ድሬዳዋ ፖሊስ ጣቢያ በመግባት መፍትሔ ያገኘው ጅብ

ነገሩ እንዲህ ነው ትናንት ሰኔ 16 ቀን 2017 ዓ ም ድሬዳዋ ከተማ ወረዳ 2 በልዩ ስሙ ሰባተኛ እየተባለ በሚጠራው አካባቢ ከረፋዱ 4 ሰአት ገደማ አንድ የነጋበት ጅብ ድንገት ይከሰታል ፣ ታዲያ በሁኔታው ግራ የተጋቡት የአካባቢው ማህበረሰብም ይህ ጅብ ጉዳት ከማድረሱ በፊት ልንቀድመው ይገባል በማለት ዱላ ፣ ድንጋይ ፣ ሌሎች የተለያዩ ነገሮችን በመጠቀም ድብደባ ይጀምሩታል።

ታዲያ ድብደባውን መቋቋም የከበደው ጅብም ህይወቱን ለማትረፍ እግሬ አውጭኝ በማለት ይፈረጥጣል ሰውም የያዘውን እያሳረፈበት ይከተሉታል ፣ በዚህ ሁኔታ ነበር አስገራሚው ጉዳይ የተከሰተው ከሰባተኛ ሰፈር የተጀመረው የጅቡ እግሬ አውጭኝ በአካባቢው የነበሩ የግል መኖሪያ ቤት የንግድ ድርጅት የመንግስት ተቋማትን አልፎ ሳቢያን ፖሊስ ጣቢያ የማህበረሰብ አቀፍ ፖሊስ አገልግሎት ቢሮ ሰተት ብሎ በመግባት ይደበቃል ።

የሳቢያን ፖሊስ ጣቢያ አዛዥ ዋ/ኢ/ር አምበሉ አየለ ጅቡን ተከትሎ የመጡ ማህበረሰብን በማረጋጋት በሰው ላይ ጅብ ጉዳት እንዳያደርስ መፍትሄ አንደሚሰጡ በመናገር ጅቡ ፖሊስ ጣቢያ እንዲቆይ በማደረግ ክስተቱን በዕለት ሁኔታ መዝገብ ላይ ከመዝገቡ በኃላ በቀጥታ ከዱር እንሰሳ ጥበቃ ጋር በመወያየት ምሽት ላይ አራት ሰዓት ላይ ማህበረሰቡን በማይጎዳ መልኩ ወደ ጫካ ተወስዶ እንደሚለቀቅ አስታውቋል::