ربي رب السما و الجفن لامنه ندّا
كل ما تهت بسنين الحزن قلت: عااادي
والله إني أمر المسجد وما أتعدّا
توقف الروح عند الباب تبكي تنادي
لا إله إلا أنت بكل شيٍ مبدّا
لك سلّمت أمري ولك مسلّم فؤادي
دلّني لليقين اللي عليه أتهدى
ماسكٍ درب أحسبه صح وأثرني غادي!
كلّي جروح طيب، و كل عمري تردّى
يا صبر قبلي قد هديت حيل المهادي
تسلم يد الظروف اللي بوجهي تحدّى
كرهتّني بحبيب و حببتني بمعادي

تقتلّك ممكن كلمة ليش!
‏الكل يلهث ورى العيشه
‏الطفل ميّت من التهميش!
‏والحلم فاصل من الفيشه
‏وطن يظن الحمايه جيش!
‏وكل الضحايا دراويشه
‏قد أيش باعوا شرف قد أيش؟
‏عروش لكن كمّا الريشه
‏من يحسب الحق كلمة طيش
‏مايدري هي به أو الخيشه
‏لازم تكذّب عشان تعيش؟؟
‏يلعن أبو جدّها عيشه.

ذقت المراره من عذوبة لياليك
هذاك حد علمي بطعم العذوبه
من طيّر أسراب الحنين بطواريك؟
وأنا السراب اللي بعيدٍ دروبه
من غيّر أجراس المجون بخطاويك؟
يا ذنب داريته و عيّيت أتوبه
ياما تحريت الهوى من حراويك
وياما تبعك المزن.. ما رحت صوبه
أحترت يا عذب اللمى وين أراضيك؟
وأنت السما و السهل وأنت الصعوبه
وأنت الرضا و النور.. وأيامنا ذيك
وأحلى جروح القلب.. وأحلى ذنوبه

يا حبيبي، لا حقيقه مطلقه
والدليل، إنك خيال وما تصير
أنت يا حلمٍ عجزت أحققه
مر حلو النوم، و الواقع مرير
يا هوى كم لي وأنا أستنشقه
معه دايم أحضن الغيمه و أطييير
المحال.. اللي غرقت بمنطقه
الزلال.. اللي نجى فيه الغدير
قبل لا يطري لقى.. كنت أسبقه
من قليل الوقت.. في قلبي كثير
كل موعد كنت وياك أسرقه ؟
كانت دروبك سجن.. وأنا أسير
من يقول أنساك كيف أصدقه ؟
وفجر عمري معك.. و الثلث الأخير ! .

ندم.. ولا يلحق قفى عمري حسوف
معي على كل الخيانه دلايل
كنت أحسب إن العمر لا مر.. بيطوف
وما طاف غير الحق، و العدل مايل
أثر التعب ماله مع الوقت مخلوف!
زمان ماني عارف شلون قايل
لا رحت أسوي لي مع الناس معروف؟
أرجع وأنا كني مسوي الهوايل
لله قلبي، و الله يحن و يروف
له الفضل ولا لغيره فضايل
يا نوف أنا صحرا مواليف و صدوف
من كل حيرة جرح.. فيها قبايل
من كثر ما مرّت تباريح وظروف؟
كل ليلةٍ يطوي ثراها الرسايل
حفيّت أمانينا من الصبر يا نوف
دم الهوى من صدر الأيام سايل
وجيهنا سوده من الهم و الخوف
لكن تبيضها نظاف الفعايل
شوف القلوب ينقص العمر و الشوف
وأشوف ما للبعد عنك بدايل
بنروح ما فينا على البيد ملهوف
لكن تعج فينا حتات الجمايل

من يقول اللي وقف ما كان خايف؟
خايفٍ ما للوفا كلمه هنيّا
الوفا ماله أثر بين الولايف
الوطن ماله أثر بيّن هنيّا
الندم قطّع من الحرّه شفايف
لو تقول الموت عانه قال: هيّا
لا يسوي لي بها ما كان شايف
لعنبو رجّال ما بقلبه حميّا
لا يغمضني وأنا شايف و عايف
"أعطني حريّتي أطلق يديّا"

لا صبح يتنفس ومرتاح جوفه
كن السما و الارض ناموا ببالي
تصب وتشب الحنايا.. قنوفه
ولا لقيت أحد يجاوب سؤالي!
حطيت بيني وبين الأحباب.. طوفه
وقعدت أعض من النواجد.. لحالي
أضحك على الأيام ضحكه عيوفه
يا مرخص الأفراح.. والحزن غالي
قاسي.. ويوجعني الفقير بظروفه
وأنا فقير.. وعزتي راس مالي
قل للزمن ع البال طوّل وقوفه
ومواقفه ماهي.. مواقف خوالي
أنا حجازي.. لا لفتني ضيوفه
لكن على عوج البلاوي.. شمالي
واقف ولا ألحق زماني حسوفه
حتى العمى شايف ظلام الليالي
صابر على جور الزمان و صروفه
عندي يقين إن الليالي خوالي
ماعندي إلا حزني اللي تشوفه!
وأخاف بكره يورثونه عيالي.

عصفور .. رفرف بعيد الحوم
ضم السما قبل جنحانه
لا راح.. وصى عليك غيوم
كان الرذاذ.. أصغر أخوانه
وده يهاجر بدون هموم
ما طار إلا من أحزانه
محد يحب المفارق،، دوم
إلا اللي ما واطن أوطانه
الستر لا تحسب إنه هدوم
يا مكثر عقول عريانه
مخابي تصفر وفيها علوم
من عزة النفس مليانه
الفقر ماهو حتات رزوم
الفقر بنفوس هلكانه
بشر بدون رمضان تصوم
قلوب بالفطره جوعانه
كذاااب.. أعرف بكى المظلوم
مرّه سمعته.. بزنزانه
مرّه سمعته و طار النوم
أطفال بمهاد حيرانه !!
أنا غريقٍ.. برع بالعوم
لكن تبرع بذرعانه
حط الله للي يخون؟ وسوم
وحط الخزي بين حجانه
قلبي قسى، من هذاك اليوم
وكل ما قسى! زاد تحنانه
ماني بخايف من المقسوم
مفوّض أمري، لسبحانه.

طلّي وخلّي الشمّس يصبح لها نور
متعلّقه آمال عمري.. بـ طلّه
بين الحياه و الموت وعيونك الحور !
حطتني الأقدار.. و الشكوى لله

يا رب.. هب لي من الأرزاق وأقسم لي
عشان لا جاني المحتاج.. يلقاني
وأخذ بناصيتي لطاعتك و أحسم لي
طاعتك عندي ولا طاعة احد ثاني
عايش ومن فضل ربي ما أنقطع عملي
ولا عدم طيب أبوي.. و مجد جداني
شايل حمول الليالي فوقها حملي
يكتبني الوقت و التاريخ يقراني
يذكرني الورق لا هام يترنمّ لي
غنّاني الصبح.. وإن جا الليل خلاني!
يحزنني إن الورق في وحشتي مملي
يحزنني إن الملا تسعدهم أحزاني
الكلمه اللي بدمع الذهب ترسم لي؟
كانت ضريبة فرح.. و الحزن مجاني
أذكرك يا خالق النسيان أنا كم لي؟
أذكرك ملهوف يوم الناس تنساني
أيامي البيض ماابيها تبسّم لي
أيامي السود فيها كنت وحداني!
الفرصه اللي بدربي ما تْغانم لي؟
بكره أبا أدوسها بنعال حرماني
الناس ماعاد تصلح لي وتهتم لي
أبيك يا رب تاخذني على شاني
شهيد.. يا شاهد بكل حاجه أختم لي
قتلني الشوق قبل الحور.. لأخواني

سكّر العمر أنتي ملح الأيام
يا هبوب الصبا و أصدق حنينه
مرحبا يا أرّق.. أرّق الأنسام
هبّي و حبّي جروحٍ دفينه
يا ربيع الليالي ورد الأحلام
ما يموت الزهر.. من تقطفينه
كل خطوه معك! كانت بالأقلام
كل نشوه بسحابك! كنت طينه
ناي شلتي بقلبك كل الأنغام
لو تمرين عود.. تقسّمينه
أسعد ْمن اليمن أحزن من الشام
وأجمل أصوات بغداد الحزينه
نسمه.. تحن تمسح روس الايتام
يا حمامٍ سكن نور المدينه
كل ذكرى ورى و الوعد قدام
بحر ما خانت أمواجه.. سفينه
يا أماني ضرير بسود الأوهام
كيف بيشوف غيرك وأنتي عينه؟
أنتي الأجر أنتي كل الأثام
أنتي حتى الهلاك.. تشفّعينه
من فتن بك حرام إنه ما ينلام
عذبةٍ كل عذاب.. تعذبينه
الليالي معك تركض.. و الأرقام
أنتي مثل العمر... ما تنصفينه
سكّر العمر، أنتي ملح الأيام
يا فرج.. من تولجته سنينه
عينك بشاره لمسجون منضام
لا تصدين عنه... وتعدمينه

يا وجودي وجود اللي يهز السرايا
والمقادير خلّت بالضلوع أرتعاشي
لا ذكر ما مضى.. ماتت جميع الخلايا
خر سقف الحنين بغربته .. وخر غاشي
السحابه تمر وتنهمر، بالزوايا
ويوم راح الزوايا.. راح عمره بلاشي
أثر كل الظروف اللي بوجهي هدايا؟
ترجد العين غالي من خيار المناشي
أه.. من عبرةٍ أزرت تفك الحنايا
كل ما جيت بدله ! ما هنى لي ولا شي
وين بلقاك ربي و رب كل الضحايا؟
كل ذنوبي بريئه.. كل جروحي بجاشي
أنت تدري بحالي وأنت جزل العطايا
ما ترجيت من كف الحكومه معاشي
كفّت العين دمعتها و عين الزرايا !
كل منهم نذر يذبح بفرقاي.. حاشي
سمّهم بالقلوب.. تموت منه الحيايا
وإن تدانى عطشهم.. ما توانى رشاشي
أترفّع.. عن فعول النغول المطايا
ما أتشفّع بأمير .. ولا أتمسح بكاشي
ليلة فراقنا بانت جميع النوايا
غربتي قالت أمش.. وقلت ماني بماشي
لو خذتني من يدين الأماني.. المنايا؟
ترفّع النفس عزّه.. ما رفعها نعاشي
لا توصي وداع.. ولا تتبرر خطايا
ما يصلى بغيابك.. أنت ما أنت النجاشي

طرّف الليل والدمعه تغطرّف بجفني
يفتن القلب جرحٍ بين الأضلاع.. عاري
رمش مر بغرور يحق له.. ماعرفني!
من يلومه وهو دايم على الطلع ضاري
كل ما ناض له براق يمّك ! خطفني
كل ما سرّته حسره ! تلقاك ساري
ياحبيبي أنا اللي شايف الضيم... شفني
من لياليك تلقى في جفوني مواري
ليت حظي قبل وقتي بوصلك سعفني
كان ماطال مشواري وطال أنتظاري
مرني من صواديف القدر ما صدفني
رد.. و يرد لي كل شي، حتى إعتباري
كل ماجيت بقطف ورد.. عمري قطفني
قلت أقدم عيوني قبل دمع أعتذاري
يا سجينٍ تمنيت إنه مايعترفني
كنت خايف يكون السجن كله قراري
وين ربي بلاني في هواك و حذفني؟
غرر الروح لين القلب جاك إنتحاري
الزمن ما تركني معك.. ولا نصفني
والله إني بفرقا وجهك العف.. داري
كيف بنساك يا ذنبٍ سنين أقترفني؟
لو أحج العمر كله.. نهر عذب جاري

تذكريني إذا مالت رقاب النخيل
تفقدي لك رذاذٍ بخّته فيّتي
ناديني بصوتك المبحوح حزن و هديل
وأستغفري للجروح اللي على نيّتي
يا بنيّتي ما بقى لي صبر.. غيرك جميل
ولا بقى في يديني شي .. يا بنيّتي
ياليت لي بال يشبه رمش عينك طويل
ماكنت دون الكرى أتلحف وصيّتي
يا ليتني ماخذيت الليل عقبك خليل
البارحه أغتابني وأنا على جيّتي
كل السحاب يتمنى عند بابك يسيل
الله مخلي عيونك كل ذريّتي
أعن لك بالمخايل كل برقٍ يخيل
أحن لك لين يبكي المزن حنيّتي
القلب عاف الخداع وضاع..وأنتي دليل
والدرب لا زاد وحشه.. زاد وحشيّتي
ماني بحاسب وحسبي الله ونعم الوكيل
لو ياخذ الكون كل الهوى من ريّتي
إن مت بيد النوى على حداد الرحيل؟
دمي حلالٍ عليك.. و ضحكتك ديّتي

أنت ماغيرك أحد.. ياللي ببالي
يا حلو منك المواجع والمضرّه
ورد طايف.. موعده في ربع خالي
غيمةٍ هلّت على الدنيا مسرّه
عنك قلبي ماهو بداله و سالي
يتحرى كل ليله بك تمرّه
هات من رمي العيون السود.. صالي
حر ومبايحك.. لو أموت حرّه
الجروح اللي تجي من قلب غالي؟
ودك إنها ماتفك الصدر.. مرّه
حتى لو تقتلك.. في بعض الليالي
ودك إنها طول عمرك مستمرّه
ودك إنها تترك الضلع الشمالي
ودي إنها تنثر الحب و تذرّه

ما شعاني من معاليك يا ظبي الحماد
مابقى لك غير قطرة سراب .. وقنطرّه
الهوى قفى به الوسم وأيام الحصاد
ما بقى للعين شيٍ يعزّ و تذخره
يا كثر ماله بدونك مواليف و سهاد
كم جناح الليل غرّه بحلم و طيرّه؟
هب.. لا عادت طواريك لا هب البراد
كم تقطّع في مواصلك حبل.. و حنجرّه؟
أثر كل اللي جنيته من أحلامي هجاد !
كان لي شيطان يغوي .. و رب أستغفرّه
كم عليل لف عمره و هاجر عن بلاد؟
ما درى إن دواه بالمصحّف اللي هاجرّه
أذكر اللي يوم تعصيه.. نزوى بإنفراد
كل ذنبٍ يفضحك كان.. ربك يسترّه
حط بين عيونك الله.. وقل ماشاء وأراد
من نسى ربّه نسي.. من ذكر ربّه ذكرّه
عندنا ميعاد بكرّه.. معَّ رب العباد !!
به وجيهٍ مسفرّه و به وجيه مغبرّه

لا تخاف
أعتبر نفسك بحجه
وأنت طوفت الطواف
دايماً ربك غفور.. و راح يغفر
يرأف بحال الضعاف..
وأعتبرني واحدٍ مرّك و طاف
عطني طاف
بس قلّي شاللي راح؟
كم طوّت منّك مسافه
كم كوّت قلبك حسافه
كم تجمّد من جراح
باقي سنينٍ عجاف
باقي قلوب نظاف
لا تخاف
أعتبر نفسك بعجّه
صاح .. قلبك و أستغاث
كانت الساعه :ثلاث
عصر يعصر موج
بعيونك وتغرق
شفت بعيونك وعيد
وكنت تبرق
كلما كحيت تشرق
أنت تشرق من جديد
شفتك ترفرف شهيد...

كل واحد في طريقه
كلبوهم "نفسي نفسي"
نفسي أعرف هالطريقه !
كبلوني بالأماني
كل مرّه بس عشاني؟
بس عشاني كل ضيقه؟
الدروب لها مسافه
والمحطات الحسافه
وكل واحد مع صديقه..
يا صديقي :
لا تحسب إن الحقيقه
في عيونك!
إنها فعلاً حقيقه.