باجر يفرغ الباكيت والماعون
دورلك شريف يداين المديون
جاي اخذ نفس مادري وين يروح
وصلت للنفس واخواني مايدرون

اله انَشِف ماي اصابيعَك
واخليها اتراعَش مِن كِثُر دَكها اعلى بابي
اله اضوگَك ذِلَة المَلاچ مِن يصير راعي
اله اخَليك بمكاني المالَه داعي
اله ارِدَك عَ الهدوم الشابگك
بيهِن تَدور خانه خانه !
اله اخَليك اتصفَن بالوجوه
التِمشي يَمَك كِلها تتراولك انه
انتَ ياهو ؟
وهذا ياهو الگالك روحي ذليلة ؟
خاف حسبالَك صِرت فوگ ورَهيت !
انه روحي اعنادها عناد الفِسيلة !
الظاهِر انتَ لهَسه ماتعرُف شأريد
ولا مفَكِر تفتهمني
واني اوَل ماعرَفتَك كِتلك حچاياتي ذَني
حِطلي فوگ متوني ضَيم اهِل العراق
وحطِلي كاع الله وسماها ومايهمني
ولا تحِط يَمي بَشر ما يفتهمني !
خاف گالولك عَلى گَلبي حنين
تَرا هذا الگالَك مَطرود گَبلك
لا تفَكِر تستغِلني
ولا تتانيني ارجَع ومِن هَسه اگِلَك
مايردلَك لا تصيح بظَهرَه
المحَمل غَراضه وتَوة شايل
الواصِل لمَرحَلة يشَگِكله قَصيدة
لا توَديله رسايل
عِد اليشگ القَصيدة يجوز تِنداس الرِسايل
"زَعلي هَالمره ثِكيل"
لا توَديلي غَريب اعلى المراضَه ولا گَرايب
"اني مِنَك ما رضيت"
المَن موَدي الغَريب يصالحَك وياي خايب ؟
رَخصت روحَك وِلَك !
اغلَه لا ينگال عَني چان عاشِگله رِخيص .

- مرتضى مطشر

اذكرها اخر شوفة الك ؟
من گتلك شمالك عليّ
ماجاوبت چنك ولا سامعني
من عدها فز گلبي وخفت
سديت عيني وفتحت
نفس الوجه !
وجهك وجه بايعني
والله وكت ، اندارلك من كل درب
وعيونك تضيعني .

كان من الممكن أن ألجأ إليكَ
في ليلة أرق كهذه
لتخبرني أنهُ لا داعي للخوف
وان ما كسر يمكن إصلاحه
أو ربما تعويضه بأشياء جديدة تماماً
فأطمئن أكثر
ويعود كلانا إلى النوم
شاعرين بسخافة ما يحدث في العالم
لأننا معاً
لكن الحياة ليست بهذه البساطة !

يجي وكت العتب
وأتعاتب وياك
وأخليهن كبال عينك
وحدة وحدة
أجرح بالعتب ما تجرح بسيف
لأن جرح العتب محد يضمده
مو كتلك ترااا الدنيا دولاب ؟
إذا فترت عكس حيلك تهده .

ردتِك بأخرَ دقيقِة تگليُ " أحبچَ "
تگليُ عوفِي الدنيَا كُلها بسِ ضمَيني يمِچ
رايَد تلمِيني بأيَدج
حَلمي ضلمِة وأگعَد بنصَ ليلِي أريدچَ
أبقِي يمَي
خِايف تضيعَين مِني شلوُن أجًيبچ
أيدِي چَانت تنتظِر أيَدك تضمِني
وسَكتة مِنك وسَكتة مِني
وهَيچ قصِتنا انگضَت
لا گدرنِا النحچَي بينِة وَلا سوالفِنا الحچَت

لكيتك وشلكيت وياك
رب الشوك واسراري
اجيت من الضياع
لبيتك التعبان بعيوني
الدمع والمغرب وملگاك والطاري
اجيت ابابك وضليت للنسيان
كل اوراقي محترگه على چف ناري
انا الحرمان خلاني غصن ذبلان خلاني
حاولت شكد بس ما كدرت انساك
بيك وجوه خلاني

ما چنت اظن أشرب خمر
چي فارگتني وناسي
صدگني من أشرب خمر
جايب صورك حتى اصعده براسي
ذني السوالف مو إلي
بس انت تدري بروحتك
مدمر انه احساسي
صدگني مو اهلي الاجو
شمات اجتني تواسي

الخلل بيه عفتني وماعرفت انساك
لا والله من الأول ماعرفت أهوه
ماترهملي صاحب مو حبيب تصير
بس ترهم بن آدم يوكَع ابلوه
مو بحجارة ربك يضرب بمحبوب
يحط روحك بواحد دمعة مايسوه
جنت ماعندي شي وتصيحلي ومآجيك
وتتوسل جبتها فدوة ما فدوة
عفتني والله نكتة تموت من النوح
بقيت أضحك وأون من كثر ماحلوة
هسه انت رحت طيرة وخذتها الريح
قلبي شبي بدونك ماعرف يروه
أعاشر غيرك وأطلع وأطب وأشتاكَـ
ماكَلك وفه بس روحي محرومه
شفت الأحلى منك والأحب والزين
واهتموا بروحي وبقت مهمومة
ثاري العشكَـ موش تكَلب وتختار
مثل الموت هم كل واحد بيومه
التجارب فشلن وسميتهن نزوه
ردت ارهم لغيرك لجن مو كَوة
مو كل حسره تعرف قيمة الدخان
الجكَارة بشفة المرتاح مو حلوة
آنا وياك ام وأبن بس مو زين
أحن غصباً عليّ وتشح بالمروه
يذآك الـ بالسجن من تطلع افرح بيك
يجي الليل وتجي هم ذآبني ابلوه
انا مقيمك غلط والغير ما الومه
كَالوا مبتسم من كَلت شعلومه
فرحانين لك وانا ابجي ختيلان
مثل وحده بعرس صاحبها معزومه
كَطعت وياي أذا بالطيف أجيك تكَوم
تفز فزة الشاف جنازته بنومه
بعده أخضر فراكَك والشمس بت غيم
والخليته ذاك ، ذاك المبلله هدومه
شطلع بيه وعليك فراكَي مر نشوه
وانا من اسبوع بأيامك جنت لكَوة
استشعرت الكرم بيه ولزمت الباب
مشاعر قلبي امس جديتهن جدوه
وجاملتك حضن كَد ماصحت بردان
بس حضنيش صدري بصدرك تّجوة
هسه ازعل وما تهتم
وانا من ايام اذا ماارضه تنطي شفايفك رشوه
وهي خلصت وبعده الشوكَـ ماخلصان
غيب وعود تلكَة المايريدك حان
كَالوا الينسي اليبتعد بس لتخاف
أديّ تهوه المكَاود ماتهز فنجان
طري ، طري وجهي وبعده بي للمعاتب ماي
خاف تريد نتحاسب منو الغلطان
مشكلتك تحب بس اكثر من اثنين
ومشكلتي من احب من قلبي اصير انسان
وهذني جفوفي مارافعهن بدعوة
اعله واحد عافني ادري الخسر هوه
طيب واليضوك سوالفي ميخون
على اهل الشوكَـ نسمه وللربع خوه
امي بروحها تنست لمن ماجيت
وموش بجلدي صارت بالقلب نِسوه
وشنو الماخسرته ورايد اربح بيك
انا الشاطر المانصبوه قدوة
ومو شرط التعب بأنسان حصته يصير
الأسد حصته الزند والركض للبوه
هاي الدنيا مدري انت المهم تهون
صفه الشط صاحبي كَد ماكَلت فدوة

ليِش تخَسر مَثلي وَاحد
هَامِل الدنيَا وَيجيك
انَسان مِن تُوگع بشدَه
يعَينك أكثَر مِن أديَك
انسَان چَان يِبيع رُوحَه
ويشتَري الترهَم عَليك

برد نعسان
وآنت آوياي والصفنات
مدري آشلون آوج نوبات
مدري آشلون آسولف والدفو يزعل
وآندم وآستحي مني
كبل ما أستحي منك
اتوسل آدموعي آيدفّن آجفوفك
وآبجي وتصعد لعيني أصابيعك
اكَلادة بوس ،
ولا شيك وترد دافي وسوه نبرد
برد نعسان ، كلّش حار
وآكلّك بُْردَت آعذرني
الحجي نوبات يزهك لا تواخذني ،
ماشيني على النيّات
هذا آنا على نيتي
عسل برحي وضوه آمرايات
بعدني آمشمّس ومعسول ، لا تزعل
الزعل يحبيّب آيعطش خضار الروح
بعدني آبيض مثلما جنت بيد الله
بعد بيّه حليب آمي ضوه آمرايات ،
وجروفي زلال الماي
ولجل آشفايفك يغسل بروحه الماي

توها بردت وانتِ مريتي رصاصهَ

خايف أتلگاك يم حزني غريب
خايف عيونك تچملني نحيب
خايف من الناس
من الما بقى يمهم حبيب
لا تهدني..
الوَطن حيطانه بعيدة وما يلمّ الينتچي
آنه من تغيب،
يستفحل على عيوني البچي
يا حبيبي..
شلون لو شَحت مكاتيبك عليه؟
الغيم ما يودي حچي
يا حبيبي..
تراب الولاية حزين بغير جدمك
والضباب شما ترسني وتيهتني ألگاني يمك
چنت أظنّ يگودني الشباچ لچفوفك وألزمك
لا تروح الدنيا مو مثلي تبچيني وأرسمك
آنه بدموعي أرسمك

انه كلمة
رادو يكولوها غيرك
ومن صرتلك ما كلتني
طَرزت طولك قصايد
احب وأشتاگ بقصايد
ازعل عتابي قصايد
لا عرفت أصرخ بعينك
لا عرفت
بزعلي أكلك
لا عرفت أعتب
على حساسك وأجرحك
وهذا حالي
تبيعني
ويشتري چفوفي القلق
واسهر واكتبك
ولا وجع جابك
ولا هاي القصيدة تجيب طولك
وداعت أسمك
جنت أظن آخر قصيدة وياك
ما يوصل وكتها
وانت العلمتني وعودتني
وكَتبتها ..

قصتك عيشتني اشياء
‏متوقعت يوم تصير
‏تنام انتَ واظل سهران
‏واكضي الليل بس تفكير
‏اخاف اغفى وشخص كبلي
‏الصبح من تكعد يكلك
‏"صباح الخير"
‏وهاي الشغله اذتني
‏صوره وبيها نضحك ليش
‏بچتني؟
‏وصدمتني نهايتنا
‏الغلط چان بعلاقتنه
علاقتنه

أشتل جماجم بالدرب
و أشلاء من كل حرب
و أطفال مذبوحة
تيزاب ارش من كل كتر
أحرك جدامك من تمر
فنك دياري تزورها

واحرث گاع عينك وازرع النوم
البالي الك محد يطوله
ولا صغر نفس وبروحك تلوم
اذا گالو نجم گلهم ننوله
النسر بليل يحسد طيرة البوم
السهم يكتل رغم شدة نحوله
شعر راسك طويل مغطي الزنود
الرمش مابي قليل وحافظ العين

حَبيت و بعد
خَلي الظلام يزود
شما تِكبر الظلمة
أذكر عِيونك سُود
هوَ العنده
مِثل عيونك شمحلاه
ضگت خَدك
و عِفت العَنب و العَنگود .

كون المفارك حبيبه يرد عليل
ونبض كلبه يسولف الصار بجفاه
وكلمن يحب من طرف ولفه يجي
بوجهة يترس حيرته وتمطر سماه
حضنة العشاك مابيها حرام
اليحب من محبوبته يفصل غطاه
وكون المسافر نفس ميشم غريب
متاع للغربة اليحب ياخذ ثواب
من تراب ولايته شيوصله خير
بروحه يندهه كل صبح بالغربة تاه
ولا جفن سهران يبقى يتاني طيف
الليل مالح والجرح وجهة وكفاه
اليحب من طرف واحد ما يكفي ليل
رمشة بكل حلم من يخطف يشده
العاشك يختنك لو طاري فركة يفوت
الهوى الما مر حبيبه بريته يرده

خلنام بحضنك آبقى
باردة الدنيا بدونك
والشوارع كُلها مليانة ازدحام
والله هيچ ايام حُضنك
عندي اهم من الدوام