ምክረ ካፌ

ካፌ ውስጥ ቁጭ ብዬ ሳነብ የነበረውን መፅሐፍ በመጨረሴ እርካታ ተሰምቶኝ እየተደሰትኹ ነበር ።( መፅሐፉ 323 ገፅ አሉት የፈጀብኝ ጊዜ አንድ ወር ከአምስት ቀን ነው...ቀርፋፋ ሁነሀል ሶፊ።)

...ለመጀመሪያ ጊዜ አካባቢዬን ቃኘው...ከእኔ ብዙም ሳይርቅ ሁለት ወንዶች ተቀምጠዋል...አንዱ እጁን እያወራጨ ነው የሚያወራው...አንዱ ቃል ጆሮዬ ጥልቅ አለ "ሴት አትመን...! " ከዛን በኋላ ወሬውን ለመስማት ጓጓው (የጓጓውት ወረኛ ስለሆንኹ አይደለም ይሄ ምክር ለእኔም ያስፈልገኛል ብዬ ስላሰብኹ ነው።)

የጆሮዬን መረብ በእነርሱ ዙርያ ጣልኹ... እጁን እያወራጨ ይመክረዋል ስሜታዊ ሆኗል...

"አስታውስ ባለፈው እንደዛ የምታምናት እንደውም " ሰውን መክዳት ፋሽን በሆነበት ዘመን እንደ እርሷ ለቃሏ የሚታመን ሰው ማግኘት መታደል ነው ።" ብለህ ያሞካሸሀት ልጅ እንኳን ከድታሀለች።ወንድሜ አንዳንዴ ስብራትህን መርሳት የለብህም ፤ እንድታዝንባቸውና እንድትታመምባቸው አይደለም እንድትማርበት። ከእንግዲህ ወጥረህ ስራ ፤ ራስህን አበርትተህ ወደፊት ተራመድ ስፖርት ስራ ፤ መንፈሳዊ ነገሮችን አጎልብት ፤ ሰው ይመጣል ሰው ይሄዳል የምን እየዬ ነው ! አንድ አባባል አለ "ያቆሰሉህ ሌሎች ቢሆኑም ፤ ቁስልህን ማከም ግን የአንተ ኃላፊነት ነው ።" በነገሮች መቀያየር የማይረታ ማንነት ለመገንባት ሞክር።ከአንተ ወዲያ ላንተ ማንም አይመጣም ። " የሚመከረው ሰው ጭንቅላቱን ላይ ታች እየወዘወዘ ይሰማል።(ልክ እንደገባው ሰው...)


ይሄስ ምክር ለእኔ ነው።
ቆይ ሰውዬው ያውቀኝ ይሆን?
ቆይ እግዚአብሔር ሊያበረታኝ ልኮት ይሆን?

አረ ይሄስ ምክር ለእኔ ነው።

ወጥረህ ስራ ሶፊ የምን እየዬ ነው !


ከ ተ ቀ ደ ደ ው ማስታወሻ
©ሶፊ

#Repost

"ስለራስህ ንገረኝ? " አለች ። ...ለማወቅ እንደጓጓች ያስታውቃል።

"ምንም የሚነገር ነገር የለኝም..." ብዬ ላድበሰብስ ሞከርኩ...በርግጥም የለም።ደሞ ቢኖርስ እኔ እንዲህ ነኝ ተብሎ ይወራል? ነውር አይደለም?

" ሶፍ ?!" አለች ልምምጥ በታጀበው ድምፀት።

እንደ ክርስቶስ አንዳንዶች እንዲህ ይሉኛል...ሌሎች ደግሞ እንደዛ እያልኹ ልመልስላት?

ደግሞ ሰዎች ስለኔ ምን እንደሚሉ በምን አውቃለኹ?

ብዙ ካሠላሰልኹ በኋላ ድምፄ እየተቆራረጠ እንዲህ አልኋት...

"አንዳንድ ቀን በጠዋት ተነስቼ ቴክኖሎጂ ምን ያህል ትኩረታችንን እደበታተነብን ለራሴ ተንትኜ ስልኬን ወዲያ አሽቀነጥረው እና አንባቢ እሆናለኹ...ወደ አንዱ ካፌ ሄጄ፤ስልኬን አጠፋና መፅሐፌን አነባለኹ...ለወትሮ ኮሽታ የሚረብሸኝ ሰው፤በዛ ሁሉ ሰው መሀል ቁጭ ብዬ፥አንዳች ድምፅ ሳይረብሸኝ በተመስጦ ደራሲው ባሳፈረኝ ምናብ እየተጓዝኩ እውላለሁ።

አንዳንዴ ደግሞ እንኳን መፅሐፍ ላነብ ቀርቶ ረጅም ፅሁፍ ሳይ እራሱ እንደ እርጉዝ ሴት ያቅለሸልሸኛል።በየሶሻል ሚዲያው እገሌ አገባ፣እገሌ መኪና ገዛ፣ዱባይ ሄደ፣ዛሬ እገሌ ቺክን ሳላድ በላ...ስንት ላይክ አገኘው? ስንት ቪው ?እገሌ እንዴት ነው የኔን ፖስት ላይክ ያላደረገው...እያልኹ ስባክን እውላለኹ።

አንዳንድ ቀን ደግሞ ተስፋ እንደቆረጠ፣እንደታመመ፣በደዌ እንደተመታ ሰው ከአልጋዬ መውረድ ይቀፈኛል።ስለንጋት፣ስለረፋዱ፣ስለቀትር ግድ አይሰጠኝም...በወጣትነቴ ያረጀው ያህል ይሰማኛል...

አንዳንድ ቀን ደግሞ መናኒ እሆንና ለሊት ከወፎቹ ቀድሜ እነሳለኹ፤ከመሸ ሽንት ቤት መሄድ የምሰጋው ሰው የለሊቱ ግርማ ምንም ሳያስፈራኝ፥ደጀ ሰላም እሄዳለኹ።በፀሎት እና በምስጋና እተጋለኹ።ደግም ቢቆጠር የማያልቅ ኃጢአትን እንደሰራኹ እረሳና ከምእመኑ አቃቂር አወጣለኹ...

አየሽ እኔ ብዙ ሰው ነኝ።
አንተ ማነህ? ካልሽኝ እኔ የቱ እንሆንኹ አላውቅም።"

ከተቀደደው ማስታወሻ
30/1/2015
©ሶፊ

አንዳንዴ ስልኬን አጥፍቼ ፤ የብቸኝነት ጓዳ ውስጥ እመሽጋለኹ...ሰው እንዲደውልልኝ ስለማልፈልግ አይደለም ፤ ይልቅ ይደውሉልኛል ብሎ መጠበቅ ደክሞኝ...ጥቂት ለማረፍ ነው።



...ለካ ሁሌ መገኘት (easily available መሆን ) የትም መሄጃ የለውም ያስብል ኖሯል።



...ከእንግዲህ ብትፈልጊኝ አታገኚኝም ፤ ብትጠሪኝም አልሰማሽም !




ሩ ቅ ነኝ ለአንቺ !






ከ ተ ቀ ደ ደ ው ማስታወሻ
©ሶፊ

ዳንሰኛው ወንድሜ ከተሰኘው ድርሰት የተወሰደ...


<<ትምህርት ብዙም ያልተጀመረበት ጊዜ ነበር...አስተማሪዎቹ ስላልመጡ ተጋድሜ ፊልም ሳይ ቆይቼ የእራት ሰዓት በመድረሱ ከጓደኛዬ ጋር ወደ መመገቢያ አዳራሽ በተለመደው መንገድ ሄድን...መንገድ ላይ ግን ያልተለመደ ውበት ተመለከትኩ...

...ብዙ ጊዜ ቆንጆ ሴቶችን ተመልክቼ፤አፍ አውጥቼ ባልናገረውም በልቤ አድንቄያለሁ...ያንቺ ውበት ግን ያፈዝ ነበር...እነኚያ የሚያስፈሩ አይኖችን ጣል ስታደርጊብኝ፤የልቤን ባዶነት የመረመሩ መስሎኝ ተሳቀቅኹ...ውበትሽ ልክ ፀሐይ ምድርን ልትሰናበት ስትቀርብ እንደምታሳየው ያለ ነው...ከፍ ብሎ ተቀምጦ መላ ተፈጥሮን እንደማድነቅ ያለ...ከሚወዱት ሰው ጎን ቆሞ የፏፏቴን ውብ ዝማሬ እንደመስማት ያለ የሚደንቅ ውበት...ፍቅር መስፈርት ባይኖረውም መስፈርት ብዬ ልደረድራቸው የምችለውን ሁሉ እንደምታሟይ እርግጠኛ ነኝ።

ያቺ የተያየንባት ሴኮንድ ምናልባትም ደቂቃ...አህምሮዬ እና ልቤ እየተቀባበሉ ደጋግመው ሲያሳዮኝ ትውውቃችን ዘለግ ያለ ጊዜን ያስቆጠረ ይመስል ነበር...ጥቂት ጊዜ ግን ጥልቅ ስሜት...አልተናገረውም እንጂ ሁኔታዬ ጓደኛዬን ሳያስገርመው አልቀረም...እንደተለመደው አላወራውም...ደስታው ብዙም ሊያስበላኝ አልቻለም...ተስፋው የተቀጠለለት ሰው ይመስል ፊቴ ፍክት ፍክክት አለ።

...ወደ ዶርም እንደተመለስን አልጋው ላይ በጀርባዬ ለጥ አልኩና ከሃሳብ ማጠራቀሚያ የአህምሮዬ ክፍል ውስጥ ምስልሽን ምዥርጥ አድርጌ፤ሁኔታሽን አጤን ጀመር...አጭሯን ቅፅበት ደግሜ ደጋግሜ አየሁ።

ድንገት ከመኝታዬ ፈንጠር ብዬ ተነሳሁና በለስ ሲቀናኝ የምደንሳትን ዳንስ ደነስኹ ያኔ ዶርም ውስጥ ያሉት ሁሉ ደስ እንዳለኝ ገባቸው...>>

ያደረግኩትን ካደረግኩ በኃላ ፈገግ አለች....በስነስርአቴ የተደሰተች መስሎኝ ደስ አለኝ....አብሬያት አገጠጥኩ....


"ለምንድን ነው የሳቅከው..."....ስትለኝ የምመልስላት አጣሁ..."ስትስቂ ነው የሳቅኩት... "..ይባላል....?

"እኔንጃ.... ስለሳቅሽ መሰለኝ....".....ሳቋን ደገመችው...አሁን ነው ያስተዋልኳት...ሳቋ ላይ ፌዝ አለ....

"ምን ያስቃል....?"

"ቅድም ነበር ይሄን መጠየቅ የነበረብህ...."

"አሁን ጠየቅኩሻ...."....ስናደድ በማወጣው ድምፅ ነው ይሄን ያልኳት...

"ይልቅ ስለ ቅድሙ ሳቄ ልንገርህ...."....አለችኝ ረጋ ብላ...ለመስማት ተመቻቸሁ....

"ቅድም ምንድን ነው ያደረግከው..."

"ምን አደረግኩ....?....."....ከልቤ አላደረግኩትም መሰለኝ ከመቅፅበት ረሳሁት...

"የወደቀውን እንጀራ አነሳኸው...ከዛ ሳምከው...ከዛ ጣልከው..."

"እና ምን ያስቃል...ሲደረግ አይተሽ አታውቂም...እንጀራ ሲረገጥ ግፍ እንደሆነ አታውቂም...."....ከዚህ ንግግሬ በኃላ ሳቋ አላባራ አለ......


"አልመለስሽልኝም ምን ያስቃል...."....ጮህኩባት....

"የሹፈት ሳቁን ምን አመጣው...."...ሳቋን አልገታ ስትለኝ ጥያቄ ደገምኩ...

"ልትጥለው ለምን ሳምከው...."...መልሳ ጠየቀችኝ....

"እንዳይረገጥ...."...መለስኩ

"ግፍ ፈርተህ ማለት ነው...."....አዎ አልኳት በአንገቴ ንቅናቄ....ዝም ብዬ ሳያት እስቲ ዝም ብዬ ልከራከረው..ላናደው....ልቃረነው ብላ እኔ ጋር የምትመጣ ይመስለኛል....ብዙ ጊዜ አይቻታለሁ ግን ልትገባኝ አልቻለችም....



"ለማንኛውም ተረጋጋ...ይሄ ነገር ስለማይገባኝ ነው...መልሰህ ለምትጥለው መሳሙን ምን አመጣው...ላትበላው ነገር አቧራውን ማራገፉ ምንድን ነው...ከመሬት ላታላቅቀው ጥግ ማስያዙ ምን ይፈይዳል...እንጀራው ነብስ ቢኖረው ስታነሳው የሚሰንቀው ተስፋ ...ካፍህ ስታስጠጋው ደግሞ አስበው...ቤቱ ጠፍቶበት መንገድ የወደቀን ህፃን አንተ ቤቱን እያወቅከው አንስተህ ልብስ ገዝተህ መልሰህ ጥግ አስይዘህ እንደመጣል ነው..."

በተራዬ ከት ብዬ ሳቅኩ....."ለምን ትስቃለህ...ምን ያስቅሀል...?"...ብላ እንድትጠይቀኝ ጠበቅኩ...እሷ እኔን ትታ አየር አየሩን ታያለች....


"ምን ያስቅሀል አይባልም...?"

"ምን እንደሚያስቅህ እያወቅኩ ምን አሰጠየቀኝ...."

"እሺ አትናደጂም...?"

"ካንተ ከዚህ የተሻለ አረዳድ ስለማልጠብቅ አልናደድም....".....

"ምን ማለት ነው...."....በገንኩ....

"ኡፍ አቤል ሳትጠይቅ ለመረዳት ሞክር...አንዴም ተረድተኃኝ ስለማታውቅ እንድትረዳኝ አልጠብቅም...ባልጠበቅከው ነገር ደግሞ አትናደድም...."

ዝምታ መሀላችን ተመቻችቶ ተቀመጠ.....ቡናችን ከእጣን ጢስ  ጋር መጣ....አስተሳሰቧ ያስደነግጠኛል....ስታስተውል ጉድ ታስብላለች...ቡናዬን ሳማስል ሳይቀር እየተጠነቀቅኩ ነው...ደግሞ ምን ትላለች እያልኩ...ብዙ አትከራከረኝም...የዛሬ ሁለት አመት የነበረው ጭቅጭቃችን በርዷል....ተስማምተን ወይም አንድ ሆነን አይደለም...ሁሉ ነገሬን አስተውላ ደክሟት ነው.....አንዳንዴ እንትጨቀጭቀኝ እና ለምን እንትለኝ እያወቅኩ አጠፋለሁ...የእርሷ መልስ ዝምታ ወይንም የሹፈት ሳቅ ነው....


"ታውቃለህ አቤላ አሁን አንስተህ ስለጣልከው እንጀራ ስናወራ የሆነ ቁም ነገር ታስተውላለህ ብዬ ነበር...ማለት አንድ አንዴ እንኳን ታስባለህ ብዬ አስብ ነበር...."

"ምን ማለት ነው አንዳንዴ ታስባለህ ማለት..."....ድምፄ ላይ ንዴት አለ....

"ኡፍ አቤል ኡፍ...."....ከተቀመጠችበት ተነሳች....ተከትያት ስነሳ ላየኝ ሰው በእሷ መቀመጫ የምጠቀም ነው የምመስለው...

"ምን እየሆንሽ ነው...."

"እየሄድኩ...."

"መሄድን ምን አመጣው...."

"ፍራቻ...እና ስልቸታ...."

"ምን እንደሰለቸሽ አውቃለሁ....ግን የምን ፍርሀት ነው....."

"ስመህ እንደጣልከው እንጀራ ትጥለኛለህ የሚል ፍራቻ...."

"ኧረ ሄሉ ተረጋጊ...ብለን ብለን በእንጀራ እንጣላ...ከዚህ በኃላ የምን ማንሳት የምን መሳም አሽቀንጥሬ ነው የምጥለው....ቁጭ በይ እናውራ...."

"መቼም አይገባህም...ደነዝ ነህ አንተ....".....ብላኝ ፈረጠጠች....


ከገባችሁ አስረዱኝ...እኔ ምንም አልገባኝም...🤷‍♂





✍Shewit dorka



https://www.tg-me.com/shewitdorka

ኮስታራ ናት እንኳን ገና ላልቀረበቺው ቀርቶ ለቀረቧትም ፊቷ አይፈታም።ጭምት ናት።ለሰዎች ደግ እና ቁምነገረኛ መሆኗን ግን ብዙ ሰው ይስማማበታል።እኔ ደግሞ ጥሎብኝ ኮስታራ ሰው እወዳለሁ፤ምንም እንኳን ሳቂታ ብሆንም...ለምንም ነገር ሳቅ ይቀድመኛል...ስናደድ እንኳን እስቃለሁ።
"ያለ ሳቅ ህይወት ምንድነው?" ብዬ የማስብ አይነት ሰው ነኝ።

የእሷ ህይወት?
ሳቅ ፈፅሞ የማይታወቅበት ጨለማ ነው ብዬ ደመደምኩ...የማስፈልጋት መስሎ ተሰማኝ...ለጨለመ ህይወቷ ጭላንጭል ብርሃን ልሆን...ፋኖሴን ይዤ ቀረብኳት፥ፈገግታዬን።
አልገርምም?
ማን ነኝ ብዬ ነው የማስበው?

የመጀመሪያ ሰሞን በቀልድ የተከሸኑትን ረጃጅም አረፍተ ነገሮች...በአጭር መልስ ድባቅ መትታ ጨዋታ ታስጠፋብኝ ነበር።እንኳን ለማሳቅ በወጉ ለማውራትም ቃላት እያጠረኝ መጣ...ይቺ ሴት ፋኖሴን፥ፈገግታዬን እፍ ብላ አጥፍታ እኔንም ያለሳቅ ልታስቀረኝ ነው?

እሷን ሳያት "በፌዘኞች ወንበር አትቀመጥ" የሚለውን የመፅሐፍ ቅዱስ ጥቅስ አስታውሰዋለው...በተገናኘንባቸው አጋጣሚዎች ላስቃት ስውተረተር፣ቃላት ጠፍቶብኝ ስደናበር...ርቃኝ ልደርስባት ስንጠራራ...በቀልዶቼ ሳይሆን በሁኔታዬ ፈገግ ማለት ጀመረች...ኋላ ላይ ሁኔታዬ አሳዝኗት ነው መሠል እሷው ታስቀኝ ጀመር...

አልፎ አልፎ እንደ ቅመም ጣል የምታደርጋቸው ቀልዶቿ ሆዴን አስይዘው ያስቁኛል...በሳቄ እሷ ትስቃለች...ሳቋ ደስ ይለኛል...ሳቋን ለማየት አንዳንዴ እንዲሁ እገለፍጣለሁ።

አንድ ቀን ብዙ ግርግር በማይበዛበት እሷ ባሳየቺኝ ካፌ ቁጭ ብለን ስንጨዋወት..."ከሳቅ ያኳረፈሽ ምንድነው?" ብዬ ጠየኳት።መልሱን ለመስማት ከመጓጓቴ የተነሳ መላ አካላቴ ጆሮ የሆነ እየመሰለኝ።

ጥያቄን በጥያቄ መለሠች። " ሰው ስለሳቀ ደስተኛ ነው ማለት ነው? " አለቺኝ በአይኖቿ ትኩር ብላ እየተመለከተቺኝ።
"ይመስለኛል...ሳቅ የደስታ መገለጫ አይደል፤እንባ ደግሞ የሐዘን።" አልኳት።
"ሐሴት ምን እንሆነ ታውቃለህ?" አለቺኝ።
"ደስታ አይደል"አልኳት በጥርጣሬ።
"አዎ ነው ግን ምን አይነት ደስታ?" ዝም አልኳት ግራ መጋባቴን አይታ ቀጠለች።
"ውስጣዊ ደስታ!" አለችና እርካታ የተሞላበት ፈገግታ ተጎናፀፈች...ሐሴት አደረገች?
ማብራሪያዋን ቀጥላለች "...ሐሴት ማለት ከትክክለኝነት የሚመነጭ ደስታ ነው...አደርገዋለሁ ያልከውን ስታደርገው ነኝ ያልከውን ስትሆን...ብዙዎቹን የራቀው ደስታ ይሄ ነው...እኔ ደስ እንዲለኝ...በየማዕበራዊ ገፁ የሚያሥቅ ነገር ሳስስ ውዬ አላውቅም...ውጪያዊ ደስታ ውሥጥን አርክቶ አያውቅም፤ይልቅ ባዶነት እንዲሠማህ ያደርጋል አንዳንዴም...ሰዎች ደስታ ውስጣቸው እንዳለ ዘንግተውት ደስታን ፍለጋ አይሆኑ ሲሆኑ ያሳዝኑኛል።እኔ ምንም እንኳን ባልስቅም ውስጤ ባለው ሰላም ሐሴት አደርጋለሁ። "

አለች ፍፁም መረጋጋት እና ስክነት ከሁናቴዋ እያነበብኹ።

ከተለያየን ፤ ከሄደች በኋላ ራሴን ጠየቅኹ...

እውነት ደስተኛ ነኝ?
እንጃ!

እኔም ብሎ ፋኖስ ለኳሽ፤ብርሃን አብሪ

እፍፍፍፍፍ....ፋኖሴን(ፈገግታዬን) አጠፋዋት!

ደግሞ ለፀሐይ የፋኖስ ብርሃን ምኗ ነው?
ለካ ጨለማ የነበረው የእኔ ህይወት ነው።




ከተቀደደው ማስታወሻ
©ሶፊ

ሰማው መቼም ያደረግኹሽን...ተፀፅቻለኹ።

የነገ ትናንት ላይ ናችሁ አይደል....ዛሬ ላይ ማለቴ ነው...እኔ ግን የዛሬ ትናንት ላይ ነኝ....

ነገ....
ዛሬ....
ትናንት....

የ"ነገ" እና የ"ዛሬ" ሆሄያት አጥረው የ"ትናንት" ሆሄያት ለምን ረዘሙ....ነገ እና ዛሬ በሁለት ፊደል ስለተዋቀሩ አልያም ትናንት የሚለው ቃል ላይ አራት ፊደላት ስላሉ ነው ትናንቴ የሚከተለኝ...ነገዬ አጥሮ ነው ያልክ የራቀኝ...ቆይ ዛሬዬስ....

ከራሴ ጋር ጥልቅ ጭውውት ይዣለሁ...ትናንቴ ሙጫ ሆኖብኛል...የረሳሁት ሲመስለኝ መልኩን ቀይሮ አለሁ  ይለኛል....ትናንት ጠባሳ ሆኖ ያለቀ ነገር ነው ብዬ ሳልጨርስ  እንደ አዲስ ይመረቅዛል...ጠባሳ ያማል እንዴ...
...ከመቼ ጀምሮ...እንጃ ብቻ ያመኛል...

ችግሩ ጠባሳ ያልኩት ትናንቴ ገና ጠፈፍ ያላለ ቁስል መሆኑ ላይ ነው...ለዛ ነው በተነካ ቁጥር የሚያመኝ...


መች ጨረስኩ...አሁንም ጭውውቴን ቀጥያለሁ..."እንደዛ ባይሆን ኖሮ እንዲህ አይሆንም ነበር" እላለሁ ለሆነ ነገሬ...ቁስሉ እንደ አዲስ መድማት ይጀምራል...የነገ ትናንት ላይ ነኝ....ዛሬ ላይ ማለቴ ነው...ግን ጭንቅላቴ ዛሬ ላይ ሳይሆን የዛሬ ትናንት ላይ ነው...እናንተ እኮ አታፍሩም..."move on ምንድን ነው...በቃ አለፈ እኮ ..."...ትሉኝ ይሆናል...እሱ መች ጠፋኝ...ማለፉን ጠንቅቄ አውቃለሁ...ችግሩ ምን አድርጎኝ ነው ያለፈው የሚለው ነው....


የደማው ቁስሌን ከማከም ይልቅ "ደማባት እኮ ስታሳዝን" ብሎ የሚያልፈኝ በዛ....ደሜ እንዳይነካው ደሜን ዘሎ የሚያልፍም አልጠፋም...ቁስሌ መሽተት ሲጀምር እንዳይሸታቸው አፍንጫቸውን ይሸፍናሉ....አንዳንዶቹም አይናቸውን...ያኔ ነው የገዛ ቁስሌን ለማከም የሰነፍኩት...ያኔ ነው ለራሴ ቁስል አይኔን የሸፈንኩት...ሲቆይ እኔም እንደ እነርሱ አፍንጫዬን ሸፈንኩ...ሽታው ይረብሸኝ ጀመር...ትናንቴን አለባበስኩት....ንፋስ እንዳይገባው ጠፍሬ አሰርኩት...ለዛ ነው ዛሬ ላይ ሳይሆን የዛሬ ትናንቴ ላይ የቀረሁት...

የታፈነ ቁስል በእንጨት እስኪነካ አይጠብቅም...በትንሽ ሽንቁር ውስጥ ሽው የምትል ንፋስ ትበቃዋለች...ያማል...በጣም ያማል...ያኔ ነው ያሰርኩት ቁስሌን ማደንዘዝ የጀመርኩት...."ለምን ቆይ...አንቺ እኮ ራስሽን ማከም ትችዪ ነበር...ልክ አልሰራሽም..."....ይላሉ ገና ደከመኝ ከማለቴ... በጨርቅ የተሸፈነ አፍ ለወሬ ሲሆን ይበረገዳል....ሁሉም አስተያየት ሰጪ ይሆናል...ሁሉም አልቃሽ ይሆናል...አይናቸውን እንዳልጨፈኑ አይናቸውን ከፍተው ያነባሉ...

...ስለ እነርሱ ማሰብ ይብስ ነፍሴን ያቀጭጫታል....

ስለ እነርሱ ትቼ ስለ ሆሄያቱ ባሰላስል ሳይሻል አይቀርም ብዬ ወደ ቀደመው ነገሬ ተመለስኩ...

"ትናንት"....ላይ ሆሄያት በዙ..."ዛሬ"...እና "ነገ" ላይ ግን አነሱ....ለዛም ነው ትናንቴ የተጣበቀብኝ የሚል ድምዳሜ ላይ ከመድረሴ አንድ የቴሌዥጅን ማስታወቂያ  ከጭውውቴ አባነነኝ.......

"ከብዛት ጥራት እንዲሉ የተለያዩ  እቃዎችን በተመጣጣኝ ዋጋ...."....እያለ የሚጀምር ማስታወቂያ ነው...."ከብዛት ጥራት...."....ጋር ቀረሁ....ትናንት ሆሄው ስለበዛ "ጌታ" ዛሬ ደግሞ ሆሄው ስላነሰ "ባሪያ" አይደሉም አልኩት ለራሴ....


አንዳንዴ ፈጣሪ በምን በኩል አድርጎ ወደ እቅፉ እንደሚመልስ አይታወቅም አይደል....አዎ ካልጠራ ትናንቴ የጠራው ዛሬን ሊያኖረኝ ቢሆንስ... በቁስሌ በኩል አይቶኝ ቢሆንስ.....የፈራሁት ቁስሌን እርሱው እየፈታው ቢሆንስ.....በራሱ መንገድ እያደሰኝ ቢሆንስ...


እንዲያድሰኝ መፍረስ ግድ ከሆነስ....እንኳን አመመኝ....😊




✍Shewit




https://www.tg-me.com/shewitdorka

ከ exህ ጋር እንዴት ተለያያችሁ...?

ቤታችን ለልማት ተፈልጎ ፈረሰ እና ተለዋጭ ቤት ጀሞ ተሰጠን።ልንገናኝ ተቀጣጥረን...ሁለት ቀን ባስ አመለጣት እና በእግሯ መጥታ ሜክሲኮ ተገናኘን...ከዛን በኋላ ወሰነች...

"long distance relationship ለእኔም ለአንተም አይሆንም " ብላ ነው የተለየቺኝ።

ሰፈሯ የት ነው?


ኮዬ ፈጬ


አይዞህ በቃ አታልቅስ...
©ሶፊ

Facebook ላይ ሳያት እየፀለየች ነው "አቤቱ ህዝብህን አድን" ከሚል caption ጋር ፎቶዋን ለጥፋለች ticktock ስገባ እዛም post አድርጋለች...እየደነሰች ነው "አለም ሞልቶ አይሞላም" የሚል ፅኹፍ ከስሩ አስፍራለች። Instagram ስገባ በተመሳሳይ ሰዓት ሰውነቷ ላይ እራፊ ጨርቅ ጣል አድርጋ "Only God can judge me." ከሚል Caption ጋር ለቃለች።Telegram~ሟን በፍጥነት check አደረግኹ ከፍቷታል መሠል profile-ሏ "ትወደኝ የለ አበርታኝ" ይላል።

ከሷ ፖስቶች የኔ በየቤቷ መንከራተቴ...
ይቺ ሴት ስንት ናት እያልኹ መብሰልሰሌ አይገርምም?

ጌታ ሆይ እኔንም አበርታኝ።
26/04/15
#repost
©ሶፊ

የልቤን ላዋይሽ እሻለኹ...
ይች አለም ምንኛ እንዳታከተቺኝ ልነግርሽ እፈልጋለኹ...

የማዋየው፣የምነግረው፤ሳጣ ፣ሁሉም ፊት ሲነሳኝ የምሸሸገው ባንቺ እንዲኾን እመኛለው።

ምኞት ብቻ።

የእኔ አለም ለካ አንቺም ከሌሉት ውስጥ ነሽ።


ለካ አንቺም ተስፋ ካስቆረጡኝ አንዷ ነሽ።

መደበቂያ ያሉት አደባባይ ሲሆን ምን ይደረጋል?
መጠለያ፤መሸሸጊያ ያሉት ከጠላትም ብሶ ሲያሳድድ ወዴት ይደረሳል?


የማርያም መንገድ ሲጠፋ...
ወዴት ይሸሻል...?



ከተቀደደው ማስታወሻ
©ሶፊ

"ትንሳኤከ ለእለአመነ
ብርሃነ ከፈኑ ዲቤነ..."
የሚል መዝሙር ከቅዱስ ሚካኤል ቤተክርስቲያን በስሱ ይሰማኛል...ክርስቲያኖች ዳግማዊ ትንሣኤ የሚያከብሩበት ሰንበት ነው...መዝሙሩን ስሰማ ባር ባር አለኝ ቤተስኪያን የማልቀርበት ልጅነቴ ታወሰኝ...አፌን የፈታውበት የአምላኬ ስም ናፈቀኝ...ወይ ከአለም ወይ ከፈጣሪ አለመኾኔ አሳሰበኝ...ሐዘንና የልብ ስብራት በፀፀት ገላ ተወጣጥሮ የተመለኽትኹት መሠለኝ...ጠቆር ያለውን ማኪያቶዬን ጎንጨት አልኹና ላነበው በእጄ የያዝኹትን መፅሐፍ ጠረቤዛው ላይ ጣል አደረግኹት።ጭንቅላቴን ግርግዳው ላይ ለአፍታ አስደገፍኹት...ወደ አዕምሮዬ የመጣውን የሐዘን ስሜት ላስተናግደው ሽቻለኹ...ፀፀቴን ኹሉ በእንባ አፍስሼ ከእኔ ባርቅ ምንኛ በወደድኹ...ዳሩ ልቤ ፀፀት ትቷል፤በደል ውስጥ በጨለማ ተውጦ እንኳን የተሳሳተ ነገር ላይ እንዳለ አይሰማውም።የትክክል እና የስህተት ሚዛኑ ተሠብሮበታል።መመዘን ትቷል።መፀፀት ትቷል።
...ማዘኑን ትቼ ማኪያቶውን እየተጎነጨው ስለ ቀኑ ማሰላሰል ዠመርኹ...ዳግም ትንሳኤ እንዴት ያለ ነገር ነው?  ስል አሰብኹ...ልጅ እያለው ጌታ ዳግም የተነሳበት ቀን ይመስለኝ ነበር አድጌ ፂም ካበቀልኩ በኋላ ነው ኃዋርያቱ ከስቅለቱ በኋላ በዝግ ቤት ተደብቀውና በፍርሃት ተሸሽገው ሳሉ "ሰላም ለእናንተ ይሁን" ብሏቸው ሰላም ቢሰማቸው "ዳግም ትንሳኤ" ኾነ ማለታቸው እደሆነ የተረዳሁት።
ቀኑን አሳክኬ ጥያቄዬን አቀረብኩ በዚህ ማደግ በሚሉት በቆሸሸ እና በተጨማለቀ ስብዕና ውስጥ ተሸሽጎ ያለውን ልጅነቴን "ሰላም ለአንተ ይሁን" ብለህ ሰላሙን ሰጠው... እንደ አልዓዛር ከሞት ጥራኝ... ውብ በሚመስል በብልጭልጭ ጨርቅ የተገነዘውን ሙት ገላዬን ይዤ አለም ከሚሉት መቃብር አቤት ብዬ ልምጣ...ፈጣሪን ተማጠንኹ... ቤተክርስትያን ሄጄ ከፀለይኹ ቆየሁ...
.... ድንገት ልብ የገዛኹኝ እደው ባለሁበት ኹኔታና ቦታ እንዳለኹ ፀሎቴን አደርሳሁ ...ምንአልባት አንዳንዴ ፀሎት ማደርሰው በሀጥያት መሀል እያለኹም ሊኾን ይችላል።

ማኪያቶ ጎንጨት አልሁና መፅሀፌን አነሳው''የ ተ ቀ ደ ደ ው ማስታወሻ'' ይላል ገልጬ ካቆምኹበት ማንበብ ቀጠልኹ

"ምንም እንኳን ብንለያይ ''ቻው'' ብንባባልም፤መንገዳችን መልሶ ባይገጥም...ፈፅመሽ እንደማትረሺኝ አምናለኹ...ከስጋሽ አልፎ ከነብስሽ ጋር የተዋሀድን እስኪመስል ተቀራርበናል... ስንለያይ የሆነ አካሌ ካንቺ ጋር አብሮ እንደሚሄድ አምናለኹ...ቃል ሳንተነፍስ የተግባባንባቸውን ንግግሮቻችን እደማትዘነጊው አምናለኹ...ማንም ገብቶ በማያቀው ልብሽ ውስጥ የልቤ ዳና እንደማይጠፋ አምናለኹ...


ሄጃለኹ ባልሽኝ ስፍራ በልብሽ ይዘሺኝ እንደምትሄጂ አምናለኹ።"


የ ተ ቀ ደ ደ ው ማስታወሻ
20/08/2015
#repost
©ሶፊ

ወዶ አለመወደድ የዘመን እጣዬ
ተወዶ መኩራራት የሰርክ ባላንጣዬ
አንገጥም አሉና ኮከብ ከፀሀዬ
የብቸኝነት ዳስ ተጣለ በላዬ



~አዲስ 🤙

ለኢትዮጵያ እናቶች❤️

አንዳንዴ መልአክ ትመስይኛለሽ.....


እንደዛ ነው...እጅ ልብን ሲነካ ያየሁት ባንቺ ነው...አይን አፍ አውጥቶ አለሁልሽ ካለኝ ያ አይን ያንቺ አይን ነው ማለት ነው.... እቅፍ ከአለም ሲሸሽግ አይቻለሁ...ፍርሀቴ ሁላ ሲተን አስተውያለሁ...አንቺ እስካለሽ ድረስ ለመኖር ምክንያት አጣሁ አልልም...ትንፋሼን ነጥቆ ካንቺ እንዳይነጥለኝ ብቻ ...ብሞት ራሱ የምትናፍቂኝ ይመስለኛል....አንቺን ከሰጠኝ ወዲያ ምንስ ቢነሳኝ....

አንቺ ስላለሽ እኮ ነው ለመሳቅ የምሞክረው...በሳቄ እንደምትስቂ ስለማውቅ እኮ ነው ትንሽ እንኳን ፈገግ የምለው....ዝምታዬ ሳይቀር አንቺ ጋ ድምፅ እንዳለው አውቃለሁ...


አውቃለሁ ህይወት ቀሎሽ አያውቅም....አግኝቶ ማጣት እንዳዘመመሽ አውቃለሁ...ዘመም ማለትሽ ግን ስለ እኛ ከመጨነቅ አላቆምሽም...እማ ህመምሽን ማዳመጥ ትተሻል እኮ...ህመምሽን ፊት ነስተሽ የእኛን ህመም እንደምትታመሚልን ጠንቅቄ አውቃለሁ...ልብሽ እንደ ህፃን ልብ ነው...አንቺን ሳይ 'መላእክት እኮ ምድርም ይኖራሉ' ብዬ መከራከር ያምረኛል...

የአለም ውጭንብር ሲያንገዳግደኝ ምርኩዝ ሰጠኝ....አንቺን....የእኔን አንቺ....

ቀርበው የራቁኝ ብዙ ቢሆኑም አለሽ አንቺ...አፌን ሞልቼ የኔ ናት የምለው እኮ አንቺን ነው...

አውቃለሁ ጫንቃሽ በእኔ ምክንያት ዘንበል ብሏል...አይንሽ ለእኔ በማልቀስ ደክሟል....ቀሚስሽ ቢሰፋሽ ምክንያትዋ እኔ እንደሆንኩ ነው የማውቀው...ከነ ጥፋቶቼ ልብሽ ላይ አመቻችተሽ አስቀምጠሽኛል...በፀሎትሽ መሀል ሁሉ አለሁ....እግርሽ ለእኔ እንደባከነ ሳላውቅ ቀርቼ አይደለም...እማ አንቺን በፊደላት መግለፅ ባህር በማንኪያ እንደመጨለፍ ነው....አልገልፅሽም....

አንቺን እንደሚገባሽ ማኖር የማይታሰብ ነው...የሚገባሽን ገነት መስራት አልችልማ....እማ መልአክ ነሻ የት ላኑርሽ....?...ገነት ልስራልሽ....ከኤዶም ፈሳሽ ላጠጣሽ......ቆይ ምን አባቴ ልሁንልሽ.....?...


እኔንጃ ብቻ ኑሪልኝ ❤️



✍Shewit




https://www.tg-me.com/shewitdorka

ፎቶ ደብዳቤሽን ሁሉን አቃጠልኹት
እሳት ዳር ቁጭ ብዬ ትዝታሽን ሞቅኹት።

ሶፊ 🤙

"ትቀልዳለህ እንዴ ብሮ ?
...ወጪ ታሶጣለች ምናምን እያልኽ እሪ ትላለህ?

እሷኮ አንተ ጋር ለመምጣት...በስሱ ሽቶዋን ነስንሳ አንተ ላም ሽቶ ስንት ነው ?
ሂውማን ሄሯን ጣል አድርጋ...
ሜካፗን ተቀብታ (ፊቷ ረዘም ካለ ደግሞ አስበው?) ሜካፕ ስንት ነው? እሱን ተወው ይወደድብሀል...ጥፍር ቀለም ስንት እንደገባ ታውቃለህ? አታውቅም ! አታውቅም ! እና እንደዚህ ውብ ሆናልህ መጥታ ላንተ ብላ ተቆነጃጅታ...በመጀመሪያ ትውውቃቹ ማዘር ቤት ምሳዋን ፤ ዲዘርት ደግሞ ወክ ልትጋብዛት ትፈልጋለህ...? እንዲህ ብታደርጋት ሌላ ጊዜ ስትቀጥራት "nah nah ከቦታውም እደዛ አልመጣም፤አልመጣም " ትልህ ነበር...ሃሃሃ
Fancy restaurant መርጣ ገባች ምናምን ትላለህ እንዴ ብሮ? አቅሙ ከሌለህ ለምን ጠበስክ አርፈህ ከእኛ ጋር አትቀመጥም ነበር።"

~ለኛ ለሻይ የማያወጣ ሰውዬ አዲስ ሴት ተዋውቄ ጋበዝኩ ሲለኝ አበሳጭቶኝ ነው የተናገርኹት።

እሱም ተበሳጭቶ "አንተ ይሄን ኹሉ እንዴት አወቅኽ? በበፊት ህይወትህ ቺክ ነበርክ እንዴ ?"

ንዴቱን ረስተን ሁለታችንም ተሳሳቅን።



(በነገራችን ላይ ብዙ የማትኳኳል ሴት የሚል የጋብቻ መስፈርት ከሰማኹ በኋላ ነው የፃፍኹት።)
©ሶፊ

የኾነ ቀን ላይ ታች ስል አመሸው...ወጣው ወረድኹ...ከሌላው ቀን በተለየ ደከምኹ (እንደሚታወቀው እኛ ሀገር ትንሽ የሚባል ስራ የለም ፤ የሀገሪቱ ሁኔታ ትንሹን ነገር ሁሉ ያከብደዋል...ነገሮችን ለማክበድ ታትረን የምንሰራ ይመስለኛል አዳንድ ጊዜ...አስበው አንዳንድ ጊዜ ከመገናኛ ሜክሲኮ መሄድ እጅግ ይርቅሀል፤ተከዜ ደርሰህ ብትመጣ ሁላ ይቀልሀል። ተይኝ እቴ አለች ወይዘሮ አስካል።)
ምን ላይ ነበርኹ?
አዎ እናላችሁ ቀን ስደክም ውዬ ¡ አመሻሹ ላይ እግሬን ለዮጋ እንደተሰናዳ ዮጊስት አጣጥፌ ገቢ እና ወጪዬን በገንዘብ ሳሰላው ካገኘውት ይልቅ ያጣውት በዛ...

ከዛ አዕምሮዬ እንዲህ የሚል ምርጫ ሰጠኝ...

"በገንዘብ ስሌት ስታሰላው ወጥተህ ወርደህ፤ደክመህለት ስላላገኘኽው፣ይልቅም ስላጣኽው ገንዘብ እርርር ድብን እያልኽ እንቅልፍ ታጣለኽ?

ወይስ

እግዚአብሔር ይህን ሁሉ ታከናውን ዘንድ ጤናውን ስለሰጠህ፤ቸርነቱን እያደነቅህ በሰላም ትተኛለህ ? "

ብሎ ሁለት ምርጫ አስቀመጠልኝ እኔም መለስኹ...

"አረ ወንድሜ እግዚአብሔር ይመስገን ! በሰላም ማደርን መርጫለሁ። ያጣሁት አንሶ በማጣቴ ስብሰለሰል የማድር ሁለቴ የምጎዳ ሞኝ አይደለሁም ።"


በቸር ያሳድረን
©ሶፊ

ብዙ ንግግር አላውቅም...አንደበተ ርቱዎች ያስቀኑኛል።

ግን ባዶ ቃላት ምን ያደርጋሉ?

ልቤ፣ቃሌ እና ተግባሬ ሊገናኙ አልቻሉም ፤ እወድሻለኹ እያልኹ መደጋገሜን ትቼ ...


ጥቂት ፈገግታ እና አበባ እሰጥሻለኹ፤አበቦች ከቃላት የተሻለ ፍቅርን ይገልፃሉ።



የ ተ ቀ ደ ደ ው ማስታወሻ
©ሶፊ