🇺🇿🇶🇦Президентимизнинг 1-2 октябрь кунлари Қатар давлатига амалга оширган ташрифлари доирасида эришилган келишувларнинг ижросини таъминлаш мақсадида ушбу давлатда бир қатор учрашув ва музокаралар ўтказдик.

📍Учрашувлар якунига кўра икки томонлама амалий ҳамкорликни йўлга қўйиш бўйича муҳим келишувларга эришдик. Хусусан,

🔹Қатар Давлат аудит бюроси билан:
▪️молия соҳаси мутахассислари, бухгалтер ва аудиторлар учун махсус ўқув дастурларини ишлаб чиқиш;
▪️давлат харидлари соҳасидаги электрон дастурлар (Қатарнинг Archer GRC ва Ўзбекистоннинг exarid.uz порталлари)ни такомиллаштириш бўйича ҳамкорлик қилиш;
▪️Бюрода Коррупцияга қарши курашиш агентлиги ходимларининг малакасини ошириш бўйича қисқа муддатли ўқув курсларини ташкил қилиш.

🔹Қатар Давлат прокуратураси билан:
▪️икки давлат ўртасида коррупцияга қарши кураш борасида ўзаро маълумот алмашишни йўлга қўйиш;
▪️коррупциявий жиноятлар содир этилишини таҳлил қилиш ва қонунчиликни такомиллаштиришда ҳамкорлик қилиш.

🔹Қатар давлати Коррупцияга қарши курашиш ва қонун устуворлиги маркази билан:
▪️Ўзбекистоннинг Коррупцияга қарши курашиш идоралари халқаро ассоциациясига қўшилиши бўйича жараёнларни амалга ошириш;
▪️Қатарнинг Лусаил университетида Агентлик ходимлари учун коррупцияга қарши кураш бўйича қисқа муддатли курслар ва магистратура босқичида грант асосида ўқишини ташкил қилиш.
Шунингдек, Марказ вакиллари билан жорий йил декабрь ойида Тошкентда ўтказилиши режалаштирилган Коррупцияга қарши курашиш бўйича махсус халқаро мукофот билан тақдирлаш маросимининг ташкилий масалаларини ҳам муҳокама қилдик.

🔹Қатар Давлати Маъмурий назорат ва очиқлик идораси билан:
▪️қўшма ўқув курсларини ташкил этиш, ўзаро ахборот алмашиш, ўқув-услубий қўлланмалар тайёрлаш;
коррупцияга қарши курашишда ёшлар ташаббусларини қўллаб-қувватлашга қаратилган грант лойиҳасини ишга тушириш;
▪️давлат идораларининг шаффофлигини оширишга қаратилган таклифлар ишлаб чиқиш;
▪️ННТлар ва жамоатчиликни коррупцияга қарши курашга жалб этишда ўзаро тажриба алмашиш.

@aburxanov

Ўтган йили Давлатимиз раҳбари томонидан божхона тизимини янада ислоҳ қилиш бўйича ўтказилган йиғилишда тизимни коррупциядан холи қилиш бўйича топшириқлар берилган эди.

Шунингдек, Президентнинг божхона маъмуриятчилигини янада такомиллаштиришга доир фармони билан тизимда коррупцияга сабаб бўлаётган омилларни батараф этиш, манфаатлар тўқнашувини олдини олиш ва ходимлар иш самарадорлигини ошириш бўйича қатор вазифалар белгилаб берилган эди.

Мазкур топшириқ ва вазифалар ижроси ҳолати, соҳада амалга оширилган ишларни муҳокама қилиш ва жорий қилинган янги тизимлар билан танишиш мақсадида, Божхона қўмитасида бўлдик.

Хусусан, коррупциявий хавфларни бартараф этиш ҳамда инсон омилини қисқартириш мақсадида ишлаб чиқилган 17 та янги ахборот тизимлари (“Юк операциялари”, “Божхона кўриги”, “E-Navbat”, “Шаффоф тизим”, “Божхона ходими”, “Самарадорлик”, “Божхона қиймати”, “Таргетлаш ва хавфларни бошқариш” “Транспорт назорати”, “Коррупциявий хавфларни бошқариш” ва б.) ва 13 та янги электрон хизмат, 6 та мобиль иловаларнинг ишлаши билан танишдик.

Масалан, “Самарадорлик” тизимида ходимлар фаолиятини баҳолашни инсон омилисиз амалга ошириш, “Коррупцион хавфларни бошқариш” тизимида эса ходимларнинг коррупцияга мойиллигини аниқлаш имконияти яратилган.

Шунингдек, ходимларни ишга қабул қилиш “Божхона органлари хизматига ишга жойлашиш” онлайн саҳифаси орқали амалга оширилиши, божхона расмийлаштирув жараёнлари эса масофавий тарзда амалга оширилаётгани, божхона кўриги натижалари планшет ёрдамида тасдиқланиши, аэропортларда янги “Масофавий божхона назорати” ахборот тизими ишга туширилганлиги соҳада коррупция даражасининг камайишига, очиқлик ва шаффофлик таъминланишига хизмат қилмоқда.

Бу каби чораларнинг самараси ўлароқ, Божхона қўмитаси давлат идораларининг коррупцияга қарши курашиш ишлари самарадорлиги рейтингида “яхши”, очиқлик индексида эса фаолият очиқлиги ва шаффофлиги даражаси "яшил" тоифада баҳоланган.

Қўмита раҳбарияти билан соҳани янада шаффоф, коррупциядан холи қилиш бўйича келгусидаги режаларни белгилаб олдик.

@aburxanov

Бугун Ўзбекистон Республикаси Ҳуқуқни муҳофаза қилиш академияси ташкил этилганлигининг бир йиллигига бағишлаб тадбир бўлиб ўтди.

Бугунги кунга қадар Академияда Агентлигимизнинг барча ходимлари махсус малака ошириш курсларидан ўтишди. Академия билан биргаликда ташкил этилган  20 та ўқув курслари орқали 700 нафарга яқин давлат хизматчиларининг коррупцияга қарши курашиш ва ҳалоллик стандартларини жорий этиш бўйича билимлари оширилди, коррупцияга қарши курашишга оид долзарб мавзулар бўйича 20 дан зиёд тадқиқотлар олиб борилди. “Коррупция муаммолари” ихтисослиги бўйича ўнлаб докторлик диссертациялари ҳимоя қилинди.

Агентлигимизнинг асосий ҳамкори бўлган ушбу таълим даргоҳини табриклаган ҳолда, келгусида ҳам ҳуқуқий соҳада, айниқса, коррупцияга қарши курашиш соҳасида етук кадрларни етиштиришдан чарчамасликларини тилайман.

@aburxanov

Тошкентда ўтиши режалаштирилаётган “Халқаро коррупцияга қарши курашиш бўйича юксак мукофоти”нинг тақдирлаш маросимига илк маротаба шу пайтгача ғолиб бўлган фаолларнинг барчаси мамлакатимизга ташриф буюриши кутилмоқда.

Уларнинг бири – доктор Неажай Пайлей бўлиб, у 2018 йилда мазкур мукофотнинг “Коррупцияга қарши тадқиқотлар ва таълимга қўшган ҳиссаси учун” номинациясида ғолиб бўлган. У мактаб ўқувчилари учун коррупцияга қарши курашиш бўйича махсус дарслик ҳамда ўқув қўлланмалар ишлаб чиққани, шунингдек, бир қатор таълим подкастларини яратгани билан машҳур ҳисобланади.

Доктор Неажай бир қатор нуфузли вазифаларда, хусусан, Либерия Президентининг спичрайтери, The Washington Informer Newspaper газетаси муҳарри, Оксфорд ҳамда Либерия университетлари, Лондон иқтисодиёт ва сиёсатшунослик мактабида тадқиқотлар ва педагогик фаолият олиб борган.

У шунингдек, Африка тараққиёт банки, Австралия халқаро ривожланиш агентлиги, Форд жамғармаси, Барқарор ривожланиш институти ҳамда БМТнинг Африка бўйича иқтисодий комиссиясида эксперт-маслаҳатчи сифатида ҳам фаолият юритган.

Неажай Пайлей 2020 йилда Grassroots Alternative Movement ҳаракатининг Давлат хизмати соҳасидаги мукофоти лауреати, 2019 йилда “Жасур лидерлар” халқаро мукофоти совриндори, 2016 йилда Африканинг “Йил аёли”, 2015 йилда Financial Times нашри томонидан “Эътирофга лойиқ бўлган 25 африкалик” рўйхатига киритилган.

Бугун доктор Неажай Тошкент шаҳрининг бир қатор мактабларига бориб, ўзбекистонлик ўқувчиларга маҳорат дарслари ўтди.

Биз ҳалолликни тарғиб қилувчи, ёшлар учун мўлжалланган ўқув қўлланмаларни яратишда унинг тажрибасидан самарали фойдаланган ҳолда, фаол ҳамкорлик қиламиз.

@aburxanov