قصيده عكيلي بحق {السيده ام البنين}{عليها السلام}
****
عينج يم عباس علينه
****
عليج حسين ودمه السايل
وجفوف وعينين الكافل
طيبين هوايه ونستاهل
منج يحنينه تنظرينه
****
يالكلج رحمه وحنيه
وبغيرة حيدر ممليه
بدمعه تدك بابج يوميه
ندري الميصير تسوينه
****
يمج حاجات النه هوايه
وحكج سوت بينه سوايه
اكتبناهن كلهن عالرايه
يالوفايه شعملت بينه
****
منج نتامل تكضيها
ونتوسل لا لترديها
بجفوفج نعرف تاليها
خلصينه منها وريحينه
****
ممليه ومابيج اي قصره
بعيونج ماتوكف نظره
اكضيها عليج مصاب الزهره
كدها انتي وحاشه ترجعينه
****
خادم اهل البيت عليهم السلام
الشاعر السيد{هاشم قاسم الداودي البلداوي}

قصيده بحق {السيده ام البنين}{عليها السلام}
****
وين انطي وجهي بهالحزن ياربي
حتى من اموت وياي اخذ تعبي
حسبالي موتي المحنتي ينهيها
ما جنت ادري النايبه يبديه
مكتوبه مانرتاح انه وكلبي
****
ظنيت من يدنه الاجل والموت ياخذ روحي
ارتاح من هذا الحزن. وانسه ونيني ونوحي
شمدريني يتفاقم عَلَي ويصب ملح بجروحي
ويشمت بحالي وشدتي ويهد بقايه صروحي
الحسبته ماصار والتمنيته. ما حصل شي منه
الحسبته ماصار. عكسه جرالي يريد مااتهنه
حسره عليه الفرح يطرق بابي ايست منه ومن رجوع احبابي
ظليت وحدي ومحنتي ابجيهه
ما جنت ادري النايبه يبديه
مكتوبه مانرتاح انه وكلبي
****
اكبر اماني ام الوِلِد بالموت حوف تحفها
رويحتها تصعد للسمه والغالي لازم جفها
دمعات فركتها عمر مثل الجمر تذرفها
ماتمشي تشعر للكبر. للجنه هيبه تزفها
ياحسرة العين هالعاده ماصارت ولا شافتها
ياحسرة العين. بس نايباتي ولهفتي حافتها
مكسور كلبي بخاطري وعيوني
اربع ولد تانيتهم ماجوني
وروحي المصايب والالم ماليها
ما جنت ادري النايبه يبديه
مكتوبه مانرتاح انه وكلبي
****
ام البنين ام البخت تسميني جانت كلها
المالها حل واستصعبت انه وبنيني نحلها
للموت رحت الوحدي وروحي الحزن كاتلها
موسهله للعدها اربعه. ماتت ومحد الها
اخ من الاقدار ياوسفه ماخلت حلو يعاشرني
اخ من الاقدار. دوم بجروح القاسيه تمرمرني
خَلصت بالكوه حياتي وياها
ليهسه يلجمني الم ذكراها
وسوالف التصعب علي احجيها
ما جنت ادري النايبه يبديه
مكتوبه مانرتاح انه وكلبي
****
بيوم المنيه مصيبتي. بجت الكون وناسه
والموت شفته من الحزن. شايبه رموشه وراسه
ومن طلعت انفاسي شفت طلعت ويااهه انفاسه
البجه دمه عين البشر من دم بجالي احساسه
من طلع الروح ماغمضت عيوني بقت مفتوحه
من طلع الروح. عالباب ظلت دامعه ومشبوحه
تمنيت كبله يكون اشوف اولادي
بنار المصيبه التستعر بفادي
لو الف موت النار مايطفيها
ما جنت ادري النايبه يبديه
مكتوبه مانرتاح انه وكلبي
****
جان انتظاري شكد صعب كلشي اخذ من عندي
تعبني سهرني شكثر. عيشني عالم وحدي
بدروب مابيها امل باحلامي دايم يحدي
واندعي من الله يجيب الي لو موتتي لو ولدي
من صبري والنوح كل ليله جان براسي تطلع شيبه
من صبري والنوح مليت من كد ما نحت بالغيبه
ماطيق نفسي واكرهت ايامي
وعليه كل ساعه تزيد الامي
وحشتي للذكره صرت اشكيها
ما جنت ادري النايبه يبديه
مكتوبه مانرتاح انه وكلبي
****
خادم اهل البيت عليهم السلام
الشاعر السيد {هاشم قاسم الداودي البلداوي}

قصيده بحق {السيده ام البنين}{عليها السلام}
****
ٱشسوه الفراك 
بيه ناره تلهب ٱو ما تنطفي
و يحس بيها بس المفارك وفي
ٱشسوه الفراك
ٱمضيعه الجروح الدوه *** ٱبصدري مخنوك الهوه
ٱشسوه الفراك
*
خلصت عمري ٱبحزن * ونوح ٱبد ما يستچن
ٱو حسرتي حسرة غريب ٱمتاني ٱهله
ٱدموعي تنزل جالسهم * ما أنام ٱمن الألم
ٱوصرت أتنفس مثل البصدره نبله
شاب رمشي ٱمن السهر * ٱتودي و تجيب الصور
عشت عمري لاني ميته ٱو لاني عدله
داري بعيوني گبر * ٱعزازي مترد و ٱنتظر
و الأحبهم أدري بيهم گضو قتله

شنهو اليهون 
حتى سهله ٱنگول شدته ٱو تنحمل
و ناري تطفه و ٱمسح دموع التهل
شنهو اليهون
مني ضاع المحتوه *** بصدري مخنوك الهوه
ٱشسوه الفراك
*
يم البنين الصبر * ٱيگلي العليه يمر
وثكل عشر جبال حزني من الفجيعه
ولد عندي أربعه * ٱچبيرهم عالمشرعه
ٱعيونه مطفيات و چفوفه گطيعه
بالغرب ماتو ضمه * وغسلوهم بالدمه
ٱبدالهم أتمنه لو آنه الصريعه
ليلي لو مر ٱختنك * و الصبح بي أحترك
أمنية روحي أموت ٱعله الشريعه

ويَّه عباس
أندفن يم العزيز بكربله
ويه ٱبنها الأم تصير ٱمدلله
ويَّه عباس
حلمي ٱموت ٱبنينوه *** بصدري مخنوك الهوه
ٱشسوه الفراك
*
ٱنذرت إلهم چم نذر * كون بس ما تنغدر
ولدي حيل ٱعزاز يا عالم عليه
ٱشگد نطرت و ما إجو * و آنه من يوم المشو
ذبل كل شي البيه من هاي الرزيه
ما يعوضهم بچي * أيّست لا ما تجي
ٱموذرين ٱعله الترب بالغاضريه
ما رحم بيه الزمن * و عافلي بس المحن
و ٱنتظر موتي يجي صبح و مسيه

بلچن الموت
ٱبولدي يجمعني بعد ذاك الغياب
و ٱنسه ضيم همومي وسنين العذاب
بلچن الموت
ٱو من جديد ٱنرد سوه *** بصدري مخنوك الهوه
ٱشسوه الفراك
*
ردت بچفوف الوِلِد * عيني تنسد و ٱنسعد
و بحضن عباس ٱموتن هذا حلمي
إبني شيّال العلم * عله ٱفراگي يبچي دم
بصوت عالي ٱيصيح ويلي ماتت ٱمي
و نعشي هوَّ ٱو إخوته * ٱيشيله و تهل دمعته
حيله طايح للمصيبه ٱو گلبه مدمي
وحدي ما موتن ردت *  و يا وسف تالي متت
الوحَّدي و ٱعزاز گلبي موش يمي

گلبي مجروح 
جرح فاگد غالي ميشوفه بعد
ٱو بين أحضانه ٱنذبح طير السعد
گلبي مجروح
وحك شيّال اللوه *** بصدري مخنوك الهوه
ٱشسوه الفراك
*
الردته ما صار ٱو جره * مات سبع الگنطره
و أيست من جيته لا واحد يجيبه
ٱبحسرة ٱيرد ٱولدي * آنه متّ الوحدي
بين حلمي و دمعي و ٱحزاني النحيبه
للبقيع ٱتشيعت * ٱمن النواعي مشبعت
و ما طفت لي هسه جمرات المصيبه
ماردت بي أندفن * مو عليه گلبي يحن
يحن گلبي الگاع ٱبو اليمه الحبيبه

وحشه و الله 
لا ونين ٱو لا نواعي ٱو لا بكاء
ٱو لا محب عالگبر ينصبلي عزاء
وحشه و الله
و الظلام بلا ضوه *** بصدري مخنوك الهوه
ٱشسوه الفراك
****
عدله ميته أنهظم * ٱمن الحبايب أنحرم
هيّه مكتوبتلي ٱظل ٱبلايه غالي
ٱعليه ما واحد يمر * يگعد ٱبصف الگبر
ٱضلوعه من اللطم يكسرها ٱعله حالي
يمي يفتر الشمر * بحقده گاعد ينتظر
يحز منحر كل من ٱتعنه و إجالي
و آنه عيني شابحه * ٱعليه أقره الفاتحه
و عَلَي يبچي الفات من عزي و دلالي

وين اللي يصيح
بٱسمي و يناديني بدموع الحنين
يا سلام الله على أم البنين
وين اللي يصيح
ٱضمايه لليوم مرتوه *** بصدري مخنوك الهوه
ٱشسوه الفراك
*
يمته گبري ينبني * جنه للّي يعتني
و من بعيد ٱتبين الگبه ٱشحلاها
و يمته ٱشوفن بي صحن * لليحبوني وطن
و المناره ٱچفوف و تحييّ الإجاها
و المواكب تنصب * و ماليه الناس الدرب
و الشمس من گُبِّتي تاخذ ضواها
ٱتصيح كلها يا هله * و اليجيني ٱتدلله
ٱو عله بابي الناس تتنطر سراها

كل من ٱيتيه 
عن هله الخادم يطيب خاطره
بشارع ٱم عباس تلكاهم تره
كل من ٱيتيه
ٱو شايب ٱيثوب ٱگهوه *** بصدري مخنوك الهوه
ٱشسوه الفراك
*
خادم أهل البيت ( عليهم السلام )
الشاعر السيد هاشم قاسم سعود البلداوي
24 - 12 - 2023 ميلادي
10 - جمادي الثاني 1445 هجري

قصيده بحق{ام البنين}{عليها السلام}
****
يادمع عِيوني ** ماترد بَنوني
ضايع خبرهم *** لا تنتظرهم
****
ارحم بحالي يدمعي وحن عليه
لاتزيد هظم كلبي والرزيه
حيل ماظل عندي واتحمل اذيه
راحو اعزاز الكلب من بين اديه
ايست من عدهم ** يادمع شيردهم
ميت عذرهم *** لاتنتظرهم
****
جمر لو تنزل تره وتحرك جفوني
والبواجي يادمع تعمي عيوني
عالرضو يبقون ويضلون دوني
لو تسوي شما تسوي مايجوني
احرك بوجنتي ** بصبري وبلهفتي
وإِمسح صورهم *** لاتنتظرهم
****
****
عندي ماظل شي بعد يادمعي يسوه
الوحدي اعيشن لا ولِد لا عندي سلوه
مثل بلوايه ابد ماجرت بلوه
قسه بيه الحزن قسوه شلون قسوه
مرمرالي حالي ** واسهرت ليالي
حظي وقَدَرهم *** لا تنتظرهم
****
هو المضيع ضنه مضيع حياته
ومستحيله يكضي حزنه ونايباته
ناره تحرك شوكه كله وامنياته
واكبر أحلامه تحن ساعة مماته
ما تنفع الوسافه ** لو ماتت الترافه
دامي نحرهم *** لا تنتظرهم
****
عُمُر دمع العين مارجعله مدفون
اسأل الدفنوّ غوالي وبقو يبجون
اقتنع يادمع المحنه مايرجعون
الخاطر الله ارحمني هو شظل بالعيون
شيبتلي رموشي ** ذبلتلي هروشي
دايم سفرهم *** لا تنتظرهم
****
أَنجمع هيهات بيهم والتقيهم
مايجوني همه المتانين اجيهم
الصار كله لابديه ولابديهم
بالچي موتي والكبر يجمعني بيهم
هذا كل دعائي ** مُنيتي ورجائي
اشتم عطرهم *** لا تنتظرهم
****
خادم اهل البيت عليهم السلام
الشاعر السيد{هاشم قاسم الداودي البلداوي}

قصيدة نزله بحق{ام البنين}{عليها السلام}
**،
ضمير واحساس حنين وانفاس
خدمة ام عباس مايشنبع منها
****
هالكلمه والله من نص ضميري
ماردها هيهات بيها مصيري
رفعتلي راسي ومن عدها خيري
مابالي بالغير ميهمني غيري
تدور الايام تزيد الالام
فلا اغيب عنها ماينشبع منها
****
هاي ام البنين ام النشامه
خدمتها يا ناس تنطي كرامه
ودم منحر حسين واهله وخيامه
نورٌ على نورٌ اليوم القيامه
عطرها من يفوح يداوي المجروح
من الجنان جنها ماينشبع منها
****
اخ شحلاها لو للمنيه
عالخدمه ابقه وترضه عليه
ويكلي باجر حامي الحميه
ماقصرِت دوم صِنت الهديه
اكر بيها العين واسر بيها حسين
يحب حيل ونها ماينشبع منها
****
الحره الحنينه الوكفتها عنبر
هوايه يخدام تستاهل اكثر
يصعب عليه اوفيها اكدر
عليها ميغله لاوالله منحر
احبها انه هواي واضمها بعيناي
تظل دوم لنها ماينشبع منها
****
للظلمه كمره وللاعمى شمعه
البيها تمسك عالكل ترفعه
ندري اللي يزرع يحَصِد اليزرعه
والضيم الايام باجر تنفعه
تطفّي النيران تروّي العطشان
اليحبها يهنه ماينشبع منها
****
يوميه ادعي ودموعي اصبها
الاخر حياتي امشي بدربها
عمري اخلصه كون بكربها
الجنه بلا حساب قطعاً اطبها
من اموت الكفّال يجيني بالحال
هويت امحنها ماينشبع منها
****
الخدمه ملتني جاه وجاها
داوتلي الجروح عشت برفاها
علّتلي شاني وصرت بحماها
حكي على الكون بيها اتباها
اظلن للموت اصيح بهالصوت
انه گد ضنّها ماينشبع منها
****
خادم اهل البيت عليهم السلام
الشاعر السيد{هاشم قاسم الداودي البلداوي}

قصيدة موشح بحق ام البنين (عليها السلام)
****
ياسلام الله على ام البنين
وعلى ذاك الطيب والحب والحنين
****
الها كل صبح ومسى ابعث سلام
على نسمات الهوه وجنح الحمام
خذت فكري الطاهره بضعت حزام
اشما اوصفها اضل الها مدين
****
هالحنينه والوفيه الطاهره
الباذله والخادمه والصابره
شايله كل الصفات النادره
وبيهه يفخر مؤمنات ومؤمنين
****
فرق عن باقي النسه كاع وسمه
زلم ماتوصلها يوم الموزمه
كفت وفت بخدمة فاطمه
وصار كل الكون بيها يستعين
****

سهرت وضحت ونالت ماتريد
تعتك الايام وتبيد التبيد
وام ابو فاضل تظل طلتها عيد
ابد ماغيرتها افات السنين
****
تعبت شكد وشكثر ام الكمر
سنينها خلصت الم دمع وسهر
كضت الايام من مر الامر
صبرت وجازاها رب العالمين
****
جاه عدها محير الكون وهله
وناس تحلم توصل الهالمنزله
عد محمد واهل بيته مدلله
المستحيل ابجفها ينذل ويلين
****
باب للحاجات خلاها الاله
ودرب ليريد الفرج منها ابتداه
مثل نجمه وزاهيه تضوي بسماه
عيون للي تاه والماله معين
****
انطاها كلشي الباري من حبت علي
مايرد دعواتها دعوت ولي
هالامر عند الخلك واضح جلي
مثل ضي الشمس للكل تستبين
****
بخت عدها يفوق ادراك العقل
البوصله من تحير بيها تستدل
بامر ربنه كلشي الها يمتثل
هاي ام الوفه ام الطيبين
*
خادم اهل البيت عليهم السلام
السيد هاشم قاسم سعود الداودي
١٤٤٥هجري

قصيدة عكيلي بحق ام البنين ( عليها السلام)
****
تستاهل ام الوفايه
****
تستاهل كلشي الننطيها
وهاي الارواح نضحيها
وذكراها اعله الدم نحييها
وفوك الغيم اندك الثايه
****
هي العلمتنه اعله الخدمه
ومن نتعب تنطينه الهمه
تشد عزم اليتردد عزمه
وتسلم بجفوفه الرايه
****
ننسه الدنيا وماننساها
وللموت انظل احنه وياها
وبدم المنحر نفداها
وللمحشر منمل من هايه
****
محبوبة حيدر والزهره
مهيوبه ومابيها اي قصره
ودم حسين وصبره ونحره
تحبهم ويحبوها هوايه
****
يفوز اليخدمها ومايخسر
تنطي جاه المايتصور
تشفعله باجر بالمحشر
عون وكفال وتجايه
****
خمسة ايام انقيم الها
كل عام وهيهات نملها
بجف العباس اتسجلها
وماتنسه شنكتب عالرايه
****
الشاعر السيد هاشم قاسم سعود الداوودي البلداوي

قصيدة بحق السيدة الجليلة أم البنين (عليها السلام)
*
بعد البنين * عشت السنين
عشت السنين * بعد البنين 
حزني متدركه  العقول  
عنه محتاره شكول
بعد البنين
****
ام البنين اللي ماينوصف همها
واللي سابع مستحيل يزول غمها
هي انه التسري الاحزان اويه دمها
والنوايب ذبت بضحكتها سمها

ناري تاكل بالكلب * شنت عليها حرب
جيوش الهموم
عافني وراح الصبر * وابجي كضيت العمر
بجي المظلوم

سهري والليل * طيح الحيل
طيح الحيل * سهري والليل
يزول كلشي ومايزول 
عنها محتاره شكول
بعد البنين
****
بنار يوميه اشتعل وانطفي بالنار
اندار وكتي الماحسبته بيوم يندار
المااريده صار والردته فلا صار
راح مني ومستحيله يعود للدار

لازمه بجفي الورد * وافتح لباب واسد
من يمر صوت
خلص كلبي من البعد * الراح اساله واليرد
صرت للموت

تسال الباب * وين الاحباب
وين الاحباب * تسال الباب
غيرهم لا مو قبول 
عنه محتاره شكول
بعد البنين
****
الام اذا اتفارك ولدها شيبقه عندها
غير ونها ونوحها ودمعه اعله خدها
من وحدها تعيش وتموت الوحدها
ذكريات الربه تاخذها اللحدها

وانه فاركت اربعه * جبيرهم عالمشرعه
بلايه جفين
كمر احله من كمر * بشوفهم يحله السهر
خامسهم حسين

طيح الحيل * ويلي ياويل
ويلي ياويل * طيح الحيل
وزيد الامي العذول 
عنه محتار شكول
بعد البنين
****
والله لو بالطف جنت والصار اشوفه
كل جرح منهم جنت بجفوفي اروفه
امشي للعباس ابوسه من جفوفه
وبيدي اغطي حسين عاري مااعوفه

اله ابوسه امن النحر * وسهمه اطلعه من الظهر
والطم الراس
اعمي عيني وابجي دم * وذب جفي اعله العلم
مثل عباس

مااخليه * بروحي افديه
بروحي افديه * مااخليه
تسحك عليه الخيول 
عنه محتاره شكول
بعد البنين
****
من الشمس والحر افيّله بعباتي
وامسح الدم عن جسد ديني وصلاتي
كون مو بس ولدي افديه ابناتي
هو اعز واغله شخص يبقه بحياتي

من يذبحوه العده * مااتركه لوحده
فوك التراب
الجفه ارجع خنصره * وماي اصب بمنحره
البات لهاب

هو الحسين * عيني الاثنين
عيني الاثنين * هو الحسين
عندي امانه من البتول  
عنه محتاره شكول
بعد البنين
****
الكل تروح ميسره وانه ابقه يمه
واظل ابجي عليه لحد ماعيني تعمه
جرح الي أذيه اعرفه وما الجمه
واخ من يصيح اكله اسم الله يمه

اوياه اظل ابلا عذر * واطب ويّا للكبر
الف ياريت
ابد ماانسه ابد * مثله ماعندي ولد
شمعة البيت

ياحرامات * بالغرب مات
بالغرب مات * ياحرامات
مشه بدمه للرسول 
عنه محتاره شكول
بعد البنين
****
تدعي هالوادم عمرها يطول اكثر
وانه عكس الناس ادعي سنيني تكصر
كل معاناتي والم كلبي التمرمر
تنتظر قائم محمد الها يظهر

ينهي كل هاي المحن * ويمسح جروح الزمن
بيده وتطيب
والله من كلشي اتعبت * راسي من كد مانحت
تارسه الشيب

مثل الرماح * فوك الجراح
فوك الجراح * مثل الرماح
يصول عالراس ويجول 
عنه محتاره شكول
بعد البنين
****
الشاعر السيد هاشم قاسم سعود الداوودي البلداوي

قصيده كعديه بحق السيد محمد سبع الدجيل عليه السلام
****
سيدمحمد بالشدد    راعي البساله
من حيدره ياخذ مدد   راعي البساله
مايرد زواره ** يكرم بخطاره
راعي البساله
****
سيد محمد يعالم   كل صفاته حيدريه
هاشمي وماخاوه باطل    وكف ضد العنصريه
سيف ويحش ابن حيدر     بالنحور البربريه
رايته اعلى من السمه ** نور الليالي المظلمه
بجف الفخر واالغانمه ** احلى واجمل مزهريه
علّه مقامه من الازل   جله جلاله
من الولاده للاجل   جل جلاله
بجف البخت آيه ** الربته وفايه
راعي البساله
****
حيرت عقل المعاجز   سيد محمد صفاته
ماترك لعداه فرصه   خّيط حلوك الشماته
غيره واحساس وحميه   نور ويضَوي شحلاته
لو ردنه نحجي اعله الكرم ** خيره ترس جف النعم
بكل زمن ديوانه هرم ** لليجي يفرش عباته
يتمنه زود الغانمه * يحظه بوصاله
ويندعي من رب السمه * يحظه بوصاله
ياالف هنياله ** اليشرب من إدلاله
راعي البساله
****
لو ردت شاراته أحسب    مدري من ياشاره ابدي
تارس الدنيه سوالف    حلم للمحتار وردي
نوره نجمه ابليل اظلم   للمضيع دربه يهدي
الكونين بافعاله إتعرْف ** والمرجله بزوده إتحلف
جن وانس كلها إتهتف ** غير ابو جعفر شعندي
وكفاته النه والمجد    تشهد فعاله
وشاراته يم باب الحمد   تشهد فعاله
شوفتنه انواره ** شاره احلى من شاره
راعي البساله
*****
مثل عيسى النبي جنه    يسوي باذِن الله كلشي
يشافي كل معلول جفه   الكل ظلام نهاره يغشي
الماكدر يتعنه يمه   ابو جعفر يمه يمشي
الدك بابه خايب مايرد ** يتغنه بوصافه المجد
بروس الشدد يحصد حصد ** ماتهمه افكار وحشي
طبق الاصل راعي العلم   حيد الكفاله
تتراجف من اسمه الزلم   حيد الكفاله
معروف ابو جعفر ** عباس المصغر
راعي البساله
*****
مثل عين الشمس واضح    ايه ماينكرها حاقد
غيث والوادم صحاري   الخير بين جفوفه لابد
سيد وعالي مقامه   عالم وزاهد وعابد
مصحف ترتله الغانمه ** ابن الصميده و فاطمه
سجيل واكثر صارمه ** فارس وعالغيره قائد
مايسلم الضده ابد   لا لا محاله
ومَخَيب الراده سند   لا لا محاله
جفينه ممدوده  ** المايخلف وعوده
راعي البساله
**
كحل عيون البساله   ورفع راس الزود عالي
سيد محمد حروفه   بكل زمن نور ويلالي
اب حنون وكله رحمه   كمره ويضوي الليالي
سبع الجزيره والاسد ** ماتوكف بوجهه العكد
ماخسرت وربحت بلد ** حين قبلت بيه والي
بهاي المدينه الباسله   امبينه الدلاله
القاتلها هو يقاتله   امبينه الدلاله
نيمها باحضانه ** وعلاها من شانه
راعي البساله
**
العنده شده وبيها حاير   ومالكه واحد يحلها
خذت كل عافيته منه   وانكسر ظهره بحملها
خل يكصده بطيب نيه  بس ييدك بابه يحلها
باب الحوائج مرقده
ميخلي زاير وحده
كل الم بخته يهوده
هالسبع الله مسدده
شبل حماي الحميه **بنظره للشده يذلها
****
خادم اهل البيت عليهم السلام
الشاعر ( السيد هاشم قاسم سعود البلداوي )

قصيده بحق السيد محمد سبع الدجيل عليه السلام
*
سيد محمد يرفعة راسنه
ياشرفنه وعزنه يانوماسنه
ياوطنه والامان ** ياحمانه بكل زمان
يابو جعفر *** يابو جعفر
****
احنه يبن المصطفى ماعدنه غيرك
بكل وكت ياسيدي شابعنه خيرك
بالصغيره والجبيره نستشيرك
ياللي بس عباس اخو زينب نظيرك

يبو زود العالي والكلب الجبير
عاش كلمن جاورك عيشة امير
الك كل الامتنان ** ياحمانه بكل زمان
يابو جعفر *** يابو جعفر
****
حكنه باسمك نفتخر يابو المحنه
وألك فدوه نروح كل احنه واهلنه
سُنّه عدنه زيارتك يا احلا سُنّه
ومانبالي لو تصير الدنيه ضدنه
يختلف كلشي اللي عندك يالحبيب
منين ماننخاك النه تستجيب
عنه ميحجبك مكان ** ياحمانه بكل زمان
يابو جعفر ** * يابو جعفر
****
تشهد الايام فضلك والليالي
يظَلم الكون ويضل نورك يلالي
احنه حبيناك وعلَينه المعالي
الغالي تدري لو هوه يهواله غالي
ماعفتنه للزمن نصبح عبيد
طبعك المعروف هذا مو جديد
ياكيان الكل كيان** يا حمانه بكل زمان
يابو جعفر *** يابو جعفر
****
اكثر من امنه وابونه دللتنه
عالوفه والطيب والحب علمتنه
اكثر من البيه نحلم وصلتنه
ولليخون العشره ابد ماسلمتنه
النه سويت اللي ميمر بالخيال
اومنه صار يغار مولانه الدلال
وجفك ملانه حنان ** ياحمانه بكل زمان
يابو جعفر ** يابو جعفر
****
اعمه عين وكلب كلمن مايحبك
والمحمد يامحمد ماينسبك
يخسر المو عله شريانه يكتبك
ياسلام الله عليك وعله كلبك
على بابك يسجد الرايد فخر
تعطش الدنيه ويظل اسمك نهر
الممحي يمك يُستبان ** ياحمانه بكل زمان
يابو جعفر** يابو جعفر
****
يبو راس الحار ياراعي البساله
استحاله ننسه فضلك استحاله
انته مامحتاج ادله ولا دلاله
غصباً اعله الناصبك واهل النذاله
مثل عباس الكمر شايل صفات
جفك يذل الصعب والمعضلات
بيك ابد مايستهان **ياحمانه بكل زمان
يابو جعفر *** يابو جعفر
****
عليك ماتغله يبو الغيره المناحر
ياحمانه وياسندنه والمناصر
بالصعاب اليندبك متعوفه حاير
الوادم يسموك جبار الخواطر
مرقدك نور ويضوي بكل زمن
يابو جعفر واحلى من جنة عدن
واحلى من كل الجنان** ياحمانه بكل زمان
يابو جعفر*** يابو جعفر
****
انته عم اليملي هذا الكون عدله
كلمن يضدك اكيد ابنسبه خِلَه
بدمع زينب من يجيك علينه كّله
عله فراكه نون صرنه ونين ثكله
يمته يرجع من مغيبه ونستراح
وليل هجره ينجلي ويطلع صباح
كله ماان الاوان ** ياحمانه بكل زمان
يابو جعفر *** يابو جعفر
****
خادم اهل البيت عليهم السلام
الشاعر ااسيد هاشم قاسم سعود البلداوي
١٤٤٥ هجري

قصيده موشح بحق {السيد محمد سبع الدجيل}{عليه السلام}
****
مصيبتك سيد محمد مؤلمه
بجّت عيون اليحبونك دمه
****
هالمصيبه علينه موسهله ابد
والرفع هاي السماء بلا عمد
شيبت حتى الرضيع البالمهد
وناحت عليها السمه واهل السمه
****
من طحت مسموم وحدك عالترب
سيدي ومولاي وسفه وبالغرب
ودمعة الوحشه على خدودك تصب
طاحت بصفك تنوح الغانمه
****
والله من اتخيلك طايح تلوب
وجبدك امن السم يبو الغيره يذوب
امّدد ابين المصايب والكروب
لااخو يمك ولا يمك حمه
****
صعبه ابو الحض والبخت من يلجم
العيشه وحشه تصير بعده وتنعدم
والراواسي امن الفجيعه تنهدم
وتصبح الدنيه برحيله مظلمه
****
وانته شيخ الزلم ياسبع الدجيل
وفي وطاهر دومك اتعدل الميل
ليش ضيّك ينذبح بجفوف ليل
بفتوه من اهل السقيفه الظالمه
****
بلا ذنب سموك يابو المرجله
وكلها تعرف بيك ابن عقد الوله
ليش ماروت حقدهم كربله
والدمه السالت امن امك فاطمه
****
راح نوح عليك اكضيه العمر
والدمع ينزل عله مصابك جمر
منين اجيب منين لفراكك صبر
يوم فكدك يبو جعفر هدمه
****
شعدها مدري وياك اولاد الحرام
تعيش ماخلوك بالدنيه بسلام
عليك للمحشر يبن سيد الانام
تظل دمعاة المصيبه ساجمه
****
خادم اهل البيت عليهم السلام
الشاعر السيد{هاشم قاسم الداودي البلداوي}
١٤٤٥ هجري

قصيده بحق {السيد محمد سبع الدجيل}{عليه السلام}
****
يبو جعفر جرح فركاك * يظل طول العمر ينعاك
كسر يابو الوفه ظهري ** تدري بحالتي تدري
يظل طول العمر ينعاك
****
دمع مصيبتك مافارك خدودي
يالموتك هدم حيلي وكسر عودي
ذبلت يالحنين بهجرك ورودي
وداس الماتريده صبري وحدودي
اشعملت بينه هالايام * بينه ردت الالالم
وضاع بفركتك صبري ** تدري بحالتي تدري
يظل طول العمر ينعاك
****
كل اللي جنت بي احلم يبو جعفر
من عندي وكع ياخويه وتطشر
خلتني منيتك بالهوه اعثر
من دونك اعيش شلون مااكدر
ردت اكضي العمر وياك * موتي ولا الم بلواك
من بعدك شلي بعمري ** تدري بحالتي تدري
يظل طول العمر ينعاك
****
الدنيا بلا اخو ياخويه ماتنراد
الحلو كله برحيله من الجذر ينباد
جزع صبري بمماتك والدمع مافاد
كلما انه اريد انسه الحزن يزداد
صعبه تكطع الجيه * بانت فركتك بيه
وحسرات انترس صدري ** تدري بحالتي تدري
يظل طول العمر ينعاك
****
ياسبع الدجيل وداعت الخوه
يبو كلب الحنين وعشرة الحلوه
لو تدري رحيلك يالوفي شسوه
صرت كلي جرح وبناري اتجوه
علي تشهد نجوم الليل * اخذ مني الاجل ياحيل
حرت وتحيرت بامري * تدري بحالتي تدري
يظل طول العمر ينعاك
****
شترجه بعد من دهري وايامي
واللي جاي اليه اسود من الامي
لي هسه بعدني الشوفتك ضامي
دمعي والكلب لمصيبتك دامي
بكل رمشه الك تذكار * لو بيه تشوف شصار
يصيتي وهيبتي وقدري ** تدري بحالتي تدري
يظل طول العمر ينعاك
***
هذا انه اخوك الغيرك شعنده
تركته للحزن والنايبه وحده
وره موتك يضم ليه الزمن حقده
عني الجاي بعدك ياهو اليرده
خوتك خوة العباس * غيره ومرجله ونوماس
سند ضميتك الكُبري ** تدري بحالتي تدري
يظل طول العمر ينعاك
****
اخذ والله رحيلك كل شي من عيني
وحال تراب كبرك بينك وبيني
مدري شلون راح اكضيهن سنيني
وليالي الفركه تتسله على ونيني
واحد جنه موش اثنين * وين الكه مثيلك وين
كلك بالدمه تسري * تدري بحالتي تدري
يظل طول العمر ينعاك
****
خادم اهل البيت عليهم السلام
الشاعر السيد{هاشم قاسم الداودي البلداوي}

قصيده عكيلي بحق السيد محمد عليه السلام
****
سيد محمد راعي الغيره
****
عباس الثاني يلقبونه
صكار عداه يسمونه
من كل الكون يزورونه
شابع كل الوادم خيره
****
مايتوصف عزمه وزوده
بيرغ للعز وانشوده
الكلمن ضايع حكه يعوده
رفعت راس الطيب سيره
****
تشهد وكفاته وافعاله
ماتطفى انواره التتلاله
الينخاه يغير احواله
سكان الحك بيده يديره
****
عن زوده تسولف وكفاته
هوايه وماتنعد شاراته
سيد حيد وطاهر ذاته
متهمه جبيره ولصغيره
****
واضح مايتطمس دوره
كل ليل يضويه بنوره
من عباس الكافل صوره
ماواحد يعرف تفسيره
****
هيهات يخيب اليتعنه
ويدك بابه ويطلب منه
ينطي شماراد ويتمنه
ميعوف الينخاه بحيره
****
تحل الماتنحل جفوفه
شمس الله تنزل وتطوفه
عميه عيون اللي متشوفه
خسران الضيع تقديره
****
خادم اهل البيت الشاعر
السيد هاشم قاسم سعود البلداوي
١٤٤٥ ه

قصيده ميمر مقطع بحق{سبع الدجيل سيد محمد}{عليه السلام}
****
من اسالك وتوسلك متردني ابد شكراً الك
باب الحوائج الكاك كلما اطيح بشده
****
تارس عيوني وكلبي بالحنيه
واشواكي ماليها قصص ورديه
شما ردت تنطيني بلا منيه
نبع الوفه كلك دفه جفوفك سوالف هادفه
كلبي بحزن من ينضام شاراتك اللي تسعده
****
يابو المكارم خيرك مغطيني
يفرغني دهري وجودك اليمليني
ومن المخاطر سيدي تنجيني
مثل الشمس فضلك احس الهسه والجايني وامس
سرك حير هاذا الكون ماي وخيرك شيعده
****
سبع الجزيره المايوصفك واصف
وايايه بالشدات اشوفك واكف
منك كبل لاسامع ولاشايف
سيد وفي ماتنخفي نارك ابد ماتنطفي
يتباها بيك الديوان بابك ابد متسده
****
دلالك ابد ياسيدي ماتبرد
يبن الامام الهادي ضيوفك تشهد
بكد النجم شارات الك ماتنعد
انته الضوه وانته الهوه والشمس والكمره سوه
ياشيخ وتربات شيوخ الجايك محال ترده
****
كلك مواقف يافخر يانبراس
راسي نرفع بيك انت يارفعت راس
بابك وشباجك وعطرك ينباس
جود وعزم يابو العلم تاج اعله هامات الزلم
ياسيد محمد ولله هواي الحجي شيسرده
****
زينة الدنيه مكبعه بشاراتك
والفقره كلها تنعم بخيراتك
تحل العكد يابو الفرج نظراتك
الحبك ربح مصدر فرح للي بسهم هم نجرح
متخيب اللي ينخاك توكف وياه تسنده
****
خادم اهل البيت عليهم السلام
الشاعر السيد{هاشم قاسم الداودي البلداوي}
١٤٤٥

قصيده بحق استشهاد الامام {علي الهادي}{عليه السلام}
****
بعد يا دنيا الي شخليتي
خذتي روحي وخذتي شمعة بيتي
وين اروح بحالي وين*راح ابو كلب الحنين
****
دكليلي يا دنيه شعندج ويايه
خليتي دمعتي تنزل دمايه
انه الايه ابن ايه وابو الايه
اخذتي روحي انتي وشجرة فيايه
من اخذتي والدي وعفتيني
بين اه و اه عيشتيني
غربه راح اكضي السنين *راح ابو كلب الحنين
****
اليفاركله غوالي الدمعه شتنفعه
الليالي الحلوه ليش تعدي بسرعه
يضل بس الحزن و الونه والدمعه
العمر و بلا ابو يا دنيا شيجرعه
اليوم هو وبل امس سبع الدجيل
والنوايب زرعت بنص عيني ليل
بعد شيفيد الونين*راح ابو كلب الحنين
****
حاجيني يا دنيه بيا الم ننعه
اذا راح العزيز وندري شيرجعه
علي الهادي ابويه ودنيتي الوسعه
راح وظل ظلامي بلا ضوه الشمعه
هوايه احتاج الابويه هوايه
راية الله وصرت ادور رايه
والمعين بلا معين*راح ابو كلب الحنين
****
بعد حنيتة وين الكالي حنيه
ثوب من الحنان مفصل عليه
بامان اشعر اذا حط اديه بيديه
وانسه الالامي كلها شبيه ما بيه
روحي من الفرح جن طير و تطير
انه امير ولازم جفوف الامير
مو ابو الافاركته دين*راح ابو كلب الحنين
****
بني العباس منه ليش حرموني
وحزين اكضي العمر بخلافه خلوني
الف يا ريت اليه بداله سموني
اذوني شكثر بمصابه اذوني
انه ابنه الحسن نار فادي
ابد ما تطفه عله سم الهادي
واكضي كل عمري حزين*راح ابو كلب الحنين
****
الابن لو مات ابيه ينهدم بيته
وما يسمع بعد جلمات حنيته
وانه اليوم ابويه لكبره وديته
و تراب الكبر بجفوفي هليته
راح كلشي ونتهه بهاليله
راح اضل طول العمر ابجيله
هو جان العيني عين*راح ابو كلب الحنين
****
خادم اهل البيت عليهم السلام
الشاعر السيد {هاشم قاسم سعود البلداوي}

قصيدة بذكرى ٱستشهاد الإمام {علي الهادي} {عليه السلام}
****
عين التشوف احبابه*ماتت ٱبجرح مصابها
ٱشتنتظر يافرحه لتدگ بابها
****
عين ٱلتفارك غوالي تعيش وحشه
مثل ليل الشتا اللي مذبوح غبشه
ٱتموت موتة طير باكو منه عشه
ومايصحله جف يجي ويشيل نعشه
بغربه ٱليفارك روحه*تنعه اعله روحه جروحه
وتذب للشامت دمعته حجابها
ٱشتنتظر يافرحه لتدگ بابها
****
مو مصيبه شافت عيوني المصايب
شاب انه وشيبيت بشيب شايب
مات ابويه وشفت من بعده العجايب
اكعد وامشي وانام اعله النوايب
عالخد دمعتي ساجبه*وروحي اعله روحه ناحبه
المن احتارت توجه اعتابها
ٱشتنتظر يافرحه لتدگ بابها
****
بالامس فاركني اخويه وكسر ظهري
سيد محمد عضيدي وبيه يدري
خله دمع مصيبته اعله خدودي تجري
وكلت بلكي بوجه ابويه يكضي عمري
واليوم ابويه عافني*راده الاجل مارادني
ماتت امنيتي بونين اعتابها
ٱشتنتظر يافرحه لتدگ بابها
****
علي الهادي جان كلشي وجنت اشوفه
ليل دافي وشوكي واحلامي تطوفه
هو ابويه الغالي هو شلون اعوفه
وجرح نسيانه غميج بيش اروفه
الموت كون انحاسبه*مو بالدموع انعاتبه
شكثر منه اعزاز اخذ ماجابها
ٱشتنتظر يافرحه لتدگ بابها
****
العين عميه تصير من تفكد ضواها
من ظلام النوح تتنفس هواها
جمر ضيم النايبه يلهب وراها
وبالمكابر سكن بلسمها ودواها
ٱمصيبة رحيله ٱمصيبه*راح وبعد شيجيبه
العِشَكْ كاع المكبره وترابها
ٱشتنتظر يافرحه لتدگ بابها
****
والدي الغالي ابو روح الحنينه
الشال رحمة الله كلها ابين عينه
من صرت ما أسمع آهاته وونينه
كمت اسال روحي منهو المات بينه
كلي انتهيت بموته*من مات ابويه وصوته
وروح التصير المنيه صوابها
ٱشتنتظر يافرحه لتدگ بابها
****
الأقره جنت بعينه مستقبل حياتي
ٱدفنته بيدي و ٱدفنت وياه ذاتي
الأنحسد وياه جنت من امنياتي
فاركاني وبيه شمتت نايباتي
كلش عيوني خايفه*بالينتظرها عارفه
ٱليمها ظل بس الذي مو حابها
ٱشتنتظر يافرحه لتدگ بابها
****
خادم اهل البيت عليهم السلام
الشاعر السيد {هاشم قاسم سعود البلداوي}

قصيده موشح بمناسبة استشهاد{علي الهادي}{عليه السلام}
****
ظلمه سامراء هاي الليله
مات ضيها الي يعدل الميله
****
ظلمه صارت والعويل بكل مكان
ولبس ثوب الحزن هالليله الحنان
والمصيبه ضيعت حلم الامان
والصبر نايبته هدت حيله
****
علي الهادي طاح مسموم الجبد
بجف غدر متروس باثام الحقد
عبدلله المايصح مثله عبد
طاح والونه وسف ترتيله
****
مصيبته شيبت عرش الله العضيم
شسوه بي وشعمل ياحيف الزنيم
ينولي صعبه الكريم من اللئيم
كلشي ياخذ منه ماينطيله
****
الهادي ابن المرتضى عقد الوله
عله مصابه عيوني كون اهملها اله
وون ون عليه مثل ون كربله
دمعي ميكفي عليه ابجيله
****
عله همه بجت من دم السماء
ونصبت الاملاك لمصابه العزاء
الجان مالي الناس احساس ووفاء
للكبر هاي المسيه تشيله
****
يعين الله بهالمسه ابنه الحسن
اشلون شد عليه ماأدري الجفن
بعد مثله وين يلكاله وطن
يرد عنه الراد بيه العيله
****
المثله الف ياحيف ينضم بكبر
وبلنياح تصير خاتمة العمر
ابو البيت البيته ميعود ويمر
هوايه صعبه وهاي حيل ثجيله
****
عمت عيني عليه سموه بالغرب
والنواصب علنو عليه الحرب
شاب من مصابه واهواله الكلب
هاذه ابن حامي الحمه ودخيله
****
خادم اهل البيت عليهم السلام
الشاعر السيد{هاشم قاسم الداودي البلداوي}
١٤٤٥هجري

قصيده كعديه بمناسبة استشهاد الامام علي الهادي السلام

‎هاي دون المصايب المتني
‎سهرتني نوايبها وحنتني
‎ذبحت من الكفه روحي والها مايستجن نوحي
‎بسهم جاتل رمتني وصوبتني
*
‎هالمصيبه ونايبتها الكسرت نصين ظهري
‎كلشي اخذت هي مني وعافت دموعي اللي تجري
‎تعبتني وذبلتني وشعلت بنيران صدري
‎يبست وردات الامل والضوه بنص عيني انجتل
‎من دنه من للهادي الاجل ويه روحه اخذ عمري
‎هو ابويه وضوه عيوني ومناها
‎الدنيا هاذي بعد عينه شوراها
‎مابقه كل خير بيها ولادليلي يحن عليها
‎بعد موت الهادي للهم سلمتني
****
‎عاش عمره شلون عيشه من المصايب للمصايب
‎فرحه ماشاف بحياته يكعد ويغفه بنوايب
‎سنينه بالحسره كضاها بسن شبابه وصار شايب
‎مغوركه عيونه بدمعته زلام العده مارحمته
‎نجوم الظهاري راوته مايحبونه النواصب
‎سكنوه ياالف حيف بخرايب
‎بعيد عن اهله ووجوه الكرايب
‎للغرب اجبار ودوه والبغض فوكاه صبوه
‎لوعتني همومه ونحلتني
****
‎جانت الايام تمشي وحال ابويه يسوء اكثر
‎من السلاطين اللعينه اتعذب اتلوع اتمرمر
‎تكبر سنينه الشريفه وجان حزنه وياه يكبر
‎من الالم لاصبحه صبح والليل لو مر ينذبح
‎مثل الذي بظهره رمح وبالدليل يبات خنجر
‎بعيني شفته ودمع عينه يتهاله
‎وبانت آلامه واحزانه بخياله
‎هذا حاله اكبالي اشوفه وياجرح مدري اروفه
‎شاب لسه وهمومه طيحتني
***
‎سجن تضيك وملامه والدي خلص حياته
‎لحظه مانشفت دموعه يبجي ظل الحد مماته
‎الجبل مايحمل همومه ثجيله جانت نايباته
‎اذته الظلام شكثر للفعل ماعدها عذر
‎بجه دمه عيون الصبر وفرحت بحاله الشماته
‎جان مايشتكي بس الصلاته
‎لله يحجي ويسولف امنياته
‎ياهو العليه التماده وكفر باياته ووداده
‎السلِبت ابنة محمد سلبتني
****
‎بعد ذاك الويل كله ماطفت نار الاعادي
‎اتعنته بليل المنيه ويتمت شوكي وودادي
‎طفت انواره الزهيه وطاح غدرا علي الهادي
‎فطرت كلبي النايبه ودمعاتي عالخد ساجبه
‎وكل امنياتي لاهبه وصرت وحدي اصرخ وانادي
‎راح ابويه وبعد ياهو اليجيبه
‎لادوه يصحله ومئيس طبيبه
‎للكبر راح بدموعه ونار ملتهبه بضلوعه
‎ساعة افراكه عن بيتي سبتني
***
‎غمضت عينه بديه وسبلت ايده بنحيبي
‎والدي وروحي وشمعتي واغله كل ناسي وحبيبي
‎انحرم من وكت منه قسمتي هايه ونصيبي
‎هليت فوكاه الترب بيديه والمدمع يصب
‎وظليت وحدي بالغرب احترك كلي بلهيبي
‎ضاكت بعيني من بعده الوسيعه
‎وكلشي ماخلت عليه الفجيعه
‎وين اروح بهالرزيه وهو ياهو الظل اليه
‎وصرت ماشوف نوايبها عمتني
****
‎صوت اسمعه يصيح باذني يالحسن شو صرت وحدك
‎حاير بهمك وحزنك والدموع مغطيه خدك
‎راح ابوك الجان كلشي وهسه ماظل كلشي عندك
‎يالحسن ياهو الظل الك راح اللي جان مدللك
‎واغله شخص جان بهلك بلا ابو هالدنيا وحشه
‎وتصف دوم ويه اليضدك
*
السيد هاشم قاسم سعود البلداوي

هوسات بحق الامام امير المؤمنين علي بن ابي طالب عليه السلام
*****
شك حلوك حيدر ويه شك البيت
بيه حكي ترا شما كلت وشغاليت
بفخر عالدنيا كلها بسيدي تباهيت
وهنيالي بحيدر هنيالي
****
ابو الحسنين اميري القلع بيده الباب
ناصر دين الله وهازم الاحزاب
ينعاب الزمن بس هو ماينعاب
يلقبونه بالموت الحتمي
****
فوك الكل تعاله بزوده راعي الزود
ابولحملات هاذا الماتحده حدود
نطاه كلشي الاله الخالق المعبود
سكان الكونين ابأيده
****
وعلي البايع علي للموت مايخسر
وعلي هوه الشفيع ابساحت المحشر
وعلي هوه العقل والكلب والابهر
ويدور الكون بجفينه
****
علي اول خليفه اتنصب من الله
امير عله الخلك رب العله ولاه
مد جفينه اله وفوك البشر علاه
نتباها مو حكنه بهايه
******
متهمنه الشماته تكول لو متكول
معقول الامر لوعدها مامعقول
افظل من علي بس النبي المرسول
سادتهم فدوه يروحوله
******
يكفرونه ويذبحونه ويسيل الدم
علي منعوفه ابد والماقبل يحلم
نثبة عالولايه وابد مانهتم
قران وتحيينه اياته
******
علي يبقه الامام انقدسه ونطيعه
ونبيع الدنيا كلها وعلي منبيعه
بكل صبح ومسيه نجدد البيعه
ونموت احنه ونحيه وياها
******
محمد يشهد النه ويشهد المهدي
الوديان وجبال وهور والبردي
شما صبح زمان علينه لو يغدي
خدامه انظل احنه وشيعه
******
حبنه مايموت ولايموت الصوت
بعلي نهتف نظل وحك علي للموت
نسحك عاليضده وعالمنايه انفوت
ومندنك هام العدوانه
*****
مثل السعفه يرجف مني عدواني
اسد علساتر بكل وكت يلكاني
مادام انه عندي علي السسيتاني
يازلمه اليوصل لحدودي
******
حشد عندي زلم والله وزلم نيبه
تفرض من تريد الهيبه عالهيبه
بحلك الموت حكنه لو هو تجيبه
متهاب الموت اهل الغيره
[الشاعر السيد هاشم قاسم البلداوي ]
١٤٤٥هجري

قصيده بحق امير المومنين عليه السلام
عنك شرد اسولف يالمخرس الليل
يالمحير اليحبك واليضدونك
يالمسكت حلوك. الموت خايف جان
منهم يقترب ويلوذ بمتونك
من تدخل حرب يتزلزل الميدان
الإنس والجِنه جانو مايصدونك
يم سيفك اليدنه ينقسم نصين
والفارس يطيح بخزرة عيونك
بطل وكت المزامط علي ماتنقاس
السمه والكاع حيدر مايحدونك
واذا عالطيب اسولف انحنيلك كون
تبجي جيوش والفقره يبجونك
خيرك جان شابع حتى اليكرهوك
تشبعهم جنت وتبوس ماعونك
وتبات بلا عشه واطفالك ٱيونون
وتتبسم جنت والكل يشوفونك
متحير شوصفك ياعلي الكرار
وياجلمات اجمعها ويوصفونك
انت الأنبياء والرسل حارو بيك
بس الله ومحمد علي يعرفونك
**
الشاعر | السيد هاشم قاسم سعود البلداوي