قصيده موشح بحق السيده زينب عليها السلام
****
صعب حيل اعله البشر يوم الاجل
ويصعب اكثر عَلّي ماعنده اهل
****
والله مدري منين ابدي بالحجي
على بالي صور كل شي ماتجي
اخذ مني الحيل والبال البجي
وشمسي غابت والكمر نوره افل
****
اصفن وحسباتي يم زينب تروح
وتصب حسراتي ملح فوك الجروح
كون مو بس ابجي وعليها انوح
كون اون ون ينضرب بيه المثل
****
دنه ليها الموت بديار الغرب
ونايبتها الشيبت حتى الكلب
لا اخو لا ابن لا مدمع يصب
مأيسه مضلومه ماعدها امل
****
موسده على القبله بنت الطيبين
وعينها تتلفت يسار ويمين
يدك بلكي الباب ويفوت الحسين
اتشوفه اخر مره رادت عالاقل
****
تموت مرتاحه بعد ذاك الحزن
ونوحها الماهده يهده ويستجن
وتشفه كل جروحها من تندفن
بشوف وجه حسين مايبقه وجل
****
عدل لو بعده ويشوف ام الخدر
يحترك كلبه وعليها وينفطر
واكثر من الطف ضلوعه تنكسر
من يشوف عله العزيزه الي حصل
****
اشد من جروحه ومصاب العطش
واشد من جسمه العلى الغبره نفرش
من يشوف اخته غريبه على النعش
يموت موت الي الف مره انجتل
****
زينب الجانتله اعز من الهوه
واغلى من عيونه واغلى من الضوه
بالغرب معلوله ما الها دوه
مو دمع دم على حال اخته همل
****
ياحلاها من يطب ويه الكفيل
حسين ابن حامي الحميه والدخيل
تنسه زينب كل حزنها والعويل
وتبره من البيها وتطيب العلل
*
خادم اهل البيت عليهم السلام
الشاعر السيد هاشم قاسم سعود البلداوي
١٤٤٥هجري

قصيده بحق زينب عليها السلام
****
مناطرين .. انه وشواكي ودمع عيني سوه
مناطرين ..وعلى حالتنه بجه حتى الهوه
حملي مطروح ** تبجي الجروح
وعلى حالتنه بجه حتى الهوه
****
على فراش الموت ودموعي جريه
ابجي ومضيعه الذي يبجي عليه
بعيده عن اهلي وقريبه من المنيه
وانه غير دموعي شنهو يصح بديه
والعيون .. تمنت تشوفلها لو واحد يجي
والعيون .. وتنسه ضيم الماضي وهموم البجي
وصوتي مبحوح ** تبجي الجروح
وعلى حالتنه بجه حتى الهوه
****
لااخو لا اب و لا ام بقو عندي
لا كرايب لا اهل لا يمي ولدي
قسمتي بالدنيا هاذي وهذا وعدي
عشت وحدي وراح اموت اليوم وحدي
مدري ليش .. هالمصايب كلبي دوم اتعذبه
مدري ليش ..حتى يوم الموت اموت بنايبه
دمعي مسفوح ** تبجي الجروح
وعلى حالتنه بجه حتى الهوه
****
اه يزينب ماكو اليصيحون يمي
زيدت بيه المصيبه وزاد همي
مناطره ومدده للموت جسمي
بلا اخو لا ابن يصرخ ماتت امي
والدموع .. عله خدودي طايحه من الحزن
والدموع .. تجري من عيني وعله مصابي تون
الحزني والنوح تبجي الجروح
وعلى حالتنه بجه حتى الهوه
****
انه حسبالي بمنيتي تهده الالالم
وبعد ذاك الحزن عيني تغفه وتنام
انسه ضيم البيه كله وذيجي الايام
وبعد ما تلجمني صورة حرك الخيام
يا حرام.. يا وسف زادت عليه محنتي
ياحرام .. والمواجع ضاعفتلي مصيبتي
شوفي مشبوح تبجي الجروح
وعلى حالتنه بجه حتى الهوه
****
روحي من تطلع منو يغمضلي عيني
ينوح ياهو وياهو الي يسبل اديني
بيا وجه ارتاح من نوحي ونيني
وانه ماظل عندي الانتظره ويجيني
نايمين .. عزاز كلبي ياوسافه بالترب
نايمين .. بالغرب وانه انتظرهم بالغرب
ذابت الروح تبجي الجروح
وعلى حالتنه بجه حتى الهوه
****
ادري بالعباس اخويه كله غيره
حاشه ما يقبل اطيح بهيجي حيره
مرتين امشي ميرضاها اسيره
عليه هاي هواي وعليه جبيره
منه اريد .. يشيل نعشي ويرد بيه الكربله
منه اريد .. هناك يدفني واموت مدلله
بعطره اليفوح تبجي الجروح
وعلى حالتنه بجه حتى الهوه
****
العزيز شتسوه عزته بلايه اهله
عاليالي والدموع يصير عله
ينسه عيده والونين يصير خله
وصبر صبره يجزع بساع ويمله
من يموت .. عين مايلكه التصب عليه دمع
من يموت .. مايصح اعله الكبر يشعل شمع
شوكي مذبوح تبجي الجروح
وعلى حالتنه بجه حتى الهوه
****
لخادم اهل البيت عليهم السلام
الشاعر السيد هاشم قاسم سعود البلداوي

قصيده نزله بحق السيده زينب عليها السلام
****
يالعقيله يلعقيله
يالعقيله يلعقيله

يمفخرة البطوله يلعقيله
فخرج من ينوله يلعقيله
يتربات الحموله يلعقيله
يالمحيره الرجوله يلعقيله
من يصلها من يصلها
الج كومة مواقف من يصلها
منو المابيها عارف من يصلها
شهد بيها المخالف من يصلها
شيخه وبت مضايف من يصلها
والصميده والصميده
شرف انتي واميره والصميده
فخر كل العشيره والصميده
بعين الكل جبيره والصميده
الشدد يمج زغيره والصميده
كل شموخج كل شموخج
وحك راس ابوفاضل كل شموخج
عله فوك المراجل كل شموخج
بنت واخت البواسل كل شموخج
اكيد من الله نازل كل شموخج
هيبه انتي هيبه انتي
نجوم السمه تشهد هيبه انتي
ابد ميشبهج احد هيبه انتي
العلى باسمج تمجد هيبه انتي
زينب بت محمد هيبه انتي
غيرة الله غيرة الله
يبت حيدر حجابج غيرة الله
مكتوبه على بابج غيرة الله
ذهابج وابأيابج غيرة الله
وبجت دم المصابج غيرة الله
للثريه للثريه
وحك القتل مرحب للثريه
صعد اسمج يزينب للثريه
مثل بلعفه يضرب للثريه
شموخج انتي مذهب للثريه
كبريائج كبريائج
نفس حامي الحميه كبريائج
يذل كل ال أميه كبريائج
يضوي الدنيه ضيه كبريائج
سحك عالناصبيه كبريائج
للمنيه للمنيه
نظل نصيح باسمج للمنيه
قسمنه بضلع امج للمنيه
خدم كل احنه يمج للمنيه
شرف النه نخدمج للمنيه

خادم اهل البيت عليهم السلام الشاعر السيد هاشم قاسم سعود البلداوي
١٤٤٥هجري

قصيدة القائيه بحق السيدة زينب ( عليها السلام )
*
زينب من اذكرج واجب ابجي دموم
اقرالج فرح مولاتي ما اكدر
شتصور فرح من شافج الكرار
عله راسه لطم من شافج اتصور
شافج بالمهد وبعينه جان يشوف
مصايب كربلاء ولوعة المنظر
وعلى كصتج كتب ام المصايب هاي
مثل امها الزجيه الطاهره واكثر
ولاتبجين كلج ضمي هالدمعات
تنتظرج دموع هواي عالمنحر
تنتظرج يتامه بظلج يلوذون
ويم خدرج يزينب تحتمي الخدر
وانتي الوحدج لا اهل لاخوان
لافزاع عنج يدفع العسكر
ثيابج تحترك ومتونج مورمات
وخيام الشرف بالنار تتوجر
زينب والصراخ يفزز الميتين
كلشي بمسه العاشر غاد يتغير
اخوتج واهل بيتج كلهم يموتون
ولحمهم عالرمال الصحره يتطشر
وحبال ونياك وضيم يردف ضيم
وعليج الماله دين هناك يتأمر
وتتفرج عليج الكوفه واهل الشام
يشتم بيج ذاك وذاكه يتنمر
يزينب شرد اسولف والكلام هواي
ماناسي الجرالج زين اتذكر
لذلك يالعقيله بمحنتج احتار
واشب بنار كُلي وكلبي يتفطر
يبنت المصطفى يابضعة الكرار
بيج من ارد افكر دمعي يتفجر
دورت بحياتج فرح شو ملكيت
لكيت الفرح نفسه عليج يتحسر
لذلك مايهمني الكال والماكال
اكتبلج فرح مولاتي ما اكدر
****
خادم اهل البيت ( عليهم السلام )
الشاعر ( السيد هاشم قاسم سعود البلداوي )
1445هجري

قصيده نزله بحق{موسى ابن جعفر}{عليهم السلام}
****
باب الحوائج للموت ماننسه يوم مصابه
****
ماننسه والخمسه سادات البشر
والتسعه والسبعه والشمس وكمر
بالحسره بالعبره وبليل السهر .
ولوعاته ودمعاته الون الها الصخر
نايبته شعلت نيران ماتنطفي لهابه
****
اذانه وخلانه بس نبجي ونون
مانشفت لاجفت دمعات الحزن
وناته واهاته لا ماتستجن
موضوعا بموضوعا من سجن السجن
موطن وبيت وعنوان صار السجن محرابه
****
لااجرم لااظلم لاعنده ذنب
من الناهب والناصب حقه ينسلب
اياما كدامه ظلماً تنصلب
افكاره وانواره منهلهن عذب
فَضَله رب الارباب ايات اله بكتابه
****
ويانه وبدمانه تسري محبته
ونتنه وحسرتنه كلها لونته
مانهتم بلي ذم والما رادته
منساوم ونقاوم ناس العادته
المايرضه نتعنا عليه ويانه طب بطلابه
****
نهديله ونبجيله مو دمعه دمه
مسفوحه للوحه وحك حامي الحمه
لجروحه ولروحه والهالمظلمه
عين الكل من تمل كون الها العمه
هاي مدامع والله الابن نبي سجابه
****
بالمجلس من نجلس كل احنه سوه
وحك جده السم جبده نصير احنه دوه
الالامه وحلامه نتناثر ضوه
بلامنه نتعنه نسد حتى الهوه
غصبن على الميقبلون نحضر وننعا غيابه
****
خادم اهل البيت عليهم السلام
الشاعر السيد{هاشم قاسم الداودي البلداوي}

قصيده نزله بحق الامام{موسى ابن جعفر الكاضم}{عليه السلام}
****
ياسيدي ياسيدي ياموسى بن جعفر
ياسيدي ياسيدي وياك للمحشر
****
شيعتك تدرينه عالحب تربينه
وقعنه بدمانه عشرتنه للموت
عايش نبض بينه. نورك يوالينه
صوت بضمايرنه مايعتليه صوت
خدامك واحبابك ياسيدي انصارك
وفايه وكفايه ماتنسه ابد ثاره
طول العمر. طول العمر وحسين للمنحر
****
يااغله كل غالي يااول وتالي
ماينوصف حبك لاولله هيهات
نبض الكلب انته ياسيدي وجنته
مرقدك قبلته والدكته دكات
ياهوه للريه يابلسم لبلسم
من دونك مايسوه بالعيشه ماينعم
انته الامل انته الامل والنبض والابهر
****
مثل السمه خيرك هوه انته مو غيرك
للسمه ولارض ماليها اشواك
شمسك شمس غيره هل كوكب تنيره
موصدف تتلاله هيج انته محلاك
نتغنه بحروفك ياجنة الجنه
انوارك واياتك للمنهضم حنه
يبن النبي يبن النبي. والنبأ والكوثر
****
الناصبك وينه افكاره وبنينه
سلطته هيبته ماالهن مجان
اي ذكر ماعنده. لاهو لاولده
لافكر ينذكر مضله عنوان
وهاذه انته يالكاضم عالسمه تتعاله
ياموسى ابن جعفر عنوان يتلالا
مثل الكمر مثل الكمر . احله بعد وانوار
****
السم جبدتك بيده مو هاذا ليريده
حسب بموتتك تنسي الملعون
من كبره لويطلع وصد كبتك تلمع
ينصدع من يرد للدنيا هارون
يالكاضم لو شاهد زوارك بعينه
هالناصب هالحاقد ثق يكفر بدينه
هالناصبي هالناصبي هالوغد والاذعر
****
من حكنه نتباها يبن علي وطه
يافخر والفخر من عندك يغار
حبينه افعالك دم نبجي الحالك
للاجل منعوفك انصارك احرار
تعلمنه من عندك هالصبر والهمه
كل شيعي للمحشر باصملك بدمه
لزيارتك لزيارتك تمشي متتاخر
****
خادم اهل البيت عليهم السلام
الشاعر السيد{هاشم قاسم الداودي البلداوي}

قصيده موشح بحق الامام{موسى ابن جعفر الكاظم}{عليه السلام}
****
ياصبر عندك ياامام الصبر
وبالهضم والضيم كضيت العمر
****
اشفت من عمرك يبو طلبه اشفت
وانته بين الغربه والحسره عشت
مدري جم موته كبل موتك متت
والعسر عندك فلا مره اليسر
****
انته روح المصطفى وسابع امام
السلام انته ولا عشت بسلام
عذبوك بلا سبب ولد الحرام
لاذنب عندك ولاعدهم عذر
****
دورت عن فرح يمك مالكيت
وين ماامشي اشوفك دم بجيت
عشت وحدك المن الهمك شكيت
وجان غير الحزن يمك مايمر
****
كضيت ايامك غريب وبالسجون
لاكرابه لاحبايب لابنون
عالنوايب تكعد وتغفه العيون
وكلبك الطيب احر من الجمر
****
امكيديك وحالك يبجي السمه
سيدي ومن كل كتر تنزف دمه
ويشتمون كبال عينك فاطمه
هاي كسره الي ابد ماتنجبر
****
على حسين تنوح من يعطشوك
وعلى زينب تون من يكيدوك
يعينها الله تصيح من يشتموك
ودمع عينك على وجناتك يدر
****
السجن والسندي نفس زجر وشمر
النهج واحد جانو ونفس الفكر
دينهم دين المذابح والغدر
هذا واقع حال ابد ماينعبر
****
الف لعنه على هارون اللعين
بالسجن خلاك ايام وسنين
ونته بن حيدر امير المؤمنين
قطعاً ويه بليس باجر ينحشُر
****
غير جتلك جان كلشي مايريد
سمك وللجسر شالوك العبيد
فتوه هذا الباغي ماخذ من يزيد
كفر بيك وآمن بدين الكفر
****
لعنت الله عليه كل صبح ومساء
فجع بيك اهل الارض واهل السماء
على عناده نقيم الك هاذا العزاء
وزحف نتعنه ونجيلك للكبر
****
بجت دم عليك عين الرافضا
لرُفض نهجك يبو طلبه أتناهضا
نبقه لمصابك نون يابو الرضا
لحد ما النه يرد راعي الامر
****
يرجع النه ويزرع دروبك ورد
بذن الله ابو صالح من يرد
يبيد كل الحقد والحك يسترد
عله نار الشوك كلنه ننتظر
****
خادم اهل البيت عليهم السلام
الشاعر السيد{هاشم قاسم الداودي البلداوي}

قصيدة بحق الامام{الكاظم}{عليه السلام}
****
بالكاظميه ** ويلي شرزيه
الكون نصدع * بيها نفجع * ويلي شرزيه
****
هالمصيبه البجت عيون السماوات
وناح عرش الله عليها وكل الايات
صعب ماينسي همها ابد هيهات
موسى ابن جعفر الصادق بالسجن مات
بالغربه وحده ** لااهل عنده
يدمي الكلب * كلش صعب * يهل الحميه
****
كضى كل عمره غريب ودمعه يجري
وناره ظلت للمنيه بصدره تسري
على مصابه لو اكضي سنين عمري
انحب عليه واللطم يكسرلي صدري
وليلي ونهاري ** ماتطفه ناري
مايستجن * بيه الحزن* لاولزجيه
****
ضيمه مامر عالوجود وشافه انسان
ابو طلبه للحزن صار اسمه عنوان
مات مثل حسين وحده وعلى التربان
لا مناصر لامعين بين عدوان
هاي المصيبه ** كلفه ورهيبه
عاش بظلم * مات بهظم * شبل الحميه
****
اشسوه ببن المصطفى وشعمل هارون
بجى دم موسى ابن جعفر من العيون
ياذنب عنده ورماه بنص السجون
وعيشه بضيم اليشيب رمش الجفون
مارحم حاله ** ونسبه وخصاله
بدينه كفر* سم وغدر*ابن الدعيه
****
جيوش عنده اللي تحقق امنياته
وبالقصور العاليه خلص حياته
شعنده جان الكاظم ورايد مماته
وحيل جان يخاف من صومه وصلاته
سلاحه سبحته **والدرع عمته
غيرة علي * عنده الولي* وسيد البريه
****
جان بيه يشوف اوصاف الصميده
وسبحته جن ذو الفقار اتكول بيده
لله يدري لو دعاه ورفع ايده
خيبر ابغداد ابو طلبه يعيده
ميرد دعوته ** ربنه وطلبته
وراعي العلم*يمطر حمم*عالناصبيه
****
اجه امر الله واخذ مولانه للبين
ومات مسموم الولي ودموعه بالعين
دين يطلبنه الامام ونوفي هالدين
اله نبجي عليه مثل مانبجي لحسين
للمات مسموم**دم نبجي كل يوم
هذا العهد*دوم وابد*صبح ومسيه
****
خادم اهل البيت عليهم السلام
الشاعر السيد{هاشم قاسم الداودي البلداوي}

قصيده موشح بحق{ابو طالب}{عليه السلام}
****
الله بالقران نزلها ويكول
العم ابو ولله يصحاب العقود
****
وابو طالب شهم من نسل الكرام
صار للهادي ابو عم وسلام
ينام جان وهو يسهر ماينام
قدم سنينه فدائاً للرسول
****
موقفه ماينسي لا مستحيل
هوايه صار بزمن بي كلش قليل
اليوكف ويه المصطفى وللحك يميل
وماسمع حجي الملامه والعذول
****
للنبي دك صدره كله مايلي
عله جتافي تصير يبني وتعتلي
وفه وكفه الحيد ابو حيدر علي
وفي وللحك والعدل دومه ميول
****
وكف ضد الكل ولاخاف العدد
حزام ظهر المصطفى وعون وسند
الموت كال اهون ولا خون العهد
ولا اسلم ابن اخويه للقتول
****
الدين ليهسه مدين الوكفته
أَمَن بدين النبي وشد رايته
يصون رحمه ودينه جانت غايته
نقطه بيضه وكفته لا ماتزول
****
ابو طالب فخر كل المسلمين
فده بجاهه وروحه واهله والبنين
فضله ماينساه عند العالمين
والمواقف تشهد وناس العدول
****
مثل شمس الصيف لامع بالسمه
والنعم من عنده راعي الموزمه
هو البظهره علي حامي الحمه
بكيفه عالعدوان ابو الكلفه يصول
****
ابن سادات العرب هالهاشمي
بظهره جان الدين كله يحتمي
المايشوفه كلبه وعيونه عمي
يرعب بصيته العساكر والخيول
****
مايهمنه عنه شيكول اللئيم
الكفره هذه ابن باغي وزنيم
ابو طالب زلمه ياشيعه عضيم
الجبل والوديان تشهد والسهول
****
عالي شانه هواي واحنه نقدسه
الشرك للطاهر ابد مينجسه
للبواسل قدوه دومه ومدرسه
الدنيه ماتنسه مقامه شما تطول
****
خادم اهل البيت عليهم السلام
الشاعر السيد{هاشم قاسم الداودي البلداوي}
١٤٤٥هجري

قصيدة گعدية للإمام {موسى الكاظم}{عليه السلام}
****
يامسجون المثلك چان من صيته ٱيخاف الحاكم
بصبرك وحّدت الأديان من صيته ٱيخاف الحاكم
بالگيد حررت الفكر * بالگيد دومك منتصر
من صيته ٱيخاف الحاكم
****
عنك ٱمنين ٱبدي ٱسولف حاير ٱحجيها ٱبأمانه
ٱمنين ما فكر أشوفك إنت أكبر من مكانه
صبرك المنهاجه ثوره ٱوفكرك أكبر من زمانه

تتحده أفكار الظلم
يمك الأعوج ينتظم
و الما يريدك ينحرم
من لطف الله ٱوجنانه

لليوم ٱتخاف الحكام إسمك يابو الحريه
ويهد ٱعروش الظلام إسمك يابو الحريه
للّيل آياتك بدُر * بالگيد دومك منتصر
من صيته ٱيخاف الحاكم
****
وحدك ٱبطاموره ظلمه أو مايمر الضوه يمك
ٱجروحك ٱتخوف السلاسل ويرسم الحريه دمك
وصوت آهاتك يدوِّي أو صگِر يِصْگُر باليظلمك

ٱمن ٱونينك ٱتخاف العده
ٱو عرش الطغات ٱتهدده
ٱو ٱهل الكراسي الحاقده
كل وكت يرعبها إسمك

آيات ٱجروحك قرآن شامه ٱبوجنات الذمه
ٱمن الذِّل ٱتطلع الإنسان شامه ٱبوجنات الذمه
مازال إنت ٱو تستمر * بالگيد دومك منتصر
من صيته ٱيخاف الحاكم
                    ***
ياسجين الچان گبلك صوت ماينسمع صوته
ساكت ٱو عايش الوحده ٱو يرعب الظالم سكوته
إجيوش و ٱعداد و عساكر كلها ترجف من نخوته

ٱبصبرك چنت يابو الرضا
نهج الكراسي ٱتناهضه
ٱستبداده دومك ترفضه
ٱودومك اتحث الصحوته

ٱو توگف ضد الميقبلون و ٱعداء الإنسانيه
ٱو صارو رب ٱو ينعبدون و ٱعداء الإنسانيه
كل يوم تطعن بالغدر * بالگيد دومك منتصر
من صيته ٱيخاف الحاكم
****
إنت مثل حسين نهجك رايد ٱتحرر فكرنه
مانطخ للكرسي هامه ٱو ماندك للذل صدرنه
إبدين الٱستغلال نكفر ٱو أبد منضيّع فرضنه

بس للأسف يبن النبي
سلمنه أمرنه الأجنبي
و الشرف صار ٱبلا عبي
أو صرنه ما ندري بأمرنه

نكره گمنه اللي ٱيصلون ونذم اليدخل جامع
ونحب البالله يكفرون ونذم اليدخل جامع
والجاي أسوء ننتضر * بالگيد دومك تنتصر
من صيته ٱيخاف الحاكم
****
وٱحنه چيف ٱنحبكم ٱحنه أو ماقبلنه بيوم بيهم
عيِّرونه ٱو حاربونه ٱو ماسلمنه من ٱديهم
كُرُه كُرهونه ٱو حياتك چَنه چتالين ٱبيهم

چيف بنهجكم نقتدي
لانكره ٱو لا نعتدي
ينتهي ظلم ٱو يبتدي
ظلم آخر من وليهم

كل همهم بينه ٱيسقطون گدام الغير ٱتذلنه
ٱو حگك من عدنه ٱيغارون گدام الغير ٱتذلنه
وياك نبقه للحشر * بالگيد دومك منتصر
من صيته ٱيخاف الحاكم
****
مثل عن هيئتنه أضرب يا بو طلبه يا ولينه
الما تحبكم شنهو تعمل أو ظلم شيسون بينه
گاع شافونه ٱشترينه گلبوا الدنيه علينه

و ٱمصابك ٱو كسر الضلع
أحچيلك ٱو لا تنفجع
لامونه حته ٱعله الدمع
ٱو يستهِزْءون ٱبچينه

چي تبچي ٱعليكم مولاي حاربو هاي الهيئه
شحچيلك و العندي هواي حاربو هاي الهيئه
و بهاي إحنه نفتخر * بالگيد دومك منتصر
من صيته ٱيخاف الحاكم
****
خادم اهل البيت عليهم السلام
الشاعر السيد{هاشم قاسم الداودي البلداوي}
8 - 2 - 2024 ميلادي
27 - رجب 1445 هجري

قصيدة بمناسبة ولادة الامام العباس هليه السلام

ها يم البنين انولد عباس
اخوي البل شدايد بي اشد حيلي
تانيته اشكثر يايمه والله
هيمني انتظاره ومانمت ليلي
مشتاكه ارد اشوفه وداعة حسين
مايرتاح شوكي وعنه تحجيلي
حجالي عليه حيدر يم البنين
وعن اوصافه كلي وشنهو ينطيلي
خليني ارد اشوف عيونه  حلوات
عليج الزهره يم الوفه سهليلي
احله من الكمر مو بله بضعاف
ماشايفته بس حافظته لكفيلي
اذا يمه انولد كليله عل الباب
اختك زينب وشوفي شيسويلي
يكطع اكماطه بيده ويعتني اركاض
وفي كالولي ميضيع تفاصيلي

حافظني كلش   زين يايمه اخويه
ماينسه لاحاشاه.  هذا ابن ابويه

اي يمه انولد عباس العضيد
اجه الباجر ييمه يصير كفالج
عشر اقمار يم اوصافه تضيع 
عنده اوصاف ابني تفوق لبالج
من ارسومه قريت يحبج هواي
عرك من سمع صوتج يمه ونفاسج
انتفض من سمع بسمج وارتعش عباس
ظل يرعد رعد من شاهد خيالج
شاط من الغضب واشتعل نيران
يدري بضيم كلبج چنه واهوالج
اي كطع اكماطه ودمّعت   عيناه
ودنك مستحه من صرت انه كبالج
هاج اخذي يزينب خله يرتاح
ابو جفوف الكريمه اليرسم امالج
مشتاكتله انتي وهو مشتاك
ادري بشوفته يرتاح دلالج
الف هنيالي ببني اليرفع الراس
وانتي بهيج  اخو يايمه هنيالج

مبخوته آنه بهاي. ياأم البنين
من فدوة اروحن كون لجفوفه الاثنين

أبوذيات بولادة صاحب العصر والزمان الإمام المهدي ( عجل الله تعالى فرجه الشريف )
*
أخذني الشوك من ايدي بلا بال
و اغرد صرت تغريدة بلا بال
يسألوني الفرح واجب بلا بال
أكيد او واجب بهاي المسيه
*
الكون ابكل هله او ناسه وجانه
يصير العيد و افراحه وجانه
أبو صالح لون يرجع وجانه
عليه ارواحنه انطش واهليه
*
الشاعر السيد هاشم قاسم سعود البلداوي
17 - شعبان 1445 هجري
28 - 2 - 2023 ميلادي

قصيدة موشح بمناسبة وفاة مولاتنا{أم المؤمنين السيدة خديجة بنت خويلد}{عليها السلام}
****
اشكثر افضال الج ياام البتول
يفوق ادراك التصور والعقول
****
اشما تدور الدنيا وتطول السنين
انتِ تبقين انتِ يانبع الحنين
شيخة النسوان وام المؤمنين
مااوصفج عنج شما ردت اكول
****
شكد مواقف عندج بكد النجوم
شمس جنتي للنبي تزيل الغيوم
ابد ماهمج كلام اللي يلوم
ودستي بجدامج على راس العذول
****
جنتي ام واب اله وعون وسند
وجَنّه لتنسيه اهات الشدد
مااعوفك وحدك كلتيله ابد
وطن صرتيله يتربات الاصول
****
اله انطيتي اموالج وذاك الدلال
ياخديجه والله سويتي المحال
وكفتج حيرت يالحُره الخيال
اتحمليتي الم فاق اعله المهول
****
من اسولف بيج يمليني الفخر
وعلى عيوني تمر الاف الصور
نقطه جلمات المدح وانتِ البحر
غرك بيج الراد من عندج ينول
****
كمر نورج يظل يتحده الظلام
صرتي مضرب مثل بالحب للانام
ياخديجه عليج من عندي السلام
مايهمني شحجه وشكال الجهول
****
مالكه غيرج رسول الله بديل
يدري جان الامر جداً مستحيل
وزعيتي شعندج من اجله سبيل
يسجد التاريخ يم بابج خجول
****
خادم اهل البيت عليهم السلام
الشاعر السيد{هاشم قاسم الداودي البلداوي}

قصيده بمناسبة استشهاد{امير المؤمنين علي ابن ابي طالب}{عليهما السلام}
****
كون الله ينطيني صبر واصبر عله الدمعه عمر
يوميه من عندي الگبر ياخذله غالي
دنيايه صارتلي سجن يكتلني ليلي من يجن
مني اخذ ضيم الحزن عزي ودلالي
****
انه الي مجروحه بجرح بالموت مايتضمد
شما يمشي بايامه العمر. وسط الكلب يتمدد
ليليه اسهر بل الم حزني فلا يتحدد
تعتك لياليه ويظل. ظيمه علي يتجدد
جرحي فلا يشبه جرح. سَوَّد بعيناي الصبح
العنده عزيز وينذبح. يبقاله تالي
ياناس والله تعبت. اتمنه من صغري متت
بالدمه طايح من شفت عزي ودلالي
****
عنوان صرت لكل حزن متحيره ومهظومه
شيبني ضيمي من وكت اخ شكثر ملجومه
ما نصف ويايه الدهر. ياحسرتي من يومه
انه العلهكصتي انكتب. زينب علي المظلومه
بالامس ماتت فاطمه. واليوم حماي الحمه
بجتني فركتهم دمه طول الليالي
عالباب وشلت الدمع من كسرو من امي الضلع
كل يوم بل هم ينفجع عزي ودلالي
****
كل كبريائي ويه الدمع عل كاع كله تبده
واهاتي ابد ماتنوصف وحده اشد من وحده
باب الحزن من ينفتح. يادمعه بعد اتسده
والكبر من ياخذ بشر هيهات لهله يرده
فراك الابو كلش صعب. تكسر مواضيعه الكَلب
شتعوض دموع التصب. فركة الوالي
فركاه ابد ماينحمل. تكسر ظهر تكتل كتل
شتفيد دمعات التهل. عزي ودلالي
****
الفاكد ابو بيه يحس ويدري شغمجها جروحي
والعاش وحشة فركته يبجي لونيني ونوحي
الموت لو عافه الي ومن عندي ماخذ روحي
جاهسه مرتاح الكلب لامني نازل موحي
لااكضي هاليل بسهر لادمعي ينزل جل المطر
لابيه يندك الخطر. ويهد امالي
ومايذبح الضحكه الرمح واحساسي ابد ماينجرح
ياحيف غفله ينذبح عزي ودلالي
****
لو اكلب الدنيه كلب مثله ابد ماالكه
هو علي يشبهه منو. خاطر تهون الفركه
مصيبة رحيله نايبه. نار بدليلي تحركه
اذاني حيل بموتته. ومَيَت بروحي الملكه
أمني واماني ودنيتي. راح وتركني بحيرتي
اعثر صرت من بلوتي. حته بخيالي
راح وبعد شيرجعه. بااحزاني صرت مكبعه
انعه وعلى مصابي نعه. عزي ودلالي
****
نور الله عالهامه انطبر. وتغطه بالدم شيبه
حامي الحمه وصهر النبي. المليان غيره وطيبه
راعي اليتامه والوطن. سيف الحقود ايصيبه
بالمكبره هناك سكن. راح وبعد شيجيبه
اتمنه لو يرجع الي. اغله واعز ناسي وهلي
وحشه الليالي بلا علي والدمع هالي
هيهات مايرجع بعد. غطه الترب طير السعد
مني اخذ ليل الوعد. عزي ودلالي
****
خادم اهل البيت عليهم السلام
الشاعر السيد{هاشم قاسم الداودي البلداوي}

قصيده بمناسبة استشهاد الامام{امير المؤمنين علي ابن ابي طالب}{عليهما السلام}
****
حيدر علي كبل الموت وصه بوصيه العباس
****
ياكمر هاشم كله مني تدنه
ياروح ابوك الماتخيب ظنه
اوصيك انه بسيد شباب الجنه
وكت الشدد لتخليه صير اله عون ونبراس
****
لو شفته يابدر العشيره حاير
بين العده ماله معين وناصر
بطف كربله يوليدي يوم العاشر
يابا الفضل صير وياه ظهر بظهر عالارجاس
****
ياكمر هاشم باجر من تشوفه
بالحومه بين اهل العده لتعوفه
ضحي بجفوفك والنحر بطفوفه
عالنهر واعدني تطيح وبعمد ينصاب الراس
****
وزينب امانه بيمنتك ياوفاي
الها اعصر العينين لو رادت ماي
كفال صير الها وعضيد وحماي
بالغربه ماريد تعيش يابو الوفه والنوماس
****
رد ابو فاضل والدمع منه يسيل
امن يبويه الحمل بعدك ميميل
شحده بوجودي اليدنه وعليه يعيل
ياعلي وحك ليل رباي اقلع الدنيه من الساس
****
ياباالحسن امن يكرة عيني
ماعوف زينب ياعلي وحسيني
عيوني ودمايه ويسرتي ويميني
من بعد عينك والله عالباب توكف حراس
****
خادم اهل البيت عليهم السلام
الشاعر السيد {هاشم قاسم سعود الداودي}

قصيده موشح بمناسبة استشهاد {امير المومنين علي ابن ابي طالب}{عليهما السلام}
****
شصار بخت حسين من سمعت خبر
علي حماي الحمه راسه انطبر
****
هي مجروحه بجرح ينزف دمه
ماتمر ليله الحزن مايلجمه
وين خلت نايبة حامي الحمه
ويم المهه الالم قطرة بنص بحر

****
حين دكو بابها وجابو علي
مخضب بدمه حماها والولي
منهدم حيله وونينه معتلي
معَصَّب بعمته وعلى الهامه الاثر
****
شافته بمنظر ابد مارادته
لونه اصفر دمه صابغ لحيته
شكالت اخت حسين لمن شافته
والمصيبه شجابت الها من صور
***
لطمت اعله الراس ماادري بجت
حجت ساعة شوفته لو ماحجت
زين ظلت عين الها وماعمت
وبت علي الكرار ما ماتت قهر
****
علي ماجان الها بس والد تره
جان دنيتها الزهيه الزاهره
من اجه منحني ودامي منظره
على حاله وحالها ون الصخر
****
بقه ثلث تيام والدها يون
بعينها تشوفه وتسمعه ام الحزن
دموعها ودموعه نزلت بلحضن
عالمصيبه مو جمر تنزل احر
****
مات حامي الحمه والمنزل خله
وبقت زينب بت محمد معوله
الينتظرها من المصايب قافله
وابد ماترحمها اهات الدهر
****
شتنتظر زينب بعد عين العميد
غير غربه ونوح وسلاسل حديد
والزمن بيها يسوي الماتريد
من المخاطر بيها ياخذ للخطر
****
مرت الايام بيها والسنين
والوحدها بت امير المؤمنين
بقت لاناصر ولاحامي ومعين
وذبلت الجفنين من كد السهر
****
يسروها وصعدوها اعله الهزل
جتفوها ولوعوها من الجتل
تبجي وبدمعاتها يشمت نذل
تنادي يالهادي وينادي ياعمر
****
ابو اليمه موذرينه اعله التراب
عاري ابو السجاد ظل بلا ثياب
بالرماح وبالسيوف وبالحراب
والشمر من الكفه حز النحر
****
هو جان اكبالها تدوسه الخيول
على جسمه شافت تصول وتجول
تطشر اعله الرمل محبوب الرسول
ومابقه من ضلوعه واحد مَنكِسَر
****
هاي زينب بت علي حامي الدخيل
كضت كل سنينها بنوح وعويل
منين الها تجيب ياعالم كفيل
وابو فاضل كطعوه اعله النهر
****
وين ابو صالح يكوم بهمته
وياخذ بثارات اهله وعمته
وينتقم من الظلمها وظلمته
طول غيابه ونشف ريج السفر
****
ياالاهي بجاه طبرة حيدره
مانريد اكثر ولينه اتاخره
نعاهدك بالدم يربي اناصره
ونفدي كل ارواحنه للمنتظر
****
خادم اهل البيت عليهم السلام
الشاعر السيد{هاشم قاسم سعود البلداوي}

قصيده ثلاثيه بمناسبة استشهاد الامام {امير المؤمنين علي ابن ابي طالب}{عليهما السلام}
****
حس كلبي بمصاب * من دكة الباب
بحسباتي مر بس الخطر ** ومصيبه جايبلي القدر
من دكة الباب
****
بالدكه كل حيلي انهدم  وانعصر كلبي
واسود صبح لون الضوه  وتيهت دربي
وحسباتي بس عالماردت  ياويلي تربي
واركض واصيح من الوجل  ساعدني ربي
والدمع همال ** واتغير الحال
واجتمعت كبالي الصور * ومصيبه جايبلي القدر
من دكة الباب
****
للباب ياشيعه وصلت  بالموت الاحمر
شيبت وعيوني انعمت  والوجه اصفر
افتحها صرت من القلق  مابيه اكدر
من انفتحت وشفت الولي  حيدر مطبر
سابح بالدموم ** والدي المظلوم
بنيراني كل حلمي انصهر * ومصيبه جايبلي القدر
من دكة الباب
****
ارد احجي تيهت الحجي  بس اذرف دموع
من عاينت عقد الوله  من الطبره موجوع
وناتي تاكل بالكلب  وونينه مسموع
والنفس مو جنه نفس  يكسر بالضلوع
من اسمعه ينوح ** اختنك بالروح
تمنيت دلالي انطبر * ومصيبه جايبلي القدر
من دكة الباب
****
عزي ودلالي وهيبتي   واحلامي والجاه
سيف ابن ملجم ياوسف  طابرها وياه
العيشني اميره مدلله  مهيوبه بحماه
يم راسه كعدني القدر  ابجيله وانعاه
مصاب ابو الايتام * كبرني الف عام
والظهر لهمومه انكسر * ومصيبه جايبلي القدر
من دكة الباب
****
صرت اصفن بوجهه شكثر  واتامل الجاي
كل ماكرب منه الاجل  تتكرب عداي
وكل مايمر بيه الوكت  يتفرهد الراي
واتخيل الوحدي صرت  ولا واحد وياي
والحسن مسموم ** وحسين مدموم
وعالنهر مذبوح الكمر * ومصيبه جايبلي القدر
من دكة الباب
****
مايرحم بحالي الزمن  من بعده هيهات
بدمع الحزن اكضي العمر  واتذكر الفات
مو بلوه اعاشر لو مشه  تعاشرني بلوات
ماشوف من بعده الهنه  لاولله لو مات
والامل ينباك ** لو صار الفراك
ماترحم دروب السفر * ومصيبه جايبلي القدر
من دكة الباب
****
بفراكه اعيش بنايبه  متمر على انسان
وتشوف عيني من الحزن  اشكال والوان
والبيت يتحول كبر  وامالي اجفان
وابنيلي بيت من الحزن  يم بيت الاحزان
بالكوفه بالشام ** بكلوب الايتام
لو بالطفوف عله النهر *ومصيبه جايبلي القدر
من دكة الباب
****
خادم اهل البيت عليهم السلام
الشاعر السيد {هاشم قاسم سعود البلداوي}

قصيده عكيلي بحق{امير المؤمنين علي ابن ابي طالب}
{عليهما السلام}
****
ماانسه مصابك ياحيدر
****
يابو الحمله وداعت زينب
دلالي من همومك شيب
انحب وتمرمر وتعذب
والحزانك عيدي اتكدر
****
بعيوني إسودت ايامي
لجلك يامطبور ودامي
صورك من دمر كدامي
طايح بالمحراب مطبر
****
يامولاي دموم ابجيلك
وحيل البيه ينوح لحيلك
ياسيف الله وحامي دخيلك
اكثر بيه يمر وأكثر
****
رحت وماكملت صيامك
مت واعاشت بيه الامك
وتتجدد كل عام ايامك
وكلي بالنيران اتوجر
****
لو بس ذيج ايامك ترجع
واحضر انه بيوم المصرع
ماعوفك لو مو اتكطع
ودم راسك ياقالع خيبر
****
مولاي انت وكرة عيني
وكل ذاتي واحساسي وديني
ارخس ماانطيك سنيني
بروحي افديك ودم المنحر
****
خادم اهل البيت عليهم السلام
الشاعر السيد{هاشم قاسم الداودي البلداوي}

قصيدة موشح بذكرى ٱستشهاد الإمام{جعفر الصادق}{عليه السلام}
****
اليوم للصادق تعنت فاطمه
من ضلعها وعينها ٱتصب الدمه
****
حين سمعت فاطمه ٱبْسَم جبدته
نست كل همها وحزنها وكصدته
ٱمغمض العينين لمن شافته
آه صاحت يا شبل حامي الحمه
****
شنو ذنبك صاحت وانت الامام
وسمتك يبني غدر ولد الحرام
وليش جفنك ماغمض يبني ٱبسلام
وانت نبع الدين واصل الغانمه
****
يمه كعدت فاطمه ام الحزن
على ٱمصابه تبجي تنوح وتون
كِلها من الگال بالعصره وإن
هو أسس إلها هاي المظلمه
****
على حاله تنعه وتصب الدمع
بيد تمسح وجهه وايد اعله الضلع
وونها من الالم كوه ينسمع
بت محمد بجت املاك السمه
****
صبرت ٱشلون الزجيه الهالبله
وحيل مابيها بعد وتنوح اله
كظه ونها ونوحها ٱبطف كربله
وحيلها مصاب ابو اليمه هدمه
****
والمصيبه الاشد من سم الجبد
عدل ميت ينظلم من الحقد
واليزوره ينذبح لو ينجلد
بسبب احكام السقيفه الظالمه
****
بت رسول الله انمرد دلالها
وكسرة مصابه انقرت بخيالها
حال ابنها الصار يشبه حالها
بعد جف السعد لاميسالمه
****
لاصحن لاكبه عنده اعله الكبر
باامر من الناصبه واهل الكفر
المشتكى لله والراعي الامر
ابن حيدر علي راعي الموزمه
****
وين ابو صالح يجي من الغياب
ٱوْبيده ينهي الهالمصايب والمصاب
وتستراح ام الحسن من العذاب
وترتوي الضحكات من بعد الضمه
****
تستراح الزهره ويعم الامان
وياخذ الثارات من البيها خان
من يرد المهدي سلطان الزمان
بيده يمسح دمعة امه الساجمه
****
خادم اهل البيت عليهم السلام
الشاعر السيد{هاشم قاسم الداودي البلداوي}