كل حـياتي بخدمتك يحسيني
الحد وفاتي بنعـــمتك خليني
خدمتك هيه الأمل كون مقبول العمل
كل حياتي
***
لاردت مال واجـــــر يابو المحنه
خدمتك يابو علـــــي عــد الله جنه
انته يا الاغله الي حتـى امن اهلنه
الكلب بس وياك ظل و باقي ضنه
علكَــتها خدمتــي ابيبانك
ماعفتها طامع بأحسانك
بخدمتك عقلي اكتمل كون مقبول العمل
كل حياتي
***
آنه ناذرها ألك كلــــــــــها حيــــاتي
كون تقبلها وقـــــــــف كل امنيـــاتي
هذا عهدي يابو اليمـــــه الوفــــــاتي
أن شاء الله ما اعوفك الساعة مماتي
أحمد الله حركتي اعله اخيامك
اشكر الله منجـــــــرح بآلامك
ساجد الربي اظل كون مقبول العمل
كل حياتي
***
ألف هنيـــــالي أذا تقبلنـــــي خادم
وترضه عني يابخت بيت الهواشم
خادم ازغــــــــيرون اخدم بالمآتم
ويبقى فيك فوكي يا بو اليمه دايم
يابو الاكبر ابفـــيك اتخــــــليني
حبك اكثر يضوي دوم بعيني
بكلبي كاتب مستهل كون مقبول العمل
كل حياتي
***
اقبلها مني خدمتي ابجاه ابوفاضل
نيتـــــي لله ما طالــــــــــب مقابل
البيدي والاكدر عليه للخدمه باذل
ماد ايدي ابابك ومــــولاي سائل
ماد ايـــــدي طامع آنه بخيرك
وانته تدري مااروح الغــــيرك
بحبك الكَلب انشغل كون مقبول العمل
كل حياتي
***
مااوفي لو عمـــــــر لأجلك فنيته
حتى لو باللطم جســــمي كطعيته
ولو دمه دمع النظـــر كله بجيته
وكل شعر مكتوب لمصابك قريته
ترضه عني يا ألف هنيالي
يبقى حــزني بخدمتك يالغالي
اشلون اوافيك بجُمل كون مقبول العمل
كل حياتي
***


الشاعر ابو علي الركابي


https://www.tg-me.com/aabas78
قصائد لكل ايام محرم اشترك بالقناة

شدو حزام للخدمه
محرم مو فقط كلمه
محرم من صدك رحمه
الله يديم هالنعمه
.....................
ندبو حيدره وفاطمه خدموها
وباب المجالس رايه علكوها
وقرايات هيج الدنيه ترسوها
وحضرو بالطم والرده شدوها
وام حسين انتم الها عينوها
وبسم حسين صيحو رددو بسمه
......................
سهرو للكتابه صور كتبوله
وكون من الشعر ديوان جمعوله
واليطبع قصائد كون يقروله
وكل مجلس بعيد بعزم روحوله
والردود عيد ارجوك كلوله
وشدو حيل بلطمه
...................
كون دموم من الصدرهم تجري
وفدوه الشمر يابو النحر نحري
حسين للخدمتك فوضت كل امري
وانه ادريك حاشه تعوفني ادري
يالعليت صيتي وسمعتي وقدري
وحضي بخدمتك رسمه
..................
مثلك وين يلكه العالم ابأسره
وماتوفي المجره دمك بقطره
وانت حسين تعلم يامحرم وادرى
ومتضيع اليخدمك سيدي واحيره
وانت احلام كنز الوادم الفقره
وانت للهوى نسمه
..................
الاكبر في سجل فاطمه يسجلكم
والحاجات بسم الزهره ينطيكم
وتقدير الجهود النبي قدركم
تشملكم بشفاعه حيدره كلكم
ودخلون جنه ومايأخركم
واحدكم يصافح علي ويسلمه
.......................
الشاعر
اياد الفرح المهدوي


https://www.tg-me.com/aabas78
قصائد لكل ايام محرم اشترك بالقناة

أجه شهر ألحزن والنوح والونه
شد حيلك يخادم وأضمن الجنــه
..........................................
أجــــــه شهر الحسين وكربت أيامه
وجب كل خادم أيشد عزمه وأحزامه
حضر دمعتك وأطفـــي لضى أخيامه
وكـــــــــل مجلس عزيه روح وأتعنه
.......................................................
كـــــــــــل مجلس تروحه أكعد أبابه
تره الزهره تجي وتوكف على أعتابه
تـــــــــون وتنوح آه يحسين وأمصابه
بدفترها تسجـــــــــــــــل أسمك أتمنه
.........................................................
مجالسنه مدارس واللطـــــــــم عاده
واه ويلــي على حسين وعلى أولاده
أووا ويلـــي أعله زينب عمة الساده
وعالعباس مــــــــــــــا تبطل مدامعنه
.........................................................
غير حسين باجــــــــــــر ياهو أينفعك
لـــــــــــو نزلوك كبرك محد أيسمعك
لا خـــــــــــــــوان تفزع لا ولا ربعك
لحد شيـــــــــل الجنازة وتكطع الضنه
.........................................................
حب حسين مــــــــــو تعلوم عالفطرة
شتجازي الفده لجلك دمــــــــــه نحره
كبلك عابس أنجن ونـــــــــــذر عمره
وعلــــــى دربه المشه بالمحشر أتهنه
....................................................
أكشــــــــــــــخ بالسواد وعلك الراية
زينب مـــــــــن تشوفك تفرح أهوايه
أنصب موكبك وأتوضىه مــــن مايه
وبجاه أحسين أطلب حاجتك منـــــــه
.........................................................
خادم خدمة الحسين
الشاعر
محمد الموالي


https://www.tg-me.com/aabas78
قصائد لكل ايام محرم اشترك بالقناة

نزلة عزاء في شرف الخدمة

هل محرم منچ إنريد المدد
يم حسن جهزينه بالعده وعدد
==========
العده دمع عيونه ولطم الصدر
يم حسن تسهيل ردنا لهل الامر
ردنا مايطفه بصدرنا هل جمر
بينه جمر صدورنا لا مابرد
==========
والعدد كون الابو يجيب الابن
كون يتربه بعزاكم عالحزن
من الزغر دمعه يعاشر للجفن
وانتي للخدام يالزهره سند
==========
نحلفج بگلب الحسين المنفجع
ردنا نظرة عينج إنسيل الدمع
كون من نلطم نكسره للظلع
كون وياكم ولانخلف وعد
==========
والله لوما الخدمه هالدنيا جحيم
خدمة ابنج عدنا جنات النعيم
اليخدم ابنج كون لازم يستقيم
وي ابو السجاد وقعنه العهد
=========
حان موعد هالطم والفاجعه
حسب توقيت العيون الدامعه
نجري دمع عيونه اعل المشرعه
هالحزن بينا ويه مولدنا انولد
==========
بشهر شهرين وابد مانكتفي
نور هاي الخدمة لاماينطفي
ورث هم نتوارثه ومايختفي
وارثين الخدمه عن ابٍ وجد
==========
الشاعر علي النائلي


https://www.tg-me.com/aabas78
قصائد لكل ايام محرم اشترك بالقناة

حسب توقيت المخيم والعَلم
للخدامه اتحزمت كل الخدم
__
احنه علمنة الهلال اشما يهل
يلكه نار الغيرة بينه تشتعل
كل سنه وهاي الخدم كول وفعل
ماتعوفك بالنحر قسمت قسم
__
هل هلالك والجرح سولف دمه
ونشرت الزهرة قميصك بالسمه
كمنه للخدمه وتحزمنه ابضمه
وسكتت الدنيه وعلة صوت الالم
____
كلشي يمك وانته ايدك مو الك
بطيحتك بالطف الاهك دللك
خلق وادم بس تنوح لمقتلك
وخله بيهم جمرة من نار الخيم
____
الخدمه ردت واللطم نفس اللطم
الدنيه دونك ماي مابيها طعم
ندعي منك كون ابد ماننحرم
ياربح كلمن يخسرك مافهم
___
بسمك وبسم الله كمنه لخدمتك
ومن كلبها الخدم كلها نادتك
اِدعي ربك خلي يحفظ شيعتك
بجاه اخوك الصابت عيونه السهم
_
اعليك كطعة نحرك ابذاك الضهر
بخير خلي هالسنه تعدي وتمر
لاتشمت السوط بجروح اليسر
هواي وادم تدري ماعدها ذمم
__
سيد معتز الحسيني


https://www.tg-me.com/aabas78
قصائد لكل ايام محرم اشترك بالقناة

عهد الولاء........ياسيدي
نحيي العزاء .....ياسيدي
***
الله  من  اعلينه .....بالحسين  واله
حبه خير  انطانه....والمدح  يحلاله
دمعه اخذ وهديله...يالعليت ابجاله
حتى الله يحبك...لو ختمت اعماله

حلوه شغل الخادم........يفتخر عالوادم
باچر اشمحلاها ...ايسجل اسمه القائم

اجمل وفاء........ياسيدي
نحيي العزاء......ياسيدي
***
ابحبك  اني اتباها.....عالخلك  عرفوني
ناسي  كلها   اتذمني.....بالعشك لاموني
اسمه يمشي براسي..وضحتهه اجنوني
بس خطيه  الحاقد....ماعرف مضموني

اتعينت بالخدمه....شغلي اكبر نعمه
والكلب دگاته.....كلها صاحت أسمه

عطر السماء......ياسيدي
نحيي العزاء ....ياسيدي
***
اشكد حلات الخدمه......طاهر امخليتك
لوحضرت  المجلس...كاشخ بشخصيتك
حسين هذا  ايريده......خاتم   ابتربيتك
چن يگول   الهايم ....بالعشك توصيتك

والخدم تتبشر......هذا يوم المحشر
والتحبه اتگله........تگعد بصف قنبر

كاتب  رثاء........ياسيدي
نحيي العزاء ...ياسيدي
***
كلها بيضه اعمالك.....لو نويت الخدمه
الله يجزي  الخادم......بالشكر  والنعمه
يعله كل  توفيقك.......والجنون بأسمه
زلمه صرت وهايم......والعشك مفتهمه

گلبي والله يريده.......بالعشك تعويده
وشكبر چا حضي.......لو يمسني بأيده

يعلى النداء.......ياسيدي
نحيي العزاء.....ياسيدي
***
ابهل المجالس  هايه.....خدمتك خليهه
حلوه شوف الخدمه....تعله بس داريهه
فاطمه  ابهل المجلس.....لازم   اتعزيهه
حسره دمعة  عينك....فاطمه اتواسيهه

عالخلك نتباها......كل وكت نلگاها
هالمأتم  هايه... .... فاطمه ترعاها

باب الرجاء.........ياسيدي
نحيي العزاء........ياسيدي
***
انه  وابني  انساهم........بالعزم  تأويلي
والله اشد  احزامي.....ما اضمن  حيلي
خيري كله ابخيرك.....يالوفيت اهديلي
عندي حظ اشكبره......فاطمه  تدعيلي

بشغلي منهو ينافس....اني ماخذ فارس
اتخرجت بالخدمه...استاذي اول عابس

باب عطاء....... ياسيدي
نحيي العزاء......ياسيدي
***
تمت بعون الله تعالى الشاعر_يوسف_الفتلاوي


https://www.tg-me.com/aabas78
قصائد لكل ايام محرم اشترك بالقناة

ـ #لخدمة_الحسين ع
ـ محرم 1447 هـ


درب العزه ابهذا الـعـمر
مثل اليكض بيده الجمر
خايف اهدن مجلس حسين

مـن ذنبـي شارد للخيم
خايـف أزل واشبـع نـدم
خايف تضيع ابغيره السنين

بالدنيه كلشي ايصادفه
گلبي ويـكـف عـينه
شاف العشگ لاهل العشگ
واختار ابوسكينه
وعــوّدنه راحـتـنه ابتـعب
ولـعيـونـه صلينه

أحن منه ماكو .. وصاله قريب
خذاني الجروحه .. واعيش النحيب
شغّل بالي كله .. حبيبي الغريب

=======ـ

بسم الله والزهره بده
گلبي ينوح السيده
دوم اعله جرحه ينعى بالآه

عد الحُسين انه عبد
والـعبـد لازم يبتعـد
عن كل شخص مايبچي مولاه

ماعندي غاية ابدنيتي
من احتمي ابساداتي
رايد رضا الــزهره عليّ
واتــوسل ابـدمعاتي
خادم ذليـل وامتثل
ومنـهـم ردت حـاجـاتي

تره الدنيه هايه .. متاهه وتعب
درب گلبي اريده .. دروب الگبب
جمـال المناره .. تساوي الذهب

=======ـ

معنى الامـان ابخدمته
وتـغـري العوالم رحمته
عالم خدمته ايـبدل إنسان

هذا الحُسين ولا عجب
امنترابه ينصاغ الذهب
ضل عالي ذكره ابكل الازمان

يحسيني لاتترك عبد
شافك ضوه الليله
اتقرب الجرحك ردت
وكل عمري ابچيله
هذا انه طايح بالوهم
ومحــد يتچيله

اريد اگضي عمري .. دموعي وألم
واعاشر خدمتك .. وانوح الخيم
تره ماكو مثلك .. يعالي القمم

======ـ

- خيري الصفراني ✍️


https://www.tg-me.com/aabas78
قصائد لكل ايام محرم اشترك بالقناة

كلشي بالدنيا وهم ::: أنته بس أنته الصدكَـ
ارد افهم الما فهم …. بس إلك يحله العشكَـ
****
١=
كلشي بالدنيا وهم وانته الحقيقه
البيك ما آمن شمر باجر رفيقه
يا أمان الخايف التيِهـ طريقه
السنه يمك تنكَـضي بحسبت دقيقه

يم ضريحك أي نعم .. الساعه رأساً تحتركَـ

٢==
كل بشر باجر إله حساب وصحيفه
وينكتب مؤمن الفاتحلك مضيفه
المايصافح جف توالي أهل السقيفه
الدمعته تجري ابعزائك على كيفه

الباجي الحركَـ الخيم .. ودمه الجاري امن العركَـ
٣===
كلمن ايحبك صدكَـ عنده الله غالي
واله جاه الما يُقدر حيل عالي
هذا واقع مو وهم تحجي الليالي
كَـلبه ميموت الحروفك بي تلالي

الصورتك كَـلبه رسم … ونبضته بسمك تدكَـ


٤====
والخدم ليك بصدق نال الكرامه
خدمتك أعظم شرف يابو الشهامه
كلش باجر ينتهي وتبقى الخدامه
تاج فوكَـ الراس تنشد كالعمامه

يا أبو هاي الخدم … عنك اشلون أفترك

٥=====
رحمة الله الواسعه انته العباده
حروف اسمك طلسم الجلب السعاده
حبك امن الله فرض مو بل إراده
والمشه بدربك لبس ثوب الشهاده

وجبدك الصابه السهم ،، ونحرك الراد الشبكَـ
\\\\\\\\\
✍🏻 كلمات موسى الخادم ٢٠٢٥


https://www.tg-me.com/aabas78
قصائد لكل ايام محرم اشترك بالقناة

موشح للخدمه
.

خـــدمـتـك يحـسـيـن يا محلاهـا
حـــتّـه جــبـرائـيـــل يــتــمـنّـاهـا
حسين ابا عبد الله .. حسين ابا عبد الله

----------------------------

الخدمِـتك كـلـمَـن سعه وراد الأجـر
مـو شـرِط رادود لـــو يكـتب شـعـر
التـلـطّـخ وجـهـه بـصـخـام الجــدر
شِــي طـبـيـعي خـدمـته تـرضـاهـا
حسين ابا عبد الله .. حسين ابا عبد الله

----------------------------

سـيّـدي كلمن قِـبَـل خــادم يـصـيـر
الناس تـنظـرله وِسـف نظرة حقير
واليخِدمك يخـتـلف، يصبح أمـيـر
وبـخـدِمْـتــك حــقّـه لــو يــتـبـاهـا
حسين ابا عبد الله .. حسين ابا عبد الله

----------------------------

حـقّـه يـتـباها اليــخِـدْمـك يا كـريـم
اليِـكْـنِـس ابمجلسك ذو حـظٍّ عظيم
عـقلــه صاحي ومـيّــه بالـمـيّه سليم
عــنـده حــظّ وبـخــت مِــن سـوّاهـا
حسين ابا عبد الله .. حسين ابا عبد الله

----------------------------

الـعـنـده حظّ وبـخَــت يـتوفـَّـق أكــيـد
الـمِــن عـبـيـدك صار مــنّ اللـه شـيريـد
صدگ فطـرس عـبد وآنـه امـن العـبـيد
كُـــون اقَــــبــل چــــفّــك الســــاواهـــا
حسين ابا عبد الله .. حسين ابا عبد الله

----------------------------

امن اخـدم ابموكـبك ماحـس بالـتّـعـب
وبالطـبُـخ أر تــاح لـو مـسْــني الـلـهَـب
مــنّ اشــم ابـثوبـي دُخّــان الحــطــب
والـلـه احــسّ ابـخـدمِــتي ومـعـنـاهــا
حسين ابا عبد الله .. حسين ابا عبد الله

----------------------------

واللــه لــو مـا إنــته چــا آنـي عــدم
وچـان هــذا العــمُــر خــلّـصـته نـدم
أشـكـر اللـه اللي جَعلني امن الخَـدم
ونـعـمـه هالخـدّام اعــيـش اويـاهــا
حسين ابا عبد الله .. حسين ابا عبد الله

----------------------------

عالخـدَم أدري الحـچي يـمـكـن يـطـول
وآنه اريـد ابـچـي يـبـن بـنـت الـرسـول
أرْد اسِـــئـلــك ســـيّـدي عـنّ الخــيــول
اضـلـوعـــك اشـچـم حـافـر الـرضّــاهـا
حسين ابا عبد الله .. حسين ابا عبد الله

----------------------------

اشجم فَـرَس يحـسـين مر اعـله الصدر
وعــن ســـؤالـي هـــذا مـــولاي الـعـــذر
الشـمــر يـا مــولاي طـبــراتـه اشـكــثـر
هُـــــوَّ لـــمّـــن رگـــبــــتـــك حــــزّاهـــا
حسين ابا عبد الله .. حسين ابا عبد الله

----------------------------
تمّت والحمد لله
حيدر تركي الكربلائي


https://www.tg-me.com/aabas78
قصائد لكل ايام محرم اشترك بالقناة

#مجالس_محرم_الحرام_١٤٤٧هـ

💫💫

اليحبه حسين بيده يجيبه
هذا قانون الخدم ترتيبه
اخذ درس المنبر .. كل فصل بي قنبر
هذا قانون الخدم ترتيبه
🛑🛑🛑
المعدنه صافي ويقينه حسين هوه يدوره
يريد طبعه كربلائي وگلبه مثل الجوهره
يجيبه بيده للمجالس خطوه خطوه يعبره
كل حسينيه سفينه والنجاة بمنبره

الدولة الخدام من تسافر
حط جوازك بي صور للعاشر
وسوي عمرك دفتر .. كل فصل بي قنبر

🛑🛑

هيه توفيق الخدامه وبيها ناسك تنكشف
اكو يجفي الخير بيده وعن طريقه ينحرف
واكو عالدمعه يتبعه يسوه من ذولاك الف
يخلص وياه بخدمته ومستعد حد النزف

ويه الحسين اليگضي كل ايامه
تسجله الزهراء مطفي اخيامه

وشرط مايتكبر .. كل فصل بي قنبر

🛑🛑🛑

عدنه دستور المنابر واضح النه بكل زمن
من ظهر يوم الطفوف الحد ظهور ابن الحسن
حسين بالدم راسمه النه وبي خواطرنه ارتون
الجفن بي هيهات نكتب حتى بي نبني الوطن

محكمه والقاضي بيها الشاعر
يبدي بالتحقيق من الحافر
والسبي وكل مصدر .. كل فصل بي قنبر

🛑🛑🛑

مثل ماي البي وضوئك طاهره خل صحبتك
المايقربك للمجالس تره يخرب مشيتك
ويه السمعته بيها لثگه لاتلوث سمعتك
وقف بس لحسين خلها مشيتك واحجايتك

جامع الكل الشرائط لازم
حتى ابو الاكبر يقبلك خادم

الموكب البي تحضر .. كل فصل بي قنبر

🛑🛑🛑

دمعة العاشگ رساله بمفترق اربع طرق
واليهلها على الحسين من الله هذا اكبر رزق
معركه الدنيا وطويله وكل بشر من يلتحق
لازم يثبتله موقف ويه الحسين بصدق

من البدايه اليلتزم قانونه
حسين والعباس ميعوفونه

بمنهجه ويه الاكبر .. كل فصل بي قنبر


علي حسين المنصوري

https://www.tg-me.com/aabas78
قصائد لكل ايام محرم اشترك بالقناة

العليله عليها السلام 👇👇👇👇👇

3 محرم الحرام

تبجي العليلة
وكلش نحـيلة 

سفـرت أبـوهــا    صــارت طــويـله 
ـــــــــــــــــــــــــــــــــــــــــــــــــــ
عليلة وكامت بدمعه عليه تـسـال 
وتكله بــويه هـجرك والـسفر طول
الحـزن بيه عليك بيا وكت ينحـل 
دمع يسجب يبويه والجفن يـذبل 

بـعدك يــغالي 
جاشنهو حالي 
شيسكن الروح.    شنهو الوسيله 
ـــــــــــــــــــــــــــــــــــــــــــــــــــــ
الكلب بويه وبعد عينك ولا هـود 
ولايخـمــد جمـر كلبـي ولا يـبـرد 
وجره دمعي بعد جفني ولا ينسد 
حسبت ايام هجرك شونست العد 

تـمر الثـوانـي 
احسب وتانـي
من بعد الغياب    ونتــي ثكيله 
ــــــــــــــــــــــــــــــــــــــــــــــــــــ
شسولف ع الهجر بعـدك يغاليـنه 
يبويه  بيا وكت ترجـع تجي لينه
سكنـت الباب  من بعـدك يوالينه 
بغيابك بس حزن والدمعه تولينه

مااكــدر انسـاك 
وبــالي ذكـــراك 

ماهادت العين      لا ول  العقيلة 
ــــــــــــــــــــــــــــــــــــــــــــــــــــ
 ماانسه وذن أنـته سكنته البال 
تغير حالي بعدك والحزن جتال 
إذا تسأل عليه ومـا بقى بالحال
وأنه بدمعه اناطر جيت المرسال

وبكـوسـر الدار 
منتظره الاخبار 

توصــل ألـيه    وانه نحيلة 
ـــــــــــــــــــــــــــــــــــــــــــــــــــــ
تجي أخبارك وروحن يمك اتعنه 
وفك حزني وعوفن دمعي ولونه
ترد ضحكتنه من جنه وقبل جنه 
ترد انته شحلاتك من تجي يمنه 

وتـرد الأحبـاب 
من بعد الغـياب 
 
نرجع سويه.      امنيت العليلة 
ــــــــــــــــــــــــــــــــــــــــــــــــــــ
كلمات
مرتضى مكطوف الموالي 


https://www.tg-me.com/aabas78
قصائد لكل ايام محرم اشترك بالقناة

#مجالس_محرم_الحرام1447

💫💫💫العليله 💫💫💫

شال ضعن احبابي .. و الف صفحه اعتابي
لو ماترد الضعون .. اشهگ واموت ابابي

اه ياحسين
🔹🔹🔹🔹🔹

بكل رساله ابديها .. الورقه ارد اطويها
وظال گلبي محتار .. اكتب وامسح بيها

بدرب كل امسافر .. روحي روحي تهاجر
على الضعن من يحجون .. ينكسر گلبي الصابر

آه ياحسين
🔹🔹🔹🔹🔹

ضايعات اخبارهم .. ومثل طيره بدارهم
الهجر كاسرلي اجناح .. تجويني نار اغيابهم

الطف بعيد هوايه .. وعطش گلبي المايه
شكثر لحسين اشتاك .. والعمي راعي الرايه

آه ياحسين
🔹🔹🔹

ضعن شيخ الديره .. شال وانه بحيره
وياه خذه العلويات .. بس انه كال ازغيره

وبالعلل دلالي .. حيل ماخلالي
بي تطيب الجروح .. بس ماخذاني الغالي

آه ياحسين
🔹🔹🔹🔹

خذو عمري وياهم .. الكربله مسراهم
والكمر غايب وانجوم .. مااعيشن ابلياهم

اندعي يرد سالم .. علي اخوي وجاسم
وعلى عبدالله الروح .. اسمه ويه نفسي تقاسم

آه ياحسين
🔹🔹🔹🔹

الفاكد اهله وناسه .. الشيب يترس راسه
يروح مايعرف وين .. مذبوح كل احساسه

من البجي يمل جاري .. ونهر دمعي الجاري
‏بس جدتي ام العباس .. يمي وتعرف اخباري

آه ياحسين
🔹🔹🔹🔹🔹

جم علك شديته .. ابابي واتمنيته
حسين يرجع للدار .. والدي ينور بيته

وموصدك احلامي .. تطلع و مو دامي
وترد زينب وياه .. وحلوه تصير ايامي

آه ياحسين
🔹🔹🔹🔹🔹

علي حسين المنصوري


https://www.tg-me.com/aabas78
قصائد لكل ايام محرم اشترك بالقناة

 قصيدة ليله العليله
.
.
.
 
 
كلشي راح الـغالي وامــالي ودلالي كلشي راح
كلـشي راح بـدنيــتي مـــحد بقالي كلشي راح
باقي بس ثوب ابــواليــمه
ومن يهزني الشـوگ اشمه
كلشي راح

***

اول ليـــلــه بالـــفرگه .. بــدت وزدادت الحرگه
اشهگ عالابو واشعــر .. تطـلع روحـي بالشهگه
علــيلـه وشدتي شده .. تفــور احــزاني واتبـده
ياهــل وادم الـغـــالي .. مــكانه الخالي شيسده
 
غريبه / عگب حسين احس روحي غريبه
اجيبه / الصبر من ياكـــتر گــــلولي اجيبه
مصيبه / على راسي احس طاحت مصيبه
 
كلشي راح علـي وعبـــدالله ورقيه كلشي راح
كلشي راح منين اجتنــي الغاضريه كلشي راح
كلشي يمــي الـجان نعمه
مـن يهزني الشـوگ اشمه
كلشي راح

***

العلـيله فاطــمـه انــي .. اليوم احچي على احزاني
الزمن من راح ابوي حسين .. بــلا رحـــمـه تـولاني
اول مابــــده غـــــيابـــه  .. جرت دمــــعاتي لـهابه
وكلشي البيه احسه يصيح .. اه يحسين ومــصابه
 
اريــده / ابويه الكـــــله حــــــنيه اريــده
وحيده / اول تالــي يــــتركني وحــــيده
بعيده / صدگ ياناس ارض الطـف بعيده
 
كلشي راح نحره عطره وحتــى صدره كلشي راح
كلشي راح هم يـــرد ثـــاني واخبـــره كلشي راح
اكتب اعله الــــگـاع اسمه
ومن يهزني الشـوگ اشمه
كلشي راح

***

صدره المنخلق للـشـم .. وعطره للجرح بلسم
مكان الاغفه بي ياناس .. خـاف هنـاك يتهشم
اصيح بلهفــتي يـــابه .. كلـــما اشــتم ثـــيابه
كلشي حاسبه والصار .. لاماحـــاسبـه حــسابه
 
اكلمه / وكـت المــــغربيه الــــثوب اكلمـه
واشمه / واكــــله وين راعــــيك واشـــمه
اضمه / على عيوني وعلـى صدري اضمه
 
كلشي راح ضل وجــوده وضل حــنانه كلشي راح
كلشي راح الهالســـــبب خـــالي مـكانه كلشي راح
وراح من هالثوب اعمــه
ومن يهزني الشوگ اشمه
كلشي راح

***

الغالي بكلشي ياذيني .. العاشت صورته بعيني
كلساعه احترگ لجـله .. وماصــــح اليطـــفيني
ياهــالنـــاس گلـــــوله .. اذا للطـــف تروحــوله
يالماتنســه للـــتذكــير .. عنـــدك طـفله معلوله
 
اعاني / بغــــيابه هـواي گلـــوله اعاني
زماني / ستقوه اعلــــيه ياوسفه زماني
اتاني / انـه لشــــوكت ابـــــقه اتــــاني
 
كلشي راح ابيت اهلي الچان جنه كلشي راح
كلشي راح وبقه البيت بلا مــحنه كلشي راح
باقي محـــــرابه واكلــمه
ومن يهزني الشوك اشمه
كلشي راح

***

ياهو الي سمـع وني .. عن وناتي يسـألني
واگلهم ذكريات اهلي .. ياهل الـناس اذني
كاتلني القهـر والـــهم .. كلمــا عنـهم أتكلم
مـــو عن علتي اتألـم .. عليــهم انـــه اتألم
 
چبيره / اشعر حسرتي كلش چبـيره
اديره / النظر المن عگب اهلي اديره
بصيره / ياهل ناس انطوني بصـيره
 
كلشي راح صافــــنه بالــــدار وحــدي كلشي راح
كلشي راح وكلشي ماضل والله عندي كلشي راح
والدي ابذاكرتي وارسـمه
ومن يهـزني الشوك اشمه
كلشي راح
***
حيدر تركي الكربلائي


https://www.tg-me.com/aabas78
قصائد لكل ايام محرم اشترك بالقناة

الليلة الثالثه العليلة ع


لو صحت بويه الصده اسمع يجاوب راح
والدي ناعي الحزن ساعة غيابك صاح

كلبه الحنيّن رحل. مابقه بس الامل.
من غيابك صاح

………

عايش بين جفوني. ومتعودات عيوني
صوره بعيني ومن حبه تحضنه الجفنين

عيوني كبال عيونه. لوني يشبه لونه
وحتى شفافي ولاتطبك لو كلت حسين

متعوب من هذا الوكت. بس شحلاته
ويموت بالدنيا على. طاري بناته

لو طلع ساعه ورجع كتله الغياب هواي
ومن اجيبن ماي اله يتحسر اعله الماي

كباله اموت من الخجل. مابقه بس الامل
من غيابك صاح

………

يسولف لو صاح اسمي. تذكريني بوجه امي
راحت يبنيتي وعافتنه ايتام زغار

عن الطف يحچيلي. يصبرني ويدعيلي
اول مره أحسّن كلبي هواي احتار

صاح استعدو للسفر. وحسره بدليله
من كتله اروح آنه اسمعت. لا يالعليله

اتسائلت ليش وشفت ويه الجواب دموع
انتي اسمچ فاطمه الوادم تكسر ضلوع

حيلي وي دمعي نزل. مابقه بس الامل. من وداعك صاح

…….

كلت اكسر خاطرهم. ويحنون لبتهم
من خذت هدومي ونمت بهودج عباس

من طر فجر الفركه. چا مت من الحرگه
نزلوني ويدرون بكلبي شكد حساس

ودعت ابوي وچا وكف. دلالي نبضه
الشبگه الاخيره لو سنه. تمر چنهه لحظه

من مشه الحادي صحت ها ياهلي تردون
كلهه سكته بس شفت نازل دمع ام عون

كلبي رف جفني ذبل. مابقه بس الامل
من وداعك صاح

…….

بهالوحشه المو سهله. لاميته ولاعدله
يابيت اهلي اسأل وين ايامي الحلوات

راحو عالباب اكتب. احچي ويامن واعتب
وفركاهم يوجع كلبي وحچي الشمات

يامغرب بلايه دمع. ياليل انامه
يايوم اكلهم حمدُ لله عالسلامه

كلشي ظل بلا طعم بس ظل طعم فرگاه
مابقه بس النفس كلشي خذاه وياه

جاوبت كلمن سأل. مابقه بس الامل. من وداع صاح

……..

وين سنيني الحلوه. بيهم جانت تسوه
يادنيا ولو رجعو للملكه انطي عيون

لكن آ يادهري. كاسر كلبي وظهري
انا لله ومدري بروحي انه شلون

ابچي وامل من البچي. وشيفيد نوحي
مكتوب الي بعمري التعب. خلصانه روحي

من يكله بفركته راح العليله تموت
لا يجي خافن يجي يلكاني بالتابوت

قصتي وكل الحصل. مابقه بس الامل.
من غيابك صاح

…….

نسألكم الدعاء
حسين صادق العقابي


https://www.tg-me.com/aabas78
قصائد لكل ايام محرم اشترك بالقناة

اشوفن اهلي ماشين محد كلي ترحين
عليلتهم واصد ألهم
محد كَلي ترحين
***
حمل ضعن المكوطــــر ماخذ كــل اليعزني
وين الساكن ابكلبـــــــي ماخــذ وين اليودني
وين الســـــــاكن الدلال وين الغالي ويحبني
شالو فرد شـــــيله اليوم وظل الكلب لاجمني
وينه اوينه اليروح يمشي وياخذ الروح
اشوفنهم واصد ألهم
محد كَلي ترحين
***
النوك اتصفطت بالباب وعدلوهـــــن قوافلها
وي طرت الفجر بحبال شــــــدوهن محاملها
وصاحو على العلويات تترك كــــل منازلها
واعيوني الدمع عبرات فوك الشــيله تهملها
واتفكر بالعــــــيون شو كلهم يرحلون
اضن كلهم واصد ألهم
محد كَلي ترحين
***
ترجف كامت اعظامي ويابس ريجي واتفكر
محد كالـــــــــــي ادني ولاواحـــد عليه المر
عليله وروحي ممروده بس اعله السفر اكدر
اصعد وحــدي خـــافن مايرضــى ابو الاكبر
شومحد يكلي شالو كلهم اهلي
اناشدهم واصد الهم
محد كَلي ترحين
***
خواتي كلهن الطلعن وراحـن يم هوادجـــهن
ابوي الواجف اينادي وحده وحده صاح ألهن
سكنه وفاطمه ارقيه يبنياتــــــــــــي كا للهن
وآنه خاطري اتكسر غريبه و جني مو منهن
صعدن كلهن النوك وآنه اكليبي محروك
اعاينهم واصد الهم
محد كَلي ترحين
***
جبت افراشي وادنيت واســــحب بالنفس كوه
اجيت الوالدي وابجي وروحـــــي بنار تجوه
كتله يالحنـــين اوياك امشــــــي يابو المروه
زينه ابنيتك بهالـــيوم هسه امن المرض اشوه
لاتخلينـــــي وحدي وماظل كلشي عندي
اشاهدهم واصد الهم
محد كَلي ترحين
***
كتله يابعد روحـــــــــي اشلون اتعوف البنيه
ضمني بصدره واجفوفه وحيل اندارن اعليه
وحبني بكصتي ودمعت عينه الكلـــــهه حنيه
كلي ابقي يبنـــــــــيتي تكفـــي محنة ارقيه
لاتمشين وياي باجر ماكو فياي
بمحاملهم واصد الهم
محد كَلي ترحين
***

الشاعر ابو علي الركابي


https://www.tg-me.com/aabas78
قصائد لكل ايام محرم اشترك بالقناة

#قصيدة سريعة – للعليلة

يا فاطمه العليلة
يا فاطمه العليلة
ـــــــــــــــ
يكسر اگلوب مصابج من يمر
لفرگة احسين ولا ينفع صبر
حالي شوفيه اعلى حالچ منكسر
جرحي ما طاب اذا ادك عالصدر
هذا الدمع نسيله
يا فاطمه العليلة
ـــــــــــــــ
يلي وياج زمانج ما نصح
كلمن اينوح على مصابج ربح
دمع الاعيون وداع اويه الفرح
يوم الاوداع گلب بيه انجرح
يل ونتج طويله
يا فاطمه العليلة
ـــــــــــــــ
راحت الروح اسيرة اويه الضعن
جان الاحسين الج اكبر وطن
تجوي جمرات عليج وما طفن
هاي الادموع على مصابج جرن
نبجي ونون قليلة
يا فاطمه العليلة
ـــــــــــــــ
ويه الاهلال دمعنه ضل يهل
جرحج امصاب علينه موسهل
من لطمنه وحزنه ما نمل
يالغربتج ابد ما تنحمل
يل خدمتج وسيله
يا فاطمه العليلة
ـــــــــــــــ
گلبج اهناك مشه اويه القافله
وضلت تسيل دمعتج هامله
من تونين ونين الثاكلة
منهو مثلج فكدهم كل هله
يل غربتج ثكيله
يا فاطمه العليلة
ـــــــــــــــــــــــ
نعيم ابو باقر الساعدي


https://www.tg-me.com/aabas78
قصائد لكل ايام محرم اشترك بالقناة

تدري بيها روحي عندك
ونتظر....يابويه وعدك

واحسيناه......واحسيناه
*****
طيفي فسر روحتك كلبي انچوه
ياحلم عاش... ابخيالي المحتوه
جرحي مايرهم دوه ضاع الضوه
انت بنفاسي وعلي يسري الهوه

لو تجاوب...دمعه ردك
ونتظر ..يابويه وعدك
****
انه متعوده عله صدرك بي اشم
گعدتك چانت تمرني ابكل حلم
حسرة الفاگد ابوها اشكد تهم
مثل ...حيلك بويه وياك أنهدم

والدمه ايسيل عله خدك
ونتظر......يابويه وعدك
****
كون اهزن رايتك وشبع عشك
والله يحسين .. بغيابك احترك
شايف المشتاك گلبه شگد يدك
بداري مگطوع الهوه بأه اختنك

والهجر ياخذني بعدك
ونتظر...يابويه وعدك
****
عمري.....مر بلا طعم عشت دمع
ينذبح ليش الضوه بطول الشمع
خايفه ...يحسين گلبي ينصدع
باچر ...الخيل عله ظهرك تنطبع

بويه لوتشرحلي قصدك
ونتظر.....يابويه وعدك
****
اشبگ ابطيفك وحس جاي الگلب
ياحلم باقي عله شوفك هم صعب
بيا وگت يحسين لو داري تطب
احذف ايامي العشتهه بس غرب

اشگد اتاني بهذا عهدك
ونتظر....يابويه وعدك
*****
راحت ايامك وشوفك بس جرح
انه ميته ومن تجي يعيش الصبح
وجهك ينگط محنه اشگد سمح
انذبح.. واسنيني خلصت عالرمح

بطيحتك منهو اليسندك
ونتظر.....يابويه وعدك
*****
#تمت....بعون الله تعالى
#خادمكم....يوسف الفتلاوي


https://www.tg-me.com/aabas78
قصائد لكل ايام محرم اشترك بالقناة

#مجالس_محرم_الحرام 1447 هـــ
مولاتي العليله عليها السلام
🔹🔸

الصبر مفتـــاح الفــــرج يادنيــــا افهما
اشلون اصبر والظعن كل روحي هدمها
ــــــــــــــــــــــــــــــــــــــــــــــــــــــــــــــــ
من يوم ما راح الظعن واحلامي مهدومه
ظعن الاحبهــــم يبتعد والروح ملجومــــه
مافارك اعيوني السهر من نومي محرومه
الفركـــه خلتني اون وابداري مهمومــــه

كالوا عليله ومارحــــت والحاله احسنها
اشلون اصبر والظعن كل روحي هدمها
ــــــــــــــــــــــــــــــــــــــــــــــــــــــــــــــــ
سئلوني اهلي وجاوبت عن وضعي الصحي
احوالي متحسنه وشمس مافاركت صبحي
ماكو خساره لو رحــــت بس ابقى مو ربحي
بدونهم حنطــــه اضل وافراكهم رحــــــــي

افراك احبــــاب الكلب نيرانــــي شعلها
اشلون اصبر والظعن كل روحي هدمها
ــــــــــــــــــــــــــــــــــــــــــــــــــــــــــــــــ
عثروني بوداع الاهـــل خلونـــي مشتاكــــه
حسيت لحظات المشوا كلبي على الناكــــه
فــــاركني الاكبر والابــــو ذابحني بفراكــــه
ونــــار فركتهم هلــــي ماتطفــــه حراكــــــه

اشلون روحي تستقر وحسيني اعز منها
اشلون اصبر والظعن كل روحي هدمها
ــــــــــــــــــــــــــــــــــــــــــــــــــــــــــــــــ
ماضلت احلامي تسر مبيوكه من روحــــي
عكب الحُسين وريحتــــه ماطابت اجروحي
الليل لو مرني جــــرح واسهر انه بنوحـــي
منين يلفيني الفـــرح والحزن بسطوحــــي

ماوصلت الراحـــه الي واحزاني باكملها
اشلون اصبر والظعن كل روحي هدمها
ــــــــــــــــــــــــــــــــــــــــــــــــــــــــــــــــ
انــــه العليله والسهــــر حطمهن امالــــي
نبض كلبي مــــاغلــه بس هوه ضل غالـــي
حسين كل روحي وهلي وافراكه جتالــــي
كل نورس بشط الدمع يرويلك احوالــــي

روحي التون اشتستقر ماكو الي طمنها
اشلون اصبر والظعن كل روحي هدمها
ــــــــــــــــــــــــــــــــــــــــــــــــــــــــــــــــ

الشاعـر : فيصل عاشــور المنصوري


https://www.tg-me.com/aabas78
قصائد لكل ايام محرم اشترك بالقناة

للعليله على لحن أحزاني تابوت ملا محمد الجنامي
أحسب دمع ما أحسب الثواني
فوك المرض جمر الهجر جواني
كل لحظه أشتاك .. بويه بويه
ما أحمل  فراك ..   بويه بويه
...................................
يابويه عني من رحت .. بصوتي النحيل شكد صحت  .. وينك
بجروح البكلبي شفت   ..    ماتكدر أنت تلتفت      ..  عينك
أعيوني رِدت بشوفتك يابويه تشبع
اسمع  رقيه  الفاطمه  أتكلك  ارجع
كلبك أحسّه ينفطر لو صوتي تسمع

ظليت  أحس  بلوعة اليتيمه
حسره بدليلي والمدامع غيمه
ما  تلتفت  ليش  .. بويه بويه
بدونك فلا اعيش .. بويه بويه
....................................
ظليت وحدي بلا أبو ..ولا يمي أخت ولا أخو .. ويلي
لاساعه يغمضلي جفن .. حسرات وأهات وأوّن  .. ليلي
خليتني   بدمع   الالم  أترس  وأبدّي
طفله وعليله أشلون أظل يابويه وحدي
ومفصّل  أثيابه  الحزن كلها  أعله  كدي

لحظة  موادع والدي سمعته
يرجعلي الأكبر طوّل برجعته
ما ظلّي كل حيل .. بويه بويه
وأنطر   مراسيل   .. بويه بويه
...................................
عالباب شابح ناظري   ..   مكسور ظهري وخاطري .. وأنحب
فراك أهلي واقع وأنفرض .. والرمش من فركه ومرض .. شيّب
ظليت أناطر كل وكت ترجع أليه
كالو عزيزه أعله الأبو حيل البنيه
أتصلي يمي أتصورك وأشبك رقيه

ظلت صوركم ماتفارك عيني
عندي أمل  يا والدي تجيني
اعيوني عالباب .. بويه بويه
تترجه الأحباب.. بويه بويه
.....................................
يابويه هد حيلي الألم  .. والحلم عندي أصبح وهم .. حيره
الليل يذبحني ذبح .. لو حتى راسك عالرمح .. ديره
لا لون عنده ولا طعم كلشي بحياتي
سالم  ترد  يا والدي  أدعي  بصلاتي
مدفون جرحي وعلتي بويه بعباتي

صدرك حنين وبس ردت أشبكه
خاف  الحوافر  تهجم  وتسحكه
وتتهشم أضلوع .. بويه بويه
والنحر مكطوع .. بويه بويه
.......................................
لو حرّك الباب الهوه .. ردو هلي من نينوه .. ظني
كلبي كبل جدمي ركض .. لا طفله لا بيه مرض .. جني
مشتاكه  ياناس  شكثر  للفاركوني
مزروعه عيني بالدرب تكثر ظنوني
أتشافه ويطيب المرض لمن يجوني

ياطير أخذ شوكي وأخذ سلامي
للما نسيته  بصحوتي  ومنامي
أحلامي  بالليل  ..  بويه بويه
بيّ تسحك الخيل .. بويه بويه
........................................
مو يوم مر شجم شهر .. مرسال ماكو ولا خبر .. عنك
وي الهوه الهاب أنتظر .. هلبت تهب نسمة عطر  .. منك
الدار  وحشه  وأنتظر والحاله حاله
وأتأمل بشمس الصبح توصل رساله
مرفوعه أيدي كل وكت لرب الجلاله

علخدودي دمعي بالدعاء يلالي
سالم تردلي كون بويه الغالي
الساكن الروح .. بويه بويه
أبنيتك تنوح  .. بويه بويه
....................................
حيدر مطر العبادي


https://www.tg-me.com/aabas78
قصائد لكل ايام محرم اشترك بالقناة