مو أنت واتوسل بُگاياك
يدري الله بالـ صاير بليّاك
خاب على شوفة وجهك انخاك !
چا وين الـ مسولفهن وياك ؟
يخنگني شوگي الـ ما رضا يفُض
وكلما نگال اسمك اغمُّض
ارد انسى بس الـ ليش تعرُض
وها ، حشا جدامك
صوچ دربي
المشكلة عيونك هنّه هنّه
چا وين وديت المَحنّة ؟

منو يلفظ " فرگتك " من يجيني الليل؟
ثگلة فرگتك ثگل الراء بلساني

اتندمت چي ما حچيت
وبعد شيرجعَة لزمانة ؟
چان من بصفي يگعد
گلبي احسة
يريد يطلع من مَكانة
اني يَمه هواي اضعَف ..
مُمكن توصلوله كل هذا الكلام ؟
والله من دونه احس اللحظة عام
"عيونة اعرف سود هنة
بس يدلن ع السلام "

أَيام البُعِد جِبنَاها صَفنَات
وبيِن أَمالنَه وحِيره أَمُرنهَ
تِجي لو مَاتِجي گَضينهَ الأَيَام
وصِرنَه ويَاهو يِدري شلوُن صِرنَه
صَبُرنَه متِاع صار وبُعدَك بِعيد
وتِجوَع ايَامنَه وتاكُل صَبُرنه
شبَعَد يَـ المَا تُمِر مو كَافي الغِياب؟
صَار هوايَ نِنتَظرَك تُمُرنه
نِذَرناَلك تِجي ونِدعيِلَك تعُود
وعِمَت سِچينهَ وشَيب نِذرِنه
وعلى غِيرَك چِذب مَاتِرهَم الروُح
ومِن غيِرك يِسد حَاجةَ نَظَرنه؟
يَا إِبِن الناس غيِرك مَاكو مَوضوع
هَلبت بِالچِذب شَخصَك ذِكرَنه
نِسوُلِف بيِك لآخِر لحَظَه بِليل
وتِرد من الصُبح تِشغِل فِكرنه
ماعَنت عَليك بسَاعةَ غروب
روحَك وأَشتِهت تِسمَع خبَرنه؟
ياروُح الگَلب ياعِزة الرُوح
يادَمعَاتنَه وهَمنه وسَهرنه
يا أوَل عَهد يا تالي الايام
يالعِبةَ صِبانَه ياَ شيبة كُبرنهَ
شگد قَبلك مِشوا مَاسلَوا الروح
ولا بغِيابهُم كِسروا ضَهرنه
البُعُد نيِران كَبره يبَخر إِلدموع
وبَس يِزود يتبَخر بَصرنه
منِين نجيبّ مِثلَك حتى نِنسَاك؟
ومنو المِثلك يعوَض لو خِسرنه
الشَبه كُل اربعَين حِچايَه تنگال
واذا واحَد يصح چان انتِظَرنه
تعال الجَرح جَنّ ومارِضه يهين
وحچِينه وَيا مَاينفَع عِذرنه
ويشِگ روَحه عَلى طوله وينكِت جروح
وگضِينه خِيوطنَه وَملت ابَرنه
شوَكِت ينَدگ عَلينه ويِفرَح الباب
ويتِرس بيِتنَه وِصوتَك يِسُرنه؟
وِترُد أَنتَ ويجَن الراحَن ويَاك
وتجِيبهَ وياك يَـ المَاخِذ عُمُرنهَ
- جَبار رشيد .

برودگ صاير بكد ضعفي وياك
وأنا شايل حرارة دم هواديد
ازدواجي وفوضويتك ذبحت الشوك
تكص جفوفي وتنزل العناكيد
ورا كل ما كلتلي نطيني كت هاك
لحد ما كام كلبك مدري شيريد
مو بس الحديد يصير مفتاح
الصبر موقف وينعد عل مفاتيح
هلكد ما تروح وترجع وياي
كمت اتذكرك يم المراجيح

ما باوعتني أبد
‏عينك تصد للغرب
‏وانا أنسى أسمي وهلي
‏من أصفن بعينك

أنة شفتك نهِر
والدنيا جانت صيف
ذبيت الهدم ، گلت
أسبح هنانة
بأول غطة الية
وللجرف رديت
لگيت شگد بشِر
جواگ غرگانة
ما إحب النهر بية كثرة اليسبحون
أنة اريد النهِر
سباحة بس أنة !

يبو عيون الفجر گعد العصافير
لتفسر سبب لا تنطي توضيح
و لتيتم قلم من حضن الاوراق
لأن لمّ الشمل ينحسب تسبيح
ب اوراق الضمير امسحها الچفوف
حتى على الشماته تبطل تصيح
البلايه چفوف لتسولفله عالباب
طاري الباب لتظن بالحچي يريح
بمگبرة الصغار البرزخ يصير
من تسولف بطاري المراجيح
عين المختنگ ويَ الهوى تلوب
وعند الشجر عيد بصفنة الريح
واذا خيال لا تصعد على الروج
خيل الروج حدها الجرف و تطيح
هاك اخذ الگلب متروس طعنات
مثل گاع الحرب ميهمه تجريح
و مو كلمن نصاحب هذا محبوب
باچر تنسئل تحتاج الاسباب
اكو صاحب صنم تكفر بملگاه
واكو صاحب تشوفه تگول محراب
من يكثر الدگ هم تعمى الچفوف
وبابك خاف ادگه وچفي ينعاب
بابك ما ادگ مو قصة چفوف
عندي چفوف واكره دگة الباب
بدخانك بعد لتحجب الورود
لأن أي حلو تحجبه يخنگه الحجاب
مدامك عالأرض لا تعشگ الفوگ
مو قصة بعيد وعشگ الغراب
ولتعود عيونك تعشگ الطير
تاني الطير يمكن يطلع غراب

وطگتك هاي البگلبي
وعلي تعور
أحچي وياك
وانتَ تدنگ وتندار ؟
برر ولك
هيَّ الناهبة تبرر

مربوطة روحي بحضرتك
ترضى دخيلك ينولي؟
موش انا الك
موش انت الي؟
وديتلك صوغة العمر
طرزته ياقوت وحلي
ضميت سري بشيمتك
وتريد تسله ، وتنسلي
وانت السند
وانت لخيم شوگي وتد
ماين و ادوس بمشتلك
هم انت دوس بمشتلي؟

بَس بالليّل!
يلتم كِل عَتب روحي
وأغنيلَك
أغني و عَيني تبچيلك
أغني و شوگي ياخَذني
بجدم حَافي لمُواويلك .

شَتريد أعددلك بعد؟
كَم مرة شابع بچي
ولو أشوفك أضحكلك!
الحُراس تغفى ولك
وأنه أسهر أكتبلك
تحلفني وأني الچنت
بعيونك أحلفلك؟
ألمن أسولف حَرت
متعلم أنه چنت
بس أنتَ أسولفلك

اسف على إزعاجَك
زَعلان عَنك رِحت بَس لِسة مِحتاجَك
بكِل ذكرىٰ ألك أنسِجن وأتامَل أفراجَك
ما بَينت مِنكسر و مَثلت دور النَصر
بَس المَسارح إلك والمَشهد أخراجَك
كِلش عَليك العَتَب ..
چا غير مِن هَدمت بأحلامنة تشَيّد ؟
غير إنتَ غالي عَليّ !
ومِن چنت أكثر العَتب چي بس هالوحَيد!
ما تنعبر شارتَك، شارتك ما تِنخطي
غيرك شگد جَربت ..
بس مافِلحت بعِشگ
عِندك بَخت سَيد.

المهم هسه انا بعد
ماريد منك ترجع
جنت بغيابك أنعزل
بس هسة راجعلي الخلك
صاير أعاشر و أطلع
صح باقي ليهسه اختنك
بس بعد ما ينزل دمع
لمن اخبارك أسمع
وصاير شويه اتحمل
وكمت أقتنع ابقى بنقص
مو الا وياك اكمل

مگابل صَورتك والحَيرة تحچي اشكال

گبعت الشمس من گتلي أريد فياي
ونزلت العنب من گتلي ما ألوحة
بأفراحك أشر سنوني للدَفان
ولو ضاگ خلگك تلگاني مرجوحة
دَللتلك يِتيِم نريد ينسى الراح
بعزاي اضحكله حتى يقلل بنوحه
على عناد الخطر ماشي الحرب وياك
وي جرت السيوف الروح مذبوحة
خايب كاتلها الفضول مركزة بيه الناس
جثة شگد عليه عيون مشبوحة
ومن دون البشر تضحك وبستهزاء
وتهز ايدك وتدري بدمع مسبوحة.

كَصه بيه الوكت وتنطر تعود
انا اخرس والوكت يرادله صياح
الحزن ماعنده غيري توالف وياي
الفرح خطار مرني ومن وكَت راح
يخاين بس احبك من يجي الليل
استلذ من كون اخلصه بهمك نياح
براسي كليب طايح وادري بيه وين
وراسك ماعرفته بيا متن طاح
الكبل لاحت سما من نومت عليك
ابشرك صار حدها الكض الاصفاح
اذا يوم شتهيت محاضن وياي
تحاذر لاتخجل جفوفوك رماح
وحكَي من اكول هواي تعبان
هوه العنده مثلك وين يرتاح

أجيت تگضي وكتك ما أجيت تحب
وأعرفنك وصدگك بل حچي تچذب
لو وياي كلك لو بعض ما ريد
أنه برزق وادم غربه ما چلب
ماعفتك تنام وانته ما مرتاح
وتنيمني بسوالف نار بيه تشب
چنت ما أشتكيلك خاف اغثك يوم
حنين وما اهون دمعتك تسجب
تجازيني بهجر وحجايت المو خوش
تعال عله الجروح حساب خل نحسب
الاكيك بربيع وكل بلابل شوك
وتلاكيني بخريفك وألهوا ألمغضب
وأجيك بيا هله وبعتاب من تغيب
وأنه سنين أغيب وچلمه ما نعتب