‏
‏ ⁧ #لو_هزك_الشوق⁩ ماطولت بغيابك
‏خل المعاذير مالك حاجةٍ فيها
‏
‏يمديه لو جاك من عقب البطا جابك
‏فزات الاشواق تخلف حال راعيها
‏
‏خذتك الايام واشغلتك عن احبابك
‏ماكن الاحباب عندك مر طاريها
‏
‏تبقى على البال واشواقي تغنابك
‏غالي ولوغبت عشق النفس غاليها
‏
‏⁧ #شطر_طرالي

‏لك الله ياقلبٍ تعاين بك الجراح
‏حداك الزمان وغير الوقت دقاتك

‏عقب منت خالي من هموم الشقا مرتاح
‏تمايل بك ايامك على عكس مشهاتك

‏تصبرت لين الجرح عمّر وزاد اجراح
‏وحظك تردى في طموحك وهقواتك

‏سلامات والايام ماترجع اللي راح
‏تصبّر ولو زيفت واقع معاناتك

‏⁧ #شطر_طرالي

‏
‏لاصار حظك مايميز صلاحك
‏مده شحيح ونكبته من نصيبك
‏
‏تبيه عون وصار عثرة نجاحك
‏زاد بقساه وجار كنّه حريبك
‏
‏وين النجاح وكيف تبرا جراحك
‏وانت العزيز وحاجتك ماتجيبك
‏
‏ليلك عذاب وغربتك في صباحك
‏بين الظروف وكلمةٍ تستريبك
‏
‏وين الحلول ومن يقدر كفاحك
‏دامك سعيت وعثرتك ماتعيبك
‏
‏⁧ #شطر_طرالي