خيرة إنساء الارض هاي المره
ربت افحول الوغى لخير الورى
———————————
خيرة النسوة ونعم هذا النسب
طبع بدويه انعرف عند العرب
من عقيل اختارها شرف وحسب
نِعم مَختار لعلي لهل الطاهره
———————————-
يكله اريدنها مره تخلّف سِباع
تشبع إمن سيوفهم كُل الجِياع
أمر ابو اليمه كلف لابد يطاع
والجثث عالكاع تنمد بالسره
——————————-
نشوف عبدالله يشد مُهره ويعِج
لو هجم بطفوفه وبصوته يضِج
رؤوس و برؤوس العده بيهم يرِج
جن قيامه تقوم بيهم صايره
——————————-
عون والله لو هجم ريح التهب
اعصار شيلزمه لمن سوحه يطب
كلها تشرد ترتعب مثل السرب
وخله عدوانه بخزرته حايره
——————————-
من سيف جعفر ابد ماواحد نِجه
انهارهم اتصّوروا ليل الدُجه
منه تطلب كامت العون و رِجه
اتمنه أُمه هالوفيه حاضره
———————————
شنحجي عن عباس سيدها الشبول
ليث فرسان الوغى فحل الفحول
وبقواميس الوفه يصول ويجول
كفو من عباس ضنوة حيدره
———————————
والله ماخنوا ابد ذاكَ اللبن
بيهم افواه البساله سولفن
الينطي عمره مايبالي بأي ثمن
وأُمهم بدم الشهاده فاخره
——————————
اخذ هيجي والده من تفتخر
من ابن حذلم يگلها تبتشر
بكل بنينج عظمه ربنه الاجر
ريت وياهم اضحي ناصره

علي موفق القزاز

انخسف بالكوفه الكمر ونجومه
مُسلم بدمه كتب مرسومه
———————————-
الكوفه ضجت من وصل ليها الخبر
شلون ليلة مُغبره انحس بالخطر
لابن عمه مسلمه تارك اثر
يبن عمي موتتي محتومه
———————————
لهل مهمه يلوك بس هذا الامير
مثل مسلم يازمن يحصل سفير
بيده شايل حتفه معروف المصير
هل سفارة بينت برسومه
———————————-
حين للكوفه اعتنه كلشي اختلف
بيده مرسوم السبط شايل هدف
والله ما يترك ابد هذا الشرف
ماتهمه مُغريات خصومه
———————————-
وسفه أشباه الزلم نقضت عهد
للخيانه لبست اثياب السعد
الميه جانت ما لكه بظهره عدد
والضمائر ملوثه وماثومه
———————————
زمرة باعت دينها إبكم فلس
ولطمع دنياهه مترّوض النفس
وصمة علتاريخ ماينسه الامس
و شمس مسلم مشرقه بعلومه
———————————
رغم ماطوعه مره تسوه زلم
هلا يامسلم تكله لاتهم
ابن عم حسين والله ونعم
الروح تفرش بالفخر لقدومه
———————————
من قصر اهل الغدر دمه يسيح
بيد زمره ظالمه لدمه تبيح
شلون مسلم مادره بحال الذبيح
روحه لحسينه تظل مالومه
———————————
لبو اليمه يبعث بهذا السلام
حين ارمى من سطح قصر اللئام
سيدي عُذرًا اذا غاب الكلام
لنصرتك دمي فصح مختومه

علي موفق القزاز

يرد راح بصارمه صفينه
للحسن باجر يگرها عينه
—————————-
يرد صفين وجمل هذا الشبل
مايظل وبصارمه بالطف حمل
وارث علوم الحسن خير النسل
يلوك والله صارمه بجفينه
——————————-
يلوك والله صارمه بيد الهمام
دمدم اعله اعداءه بوكت الخصام
معجب الفرسان لو شد اللثام
فارس برغم صغرها سنينه
——————————-
لو برز بالحومه مايبقه نزيل
تشوف كاع المعركه بيهم تميل
تصيح هذا المرتضى حامي الدخيل
بيه هيبة حيدره مشبهينه
———————————
شُبه هوه لهم جنّه الامير
جن ضربته النازله الحر الهجير
يعيد صولاته غده بيده المصير
كلها صاحت من الثره يمحينه
——————————-
كل جمع ماهمه ميهمه عدد
اخذ هيجي ضيّغم بوكفت اسد
اخذ من عمه السبط عون ومدد
شلون يرجع والي عمَ إحسينه
——————————
يشتهي سيفه العدد ما ينحصه
جنه موسى اتحولت بيده العصه
بيها يلكط كام مايحصه الحصه
اسمه حصاد الركب ملقبينه
——————————
حسين كلبه يلوب وبوسط الخيم
تسولف دموعه وتعاينله الحرم
طاح جسام وشبابه ماسلم
اتوشح ابدم الشهاده اجبينه

علي موفق القزاز

ارتجت الحومه برز خيالها
صار الاكبر يقطف بآجالها
——————————
ارتجت الحومه بثكل هذا العجيد
سيفه يحصد رؤوسهم بيهم يصيد
كلشي بالطف انخرس صاحوا يحيد
والارض جن أخرجت بأثقالها
——————————
اخرجت جن الارض نار الغليل
انترست اركاب وجثث بالدم تسيل
علي الاكبر شبّع الفرسان ويل
وياشمرته نازله بزلزالها
——————————
يا شمرته ما تظل تسلم رِكاب
مثل جده راوه بخصومه العِجاب
يانزلته يضهضب اشتد الحِراب
يطوي بيهم هالطفوف اميالها
——————————-
ماشه ملك الموت اصبحله رفيج
صاحبه هوه البقه بهذا الطريج
بسيفه ماتلحك بعد تبلع الريج
ضيّعت باب الهوه من جالها
——————————
كل جمال الهاشمي بوجه انحوه
وامه تقره بخيمته القل هو هوه
تخاف جانت من يمر بيه الهوه
شلون لو عرفت ذبح آمالها
—————————-
شلون من تنظر اله اتكطع وصال
هالمصيبه الواقعه لا مو محال
إطلّعه من صدره مشتبكه النبال
بجّت عيون السمه احوالها
——————————
اه كلب الفاكده ينزف حنين
تكله ضيعت التعب سهر السنين
وين اشوفنك بعد يوليدي وين
و اليماشيها غدًا جتالها

علي موفق القزاز

لمُسلم وديعه...اطول سفرته
لا تنطرينه..... ...بغربة روحته
لجيّته لا تنطريين
احبابج بعيدين
يا طفلة مُسلم
—————————————
مُسلم برحله طويله لاتنطري بعد جيه
هل وعد يوم السفاره مواعده ابن الزجية
عاصف بروحج حنينه ونار حسراتج سريه
والدلال الباقي ذكره يقهرج كل مغربيه
توّدعي حنانج... حُبه ولهفته
شتعنه حياتج...تصعب رجعته
تذبل هل رياحيين
احبابج بعيدين
ياطفلة مسلم
————————————
هايمه دمعة حميده مانشف لحظه مُسيله
شلون مايرجع ابوها فركَت الوالد ثكيله
والشهر سيفه زمانج كل امل مسلم تجيله
والصعب ليل انتظاره الليل لو جن بعويله
راحت تدعيله... إتنطره ابنيته
سالم وتشوفه...الضمهه بمهجته
بآهاتج تندبين
احبابج بعيدين
ياطفلة مسلم
————————————-
رايح لدرب المنايه بيده مرسوم الامامه
وانتي بديار المصيبة ماغفه جفنج منامه
حسين اطفاله تصبرج يعاود الها بالسلامه
لو مسح راسج حميده لليتم بانت علامه
بالغربة يتيمه... ..تسولف دمعته
بدهرج ترويله...ابالج صورته
لو بابا تناديين
احبابج بعيدين
ياطفلة مسلم
————————————-
لو وصل طارش يخبرج مسلم بدمه بريده
حامل دموع ونوايح جيت الوالد بعيده
من السطح مسلم يخبرج والبكَه براسج حميده
بالحبال اتجره كامت بموتته الكوفه سعيده
ارذال الامه ... مسلم خانته
دورها بظهره... نقضت بيعته
لو حاله تشوفين
احبابج بعيدين
يا طفلة مسلم
————————————
حسين عمج يلحبيبة حاسبج بنته رقيه
عُودج بدم الشهاده روحه قدمها الابيه
الفكد ادري حميده صعب يابنتي عليه
ثقتي هذا ابنه عمي ارتفع مجده للثريا
سفير إلدينه... دمه ثورته
المبدأ احسينه.... ينصره غايته
مُسلم سفير الدين
احبابج بعيدين
يا طفلة مسلم
—————————————-

علي موفق القزاز

مضحية بولد...مثل الورد
بنت الاصل...حاشه ترد
باب السمة ام عباس ..بكل الشدد انخاها
—————————————
باب الله هاي العظيمة الحره
الضحت ولدها عالفخر مفتخره
اقسم عليها بالحسين ونحره
بصدر السمه ...متوسمة
تريد الاسم ... هلـ خادمة
هاي الوفية هلـناس... رب العرش جلاها
————————————-
ام الوفة ابكل شده لابد تحضر
دهرك لوّن حد سنونه و تعسر
بالفاتحة كل العسر يتيسر
تحل الشدد....منها المدد
ام الوفه... هي السند

معروف اليدك هلـ باب. باب الفرج يلكاها
———————————-
هنيال هاي المرأة دين و إيمان
تحجي بفضلها اسيه وبت عمران
بيّضو وجهه هلـ بنين الشجعان
بنهر الشرف...الدم نزف
جف الكمر ...اغله هدف

رب الوفه يحجي الكون...فوك النجم علاها
—————————————
انخة الكريمة الفاضلة متردك
اكبر همومك احجي يمها العندك
توكفلك بكل مشلكة لو وحدك
باب الكرم ...يجاوب نعم
يمها ابد... يحصل ندم

متعض اصابع والله... كلبك يسر إوياها
—————————————-
بدويه وطاهرة نسب بين الناس
احتارت قواميس الوصف بالمقياس
عزها وفخرها والنعم من عباس

بحور الجنة ...بيها اتحفنه
هاي الحرة...جوهر ربنه

ياتاريخ الينصف راح...سورة وفه يتلاها
—————————————-
تاريج المجد طول الزمن ينصفها
بهذا النسب بنت الشرف يوصفها
عن السبط ريح الدهر تعصفها

لعقد الوله ...حبها اعتله
يامُنيتها ..... و ابكربله
جم امنيه وبالاحلام....شوك البعد أذاها


علي موفق القزاز

يايوسف جروحي طوّل غيابك
انا امك حبيبي ناطره ابابك
يمه وديلي الثوب
ويلي كالوا مسلوب
عميّه عيوني يحسين
——————————————
والده وكلبي عصرني عني يحجيلك حناني
اني يعكوب انتظارك بلهفه اتنطر تراني
الهوه يخنكني يمه ما اشم عطرك شجاني
مايهون اعليه بعدك ميته والله عساني
ربيتك بعمري يااسعد ايامي
ترجع واشوفك واطيّب الآلامي
شيصّبر كلب يعكوب
ويلي كالو مسلوب
عميّه عيوني يحسين
———————————————
يوسفه ليعكوبه ردّله بعد ماطوّل مغيبه
وبقميصه عطره طيّب صبح لعيونه طبيبه
كلبي يلجمني لوجوده يلتقي راد بحبيبه
دعوتي ربي اسألك سالم الغايب تجيبه
يافرحة سنيني اتنطرك ترجع
اعز من بنيني كلهم الاربع
بغيابك اتعذب جم دوّب
ويلي كالوا مسلوب
عميه عيوني يحسين
———————————————
بس علامه ردت منك يكشف الهموم العليه
سفرتك ياعمري طالت هم الك يوليدي جيه
امك وتعرف شعوري ياحبيب امه الزجية
مالي قوه بعد يمه يمتى احضنك بين اديه
بحسراتي ورجائي ارحم دموعي
يا كسرة فراكك كسرة ضلوعي
وكليب الفاكد متعوب
ويلي كالوا مسلوب
عميه عيوني يحسين
———————————————
عايشه بنار اصطباري ممتلي كلبي نوايح
جنها روحي مني طلعت من كلتلي يمه رايح
شلون يالغالي عفتني عله خدودي دمعي سايح
واني موتي مني يدني وللمنيه دهري لايح
امنية إلموتي من يدك بابي
عمري مااعيشه من غير احبابي
وجمرات الغياب تلوب
ويلي كالوا مسلوب
عميه عيوني يحسين
——————————————-
طارشك لمن وصلني زيّد جروحي وعذابي
من نشدته يمه عنك اقراه بعيونه جوابي
يعظم الله بكل بنينج هذا ماهمني مصابي
عنه محبوبي سؤالي شابحه عيني اعله بابي
ابن حذلم يكلي ذبحو حسينج
ومايفك حزنج تخلصي سنينج
بنايباته العمر مصيوب
ويلي كالوا مسلوب
عميه عيوني يحسين
——————————————-
ماجبتلي يبن حذلم رايده اشتم عطوره
من طفوفه اوياك جايب الغارك بدمه نحوره
اعمامته وذيجه ثيابه يخفف الآلامي الصبوره
رد يكلي لجن ماكو سلبوا إثيابه الطهوره
وخنصره المبتور لو تشوفينه
والجسد دامي اموذرينه
وجه السمه مخضوب
ويلي كالوا مسلوب
عميه عيوني يحسين

علي موفق القزاز

انتَ لاهوت الوفاءْ
انجبتك كربلاء
السلام عليك ياابا الفضلِ
————————————-
يا كمر مثلك تشبه بكل وصف روح الكمالْ
سُبحان رب القدره صنعه اكملك روعه الخصالْ
اختارك إلباري بعظمته باعثك هذا الوصالْ
انت لوحه راسمك رب القدير
بالشهامه البيها نازل جن امير
واليشوفك والله بوصافك يحير
في حِجِر خيرُ النساءِ ربتك أُمُ العطاءْ
————————————-
عُنفوان الأخوَ كنتَ انتَ يا بدر الوجود للحسينِ كان عهدك للهِ اوفيت العهودْ
للوفى كُنت اميرًا حينَ ضحيتَ الزنودْ
انت ماي ولسه جودك مايجف
انت راية مفخرة ولسه ترف
لجن سهم الصوبك حار وصلف
من رسالة كبريائك بِها تحكي كربلاءْ
——————————————
للعُلى حقا مضيتَ حاملاً دين السلامْ
وبِكَ البِئسَ تسامى خيرَ صنديد وهمامْ
تباهى عزًا كُل امامٍ واصطفاكَ على الانامْ
وانت يا عباس ربك قدسك
صاغ من اعظم جنانه سندسك
بالكرامه البيها نايل مؤنسك
تممت فرض الإطاعهْ وأبشرك رب السماءْ
——————————————
عَجَزتْ ألسن توصفك اي وحقُ الذارياتْ
يوم قلتَ النفسُ هوني لم تَذقْ عذبَ الفراتْ
كرست معنى الوفاءِ خالدٌ ذكرُ الأُباةْ
يوم صارت عالشريعه الفاجعه
وتنظر الجربه وجفوف مكطعه
وهنا روحه يم خيامه مرّوعه
وانت جنبُ النهرِ تنزفْ خَجلٌ والله حياءْ
——————————————
للحسينِ قالَ شِعرك معك أمضِ ماتُرِيدْ
للبصيرة كُنْتَ نافذ نَعَمْ للسبطِ الشهيدْ
انتَ ذِكْرَكْ يحيا فينا أَينَ عَنْ ذِكرك يَزيدْ!
والنعم منهه الربتك ام البنين
زلمه كلفه مابخل بدمه الحسين
هايه بس افعال ندري المتقيين
معهُ الموتُ حياةٌ لَمْ تُبالي بالفناءْ
——————————————-
مِنْ سماءِ العزمِ آتٍ ترتجي منهُ القبولْ
آل بيتُ الله انتم عنكم ماذا اقولْ
اقبلوا العبدُ آتاكم سيدي يبنَ الرسولْ
هاي ساعات الاخير للكمر
بدمه كاتب هالوصيه عالنهر
سيدي عذرًا اذا حالَ الدهر
مِنْ دمومِ التضحياتِ انتهى عهد اللقاءْ

علي موفق القزاز

نْاحَتْ سُوْرَةُ النَحْرِ.... .جَفْىٰ ضّامِيًا صَدْرِيْ
طِفْلِيْ أيْتَمَ عُمْرِيْ
_________________________________-
يْا طِفْلُي أتْعَبَنِيْ قَلْبَك اليِسْعَرْ
وا لَهْفِي عَليّكَ بِسَهمٍ تُنْحَرْ
كَبدِي فَلْذَةُ مُنْيَتِيْ تَكْبَرْ
وَعُمْرِيْ وِرْدَهُ يَذْبَلُ أسْفَرْ
دَمعِْ راْحَ يَرْثِيْنِيْ....قْابَ المُوْتُ يِدْنِيْنِيْ
يَحْكِيْ لَوْعَتُ كَسْرِيْ
طِفْلِيْ أيْتَمَ عُمْرِيْ
_____________________________
أ دِماً تُسقْىٰ يَكونُ الفِطْامْ!
مْاتمَ آهٌ مِنَ عُمْرِكَ عْامْ
مَكانْ الماءِ تَسْقِيْكَ السِهامْ
أُطْفِأتْ كَشَمسٍ بِلَيلِ الِلآمْ
أطْفَوا شَمْسَ أيْامِ...دَماً تَبْكِيْ أحْلاْمِ
لَمْ يَذِقْ الهَنْا صَبْرِيْ
طِفْلِيْ أيْتَمَ عُمْرِيْ
___________________________
نَزَفُ مَهْدَهُ الخْالِيْ دَماْ
عُطْرٌ بْاقِيْ فِيْهِ بَثْا ألَماْ
أدْهىٰ الفِراْقُ الخِيْامُ هَماْ
إخْوَتهْ بَيْنَهمْ فَقْدُهْ خَيَّماْ
خِدُودٌ هَلتْ الدَمْعاْ...أهْفُوْ بِمَهْدِهِ أنْعاْ
ما يُخَبِ جَوى دَهْرِيْ
طِفْلِيْ أيْتَمَ عُمْرِيْ
____________________________
شُبهَ كَوْكبٌ دُرِيٌ يَكونْ
جَمْالٌ أسْحَرَ شَغْف العِيونْ
مَلاْيِكْ عِنْدَهُ جِمْرُ الشِجونْ
ذَبِيْحاً ضْامِياً شَرْبِ المَنونْ
لَمْ يُسْقىٰ الفُؤادُ شَرْباْ...يَشْكوْ راْحَ لِلرَباْ
أوْكَلتُ للرَحْمنِٰ أمْرِيْ
طِفْلِيْ أيْتَمَ عُمْرِيْ
___________________________
دَمُكَ الطْاهرِ بِالرَمْلِ إمْتَزجْ
كَـ لؤلؤٍ يَسِرُ أحْداْقَ المُهَجْ
تَوْسَدَ جِسْمُكَ بِحرِ الوَهجْ
رِحْتَ تَنْزِفُ بِمْوطءِ الرَهجْ
عَليْكَ أبْكَتْ العَّلياْ .... دَمٌ هَلتْ الثَكلى
ضْاعَتْ شِهُوراْ في سَهْرِ
طِفْلِيْ أيْتَمَ عُمْرِيْ
_____________________________
لِنَحْرٍ بَكتْ أعْبارْ النَدى
ضّجى نَحْبَهُ أصْداءُ المدى
أنْبِياءٌ وَرسلٌ وأخيارُ الهُدى
أهجعا بالحزنِ لابنِ الدُجى
كَخَريفٍ ذاْبِلٌ وَردِيْ... ضّاعَ العُمرُ مِنْ عِنْدِيْ
أمسى يابِسٌ ثَمْرِيْ
طِفْلِيْ أيْتَمَ عُمْرِيْ

علي موفق القزاز

إلكربله جان الحسن مضمونه
إدير ظلت للحسين عيونه
—————————-
عند غاية ومعرفه بهذا الصلح
مو طمع كرسي ولا مُلك وربح
عنده دايم يبقه دين الله السمح
وينعبد رب السمه مكنونه
——————————
النّور ميصافح ابد ايد الظلام
والرساله يريد الدينه التمام
إشرارة الثورة بدت بهذا الامام
نورَ ماكدروا ابد يطفونه
——————————
يستمر نهج النبي يعم العدل
ينعبد رب السمه هذا الاصل
لا هبل رب اتخذ من ينجعل
ويُمحه دين المصطفى ينهونه
——————————
غايه عدهم واحده كرسي الحكم
من ال سفيان الغدر واهل الظلم
يريد ابليس ايتصدر بكل جرم
ابليس يقيم الشرع يردونه !
——————————-
مبدأه جان الحسن طف كربله
يستقم دين السمه بأهل العُلا
إتوّذره احسينه عسلان الفله
خامس اصحاب الكسه يذبحونه
——————————
البيض بالطف تّنهشه مامعترض
دين جده غايته من ينحفظ
وكل عباده اديم كل ذكر وفرض
يريد دين الباري ميتركونه
——————————-
عاف دنيه الفانيه وجان القرار
ثبت ابدم الشرف هل انتصار
وراح باجر عيلته بغربه تُسار
خلاف عينه الحادي يحدي إضعونه

عل موفق القزاز

راسه نزله يارمح
عمري صار بلا صبح
يارمح وارحم حالي
نزلي راس الغالي....يارمح
————————————
بالله اسألك يارمح وانته تعرف حالتي
الليل ساهر ماغفه وي غربتي ودمعتي
الجان تارس هالعمر هجره تارس صفنتي
راح إمن ايدي الابو بعيني ظلمة دنيتي
ليش وجه كل دم
شوفته صارت عدم
مني خذت آمالي
نزلي راس الغالي....يارمح
———————————-
يتعب اشوفن منحره يرتاح خله بحضني
ياذيه ادري لو علم من السوط ينزف متني
من شيبه امسحها الدمه رغم الحبال تعتني
من دمعي اقطرله ردت واروي شفايف ذني
شفاف ابوي مفطره
كسر ظهري منظره
نزف دم دلالي
نزلي راس الغالي...يارمح
———————————-
يابويه انظر جبهتك باقي اثر ذاك الحجر
لمن احضنك بي شفت اثنعش طبره عالنحر
المن عفتني بيا جرح زماني شبعني قهر
بنيتك انه و ياراحتك متعب عيوني السهر
افياي اسويله ردت
ياويلي يتلوه شفت
راس الحنين اكبالي
نزلي راس الغالي...يارمح
———————————
هل فاجعة بيهن تمر كلمن اجت تشكيلة
هاي الفواطم حايره بعازة ابو هالعيلة
هضموها تدري بنيتك فاض الدمع مسيله
اني رقية الغالية ضيم اليسر ارويله
مني خذوا ترجيتي
وناكة هزيلة ناكتي
حادي الضعن جتالي
نزلي راس الغالي....يارمح
——————————-
عمتي العقيلة حايره تعاتب اشوف بعمي
اعتاب الاخو وبلا زعل وتگله ريتك يمي
مدللنه كل يومك جنت وجان الاميره اسمي
دار الوكت رحنه بسبي وعكبك تغيّر رسمي
اكعد تكله ياكمر
بالغربه ودانه القدر
انت المحامي الوالي
نزلي راس الغالي....يارمح
——————————
عطشان يارمح الابو تلهب جمر لهاته
يقشعر جلده ياوسف من ينظر إبنياته
مايحتمل انا انولي يغمض شفت نظراته
من اشكف اسياط الزجر عالي صده وناته
خليته عاري عالثره
فاجعني والله هالجره
ذبح الابو يبرالي
نزلي راس الغالي....يارمح

تمت

علي موفق القزاز

ابني من دم منحره مغسلينه
ذنبه شَربة ماي ممشربينه
——————————
جانت احلامه زغيره هالطفل
جن بدر بليلة تمامه مكتمل
راد شربة ماي مو مالت جتل
ابني ياناس العده معطشينه
——————————
يبجي كاروكه من إمناغه سكت
شهل مصيبة عالكلب من انزلت
بضيم احزاني وجروحي فرفحت
والده وكلبي بألم مرّوعينه
——————————-
عله خدوده يغفه وينام النده
ترف ابني وحار رمل ايوسده
والضمه بذيجه شفافه يمرده
اه من ذبحوا جمال اسنينه
——————————-
برد حضني وكل حناني انذبح
يوم كالوا ركبته دمها انسفح
لا هنا عمري ولا حزني برح
من يرد لخيمته مخضبينه
—————————-
بين اديه تغفه يوليدي جنت
لجن باحضان المنايه غربت
فكدك ادهاني تراني اتلوعت
يساعده الله والده ويعينه
——————————-
ويلي ياسهم الغدر حار الاجاك
عجب ستة اشهور ماخلص رباك
ريت اشوفنه كبر طولك هذاك
ادعي ربي هالصبر ينطينه
——————————-
والبراءة تنام يحضنها التراب
ذاك طولك يختفي يصبح سراب
وجهك النوراني بدموم الخضاب
وبيَّ جن سهم الاسى مصوبينه
——————————

علي موفق القزاز

عليله ودهري طاوعني وأتنطر بعد جيه
اكولن ترجع احبابي ادعي ربي يوميه
""""""—————-"""""———
حمّل ضعن احبابي ونزلت دمعتي بخدي
من هذا السفر خايف ماخله اخو عندي
ارد امشي يبويه وياك روحي اوي الضعن تحدي
واشوف احزاني مشرعه تطحن روحي ليليه
—————————————-
الغايبله ابو ياناس بشغف يتنطر اخباره
اجيبه الحسبه وتوديه تربي عالباب انظاره
جم موقف تذّكر راح خيمه الوالد للداره
رايح ياعمود البيت تشيل اوياك الحنيه
—————————————-
ملاني حجي الهجران بنار الفركه محتركه
تدري بس دواي انته وتطيّب علتي الملكه
عليله ودهري عاكسني عيشني طعم الفركه
صحت ياعازة الاحباب تعرف لوعتي البيه
—————————————-
كلما يتحرك الباب جايب هوه احبابي
إلعليلتكم همْ ترّدون وانسه محنة اصوابي
واشيلن بيدي عبدالله وتكّحل عيني غيابي
شكثر مشتاكه يسكينه غيابج طوّل اعليه
——————————————
ورقيه بلهفه تحضني وعالخد دمعتي اتلالي
ما غبتي عن بالي يوم غالي يحضن بغالي
يطاريكم هوه عذيبي يضمد جرح دلالي
واسولف غربتي وهمي نزلت دمعة ارقيه
——————————————
وعباس الكمر كلي هلا ببنيت احسيني
ياهيبة بني هاشم ياعمي يضي عيني
كل غربة سنيني تروح من عمي يحاجيني
والصدره يجي يضمني واحضنه بجفوف اديه

علي موفق القزاز

المن تخليني ..يلماخذ سنيني
ترجعلي وانتظرك
وين وين حاجيني يوليدي
وين وين يافرحتي وعيدي
ترجعلي وانتظرك
———————————-
گلت جّسام يكبر وبيدي ازفنه
ابني وحكي افخر بتعبي اكبرنه
لشبابك راح احضر الياس والحنه
يوم ويوم يكبر حلمي الاريدنه
تحجيلك احلامي...تفرّحها ايامي
يلمكتمل بدرك
وين وين ياشمعة ادروبي
وين وين بدمعاتي مكتوبي
ترجعلي وانتظرك
——————————-
ثوب العرس يمه لايك لطولك
واشوفن للحرب لامه يفصلولك
متعني لطفوفك كاموا يكلولك
ولنصرة احسينك يبني يحجولك
ينصر ابو اليمه ...يضحي اله بدمه
تفدي اله عمرك
راح راح يبني تفاركني
راح راح دهرك يباعدني
ترجعلي وانتظرك
————————————
لكلشي محسبه وممحسبه لوداعك
سفينة حبنه تغرك لو كسروا شراعك
باجر من تردلي شمكثر اوجاعك
وبجسمك جروحك صايره امتاعك
عايفني يوليدي...وانه اصفك ابيدي
ماينتظر دهرك
وين وين دمعاتي بخدودي
وين وين لتخّيبه معهودي
ترجعلي وانتظرك
————————————
طفوا شمعتي يوليدي من امشيت
ياخطوة رحيلك ارجعلي ماحنيت
لوّن مره تجيني بالطف مامريت !
تدري بعيني دمعه من رحت ماخليت
متحيره خلاني...ماتخلص احزاني
ادور العطرك
وين وين يلدوهنت فكري
وين وين مايحتمل صبري
ترجعلي وانتظرك
————————————
ساعة من يرد متخضب بدمه
عله احواله منكسر ياناس عمه
ويجيبه لخيمته وانتحب يمه
دحاجيني يجاسم وكول يايمه
فدواتك دحاجيني...فايضلك حنيني
وبياكلب انظرك
وين وين هالرايح جماله
وين وين وترابه حلاله
ترجعلي وانتظرك
————————————
لهل ساعة تمنّوا ربعك يزفوك
مو رايح الحتفك وبالدمه يشوفك
يبني وانت نايم عالرمل إيخلوك
مكطع ذاك طولك عطشان ويذبحوك
يامعظم مصابه ...من دفنو شبابه
واتوسد بكترك
وين وين ماترحم ادموعي
وين وين احزاني موضوعي
ترجعلي وانتظرك


علي موفق القزاز
( وزن المذيل-المقطع)

ياعباس يعضيدي ياذخري
ياعباس ليش اكسرت ظهري
—————————————-
للمشرعه رايح صحت وحدي تخليني
يعضيدي غيرك ماالي ترجعلي حاجيني
سكنه تكلي من الضمه ذبلت رياحيني
بجودك يعمي مرّوتك وترد ترويني
ياعباس منتظره ياعمري
ياعباس ليش اكسرت ظهري
—————————————-
ياخويه جنك ماترد واتحير بهمي
جنّه وداع الموت الي وبي انطفه نجمي
وينك يكفال الخدر بيك الضعن محمي
تسمعها اطفال وحرم وينه الكمر عمي
ياعباس شنهو بعد عذري
ياعباس ليش اكسرت ظهري
—————————————
اعليك زينب يالاخو بالخوه احلفنك
بهل دنيه مثلك ماحصل واحد اخو منك
ذبيت جفك عالنهر وإسهام صابنك
وعيونك التنزف وفه خجلانه اشوفنك
ياعباس وبحالي لو تدري
ياعباس ليش اكسرت ظهري
—————————————
يانفسي هوني للعذب خله الكلب يضمه
وفاي انت والنعم امك هلـ إمعلمه
بدوية هاي الربتك عالشيمه اتكلمه
وتكله يبني هاي ابد يعطش ابو اليمه
ياعباس بالطف يظل فكري
ياعباس ليش اكسرت ظهري
—————————————-
ماقصرت ياالفضل وفيت بعهودك
اروع مثال بموقفك كطّعوها لزنودك
وانتَ بعظيم المنزله مشكور مجهودك
رواي تبقه بكربله وشاهد يظل جودك
ياعباس باقي عذب تجري
ياعباس ليش اكسرت ظهري
—————————————-
شكد عظيمه وكفتك ياصاحب الرايه
كدها اعرفك ياشهم من تنطي الحجاية
متخلّف ادري ام الوفة بس ناس وفايه
ومعروفك بحلگ الزمن يترجم لأيه
ياعباس و اليشهدك دهري
ياعباس ليش اكسرت ظهري

علي موفق القزاز

اعله ابني جنّها مشتبكة الهنادي
و الكلب جنّه سمع يمه ينادي
يمه يا ليلى يصيح
اكبرج طايح ذبيح
————————————
بيك اشمن ريحة موادع اخير
تاه فكري واعرفه هذا المصير
احساس كلي يرجع اوصاله بحصير
وحيره تاخذني وترد ونوب احير
يبني اني ودمعتي بحسره اكابر
ربي احفظلي علي من المخاطر
دمعتي من دم تطيح
اكبرج طايح ذبيح
—————————————-
يا الهي ويستغث خاف الكلب
والسيوف تحيطه و ارماح الغرب
مكطع اوصاله وبقه دمه يصب
البيض هاي مشرعه ابصدره نصب
كعبة صار بحومته وجسمه تطوفه
الكّطعو اوصاله منو يكدر يروفه
عالارض دمه يسيح
اكبرج طايح ذبيح
——————————————
جسمه رايح تنهشه حصة الرماح
وهذا ثوبك يلولد بحضن الجراح
يمه تاركني رحت بس للنياح
مابرح حزني يظل ليل وصباح
هالجمال الاحمدي تلمه حصيره
وهذه عظامك تنجوي بحر الظهيره
نايم معفر جريح
اكبرج طايح ذبيح
—————————————
صدك ما اشوفه بعد يمه الجمال
والربه تعب السهر ذاك الدلال
اعله هونك يلولد جن حملي مال
دهرك يكلي بعد يرجع محال
جن اشوفه المصطفى بالطف رميه
و مكسره اضلوعه بحوافر اعوجيه
ويلي بالبيده طريح
اكبرج طايح ذبيح
—————————————
ابن غانم ماسلم من ضربتك
الحومه طلكت ولطفوفه جابتك
وجفوف ابو فاضل نعم من ربتك
يعني خريج الشريعة سيرتك
تربية عمه وكفو بدر الهواشم
وراسه بيده حامله لبكر بن غانم
هاشمي وسيفه صريح
اكبرج طايح ذبيح —————————————-
هي مو تعلوم معروفه الطباع
علي من حيود الوغى تعده السباع
من جثههم مشبعه بسيفه الجياع
تسجد اركاب العده برهبه تطاع
من برز ياهيبته مفرّگ الكتايب
عنده نزهه من دخل سوح الحرايب
بالحرب دمهم تبيح
اكبرج طايح ذبيح

علي موفق القزاز

لبّوا لهل الموزمه احبابك
بيهم اكشخ ياحسين اصحابك
———————————
كعبة للدين اصبحت راحت تطوف
بالدمه هل تلبية تحجلك إلوف
والهدي عدهم نحر تحفه السيوف
وبشيبته يهوس ابن ظاهر تشوف
والنحور اتقدمت ابابك
———————————
هذا يوم التضحية تحج النحور
تحت ظلك سيدي اعظم شعور
لك عذرًا إذ بدى منا قصور
لهل الشرف هذا نعد صرنه شهور
نروح فدوه سيدي لترابك
———————————-
الشاكري بعشكه لبو اليمه فصح
ياجنونه الهايم من كلبه طفح
عمره يخسر حبك الطاهر ربح
مايهمه لوّن هل دم انسفح
و الغياره ناطره إجوابك
———————————
الرياحي بتوبته جابه هواك
يبو اليمه اقبله العبدُ اتاك
عفوك ولنصرتك طالب رضاك
با ابي انت وامي كلنه فداك
والعبير اطيّبه اطيابك
———————————
صحبة ماعدهم تراهم مصلحه
انت يحسين الوسيله الواضحه
باعوا الدنيه بتجاره رابحه
كفته بين البشر هالراجحه
كلُ نفسً بالطفوف احجابك
——————————-
على المنية من إجوا يتسابقون
للعقيده صحبتك يتنافسون
الامنوا بحبك غدًا هُم مفلحون
لا يضيّع الباري أجره المؤمنون
كلها ترخص ناذره اعله اعتابك
———————————
شلون صحبه خيره أُولي الالباب
الذين اعطوا باليمنه الكتاب
للديانه لاذوا ولاهل الصواب
ضحوا بأغله ثمن لسيد الشباب
وبدماهم رتلوا اكتابك

علي موفق القزاز

عّباْسُ يا سّنَدِيْ كَفْالُ زَيْنَبْ
أَ كوْكَبٌ أَمْ وَجْهُكَ المُخَضَبْ
أَنتَ كفيلُ الحوراءْ ...ابا الفَضِلْ
مِنْ كفِكَ أُشْتُقَ الماءْ...ابا الفضلْ
*************************
يْامُؤنسَ القَلبِ إِنطوىٰ وَكفُكَ السَلامْ
أَبْكيكَ يابَدرًا رَحلْ مِّنْ عِاْلمِ الخِيامْ
ماحْالُ تَبقىٰ أَنجمي أَندىٰ بها الظَلامْ
وَالَليلُ عَنْكَ يَنْسَأَل أَينَ بَدرُ التَمامْ

يا بَدْرَ لَيْلِيْ فيّ عاْلَمِ مُغَيَّبْ
أَ كوكَبٌ أَمْ وَجْهُكَ المُخَضَبْ
للدهرِ تحكي العلياءْ ...ابا الفضلْ
مِنْ كفكَ أُشتقَ الماءْ...ابا الفضلْ
""""""""""""""""""""""""""""
إِركبْ بِنَفسيْ يا أَخيْ عَباسُ ياحِماناْ
أَثْقَلتَ تَدْريْ شِدَتيْ لَماْ هَوىٰ لِواناْ
أَنتَ عُضيدُ مِحْنَتيْ صَّبَ الدَهرُ هَواناْ
إِلِيكَ أَشكوْ وَحْدَتِيْ ياسَيِّداْ رَجاناْ

يانَبْضَ قَلْبيْ مَنْ غَيركُ مُعَتَبْ
أَ كوكَبٌ أَمْ وجهُكَ المُخَضَبْ
يندبُكَ خدر السماءْ..اباالفضلْ
مِنْ كفكَ أشتقَ الماءْ...ابا الفضلْ
"""""""""""""""""""""""""""""
ماْلِي أُناْدِيكَ أَخي وَ أَنتَ لا تُجيبْ
إِسْتَضْعَفونِي قَومُكَ في كُرْبَتِيْ غَريبْ
ياكَوكَبَ الطَفِ إِنطَفىٰ مُذْ عَنهُ تَغيبْ
هذِي نَواْئحُ زَينَبً أَمَلئَها النَحِيبْ

أَخَشىٰ عَليها قَلبُها يُعَذَبْ
أَ كوكَبٌ أمْ وَجهُكَ المُخَضَبْ
قُم واطويها البيداءْ....ابا الفضلْ
مِنْ كفكَ أشتقَ الماءْ...ابا الفضلْ
"""""""""""""""""""""""""""""
جَنْبُ النَهرِ مُصّحَفٌ آياْتَهُ شَكِياْ
وَ دَمكُ شَذراً نَزفْ عِطْرَاً فاْحَ زَكِياْ
كَفاْكَ خَرَتْ ساْجِدَ شاكِرتً رَضِياْ
عَيناْكَ كانَتْ خاْشِعَة لِرَبِهاْ سَّجِياْ

الجَنةُ بعِطرِ رَحِيقْكَ تُطَيَّبْ
أَ كوكبٌ أَمْ وجهُكَ المُخَضَبْ
يا فارسً أَشضى الاعداءْ...ابا الفضلْ
مِنْ كفكَ أُشْتُقَ الماءْ ...ابا الفضلْ
"""""""""""""""""""""""""""""""
ياكافَلاً خِدْرَ السّماْ عَليكَ الإِلهُ صَّلىٰ
ناْفذَ بَصِيرةً كُنِتَ بِكَ المَعصومُ أَدلىٰ
يَتلوكَ قُرآنَ الوَفىٰ وَحيُّكَ عَباْسٌ جَلىٰ
بَيْنَكَ المْاءُ إِرتَوّىٰ كَفيّكَ آياْتٌ تَلىٰ

سّاْقي عُطاْشىٰ كَربَلاءْ مُلَقَبْ
أَ كوكَبٌ أَمْ وَجهُكَ المُخَضَبْ
لِجودِكَ تتعالا الاصداءْ...ابا الفضلْ
مِنْ كفكَ أُشْتُقَ الماءْ...ابا الفضلْ
""""""""""""""""""""""""""""""
أَخياْرَ كُنتَ نُصرَتي كـ هارونٍ وَزِيراْ
وَ صاْلَحٌ عَبداً نِلِتْ مَراْتِباً قَديراْ
أَوسَعها الباري غُرَفْ مَنْازِلاً مُنيراْ
هذْا جَزاْءُ الصّالحِ في جَنةٍ مَصيراْ

يُبْلُغَكَ البْارِيْ مَعْالِيا مُرَتبْ
أَ كوكَبٌ أَمْ وَجهُكَ المُخَضَبْ
ما أعظمَ هذا الجزاءْ...ابا الفضلْ
مِنْ كفكَ أُشْتُقَ الماءْ ...ابا الفضلْ
"""""""""""""""""""""""""""""

علي موفق القزاز

قصيدة ثلاث دكات (وزن الدارمي)

ياليل الاوداع...لاترحل بساع
شلون بِضعون السّمه
تحديها أَهل الظالمه
يا ليل الاوداع
————————————-
يا ليل طوّل ارتجي بهاي المسيه
اجروح يضملي الصبح بالغاضرية
وريح للفركه اشم بأهل الحميه
صاير موادعنه صدك تحجي الرزيه
يا ليل الافراك....تخليني اشتاك
وتبدي الليالي المؤلمه
تحديها اهل الظالمه
يا ليل الاوداع
————————————
حسين دمعاته تصب ودمعة أخيّته
باجر لوّن طر الفجر يحضني شفته
يمسحها بيده دمعتي ومن نحره بسته
هذي وصية فاطمة تشمه بركبته
إيذبحون الحسين..باجر تشوفين
بجفوف هاي الناقمه
تحديها اهل الظالمه
يا ليل الاوداع
————————————
انته يخويه الإكفلت بيهه ضعوني
إشكد عظيمه خوتك كتلي بعيوني
ذاك الدلال وهيبته إيودعوني
بس ليل واحد ينتهي اويه الدليلوني
كتلي يعباس...خدرج مينجاس
غيره وحميه ومرحمه
تحديها اهل الظالمه
يا ليل الاوداع
————————————-
بحسره خيامك ودعت بكسر الخواطر
ريت ما يطلع صبح لايجي باجر
كل غالي باجر مايظل بدمها المناحر
باجر اشوفن بس حرك ذيج العساكر
يا ليل الامصاب...متبقي احباب
يصوري ليلك بي دمه
تحديها اهل الظالمه
يا ليل الاوداع
—————————————
يا بابا جم جلمة اسمعت تبجي بناتك
تكلك يبويه لو رحت نموت وغلاتك
باجر يتاني جم سهم ياخذ حياتك
وياك بس ليله تظل بس ذكرياتك
بأيتامك شلون... لمّن ترحون
باجر يرّوعها الضمه
تحديها اهل الظالمه
يا ليل الاوداع
————————————
للسبي يا ليل استعد تبدي المصايب
اه من يوم احدعش صرعه الحبايب
كلها الحيود مخضبه فوك الترايب
يادهري إجروح وهظم لدلالي جايب
هاي الفجيعه ...بالطف صريعه
يادهري كلبي لاجمه
تحديها اهل الظالمه
يا ليل الاوداع

علي موفق القزاز

ليلة وحده وزينب توّدعوها
باجر بدرب السبي يروّعوها
———————————
ليلة بيها يعيش بس طاري الدمع
وبيه ونات الثكالى تنسمع
ظهر باجر مايظل هذا الجمع
والاماجد باجر ايذبحوها
———————————
هيه ليله و الابو يوّدع البنات
خلاف عينك والله ماتسوه الحياة
مدللاتك هالتون متحيرات
خيمه لعياله الابو تدروها
———————————-
هيه ليلة نشاهد يطول الوداع
يصيح كلب الوالده كل حلمي ضاع
اه يوداع الابن لجروحي ذاع
تعب عمري وردتي يقطفوها
————————————-
يموت كلشي باجر تعيش الجروح
وين زينبكم يهل نخوه تروح
كل كلب يم جثته تسمعه ينوح
بالحبايب باجر ايفجعوها
———————————-
باجر الاحباب صرعه عالثره
لاجل دين الهادي يبصم منحره
والحرم تفتر تظل متحيره
والطفوف ابهل دمه يكحلوها
———————————-
عالشريعه ينكسر ظهر الحسين
طايح اعضيده البقه ينزف حنين
لخوتك الگه بعد ياخويه وين
خوّتي ياحسرتي طشرّوها
——————————
بظهر عاشر تحترك كل الخيام
ويحدي بضعون السمه ابن الحرام
بالطبول الصاخبه إضيّفنه شام
بالطبول وبالحجر يلاگووها
———————————-

علي موفق القزاز