com/aabas78
قصائد لكل ايام محرم اشترك بالقناة

نزله إلى مولاي مسلم بن عقيل


الكوفه مسلم بيده كضهه وشالهه
جيوش اميه من الركض شل حالهه
.....

زلم تردم بالزلم ماصح مفر
والهوى البالريه بالكوفه انحصر
الشارد من الخوف بخياله عثر
ابن عم حسين سل سيفه وظهر

الجيش من شافه برز
سبحه ونكطعت خرز

الخيل گامت تسحگ بخيالهه
جيوش اميه من الركض شل حالهه
.......

الجيش صافن ما يحارب منذهل
واحد وي الثاني ينشد ينسأل
هذا مسلم لو علي راجع عدل
هل شجاعه لو علي لو ابو الفضل

خلصانه وما تعب
نار وگباله حطب

الشجاعه مو عدد بفعالهه
جيوش اميه من الركض شل حالهه
.......

جدحت عيونه غضب لمن نزل
رَجّع السيف اعله الكراب وزعل
باوع اعله الجيش كال ابن الفحل
على هذا العدد ما أبرز فشل

ما احارب هل عدد
مستواي أكثر بعد

الكوفه جيبولي جميع ارجالهه
جيوش اميه من الركض شل حالهه
.......

كون اريد الكوفه متروسه زلم
دوم ما اقبل بعطوه ولا سلم
الخايف من الحرب ليگابل شهم
مسلم انه اكبالكم عدكم علم

عمي قتال العرب
اليوم اخلصهه الرگب

حالف اعله الكوفه اشل احوالهه
جيوش اميه من الركض شل حالهه
.......

جيوش اميه اتجمعت صار الأمر
رايه بيضه انرفعت وصاح الشمر
خلصيت الزلم مسلم نعتذر
صاح مسلم دوم ما اقبل عذر

غضب من ربكم نزل
شلون اصالحكم فشل

الكوفه ربكم يعرف شودالهه
جيوش اميه من الركض شل حالهه
.......
الخادم موسى البطلي


https://www.tg-me.com/aabas78
قصائد لكل ايام محرم اشترك بالقناة

نزل مسلم للحرب وصار موقفهم صعب
شد عليهم شد عليهم
*
كبرت بأسمه الكتايب هاشمي وجده ابو طالب
مسلم اتعناها
واقعه وقعت عليهم ورجها رج الارض بيهم
بس جثث خلاها
لعب بالفرسان جوله شورطاهم وعتنوله
ورايته علاها

نازل عليهم رعب وصار موقفهم صعب
شد عليهم شد عليهم
*
صاعقه وعالزلم نازل هذا عنوان المراجل
هاشميه اطباعه
مالت الكوفه بهلها او وگفت الفرسان كلها
تگله سمع وطاعه
هيج صار بآل أميه خله كل عشره سويه
وكلمن واتباعه

صاح ملزوم الدرب وصار موقفهم صعب
شد عليهم شد عليهم
*
هاشمي ومحد يگدره اوجوهم خلاها صفره
بيها صارت خوفه
الخيل صار امرادم الها تريد تخلص من حملها
وتفر من الكوفه
والزلم عالزلم طاحو استراح المات صاحو
والعدل ميعوفه

الزلم تسكت من يطب وصار موقفهم صعب
شد عليهم شد عليهم
*
صاح طوعه شجعيني بعلي عمي ذكريني
اليوم اله اگضيهم
براسي غيرة علي وحمزه بسيفي اكبر راس احزه
ماكو فارس بيهم
صاح بيهم ماكو رحمه اله اشطرنه الألزمه
الموت انزله عليهم

والمثل بي ينضرب وصار موقفهم صعب
شد عليهم شد عليهم
*
بسيفه يتخاطف عليهم منين مادارو يجيهم
واخذ منهم حيفه
واحد ايصيح عله واحد وين خايب منه شارد
ما يعوفك سيفه
ما تعب بس تعباهم الموت الاحمر شوفاهم
وكلشي صار بكيفه

عالصدر شد الگلب وصار موقفهم صعب
شد عليهم شد عليهم
*
الكوفه صاحتله دخيلك ما يصح مسلم مثيلك
انت عمك حيدر
من تطش بيها وتلمها فحطت الخيل وزلمها
وتعبيت العسكر
ما نمت عل عيله اعرفك مثل عمك صلب جفك
انت ما تتكرر

تگلب الحومه گلب وصار موقفهم صعب
شد عليهم شد عليهم
*
تمت
الشاعر ميثم العمري


https://www.tg-me.com/aabas78
قصائد لكل ايام محرم اشترك بالقناة

مسلم ع

مسلم ثار لو ثارت ضده الكوفه
هاي اسرار والموقف خلي نشوفه
مسلم طالع للاصلاح رافع راية حق من راح
والموقف خلي نشوفه
طلع من المدينة بأمر ابو اليمه

سفير وجندي وشما صار ميهمه

المهم يوصل لارض كوفان كل همه

بهاني يلتقي منواه ويكلمه

لجل حسين طالع وينفذ امره
يحمي الدين من احقر وبشع زمره
جيت اصلحكم لمن صاح رافع راية حق من راح
والموقف خلي نشوفه
دخل ارض الغدر والناس تطلع

سفير حسين مسلم يبقه لو يرجع

بيهم من خطب حتى السمه تسمع

كلهم صاحوا انبايع ولا نخلع

ناس اشرار بيعة مسلم خانوها
ذله وعار ايام اللي عاشوها
راحلهم ما سل سلاح رافع راية حق من راح
والموقف خلي نشوفه

مسلم صار امير الكوفه بالاجماع

سفير حسين بحكمته غير الاوضاع

ابن زياد لامر يزيد لمن طاع

تعب مسلمنه ليله ويوم كله ضاع

تعبه وضاع ماي تبده وشيرده
ناس اتباع كلهم من اهل الرده
ظل مسلم مكسور جناح رافع راية حق من راح
والموقف خلي نشوفه
مسلم اصبح وحيد انطلب دمه

بعد لا مسجد ولا شارع ايلمه

كلها تريد راسه وراس ابن عمه

تعنه الهاني مسلم والتجه يمه

هاني الحيد ما خان بمسلم هاني
هاني يريد ميضل مسلم وحداني
هاني مخضب لمن طاح رافع راية حق من راح
والموقف خلي نشوفه

 
طلع مسلم مثل عمه علي الكرار

عيونه من الزعل تجدح شرار ونار

بيهم صاح وين احفاد عبد الدار

لخلي الروس فوك اسطوحكم طشار

هذا السيف حالف ميرد الغمده
عيد وكيف حرب الغدروني عنده
كل دم الغدروني انباح رافع راية حق من راح
والموقف خلي نشوفه
غدروا للذي دزه الحسين الهم

عبيد يزيد راحلهم يحررهم

وكف ضد الطغاة يحامي عن حقهم

وكفوا ضده ما واحد نصف منهم

تسل سيوف جته جيوش اتلكاها
طمع وخوف ما ينفع كلشي وياها
ما مستهظم دمه الساح رافع راية حق من راح
والموقف خلي نشوفه

الشاعر كريم دانه الاعرجي


https://www.tg-me.com/aabas78
قصائد لكل ايام محرم اشترك بالقناة