قصائد جديد #محرم الحرام
قصيدة الى مولاي الامام الحسين عليه السلام

________________

نويت تروح يبعد الروح وتخلي زينب بحيرة
الماشافو خيالي بيوم اروح وياهم ايسيرة

________________

اول ما طحت يحسين علينة هجمت العسكر
وياصوب الاروحن بي الكة جف خشن يسطر
و خدود البنات تراف بس ما تنضرب تحمر
وزينب تركض اليا صوب ضلت زينب بحيرة

________________

اركض و التفت يحسين واحد يركض علية
وخطوة زلمة تدري هواي فرق عن خطوة مرية
لحك بيه يم جسمك كبالك ضل يطك بية
وادري تستحي مني بضربتة و جهك اديرة

________________

جسمك يختلف يحسين مو ذاك الاعرفنة
بس ﻻ من قبل ساعة منك طلعت الونة
يعني انت الصحت احا من الخيل داسنة
ولحم من جسمك بحافر اشوفن صار تطفيرة

________________

لحيتي باوعي عليهه طاحت منهه جم شعرة
ومو وحدة الشعر من طاح الشمر يازينب الجرة
و حسين اليحبة الله عليمن رضرضو صدرة
ومن كد ما وصل خلو لمو جسمة بحصيرة

_________________

اليذبحوك الضهر يحسين الفجر يالغالي يسبوني
ومن كد الضرب بالسوط بعد ما هيس متوني
عيوني الجانت تشوفك عمت من البجي عيوني
ولو ضاعت رقية بليل شلون الكاهه انه ضريرة

_________________

يالتدري احب وياك اسهر ليلي ما نامة
وهسه ويل غرب ضليت الملم وحدي بيتامة
وراسك ليش اشوفنة برمح ما ﻻبس عمامة
و زينب يا بعد زينب فرو بيهه جم ديرة

_________________

الناكة الهزلة يبن امي ما متعودة عليهه
تقبلون شعجب يحسين غريب الناكة يحديهه
و الحرمة البﻻ وليان الزلم يا خوية توليهه
واني ادري الشمر يحسين ابد ماعندة كل غيرة

_________________

لو رحت وعفت زينب تدخل باجر بديوان
ال ماعندي رحم ذرة يضحك كام ابن مرجان
شسوي وعندي بس عليل واني مكفلة بنسوان
و طبت مجلس عليه و الله يخوتي جبيرة

خادم خدام زينب ع
حميد كاظم الشمري

(استشهاد الامام الهادي ع)


عمري كله اتاملت وصيتي يبني لو متت
تقره يم گبري ردت زيارة حسين
*
يالحسن كل عمري چنت انا انتظر
تقره يمي ازيارته من احتظر
باخر انفاسي تمنيت اشكثر
الفظ اسم حسين ونزل للگبر

هلله هلله اوصيتي شمحله تخلص دنيتي
يبني تدري بغايتي زيارة حسين
*
لا يهمك سمي بويه اتحمله
لا تشغلك يالحسن هل مساله
يبني جسمي لو بديت اتغسله
طش عليه يوليدي تربة كربله

يبني كلشي متضح تربته تهيد الجرح
هيچي موته ما تصح زيارة حسين
*
عالچفن يوليدي ارسم صورته
وكتب اسم حسين يبني وغربته
والسلام اعله العيال اوشيبته
وعل كفيل المنه طاحت رايته

دمعة عيونك حبر اكتب اسم ام الخدر
عمتي وصت باليسر زيارة حسين
*
بويه نعشي لو بديت اتشيعه
الحالي جفنك لا يهل كل مدمعه
سلم اعله حسين وذكر مصرعه
انا اريدن جسمي هيچ اتودعه

إبچي مكسور الضلع العترب ظل منصرع
يبني اقره اويه الدمع زيارة حسين
*
ألهج اسمه كل حياتي تعودت
نافله ابين الصلاة اقراء چنت
من يغطيني الترب وتأكدت
بويه لقني بحروفه لو گمت

بسمه يتلاله الگبر الشده تتحول يسر
بلحدي شمعه تستقر زيارة حسين
*

الشاعر اياد الديراوي

ذكرى وفاة السيدة زينب عليها السلام

وَدَّعنـاهـــا ـــــــ وَدَّعنـاهــــا
عبـــاس اختـــك ودعناهـــا

عبــاس وهالصرخـه اسمعها
ولــزينـب جينـــا انودعهـــا
نعــرف حاضـــر واتشيعهــا
حاشــاك الاختــك تنساهـــا

وَدَّعنـاهـــا ـــــــ وَدَّعنـاهـــا
عبـــاس اختــك ودعناهـــا

ما غيــرك بس انت الكافـل
واتشيع اختك يا بو فاضل
و المدمع من عينك هامل
اختـــك جتـــك واتلگاهـــا

وَدَّعنـاهـــا ـــــــ وَدَّعنـاهـــا
عبـــاس اختـــك ودعناهــا

وفـــاي ومــا يتــرك اختــه
يعــرف هــذا اليــوم اوَّكته
يذكــر يـــوم لزينب جتـــه
طايـح وأخته اعليه افياها

وَدَّعنـاهـــا ـــــــ وَدَّعنـاهـــا
عبــاس اختـــك ودعناهـــا

مـــا ينساهــا بيـوم الشــده
عبـــاس المعـــروف بوعده
نعش الحــره بلوعه يوسده
املاك اتعينـــه او واراهــــا

وَدَّعنـاهـــا ـــــــ وَدَّعنـاهــا
عبــــاس اختــك ودعناهـا

ماتــت وسفه بديـرة غربه
عاشت بيهـا ايــام الصعبه
راعــي الغيره ليـوم بگربه
مرقــدها وحاضـر وياهـا

وَدَّعنـاهــا ـــــــ وَدَّعنـاهـــا
عبـــاس اختــك ودعناهــا

جينه انعزي اليوم الضيغم
عباس انت اتشوف وتعلم
نبچي لزينب ننعى ونلطم
حاشــا ينسانــه وحاشاها

وَدَّعنـاهــا ـــــــ وَدَّعنـاهــا
عبــاس اختــك ودعناهــا

رايـــة احزانــــچ مرفوعه
والشيعة بفگدچ مفجوعه
واويلي لصرخه لمسموعه
تسمعهــا وتعرف معناهــا

وَدَّعنـاهــا ــــــ وَدَّعنـاهــا
عبـــاس اختـك ودعناهـا

كلمات عمار الراشدي

ذكرى وفاة السيدة زينب عليها السلام

طَبَّــت الديـــوان بنــــت الطـاهــره
شلـون موقــف هـذا يصعب منظره

دخلــت لديــوان اميّــه بـت علــــي
ابسكتـه مـن العيـن مدمعهـا ايهلـي
اتسولـف اويــه الروح وينــه كافلي
شوف حــال اختــك يسبع الگنطره

آنــه حتـى اخيالـي ماشافه الضوه
ويستحــي منـي اذا مرنــي الهـوى
اختلفـت ايامــي لَمَـن طـاح اللــوه
عگـب چــف راعِـيَّـه لَنّـي اميسـره

شوف حالي خويه عگبك يالعجيد
حــال حرمــه وعنهــا واليهــا بعيد
هذي مو عالبال اطـب گصره يزيد
وادخــل لديـــوان اميّــه الفاجــره

تنظر عيـون الشماتــه اعلـه الحرم
وآنــه بگليبـــي تشــب نــار الألــم
ريــت يــا عبــاس يمـــي يـا شهم
تشوف بينا اشصار خويه والجـره

ويــن ودانــي الزمــن ويــن المآل
بيــن هـالظــلام واشبـــاه الرجـال
راحــت أيـــام الهنـا وعـــز الدلال
لاچــن الحــره أظــل بــت حيدره

يا يزيــد الطاغيـــه جمعـــك بـدد
واشتظــن اتعيـــش عمــرك للابـد
واهــــم وأيـــــام دنياتــــك عـدد
فعلـك العمـــرك يطاغـــي گصَّــرَه

تبقى إلنـه الرفعه والعـز والخلـود
وكل زمن ذكرانه عالعالـم يســود
نبقى ما طال الدهر قلعـة صمـود
والنـه وگفــه اويـاك يـوم الآخـره


كلمات عمار الراشدي

الشام غربه وانه تكتل غربتي
ماكو بيها بس عذابي وحيرتي
الكربله كل ساع احن بيها ياريت اندفن
***************
مصيبوبه متعوبه اشحصلت من هالعمر
احلامي وايامي ضاعت بدرب اليسر

درب الشام تعبني وهدم حيلي
ابجي اعله المشو والناكه تبجيلي
شمسويه يدنيه وياج كليلي
من اخواني محد ضل يفيلي

اصعب ايام بالخرابه من بتت
عكب اخوتي والله دولبني الوكت
بيدي الاحبال واون بيها ياريت اندفن
****************
مهظومه ومالومه ودمعتي اعله الخد تهل
شتموني وضربوني وانه بجفوفي الحبل

اطب سوك العبيد بيا وكت ياناس
وكلها تصيح زينب هاي اخت عباس
من حجي الشماته دنكيت الراس
ميته ولا طفل كدام عيني انجاس

حته صارت اوجوهنه بلون العبي
ابنيه عدنه ماتت بدرب السبي
شيبت من الحزن بيها ياريت اندفن
*****************
بهالديره جم حيره بيها يا عالم شفت
اتأثر وتحسر من اذكرنه الطشت

حسبالي رقيه امن التعب نامت
ما حسبالي هيج اعله الطشت ماتت
ما شايفتك امنهد الخيم كالت
اشعجب بويه عفتني وفركتك طالت

مره وحده اظن شفتك عالرمح
أي ذكرتك وانه حسبالي الصبح
توجع اصياط المتن بيه ياريت اندفن
****************
اتألم ونزف دم لمن اذكر كربله
لا والي يبرالي وانه جنت امدلله

شفت حسين بالخيل انسحك صدره
والمثلث طلع يابويه من ضهره
لزم راسه الشمر وبسيفه حز نحره
وضل ياهو اليجي من عدهم ايطبره

انضر الكوم كلهم اعله حسين اجو
وفوك الارماح براس اخيي هوسو
وكربله منها شضن بيها ياريت اندفن
*******************


اهاتي وشوغاتي بيها جمره امن الخيم
يحضرني ويمرني انتظر راعي العلم

ردت عباس اخر لحضه اشوفنه
رحمه اعله الحليب الي رضعه منه
يودعني ردت وبدمعي اودعنه
عليه الفاتحه يقراها اريدنه

ردته جناز وبيه يمشي للكبر
وكل اخوته اعليه يبجون اشكثر
الكاع المتعبه الجفن بيها ياريت اندفن
********************
تمت
تحسين الخفاجي

شوط كربلائي

أزور السيدة الحوراء زياره من گلب والسان
بزيارتها الجرح يكتب حزنها اعله الزمن سلطان

**

توضيت بنهر جاري اوتعطرت بشذى العنبر
قبل لا انوي الزياره اعلى خدي المدمع اطشر
الزياره الما ترد الروح مِثل اليبرد امن الحر !

ازور الطاهره بواهس
من طب للحرب عابس
انافس كلمن اينافس

الحَمد لله اعله نعمتها بزيارتها الاجر طوفان

**

مِنَ اتوجه لمرقدها اشوفن بس مصيبتها
أرتل سورة الغربه واهيم بدرب غربتها
انوح او ألطم اجروحي إذا لاحتلي قبتها

وسف هيبتنه تتغرب
وعليها ابن الخنه يگرب
يريت انسب ولا تنسب

ويريت اتگطعت روحي ولا زينب تشوف أحزان

**

سلام الله اعلى اهل زينب وسلام الله اعلى طاريها
منْ شيعي يدگ عالراس إذا يسمع نواعيها
وسلام الله اعلى كل انسان عقد مجلس يواسيها

وسلام الله على الخدام
شما مرت عَلينه اعوام
قَبرها ايظل شَمس بالشام

يشع نوره اعلى دنيانه نوره من العلي الرحمان

**

اطوف او أقره بالمقتل مِنْ ظلت بلا خيمه
وكت ام الخدر ياناس تمشي ابوحشة الهيمه
سلام الله اعلى خاطرها الفلا شايف مثل ضيمه

ضيم الما تحمله اجبال
بعد احسين والكفال
صارت خيمه للاطفال

وسلام الله اعلى كل خطوه مشتها الخاطر العطشان

**

كل ما اقبل الشباك اشوفن طفها كدامي
اشوفنها بسمه احساسي تبوس المنحر الدامي
اذوب امن الحزن واحتار وارد ألتم جرح ضامي

المصايب كلها عاشتها
امن المولد لغربتها
مصيبة امها واخوتها

ومصيبة والد المذهب عليها ينزف الوجدان

**

قبل لا اختم ادعيلك الله يعجل بثارك
تدري باليصير اوصار يمته اتسله فقارك
يمهدي العالم ايندبك تعال واحنه خطارك

تعال وفرح الزهره
واجبر خاطر العتره
الگسر بس انت الجبره

يمهدي ابصوتك المملوح اشتهينه نسمع الاذان

**

سليم الغزالي

https://www.tg-me.com/saleemalghazalii

أه الشام
ابوذيه

بـكـيـف الـحـادي والـحـادي.. هُوه الشام
وصـلـتـه وشـگـگ الــــريّــه.. هَوه الشام
اوصـفـه شـلـون مــــا أدري.. هوه الشام

حـچـي وحـجـار ضـل يــرمــي عــلــيــه

              *---------------*----------------*

✍بقلم خادم الحسين ع
الشاعر رعد الجربخي

جفن الناگه ضل ينزف .. ويهلاي
عَلي وتوادعت غصباً .. ويهلاي
ماخليت صد واحد ... ويهلاي

على الناگه وستر سويت أديه
*-------------------*-----------------*

چفوف الدهر چفي .... لونه
وون الدوح لحبابي ... لونه
يسمع صوتي ابو الغيره ...لونه

أفزعنه على العالو عليه
*--------------------*----------------*
✍بقلم خادم السيده زينب ع
الشاعر رعد الجريخي

ابوذيه
على لسان السيده زينب ع


اضـلال شلون أحـط لحسين.. وذره
ونثر جسمه السحگ يـانـاس.. وذره
مـن صـدره هـدتـلـي الخـيـل.. وذره

بـحـوافـرهـن ركـض جـابـنـهـه إلـيـه

*----------------*---------------*
✍بقلم خادم الحسين ع
الشاعر رعد الجريخي

معاني الجناسات
*الجناس الاول يعني الفي والسد
*الجناس الثاني يعني السحك وزع جسم الحسين وذراه
*الجناس الثالث يعني الخيل بحوافرهه جابتلي جزئ من صدر الحسين ع

احنه مو مــوسى اذا انته الخضر
نستطيع ويــــاك يالمـــوت الصبر
رافضيــه الرايه
كاظميــه الغايه
والجسر موعدنا ما عدنا عذر
****
اسأل الكلفـــات عن الرافضيـــه
ها يموت وشوفنــــه بوكت المنيه
التسعه گالوا الهم العاشر ضحيه
گلنا عشرتنه فــــداء ابن الزچيه
هذا مو تاريــــــخ خطه الطبري
فتوى مصدرها الامام العسكري
واحنه نمشي برايه
كاظميه الغايه
والجسر موعدنا ما عدنه عذر
*
تخرق برايك سفينـــه ما نسـألك
ليش تقتل طفل امــــــن ما نگلك
تعدل الحايط تطيّحــــه هذا شغلك
ألا تمنعنه الزيــــــاره ما نحملك
وكت كل خوف اللجأ الها امن
ولا رشيد اليظن يمنعنه سجن
عالوعد مشايه
كاظميه الغايه
والجسر موعدنا ما عدنه عذر
*
لو تصير الدنيا كلها سجن سندي
صيحة الزوار تصبح هاي عندي
ها هنا جندك يبو صالــح المهدي
والاوامر ما يناقش بيهــــا جندي
اختبار الطاعه مو وكت اليسر
جرب جنوده وكت هذا العسر
وانظر الوفايه
كاظميه الغايه
والجسر موعدنا ماعدنه عذر
****
صيح حيهم تسمع الكل صوت زاير
سَتجدني ان شاء الله يا موت صابر
اخذ لليمنى نجـــي باليسره باچر
تسقط الايدين والتحيـــــا الشعائر
واسأل السياف ويگلك ترى
على گطع ارگابهم لزموا سره
للمنيه حچايه
كاظميه الغايه
والجسر موعدنا ما نقبل عذر
****
رجبيه وبيهـــــا حتماً مانســاوم
تمتلي بينا المواكب والمــــــاتم
واللي ماتلگاه زاير هــذا خــــادم
شبيها دنيانا عدا : موسى الكاظم
بلهفة المخنوكَ نركض للهوه
يا وباء بحضرته وهوه الدوه
نبقى اله شرايه
كاظميه الغايه
والجسر موعدنا ماعدنه عذر
****

يشبّاچ الغريب إبناسـه عـامر
وحياطين السجون أربع مناير
على إعنادك زهيّه
و إسمها الكاظميّه
ـــــــــــــــــــ
چــذب مُلكك سراب و أرضـه صحره
منو الـ تمطرله ناس وگاعه خضره ؟

منو أعتابه إبفخـر تنباس ؟
منو اللّي بصحنه تمطر ناس ؟
بني فاطـم حبلهـا إطويـل
إشگصر چذبت بني العباس

حَلَق ذيچ القيود انحط بدينك
دعاين ياهو أمير و إنته وينـك !
طواميـره البهيّـه
و إسمها الكاظميّه
ـــــــــــــــــــ
واذا حــدر التـراب و يومـه ظلمّه
ذهـب موسـى و أكيد الباري ضمّه

يـ هارون وتعــال إبسـاع
دشوف العمره حدر الگاع
غشيم انته و تِضُمّ النور
دعاين ياهو صيته إنذاع

ويـ غربيلك زغيـر وشمسه الـ أكبر
شفت حجمك يضيع ويْه إبْنَ جَعفَر
الـ قيـوده الأولويه
و إسمها الكاظميّه
ـــــــــــــــــــ
دشوف إبن السوَيد أشسوّه بيهـا
ملاييـن النفـوس إتحِـجْ وليها

وموش كل هارون هارون
يصِح أخّ . و يصِح ملعون
أخو موسى صار إله حزام
وموسى يمك شابع إسجون

شفت موسى الكليم إبظهره واحد
يهارون اللعيــن و إنتــه حــاقد
إشكبرها الموسويّه
و إسمها الكاظميّه
ـــــــــــــــــــ
أمس ذاك الظلام إعيونه خرسّه
شفت ذاك الغريب وشـوفه هسّه

إنته ذاك الـ بالقصر خاف
إبمزبلة تاريخـه ينعـاف
إنتـه موش الباني بغـداد
الكاظم إمن إبعيد ينشاف

اليوصفك بالرشيد ابعقله خِلّه
البلد . بس للغريب وبسمه كِلّه
و قناديله المُضيّه
و إسمها الكاظميّه
ـــــــــــــــــــ
منو الـ حتّه الطيور ابسِدّه تغفه
ابو العقــل الزغيــر الما يعرفه

هسه امير ومن قبل چان
و لا كِل سلطان سلطان
الـ إناء ينضح بالذّي فيه
منو الحط للحاجه بيبان

الأميـر العنـده دين و دينه تاجـه
شفت واحد سجين ويگضي حاجه
أبو الدوّله الخَفِيّه
و إسمها الكاظميّه
ـــــــــــــــــــ

مهدي التقي

لاخر لحظات يتلفت جان
راد امن ايموت يلكاله اخوان
**
اليريد ايموت بالتابوت كلها اتجلب اعياله
والمسموم شفنه اليوم مات ومحد ابحاله
العد راسه تون اخوان صحت يا ناس هنياله
بس موسى ابن جعفر ليش مات ومحد الشاله

صار اصعب ليل ليل الاحزان
راد امن ايموت يلكاله اخوان
**
نحل جسمه وكثر همه وتغير بالسجن لونه
صحت نكبه شنو ذنبه وابن جعفر يسمونه
ليش الكاظم المظلوم محد غمض عيونه
ولا عنده كرابه اللي يشيعونه ويدفنونه

والناعي ايصيح وين الوليان
راد امن ايموت يلكاله اخوان
***


الاخو لو صاح يفرح راح لو شاف اخوته تحضره
بذاك الحال الحمل ينشال ويرتاح اشكد بكبره
مهيوب الوراه خوان ابد ما ينكسر ضهره
بس الكاظم المسموم ما عنده اخو اينضره

ضل يبجي اعليه حته الدفان
راد امن ايموت يلكاله اخوان
***
خلص عمره اشعظم صبره اسنين امن الشمس محروم
بحزانه وبشجانه يدعي للفرج كل يوم
امكيد بالسلاسل ليش صحت واويلي عالمسموم
من الجامعه متعوب وجفوفه تصب ادموم

ما يسمع جان صوت الاذان
راد امن ايموت يلكاله اخوان
***





اشهل حيره ابو الغيره نعشه اعله الجسر مطروح
واحبابه عله امصابه تون اعله النعش وتنوح
تره الكاظم عزيز اهواي وتشيب ابيوتنه امن ايروح
والمجروح كلبه اليوم يحس بلوعة المجروح

من غير جفوف خرسه البيبان
راد امن ايموت يلكاله اخوان
*****
اهاته وحسراته بكل ليله يذبحنه
ابد ما نام والالام يصبحنه ويمسنه
غريب ولا اهل يمه ويحضرون اهله يتمنه
حلات الميت امن ايموت من تسمع وراه ونه

الكاظم من مات بيد السجان
راد امن ايموت يلكاله اخوان
***
تمت
تحسين الخفاجي

يموعود....والدمع ظل ساجم
يموعود..محنه شوف الكاظم
************************
يمتى ثارك يابو صالح ينحسم بالرايه
اتشوف هاي الشيعه يمك سيدي
وفايه
نرتقب واحنه بحضورك روجة المشايه
احنه بالحضره نشوفك ناصب انت اقرايه
يموعود.......والكلب ظل هايم
************************
نشتكيلك يابوصالح من وضعنه الحالي
بجاه ابو طلبه تجينه حسرتي بدلالي
اشكثر ضيم الدنيا شفنه بس حزن يصفالي
بس حلم واحد بقالي والله شاغل بالي

يموعود......والدمع يتزاحم
*************************
بيدك اتذلهم يغايب كلها تحت جدامك
السندي بجفوفك تصفعه ينتظر صمصامك
وياك شدينه حزمنه من تشد احزامك
كل بني العباس ...تخضع سيدي لحكامك
يموعود......نسحك عالظالم
***********************
بالورد تنزل دموعك حمره صارت عينك
من تشوف الكاظم انت سيدي الله يعينك
الهجر ذابحنه يمهدي حسره ليش اسنينك
عالجسر موعدنه صاير جمعته امتانينك

يموعود...... وقعتلك خادم
*************************
بالسجن جدك يعاني شوف حاله
شلونه
والحديد برجله صاير والدمع بعيونه
حيله من السم تهدم حيل غير لونه
باجر السندي بحسابك والتبع هارونه

يموعود.....همه حيل اتراكم
************************
يمه سجلهه الاسامي يدعي الله ايزيده
باجر الزهره تكلك هذا بيتك عيده
ندري يالمهدي التحبه بيدك انت تريده
والله غير الخدمه كلشي بالحشر ميفيده

يموعود.....انت عالحك قائم
************************
تمت بعون الله وبركاته
خادمكم ...يوسف الفتلاوي