وين ..حادي يايمة الضعن
وين ..بالي راسملج جفن
وين..ايذكرج السان الزمن..غريبة
#################################
ماشية اووياج شيخ الطايفة
وللحراسة اربع ولد بس خايفة
زينب اتعرفين بية اشعايفة
زينب الخوف ..ليش ماخذ بالي
راح ترحين.. وكلشي يتراولي..لومشيتي
ليش..بالي راسملي رعب
ليش..ايكلي دمعاتج تصب
ليش..والخواطر فكرن..غريبة
#################################
بالي راسملج درب كلش خطر
بي حرك خيمة وسحك فوك الجمر
ليش اشوف جفوفج من الشد حمر
ابريتج انفاس.. تطلع اتخلف حرك
تشكف اسياط ..وصايرة جفوفج زرك..ايكلي بالي
خوف ..ياكل ابكلبي اكل
خوف..حايرة زينب تضل
خوف..ايكلي سوتهة المحن..غريبة
#################################
يااميرة ابكلبي دومج كاعدة
ليش احسج يمة عالتل صاعدة
كولي وي درب السبي متواعدة
انة حسيت.. روحتج بيهة سبي
وتوصل النار ..حتى لحدود العبي..انه احسهة
نار ..تحرك اعليج الخيم
نار..ترعب اكلوب الحرم
نار..اتحسس العافت وطن..غريبة
#################################
انة اشوفج حايرة فوك الهزل
ابوجهج اديرين لا واكع طفل
يمة هاي الحالة كتلتني كتل
يمة عالبال..صورتج لمن تمر
وانتي عالكاع..مطيحة وردة ابكل كتر..من اخوتج
ويل..يمة من اتخيلج
ويل..وعلترب نامو هلج
ويل..فوك كل ذن الجرن..غريبة
#################################
ليش احسج كاعدة ومتكدرة
حسين بالجف ما اشوفن خنصرة
وجنج اعلة الشام رحتي ميسرة
الروحت الشام..يمة ماينشف جرح
ليش اليام..بيهة ماغزر ملح..بيج دارت
راح..ايشيب راسج باليسر
راح..ايزيد بيج ايشب جمر
راح..الخرابة اتضل سكن..غريبة
#################################
ذوالفقار الزيدي

عجيب ..حسين يادنية انذبح ..عالخيام ايهد شمر
عجيب ..راسة ينشال ابرمح ..زينب ادوس الجمر
زينب اتصبح غريبة ..والله دنية عجيبة
#################################
والله يادنية عجب ..بيج ماغزر ملح
الكلبة ابيض من ثلج ..بيه خليتي الجرح
حسين مغشي اعلة الرمل..منة كومة ماتصح
اشطلعيتي من الخيم ..ابتلة صعدتي الصرح
ابسبتج زينب تطلع صوتهة
جبتي كلشي وما اجيتي ابموتهة
نحيب ..الزينب مفطر السمة ..من دمه ايهل الدمع
نحيب .. حسين ماجاوب بعد..كاتم انفاسة الضلع
شيبته من الدم خضيبة .. والله يادنية عجيبة
#################################
جهزت مهر الذبح ..للاخو ابموقف صعب
حسين هلت دمعتة..وية دمعتهة التصب
هاية اخر شوفه اله ..وبعدة يوليهة الرعب
ليش شوفتيهة الم ..ادري ماعندج كلب
ابهيج موقف ليش خليتيهة
زينب اشسوتلج اتعذبيهة
حبيب..ما بقة الهة ابسبتج..درتي وياهة الم
حبيب..مابقة بلاية ذبح ..اله نايم بي سهم
تنادي بس ماكو المجيبة..والله يادنية عجيبة
#################################
مارضيتي ابحز نحر..انوب جملتي السحك
وبقت زينب تستمع ..كل ضلع لمن يطك
ياهو يحمل ها الالم..اكبالة ينداس العشك
مو منية اوتنتهي ..مو وداع وتفترك
كطع جم بت من كلبة الحافر
بس قوية وبينتهة اتكابر
تريب ..ضل اخوهة اعلة الرمل ..وهية عالتل واكفة
تريب ..شافتة وجاه الشمر .. وكام يذبح من قفة
ياخذ السيف ويجيبة..والله يادنية عجيبة
#################################
كل اهلهة اتفرهدت ..ونار شبت بالخيم
وكامت ادوس الجمر ..وضلت اتلم بالحرم
زينب اعليمن تصد ..والمواقف كلهة دم
الهة ميلوك السبي ..وياهة كلش ما رهم
وين ترهم زينب ايشوفوهة
وفوك هزل خاوية ايركبوهة
صعيب ..حيل ياليل اهدعش..وحشة ماكو ابوحشتة
صعيب ..بيه زينب شيبت ..من ضلمتة وغربتة
لهدعش اكبر مصيبة..والله يادنية عجيبة
#################################
بلخرابة الحرة اسف ..وبقصر باتت هند
خادمتهة مدللة ..وهية شيبهة البعد
نايمة ابقصر الترف..وزينب ابحر وبرد
هية تنضر للنعم..وللرمح زينب تصد
بزينب اسوت يدنية ايامهة
وماتساوت حتى وي خدامهة
اتنام بالكاع التريبة ..والله يادنية عجيبة
#################################
ذوالفقار الزيدي

لاخيمة لا حرك العبي..اكبر جرح جان السبي
لا مو عبايات ..اكبر جرح بات .. للهاشميات ..جرح السبي
################################
لامو حرك خيمة ..لانسوة فرت لا رعب داخل للزغار
لافزعة سكينة..لاعمه ارقية لاسلب لاهاي الخطار
اكبر جرح زينب..للمهدي من هذا الجرح واصل لهب نار
والله دنية..اتصير زينب بت علي ياناس اسيرة
والله دنية..المو اميرة اعلة البشر للجنة اميرة
زينب يشدوهة ابحبل ..وفوكاهة تركب عالهزل
هينات لجروح ..ليطلع الروح..للهاشميات ..جرح السبي
#################################
الشمر بحبالة ..لمن اجاهن جان اشد من ذبح الحسين
هذا الكتل عادة.. بس مو بنات المصطفى اتصدلهن العين
ما صارت الهاشم..ايطلعن بنات ميسرات من الصواوين
وين صارت..لال هاشم تنجتف بحبال نسوان
وين صارت..من صواوين الفخر دخلوهة ديوان
للال النبي عادة الكتل.. بس ماكو عادة اعلة الحبل
موعادة لحبال..وتصد الرجال ..للهاشميات ..جرح السبي
#################################
كلمن ملك غيرة..السبي ايكتلة مو حرك ذيج العبايات
قصت عرض هاية.. مو اي نساء الطالعة ذن فاطميات
صح عالمة الحرة..ثورتهة جانت عالكفر ثورة حجابات
ثورة سوت..وما رأيت الا جميل الصار بينة
ثورة سوت..صح حجتهة بس بقت زينب حزينة
صح ثورة علنت عالكفر..بس وسفة اذاهة الشمر
قادتهة لضعون..بس صدت عيون ..للهاشميات..جرح السبي
#################################
الفاكد اخوانة..ابكلب العقيلة اتصور حسين ومصابة
الطيحة مو سهلة..بس صعبة زينب تكعد ابنص الخرابة
الدنية دوارة.. الخلت يزيد اعلة النسة ايسولف خطابة
ياعملت الشام ..راس الحسين ابنص طشت وتشوفة لعيون
ياعملت الشام.. ايزيد يضرب بالثغر خاطر يشوفون
بالمخصرة ايطك الثغر..خلة العقيلة تشب جمر
ياموقف الشام.. ياذيج ليام ..للهاشميات ..جرح السبي
#################################
هذا الجرح باقي ..موقف دمع كل مايمر ذكرة اعله الايام
من يذكر الراوي ..اكبرجرح شاف الزمن زينب وليتام
والذبحت الشيعة ..هند ابقصر والحرة ماضلت بالخيام
اتبات بقصور ..خادمتهة والاميرة بلاية خيمة
اتبات بقصور ..وصاعدة فوك الهزل زينب هضيمة
هند اصبحت متخدرة ..ولبوة علي متيسرة
دورات ليام ..ماخلت اخيام ..للهاشميات ..جرح السبي
#################################
ذوالفقار الزيدي

من القفة حسين انذبح ..والراس ضل اعلة الرمح
الدنية ماترحم ترف.. وبالدنية ماغزر ملح
#################################
مو بس النحر ارد احجي الصعبة
الطعنة فوك طعنة وضربة عالضربة
واسولف عن سهم ضل نايم ابكلبة
وحجر شك حاجبة وبالدم كطع دربة
لعيالة ماخلا يصد..لمن ضرب وجهة الصبح
من القفة حسين انذبح..والراس ضل اعلة ارمح
#################################

عمت عيني اعلة اخر نضرة لعيالة
وبعدهة اعلة الارض طشوهن اوصالة
الدهر وية الترف مايعدل اشمالة
دوس اخيول فوك المنحر اچمالة
فوك الذبح چمل سحك..عفية الزمان اشكد وقح
من القفة حسين انذبح..والراس ضل اعلة الرمح
#################################
ماكف الشمر لمن كطع نحرة
امر عشرة خيول اترضرض ابصدرة
عوجة روس اجت ماتكدر اتنظرة
وياعظم اليلوحة الحافر ايكسرة
جوة الحوافر منطحن..سالم عضم لا مايصح
من القفة حسين انذبح..والراس ضل اعلة الرمح
#################################
اللعين بكيفة ضل ايصرح ايقرر
انتة اسلب هدم وانتة اكطع الخنصر
وانتة ادخل خيمهم واسحك وطشر
وانتة اكبال زينب اوكف استبشر
اونتة اضحك وبّين الفرح..وحسسهة زينب بالجرح
من القفة حسين انذبح..والراس ضل اعلة الرمح
#################################
الحراير من دخل ياوسفة كيدهن
بعد ماسلباهن حَرّك اخيمهن
ماكظة الحية جي والي ماعدهن
حضرهة الهزل خاطر يصعدهن
محضرلهن اجروح السبي..ماكفتة اجروح الذبح
من القفة احسين انذبح..والراس ضل اعلة الرمح
#################################
ذوالفقار الزيدي

انة وية الحسين وحسن
لمن غدر بينة الزمن
قمنالج ابمجلس عزية
واحنة البدينة الفاطمية
#################################
ردينة من بعد الدفن ياحالة تشبه هاية
واحدنة يقرة الفاتحة ويتحسر بكل اية
صلينة وحشت فركتج غركنة المصلاية
وكلولي بوية ياعلي وحشتنة مال اقراية
ابنيت افراكج الوحشة صلينة
ومجلس ادموع يالمغربة سوينة
والمجلس ابون ابتدة
يشرح عليج اشما سدة
وصار الحجي بذيج الرزية
واحنة البدينة الفاطمية
#################################
مجلس عزائج مبتدي ورادودة جان حسينج
ابفتحت عزة يافاطمة والحسن يصرخ وينج
وطب للمصايب وانتحب وجاب الحجي الخدينج
يافاطمة وعيني انطفت لمن وصل حد عينج
جاب العيون بالقراية واذاني
والحسن صاح واحس جمرة جواني
وكلة الحسن خوية استمر
بس اعلة هونك بالكسر
وحسين ون وي ون اخية
واحنة البدينة الفاطمية
#################################
زينب اجتنة وشاركت وكلتلة عيد اشكايل
سولفلي جايب ياجرح شو ضهرك شبي مايل
كللهة ما اعيد استمر بالقصة واحد عايل
ماواصل الهذا الجرح زينب يخيتي شناقل
كلهة والباب يزينب اخذ روحي
اجروح الضلوع احس بيهن جروحي
كلتلة اخوي اشبي غضب
كلهلة اسوالف عالحطب
والنار من شبت سرية
واحنة البدينة الفاطمية
#################################
وحسين ضل يروي القصص وعالخد دمعتة اتلالي
اهتز كلة من كتلة لمن كلي الجرح دلالي
حسيت بالغالي صدك لمن يودع الغالي
كلالي حسيتك متت كتلة استمر واقرالي
حسهن اسيوف تحز بية جلماتة
وانه محروك لان اسمع اهاتة
كلالي اذيتك احس
كتلة انة لمضيع نفس
مضيع اعز مخلوقة الية
واحنة البدينة الفاطمية
#################################
عالمنبر وضل يرتجل والحانة مامسموعة
والنفس يطلع جن جمر من ريتة الموجوعة
حسيتة كدما محترك متفرد ابموضوعة
ولمن وصل يم لضلع ضل يلطم اعلة ضلوعة
ايدك علة ضلوعة ويصيح يضلع امي
هذا عالباب اثر دمهة لودمي
ضل عالضلع بالجف يدك
ويصيح ياضلع العشك
اوويا نصيح اه يالزجية
واحنة البدينة الفاطمية
#################################
ابهذا العزة وتخيلت وابالي مر فد احساس
شيسوي يلطم ينتحب لو جان حاضر عباس
بضهري واحسنة جمر ويتوعد الذيج الناس
ايكلي يطلعني الزمن اوطبكه راس اعلة الراس
باجر الناس جمر كلبي اراويهة
وراية الثار بلطفوف اعليهة
يكلي يطلعني الزمن
والناس اشدلهة الرسن
ويكلي غيض الزهرة بية
واحنة البدينة الفاطمية
#################################
ذوالفقار الزيدي

(كعديةللزهراء)
ماتنشف جروحة..الدافن بيدة روحة
الله الحيدرة ايعين..دافن ام الحسين
#################################
الوداع ايريد حيل وحيدرة مهدود حيلة
ضال حصرة ابنص يتامة وصبحة مطبوك اعلة ليلة
عايش ابديرة شماتة وماكو خل اليشتكيلة
وي فاطمة جان ايحجي
وعليهة بالهم ينتجي
راحت وضل ويالبجي
ايسولف ابعازة خليلة
يحجي ويالليالي..هذا عليهة حالي
وحكة ايطول الونين..دافن ام الحسين
#################################
الوجع نازل وي خيالة وضهرة محني اتكول شايب
ومالة حيل الشيل هدمة ذاكة رداد الطلايب
ابعينة كل الدنية ضلمة حكة بدر اسنينة غايب
من حكة عايش منمرد
ام بيتة راحت ماترد
والشيب اثار البعد
وبيضت راسة المصايب
والسبب مشيبة..فركاه الحبيبة
وهاي مصيبة البين..دافن ام الحسين
#################################
ايدور بالبيت ويعاين كل مچان امخلي ذكرة
ويكض سبحتهة ويشمهة وخرزة خرزة ايذبلة حسرة
يعني تسبيحت مماتة سوة تسبيحت الزهرة
ابكل خرزة يشمرلة عمر
ابكل فرة كلبة ايضم فطر
وتطلع الحسرة من الصدر
وتنتجي بضلعة وتكسرة
تسبيحت زجيتة..حاسبهة ابمنيتة
ضاعت ذيج السنين..دافن ام الحسين
#################################
لابس اسود والليالي جانت اكشف من سوادة
وساعة التوديع تمشي وميلهة ايرد ابحدادة
صار قصة ودهرة راوي وماقبل يخلص مدادة
ايمر الوكت بس الحزن
كل ليلة يم حيدر يجن
والدمعة تاكل بالجفن
والحزن موخوش عادة
شما وكتة ايتمدد..بحزانة ايتجدد
ومايطبك جفن عين..دافن ام الحسين
#################################
ذاك يدفع فاطم اتصد شلون ذكرة شلون حالة
مات محسن وانة ساكت هاي جلماتة ويبالة
وصوت يافضة اسنديني موت ويدور ابخيالة
واكثر مصيبة اتألمة
وتطبك الكاع وية السمة
كلمت وان بي فاطمة
الكالهة وسوة البدالة
ودفعت ام ابيهة..ضيع حيلة بيهة
ايجيب امكابر منين..دافن ام الحسين
#################################
ذوالفقار الزيدي