Исроил Эронга кенг кўламли ҳужум уюштирди

12 июндан 13 июнга ўтар кечаси соат учда Исроил Эронга ҳужум бошлади. Исроил ҳарбий-ҳаво кучлари Натанз ва Фордодаги уранни бойитиш корхоналари, Кирмоншоҳ ва Ҳуррамободдаги ракета базалари, шунингдек, Теҳрон, Исфаҳон, Табриз ва Эроннинг бошқа йирик шаҳарларига зарбалар берди.

Мўлжал Эрон қуролли кучлари ва Ислом инқилоби қўриқчилари корпуси раҳбарияти, шунингдек, ядро дастури устида ишлаётган олимлар бўлган. Шунингдек, ислом республикаси диний раҳбариятининг кўплаб вакиллари яшайдиган Қум шаҳрига ҳам зарбалар берилди.

Исроил мудофаа кучлари вакили Эфи Дефриннинг айтишича, бу Эрон «ядро қуролига эга бўлишга ҳар қачонгидан ҳам яқинлашгани» билан боғлиқ огоҳлантирувчи ҳужумдир. «Исроил давлатини йўқ қилишни мақсад қилган режимнинг оммавий қирғин қуролига эга бўлишига йўл қўймаймиз», — дея таъкидлади у.

Нетаняҳу Эрон билан уруш узоқ давом этишини таъкидлаб, исроилликларни сабрли бўлишга ва Исроилнинг ғалабасига ишонишга чақирди.

«Биринчи зарба муваффақиятли бўлди, аммо уруш узоқ давом этади, биз ўрганганимиздан узоқроқ. Эрон тўққизта атом бомбаси учун уран тўплаган ва уч йил ичида ўн минг баллистик ракета ишлаб чиқармоқчи эди. Биз бунинг олдини олдик», — деди Исроил бош вазири.

Ислом инқилоби қўриқчилари корпуси (ИИҚК) бош қўмондони Ҳусайн Саламий Исроилнинг Эронга уюштирган кетма-кет авиазарбалари оқибатида ҳалок бўлди, деб хабар бермоқда IRNA Эрон давлат агентлиги.

У билан бирга Эрон қуролли кучлари қўмондони ўринбосари генерал Ғолами Рашид, шунингдек, икки нафар ядрочи олим: физик Муҳаммад Меҳди Теҳранчи ва атом энергияси ташкилоти раҳбари Ферейдун Аббосий Давоний ҳалок бўлгани айтилмоқда.

Шунингдек, тасдиқланмаган маълумотларга кўра, зарбалар чоғида Эрон қуролли кучлари бош штаби бошлиғи Муҳаммад Багерий ҳалок бўлган бўлиши мумкин.

Эрон Исроилнинг ҳужумларига қарши жавоб чоралари аллақачон бошланганини эълон қилди

«Қилинган ҳужум учун ноқонуний Исроил режимини афсуслантиришга қаратилган зарурий чоралар шу ондан бошлаб амалга оширилмоқда. Биз урушни бошлаб берган томон эмасмиз, аммо бу воқеалар тарихининг сўнгги бобини Эрон ёзади», дейилади Эрон ҳукумати баёнотида.

Бу хабарлар фонида Исроилда фавқулодда ҳолат эълон қилинди. Мактаблар, боғчалар, университетлар ва ҳаётий муҳим корхоналардан ташқари бошқа жойлар ишламаяпти. Мамлакат ҳаво ҳудуди ёпиқ. Эрон ҳам ўз ҳаво ҳудудини ёпган.

АҚШ давлат котиби Марко Рубио Исроил Эронга ҳужумни «бир томонлама» амалга оширганини айтди. Бир кун аввал Давлат департаменти Яқин Шарқдаги америкаликларни ўта эҳтиёт бўлишга чақирган эди. Асосий бўлмаган ходимларга минтақадаги Америка элчихоналари ва ҳарбий базаларини тарк этиш буюрилган.

АҚШ Исроилни ҳимоя қилишга тайёр — Трамп

Президент Доналд Трамп АҚШ Эроннинг жавоб зарбаси юз берган тақдирда Исроилни ҳимоя қилишга тайёр эканини билдирди.

Унинг сўзларига кўра, Қўшма Штатлар учун бу воқеаларда “ҳеч қандай кутилмаган ҳолат бўлмаган”, бироқ АҚШ ҳарбий ҳаракатларда иштирок этмаган.

«Эронда ядро бомбаси бўлиши мумкин эмас, биз Теҳрон музокараларга қайтишига умид қиламиз. Эрон раҳбариятдан бир нечта одам ҳалок бўлди», — деди АҚШ президенти.

🔥 @fayzboguz

Эрон Исроил ҳудудидаги нишонларга муваффақиятли зарбалар берилганини маълум қилди

Эрон оқшомда Исроилга уч марта, жами 300 га яқин баллистик ракеталар билан ҳужум қилди. Расмий баёнотга кўра, ракеталар Тел-Авивдаги режалаштирилган мақсадларга — жумладан, ҳарбий базалар ҳамда Мудофаа ва Миллий хавфсизлик вазирликларининг биноларига бориб урилган.

Fox News телеканали эфирида берилган маълумотда келтирилишича, зарбалар Исроил пойтахти марказида жойлашган Қуролли кучлари муассасалари тўпланган стратегик аҳамиятга эга ҳудудга қаратилган.

Бироқ Исроил расмийлари ҳужум натижасида асосан фуқаролик объектлари зарар кўрганини таъкидламоқда. Мамлакат Бош вазири Биньямин Нетаняҳунинг баёнотига кўра, Исроил Эроннинг баллистик ракета захираларининг "салмоқли қисмини" йўқ қилишга эришган.

Эрон Ташқи ишлар вазири Теҳрон АҚШ билан янги музокаралар бўйича маслаҳатлашувлар олиб борганини, бироқ Исроилнинг зарбалари мамлакатни "дипломатик йўлдан чекинишга" мажбур қилганини қайд этди.

🔥@fayzboguz

Эрон ва Исроил ўртасидаги тўқнашувлар давом этмоқда. Бугунгача қайд этилган қўшимча маълумотлар:

▪️ The Jerusalem Post хабарига кўра, Эрон томонидан амалга оширилган ҳужумлар натижасида камида 4 киши ҳалок бўлди, тахминан 70 киши жароҳат олди. Тел-Авив округи қўмондони «зарбалар оқибатида етказилган зарар жуда катта» эканлигини айтмоқда. Зарбалар, шунингдек, Қуддус, Беэр-Шева, Гуш-Дан ва бошқа шаҳарларга йўналтирилган;

▪️ МАГАТЭ раҳбари Рафаэл Гроссининг маълум қилишича, Исроил томонидан нишонга олинган Натанздаги Эрон уран бойитиш заводининг ер усти қисми ва унинг электр инфратузилмаси бутунлай йўқ қилинган;

▪️ Доналд Трамп Эроннинг АҚШ билан музокаралар олиб бораётган барча вакиллари Исроил томонидан йўқ қилинганини таъкидлади;

▪️ Эрон расмийларининг маълум қилишича, кеча амалга оширилган зарбалар 150 дан ортиқ нишонга қаратилган бўлиб, улар орасида F-35, F-16, F-15 қирувчи самолётлари, ёнилғи қуйиш ва транспорт учоқлари жойлашган ҳарбий авиабазалар ҳам бор;

▪️ Эроннинг БМТдаги доимий вакили Исроилнинг ҳаракатларини "уруш эълон қилиш билан баробар" дея баҳолади;

▪️ Исроил ҳарбий-ҳаво кучлари Эроннинг баллистик ракеталари ва уларнинг учириш мажмуаларига зарбалар беришда давом этишини маълум қилди.

🔥@fayzboguz