Матбуот хизматлари фаолиятида янги босқич: сифат, шаффофлик ва замонавий ёндашувлар сари

Бир неча йил аввал матбуот хизматлари асосан пресс-релизлар тайёрлаш ва тарқатиш билан чекланганди. У пайтларда асосий мақсад – идора номи оммавий ахборот воситаларида қанча кўп тилга олинса, шунча яхши, деган ёндашув ҳукмрон эди.

Бугун эса вазият мутлақо ўзгарди. Эътибор марказида – контент сифати, унинг таъсирчанлиги ва самарадорлиги турибди. Ахборот хизматлари энди фақат ахборот тарқатувчи эмас, балки жамоатчилик билан ишлашда етакчи куч, коммуникация стратегияларини белгилайдиган муҳим механизмга айланмоқда.

Биз турли ҳудудларда фаолият юритамиз, турли вазирлик ва идораларда хизмат қиламиз. Ҳар биримиз ўзимизга хос муаммолар ва вазифалар билан юзма-юз келамиз. Аммо бир нарса барчага умумий — бу соҳада ҳамиша ривожланишга интилиш ва янгиликлардан хабардор бўлиш зарурияти.

Шу маънода, АОКА ташаббуси билан ўтказилаётган “Ахборот хизматлари фаолияти: очиқлик, тезкорлик ва холислик бош мезон” мавзусидаги миллий конференция — биз учун бебаҳо тажриба мактаби, билим ва илҳом манбаи бўлмоқда.

Конференцияда қатнашиш орқали замонавий трендлардан бохабар бўлиш, ОАВ ва ижтимоий тармоқлар билан ишлашдаги янги ёндашувларни ўрганиш, муаммоли вазиятларда қандай ечим топиш мумкинлиги ҳақида тажрибали спикерлардан билиб олиш имконига эга бўлдик. Шунингдек, сунъий интеллект имкониятларидан унумли фойдаланиш масалалари ҳам кенг ёритилди.

АОКАга ана шундай мазмунли анжуман ва қизиқарли маърузалар учун алоҳида миннатдорлик билдираман!

«Энг яхши матбуот хизматлари» танлови эса, нафақат соҳадаги энг илғорларини тақдирлаш, балки ҳар бир иштирокчи учун ўз меҳнатига объектив баҳо олиш, энг асосийси, ўзини профессионаллар жамоасининг ажралмас қисми сифатида ҳис этиш имкониятини яратади.

Учтепа туман ҳокимлиги Матбуот хизмати бу танловда иккинчи бор иштирок этиб, яна олдинги қаторлардан жой олгани — жамоамиз учун фахр, бир вақтнинг ўзида катта масъулият. Бу бизга келгуси фаолиятимизда янада ижодкорлик ва илҳом билан иш олиб бориш, янги ғоялар ва креатив инструментларни ҳаётга татбиқ этишда кучли туртки бўлди.

Танлов иштирокчиларига — жасорат, ишонч ва қатъият тилайман! Маррани баланд олинг, чунки ҳақиқий муваффақият — фақат олға интиладиганларга насиб этади!


Тўрабек Тўраев
Учтепа туман ҳокимининг
Ахборот сиёсати бўйича маслаҳатчиси,
танлов ғолиби