#EthiopianCivilServiceUniversity

የኢትዮጵያ ሲቪል ሰርቪስ ዩኒቨርሲቲ በፐብሊክ ሴክተር ውስጥ የሚሰሩ ሠራተኞችን እንዲሁም በ2017 ዓ.ም የ12ኛ ክፍል ፈተና ወስደው የማለፊያ ነጥብ ያስመዘገቡ ተማሪዎችን ተቀብሎ እንዲያስተምር መወሰኑ ይታወቃል፡፡

በዚህም፣ ዩኒቨርሲቲው በ2018 ዓ.ም የቅድመ ምረቃ ፕሮግራም የመግቢያ መስፈርቶችን በማሟላት መማር ከሚፈልጉ ፐብሊክ ሰርቫንቶች መካከል መልምሎ ለማስተማር ዝግጅት ማጠናቀቁን ገልጿል፡፡

በዝርዝር የተገለፁ የመንግሥት መስሪያ ቤቶች መስፈርቶችን የሚያሟሉ የመጀመሪያ ዲግሪ አመልካች ሠራተኞቻቸውን በመመልመል ዝርዝራቸውንና ማስረጃዎቻቸውን እስከ መስከረም 30/2018 ዓ.ም ድረስ እንዲያሳውቁ ዩኒቨርሲቲው ጠይቋል፡፡

የትምህርት፣ የምግብ፣ የመኝታ እና የሌሎች አገልግሎቶች ወጭዎችን በየዓመቱ የትምህርት ዘመን መጀመሪያ ላይ ብር 49,097 ላኪው መስሪያ ቤት ወይም ግለሰቡ ከላኪው መስሪያ ቤት ጋር በመስማማት መክፈል እንደሚጠበቅባቸው ተገልጿል፡፡

የትምህርት ሚኒስቴር ባለፉት 5 ዓመታት ለየትምህርት ዘመኑ ያሳውቀውን የከፍተኛ ትምህርት የመጀመሪያ ዲግሪ መግቢያ መስፈርት የመቁረጫ ነጥብ ያላቸው ወይም ከቴክኒክና ሙያ ትምህርትና ሥልጠና ተቋም የተመረቁ ባለሙያዎች በሠለጠኑበት የሙያ መስክ በደረጃ 4 ወይም በቀድሞ 10+3/12+2 ዲፕሎማ ያጠናቀቁ ሆነው በሙያው ደረጃ 4 የብቃት ማረጋገጫ ምዘና ተፈትነው ያለፉበትንና በሙያው ቢያንስ የሁለት ዓመት ሥራ ልምድ ማስረጃ ማቅረብ የሚችሉ በሙሉ ለመጀመሪያ ዲግሪ ትምህርት ፕሮግራሙ ማመልከት ይችላሉ ተብሏል፡፡

ለጥቆማ 👉 @atc_newsbot
➡️ https://www.tg-me.com/atc_news

" ከሚቀጥለው ሳምንት ጀምሮ ትምህርት ቤቶችን በደንብ መመልከት እንጀምራለን በተማሪ ቁጥር ልክ መጻሕፍትን ገዝቶ ያላዳረሰ ት/ቤት ካለ የእውቅና ፈቃዱ ይሰረዛል " - ትምህርት ቢሮ

የአዲስ አበባ ከተማ መስተዳድር ትምህርት ቢሮ በከተማዋ የሚገኙ የግል ትምህርት ቤቶች በተማሪዎቻቸው ቁጥር ልክ መጻሕፍትን ገዝተው ማሰራጨት ካልቻሉ የእውቅና ፈቃዳቸው እስከመሰረዝ የሚደርስ እርምጃ እንደሚወስድ ገልጿል።

የቢሮው ሃላፊ ዶ/ር ዘላለም ሙላቱ " በግል ትምህርት ቤቶች አልፎ አልፎ የሚታየው የመጻሕፍት እጥረት ከህትመት ጋር በተገናኘ ምክንያት እጥረት ኖሮ ሳይሆን ገዝተው ለተማሪዎቻቸው ማሰራጨትን እንደ ወጪ እና እንደ ድካም ስለሚያስቡት ነው " ብለዋል።

ሃላፊው ይህን ያሉት በአዲስ ቲቪ በተላለፈ " በጠረጴዛ " በተሰኘ ፕሮግራም ላይ በቀረቡበት ወቅት ነው።

" የመማሪያ መጻሕፍት በበቂ ሁኔታ ታትመዋል?በተለይ በግል ት/ት ቤቶች ለተወሰነ ጊዜ መጻሕፍት ሽያጭ ይከናወን እና አልቋል ይባላል ይህ ለምን ሆነ ? " የሚል ጥያቄ ለትምህርት ቢሮ ሃላፊው ቀርቦላቸው ነበር።

የአዲስ አበባ ትምህርት ቢሮ ሃላፊ ዶ/ር ዘላለም ሙላቱ ምን መለሱ ?

" በተለይ አዲሱ ስርአተ ትምህርት ተግባራዊ ከሆነ በኋላ በልዩ ሁኔታ ድጋፍ ተደርጎ ለተማሪዎቻችን አንድ ለአንድ እንዲደርስ ተደርጎ ህትመቱ በበቂ ሁኔታ ተሰራጭቷል።

የመጻሕፍት ህትመት እና ስርጭት ላይ ለመንግሥት ተማሪዎች መጻሕፍት በነጻ ይሰጣል ለግል ትምህርት ቤቶች በሪቮልቪንግ ፈንድ 250 ሚሊየን ተፈቅዶልን ይህንን ስራ እየሰራን እንገኛለን።

የግል ትምህርት ቤቶች ላይ ያለው ችግር ከተማሪዎች የመጽሐፍ ገንዘብ ሰብስበው ከትምህርት ቢሮ ስቶር ገዝተው ትምህርት ቤታቸው ማድረስ እና ማሰራጨት እንደ ትልቅ እዳ ነው የሚቆጥሩት ።

እንደከተማ ግን በቂ ህትመት ታትሞ ስቶራችን ሙሉ ነው ችግሩ ት/ቤቶች መጻሕፍቶቹን ከስቶር ወስደው ለተማሪዎች ማከፋል ላይ ነው ያለው።

በተለይ የትምህርት ስልጠና ጥራት ቁጥጥር ባለሥልጣን ፈቃድ የሚሰጠው አካል እሱ ስለሆነ መጻሕፍት በተማሪዎቻቸው ቁጥር ልክ ወስደው ለተማሪዎቻቸው ያላዳረሱ ትምህርት ቤቶች ካሉ እውቅና ፈቃዳቸው እንዲሰረዝ ተግባብተናል።

በቂ መጻሕፍት አለን በግል ት/ቤቶች እየተሰራጨ ነው አሁንም በስርጭት ላይ ነው የሚገኘው ችግሩ ያለው ትምህርት ቤቶች ላይ ነው እንደ ወጪ እንደ ድካም ስለሚያስቡት ነው።

ከሚቀጥለው ሳምንት ጀምሮ ትምህርት ቤቶችን በደንብ መመልከት እንጀምራለን በተማሪ ቁጥር ልክ መጻሕፍትን ገዝቶ ያላዳረሰ ት/ቤት ካለ የእውቅና ፈቃዱ ይሰረዛል።

አንድም ተማሪ ያለ መጽሐፍ መማር የለበትም ይሄንን አንታገስም ይህም የእርምጃችን አንዱ አካል ይሆናል " ብለዋል።

ለጥቆማ 👉 @atc_newsbot
➡️ https://www.tg-me.com/atc_news

#ETA

የትምህርትና ስልጠና ባለሥልጣን የመንግሥት ዩኒቨርሲቲዎች እንዲሁም በክልል መንግሥታት የሚተዳደሩ የከፍተኛ ትምህርት ተቋማት ዳግም ምዝገባ ለማድረግ ዝግጅቱን አጠናቋል፡፡

ባለሥልጣን መስሪያ ቤቱ በተገለፁት ተቋማት ዳግም ምዝገባ አተገባበረ ዙሪያ የግንዛቤ ማስጨበጫ የውይይት መድረክ ማክሰኞ መስከረም 20/2018 ዓ.ም በትምህርት ሚኒስቴር የመሰብሰቢያ አዳራሽ ያካሒዳል፡፡

በዚህም በግማሽ ቀን የውይይት መድረኩ ላይ የሚሳተፉ አንድ ከፍተኛ አመራር ተቋማቱ እንዲልኩ ባለሥልጣኑ ጠይቋል፡፡

ባለሥልጣኑ አነጋጋሪ የነበረውን በአዲስ አበባ ከተማ መስተዳዳር የሚገኙ የግል ከፍተኛ ትምህርት ተቋማት የዳግም ምዝገባ ውጤትን በቅርቡ ይፋ ማድረጉ ይታወሳል፡፡

ለጥቆማ 👉 @atc_newsbot
➡️ https://www.tg-me.com/atc_news

በአማራ ክልል ከፍተኛ ውጤት ላመጡ ተማሪዎች የሽልማትና እውቅና መርሐ ግብር እየተካሄደ ነው

አዲስ አበባ፣ መስከረም 19፣ 2018 (ኤፍ ኤም ሲ) በአማራ ክልል በ2017 የትምህርት ዘመን በ12ኛ ክፍል ሀገር አቀፍ ፈተና ከ500 በላይ ውጤት ላስመዘገቡ ተማሪዎች የሽልማትና እውቅና መርሐ ግብር እየተካሄደ ነው።

በመርሐ ግብሩ የአማራ ክልል ም/ቤት አፈ ጉባዔ ፋንቱ ተስፋዬ፣ የክልሉ ም/ርዕሰ መስተዳድር አብዱ ሁሴን (ዶ/ር) እና በብልጽግና ፓርቲ የአማራ ክልል ቅርንጫፍ ጽ/ቤት ኃላፊ ይርጋ ሲሳይ ተገኝተዋል።

በመድረኩ በ12ኛ ክፍል ማጠናቀቂያ ፈተና ከ500 በላይ ውጤት ያስመዘገቡ 452 ተማሪዎች ሽልማትና እውቅና እንደሚሰጣቸው ተመላክቷል።

ከእነዚህ መካከልም ሦስት ማየት የተሳናቸው ተማሪዎች 400 እና ከዚያ በላይ ውጤት ማምጣታቸው ነው የተገለጸው፡፡

የሽልማትና እውቅና ሥነ ሥርዓቱ ተሸላሚ ተማሪዎችን በማበረታታትና በመደገፍ በዩኒቨርሲቲ ቆይታቸው ተግተው በመስራት የሀገር አለኝታነታቸውን እንዲያሳዩ ለማስቻል ያለመ ነው፡፡

ለጥቆማ 👉 @atc_newsbot
➡️ https://www.tg-me.com/atc_news