أنا مع الأقدار.. سويت لي صلح
‏ودعتها كل السنين الخوالي

‏ما لليالي طعم .. من خانت الملح
‏أثر الكلام رخيص و الفعل غالي !

لا تسجد إلا لوجه رب العالمين
الله مكرم لحيتك وأشنابها
ما الله معذبنا بخير المرسلين
دونه تذل العرب كل أنسابها
صمت الطريق اللي أكل وجه السنين
فيه النفوس تقول شاللي جابها !
الله يعين العبد يا عبدالمعين
لا قامت الدنيا تصك أبوابها
الرزق بيد الله خير الرازقين
مثل المنيّه ماتعرف أسبابها
والله وطلع لك صوت يا قلبٍ حزين
تجابهه الضيقه و ذنبك جابها
ورى الرحيل أضناك ماتدري منين!
وأنت الحياة اللي تلم أحبابها
يا أقرب من الأنفاس من حبل الوتين
وأبعد من الغيبه و نبح كلابها
خانك زمانك وأنت كالعاده أمين!
تداري أسرار .. قتلوك أصحابها!
أرقى على متن السحابه باليقين
مالك وصاة .. الله ما وصى بها
أيقنت إن الآدمي مخلوق طين
شفت الوجيه مودّره بترابها
جينا على الدنيا وحنا راحلين
كل شجره تلقى تحتها دابها
وإن صفوا العالم و صلوا واقفين؟
والله ماتنسى ماوقفنا بها .

تمرين.. و تضيق الوسيعه من السلهام
دخيل الحمَار اللي شطف حلو وجناتك
تروحين مدري وين.. فيني مع الأعوام
تخلين كل الكون خالي بخطواتك
مواقعك من حدب نواعس تقول سهام
دخيل العطر لامرني بطيب نياتك
تخلين كل الناس ترمي غزل و أرقام
دخيل النسيم اللي تراقص بخصلاتك
كذبتي على روحي وكذبتي على الأيام
نسيم الليالي غرّني وهب نسماتك
حلالاه يا أيام يوم بأمان أنام!
سهرت العمر كله وتشهد لي غيباتك
أنا حاكمٍ نفسي من اللي جرى.. إعدام
عسى الله يغفر ما تحملت غطاتك
كفايه علوم صغار .. مدري هوى و أوهام!!
أنا شايمٍ من .. عمري اللي بنظراتك
أحسبك فتاة أحلام وأثرك فتات أحلام
تمنيت ماتلحقك شرهاتي.. و جاتك :)

عندما خرجت من السجن فقدت حاسة الشم بسبب زكام أعتقد إنه كورونا ، للتو أستوعبت هذا الأمر !، حين أستنكرت عطرك.

ما عاد عندي للخطا تبرير
‏ماعاد باقي شي.. و أخسره
‏توني على جور السنين صغير
‏بدري على الفقدان و الكسره
‏كنت المواني كلها و الطير
‏ليه المسيّب حطني جسره؟
‏لوّحت ماني قاصد التهجير!
‏كنت أنفض يديني من الحسره

كل عام وأنتم بخير وأفضل من اللي قبله،ومبارك عليكم الشهر ياحبيبيني

ضاع طفل بليله غدرا.. ما لقوه
كان ربي يعقله.. فيه حركه
كان متشعب و ربعه طيروه
و طار لين الغيم عانقه و بكى
و السحاب يسيل والناس سألوه
وهو بس يهل.. عمره ما شكى
الشوارع و الدواعيس أذكروه
كان له دايم معاها شربكه
أعذري خطوات قلبي لو يتوه
مابقى له درب غيرك.. يسلكه
لا مشى تستنكره كل الوجوه
يبتسم للنحس ويقول بركه
صب قلبه للحبايب و شربوه
صب عشق و صب ضيم وتهلكه
من خذوا أحلام عمره.. ما خذوه !
كل شيٍ يلحقه.. يوم تركه !
اليتيم اللي فقد ريحة أبوه !
لا بكت أمه وش اللي يضحكه؟

‏-ما سبب وفاته؟
‏-ارتطم رأسه بالحقيقه.

غرتني رحمتك لين أعمتني ذنوبي
ياربي العفو و الغفران و التوبه
أنا أكثر الناس ضيعه.. تشهد دروبي
يسحبني الذنب كن النفس مغصوبه!
نسيت عمري و ناسي معه ماجوبي
والويل للرجل لا قصر بماجوبه
المعصيّه و الظلاله ماهي بثوبي
أنا ثيابي من الأحلام مقلوبه
يا دوبي أسلم من الأيام يا دوبي
سلمتك القلب والأقدار مكتوبه
كم حاجةٍ كان فيها الأجر مطلوبي؟
خذاني إبليس ع النيّه على دروبه
أخطيت يوم إني أتزرى على النوبي
وأنا أساساً ما أعرف يمة النوبه!
نافقت يوم العيون اتلفتت صوبي
كنت أحسبه طيب وأثري ماني بصوبه
كم قلت بالنفس يا نفس أنتهى. توبي
وترد لي بكل آسف.. ماغير هـ النوبه
خايف يجي يوم وأقرى فيه مكتوبي!
وأندم على كل كلمه فيه مكتوبه.

وين بروح عنّك؟ مالي غيرك مكان
تتجهك الدروب.. وكل خطواتها
جيت فاقد بلادي جيت فاقد حنان
يا حياةٍ يموت الموت.. ما ماتها
ليه بخاف دام إني لقيت الأمان؟
شفت بعيونك الدنيا و لذاتها
في عيونك ربعّ ماشفتهم من زمااان
ماخذ الوقت لمّتها وضحكاتاها

كافي جراح أرجوك.. الله يعافيك
أنا تعبت من الجراح.. الصراحه
أضحك وكب الحزن فدوة مواطيك
خل التعب لي جعل قلبك براحه
قلبك نقي سبحان منهو منقيك
وخلاك آيّه للزمان و جراحه
وش ذبّل أوراقك وجفف سواقيك؟
والطير مرخص لك غناه و جناحه
متفاني بالفطره وكل دار تنفيك
والناس بالفطره منوعه و شفاحه
أنت القمر و الكل سارح حواليك
أنت الآذان بهيبته و إنشراحه
دخان بدروبك ولا أحد مصافيك
عذروبك تسامح وطيبك وقاحه
تخالي الدنيا وكلٍ مخليك
بينك وبين الناس فرق و مساحه
دايم تداريهم ولا أحد يداريك
صمت وهذيان يضج البراحه
أرجع لعينٍ في رجاك وتحرّيك
ذاق الفرح وياك طعم المناحه
فتحت لك صدري هموم و شبابيك
عان الأمل جا لك بقلبي و جراحه
مسجون ليتك تدري إن السجن فيك
والأصل في كل الأمور الإباحه

لا يا سعد ماني سعيد
الحمدلله بكل حال
تاخذني السجه بعيد
وأرقى على روس الجبال
بكره تعرف إنك وحيد!
لا حكّتك سود الليال
ما للنسا بالعمر كيد!
من شفته ببعض الرجال
الناس عن دربي تحيد
يمين.. و لحالي شمال
الراس جبّار و عنيد
والمتن شيّال الثقال
والقلب ميّال و زهيد
وأنقى من مزون الخيال
انهار من سيل الوعيد
وشلون أجاوب ع السؤال؟
لا رددت هل من مزيد؟
يزيد فيني الاشتعال
رحمتك يا رب العبيد
ظلك ولا لغيرك ظلال

لا تخلوني معَ قلبي لحالي
كل شيٍ راح ما ودي أعيده
نفسي ألقى واحدٍ ثاني.. بدالي
واحدٍ ماهو مثل هذا و كيده
أحسب إن صدري على الدنيا شمالي
ليت لي جمله من أيامي مفيده
لي متى صابر على سود الليالي؟
لي متى هاذي الحماقات الرشيده
ماقدرت أندم على أيام الخوالي
كل فرصه حتى لو فاتت سعيده
عاشقك ليته مع الأيام سالي
مابقى بيده حسافه.. إلا قيده
لك طواري سابيّه قلبي وبالي
مختلي فيها تقول أكتب قصيده
عادة الأقدار تقفي بكل غالي
الهوى يرغب و يوقعنا وعيده
ماني بناطر إذا جاني مجالي
كل حي له مجال تحطه أيده.

من ذاق طعم الشهد من ريقك العذب؟
‏ماعاد يروي ضماه أنهار عذبه
‏ثغرٍ سوالفه لو إن نصها كذب؟
‏كلٍ يصدقه.. وأحلى كذب كذبه

جيتك على الفطره ولا أعرف الكذب
‏ولا أعرف الحب وشلون صاير
‏جيتك بقلّب أبيّض ولا يعرف اللعب !
‏ولعبت به.. لعب الهوى بالستاير

الطرق تتطرّق لي بكل الطرق
ما حرك شعوري شعورٍ طار به
ما أندم على حلم من أيامي سرق
ما ردها بتزين.. لو هي خاربه
قلوبنا لله تشتاق و ترق
مافيه نفسٍ من آجلها هاربه
الموت ماهو يعني إنّا نفترق؟
بكره تشوف أرواحنا متقاربه
أركب معي ولا يخوفك الغرق
البحر.. ما يقدر يغرّق شاربه 🕺🏻

تمر الأيام لكن ما أتعداها !
ما شفت غير المواجع واقفه يمي
حتى لو إن عبرتي جتني من أقصاها؟
‏أضحك عليها بضحكه من كثر همي
‏مواقف الحزن ماني قادر أنساها
‏له وقفةٍ كنها وقفة بني عمي

ما غفى الطرف له يومين يابو فهد
كل جروحي مع الايام ضمدتها
إلا جرحٍ.. سطى وسط الضمير و لهد ؟
الطواري توسدته.. و توسدتها
ذكرياتي دموع يسيل منها شهد
كلما تنتهي آمال.. جددتها
قلبي اللي معه في كل حاجه زهد
عزة النفس بالتوديع عاندتها
قال أحبك و رجعني فطام ومهد
كل كلمه معه من روحي مهدتها
ياوليفي لفيتك عقب سهد و جهد
الخطاوي لعينك ما ترددتها
جيت بأنش قلبك قبل أنش النهد
كل ضمّه توضّت.. ما تعمدتها
كان نفسي تطمني بكلمة عهد
قلتها مرةْ وحده..! ولا عدتها

يوم مات الأمل يا ليت مات الشعور
‏قلبي اللي قتلني كيف بـ أبايحه؟
‏أدري إني محطه و أدري إنك عبور
‏وأدري إنك حسافه.. رايحه رايحه

خلك مع الله صليب الراس
قرآن ما يلحقه تدنيس
و"قل أعوذ برب الناس"
من شر بعضهم.. يهون إبليس
مليت من عالم الأنجاس
الكذب و الظلم و التدليس
و القتل و السجن و الإفلاس
وأرواح تزهق على تجنيس!
و الهم و الغم و الوسواس
ونفوس محتاجه لتنفيس
الدرب لو هد له عساس؟
ما هد هدهد سبأ.. بلقيس
لا يحسب إن البطوله كاس
لا يحسب إن المكارم كيس
من رد ولا قطع الارماس؟
ماراح يرد البرا و العيس.