جديد وفاة الأمام علي | 2023

| ماتت احلام |

• | أداء :
حميد التميمي

• | كلمات :
مهدي التقي

• | التوزيع و الهندسة الصوتية :
علي ميرزا

• | إخراج مرئي :
حارث العقيلي

•| الإشراف العام :
خالد البراك


________
📺 *للمشاهدة*|🔻|*YOUTUBE*
https://youtu.be/vbJMR3-cNfo
________

•| إنتاج :
قناتي العقيلة و أم البنين
2023 م - 1444 هـ

بويه زيـنب دمعِتِـچ .. لا تِجِف عليّه
خَمِس معصومين إلچ .. تآخِذ المنيّه
لَتبچين .. سهل راسي المنضـرُب
لَتبچين .. بعــدچ إبنـصّ الدرُب
ــــــــــــــــــــ
إنتي آية صَبُر بويه .. الحيدر نازلـه إبصُلبه
چبيره ومن علي إحچايه.. هاچ إخذيها من گلبه
طلب واحد يضي عيني .. أبييچ منـچ إيطلبه
قل لا أسـألچ بنتي .. إلا الدمعــه فـي القُربى

دمعج الـ عالخد نزل .. غالي يا نقيّه
بعده دربچ ما خلص .. دمعتچ قضيّه
تِنوحين .. وانتي دمعچ ترسه حُب
لَتبچـين .. بعــدچ إبنـصّ الـدرُب
ــــــــــــــــــــ
اعله كل معصوم من عدنه .. كون الدمعه متوزعه
احنه اهل العبا الخمسه .. نموت وحصْتِچ الدمعه
هذا إلـ سَمّ رسول الله .. وذاك اليعصر البضعه
وانتي ابين ذاك وهاذ .. كل يومين إلچ فزعه

يـ أم ابوها وبالدمع .. تشبه الزچيّه
قصّتچ ويّه البچي .. قصـه يوسُفيّه
تِصِيرين .. كعبَة وبنص كل گلُـب
لَتبچـين .. بعــدچ إبنـصّ الـدرُب
ــــــــــــــــــــ
أمس جَدِّچ مشه وأمچ .. بچيتي هواي يا بنتي
هسه انتي بوسط دربچ .. عليّه عيون وشّلتي
بعدها طويله سالفتچ .. بعدچ لا طشت شلتي
اذا عالراس يتضـمّد .. شرايچ لو چَبِد شفتي

بالدرب سمّ الحسن .. بويه و إسمَعِيني
نعشي لو شاله المَلَك .. يا سَهَم يِجيني
تِسِمعين .. قِسْمي دمعچ من يصُب
لَتبچـين .. بعــدچ إبنـصّ الـدرُب
ــــــــــــــــــــ
اذا هذا القلـق كله .. بسبب جرحي سهل ينشد
آنه حسين قالقني .. العلى صدره الشمر يگعَد
أشوفن واگف بصفّچ ..حَنيـن ودمعه فوگ الخد
يدنگ راسه من يبچي .. وباچر عالرمح يصعَد

دمعچ الينزل عَلَيّ .. بيده خل يِمِسحَه
حصّتي خليـها إله .. من شـمر يِذِبْحَه
تركضين .. باچــر ابنـص الغُـرُب
لَتبچـين .. بعــدچ إبنـصّ الـدرُب
ــــــــــــــــــــ
يمراية دمع فاطم .. وموقف دمعتچ يُحْسَب
مرات الدمـع هُوّه .. ينزل يحفظ المذهب
بيوت أحزان من نبني .. نضمن حگنه لا يُسلب
ألا من ناصرٍ دمعچ .. من الطف للحشر (زيّنب)

دمعچ إيذل الشمر .. مــا تِذِل سـبيّه
والله يخلق لچ بَشَر .. تعشگ العزيّه
تِحَيّرين .. مَملكـه وفَهمِچ صــعُب
لَتبچـين .. بعــدچ إبنـصّ الـدرُب
ــــــــــــــــــــ

مهدي التقي

( گعديّه ) شكوى لأمير المؤمنين (ع)

شگد طاحـت ابمحـرابك أزلام
لهسّه اعله أسمك ننطي خِدّام
وبشيعتك تعدِم
أحفاد ابن ملجم
لهسه اعله أسمك ننطي خدام
ـــــــــــــــــ
يا علي اكثر واحد انته متابع وتعرُف وضعنه
احنه لوما نمشي خَلفَك چا بهاي الدنيا ضعنه
بوسط محراب الشهاده إي (وربّ الكعبه فزنه)

يا حيــدر وعندك عِلم
صاير ذَبحنه إعله الإسم
إشگد عالوطن نصرف زلِم !!
هواي طحنه هواي متنه

ما يخفَه عنّك وانته ابو اتراب
ما ضـاع حـگ أو خَلفـه طّلاب
ذبحونه چي نِخدِم
أحفـاد ابــن ملجم
لهسه اعله أسمك ننطي خدام
ـــــــــــــــــ
علي و مدري منين نبدي وياك عدنه شگد سوالف
وانته تدري شصار بينه الهسّه مرفوعه المصاحِف
مطرت الفتنه علينه وضاع دمنه ويه الطوايف
مصحف الباطل ما گطع
عالرمح باقي وما وِگـع
ضِد مرجعيّتنا إرتفع
والمُخالف ضل مُخالف

التاريخ نفسـه ونفسـه ينعاد
نفس السياسه ونفس الأحقاد
و إتْخَطّط وتِرسِـم
أحفـاد ابــن ملجم
لهسه اعله أسمك ننطي خدام
ـــــــــــــــــ
منين ما ألتِفِت أُقتَل والبلد مـا چَـن بلادي
بكل مكان انصلي كوفه أو وين ما نسجد مُرادي
من قطام الهسّه دمنه چَـن مُباح وهَدرَه عادي

وتآمــرَن چَن بالسَـرَه
من مَـرَه إتسلِّمها المره
ودمنـه اليُباع ويُشترى
إنموت ومچتْفَه الأيادي

حرب الجَمَل ما راضِيَه إتهود
كلساعه فتنه ومعركه إردود
إبدِيْن الله بس تِهْدِم
أحفـاد ابــن ملجم
لهسه اعله أسمك ننطي خدام
ـــــــــــــــــ
علي وچي مظلوم انته إبخطّك اشبعنه ظُلامه
الشيعي وهوه اباب بيته للأجل يِشدِدْ حِزامه
انطيح والقصّه نفسها وبابنه اتكضّه اليتامه

حبّك علي إعتبروا ذَنِب
وچيف اعله خطّك ننحسب
أيتـامنــه ما تنحسـب
ولحظه ما عفنه الخِدَامه

ما يخفَـه عنّك وانته أبو الثام
و عنــدك علي تِعـداد الأيتـام
وباحبابك إتيَـتِّـم
أحفـاد ابــن ملجم
لهسه اعله أسمك ننطي خدام
ـــــــــــــــــ
معصّبين الراس مثك والجرح كلسا . لچمنه
إسأل السجّادة تحچي وبالمساجد فاض دمنه
ألف ميّثم والف أبوذَر محّد إخلافك رحمنه

ولو تنگطع مِنّه اللّسِن
للموت يضحك لينه سِن
خيّــاله مَنهِـد الرِّسِن
لو ألف مره إنعِدَمنـه

المات اعله حبكم هذا مبخوت
احنه اعله ريحة حُبكم إنموت
وما بيهم أي مُسلم
أحفـاد ابــن ملجم
لهسه اعله أسمك ننطي خدام
ـــــــــــــــــ

مهدي التقي

بس موتي إلبي راحة بالي
بس الزهره إتعَرْف أحوالي
رايـح يـمّ فاطـم هالليـله
ويتلاگه الغالي ويه الغالي
ـــــــــــــــــــــــــ
هيّه الليله هـاي انطرها عالجمـره
شفت تتلاگه بيها العصره والطبره

صار اسنين .. مشتاگين
بس بالطيف .. نتلاگه
شبعنه افراگ .. شگد مشتاگ
وام حسين .. مشتاگه

هالليلــه إشــگد امتـانـيها
تُقبض روحي وتصعد بيها
حيدر رايح مِنهَد حيلـه
رايـح يـمّ فاطـم هالليـله
ويتلاگه الغالي ويه الغالي
ـــــــــــــــــــــــــ
وصل يوم الوصـال اللّي شِلِت همّه
علي إيجيلچ يفاطــم سابح ابدمّه

من المحراب .. لذاك الباب
ترَسنَه الگاع. .. من دَمنَه
مظومين .. شمسوين ؟
هاي الناس .. تِظلُمنه

بس سهله الطيحه ابمحرابي
ما دام أتلاگـه ويـه احــبابي
ما صح واحد حته أشكيله
رايـح يـمّ فاطـم هالليـله
ويتلاگه الغالي ويه الغالي
ـــــــــــــــــــــــــ
إتعَبِتْ وسنين حزني هواي صارلهن
عندي جروح بس الزهـره تندلهن

دنيا إتعيل .. وحملي إثگيل
و أم البيت .. ماهيّه
بس آهات .. بس حسرات
شابع موت .. ليليّـه

هالليله امشــي العالَـم ثاني
ومحسـن هسه هناك إيتاني
وليهسّه الزهره إتناغـيله
رايـح يـمّ فاطـم هالليـله
ويتلاگه الغالي ويه الغالي
ـــــــــــــــــــــــــ
حسـن وحسـين صاحـو بويه سَلِّمْنَه
و زينب أمّنَتْنِـي إتسَــلّم إعلــه أمّنه

بسم الله .. إلزينب آه
بتـنه هواي .. تتعذّب
والطـف جاي .. حته الماي
حسره يصير .. عد زينب

شِلْت أيتام إشـگد بعويني
باچر بأيتامي ايذبحـوني
يتطشّـر كـل شمل العَيله
رايـح يـمّ فاطـم هالليـله
ويتلاگه الغالي ويه الغالي
ـــــــــــــــــــــــــ
يتامــى الناس شِبعَت منـي حنيّه
هسـه أولادنـــه أتيَتّمهُـم الدنيّـا

إلنه ايتام .. ابلايه اخيام
عدنه إعيال .. تتطشر
جرحي ازغير .. طفنه إچبير
وإبني حسين .. يتوذّر

يالزهره الشغله وما بيهــا
باچر زينبــنه إنمر ليهـا
وليل الحادي التَّلّ نِمشيله
رايـح يـمّ فاطـم هالليـله
يتلاگه الغالي ويه الغالي
ـــــــــــــــــــــــــ

مهدي التقي

ها يفاطم چنها هـاي الليله هيـّه
هيّه طبره وجاي صوبچ يالزچيه
طولچ اليوم .. أنِظْـره
هواي مشتاگ .. يزهـره
ـــــــــــــــــــــــــ
كلشي مرسوم بسماها وكلشي واضح بالسمه
هيه هاي الليله چنها اتلـث ليالي امقسمه
غير واصفها محمد من رحت فدوه إلـ فَمَه
تفارگينه هواي فاطم يالله هانت فاطمه

صارلي سنين وعزيتچ ما عفتهـا
لسـّـه فاتِحتچ يفاطـم ماشتـلها
ربي عالصـار .. أشِكْرَه
هواي مشتاگ .. يزهـره
ـــــــــــــــــــــــــ
هيه بس تعْبَتْها طبره وكلشي يافاطم سهل
شوفي گلبي الطبره سهله ثگيل خليتي الحمل
الدنيا شنهي ابلا وجودچ ليلي ضل ما ينحمل
آنه من يوم الدفنتچ لاني ميت .. لاعدل

آنه كل ما أعبر اعله العتبه أذكرچ
الليله خطارچ يفاطم فتحي گبرچ
موعدي سنين .. أنطره
هواي مشتاگ .. يزهـره
ـــــــــــــــــــــــــ
هيّه تگضي الدنيا لاچن آنه گاضيها أنتظر
چنت اتاني الليله هايه وآنه واگف عالجمر
بالليالي الناس تحسب وآنه احسب كل فجر
چم فجر مرني و أگولن هذا بي راح أنطبر

هواي فارگتچ يفاطم كافــي فـرگه
هيچ وين الليله محسن بيدي أشبگه
محسن إچبير ؟ .. إعله كُبْرَه ؟
هـــواي مشــتاگ .. يزهـره
ـــــــــــــــــــــــــ
ناسنه إتتعب يفاطم راحت اصحاب الصدگ
شوفي گلبي شلون حاله مثل بابچ محترگ
إلـ تراب يغثني صاير أخذ وين الـ ينعشگ
ضگت كلشي الدنيا ضاگت ضَلّي بس ضيگة خلگ

الناس موش الناس ذيچ الأوّليّه
هسه بس البير يسمع كلشي بيّه
شعندي حسرات . أخبرَه
هواي مشــتاگ .. يزهـره
ـــــــــــــــــــــــ
ها . يبعد المايشوفن غير . بس أم الحسن
راحت الناس الأحبها الوطن مو ذاك الوطن
ناس ما تنطــاق كللش والســنين ايعذبن
إلمن احچي وانتي ماكو . منين ما دورن محن

الدهر نزّلني يفاطــم و أشتكيلچ
آنه مو حيدر صرت ساعة رحيلچ
والصبر مات .. و أعذْرَه
هواي مشتاگ .. يزهـره
ـــــــــــــــــــــــــ
الـ بالصبر كلها إتعرفني هسه لا ما أنعرُف
صرت ادوّر بالليالي الليله هاي ام الوصُف
الله يلطف جاي موتي وربنه مصدر لـ اللطُف
ثگيل حملي وبس أشوفچ حملي لا جداً يخُف

چَنّه هذا الملتقى ومفضوخه هامي
يالله يمچ يم حسن يكمـل صيامي
وياچ هالعيد .. أحضرَه
هواي مشتاگ .. يزهره
ـــــــــــــــــــــــــ

مهدي التقي

https://youtu.be/_seTz2nnaEk
سامحني 🎙️

الحان واداء الرادود 🎙️
أبو عادل الركابي

كلمات الشاعر🖊️
مهدي التقي

تصوير 🎥 مؤمل كريم

مونتاج وألوان 🖥️
علي الحيدر

مخطوطه ✒️حسين مقيم

غلاف 📸 محمد عباس

هندسة وتوزيع 🎹
abu_adel_alrikabi

https://youtu.be/PnNaMM67pOg

حسينية المرحوم داود العاشور

كف رِدنَه والجيش .. وصل للكوفه
ــــــــــــــــــــــــ
الجيش گَلّه انطينه عَطوه بسّ دِضُم ازنودك
من بعيد انطينه جودك واحنه نترس جودك
حته جرف المــاي كـلّه إخذه والله ايعودك
وخاف ما يكفيك شطنه من جِرَبنَه انـزودك

اشمر جربتك كلشي يجرالك
شِردت الوادم بس من إخيالك
توصيل ماي وللخيـم عدنـه
لا تِهِــد فــال الله ولا فـالك

( يگضي الماي ولا تگضينه )

كف ردنه والجيش .. وصل للكوفه
ــــــــــــــــــــــــ
عدنه تاريخك الابيض ماكو عندك شارِد
النهروان انطيت حقها وجيش گابل واحد
جندي عد حيدر وكتها وانته هسه القائد
عوف سيفك فقـط چفّك على الوادم زايد

دخيل الله چم اسلاح الك شـايل
السطره وخزرتك كافي ابو فاضل
مالِك إبكُبَره و رِعبِتَــه اعـيونك
بس إلتســودن يمّـــك إيقـــاتل

( والـ يدنالَك بايع روحه )

كف رِدنَه والجيش .. وصل للكوفه
ــــــــــــــــــــــــ
شلون إلمْطَهّم ايشيلك وانته خاسف گاعنه
إنته ريشاتك گضتنه وشرّديت ارجـالنه
انته صفّين وبِدِتها اشلون بالطّف مالنه
يبن قالــع باب خيـبر لا تِشَلْع ابوابنه

هَدّات حـــيدر لا تِهِـــد بينـــه
إشورطنه غلطه وعِطشَت اسكينه
غلطه وغِلَطنَـه وعطش عبدالله
سَرفَنِت رِدنَــك نــاوي تگضينه

( للتّل وصلَتْ روس القاده )

كف رِدنَه والجيش .. وصل للكوفه
ــــــــــــــــــــــــ
عالنَخَل صِعدَت جثثنه وبعد مامش چاره
بيدك الفارس اتگطفه چن گطَفْت إحجاره
انته شِد رايه ونِفُصلَك سيفك إخمِد ناره
شِمِر وَرّطنه وغلَطنَه وهسّه ماكو أخباره

القصر الإماره إشگد زلم وصلت
وقادتنه بطويريـج أضن لِبدَت
من تِشمُر إبرَه ينسـمِع حِسـها
هيّه الطيور الـ بالسمه وشِردَت

( عزرائيل إنطاك إمچانه )

كف رِدنَه والجيش .. وصل للكوفه
ــــــــــــــــــــــــ
احنه جبناها بدينه وجِبنَه هَم تابوتنه
احنه لو ندري انته بالطف چا نِضَل ببيوتنه
حته ما نلحگ وصيّه نكتب و حَل موتنه
احنه بالطف مگبرتنه وما حصل زاتوتنه

إگرابك فرغ واحنه الخَذَانه الدّم
من نـار ســيفك گُبَــل لـ جْهَنّم
أصفر وَجهنَــه والفــرات أحمر
لا ضل أخـو ولاضـل أبو ولا عَمّ

( نَسْلْ الوادم ماضل بيها )

كف رِدنَه والجيش .. وصل للكوفه
ــــــــــــــــــــــــ

مهدي التقي

رُقيّـه إتصيـح بويـه ـ باع إدينه
وجسمك عن إخيمنه ـ باعِدينه
حتّه المــاي بالطف ـ باع دِينه
خِذَلنَه ورِكَضْ بايع آل أميّه ..

مهدي التقي
*عظم الله أجوركم*

لماذا الأربعين  ؟! 
ـــــــــــــــــــــــــ
• يربط الكثير منا زيارة الأربعين بحدث عودة سبايا ابي عبد الله (صلى الله عليه وعلى اله)  الى الطفوف ولقاءهم بالصاحبي الجليل جابر الأنصاري، في يوم العشرين من شهر صفر وعودة رأس المولى الى جسده. 
وهذا كله صحيح (وان نُوقش في بعض تفاصيله) 

ولكننا نجد أن الإمام الصادق (عليه السلام)  في خبر زرارة يذكر حقيقة أخرى  : 

١- قال الإمام (عليه السلام) :  يا زرارة ان السماء بكت على الحسين أربعين صباحا بالدم،
وان الأرض بكت أربعين صباحا بالسواد،
وان الشمس بكت أربعين صباحا بالكسوف والحمرة،
( وان الجبال تقطعت وانتثرت وان البحار تفجرت) وان الملائكة بكت أربعين صباحا على الحسين (عليه السلام). 
كامل الزيارات ص ١٦٧، ح٨ .

٢- قال الإمام الصادق (عليه السلام)  :  ان السماء بكت على الحسين بن علي ويحيى بن زكريا، ولم تبك على أحد غيرهما، قلت: وما بكاؤهما، قال: مكثوا أربعين يوما تطلع الشمس بحمرة وتغرب بحمرة، قلت: فذاك بكاؤهما، قال: نعم. 
كامل الزيارات ص ١٨١، ح ٦.

وماهذا البكاء من الوجودات هذه وغيرها  إلا لكون (رأس سيد الشهداء لم يقبر بعد  ) كون المعصوم قلب العالم التكويني والتدويني، فإذا أضطرب (القلب الكلي) اضطرب له الوجود بالحزن والإنكسار  ، من هنا كانت زيارة الأربعين هي سكون هذا الاضطراب  ، وبه يختم فصل مابعد المصيبة،  فالتفت ولا تغفل!. 

• بل ان هناك بُعد اخر لــــ(الاربعين) سيتجلى في يوم القيامة: 

عن زرارة ، قال: سمعت أبا عبد الله (عليه السلام) يقول: ان لزوار الحسين بن علي (عليهما السلام) يوم القيامة فضلا على الناس، قلت: وما فضلهم، قال: يدخلون الجنة قبل الناس بأربعين عاما وسائر الناس في الحساب والموقف.
كامل الزيارات ص٢٦٢ ح ١.

فالسماء بكت ٤٠ يوم
والشمس بكت ٤٠ يوم
والارض بكت ٤٠ يوم
والملائكة بكوا ٤٠ يوم
وإنهم سيدخلون الجنة قبل الناس ب ٤٠ عام. 

رزقنا الله وإياكم زيارة الاربعين  🤲

أغلب الأنبياء بعثوا بصفة (إخوَة)
وَإِلَىٰ عَادٍ أَخَاهُمْ هُودَاً
وَإِلَىٰ ثَمُودَ أَخَاهُمْ صَٰلِحٗاً
وَإِلَىٰ مَدْيَنَ أَخَاهُمْ شُعَيْبٗاً

إلا رسول الله (ص) قال تعالى :
لَقَدْ مَنَّ ٱللَّهُ عَلَى ٱلْمُؤْمِنِينَ إِذْ بَعَثَ فِيهِمْ رَسُولٗا *مِّنْ أَنفُسِهِمْ*

*فداك نفسي ياحبيب الله*